Leksiyon 17: Doktrina ug mga Pakigsaad 6-9

Doktrina ug mga Pakigsaad 6

“Paghunahuna ngari Kanako sa Matag Hunahuna; Ayaw Pagduha-duha, Ayaw Kahadlok”

Niadtong Abril 5, 1829, nahimamat ni Oliver Cowdery si Joseph Smith sa unang higayon. Paglabay sa duha ka adlaw, nahimo siyang tigsulat ni Joseph alang sa paghubad sa Basahon ni Mormon. Ang Doktrina ug mga Pakigsaad 6 naglakip sa tambag gikan sa Ginoo nga nagtubag sa daghang mga pangutana ug kabalaka ni Oliver mahitungod sa pag-apil sa buhat sa Ginoo. Kini nga leksiyon gituyo aron matabangan ang mga estudyante nga mosalig sa Manluluwas sa higayon nga mag-atubang sila og mga pagduha-duha ug mga kahadlok.

Posibleng mga Kalihokan sa Pagkat-on

Mga pagduha-duha ug mga kahadlok

Ikonsiderar ang pagsulat sa mosunod nga pangutana diha sa pisara ug dapita ang mga estudyante sa pagsulat sa ilang mga tubag sa ubos niini. Mahimo kining buhaton sa dili pa magsugod ang klase o sa pagsugod sa leksiyon.

• Unsa ang pipila ka mga kahadlok, mga pagduha-duha, o mga kabalaka nga mahimong aduna ang mga tin-edyer?

Human mahisgoti ang miaging pangutana, dapita ang mga estudyante sa paghunahuna mahitungod sa mga kahadlok, mga pagduha-duha, o mga kabalaka nga tingali anaa sila diha sa ilang kaugalingong mga kinabuhi. Ipasabot nga ang Doktrina ug mga Pakigsaad 6 naglakip og mga kamatuoran nga makatabang kanila atol niana nga mga panahon. Dapita ang mga estudyante sa pagpangita niini nga mga kamatuoran samtang magtuon sila.

Si Oliver Cowdery nagsugod sa pagtabang kang Joseph Smith

Ipasabot nga ang Doktrina ug mga Pakigsaad 6 naglakip sa pagpadayag nga gihatag ngadto ni Oliver Cowdery. Aron matabangan ang mga estudyante nga makasabot kon sa unsang paagi unang nahimamat ni Oliver si Joseph Smith, mahimo nimong ipakita ang bidyo nga “Days of Harmony” gikan sa time code 3:07 hangtod sa 7:18. Kini nga bidyo anaa sa ChurchofJesusChrist.org. Sa laing paagi, mahimong basahon sa klase ang Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018) gikan sa mga pahina 65–67, o mahimo nimong ipamubo ang mosunod nga parapo.

Si Oliver Cowdery usa ka magtutudlo sa eskwelahan kinsa misugod sa pagpuyo uban sa mga ginikanan ni Joseph Smith sa tinglarag niadtong 1828. Samtang nagpuyo uban ang pamilyang Smith, nahibaloan ni Oliver ang mahitungod sa balaang tawag ni Joseph ug ang nagpadayon nga paghubad sa Basahon ni Mormon. Naaghat si Oliver sa pagpangutana kon mahimo ba siyang makatabang ni Joseph sa paghubad. Sa tingpamulak niadtong 1829, giubanan ni Oliver ang igsoong lalaki ni Joseph nga si Samuel ngadto sa Harmony, Pennsylvania, aron makigkita sa Propeta sa unang higayon.

• Kon ikaw ang anaa sa sitwasyon ni Oliver Cowdery, unsa nga mga pangutana o mga kabalaka ang tingali anaa kanimo niining panahona?

Wala madugay human maabot sa Harmony, si Oliver nahimong tigsulat ni Joseph Smith. Bisan tuod si Oliver nakadawat na og balaang pagkompirma sa propetikanhong gasa ni Joseph sa paghubad, aduna gihapon siyay mga pangutana mahitungod sa iyang kaugalingong pag-apil sa buhat sa Ginoo. Nadawat ni Joseph Smith ang pagpadayag nga narekord sa Doktrina ug mga Pakigsaad 6 niining panahona.

Pagkaila ug pagsalig sa Manluluwas

Basaha ang Doktrina ug mga Pakigsaad 6:14–24, 32–37, mangita sa pipila ka tambag sa Ginoo ngadto ni Oliver. Hatagi og espesyal nga pagtagad ang unsay gitudlo sa Ginoo mahitungod sa Iyang Kaugalingon nga makatabang kanato sa panahon sa kawalay kasegurohan o kahadlok.

Agi og dugang sa pagbasa niini nga mga bersikulo, mahimo usab nga motan-aw ang mga estudyante sa “Days of Harmony” gikan sa time code 15:02 hangtod sa 17:49.

Aron matabangan ang mga estudyante nga masabtan ang ilang gibasa, ikonsiderar ang pagpakita og hulagway ni Jesukristo diha sa pisara. Kon mailhan sa mga estudyante ang mga pagtulun-an sa Manluluwas gikan niini nga mga bersikulo, mahimo nilang isulat kadto nga mga pagtulun-an palibot sa hulagway diha sa pisara.

• Unsa ang imong nakat-onan mahitungod ni Jesukristo nga makatabang kanimo nga imong ibutang ang imong pagsalig diha Kaniya sa higayon nga ikaw mag-atubang og mga kahadlok, mga pagduha-duha, o mga kabalaka?

• Sa unsa nga paagi kini nga mga kamatuoran mahitungod sa Manluluwas makatabang kanimo atol sa maong mga panahon?

Paghunahuna ngadto kang Jesukristo

Ang Doktrina ug mga Pakigsaad 6:36 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Basaha pag-usab ang Doktrina ug mga Pakigsaad 6:36–37, mangita sa mga pagdapit sa Manluluwas ngadto ni Oliver.

• Unsaon nimo sa pagpamubo sa kamatuoran nga gitudlo diha sa bersikulo 36?

Mahimo nimong hatagan og gibug-aton nga samtang kita naghunahuna ngadto kang Jesukristo, atong mabuntog ang pagduha-duha ug kahadlok.

Unsa sa imong hunahuna ang gipasabot sa paghunahuna ngadto kang Jesukristo sa matag hunahuna?

Aron matabangan ang mga estudyante nga makita ang relasyon tali sa mga pagtulun-an sa Manluluwas diha sa mga bersikulo 36 ug 37, ikonsiderar ang pagpakita sa hulgaway gikan sa sinugdanan sa leksiyon. Ipasabot nga ang pagtan-aw sa usa ka butang nagpasabot sa pagsud-ong ug pagpaniid. Dayon ipangutana ang mosunod:

• Sa imong hunahuna ngano kaha nga ang Manluluwas gusto nga atong “hunahunaon” ang Iyang mga samad? (Doktrina ug mga Pakigsaad 6:37).

• Unsa ang epekto kanato sa paghinumdom sa Iyang Pag-ula ug Pagkabanhaw?

Aron matabangan ang mga estudyante nga mas makasabot kon unsaon nila sa paghunahuna kang Jesukristo, ikonsiderar ang pagpakita sa mosunod nga mga senaryo. Mahimo usab ka nga maghimo og ubang mga senaryo nga may kalabotan sa mga kahimtang sa imong mga estudyante.

Si Anna adunay pipila ka wala matubag nga mga pangutana mahitungod sa ebanghelyo. Usahay mobati siya nga ang iyang pagpamatuod dili igo ang kalig-on aron matabangan siya sa pagbuntog sa iyang mga pagduhaduha.

Si Eric nanglimbasog sa mga pagbati sa bili sa kaugalingon. Wala siya mobati nga adunay nakamatikod kaniya sa eskwelahan.

Ang mga ginikanan ni Sophie naglisod sa paghatag og pinansiyal alang sa ilang pamilya. Nabalaka siya nga basin walay igong kwarta ang iyang mga ginikanan aron matubag ang tanang panginahanglan sa iyang pamilya.

Ikonsiderar ang pagbahin sa mga estudyante ngadto sa gagmay nga mga grupo ug paghatag sa matag grupo og usa sa mga senaryo nga pagatutokan samtang maghisgot sila sa mosunod nga mga pangutana.

• Unsa ang labing menos tulo ka mga paagi nga kining mga tawhana makahunahuna ngadto kang Kristo sa ilang mga sitwasyon?

• Sa unsang paagi nga ang pagbuhat niadtong mga butanga makahimo og kalainan sa kinabuhi niini nga mga indibidwal?

Human magkahisgot ang mga estudyante diha sa ilang mga grupo, dapita sila sa pagpakigbahin sa pipila sa ilang mga tubag ngadto sa klase. Isip kabahin niini nga diskusyon, mahimong makatabang ang pagpangutana sa mga estudyante kon sa unsang paagi ang mga buhat nga ilang nailhan mga ehemplo sa paghunahuna ngadto kang Kristo.

Ikonsiderar usab ang pagdapit sa mga estudyante sa pagpakigbahin og mga ehemplo kon sa unsang paagi sila napanalanginan samtang sila naghunahuna ngadto kang Jesukristo diha sa ilang mga kinabuhi.

Paggamit niini diha sa imong kinabuhi

Aron matabangan ang mga estudyante sa paggamit sa tambag sa Manluluwas sa paghunahuna ngadto Kaniya, dapita sila sa paghunahuna mahitungod sa ilang kaugalingong mga kahadlok, mga pagduhaduha, o mga kabalaka nga ilang nakita sa sinugdanan sa leksiyon. Ipakita ang mosunod nga mga pangutana ug hatagi ang mga estudyante og panahon sa pagtubag niini diha sa ilang mga journal sa pagtuon.

• Unsa ang imong nakat-onan o gibati mahitungod ni Jesukristo karon nga makatabang kanimo sa mga kahadlok, mga pagduhaduha, o mga kabalaka nga anaa kanimo?

• Unsa ang pipila ka piho nga mga paagi nga imong paningkamotan ang paggamit sa tambag sa Manluluwas sa “paghunahuna ngadto [Kaniya] sa matag hunahuna; ayaw pagduha-duha, ayaw kahadlok”?

Isag-ulo

Mahimo nimong tabangan ang mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa Doktrina ug mga Pakigsaad 6:36 ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang tibuok bersikulo: “Paghunahuna ngari kanako sa matag hunahuna; ayaw pagduha-duha, ayaw kahadlok.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsa ang gibati sa Manluluwas kanako bisan pa sa akong mga kabalaka?

Si Elder Dieter F. Uchtdorf sa Korum sa Napulog Duha ka Apostoles mitudlo:

Minahal nga batan-ong mga higala, kon ang Manluluwas ania karon, unsa kaha ang Iyang isulti kaninyo?

Ako nagtuo nga Siya mosugod sa pagpadayag sa Iyang dakong gugma alang kaninyo. Siya mahimong mosulti niini, apan kini usab modagayday pag-ayo—bisan gikan sa Iyang presensiya—nga dili masaypan, kusganon nga mabati gayod ninyo ang Iyang gugma alang kaninyo!

Ug gani, tungod kay kitang tanan huyang ug dili perpekto, tingali kita mabalaka nga dili takos sa iyang gugma. Kamo tingali makahinumdom og mga sayop nga inyong nahimo, mga panahon nga kamo nagpadala sa tintasyon, mga butang nga kamo nanghinaot nga wala unta ninyo buhata—o nanghinaot nga kamo nakahimo unta og mas maayo.

Ang Manluluwas makahibalo niana, ug ako nagtuo nga Siya mosiguro kaninyo uban sa mga pulong nga Iyang gisulti diha sa mga kasulatan:

• “Ayaw kahadlok” [Lucas 5:10; 8:50; 12:7; Doktrina ug mga Pakigsaad 38:15; 50:41; 98:1].

• “Ayaw pagduha-duha” [Doktrina ug mga Pakigsaad 6:36].

• “Pagmaya” [Mateo 14:27; Juan 16:33; Doktrina ug mga Pakigsaad 61:36; 68:6; 78:18].

• “Ayaw kamog kaguol” [Juan 14:1, 27].

(Dieter F. Uchtdorf, “Si Jesukristo Mao ang Kalig-on sa Kabatan-onan,” Liahona, Nob. 2022, 9)

Unsaon nako paghunahuna ngadto kang Kristo sa matag hunahuna?

Si Presidente Henry B. Eyring sa Unang Kapangulohan mitudlo:

Ang paagi aron mahimong positibo sa umaabot gihatag sa Ginoo: “Paghunahuna ngari kanako sa matag hunahuna; ayaw pagduha-duha, ayaw kahadlok” (D&P 6:36). Gisultihan kita ni Presidente Monson unsaon sa pagbuhat niana. Kinahanglan kitang mamalandong ug mogamit sa Basahon ni Mormon ug sa mga pulong sa mga propeta. Pag-ampo kanunay. Pagmatinuohon. Pagserbisyo sa Dios uban sa tibuok natong kasingkasing, gahom, hunahuna, ug kusog. Kinahanglan kitang mag-ampo uban sa tibuok kusog sa atong mga kasingkasing alang sa gasa sa gugmang putli, ang tiunay nga gugma ni Kristo (tan-awa sa Moroni 7:47–48). Ug labaw sa tanan, kinahanglan kita nga mahimong makanunayon ug mapadayonon sa pagsunod sa propetikanhong tambag. (Henry B. Eyring, “Ayaw Kahadlok sa Pagbuhat og Maayo,” Liahona, Nob. 2017, 103)

Si Elder Ulisses Soares sa Korum sa Napulog Duha mipakigbahin:

Ang pagtinguha kang Kristo sa matag hunahuna ug pagsunod Kaniya sa tibuok natong kasingkasing nagkinahanglan nga kita mopahiangay sa atong pangisip ug mga tinguha sa Iya. … Kini nga binuhatan nagpasabot nga kanunay kitang magpakabuhi subay sa ebanghelyo ni Kristo ug motutok matag adlaw sa tanang butang nga maayo. (Ulisses Soares, “Pagtinguha kang Kristo sa Matag Hunahuna,” Liahona, Nob. 2020, 83)

Unsa ang mahitabo kanako kon ako maghunahuna ngadto kang Kristo sa matag hunahuna?

Si Presidente Russell M. Nelson mitudlo:

Kinahanglang lig-on kitang nakatutok sa Manluluwas ug sa Iyang ebanghelyo. Nagkinahanglan og grabeng paningkamot sa pangisip nga motan-aw Kaniya sa matag hunahuna. Apan kon atong buhaton, ang atong mga pagduha-duha ug kahadlok mahanaw. (Russell M. Nelson, “Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 41)

Dugang nga mga Kalihokan sa Pagkat-on

Pagkat-on mahitungod ni Oliver Cowdery

Aron matabangan ang mga estudyante nga makat-on mahitungod sa background ni Oliver Cowdery sa sinugdanan sa leksiyon, ikonsiderar ang paghatag sa mosunod nga mahinungdanon nga mga pulong nga may kalabotan kang Oliver diha sa mga piraso sa papel: magtutudlo, tigsulat, nagpuyo, Harmony, pagduha-duha, kalinaw, ug pag-ampo. Ibutang ang mga piraso sa papel diha sa pisara. Human mabasa ang Mga Santos, 1:65–67, ipamubo sa mga estudyante ang ilang mga nabasa pinaagi sa pagplastar sa mga piraso sa papel sa kronolohikal nga pagkasunod-sunod diha sa pisara. Mahimong ipamubo sa mga estudyante ang unsay ilang nakat-onan.

Mahimo usab nga mobasa og dugang ang mga estudyante mahitungod ni Oliver Cowdery ubos sa “Mga Hisgotanan sa Kasaysayan sa Simbahan” diha sa Gospel Library nga app.

Mga cross-reference ug mga link sa kasulatan

Ikonsiderar ang pagbutang sa mga estudyante diha sa gagmay nga mga grupo ug dapita sila sa paggahin og panahon sa pagpangita og mga kasulatan nga ilang madugang isip mga cross-reference o mga link sa Doktrina ug mga Pakigsaad 6:36. Mahimo nilang pangitaon ang mga pulong sama sa pagsalig, pagduha-duha, ug kahadlok diha sa Giya ngadto sa mga Kasulatan.

Mahimong ipakigbahin sa mga estudyante ang mga kasulatan nga ilang nakaplagan sa ilang mga grupo ug sa klase. Mahimo usab nimo silang dasigon sa pagdugang og mga cross-reference o mga link diha sa ilang mga kasulatan ngadto sa mga tudling nga gipakigbahin sa ilang mga klasmeyt. Sa laing paagi, mahimo nilang ilista ang mga pakisayran diha sa ilang mga journal sa pagtuon.

Mga paghulagway sa kasulatan sa paghunahuna ngadto kang Jesukristo

Aron matabangan ang mga estudyante nga makakita og mga ehemplo gikan sa mga kasulatan nga naghulagway sa paghunahuna ngadto kang Jesukristo ug sa mga panalangin nga moabot gikan sa pagbuhat niini, ikonsiderar ang pagdapit sa mga estudyante sa pagtuon sa Mateo 14:22–32 ug Numeros 21:4–11.

Aron matabangan ang mga estudyante nga mahanduraw ang kasinatian ni Pedro sa Mateo 14, mahimo ninyong tan-awon ang “Wherefore Didst Thou Doubt?” (2:06). Mahimo dayon nimong hisgotan ang kalainan nga nasinati ni Pedro sa dihang siya mihunahuna ngadto kang Kristo ug sa dihang siya mitutok sa pagduha-duha ug kahadlok.

“Pagpuyo diha sa Hugot nga Pagtuo, Dili sa Kahadlok”

Ikonsiderar ang pagpakita sa bidyo nga “Live by Faith, Not by Fear“ (1:09) aron matabangan ang mga estudyante nga makakita ug makabati kon sa unsang paagi ang pagsalig sa Manluluwas makatabang kanila sa pagbuntog sa mga pagduha-duha ug mga kahadlok nga ilang masinati sa ilang mga kinabuhi. Mahimo nimong dapiton ang mga estudyante sa pagpakigbahin sa ilang mga hunahuna o mga pagbati human sa pagtan-aw sa bidyo.