Leksiyon 20: Doktrina ug mga Pakigsaad 6–9

Pagbansay 1 sa Doktrinal nga Kahanas

Pagsag-ulo ug Pag-angkon og Espirituhanong Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon maghatag sa mga estudyante og mga oportunidad aron makat-on sa mga tudling sa doktrinal nga kahanas ug sa mga kamatuoran nga gilangkoban niini ingon man sa pagkat-on ug paggamit sa balaanong mga baroganan alang sa pag-angkon og espirituhanong kahibalo.

Posibleng mga Kalihokan sa Pagkat-on

Rebyo sa doktrinal nga kahanas: Isag-ulo

Mahimong imo nang gipaila ngadto sa mga estudyante ang pipila ka mga tudling sa doktrinal nga kahanas diha sa Doktrina ug mga Pakigsaad karong tuiga. Kini mahimong maglakip sa Joseph Smith—Kasayasayan 1:15–20, Doktrina ug mga Pakigsaad 1:30, ug Doktrina ug mga Pakigsaad 1:37–38. Ang mosunod nga kalihokan naghatag sa mga estudyante og kahigayonan sa pagrebyo niadtong tulo ka mga tudling ug sa pag-anad sa ilang mga kaugalingon sa mosunod nga siyam ka mga tudling sa doktrinal nga kahanas gikan sa Joseph Smith—Kasaysayan 1:15–20 hangtod sa Doktrina ug mga Pakigsaad 49:15–17. Kon gibati nimo nga mas makaayo kini alang sa imong mga estudyante, mahimo nimo kining ipahiangay sa pagtutok lamang sa mga tudling sa doktrinal nga kahanas nga nakat-onan sa mga estudyante sa pagkakaron.

Kini nga kalihokan molungtad lamang og 10–15 ka minuto aron adunay igong panahon alang sa pagbansay sa paggamit sa doktrinal nga kahanas unya sa leksiyon.

Pagdala og pipila ka mga himan ngadto sa klase nga nailhan sa mga estudyante ug kamao kon unsaon sa paggamit niini. Kini maglakip og usa ka screwdriver, martilyo, ug gabas.

• Kanus-a ka mahimong magmapasalamaton nga makabaton og usa niini nga mga himan?

  Tugoti ang pipila ka mga estudyante sa pagpakigbahin. Sila mahimong mopakigbahin og personal nga mga kasinatian o maghanduraw og mga sitwasyon. Ang mga estudyante mahimong malingaw ug magmamugnaon sa ilang mga tubag.

• Unsa ang pipila ka mga kahimtang diin magmapasalamaton ka nga adunay usa ka kasulatan nga nasag-ulo?

Ang mga tudling sa doktrinal nga kahanas mao ang usa ka pinili nga mga kasulatan nga mahimong mapuslanon kaayo diha nimo ug sa uban. Sa seminary, aduna kay mga oportunidad sa pagsag-ulo sa mga pakisayran ug sa mahinungdanon nga mga hugpong sa mga pulong sa mga tudling sa doktrinal nga kahanas. Mahimo gani nga mosulay ka sa pagsag-ulo sa intero nga mga bersikulo sa pipila niining mga tudling.

Basaha ug markahe ang mosunod nga mga tudling sa imong mga kasulatan. Pagpili og usa o duha nga sa imong pamati mao ang labing makahuluganon diha nimo.

Ipakita ang tsart nga naglista sa mga tudling sa doktrinal nga kahanas ug sa mahinungdanon nga mga hugpong sa mga pulong sa kasulatan. Hatagi ang mga estudyante og igong oras sa pagmarka sa matag tudling.

Pakisayran sa kasulatan sa doktrinal nga kahanas	Mahinungdanon nga hugpong sa mga pulong sa kasulatan
Pakisayran sa kasulatan sa doktrinal nga kahanas Joseph Smith—Kasaysayan 1:15–20	Mahinungdanon nga hugpong sa mga pulong sa kasulatan Si Joseph Smith “nakakita og duha ka Personahe, kansang kahayag ug himaya dili mahulagway.”
Pakisayran sa kasulatan sa doktrinal nga kahanas Doktrina ug mga Pakigsaad 1:30	Mahinungdanon nga hugpong sa mga pulong sa kasulatan Ang Simbahan ni Jesukristo “mao lamang ang tinuod ug buhi nga simbahan.”
Pakisayran sa kasulatan sa doktrinal nga kahanas Doktrina ug mga Pakigsaad 1:37–38	Mahinungdanon nga hugpong sa mga pulong sa kasulatan “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.”
Pakisayran sa kasulatan sa doktrinal nga kahanas Doktrina ug mga Pakigsaad 6:36	Mahinungdanon nga hugpong sa mga pulong sa kasulatan “Paghunahuna ngari kanako sa matag hunahuna; ayaw pagduha-duha, ayaw kahadlok.”
Pakisayran sa kasulatan sa doktrinal nga kahanas Doktrina ug mga Pakigsaad 8:2–3	Mahinungdanon nga hugpong sa mga pulong sa kasulatan “Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo.”
Pakisayran sa kasulatan sa doktrinal nga kahanas Doktrina ug mga Pakigsaad 13:1	Mahinungdanon nga hugpong sa mga pulong sa kasulatan Ang Aaronic Priesthood “naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag.”
Pakisayran sa kasulatan sa doktrinal nga kahanas Doktrina ug mga Pakigsaad 18:10–11	Mahinungdanon nga hugpong sa mga pulong sa kasulatan “Ang bili sa mga kalag mahinungdanon sa panan-aw sa Dios.”
Pakisayran sa kasulatan sa doktrinal nga kahanas Doktrina ug mga Pakigsaad 18:15–16	Mahinungdanon nga hugpong sa mga pulong sa kasulatan “Unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!”
Pakisayran sa kasulatan sa doktrinal nga kahanas Doktrina ug mga Pakigsaad 19:16–19	Mahinungdanon nga hugpong sa mga pulong sa kasulatan “Ako, [si Jesukristo], nag-antos niini nga mga butang alang sa tanan.”
Pakisayran sa kasulatan sa doktrinal nga kahanas Doktrina ug mga Pakigsaad 21:4–6	Mahinungdanon nga hugpong sa mga pulong sa kasulatan Ang pulong sa propeta “ikaw makadawat, ingon og gikan sa akong kaugalingon nga baba.”
Pakisayran sa kasulatan sa doktrinal nga kahanas Doktrina ug mga Pakigsaad 29:10–11	Mahinungdanon nga hugpong sa mga pulong sa kasulatan “Ako mopadayag sa akong kaugalingon gikan sa langit uban sa gahom ug dako nga himaya … ug mopuyo diha sa pagkamatarong uban sa mga tawo diha sa yuta sa kaliboan ka mga tuig.”
Pakisayran sa kasulatan sa doktrinal nga kahanas Doktrina ug mga Pakigsaad 49:15–17	Mahinungdanon nga hugpong sa mga pulong sa kasulatan “Ang kaminyoon gi-orden sa Dios.”

Paggahin og kadiyot sa pagsulay sa pagsag-ulo sa pakisayran ug sa mahinungdanon nga hugpong sa mga pulong sa usa o sa duha ka mga tudling nga labing makahuluganon diha kanimo. Paghunahuna usab og usa ka sitwasyon diin ang pagbaton og pakisayran og mahinungdanong hugpong sa mga pulong nga gisag-ulo mahimong usa ka panalangin ngadto nimo o sa laing tawo.

Hatagi ang mga estudyante og igong oras sa pagsugod og sag-ulo sa mga pakisayran sa kasulatan ug sa mahinugdanong mga hugpong sa mga pulong nga ilang gipili. Tingali makatabang ang pagpahibalo sa mga estudyante nga ang app nga Doktrinal nga Kahanas makatabang usab nila sa pagsag-ulo sa mga tudling sa doktrinal nga kahanas.

Kon ang mga estudyante makaangkon og igong oras, dapita ang pipila sa pagpraktis sa pagpakigbahin sa mahinungdanong hugpong sa mga pulong nga ilang gisugdan sa pagsag-ulo. Mahimo usab nimo silang dapiton sa pagpasabot kon nganong mahimong mapuslanon alang kanila ang pagsag-ulo niini nga mga pakisayran ug mga hugpong sa mga pulong.

Awhaga ang mga estudyante nga magpadayon sa pagsag-ulo sa mga pakisayran ug sa mahinungdanong hugpong sa mga pulong sa kasulatan sa tibuok tuig. Mahimo usab nilang sag-ulohon ang tibuok tudling sa kasulatan kon ganahan sila.

Pagkat-on ug paggamit sa mga baroganan sa pag-angkon og espirituhanong kahibalo

Ang nahabilin nga leksiyon nakatutok sa pagtabang sa mga estudyante sa paggamit sa mga baroganan sa pag-ankon og espirituhanong kahibalo ngadto sa tinuod nga sitwasyon sa kinabuhi. Sa dili pa ang pagbasa sa sitwasyon sa ubos, mahimong makatabang alang sa mga estudyante nga dapiton una sa pagrebyo sa mga baroganan sa pag-angkon og espirituhanong kahibalo. Ang gisugyot nga mga kalihokan sa pagrebyo gilakip diha sa seksiyon sa apendiks nga giulohan og “Mga Kalihokan sa Pagrebyo sa Doktrinal nga Kahanas.” Ang mga diskripsiyon sa mga baroganan makit-an diha sa parapo 5–12 diha sa “Pag-ankon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023).

Si Ava nagsugod sa pagtuon sa Joseph Smith—Kasaysayan ug sa Doktrina ug mga Pakigsaad ug adunay maayong kasinatian. Apan, siya nakasugat og pipila ka negatibong mga komentaryo diha sa social media mahitungod ni Propeta Joseph Smith nga nakapalibog ug nakapabalaka kaniya.

Kon mapuslanon, mahimo kang mangutana og follow-up nga mga pangutana sama sa “Nganong maglibog man siya o mabalaka?”

Ikonsiderar ang pagbutang sa mga estudyante ngadto sa gagmay nga mga grupo ug dapita sila sa pagbinayloay og mga ideya [brainstorm] sa mga paagi nga ang mga baroganan sa pag-angkon og espirituhanong kahibalo mahimong makatabang ni Ava niini nga sitwasyon. Kon mapuslanon, mahimo nimong ipakita ang pipila o tanan sa mosunod nga kalihokan, ug mahimo nimong dapiton ang mga grupo sa pagkompleto niini isip kabahin sa ilang paghunahuna.

Susihon ang mga konsepto ug mga pangutana inubanan sa mahangtorong panglantaw

1. Paglista og tulo ka mga propeta gikan sa kaniadtong panahon nga ang pipila ka mga tawo misunod diha sa hugot nga pagtuo samtang ang uban wala ug tingali misaway pa kanila.

   • Unsa ang pipila ka rason nga ang ubang mga tawo misunod samtang ang uban misaway?

   • Sa unsang paagi ang Ginoo mipanalangin niadtong kinsa misunod sa Iyang mga propeta?

   • Sa unsang paagi ang pagpamalandong niining mga butang mahitungod sa miagi nga mga propeta naghatag kanato og usa ka mas maayong panglantaw sa pag-atubang sa negatibo nga impormasyon mahitungod ni Joseph Smith?

Kon ang mga estudyante maghisgot og usa ka makasaysayanong kabalaka mahitungod sa Propeta, ang pagbasa sa mga parapo 9–10 diha sa “Pag-angkon og Espirituhanong Kahibalo” nga seksiyon diha sa Mahinungdanon nga Dokumento sa Doktrinal nga Kahanas (2023) mahimong mapuslanon.

Tinguhaa ang dugang nga panabot pinaagi sa balaanong gitudlo nga mga tinubdan

2. Pangita og usa ka balaanong gitudlo nga tinubdan mahitungod ni Propeta Joseph Smith nga sa imong hunahuna makatabang ni Maria. Ang mosunod makatabang kanimo sa pagbuhat niini:

   • Pangita og mga bersikulo sa Joseph Smith—Kasaysayan o sa Doktrina ug mga Pakigsaad nga imong gitun-an sa pagkakaron nga nagpakita unsay atong mahimo kon kita mag-atubang og pagduhaduha o mga pangutana.

   • Pangitaa ang “Joseph Smith” diha sa Giya ngadto sa mga Kasulatan o sa Topical Guide. O pangitaa ang “Joseph Smith” diha sa indeks sa usa ka Liahona sa kinatibuk-ang komperensiya o sa Librarya sa Ebanghelyo nga app.

   • Kon aduna kay nahunahunaan nga usa ka piho nga negatibo nga komento nga mahimong ikasulti sa usa ka tawo mahitungod sa Propeta, tan-awa ang mga Topics and Questions [Mga Hilisgotan ug mga Pangutana] nga seksiyon sa ChurchofJesusChrist.org aron makita kon adunay impormasyon nga mahimong makatabang. Paghunahuna usab og usa ka kasaligan nga tawo kinsa mahimo nimong irekomendar nga pakig-isotryahan niini nga tin-edyer.

Molihok diha sa Hugot nga Pagtuo

3. Pinaagi ni Joseph Smith, ang Ginoo mipagawas sa mosunod: ang Basahon ni Mormon, ang Pagpahiuli sa tinuod ug buhi nga Simbahan dinhi sa yuta, ang mga pakigsaad ug mga ordinansa nga gikinahanglan sa kahimayaan, ug ang kadaghanan sa Doktrina ug mga Pakigsaad. Pamalandongi ang piho nga mga paagi ang Ginoo mipanalangin na sa imong kinabuhi pinaagi niining mga butang ug sa unsang paagi nga kini makatabang sa imong pagpamatuod sa Propeta. Paghunahuna mahitungod sa unsay imong gibuhat aron makadawat niini nga mga panalangin. Paglista og pipila ka mga paagi nga mahimo nimong irekomendar ni Maria nga molihok inubanan sa hugot nga pagtuo aron sa pagpadayon sa paglig-on sa iyang pagpamatuod ni Joseph Smith isip usa ka propeta sa Dios.

Human mahatagan ang mga estudyante og oras sa pagbinayloay og mga ideya [brainstorm] ug posibleng mibuhat sa pipila sa mga kalihokan sa ibabaw, dapita sila sa pagpakigbahin kon unsay ilang gibati nga mahimong labing makatabang kang Ava. Awhaga ang pipila ka mga estudyante sa pagpakigbahin. Mahimo usab nimong ikonsiderar ang pagpangutana, “Unsa pa ang ubang mga paagi nga inyong mahunahunaan nga mahimo kita nga makagamit sa mga baroganan sa pag-ankon og espirituhanong kahibalo sa pagtabang sa usa ka tawo niining sitwasyon?”

Dugang nga mga Kalihokan sa Pagkat-on

Paghimo og mga kard sa paghinumdom

Awhaga ang mga estudyante sa paggamit sa mga memory card sa Doctrinal Mastery nga app o maghimo og ilang kaugalingon. O tingali makakita ka og paagi sa pagpakita sa mga kard gikan sa imong kaugalingon nga mobile device ug ipapraktis sa mga estudyante ang pag-ila sa mga tudling. Kon naghimo ang mga estudyante og ilang kaugalingong mga kard, mahimo silang hatagan sa mosunod nga mga instruksiyon:

1. Gamit ang tibuok bahin sa usa ka piraso nga papel, pagdrowing og duha ka kolum nga adunay tulo ka kahon nga managsama ang gidak-on diha sa matag kolum.

2. Baliha ang papel ug buhata ang susama dinha niana nga habig.

3. Sa usa ka habig, isulat ang mga pakisayran sa kasulatan alang sa matag tudling sa doktrinal nga kahanas. (Sa laing paagi, mahimong makakita ang mga estudyante og kalamposan gikan sa pagsulat og mogaray [rhyming] nga hugpong sa mga pulong, paggamit og mga hulagway, o uban nga paagi aron sa pagtabang kanila sa paghinumdom sa pakisayran. Tabangi ang mga estudyante nga makasabot nga kining mga pamaagi kinahanglan dili buhaton sa paagi nga makabalda gikan sa sagradong kinaiyahan sa teksto sa kasulatan.)

4. Sa sukwahi nga habig, isulat ang mahinungdanong mga hugpong sa mga pulong sa kasulatan bahin sa pakisayran nga anaa sa tugbang nga kahon sa sukwahi nga habig sa papel.

5. Guntinga ang matag kahon aron ang matag card adunay pakisayran sa usa ka bahin ug ang mahinungdanon nga hugpong sa mga pulong sa kasulatan sa pikas nga bahin.

6. Balika alang sa nahabilin nga mga tudling.

Sa klase o sa panimalay, mahimong balik-balikon pagtan-aw sa mga estudyante ang ilang mga memory card kaduha o katulo ka higayon, motan-aw sa usa ka bahin niini ug tan-awon kon pila ang ilang matag-an nga sakto. Sila dayon mahimong mobali niini ug ituyok kini pag-usab.

Alternatibong senaryo

Kon gibati nimo nga mahimo kining mas mahinungdanon sa imong mga estudyante, dapita sila sa pagkonsiderar sa mosunod nga senaryo alang sa pagbansay sa paggamit sa pag-angkon og espirituhanong kahibalo: Si Dante ug Kevin naglakaw paingon sa eskwelahan usa ka buntag sa dihang si Kevin milingi kang Dante ug miingon, “Dugay na kita suod nga higala, busa ayaw kini laina pagsabot, apan nganong moingon ka nga nahisakop ka sa tinuod nga simbahan? Dili ba kini sa imong hunahuna garboso ang pag-ingon nga ang imong relihiyon tinuod ug ang ubang relihiyon bakak?” Dapita ang mga estudyante sa paggamit sa mga baroganan sa pag-angkon og espirituhanong kahibalo aron makatabang. Makadrowing usab sila sa Joseph Smith—Kasaysayan 1:15–20 ug Doktrina ug mga Pakigsaad 1:30.