Doktrina ug mga Pakigsaad 10–11

Doktrina ug mga Pakigsaad 10–11

Kinatibuk-ang Pagpasabot

Ang Ginoo mipasabot unsay nahitabo sa nawala nga 116 ka mga pahina sa manuskrito sa Basahon ni Mormon ug unsaon sa pagpadayon sa buhat sa paghubad. Si Hyrum Smith nagtinguha sa pagtabang sa Pagpahiuli sa Simbahan sa Ginoo ug gihatagan og tambag kon unsaon pag-andam ang iyang kaugalingon sa pag-alagad.

Awhaga ang mga tigkat-on sa pagpakigbahin sa mga kamatuoran nga ilang nakat-onan: Ang paghatag og kahigayonan sa mga estudyante nga masulti ang mga hunahuna ug mga pagbati makatabang kanila nga mobati sa Espiritu Santo nga nagtudlo o nagpamatuod sa kamatuoran. Pangita og mga kahigayonan sa leksiyon nga mahimo nimong dapiton ang mga estudyante sa pagpamalandong kon unsay ilang nakat-onan ug sa pagpakigbahin. Alang sa dugang pa kon sa unsang paagi kini gibuhat sa Manluluwas, tan-awa ang seksiyon nga “Giawhag sa Manluluwas ang Uban sa Pagpakigbahin sa mga Kamatuoran nga Ilang Nakat-onan” diha sa Pagtudlo Sumala sa Pamaagi sa Manluluwas. Makakita ka usab og usa ka ehemplo kon unsaon sa pagbuhat niini diha sa leksiyon karong semanaha nga giulohan nga “Doktrina ug mga Pakigsaad 10.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 10

Katuyoan sa leksiyon: Aron matabangan ang mga estudyante nga madugangan ang ilang pagsalig nga ang Dios motabang kanila sa pagbuntog sa malipoton nga mga plano ni Satanas

• Pagpangandam sa estudyante: Ikonsiderar ang pagdapit sa mga estudyante sa pagbasa sa Mga Santos, 1:56–59 aron sa pagtabang kanila sa paghinumdom sa mga panghitabo nga naglibot sa pagkawala sa 116 ka mga pahina sa manuskrito ug sa kawalay paglaom nga gibati ni Joseph ug sa iyang pamilya niadtong panahona.

• Handout: “Ang Kaalam sa Dios”

Doktrina ug mga Pakigsaad 11:1–7

Katuyoan sa leksiyon: Aron matabangan ang mga estudyante nga mobati og mas dakong tinguha sa pagpangita sa gasa sa kinabuhing dayon nga gitanyag ni Jesukristo sa tanan kinsa modawat niini

• Pagpangandam sa estudyante: Dapita ang mga estudyante sa pagbasa sa Doktrina ug mga Pakigsaad 11:7 ug sa pagtandi sa kahulogan nga gihatag sa kalibotan sa pagka-adunahan ngadto sa kahulogan nga gihatag sa Ginoo. Dapita sila sa pagpamalandong kon nganong managlahi ang mga kahulogan.

• Mga Materyal: Mga pakisayran sa kasulatan ug mga kapanguhaan nga gisulat sa mga piraso sa papel nga gibutang palibot sa lawak [room]

Doktrina ug mga Pakigsaad 11:8–30

Katuyoan sa leksiyon: Aron matabangan ang mga estudyante nga magtinguha og tabang sa Ginoo aron sa pag-andam sa pag-apil sa Iyang buhat

• Pagpangandam sa estudyante: Dapita ang mga estudyante sa pagpamalandong kon nganong mahinungdanon ngadto sa Ginoo ang atong mga tinguha ug sa pagkonsiderar og mga paagi nga mapalig-on nila ang ilang tinguha nga mas magmatinud-anon sa pag-alagad ngadto Kaniya.