Leksiyon 21: Doktrina ug mga Pakigsaad 10–11

Doktrina ug mga Pakigsaad 10

Ang Kaalam sa Dios

Human sa pagkawala sa 116 ka mga pahina sa manuskrito, ang bulawan nga mga palid, Urim ug Thummim, ug gahom sa paghubad temporaryo nga gibawi gikan ni Joseph Smith. Ang Ginoo midawat sa sinsero nga paghinulsol ni Joseph ug mipasabot kon sa unsang paagi Siya nag-andam og paagi nga ang Iyang buhat magpadayon pinaagi sa Iyang kaalam ug nag-una nga kasayoran. Kini nga leksiyon makatabang sa mga estudyante nga madugangan ang ilang pagsalig nga ang Dios motabang kanila sa pagbuntog sa malipoton nga mga plano ni Satanas.

Mga Posibleng Kalihokan sa Pagkat-on

Ang labing maalamon nga tawo nga imong nailhan

Kini nga seksiyon sa leksiyon gituyo aron sa pagtabang sa mga estudyante sa paghunahuna mahitungod sa walay kinutoban nga kaalam sa Dios. Ayaw pagduhaduha sa pagpahiangay sa mosunod nga gisugyot nga mga hilisgotan.

• Kinsa ang labing maalamon nga tawo nga imong nailhan, o kinsa ang mipuyo sa yuta, sa matag usa sa mosunod nga mga hilisgotan?

Siyensiya, Kasaysayan, Relihiyon, Panglawas, Teknolohiya

• Kon imong gihiusa ang kaalam sa matag tawo nga imong nahunahunaan, sa unsang paagi sa imong hunahuna kana nga kaalam ikatandi sa kaalam sa Dios?

Ikonsiderar ang pagdrowing og taas nga pinatindog nga linya diha sa pisara nga ang ibabaw nagrepresentar sa kaalam sa Dios. Dapita ang pipila ka mga estudyante sa pagbutang og mga marka diha sa linya diin sa ilang hunahuna ang hiniusang kaalam sa tanang labing maalamon nga mga tawo sa kalibotan girepresentahan. Mahimo nimong pangutan-on ang mga estudyante kon sa unsang paagi ang mga tudling sama sa Mosiah 4:9 ug Isaias 55:8–9 makaimpluwensiya kon asa sila magbutang og mga marka diha sa linya.

Ang Dios dili lamang mas maalamon kay ni bisan kinsa kanato. Basaha ang Doktrina ug mga Pakigsaad 10:43 aron makita kon sa unsa pa milabaw ang kaalam sa Dios.

• Sa unsang paagi makabenepisyo ang usa ka tawo sa pagkahibalo sa kamatuoran nga ang kaalam sa Dios labaw pa ka gamhanan kay sa kaigmat sa yawa?

• Unsa ang pipila ka mga ehemplo diha sa mga kasulatan o gikan sa kasaysayan diin ang kaalam sa Dios nakabuntog sa usa ka malipoton nga plano sa yawa?

Ang mga tubag sa miaging pangutana mahimong maglakip kon sa unsang paagi ang Pag-ula ni Kristo giandam sa pagbuntog sa mga epekto sa Pagkapukan, kon sa unsang paagi ang pagpuli nga buhat sa templo giandam aron sa pagtabang niadtong kinsa nabuhi atol sa panahon sa Apostasiya, o sa unsang paagi ang atong mga sala mabuntog pinaagi sa hugot nga pagtuo diha kang Kristo ug sa paghinulsol.

Samtang magtuon ka niini nga leksiyon, hunahunaa ang mga paningkamot ni Satanas sa pagpugong kanimo sa pag-uswag sa espirituhanong paagi ug pagbuhat sa buluhaton sa Dios. Paminaw sa Espiritu Santo nga nagsaksi nga ang Dios hingpit nga nakasabot sa mga taktika ni Satanas ug nag-andam na og paagi alang kanimo sa pagbuntog niini.

“Ang kaigmat sa yawa”

Ikonsiderar ang pagdapit og usa ka boluntaryo sa pagpahinumdom sa klase sa mga panghitabo nga misangpot sa pagkawala sa unang 116 ka mga pahina sa manuskrito sa Basahon ni Mormon. (Gamita ang leksiyon sa “Doktrina ug mga Pakigsaad 3” o ang mosunod nga parapo kon gikinahanglan.)

Si Satanas adunay plano sa pagpahunong sa paghubad sa Basahon ni Mormon ug sa pagpahimo sa mga tawo nga magduhaduha sa katinuod sa basahon. Gipugos ni Martin Harris si Joseph Smith nga tugotan siya nga ipakita ang unang 116 ka mga pahina sa manuskrito sa Basahon ni Mormon ngadto sa iyang asawa ug sa uban. Si Joseph padayon nga mihangyo sa Dios alang sa pagtugot, bisan og ang Dios sa makaduha misulti kaniya sa dili pagtugot niini. Miabot na hinoon nga nawala ni Martin ang mga pahina. Dayon gikuha ni anghel Moroni ang bulawan nga mga palid ug ang Urim ug Thummim gikan kang Joseph.

• Unsa sa imong hunahuna ang mga kabalaka ni Joseph human mawala ang manuskrito?

Human sa usa ka yugto sa mapaubsanon nga paghinulsol, nadawat pag-usab ni Joseph ang bulawan nga mga palid ug ang Urim ug Thummim. Si Moroni misulti kaniya nga ang Ginoo midawat sa iyang paghinulsol.

• Ngano nga ang mensahe sa Ginoo diha sa Doktrina ug mga Pakigsaad 10:43 nakahupay man kaayo ni Joseph niadtong panahona?

Sa Doktrina ug mga Pakigsaad 10, ang Ginoo mitudlo kang Joseph nga kadtong nangawat sa mga pahina nagplano sa pag-usab sa mga pulong sa manuskrito. Kon gihubad pa pag-usab ni Joseph ang samang materyal, sila mangangkon unta nga lahi ang iyang paghubad niini ug busa usa ka mini nga propeta (tan-awa sa Doktrina ug mga Pakigsaad 10:10–19).

Ang mosunod nga mga pangutana makatabang sa mga estudyante nga makakita og koneksiyon sa kasinatian ni Joseph diha sa ilang mga kinabuhi. Mahimo nimong isulat ang pipila sa ilang mga tubag diha sa pisara.

• Unsa ang mga ehemplo sa buhat nga gihangyo sa Dios nga buhaton sa mga batan-on karon?

• Unsa nga malipoton nga mga plano ang gigamit ni Satanas sa pagsulay sa pagpugong kanato sa pagtuman sa buhat sa Dios?

Mahimong hisgotan sa mga estudyante nga ang mga plano ni Satanas naglakip sa makaadik nga mga kinaiya, pagkalinga, o pagduhaduha sa kaugalingon. Ang laing tubag mao nga siya nagpugos kanato sa paghatag og bili sa mga opinyon o estilo sa kinabuhi sa uban labaw pa kay sa mga sumbanan sa Dios.

Irekord diha sa imong journal sa pagtuon ang buluhaton nga imong gibati nga gusto sa Dios nga imong pagatutokan karon ug imong makab-ot umaabot. Ang pagpamalandong niini makatugot sa Espiritu Santo sa pagdasig kanimo og pipila ka mga ideya. Unsa kaha nga mga pamaagi ang gigamit karon ni Satanas diha sa imong kinabuhi aron sa pagsulay sa pagpugong kanimo sa pagtuman sa buhat sa Dios?

Ang kaalam sa Dios

Tabangi ang mga estudyante sa pagdiskobre sa kaalam ug nag-unang kasayoran sa Dios pinaagi sa pagprinta ug paggunting og igo nga mga kopya sa nag-uban nga handout aron ang matag estudyante adunay usa ka piraso sa puzzle. Dapita sila sa pagbasa sa ilang tudling ug irekord sa luyo sa piraso sa ilang puzzle kon unsay gitudlo sa Dios o gidasig sa usa ka tawo nga buhaton.

Dayon dapita ang mga estudyante sa pagporma og mga grupo sa tag-upat kinsa adunay nagkalainlaing mga piraso. Dapita ang mga grupo nga magtinabangay sa pagdiskobre kon giunsa pag-andam sa Dios ang paagi sa pagbuntog sa pagkawala sa 116 ka mga pahina. Dayon dapita ang mga grupo sa pagpakigbahin sa klase kon sa unsang paagi kini nga asoy makatabang nga madugangan ang atong hugot nga pagtuo ug pagsalig sa Dios.

Ang upat ka mga tabang sa ubos mahimong ipakita o ihatag kon ang mga estudyante nagkinahanglan og dugang nga giya aron masabtan ang ilang mga tudling.

Ang Kaalam sa Dios

Mga tabang:

1. 1 Nephi 19:1–3—Ang Dios misugo ni Nephi sa paghimo og duha ka hugpong sa mga palid nga naglangkob sa samang yugto sa panahon.

2. Mga pulong ni Mormon 1:3–7—Ang Dios midasig ni Mormon sa paglakip sa gagmay nga mga palid ni Nephi nga adunay pagpamubo sa samang yugto sa panahon nga gihimo na ni Mormon gikan sa ubang mga palid ni Nephi.

3. Doktrina ug mga Pakigsaad 10:30, 40–42—Ang Dios misulti kang Joseph Smith sa paghubad sa gagmay nga mga palid ni Nephi kay sa paghubad pag-usab unsa ang nawala ni Martin gikan sa minubo ni Mormon sa dagkong mga palid.

4. Doktrina ug mga Pakigsaad 10:43–46—Gitandi sa Dios ang sulod [content] sa gikawat nga mga pahina (tan-awa sa bersikulo 44) ngadto sa unsa unyay ipadayon og hubad ni Joseph (tan-awa sa mga bersikulo 45–46).

Kaalam sa Dios diha sa atong mga kinabuhi

Tabangi ang mga estudyante nga makakita kon sa unsang paagi ang kaalam sa Dios makapanalangin sa ilang mga kinabuhi. Mahimo kini pinaagi sa paghimo og diskusyon sa klase gamit ang mga pangutana sama sa mosunod:

• Ngano sa imong hunahuna nga gusto sa Dios nga ang mga tin-edyer karon mahibalo unsay Iyang gitudlo ni Joseph Smith niini nga seksiyon?

• Unsa ang giandam sa Dios aron sa pagtabang kanato nga makalingkawas sa panglingla ni Satanas ug magpadayon sa pagbuhat sa Iyang buhat?

Awhaga ang mga tigkat-on sa pagpakigbahin sa mga kamatuoran nga ilang nakat-onan: Alang sa dugang nga pagbansay kon unsaon sa pagbuhat niini, tan-awa ang pagbansay nga giulohan og “Awhaga ang mga tigkat-on sa pagpakigbahin sa mga kamatuoran nga ilang nakat-onan” diha sa Pagpalambo sa mga Kahanas sa Magtutudlo; Pagdapit og Makugihon nga Pagkat-on. Kini nga pagbansay makatabang kanimo sa pagpraktis sa pagdapit sa mga estudyante sa pagpakigbahin sa usag-usa unsay ilang nakat-onan.

Dapita ang mga estudyante sa pagtan-aw og balik sa ilang entry sa journal. Ipadugang kini kanila pinaagi sa pagrekord kon giunsa sa Dios pag-andam ang usa ka paagi alang kanila sa pagbuntog sa malipoton nga mga plano sa yawa diha sa ilang mga kinabuhi. Mahimo usab nilang ilakip unsa ang ilang gibati nga nadasig nga buhaton aron mas mosalig sa kaalam sa Dios aron mas matuman ang Iyang buhat.

Ipasalig sa mga estudyante nga ang kaalam sa Dios labaw pa kay sa yawa. Ikonsiderar ang pagpamatuod sa kahupayan nga moabot tungod sa pagkahibalo nga ang Dios nakakita nang daaan ug nag-andam og paagi alang niadtong adunay hugot nga pagtuo diha Kaniya sa pagbuntog sa tanang malipoton nga mga plano ni Satanas.

Dugang nga mga Kapanguhaan

Nawad-an ba kita sa mga pagtulun-an nga atong gikinahanglan sa pagkawala sa 116 ka mga pahina?

Si Elder Jeffrey R. Holland sa Korum sa Napulog Duha ka Apostoles mitudlo nga ang “maalamon nga katuyoan” sa Ginoo (1 Nephi 9:5; Mga Pulong ni Mormon 1:7) alang sa pagmando sa pagsulat ug pagpreserbar sa gagmay nga mga palid ni Nephi labaw pa nga nakahulip sa pagkawala sa 116 ka mga pahina sa manuskrito:

Samtang gisugo sa Ginoo si Joseph sa pamaagi sa paghubad ug pagsal-ot sa materyal gikan sa gagmay nga mga palid ngadto sa unsay nasugdan isip paghubad sa minubo nga dagkong mga palid, siya miingon, “Tan-awa, adunay daghan nga mga butang nga gikulit diha sa [gagmay nga] mga palid ni Nephi nga naghatag og mas dako nga mga panglantaw sa akong ebanghelyo”. …

… Mas daghan pa ang mibalik kanato labaw pa sa nawala. Ug nahibaloan na sukad sa sinugdanan nga kini mahitabo. Kini mao ang alang sa usa ka maalamong katuyoan. Wala kita masayod kon unsa gayod ang nawala kanato gikan sa 116 ka mga pahina, apan nahibalo kita nga unsa ang atong nadawat diha sa gagmay nga mga palid mao ang personal nga mga pamahayag sa tulo ka bantogan nga mga saksi, tulo sa halangdon nga doktrinal nga mga tingog sa Basahon ni Mormon, nga nagpamatuod nga si Jesus mao ang Kristo. …

… Isip mga tigbasa sa Basahon ni Mormon, kita adunay Nephi, Jacob, ug Isaias sa pagsulti kanato diha-diha isip personal nga mga saksi sa premortal nga Manluluwas. Sila mga tigdawat sa katingalahang mga pagpadayag kalabot sa iyang kinabuhi ug pangalagad ug sa pakigsaad nga relasyon sa Dios ngadto sa Balay ni Israel, sa karaan ug sa karon. . …

Naghunahuna ako nga kini makapaukyab kon ang 116 ka pahina sa manuskrito motungha usa ka adlaw niana, apan kon kini ihatod sa akong opisina ugma dili ko gayod ibaylo ang materyal sa gagmay nga mga palid ni Nephi niini, tungod sa mas dakong katin-awan nga gihatag pinaagi sa dakong propetikanhong mga magbalantay kinsa nagbarog sa ganghaan sa basahon. (Jeffrey R. Holland, “A Standard unto My People” [address to Church Educational System religious educators, Aug. 9, 1994], 7–9)

Unsa ang anaa sa 116 ka mga pahina?

Sa pasiuna sa unang edisyon sa Basahon ni Mormon, si Joseph Smith mipasabot:

Ako mihubad, pinaagi sa gasa ug sa gahom sa Dios, ug nakahimo sa pagpasulat, sa usa ka gatos ug napulo ug unom ka mga pahina, diin ako mikuha gikan sa Basahon ni Lehi, nga mao ang usa ka asoy nga gipamubo gikan sa mga palid ni Lehi, pinaagi sa kamot ni Mormon; kansang mga asoy, gikawat ug gipalayo kanako sa pipila ka tawo o mga tawo, bisan pa sa akong labing hingpit nga mga paningkamot aron mabawi kini pag-usab. (“Preface to Book of Mormon, circa August 1829,” iii, josephsmithpapers.org)

Dugang nga mga Kalihokan sa Pagkat-on

Kaigmat ni Satanas

Ikonsiderar ang pagsugod sa leksiyon pinaagi sa pagtabang sa mga estudyante nga makaamgo nga si Satanas malipoton ug naningkamot sa pagpahunong kanato sa pagbuhat sa buluhaton sa Dios. Mahimo kang maghimo og diskusyon sa klase pinaagi sa pagpakita og lit-ag o bitik ug pagpangutana niini nga mga pangutana:

• Sa unsang paagi ang usa ka lit-ag o bitik nagrepresentar sa mga tuyo ni Satanas nganhi kanato?

• Unsa nga mga hunahuna ug mga pangutana ang mahimong mahunahunaan sa usa ka tawo human mahulog sa usa sa mga lit-ag ni Satanas?

Ipadayon ang leksiyon pinaagi sa pagpahinumdom sa mga estudyante sa “lit-ag” nga gibutang ni Satanas mahitungod sa 116 ka mga pahina sa manuskrito.

Presentasyon sa bidyo

Ikonsiderar ang pagpakita sa bidyo nga “The Work of God” (13:35) aron matabangan ang mga estudyante nga mahanduraw ang mga panghitabo nga mosangpot sa mga pagpadayag nga gihatag sa Ginoo sa Doktrina ug mga Pakigsaad 3 ug 10. Makatabang usab kini kanila nga makasabot kon sa unsang paagi ang paglakip ni Mormon sa gagmay nga mga palid ni Nephi nagpakita sa kaalam sa Dios. Ang bahin niini nga bidyo mahimong gipakita na diha sa leksiyon sa “Doktrina ug mga Pakigsaad 3.”

Ang pagsalig sa kaalam sa Dios makatabang kanato sa pagsunod sa Iyang mga panudlo

Wala ni Nephi o ni Mormon ang hingpit nga nakasabot sa panginahanglan sa gagmay nga mga palid ni Nephi nga pagabuhaton o ilakip sa rekord ni Mormon (tan-awa sa 1 Nephi 9:5–6; Mga Pulong ni Mormon 1:6–7). Ikonsiderar ang pagdapit sa mga estudyante sa pagbasa sa 1 Nephi 9:5–6 ug Mga Pulong ni Mormon 1:6–7, mangita kon nganong si Nephi ug Mormon mosunod sa sugo nga wala nila masabti. Human ipakigbahin sa mga estudyante ang ilang napalgan, mahimo nimo silang hangyoon sa pagpakigbahin sa mga butang nga gisugo sa Dios nga atong buhaton sa mga rason nga wala nato hingpit nga masabti. Dapita sila sa pagpakigbahin sa unsay ilang nahibaloan mahitungod sa Dios nga nakatabang kanila sa pagsunod Kaniya bisan sa wala pa nila masabti kon ngano nga kinahanglan nilang buhaton kini.

Mga katuyoan sa Basahon ni Mormon

Mahimo nimong dapiton ang mga estudyante sa pagbasa sa Doktrina ug mga Pakigsaad 10:46–50, 57–68, mangita sa mga katuyoan sa Basahon ni Mormon. Sama pananglit, atong nakat-onan nga ang Basahon ni Mormon modala ngadto sa kahayag sa tinuod nga doktrina sa Manluluwas (tan-awa sa bersikulo 62) ug nagtukod sa Iyang ebanghelyo “nga wala na untay daghan nga panagbingkil” (bersikulo 63). Dapita ang mga estudyante sa pagpakigbahin og mga panahon sa dihang ilang nakita ang pipila niini nga mga katuyoan sa Basahon ni Mormon nga natuman diha sa ilang mga kinabuhi o sa mga kinabuhi sa mga tawo nga ilang nailhan.

Pag-ampo kanunay

Mahimong dapiton ang mga estudyante sa pagbasa sa Doktrina ug mga Pakigsaad 10:5 mangita sa mga panalangin nga gitanyag sa Ginoo niadtong kinsa nag-ampo sa kanunay. Dapita sila sa pagpakigbahin kon sa unsang paagi ang makanunayon nga pag-ampo nakatabang kanila nga “magmadaogon.” Mahimo dayon nga pangitaon sa mga estudyante ang hugpong sa mga pulong nga “pag-ampo kanunay” sa ubang mga kasulatan ug idugang ang gisaad nga mga panalangin nga ilang makaplagan niadto nga mga tudling (mga ehemplo naglakip sa 3 Nephi 18:15–21; Doktrina ug mga Pakigsaad 19:38; 93:49).