Doktrina ug mga Pakigsaad 10–11

Doktrina ug mga Pakigsaad 11:8–30

“Ngadto sa Tanan Kinsa Adunay Maayo nga mga Tinguha”

Samtang ang Pagpahiuli sa ebanghelyo ni Jesukristo nagsugod sa pagkaylap, daghang mga tawo ang nagtinguha nga makahibalo kon unsaon nila sa pagtabang. Naglakip kini sa mga sakop sa kaugalingong pamilya ni Joseph Smith, sama sa iyang igsoon nga si Hyrum. Ang Ginoo midayeg kang Hyrum sa iyang maayong mga tinguha ug mitudlo kaniya unsaon pag-andam sa pagtabang sa buluhaton. Kini nga leksiyon makatabang sa mga estudyante nga magtinguha og tabang sa Ginoo aron sa pag-andam sa pag-apil sa Iyang buhat.

Mga Posibleng Kalihokan sa Pagkat-on

“Bisan ingon nga ikaw nagtinguha”

Ikonsiderar ang paghangyo sa mga estudyante sa paghunahuna og usa ka higayon nga sila nagtinguha nga moapil o mosalmot og usa ka mapuslanon nga kalihokan o kawsa. Ang mga ideya mahimong maglakip sa pagplano sa usa ka kalihokan sa kabatan-onan, pag-apil sa usa ka proyekto sa pag-alagad, o pag-apil sa usa ka club o organisasyon. Dapita ang mga estudyante sa paghisgot og mga butang nga ilang gikinahanglan nga andamon daan aron matuman ang kalihokan o makaalagad sa kawsa.

Ikonsiderar ang pagpakigbahin og impormasyon sama sa mosunod aron matabangan ang mga estudyante nga makasabot kon unsay gitinguha ni Hyrum Smith nga mahimong kabahin niana nga misangpot sa pagpadayag sa Doktrina ug mga Pakigsaad 11.

Niadtong Mayo 1829, ang dakong tinguha ni Hyrum Smith mao ang pag-apil sa Pagpahiuli sa Simbahan sa Manluluwas. Mibiyahe siya og kapin sa 250 ka milya gikan sa Palmyra, New York, ngadto sa Harmony, Pennsylvania, aron sa pagbisita sa iyang manghod nga lalaki nga si Joseph ug sa pagkahibalo kon unsa ang iyang mahimo aron sa pagtabang. Ang Ginoo mipadayag sa Doktrina ug mga Pakigsaad 11 tungod sa matarong nga mga tinguha ni Hyrum.

Basaha ang Doktrina ug mga Pakigsaad 11:8,mangita kon sa unsang paagi mopanalangin ang Ginoo kang Hyrum Smith tungod kay nagtinguha siya nga motabang sa buhat. Sunod, basaha ang Doktrina ug mga Pakigsaad 11:27, mangita kon kinsa pa ang gisultihan sa Manluluwas niini nga pagpadayag.

Dapita ang mga estudyante sa pag-ila og kamatuoran gikan niini nga mga bersikulo ug sa pagpahayag niini sa ilang kaugalingong mga pulong. Mahimong moingon sila sama niini: Kon kita nagtinguha sa pag-alagad Kaniya, ang Dios makahimo sa Iyang buhat pinaagi kanato.

Hatagi ang mga estudyante og kahigayonan sa pagsukod sa ilang mga kaugalingon bahin sa ilang pagpangandam sa pagbuhat sa buluhaton sa Dios. Ang mosunod maoy usa ka paagi nga ilang masukod ang ilang kaugalingon.

Gamit ang mosunod nga sukdanan, pilia kon paminaw nimo unsa ka kaandam sa pagbuhat sa buluhaton sa Dios:

• 1 = Dili kaayo andam

• 2 = Medyo dili andam

• 3 = Medyo andam

• 4 = Hilabihan ka andam

Hunahunaa kon unsa ang imong mahimo aron madugangan ang imong pagkaandam. Mahimo nimong irekord ang pipila sa imong mga hunahuna diha sa imong journal sa pagtuon.

Nangandam sa pag-alagad

Ikonsiderar ang pagbahin sa mga estudyante ngadto sa gagmay nga mga grupo ug dasiga sila sa pagpuli-puli sa pagbasa og kusog sa mosunod nga mga bersikulo.

Basaha ang Doktrina ug mga Pakigsaad 11:11–26, markahan ang piho nga mga hugpong sa mga pulong sa tambag nga gihatag sa Manluluwas aron matabangan si Hyrum nga maandam sa matinud-anong pag-alagad. Human sa pagtuon niini nga mga bersikulo, pagpili og usa ka hugpong sa mga pulong nga nagsugyot kon unsaon nato sa pagpangandam. Paghunahuna og duha ngadto sa tulo ka piho nga mga paagi nga ang usa ka tawo makagamit niana nga tambag diha sa iyang kinabuhi.

Ikonsiderar ang pagdapit sa matag grupo sa pagsulat diha sa pisara sa hugpong sa mga pulong nga ilang gipili ug sa pagpakigbahin sa klase sa pipila ka mga paagi nga ilaha kining magamit. Mahimo kang mangutana og follow-up nga pangutana sama sa “Sa unsang paagi ang paggamit niana nga tambag karon makaapekto kon si kinsa ka nga mamahimo unya sa kinabuhi?” Paminaw pag-ayo samtang ang mga estudyante mopakigbahin aron mahibaloan kon hain nga mga hugpong sa mga pulong ang gahinan og dugang oras sa paghisgot. Ang mosunod nga tulo ka mga seksiyon mahimong magamit sa pagtabang sa mga estudyante nga makasabot, maghisgot, ug mangandam sa paggamit sa piho nga mga hugpong sa mga pulong.

“Pagsalig diha niana nga Espiritu nga nagtultol sa pagbuhat og maayo” (bersikulo 12)

Paghunahuna og pipila ka tinuod nga mga sitwasyon sa kinabuhi diin ang usa ka tin-edyer tingali kinahanglang modesisyon kon mosalig ba siya sa Espiritu.

• Ngano nga ang hugot nga pagtuo sa Manluluwas gikinahanglan aron hingpit nga mosalig sa Espiritu niini nga mga sitwasyon?

• Unsa ang atong mabuhat aron makat-on kon unsaon nga mas makadawat ug molihok sumala sa inspirasyon gikan sa Espiritu Santo?

Ang mga tubag mahimong maglakip sa takos nga pag-ambit sa sakramento, pagsulat ug pagbuhat sa mga pag-aghat nga moabot, ug pagpamalandong isip kabahin sa personal nga pag-ampo o pagtuon sa kasulatan. Dapita ang mga estudyante sa pagpakigbahin og mga kasinatian sa dihang misalig sila sa Espiritu sa pagbuhat og maayo.

“Paghupot sa akong mga sugo, oo, uban sa imong tibuok nga gahom, hunahuna ug kusog” (bersikulo 20)

Pagpili og tulo ngadto sa upat ka mga sugo nga imong gibati nga ilabihang may kalabotan sa mga tin-edyer.

Alang sa matag sugo, isulat kon unsa kaha kini tan-awon alang sa usa ka tin-edyer sa pagtuman niini sa tibuok nilang gahom, hunahuna, ug kusog.

• Ngano nga ang pagpaningkamot sa pagsunod sa mga sugo sa Ginoo gikinahanglan aron mas makaalagad Kaniya?

• Sa unsang paagi ka o ang usa ka tawo nga imong nailhan napanalanginan tungod sa makugihong pagpaningkamot sa pagsunod sa mga sugo sa Manluluwas?

“Unaha ang pagbaton sa akong pulong” (bersikulo 21)

Paghimo og lista sa mga butang nga mahimong buhaton sa usa ka tawo kinsa nagtinguha sa “pagbaton sa pulong [sa Ginoo]” kay sa pagbasa lang sa mga kasulatan.

Ang mga tubag mahimong maglakip sa pagmarka sa mga tudling, pagrekord sa mga hunahuna nga moabot, pagpangita sa mga tubag sa mga pangutana, ug pag-ampo atol sa pagtuon.

• Sa unsang paagi nga ang tinuyo nga pagpangandam nga mahimong mas maayong misyonaryo, magtutudlo, lider, tigpangalagad, kapikas, o ginikanan sa imong umaabot makapausab sa paagi sa imong diskarte sa pagtuon sa ebanghelyo karon?

• Unsa ang piho nga butang nga imong mahimo aron madugangan ang pagkaepektibo sa imong inadlaw nga pagtuon sa kasulatan? (Tingali nagtakda na ka kaniadto og susama nga tumong. Kini mahimong usa ka maayong higayon sa pagrebyo sa imong pag-uswag.)

Gamita ang imong nakat-onan

Ang pagsabot sa paghulagway sa Manluluwas sa Iyang Kaugalingon diha sa seksiyon 11 makatabang sa mga estudyante nga mobati og paglaom nga Siya motabang kanila sa paggamit sa mga pagdapit niini nga seksiyon. Dapita ang mga estudyante sa pagbasa sa mga bersikulo 11, 28–30 ug sa paghisgot sa mosunod nga mga pangutana.

• Sa unsang paagi nga ang Manluluwas modan-ag sa imong dalan samtang ikaw maningkamot sa pagsunod sa Iyang tambag ug mangandam sa pag-alagad Kaniya?

• Unsaon nimo nga mas “modawat” sa Manluluwas ug sa Iyang tambag diha sa imong kinabuhi?

• Unsa sa imong hunahuna ang gipasabot nga mahatagan og gahom aron mamahimong mga anak nga lalaki ug mga anak nga babaye sa Dios?

Hatagi ang mga estudyante og pipila ka hilom nga panahon sa pagpamalandong sa mosunod ug sa paggamit sa unsay ilang nakat-onan. Kon ang mga estudyante nagkinahanglan og tabang sa paghunahuna og mga ideya, dapita sila sa pagpili og usa ka hugpong sa mga pulong nga gilista diha sa pisara gikan sa sayong bahin sa leksiyon. Ikonsiderar ang pagpakigbahin sa imong kaugalingong mga pagbati kon sa unsang paagi ang pag-alagad sa Ginoo nakabenepisyo ug nakapanalangin sa imong kinabuhi.

Paggahin og kadiyot sa paghanduraw sa matang sa sulugoon nga gusto ka nga mamahimo alang sa Ginoo karon, sa umaabot nga duha ka tuig, sa 10 ka tuig, ug sa tibuok nimong kinabuhi. Pagpili og bisan usa ka hugpong sa mga pulong sa tambag gikan sa imong pagtuon karon nga gusto nimong tutokan ug paghimo og plano sa pagbuhat niini. Usa ka paagi sa pagbuhat niini mao ang pagdrowing og usa ka yano nga hagdanan nga adunay tulo o upat ka mga ang-ang. Sa matag ang-ang, pagsulat og usa ka butang nga imong mabuhat aron sa pagtabang kanimo nga mas makabaton sa pulong sa Ginoo, pagtuman sa Iyang mga sugo, o paggamit sa bisan unsa nga piraso sa tambag nga imong nadesisyonan nga pagatutokan.

Dugang nga mga Kapanguhaan

Ngano nga ang ehemplo ni Hyrum Smith ug sa uban importante nga akong hinumduman?

Si Presidente M. Russell Ballard sa Korum sa Napulog Duha ka Apostoles mitudlo:

Ato gayod kanunayng hinumdoman ang bili nga gibayran ni Joseph ug Hyrum Smith, dungan sa ubang daghang matinud-anong mga lalaki, mga babaye, ug mga kabataan, sa pag-establisar sa Simbahan aron ikaw ug ako makapahimulos sa daghang mga panalangin ug tanan niining pinadayag nga mga kamatuoran nga anaa kanato karon. Ang ilang kamatinud-anon dili gayod hikalimtan! …

… Ikonsiderar unsa nga halad ang inyong mahatag ngadto sa Ginoo diha sa pagkamatarong sa umaabot nga mga adlaw. Pagmaisogon—ipakigbahin kini sa laing tawo nga imong gisaligan, ug ilabi na, palihog gahini og panahon sa pagbuhat niini! Ako nasayod nga ang Manluluwas malipay kon atong ihatag Kaniya ang usa ka halad gikan sa atong kasingkasing diha sa pagkamatarong, sama nga Siya nalipay sa matinud-anong halad niadtong talagsaong managsoon, si Joseph ug Hyrum Smith, ug sa tanang matinud-anong mga Santos. (M. Russell Ballard, “Kita Dili Ba Mopadayon sa Hilabihan ka Mahinungdanon nga Katuyoan?,” Liahona, Mayo 2020, 11)

Sa unsang paagi natuman ang mga tinguha ni Hyrum sa pag-alagad sa Ginoo?

Si Presidente M. Russell Ballard sa Korum sa Napulog Duha ka Apostoles mipasabot:

Mihatag si Hyrum og kanunay nga pagserbisyo ngadto sa Simbahan. Niadtong 1829 uban siya sa pipila ka indibidwal kinsa gitugotan nga motan-aw sa bulawan nga mga palid diin nahubad ang Basahon ni Mormon, ug sa nahibilin sa iyang kinabuhi mipamatuod siya sa pagkabalaan sa Basahon ni Mormon. … Usa siya sa mga unang nabunyagan niini nga dispensasyon sa ebanghelyo. Sa edad nga traynta, siya ang labing tigulang sa unom ka tawo nga napili niadtong 1830 sa pormal nga pag-organisar sa Ang Simbahan ni Jesukristo sa mga Santos sa Ulahing mga Adlaw. … Niadtong 1833, sa dihang gipanton sa Ginoo ang Simbahan tungod sa paglangan sa pagsugod sa Templo sa Kirtland, si Hyrum ang unang nagsugod sa pagkalot sa pundasyon niini. …

Nagserbisyo si Hyrum sa Ohio bishopric, sa unang high council, isip Patriyarka, magtatambag sa Unang Kapangulohan, ug sa kataposan isip usa sa duha lamang ka tawo nga naghupot sa katungdanan sa Kaabag sa Presidente sa Simbahan.

Si Hyrum nagserbisyo og daghang mga misyon alang sa Simbahan. …

Klaro nga si Hyrum Smith mao ang usa sa lig-ong haligi sa Pagpahiuli. Apan subo lang, daghang mga miyembro sa Simbahan nga gamay ra og nahibaloan kaniya gawas nga siya gimartir uban sa iyang igsoon didto sa Bilanggoan sa Carthage. (M. Russell Ballard, “Hyrum Smith: ‘Firm as the Pillars of Heaven,’” Ensign, Nob. 1995, 7)

Asa ako makakat-on og dugang mahitungod sa kinabuhi ug sa kaliwatan ni Hyrum Smith?

Alang sa biograpikal ug impormasyon sa pamilya mahitungod ni Hyrum Smith, tan-awa sa Mga Hisgotanan sa Kasaysayan sa Simbahan, “Hyrum Smith,” ChurchofJesusChrist.org/study/history/topics.

Dugang nga mga Kalihokan sa Pagkat-on

Alternatibo nga pagsugod sa leksiyon

Sa pagsugod sa leksiyon, mahimong basahon sa mga estudyante ang Doktrina ug mga Pakigsaad 11:3, 8, 10, 14, 17, 21, ug 27, markahan ang mga pulong nga tinguha, mga tinguha, o nagtinguha sa matag higayon nga makita nila kini diha sa ilang mga kasulatan. Pagkahuman, mahimo nimong hisgotan uban sa mga estudyante kon nganong sa ilang hunahuna ang Manluluwas nagpakabana pag-ayo sa atong mga tinguha.

“[Pagtinguha sa] pagbaton sa akong pulong”

Aron matabangan ang mga estudyante nga makakita nga si Hyrum misunod sa tambag sa Ginoo, ikonsiderar ang pagdapit kanila sa pagbasa sa Doktrina ug mga Pakigsaad 23:3. Kini nga seksiyon nadawat hapit usa ka tuig pagkahuman sa seksiyon 11. Dapita ang mga estudyante sa pagpangita og piho nga panalangin nga gisaad kang Hyrum diha sa Doktrina ug mga Pakigsaad 11:21–22 nga iyang nadawat sa 23:3. Dayon mahimo kang mangutana sama sa mosunod:

• Sumala sa 11:21–22, unsay gidapit kang Hyrum nga buhaton aron maandam nga ang iyang dila makasulti? (Niini nga kahimtang, ang pagkahimo sa iyang dila nga makasulti nagpasabot sa pagka-adunay abilidad sa pagsulti sa mga pulong sa Dios pinaagi sa inspirasyon.)

• Sa unsang paagi kini nga mga bersikulo magamit sa usa ka tawo karon kinsa nagtinguha sa pagpakigbahin sa ebanghelyo ngadto sa uban?