Awhaga ang mga tigkat-on sa pagpakigbahin sa mga kamatuoran nga ilang nakat-onan.

Kahanas

Tabangi ang mga estudyante nga mohimo o magsugod og mga panag-istoryahanay bahin sa ebanghelyo.

Ipasabot

Ang Ginoo nagsugo sa kabatan-onan ug sa mga young adult sa pagtabang sa pagpundok sa Israel. Ang pagpakigbahin sa ilang mga gituohan ug mga pagpamatuod ngadto sa uban makadapit og dugang nga pagkat-on ug mapalawom ang ilang pagkakabig ngadto sa Manluluwas ug sa Iyang ebanghelyo. Ang uban nga mga estudyante nanglimbasog sa pagkahibalo kon unsaon sa pagsugod niining panag-istoryahanay bahin sa ebanghelyo. Ang mga estudyante makasugod og panag-istoryahanay bahin sa ebanghelyo ngadto sa uban pinaagi sa (1) pagkonsiderar kon unsa ang ilang nakat-onan mahitungod ni Jesukristo ug sa Iyang ebanghelyo, (2) pagpamalandong kon si kinsa ang makabenepisyo gikan sa panaghisgotan, ug (3) pagdesisyon kon unsaon nila sa pag-aghat og usa ka panaghisgotan uban niana nga indibidwal. Kini mahimong matuman pinaagi sa nagkadaiya nga mga pamaagi, sama sa pagtudlo sa Dali, Sunod Kanako nga leksiyon, mosangpot ngadto sa usa ka panaghisgotan sa klase, pagsulat, pagpadala og mensahe sa text, o pagpakigbahin sa usa ka artikulo mahitungod sa Simbahan. Ang katuyoan dili ang pagpaambit sa gituohan o kasinatian apan sa pagpasiugda hinoon og usa ka panag-istoryahanay bahin sa ebanghelyo. Ang pagbuhat sa ingon makadapit sa uban sa pagpangutana ug pag-awhag og dugang nga panag-istoryahanay sa umaabot.

Pahinumdom: Kon ikaw adunay mga estudyante kinsa mahadlokon sa pagbuhat niini, ikonsiderar kon unsaon nimo sa pagtabang kanila nga mokonektar ngadto ni Jesukristo. Siya motabang kanila samtang sila moabli sa ilang mga ba-ba sa pagpaambit sa Iyang kamatuoran.

Modelo

Dapit sa hinapos sa klase, dapita ang imong mga estudyante sa pagpamalandong kon kang kinsa nila gustong mopakigbahin og usa ka butang. Dapita sila sa pagsulat og gamayng mubo nga sulat o mopadala og text nga makahatag og kahigayonan nga sila makabaton og panag-istoryahanay bahin sa ebanghelyo niana nga tawo kon sila magkita sa usag usa. Pananglitan, ang mga estudyante maka-text nga:

• “Naghisgot mi og butang sa seminary karon diin nakahunahuna ko nimo. Pahinumdomi ko sa pagsulti nimo bahin niini kon magkita ta sa sunod.”

• “Oy, naghunahuna ko bahin sa abilidad sa Manluluwas sa pagpasaylo. Makatabang ka ba nako nga maghunahuna og mga butang bahin Kaniya? Kon mao, kanus-a kaha ang maayong higayon nga mag-istorya?”

Iklik dinhi aron makakita og bidyo niini nga modelo.

Pagpraktis

Paghimo og tulo pa ka hugpong sa mga pulong nga imong magamit isip ehemplo sa pagtabang sa mga estudyante nga makita kon unsaon sa pagsugod og panag-istoryahanay bahin sa ebanghelyo.

Hisgoti o Pamalandongi

• Unsa ang imong nakat-onan mahitungod sa pagtabang sa mga tigkat-on nga makahimo o makasugod og panag-istoryahanay bahin sa ebanghelyo?

• Sa unsang paagi ang pagtabang sa mga tigkat-on sa pagpaambit sa ilang mga gituohan ug mga pagpamatuod uban sa ilang pamilya makatabang sa ilang kasinatian sa seminary o institute nga mahimong usa ka tinuod nga kasinatian nga nakasentro sa panimalay?

Iapil

Ipaambit sa imong mga estudyante ang pipila ka mga ehemplo bahin sa unsa ang ilang masulat aron makasugod og usa ka panag-istoryahanay bahin sa ebanghelyo, ug dayon magpraktis sa pagpaambit niini diha sa klase. Hangyoa ang ubang mga estudyante nga motabang nila nga molambo. Dapita sila sa pagsugod og panag-istoryahanay kon sila andam na.

Gusto pa og Dugang?

• Russell M. Nelson, “How to Share the Gospel,” New Era, Hulyo 2011, 48

• “Pagpakigbahin sa Ebanghelyo,” ChurchofJesusChrist.org

Kahanas

Andama ang mga imbitasyon alang sa mga estudyante sa pagpakigbahin sa usag usa kon unsa ang ilang nakat-onan.

Ipasabot

Mga imbitasyon nga makatabang sa mga istudyante nga mopakigbahin unsa ang ilang nakat-onan yano, klaro ug piho. Kini mao ang mga panudlo nga makatabang sa mga estudyante sa pagtudlo, pagpasabot, pagpakigbahin, pagpangutana, o pagpamatuod sa usag usa. Kini nga mga imbitasyon kasagaran maglakip og mga elemento sama sa mosunod:

• Nganong sila nagpakigbahin.

• Unsa ang ipakigbahin.

• Kanus-a ug kinsa ang ilang pakigbahinan.

Mahimong kinahanglan nimong hatagan ang mga estudyante og panahon sa pag-andam sa pagpakigbahin sa ilang mga hunahuna. Kini mahimong mga imbitasyon sa pagpakigbahin ngadto sa usa ka tawo, sa ginagmay nga mga grupo, o sa tibuok klase. Ang pagdapit sa mga estudyante sa pagpakigbahin kon unsa ang ilang nakat-onan sa usag usa mao ang usa ka buhat sa hugot nga pagtuo nga makatugot sa Espiritu Santo sa pagbayaw sa tanang mga estudyante nga naapil diha sa panag-istoryahanay.

Modelo

Ania ang pipila ka mga ehemplo kon unsa ang mahimong kahimtang diha sa usa ka lawak klasehanan:

• “Salamat sa paggahin og panahon sa pagbasa 3 Nephi 11:10–15. Gusto kong mohatag kaninyo og usa ka opportunidad sa pagpakigbahin og butang nga inyong nakat-onan mahitungod ni Jesukristo ug kon nganong kini importante nganha kaninyo. Mahimo bang moatubang kamo palihog ngadto sa tawo nga naglingkod tupad ninyo ug magpuli-puli sa pagpakigbahin sa inyong nakat-onan mahitungod ni Jesukristo niining mga bersikulo ug kon nganong kini importante diha kaninyo?”

• “Paggahin og usa o dugang pa nga minuto sa pagsulat kon unsa ang inyong nakat-onan gikan sa kasinatian ni Pedro uban ni Jesukristo sa Mateo 14:22–33. Ako nakahibalo nga ang matag usa kaninyo adunay butang nga bililhon nga ipakigbahin. Kinsa man ang andam nga mosugod sa pagpakigbahin og usa ka butang nga inyong nakat-onan gikan sa kasinatian ni Pedro uban ni Jesukristo?”

• “Sa usa ka gutlo mobalhin kita ngadto sa ginagmay nga mga grupo aron hisgotan kon unsa ang inyong nakat-onan mahitungod sa pagpadako sa hugot nga pagtuo diha ni Jesukristo. [Hatagi ang mga estudyante og usa ka minuto, ug dayon ihatag ang sunod nga bahin sa imbitasyon.] Mahimo bang inyong organisahon ang inyong kaugalingon palihog ngadto sa grupo nga tinagutlo o tinagop-at? [O sa usa ka mas dako nga klase mahimo nimong ibutang sila sa mga grupo.] Kon kamo anaa na ngadto sa inyong mga grupo, pagpuli-puli sa pagpakigbahin og kasinatian diin ang inyong hugot nga pagtuo ni Jesukristo napalig-on.”

Pagpraktis

• Tan-awa ang imong labing bag-o nga plano sa leksiyon ug pag-andam og usa ka imbitasyon alang sa imong mga estudyante aron mopakigbahin sa unsay ilang nakat-onan diha sa grupo nga tinagurha o tinagutlo.

• Motan-aw sa usa ka hut-ong sa kasulatan diha sa kurikulum nga imong gusto nga itudlo sa umaabot. Pag-andam og usa ka imbitasyon nga motugot sa mga estudyante sa pagpakigbahin og personal nga kasinatian o pagpamatuod ngadto sa laing tawo nga ilang gikatupad.

Iapil

• Sa imong pag-andam sa leksiyon sa mosunod nga pipila ka mga semana, seguroa nga imong maapil ang labing minos usa ka oportunidad sa matag leksiyon alang sa mga estudyante aron mopakigbahin kon unsa ang ilang nakat-onan sa usag usa, mahimong magpares o sa ginagmay nga grupo.

Hisgoti o Pamalandongi

• Unsa nga kalainan ang mahimo niini sa kinabuhi sa estudyante?

• Sa unsang paagi nga inyong nakita ang pipila ka mga benipisyo sa mga estudyante sa pagpakigbahin ngadto sa uban?

Gusto pa og Dugang?

• “An Evening with Elder David A. Bednar” (gabii uban sa General Authority, Peb. 7, 2020), ChurchofJesusChrist.org

• Doktrina ug mga Pakigsaad 88:122