Dapita ang mga tigkat-on sa pagpangandam sa pagkat-on.

Kahanas

Paghimo og mga imbitasyon nga motabang sa mga tigkat-on nga mangandam alang sa sunod nga kasinatian sa pagkat-on.

Ipasabot

Human sa pagtudlo sa pipila sa Iyang mga sumusunod didto sa Amerika, ang Manluluwas midapit kanila nga “i-andam ang [ilang] mga hunahuna alang sa ugma, ug Ako moanha kaninyo pag-usab” (3 Nephi 17:3). Ang pagdapit sa mga estudyante sa pag-andam sa pagkat-on usa ka mahinungdanon nga bahin sa pagtabang kanila nga mahimong masayod sa kamatuoran alang sa ilang kaugalingon (tan-awa sa Joseph Smith—Kasaysayan 1:20). Kini nga mga imbitasyon mohatag og usa ka oportunidad alang sa mga estudyante nga makabaton og kasinatian sa usa ka tudling sa kasulatan o kamatuoran sa dili pa sila motambong sa klase. Ang mga imbitasyon sa pag-andam moabot sa daghang matang. Kini sa kasagaran mugbo, yano nga mga kapahayag nga naglakip sa:

• Tudling sa kasulatan o kamatuoran nga hisgotan sa umaabot nga leksiyon.

• Usa ka paagi alang sa mga estudyante nga mahimong interesado sa pulong sa Dios. Sama pananglit, ang mga estudyante mahimong magtuon, mogamit, maghisgot, o mangutana ug mamalandong sa mga pangutana mahitungod sa unsay ilang kat-onan.

Ang Espiritu Santo makadasig kanimo atol sa pagpangandam sa leksiyon ug sa kasinatian sa pagkat-on og mga imbitasyon nga labing makatabang sa mga estudyante nga mahimong andam sa pagkat-on. Ang kurikulum kasagaran aduna niini nga mga matang sa mga imbitasyon nga gilakip sa mga materyal sa leksiyon.

Modelo

1. Si Sister Mendez gusto nga motabang sa iyang mga estudyante nga mobati og paglaom samtang magtuon sila sa 2 Timoteo. Naghimo siya sa imbitasyon: “Samtang kamo magtuon sa 2 Timoteo niining semanaha, pangitaa ang mga bersikulo nga maghatag kaninyo og paglaom pinaagi ni Jesukristo ug ipakigbahin ang usa ka butang nga inyong nakat-onan ngadto sa laing tawo.”

2. Si Brother Bradshaw nag-andam sa pagtudlo mahitungod sa serbisyo gamit ang pakigpulong ni Hari Benjamin. Siya nag-andam sa imbitasyon: “Pangita og usa ka paagi sa pagserbisyo og usa ka tawo niini nga semana ug tambong sa klase nga andam sa pagpakigbahin samtang kita magtuon Mosiah 2–4.”

Pagpraktis

1. Ikaw magtudlo mahitungod sa Kristohanon nga hiyas sa pailob sa sunod nga leksiyon. Paghimo og usa ka imbitasyon nga imong mahatag sa klase karon aron ang mga estudyante andam nga motambong sa sunod nga higayon.

2. Pagpili og usa ka tudling sa kasulatan o kamatuoran sa usa ka umaabot nga leksiyon sa kurikulom ug paghimo og imbitasyon nga mag-andam sa mga estudyante sa pagkat-on.

Hisgoti o Pamalandongi

• Unsa ang imong nakat-onan mahitungod sa paghimo og mga imbitasyon aron sa pagtabang sa mga estudyante nga makat-on?

• Sa unsa nga mga paagi nga imong nakita nga ang pagpangandam sa usa ka tigkat-on nakatampo ngadto sa usa ka kasinatian sa pagkat-on?

Iapil

• Paghatag og usa ka imbitasyon sa usa ka umaabot nga leksiyon aron ang mga estudyante adunay butang nga buhaton gawas sa klase aron mag-andam sa sunod nga kasinatian sa pagkat-on. Timbang-timbanga unsa ang imong nakat-onan pagkahuman. Pagtinguha og feedback gikan sa imong mga estudyante aron padayon nga mapalambo ang mga imbitasyon nga imong ihatag.

Gusto pa og Dugang?

• “Unsaon Nako Pagtabang ang mga Tawo nga Mohimo ug Motuman sa mga Pasalig?” Isangyaw ang Akong Ebanghelyo: Usa ka Giya sa Misyonaryo nga Pangalagad (2004), 237–246

• “Gidapit sa Manluluwas ang Uban sa Pagpangdam sa Pagkat-on,” Pagtudlo Sumala sa Pamaagi sa Manluluwas (2022), 26

• Jan E. Newman, “Pagtudlo Sumala sa Pamaagi sa Manluluwas,” Liahona, Mayo 2021, 16–19