Leksiyon 18: Doktrina ug mga Pakigsaad 6-9

Ang Paghubad sa Basahon ni Mormon

“Ang Gasa ug Gahom sa Dios”

Uban ni Oliver Cowdery nga nag-alagad isip iyang tigsulat, si Joseph Smith nakahimo og milagroso nga pag-uswag sa paghubad sa Basahon ni Mormon atol sa tingpamulak sa 1829. Samtang wala kita masayod sa piho nga mga detalye kon giunsa paghubad ni Joseph Smith ang Basahon ni Mormon, nasayod kita nga iya kining gibuhat pinaagi sa gasa ug sa gahom sa Dios. Kini nga leksiyon gituyo aron sa pagtabang sa mga estudyante sa pagpalig-on sa ilang pagpamatuod nga ang Dios mihatag og paagi ug gahom ni Joseph Smith sa paghubad sa Basahon ni Mormon alang kanato.

Posibleng mga Kalihokan sa Pagkat-on

Gigikanan sa Basahon ni Mormon

Ikonsiderar ang pagsugod sa klase pinaagi sa pagpakigbahin sa mosunod nga senaryo. Mahimo nimong hatagan ang mga estudyante og kahigayonan nga mag-drama-drama uban sa usa ka pares o diha atubangan sa klase.

Handurawa nga usa ka adlaw imong gipakigbahin sa usa sa imong maayong mga higala ang imong pagtuo nga ang Basahon ni Mormon usa ka kasulatan sama sa Biblia. Ang imong higala ingon og nasurprisa og gamay ug miingon nga siya gitudloan nga si Joseph Smith misulat sa Basahon ni Mormon gikan sa iyang imahinasyon.

• Unsa kaha ang pipila ka mga paagi nga mahimo kang motubag niini nga sitwasyon?

Ipasabot nga kini nga leksiyon makatabang sa mga estudyante nga makat-on mahitungod sa pipila ka mga detalye nga may kalabotan sa paghubad ni Joseph Smith sa Basahon ni Mormon. Dapita ang mga estudyante sa pagpangita og mga kamatuoran samtang magtuon sila nga makatabang kanila sa mga sitwasyon nga sama niini ug makapalig-on sa ilang pagpamatuod nga ang Basahon ni Mormon gikan sa Dios.

Oliver Cowdery mitabang sa paghubad

Ikonsiderar ang pagpangutana sa mga estudyante kon unsay ilang nahinumdoman mahitungod sa mga kahimtang nga may kalabotan ni Oliver Cowdery nga mitabang ni Joseph Smith sa paghubad sa Basahon ni Mormon. Kon gikinahanglan, tan-awa ang “Doktrina ug mga Pakigsaad 6” nga leksiyon o Mga Santos, vol. 1, Ang Sumbanan sa Kamatuoran, 65–67.

Sulod sa duha ka adlaw sa pag-abot sa Harmony, Pennsylvania, aron makigkita ni Joseph Smith, si Oliver Cowdery misugod sa pagtrabaho isip tigsulat ni Joseph. Sa wala madugay si Joseph ug Oliver nakahimo og milagrosong pag-uswag sa paghubad sa Basahon ni Mormon. Gibanabana kadto nga, uban ni Oliver isip iyang tigsulat, nahuman ni Joseph Smith ang paghubad sa Basahon ni Mormon sulod sa mga 65 ka adlaw sa pagtrabaho (tan-awa sa Russell M. Nelson, “A Treasured Testament,” Ensign, Hulyo 1993, 61).

Mga paghulagway ni Joseph Smith sa paghubad

Ikonsiderar ang pagpangutana sa mga estudyante kon unsay ilang nahibaloan kon giunsa paghubad ni Joseph Smith ang Basahon ni Mormon sa milagrosong paagi.

Ang mosunod nga kinutlo gikan sa Gospel Topics Essay nga giulohan og “Book of Mormon Translation” makatabang sa mga estudyante nga makasabot unsay gusto ni Joseph Smith nga mahibaloan sa kalibotan mahitungod sa paghubad.

Sa pasiuna sa 1830 nga edisyon sa Basahon ni Mormon, si Joseph Smith misulat: “Ako mopahibalo kaninyo nga ako mihubad [sa basahon], pinaagi sa gasa ug sa gahom sa Dios.” Sa dihang gipugos alang sa piho nga mga detalye mahitungod sa proseso sa paghubad, gisubli ni Joseph sa daghang higayon nga kini nahimo “pinaagi sa gasa ug sa gahom sa Dios” ug sa makausa midugang, “Dili kini tuyo nga isulti sa kalibotan ang tanang detalye bahin sa pag-abot sa basahon ni Mormon.” (Gospel Topics Essays, “Book of Mormon Translation,” ChurchofJesusChrist.org)

• Unsa nga mga kamatuoran ang atong makat-onan gikan sa pamahayag ni Joseph Smith mahitungod sa paghubad sa Basahon ni Mormon?

  Tabangi ang mga estudyante sa pag-ila sa kamatuoran nga gihubad ni Joseph Smith ang Basahon ni Mormon pinaagi sa gasa ug sa gahom sa Dios.

• Ngano nga importante nga mahibaloan nga ang Basahon ni Mormon gihubad pinaagi sa gahom sa Dios kay sa pinaagi ni Joseph Smith?

Mga instrumento sa paghubad

Ang mosunod makatabang sa mga estudyante nga makasabot og gamay mahitungod sa mga instrumento nga gihatag sa Dios kang Joseph Smith aron sa pagtabang sa iyang mga paningkamot sa paghubad sa Basahon ni Mormon.

Sa dihang si anghel Moroni mipakita kang Joseph Smith niadtong 1823, mihatag siya og mga panudlo ngadto sa Propeta kon sa unsang paagi moabot ang Basahon ni Mormon.

Basaha ang Joseph Smith—Kasaysayan 1:34–35 ug pangitaa kon unsa nga mga instrumento ang giandam sa Dios alang sa paghubad sa Basahon ni Mormon.

Kon gitinguha, mahimo usab nimong dapiton ang mga estudyante sa pagbasa sa Mormon 9:34 ug Ether 3:23–24 aron matabangan sila nga makasabot nga ang mga propeta sa Basahon ni Mormon nakasabot nga ang Dios mag-andam og paagi nga ang ilang mga pulong mahubad.

• Sa unsang mga paagi giandam sa Ginoo ang Basahon ni Mormon alang sa paghubad?

Aron matabangan ang mga estudyante nga mas makasabot sa mga detalye mahitungod sa paggamit ni Joseph Smith og pisikal nga mga instrumento sa paghubad sa Basahon ni Mormon, ikonsiderar ang pagpakita sa bidyo nga “Seer Stone” (3:47), anaa sa ChurchofJesusChrist.org. Sa laing paagi, mahimo nimong ipamubo ang mosunod nga impormasyon o dapita ang usa ka estudyante sa pagbasa niini ngadto sa klase.

Ang ulahing mga asoy sa kasaysayan nag-ingon nga agig dugang sa paggamit sa Urim ug Thummim (usahay gitawag og mga Maghuhubad sa Nephite o anteyohos [spectacles]) sa paghubad sa Basahon ni Mormon, si Joseph Smith migamit og laing instrumento nga gitawag og bato sa manalagna. Ang Propeta nakadiskobre niini nga instrumento pipila ka tuig sa wala pa niya makuha ang bulawan nga mga palid.

Wala kita mahibalo sa daghang mga detalye kon giunsa paggamit ni Joseph kini nga mga instrumento nga giandam sa Dios. Apan ang mga saksi miingon nga usahay ibutang ni Joseph ang Urim ug Thummim o ang bato sa manalagna ngadto sa usa ka kalo aron mapugngan ang kahayag, nga nagtugot kaniya nga mas makakita sa mga pulong nga makita diha sa pisikal nga mga instrumento (tan-awa sa Gospel Topics Essays, “Book of Mormon Translation,” ChurchofJesusChrist.org).

Tabangi ang mga estudyante nga makasabot nga samtang kita nasayod sa pipila ka mga detalye nga may kalabotan sa paghubad ni Joseph Smith sa Basahon ni Mormon, adunay daghan nga wala nato mahibaloi mahitungod sa proseso sa paghubad. Ang labing importante nga kamatuoran mao nga ang gahom sa Dios nakahimo sa Iyang pulong nga mapadala ngadto sa Iyang mga anak.

Ikonsiderar ang paggamit sa usa o sa labaw pa sa mosunod nga mga kapanguhaan aron matabangan ang mga estudyante nga mobati nga ang Basahon ni Mormon gihubad pinaagi sa gasa ug sa gahom sa Dios.

• Ang “Mga Tingog sa Pagpahiuli” nga seksiyon sa “Doktrina ug mga Pakigsaad 6–9: Kini Mao ang Espiritu sa Pagpadayag,” Dali Sunod Kanako—Alang sa Panimalay ug Simbahan: Doktrina ug mga Pakigsaad 2025

• “Days of Harmony” gikan sa time code 7:18 hangtod sa 11:33

• Ang paghulagway ni Oliver Cowdery sa proseso sa paghubad ingon nga narekord sa Joseph Smith—Kasaysayan (makita diha sa unang parapo sunod sa bersikulo 75)

  Mahimo nimong dapiton ang mga estudyante sa paghisgot sa mosunod nga mga pangutana diha sa gagmay nga mga grupo o sa mga paresan sa dili pa sila dapiton sa pagpakigbahin sa ilang mga tubag ngadto sa klase.

• Unsa nga mga pulong o mga hugpong sa mga pulong gikan ni Emma o Oliver ang nagsuporta sa pagpamatuod ni Joseph Smith nga ang Basahon ni Mormon gihubad pinaagi sa gasa ug sa gahom sa Dios?

• Unsa ang imong nakat-onan o gibati mahitungod sa Dios human makahibalo kon sa unsang paagi si Joseph Smith nahimong instrumento sa Iyang mga kamot sa paghubad sa Basahon ni Mormon?

Ang gahom sa Basahon ni Mormon diha sa imong kinabuhi

Ipasabot nga usa sa labing maayo nga mga paagi nga atong mahibaloan nga ang Basahon ni Mormon gihubad pinaagi sa gasa ug sa gahom sa Dios mao ang pagtuon niini ug pagsinati sa gahom sa Dios pinaagi sa pagsunod sa mga pagtulun-an niini.

Hatagi og panahon ang mga estudyante sa pagpangita og bersikulo o istorya gikan sa Basahon ni Mormon nga nakaapekto sa ilang mga kinabuhi. Kon maglisod ang mga estudyante sa pagpangita, ikonsiderar ang paghatag og tabang o giya, sama sa pagdapit kanila sa pagtuon sa pipila ka mga tudling sa doktrinal nga kahanas sa Basahon ni Mormon. Mahimo ka usab nga mosugyot og pipila ka mga bersikulo nga mahimo nilang tun-an.

• Unsa ang bersikulo o istorya gikan sa Basahon ni Mormon nga nakaapekto sa imong kinabuhi?

• Sa unsang paagi nga kini nga bersikulo o istorya nakaimpluwensiya sa imong mga pagbati ngadto sa Langitnong Amahan ug ni Jesukristo?

Ikonsiderar ang pagpamatuod ngadto sa mga estudyante nga ang kalig-on nga mahimo nilang madawat gikan sa pagtuon sa Basahon ni Mormon mao ang pagkompirma sa gahom sa Dios sa pagpadala sa Basahon ni Mormon.

Dugang nga mga Kapanguhaan

Ngano nga gamay ra ang atong nahibaloan kon sa unsang paagi nahitabo ang paghubad?

Si Elder Neal A. Maxwell (1926–2004) sa Korum sa Napulog Duha ka Apostoles mitudlo:

Ngano nga wala kitay dugang nga pagpadayag mahitungod sa proseso sa paghubad sa Basahon ni Mormon? Tingali ang tibuok proseso wala ibutyag tungod kay dili kita andam sa pagsabot niini, bisan kon ihatag. Tingali, usab, gusto sa Ginoo nga ibilin ang Basahon ni Mormon diha sa dapit sa hugot nga pagtuo, bisan og puno kini sa tinuod nga ebidensiya. Bisan sa tanan, si Kristo mitudlo kang Mormon, kinsa nagrebyo sa kaugalingong mga pagtulun-an sa Manluluwas taliwala sa mga Nephite, nga dili irekord ang tanan niini diha sa mga palid tungod kay “Ako mosulay sa hugot nga pagtuo sa akong mga katawhan” (3 Ne. 26:11). Tingali ang mga detalye sa paghubad gipugngan usab tungod kay gituyo nga atong isubsob ang atong mga kaugalingon sa unod sa basahon kay sa mahimong sobra nga nabalaka sa proseso diin atong nadawat kini. (Neal A. Maxwell, “By the Gift and Power of God,” Ensign, Ene. 1997, 41)

Sa unsang paagi nga ang paghubad ni Joseph Smith sa Basahon ni Mormon usa ka milagro?

Si Presidente Russell M. Nelson mitudlo:

Hunahunaa ang mubo nga panahon nga gihubad ni Joseph ang Basahon ni Mormon. Nagtrabaho gikan sa Abril hangtod sa Hunyo 1828, gihubad ni Joseph ang 116 ka pahina nga sa wala madugay giwala ni Martin Harris. Misugod si Joseph sa paghubad pag-usab sa Martes, Abril 7, 1829, uban ni Oliver Cowdery isip tigsulat. Ang manuskrito nahuman paglabay sa otsenta y singko ka adlaw, sa pagka-Hunyo 30 niana nga tuig. Siyempre, dili tanan niana nga panahon ang gigahin sa trabaho sa paghubad. … Sa konserbatibong pagbana-bana, aduna na lay sayes sinta y singko o minos pa nga mga adlaw tingtrabaho diin ang propeta ug ang iyang mga tigsulat mihubad niini nga basahon, nga naglangkob og 531 ka mga pahina sa kasamtangang edisyon niini. (Tan-awa sa John W. Welch, Ensign, Ene. 1988, pp. 46–47.) Kana nagbana-bana og gidaghanong walo ka pahina matag adlaw. Hunahunaa kini kon maghubad ka og basahon, o samtang mag-iskedyul ka sa imong kaugalingong pagbasa sa Basahon ni Mormon. (Russell M. Nelson, “A Treasured Testament,” Ensign, Hulyo 1993, 61–62)

Sa unsang paagi nga ang Basahon ni Mormon mahimong usa ka kasinatian sa pagpadayag alang kanako?

Si Elder Kim B. Clark, emeritus General Authority sa Seventy, mitudlo:

Ang Basahon ni Mormon mahimo usab nga kasinatian sa pagpadayag alang kaninyo, sama kang Joseph.

Ang mga propeta nga misulat sa Basahon ni Mormon nakakita sa atong panahon. Misulat sila kanato. Ang ilang mga pulong namulong sa atong panahon, atong mga panginahanglan, ug atong mga katuyoan. Kon bukas ang inyong kasingkasing samtang magbasa ug mag-ampo kamo mahitungod sa Basahon ni Mormon, ang Espiritu Santo “mopakita sa kamatuoran niini nganha kaninyo” [Moroni 10:4]. (Kim B. Clark, “Thou Art Joseph” [tibuok kalibotan nga debosyonal alang sa mga young adult, Mayo 7, 2017], ChurchofJesusChrist.org)

Dugang nga mga Kalihokan sa Pagkat-on

Pagtutok sa kon unsa ang labing mahinungdanon

Sa dili pa dapiton ang mga estudyante sa pagpakigbahin og mga bersikulo o mga istorya gikan sa Basahon ni Mormon nga nakaapekto sa ilang mga kinabuhi, mahimo nimong ipakita ang bidyo nga “How Did Joseph Smith Translate the Book of Mormon?” (8:06). Niini nga bidyo, si Elder Quentin L. Cook sa Korum sa Napulog Duha ka Apostoles ug si Kate Holbrook (1972–2022), kanhi tigtipig sa kasaysayan sa Simbahan, mipakigbahin kon sa unsang paagi ang ilang mga pagpamatuod sa Basahon ni Mormon mas importante kay sa ilang kahibalo sa mga detalye mahitungod sa proseso sa paghubad.

Pagkat-on og dugang mahitungod sa mga instrumento nga gihatag sa Dios

Samtang imong hisgotan ang paggamit ni Joseph Smith sa pisikal nga mga instrumento sa paghubad sa Basahon ni Mormon, ikonsiderar ang pagpangutana sa mga estudyante kon nakahibalo ba sila og laing mga higayon nga ang Dios migamit og mga instrumento o mga butang sa pagpakita sa Iyang gahom. Ang mosunod nga pamahayag gikan sa Gospel Topics essay sa hubad sa Basahon ni Mormon mahimong gamiton isip kabahin niini nga panaghisgotan:

“Dugang pa sa Urim ug Thummim, ang Biblia naghisgot sa ubang pisikal nga mga instrumento nga gigamit aron magamit ang gahom sa Dios: ang sungkod ni Aaron, usa ka tumbaga nga bitin, balaan nga mga lana sa pagdihog, ang Arko sa Pakigsaad, ug bisan ang lapok gikan sa yuta nga gisaglan og laway aron sa pag-ayo sa mga mata sa buta nga tawo” (Gospel Topics Essays, “Book of Mormon Translation,” ChurchofJesusChrist.org).

Mahimo usab nimong dapiton ang mga estudyante sa pagtuon sa mga entry alang sa “Urim ug Thummim” diha sa Giya ngadto sa mga Kasulatan aron sa pagkat-on og dugang mahitungod niini nga mga instrumento ug mahitungod sa ubang mga higayon nga kini gigamit sa kasaysayan. Mahimo dayon kang magdapit og usa o duha ka boluntaryo sa pagpamubo sa ilang nakat-onan.