Leksiyon 19: Doktrina ug mga Pakigsaad 6-9

Doktrina ug mga Pakigsaad 8

“Ang Espiritu sa Pagpadayag”

Si Oliver Cowdery nakadayeg sa abilidad ni Joseph Smith sa paghubad sa Basahon ni Mormon. Gusto niya nga hatagan siya sa Dios sa samang gasa. Ang Ginoo misaad kang Oliver sa gasa sa paghubad, sumala sa iyang hugot nga pagtuo. Nianang panahona, si Jesukristo mitudlo kang Oliver og daghang importante nga mga baroganan mahitungod sa pagpadayag. Kini nga leksiyon makatabang sa mga estudyante nga madugangan ang ilang abilidad sa pag-ila kon sa unsang paagi ang Dios nakigsulti kanila pinaagi sa Espiritu Santo.

Posibleng mga Kalihokan sa Pagkat-on

Mga pangutana mahitungod sa pagpadayag

Aron matabangan ang mga estudyante nga makasugod sa pagtuon mahitungod sa pagpadayag, ikonsiderar ang pagpakigbahin sa mosunod:

Gusto sa Dios nga makigsulti kanato ug nagbuhat niini sa nagkalainlaing mga paagi. Pinaagi sa Espiritu Santo, ang Dios nagtinguha “sa pagtabang kanato sa atong piho nga personal nga mga panginahanglan, mga responsibilidad, ug mga pangutana ug aron sa pagtabang kanato sa paglig-on sa atong pagpamatuod” (Topics and Questions, “Revelation,” topics.ChurchofJesusChrist.org).

• Unsa ang pipila ka mga pangutana nimo, o sa uban nga imong nailhan, mahitungod sa pag-ila sa pagpadayag gikan sa Dios?

  Ikonsiderar ang paghangyo sa mga estudyante sa pagsulat sa ilang mga pangutana diha sa pisara o sa papel. Mahimo nimong dapiton ang mga estudyante sa pagpangita og mga tubag samtang magtuon sila karon. Dili kinahanglan nga tubagon ang tanang mga pangutana diha sa klase, apan mahimong isulat sa mga estudyante ang bisan unsang mga ideya nga ilang madiskobrehan. Mahimo nimong gamiton ang mosunod nga mga pangutana aron matabangan ang mga estudyante sa paghunahuna kon nganong ang mga tawo adunay mga pagduhaduha mahitungod sa pagpadayag.

• Ngano nga lisod ang pag-ila kon kanus-a ug sa unsang paagi nakigsulti ang Dios kanato?

• Ngano sa imong hunahuna nga importante man ang pagpalambo sa atong abilidad sa pag-ila ug pagsunod sa pagpadayag gikan sa Dios?

Mahimo nimong hangyoon ang mga estudyante nga magsugod og pahina sa ilang journal sa pagtuon o maghimo og mubo nga sulat diha sa Gospel Library nga app, diin ilang marekord unsa ang ilang nakat-onan mahitungod sa pagpadayag gikan sa Ginoo. Mahimo kang mohatag og ehemplo pinaagi sa pagbuhat og sama sa ingon diha sa pisara. Ikonsiderar ang pagsugod nga adunay ulohan sama sa Unsaon nako pagkahibalo nga nakadawat ko og pagpadayag gikan sa Dios?

Ang Ginoo mitudlo kang Oliver Cowdery mahitungod sa pagpadayag

Samtang nag-alagad isip tigsulat, si Oliver Cowdery nakasaksi nga ang Ginoo mihatag kang Joseph Smith og gahom sa paghubad sa Basahon ni Mormon. Gusto usab ni Oliver nga mohubad. Ang Ginoo miuyon sa paghatag kaniya og kahigayonan (tan-awa sa Doktrina ug mga Pakigsaad 6:25). Aron matabangan si Oliver nga magmalamposon, ang Ginoo mitudlo og importante nga mga baroganan mahitungod sa pagdawat og pagpadayag.

Ang Doktrina ug mga Pakigsaad 8:2–3 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Basaha ang Doktrina ug mga Pakigsaad 8:1–3, mangita sa unsay gusto sa Ginoo nga mahibaloan ni Oliver mahitungod sa pagdawat og pagpadayag.

• Unsa ang imong nakat-onan gikan niini nga mga bersikulo kon sa unsang paagi ang Ginoo mamulong kanato pinaagi sa Espiritu Santo?

  Hangyoa ang mga estudyante sa pagreport unsay ilang nakaplagan. Lakip sa posibleng mga kamatuoran nga mahimong mahibaloan sa mga estudyante, tabangi sila nga makakita nga ang Ginoo nakigsulti sa atong mga hunahuna ug sa atong mga kasingkasing pinaagi sa Espiritu Santo.

  Pagtutok sa mga kamatuoran nga modala ngadto sa pagkakabig: Alang sa dugang nga pagbansay sa mga pangutana nga makatabang sa mga estudyante sa pag-ila ug pagsaysay sa makakabig nga mga baroganan, tan-awa ang pagbansay nga giulohan og “Paghatag og gibug-aton sa mga kamatuoran nga modala ngadto sa pagkakabig ug paglig-on sa hugot nga pagtuo diha ni Jesukristo,” makit-an sa Pagpalambo sa mga Kahanas sa Magtutudlo: Pagtudlo sa Doktrina.

  Ikonsiderar ang pagsulat niini nga kamatuoran ubos sa ulohan diha sa pisara. Ang pagdrowing og dayagram sama sa mosunod makatabang usab sa mga estudyante nga mahanduraw ang mga pagtulun-an sa Ginoo niini nga mga bersikulo.

  

• Base sa imong personal nga pagtuon ug kasinatian, unsa ang pipila ka paagi nga ang Dios makigsulti sa atong mga hunahuna? Sa unsang paagi Siya makigsulti sa atong mga kasingkasing?

Si Elder Richard G. Scott (1928–2015) sa Korum sa Napulog Duha ka Apostoles mipakigbahin sa pipila ka mga paagi nga ang Dios nakigsulti sa atong mga hunahuna ug mga kasingkasing pinaagi sa Espiritu Santo:

Mohatag ko og pagsaksi nga ang Ginoo, pinaagi sa Espiritu Santo, makasulti diha sa inyong hunahuna ug kasingkasing. Usahay ang mga impresyon kasagaran lamang nga mga pagbati. Usahay ang direksiyon moabot sa hilabihan ka klaro ug dili gayod masaypan nga mahimo kining isulat sama sa espirituhanong pagdiktar. (Richard G. Scott, “Aron Makabaton og Espirituhanong Giya,” Liahona, Nob. 2009, 9)

Mahimo nimong tabangan ang mga estudyante nga makakita og sumbanan sa komunikasyon sa hunahuna ug kasingkasing sa mosunod nga mga ehemplo nga naglambigit kang Oliver Cowdery: Doktrina ug mga Pakigsaad 6:22–24; 9:8–9. Mahimong mangita ang mga estudyante og mga pulong ug mga hugpong sa mga pulong nga gigamit sa Ginoo aron sa pagpasabot sa pipila ka mga paagi nga Siya namulong sa atong hunahuna ug kasingkasing.

Mahimong makatabang ang pagpasabot nga ang pag-init sa dughan nga gihulagway diha sa Doktrina ug mga Pakigsaad 9:8 mahimong magpasabot og “usa ka pagbati sa kahupayan ug kalinaw” (Dallin H. Oaks, “Teaching and Learning by the Spirit,” Ensign, Mar. 1997, 13).

Komunikasyon pinaagi sa Espiritu Santo

Ipasabot nga adunay daghan pang mga pagtulun-an diha sa mga kasulatan ug gikan sa modernong-adlaw nga mga lider sa Simbahan nga nagtabang kanato nga makasabot kon sa unsang paagi ang Dios nakigsulti kanato pinaagi sa Espiritu Santo. Hatagi ang mga estudyante og panahon sa pagpangita, pagtuon, ug paghisgot sa pipila niini nga mga pagtulun-an.

Usa ka paagi nga mahimo nimo kini mao ang pagdapit kanila sa paggamit sa mga himan sama sa Giya ngadto sa mga Kasulatan, ang Topical Guide, o sa search nga function sa Librarya sa Ebanghelyo aron sa pagpangita og mga kasulatan o mga pamahayag gikan sa mga lider sa Simbahan nga naghulagway sa pipila ka mga paagi nga mahimo natong maila ang pagpadayag pinaagi sa Espiritu Santo.

Laing opsiyon mao ang pagdapit sa mga estudyante sa pagtuon sa mosunod nga mga kasulatan aron makita kon unsay ilang makat-onan mahitungod sa personal nga pagpadayag:

• Juan 14:26

• Mga Taga-Galacia 5:22–23

• Helaman 5:30

• Doktrina ug mga Pakigsaad 11:12–13

Mahimo usab nimong ipakita sa mga estudyante ang bidyo nga “Patterns of Light: Discerning Light [Mga Sundanan sa Kahayag: Pagsabot sa Kahayag]” (2:12). Niini nga bidyo, si Elder David A. Bednar sa Korum sa Napulog Duha ka Apostoles mipakigbahin og mga panabot kon unsaon nato sa pag-ila sa kalainan tali sa atong kaugalingong mga hunahuna ug sa mga pag-aghat gikan sa Espiritu Santo.

Human mahatagan ang mga estudyante og igong panahon sa pagtuon, ikonsiderar ang pagdapit kanila sa pagdugang sa unsay ilang nakat-onan ngadto sa lista diha sa pisara.

Ang mga pangutana sama sa mosunod makatabang sa mga estudyante sa paghisgot sa unsay ilang nakat-onan ug nagtugot sa Espiritu Santo sa pagpamatuod ngadto sa klase.

• Unsa ang imong nakat-onan mahitungod sa nagkalainlaing mga paagi sa pagpakigsulti sa Dios kanato pinaagi sa Espiritu Santo?

• Unsa ang natabang niini nga mga pagtulun-an nga imong masabtan ang mahitungod sa kinaiya ug mga tinguha sa Langitnong Amahan ug ni Jesukristo?

• Unsa nga mga kasinatian ang imong nasinati sa pagsabot kon sa unsang paagi ang Espiritu Santo makigsulti?

Pahinumdomi ang mga estudyante sa mga pangutana nga ilang gihisgotan sa pagsugod sa klase. Dapita ang mga estudyante sa pagpakigbahin unsay ilang nakat-onan nga nakatabang sa pagtubag sa bisan hain niini nga mga pangutana. Taposa ang klase pinaagi sa pagdapit sa mga estudyante sa pagsulay sa pag-ila sa Ginoo nga namulong sa ilang mga kasingkasing ug mga hunahuna sa usa o daghan pa sa pipila ka mga paagi nga ilang nakat-onan. Tabangi ang mga estudyante nga makasabot nga ang pag-ila sa pagpadayag gikan sa Ginoo nagkinahanglan og padayon nga paningkamot sa tibuok nilang mga kinabuhi.

Isag-ulo

Mahimo usab nimong tabangan ang mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa Doktrina ug mga Pakigsaad 8:2–3 ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsa ang matabang sa Espiritu Santo nga akong masabtan?

Si Elder Quentin L. Cook sa Korumsa Napulog Duha ka Apostoles mitudlo:

Ang personal nga pagpadayag nakabase sa espirituhanon nga mga kamatuoran nga nadawat gikan sa Espiritu Santo. Ang Espiritu Santo mao ang tigpadayag ug tigpamatuod sa tanang kamatuoran, ilabi na sa Manluluwas. Kon wala ang Espiritu Santo, kita dili gayod masayod nga si Jesus mao ang Kristo. (Quentin L. Cook, “Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi,” Liahona, Mayo 2020, 98)

Unsa ang akong buhaton kon ang Dios daw dili motubag kanako?

Si Elder D. Todd Christofferson sa Korum sa Napulog Duha ka Apostoles mitubag niini nga pangutana:

Si Elder Gerrit W. Gong sa Korum sa Napulog Duha ka Apostoles mitudlo:

Samtang magkalahi ang mga sitwasyon, kon mobuhat kita kutob sa atong mahimo, ug sinserong mangayo ug magtinguha sa Iyang panabang, ang Ginoo mogiya kanato, sa Iyang panahon ug pamaagi, pinaagi sa Espiritu Santo. (Gerrit W. Gong, “Pagkasakop diha sa Pakigsaad,”Liahona, Nob. 2019, 82)

Si Elder Richard G. Scott (1928–2015) mitudlo:

Unsay inyong buhaton kon kamo nangandam og maayo, tinud-anay nga nag-ampo, naghulat og dugay alang sa tubag, ug gihapon walay gibati nga tubag? Mahimo kamong magpasalamat kon mahitabo man kana, kay kana timailhan sa pagsalig [sa Dios]. Kon kamo nagpuyo nga takos ug ang inyong pagpili uyon kanunay sa pagtulun-an sa Manluluwas ug kamo kinahanglan nga mobuhat, padayon uban sa pagsalig. … Kon kamo nagpuyo nga matarong ug nagbuhat uban sa pagsalig, ang Dios dili motugot nga kamo moabot og layo nga walay pahimangno kon nasayop kamo sa inyong desisyon. (Richard G. Scott, “Ang Paggamit sa Langitnon nga Gasa sa Pag-ampo,” Liahona, Mayo 2007, 10)

Unsa ang akong mahimo aron mahimong mas maayo sa pagdawat ug pag-ila sa pagpadayag?

Si Presidente Russell M. Nelson mitudlo:

Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—o, ang mga tinguha sa inyong kasingkasing. Ug dayon maminaw! Isulat ang mga ideya nga imong mahunahunaan. Isulat ang inyong mga gibati ug sundi kini sa paglihok sa unsay giaghat nga angay ninyong buhaton. Kon inyong balikbalikon kini nga proseso matag adlaw, matag bulan, matag tuig, kamo “molambo ngadto sa baroganan sa pagpadayag” [Mga Pagtulun-an sa mga Presidente sa Simbahan: Joseph Smith (2007), 154-155]. …

Giawhag ko kamo nga palapdan pa ang inyong kasamtangang espiritwal nga abilidad sa pagdawat og personal nga pagpadayag. …

Walay lain nga makabukas sa kalangitan sama sa kombinasyon sa nagtubo nga kaputli, hingpit nga kamasulundon, sinserong nangita, inadlaw nga pagbasa sa mga pulong ni Kristo diha sa Basahon ni Mormon, ug regular nga panahon nga ipasalig alang sa buhat sa templo ug family history. (Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95)

Unsa ang pipila sa ubang mga paagi nga ang Dios nakigsulti kanato pinaagi sa Espiritu Santo?

Si Elder David P. Homer sa Seventy mitudlo:

Ang espiritu makigsulti sa lainlaing mga tawo sa lainlaing paagi, ug Siya mahimong makigsulti sa samang tawo sa lainlaing paagi sa lainlaing panahon. Isip resulta, ang pagkat-on sa daghang paagi sa Iyang pagpakigsulti kanato usa ka makanunayong tumong sa kinabuhi. Usahay, makigsulti Siya sa atong “hunahuna ug sa [atong] kasingkasing” [Doktrina ug mga Pakigsaad 8:2] sa usa ka tingog nga gamay apan gamhanan, modulot “kanila nga … [naka]dungog ngadto sa kinahiladman” [3 Nephi 11:3]. Usahay ang Iyang mga impresyon “musulod sa [atong] [mga] hunahuna ” o “motandog … sa [atong] mga pagbati” [Doktrina ug mga Pakigsaad 128:1]. Usahay ang atong dughan “moinit diha sulod [kanato]” [Doktrina ug mga Pakigsaad 9:8]. Sa ubang panahon gihapon Iyang pun-on ang atong mga kalag sa kalipay nga makalamdag sa atong mga hunahuna [tan-awa sa Doktrina ug mga Pakigsaad 6:14–15], o mosulti og kalinaw sa atong nahasol nga mga kasingkasing [tan-awa sa Doktrina ug mga Pakigsaad 6:22–23]. (David P. Homer, “Ang Pagpaminaw sa Iyang Tingog,” Liahona, Mayo 2019, 42)

Tan-awa sa “Paminaw Kaniya” nga koleksiyon sa bidyo anaa sa ChurchofJesusChrist.org aron makakita og mga ehemplo sa mga lider sa Simbahan nga naghulagway sa nagkalainlaing mga paagi nga ilang naila kon sa unsang paagi ang Dios nakigsulti kanila.

Dugang nga mga Kalihokan sa Pagkat-on

Mga buhat aron sa pagdapit og pagpadayag

Mahimong mobati og kasagmuyo ang mga estudyante nga ang pagpadayag nga ilang gitinguha wala moabot. Mahimo nimo silang tabangan nga makat-on gikan sa mga panudlo sa Ginoo ngadto ni Oliver Cowdery sa dihang wala siya magmalamposon sa paghubad (tan-awa sa Mga Santos, vol. 1, Ang Sumbanan sa Kamatuoran, 69–71). Mahimong tun-an sa mga estudyante ang Doktrina ug mga Pakigsaad 9:7–11, mangita sa unsay gitudlo sa Ginoo kang Oliver mahitungod sa pagpangandam sa pagdawat og pagpadayag. Mahimo usab nimong gamiton ang pamahayag ni Presidente Russell M. Nelson diha sa “Dugang nga mga Kapanguhaan” isip kabahin niini nga panaghisgotan.

Mahimo nimong hangyoon ang mga estudyante sa paglista kon mahitungod sa unsa kaha nga pagpadayag ang tinguhaon sa mga tin-edyer. Ang mga tubag mahimong maglakip sa pagpalig-on sa mga pagpamatuod sa ebanghelyo ni Jesukristo, paghimo og mga desisyon sa kinabuhi, o pagdawat og mga tubag sa mga pangutana. Tabangi ang mga estudyante nga makasabot kon sa unsang paagi ang paggamit sa unsay gitudlo sa Ginoo diha sa Doktrina ug mga Pakigsaad 9:7–11 makatabang kanila.

Ang Espiritu sa pagpadayag ug si Moises

Human mabasa ang Doktrina ug mga Pakigsaad 8:2–3, tingali maayo nga hisgotan ang istorya nga gihisgotan sa Ginoo sa bersikulo 3. Mahimo kang magpakita og hulagway ni Moises ug sa mga anak sa Israel nga mitabok sa Pulang Dagat. Dapita ang mga estudyante sa pagpakigbahin og pipila ka mga detalye nga ilang nahibaloan mahitungod niini nga istorya nga narekord diha sa Exodo 14–15. Mahimo nimong hangyoon ang mga estudyante sa paghisgot kon unsa kaha kini alang kang Moises ang pagdawat og pagpadayag gikan sa Ginoo sa panahon sa iyang panginahanglan. Mahimo nimong dapiton ang mga estudyante sa paghimo og mga senaryo diin ang usa ka tawo sa atong panahon tingali magtinguha og pagpadayag gikan sa Ginoo aron sa pagtabang kaniya.