Leksiyon 96: Doktrina ug mga Pakigsaad 84

Doktrina ug mga Pakigsaad 84:49–102

“Ngadto sa Tibuok Kalibotan Diha sa Matag Linalang”

Sa tinglarag sa 1832, ang mga misyonaryo lakip ni Jared Carter ug Stephen Burnett nagsugod sa pagbalik sa Kirtland, Ohio, gikan sa pagsangyaw sa ebanghelyo ni Jesukristo. Makapalipay kadto nga panahon samtang ang mga elder nagdala og mga taho sa pagserbisyo sa Ginoo sa sidlakang Estados Unidos. Sa dili madugay daghan ang modawat ug dugang pang mga tawag sa pagpadayon sa pag-alagad. Sa atong panahon, makaserbisyo usab kita sa Ginoo pinaagi sa pagpakigbahin sa Iyang ebanghelyo. Kini nga leksiyon makatabang sa mga estudyante nga mobati sa Kristohanong tinguha sa pagpakigbahin sa ebanghelyo ngadto sa tanan sa kalibotan.

Mga Posibleng Kalihokan sa Pagkat-on

Ang tibuok kalibotan

Aron matabangan ang mga estudyante nga makaamgo kon pila ka mga anak sa Dios ang anaa dinhi sa yuta ug nagkinahanglan sa Iyang ebanghelyo, mahimo nimong sugdan ang klase pinaagi sa pagpakita og mapa sa kalibotan. Ikonsiderar ang paghangyo sa mga estudyante sa paghingalan og daghang mga nasod kutob sa ilang mahunahunaan sa usa ka minuto, o mahimo nimo silang dapiton sa pagtudlo og pipila ka mga nasod diha sa mapa. Mahimo usab nga tan-awon sa mga estudyante ang populasyon sa inyong nasod o sa kalibotan.

Pagbalhin ngadto sa paghisgot bahin sa gipahiuli nga ebanghelyo ni Jesukristo sa tibuok kalibotan. Mahimo kang mangutana og sama niini:

• Asa man nagserbisyo ang mga misyonaryo sa tibuok kalibotan? Asa nga lugar sila wala?

• Unsa man ang tibuok kalibotan nga pagkamiyembro sa Ang Simbahan ni Jesukristo sa mga Santos sa Ulahing mga Adlaw itandi sa kinatibuk-ang populasyon sa kalibotan? Unsa man ang pagkamiyembro sa Simbahan sa inyong dapit itandi sa kinatibuk-ang populasyon sa inyong lugar?

Mahimo nimong dapiton ang mga estudyante sa pagpamalandong sa kaayohan nga ilang mahimo pinaagi sa pagpili sa pagserbisyo og misyon. Basaha ang mosunod nga pamahayag ug dapita ang mga estudyante sa pagpakigbahin sa ilang mga hunahuna o mga pagbati.

Si Presidente Russell M. Nelson mitudlo sa mosunod:

Ang tanan angayan nga hatagan og kahigayonan nga mahibalo bahin sa gipahiuli nga ebanghelyo ni Jesukristo. Ang matag tawo angayan nga makahibalo asa sila makakaplag sa paglaom ug sa kalinaw nga “dili matugkad sa tawo” [Mga Taga Filipos 4:7]. (Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 7)

Hangyoa ang mga estudyante sa pagsulat og pipila ka mga ideya agi og tubag sa mosunod nga pag-aghat:

Paggahin og panahon sa pagpamalandong kon unsa ang gibati sa Dios sa tanan Niyang mga anak sa tibuok kalibotan. Unsa ang nawala sa daghang mga tawo gumikan sa wala pagkahibalo mahitungod ni Jesukristo ug sa Iyang gipahiuli nga Simbahan? Unsa ang imong nahibaloan ug unsa nga mga panalangin ang imong nasinati nga makahimo og kalainan sa kinabuhi sa ubang tawo?

Ang mga kahimtang sa kalibotan

Ang Septiyembre 1832 usa ka panahon sa kalipay sa Kirtland samtang ang mga misyonaryo nanguli gikan sa pagserbisyo og mga misyon ug mitaho sa ilang mga kasinatian sa silangan nga mga estado sa Amerika. Niini nga panahon, si Joseph Smith nakadawat og mga instruksiyon gikan sa Ginoo. Ang pipila niini nga mga instruksiyon naghisgot sa kahimtang ug panginahanglan sa kalibotan.

Basaha ang Doktrina ug mga Pakigsaad 84:49–53, mangita og mga pulong ug mga hugpong sa mga pulong nga gigamit sa Ginoo sa paghulagway kon unsa ang nasinati sa mga tawo sa kalibotan.

Dapita ang mga estudyante sa pagpakigbahin sa mga pulong ug sa mga hugpong sa mga pulong nga ilang nakaplagan ug unsay ilang gihunahuna nga gipasabot niini. Lagmit ilang hisgotan ang usa ka tema sa sala ug pagkaulipon. Mahimo usab nga mamatikdan sa mga estudyante nga ang mga tawo anaa sa kangitngit ug nag-agulo tungod niini nga mga kahimtang. Kini nagpasabot nga sila mibati nga walay mahimo, masulub-on, ug anaa sa kasakit. Mahimong ipakigbahin sa mga estudyante kon sa unsang paagi nila nakita nga ang sala maoy hinungdan sa kasakit ug kasubo ug mosangpot sa pagkaulipon. Pahimangnoi ang mga estudyante nga dili mopakigbahin og mga detalye nga mahimong mopakita og kawalay respeto sa pagkapribado sa usa ka tawo.

Ang Ginoo mihisgot nga bisan ang mga miyembro sa Iyang Simbahan nakasinati og lebel sa kangitngit ug panghimaraot nianang panahona.

Basaha ang Doktrina ug mga Pakigsaad 84:54–57 aron makita kon unsa ang hinungdan sa kangitngit ug panghimaraot sa mga miyembro sa Simbahan.

• Unsay imong nakaplagan?

• Unsa ang atong makat-onan gikan niini nga mga bersikulo mahitungod sa kamahinungdanon sa Basahon ni Mormon ug sa mga pagpadayag diha sa Doktrina ug mga Pakigsaad?

Tabangi ang mga estudyante nga makasabot kon unsa ang gibati ni Jesukristo ug sa Iyang mga tinun-an kon makita nila ang mga tawo nga nag-antos diha sa sala ug kangitngit. Mahimo nilang tun-an ang usa o duha sa mosunod nga mga tudling nga magtinagsa o diha sa gagmay nga mga grupo.

• Moises 7:26, 28, 41 (Panan-awon ni Enoch)

• Mosiah 28:3 (ang mga anak nga lalaki ni Mosiah)

• Alma 31:2 (Alma nga Batan-on)

• 3 Nephi 17:14 (Jesukristo)

• Unsa nga mga pulong ang nakatabang kanimo nga makasabot sa mga pagbati sa Manluluwas alang niadtong anaa sa sala ug kangitngit? Hunahunaa kon unsa kaha kini ang pakigbisog diha sa sala ug kangitngit.

• Sa unsang paagi nga ang pagsabot sa mga pagbati sa Ginoo makatabang?

• Sa unsang paagi sa imong hunahuna ang Basahon ni Mormon makatabang sa usa ka tawo sa pagbuntog sa espirituhanong kangitngit?

Ang tingog sa Manluluwas

Basaha ang Doktrina ug mga Pakigsaad 84:60–62, mangita sa unsay gisugo ni Jesukristo nga buhaton niini nga mga kalalakin-an. Mahimong makatabang ang pagkahibalo nga ang “niini nga mga butang” sa bersikulo 60 ug ang “niadto nga mga butang” sa bersikulo 61 nagpasabot sa gipadayag sa Ginoo diha sa seksiyon 84, nga naglakip sa paghinumdom sa Basahon ni Mormon.

• Unsay gisugo ni Jesus nga ilang pagabuhaton?

• Unsa nga mga panalangin ang ilang madawat pinaagi sa pagsunod sa Iyang direksiyon?

Tugoti nga ipakigbahin sa mga estudyante ang unsay ilang nakat-onan. Usa ka kamatuoran nga ilang mailhan mao nga gusto ni Jesukristo nga atong ipakigbahin ang Basahon ni Mormon ug ang atong mga pagpamatuod ngadto sa tanang anak sa Dios sa tibuok kalibotan.

Tabangi ang mga estudyante nga makasabot kon nganong gusto ni Jesukristo nga atong ipakigbahin ang Iyang ebanghelyo ngadto sa tanang mga tawo. Mahimo nimong sugdan pinaagi sa pagtabang sa mga estudyante sa pagdiskobre sa mga panalangin nga gusto sa Ginoo nga maangkon sa tanan. Ang mosunod nga kalihokan mahimong usa ka makalingaw nga paagi alang sa mga estudyante sa pagpakigtinabangay uban sa usa ka pares samtang sila mas magtuon pa gayod sa Doktrina ug mga Pakigsaad 84.

Ipakita ang mosunod nga mga instruksiyon, ug tabangi ang mga estudyante sa pagsunod niini. Alang sa lakang 2, mahimo kang mopili og piho nga mga misyon nga pilian sa mga estudyante.

1. Pagpili og usa ka tawo nga makatrabaho isip imong “kauban sa misyon” alang sa nahibilin sa leksiyon.

2. Pagpili og misyon dinhi sa kalibotan diin kamo ganahan nga moserbisyo. (Kon ang mga tawo mamulong og lain nga pinulongan sa misyon nga imong gipili, tan-awa kon makakat-on ka ba dayon kon unsaon pagtimbaya ang imong kompanyon niana nga pinulongan.)

3. Basaha ang Doktrina ug mga Pakigsaad 84:64–73, ug paghimo og lista sa mga panalangin nga gitinguha ni Jesukristo nga ihatag sa tanan kinsa modawat Kaniya ug sa Iyang ebanghelyo.

4. Hisgoti kon sa unsang paagi ang matag usa sa mga panalangin nga imong gilista makatabang sa usa ka tawo sa pagbuntog sa kangitngit ug sa pagkaulipon sa sala.

Hatagi ang mga estudyante og oportunidad nga ipakigbahin ang dagkong mga panalangin nga moabot gikan sa pagsunod ni Jesukristo. Agi og dugang sa pagpangutana sama sa mosunod, mahimo nimong ipakita ang bidyo nga “A Change of Heart” (4:39).

• Kon mahimo nimong ipakigbahin ang usa ka butang mahitungod ni Jesukristo ngadto sa usa ka tawo kinsa wala makaila o mosunod Kaniya, unsa man kini?

Ang mga higala sa Manluluwas

Paggahin og higayon sa pagpamalandong kon nganong daghang batan-ong mga babaye ug batan-ong mga lalaki ang kinabubut-ong midawat og usa ka tawag gikan sa Ginoo nga mahimong usa ka pangserbisyo o pangsangyaw nga misyonaryo.

Samtang namalandong ang mga estudyante, mahimo nimo silang hangyoon sa pagpakigbahin kon kinsa ang ilang nailhan nga bag-o lang nakadawat og tawag sa pag-alagad gikan sa Ginoo. Kon anaa, mahimo nimong ipakigbahin ang usa ka post sa social media sa usa ka tawo nga nagpahibalo sa iyang tawag sa misyon ngadto sa pamilya ug mga higala. Tabangi ang mga estudyante nga makakita sa hingpit nga kalipay nga moabot niadtong gustong moserbisyo sa Ginoo.

• Unsa ang pipila ka mga butang nga mahimong malisod o makahahadlok sa pag-alagad sa Ginoo isip usa ka misyonaryo?

Ikonsiderar ang pagdapit sa mga estudyante sa pagbasa sa mosunod nga mga bersikulo uban sa ilang “kompanyon sa misyon.” Mahimo nimong dapiton sila sa pagpili og duha o tulo sa mga pagtulun-an sa Manluluwas nga makahatag og pagsalig niadtong gustong mopakigbahin sa ebanghelyo ngadto sa uban. Ang mga managparesan mahimo dayon nga mopakigbahin sa unsay ilang nakat-onan ngadto sa ubang mga pares sa mga estudyante diha sa klase.

Basaha ang Doktrina ug mga Pakigsaad 84:77–88, mangita sa makapadasig nga mga pulong sa Ginoo ngadto niadtong kinsa tingali gikulbaan mahitungod sa pagdawat og usa ka tawag sa pag-alagad Kaniya.

Mahimo ka usab nga mopakigbahin og makapadasig nga mga pulong gikan sa mga lider sa Simbahan. (Tan-awa ang “Dugang nga mga Kapanguhaan.”)

• Hain sa mga pulong sa Ginoo ang nagpatigbabaw nganha kanimo?

• Gikan sa unsay imong nakat-onan karon, nganong sa imong hunahuna gikonsiderar ni Jesukristo kadtong nagsangyaw sa Iyang ebanghelyo isip Iyang mga higala? (tan-awa sa bersikulo 77).

• Unsay imong nakat-onan karon nga nakatabang kanimo nga mas masabtan kon unsay gibati sa Ginoo mahitungod sa tanan sa kalibotan? Unsa kaha nga mga buhat ang mahimong gidasig ka sa Espiritu Santo nga buhaton tungod sa unsay imong nakat-onan?

Dugang nga mga Kapanguhaan

Unsa ka importante ang pagpakigbahin sa ebanghelyo ni Jesukristo?

Si Presidente Russell M. Nelson mipasabot:

Mga kaigsoonan, ang ebanghelyo ni Jesukristo wala pa sukad mas gikinahanglan kaysa karon. … Gihigugma nako si Ginoong Jesukristo ug nagpamatuod nga ang Iyang ebanghelyo mao lamang ang malahutayong kasulbaran alang sa kalinaw. Ang Iyang ebanghelyo usa ka ebanghelyo sa kalinaw [Doktrina ug mga Pakigsaad 27:16]. …

Ang tanang misyonaryo nagtudlo ug nagpamatuod sa Manluluwas. Ang espirituhanon nga kangitngit sa kalibotan nakapahimo sa kahayag ni Jesukristo nga wala pa sukad mas gikinahanglan kaysa karon. (Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 6–7)

Unsa nga mga panalangin ang moabot pinaagi sa usa ka pangserbisyo o pangsangyaw nga misyon?

Si Elder Denelson Silva sa Seventy miingon:

Ang pribilehiyo sa pagrepresentar sa Manluluwas nga si Jesukristo ug sa Iyang Simbahan dili mabaliwala. Ang pag-apil sa dili maihap nga mga pag-ampo, pagpalambo ug paghatag sa inyong pagpamatuod sa makadaghang higayon atol sa adlaw, daghang mga oras sa pagtuon sa kasulatan, pakighimamat sa mga tawo nga dili ninyo mahimamat kon kamo magpabilin sa inyong balay, mao ang dili mahulagway nga mga kasinatian. Ang samang lebel nga kasinatian gireserba alang sa kabatan-onan nga tawagon sa Ginoo nga moserbisyo og mga pangserbisyo nga mga misyon. Kamo hangpon pag-ayo ug gikinahanglan. Palihog, ayaw ipagamay ang kaimportante sa usa ka pangserbisyo nga misyon, kay ang pangserbisyo nga mga misyon naghatag usab og dili mahulagway nga mga kasinatian. “Ang bili sa mga kalag mahinungdanon sa panan-aw sa Dios” (Doktrina ug mga Pakigsaad 18:10), lakip ang bili sa imong kalag. (Denelson Silva, “Kaisog sa Pagpahayag sa Kamatuoran,” Liahona, Nob. 2022, 71-72)

Doktrina ug mga Pakigsaad 84:73. Nganong nagpasidaan man ang Ginoo nga dili manghambog sa mga milagro nga atong nasinati?

Si Presidente Dallin H. Oaks sa Unang Kapangulohan mitudlo:

Sa paghatag og mga pagpamatuod ug sa atong mga pakigpulong sa publiko panagsa ra kita maghisgot sa atong labing milagrosong mga kasinatian, ug panagsa ra kita mosalig sa mga timailhan nga ang ebanghelyo tinuod. … Kasagaran dili angayan nga isulti ang mga milagrosong kahimtang sa usa ka kinatibuk-ang mamiminaw nga naglakip sa mga tawo nga adunay lahi kaayo nga lebel sa espirituhanong pagkahamtong. Alang sa kinatibuk-ang mamiminaw, ang mga milagro makapalig-on sa hugot nga pagtuo alang sa pipila apan dili angay nga ilhanan alang sa uban. (Dallin H. Oaks, “Miracles,” Ensign, June 2001, 10)

Doktrina ug mga Pakigsaad 84:88. Unsa nga tabang ang gitanyag sa Manluluwas kanato samtang kita nagserbisyo Kaniya?

Si Presidente Henry B. Eyring sa Unang Kapangulohan miingon:

Mopamatuod ko nga ang Ginoo anaa sa inyong atubangan sa matag higayon nga kamo anaa sa Iyang buluhaton. Usahay kamo ang mahimong anghel nga ipadala sa Ginoo sa pagtabang sa uban. Usahay kamo ang palibotan sa mga anghel nga motabang kaninyo. Apan sa kanunay kamo makabaton sa Iyang Espiritu diha sa inyong kasingkasing, sama sa gisaad kaninyo sa matag tulumanon sa sakrament. Kinahanglan lamang nga mosunod kamo sa Iyang mga sugo. (Henry B. Eyring, “Ayaw Kahadlok sa Pagbuhat og Maayo,” Liahona, Nob. 2017, 103)

Dugang nga mga Kalihokan sa Pagkat-on

Paghinumdom sa Basahon ni Mormon

Tabangi ang mga estudyante nga makat-on sa kamatuoran nga gusto sa Ginoo nga atong tun-an ang Basahon ni Mormon ug magkinabuhi sumala sa mga pagtulun-an niini. Mahimo nimong sugdan pinaagi sa pagdumdom sa mga estudyante sa ChurchofJesusChrist.org aron makita kon pila ka pinulongan gihubad ang Basahon ni Mormon.

Dapita ang mga estudyante sa paghisgot kon nganong daghang paningkamot ang gihimo sa paghubad sa Basahon ni Mormon ngadto sa daghan kaayo nga mga pinulongan. Mahimo dayon nimong basahon ang Doktrina ug mga Pakigsaad 84:54–57 isip usa ka klase, mangita kon unsay gibati sa Ginoo mahitungod sa Basahon ni Mormon. Ikonsiderar ang paghatag og paagi alang sa mga estudyante sa pagsukod kon unsa ka dako ang ilang pagpabili sa Basahon ni Mormon. Personal ba nga gibati sa mga estudyante nga ang mensahe sa bersikulo 54 magamit ngadto kanila? Unsay ilang gibuhat sa pagtuon sa Basahon ni Mormon? Giunsa nila pagpakigbahin, o unsaon nila sa pagpakigbahin, sa pagpamatuod ni Kristo nga makita diha sa Basahon ni Mormon ngadto sa uban? Mahimo nimong dapiton ang mga estudyante kinsa nakahibalo kon unsaon sa pagpakigbahin sa Basahon ni Mormon gamit ang Gospel Library nga app sa pagtudlo sa uban diha sa klase.

Gisuportahan sa Ginoo

Ang mga estudyante mahimong makabenepisyo gikan sa pag-ila sa suporta nga gitanyag ni Jesukristo sama sa gihulagway diha sa Doktrina ug mga Pakigsaad 84:88. Mahimo nimong dapiton ang mga estudyante sa pagdrowing og stick figure nga nagrepresentar kanila isip usa ka misyonaryo. Dayon mahimo silang magbasa sa bersikulo 88 ug magsulat o magdrowing sa tanang paagi nga gisuportahan kita sa Manluluwas kon maningkamot kita sa pagpakigbahin sa Iyang ebanghelyo. Tabangi ang mga estudyante sa paghisgot sa ilang mga pagbati mahitungod sa Ginoo nga nagsuporta niadtong nagserbisyo sa Iyang ngalan. Ikonsiderar ang pagpakigbahin og usa ka asoy sa kasulatan sama sa 2 Mga Hari 6:15–17 aron ihulagway ang sagad nga dili mabantayan nga suporta sa langit.