Leksiyon 95: Doktrina ug mga Pakigsaad 84

Doktrina ug mga Pakigsaad 84:33–44

Ang Panumpa ug Pakigsaad sa Pagkapari

Sa Doktrina ug mga Pakigsaad 84:20, ang Manluluwas mipadayag nga “diha sa mga ordinansa [sa pagkapari], ang gahom sa pagkadiosnon gipakita.” Kining gahom sa pagkapari nahimong posible sa tanang miyembro sa Simbahan kinsa mohimo ug motuman sa pakigsaad sa bunyag ug sa templo. Diha sa Doktrina ug mga Pakigsaad 84:33–44, ang Manluluwas mitudlo og panumpa ug pakigsaad nga nagdumala sa paggamit sa Iyang gahom sa pagkapari. Kini nga leksiyon makatabang sa mga estudyante nga mapalawman pa ang ilang pagsabot sa panumpa ug pakigsaad sa pagkapari.

Mga Posibleng Kalihokan sa Pagkat-on

Ang Langitnong Amahan nagpanalangin sa mga tigtuman sa pakigsaad gamit ang Iyang gahom

Mahimo nimong sugdan ang klase pinaagi sa pagdrowing og dalan diha sa pisara nga nagrepresentar sa dalan sa pakigsaad. Mahimo nimong markahan ang sinugdanan sa dalan og “pagkatawo” ug ang kataposan “kinabuhing dayon uban sa Langitnong Amahan.” Dapita ang mga estudyante sa pagduol sa pisara ug sa pag-label og mga pakigsaad nga atong gihimo subay sa dalan pinaagi sa mga ordinansa sama sa bunyag, pagkumpirma, pag-orden sa pagkapari alang sa mga lalaki, pagtuga, ug pagselyo.

Kon ang mga estudyante nagkinahanglan og tabang sa pagsabot nga ang mga pakigsaad duha ka pagbinayloay og mga saad uban sa Dios, ikonsiderar ang paghisgot sa mga pangutana sama sa mosunod sa dili pa ipakigbahin ang pamahayag sa ubos gikan ni Presidente Russell M. Nelson:

• Unsa ang pipila ka mga saad nga atong gihimo ngadto sa Langitnong Amahan sa dihang atong gidawat ang ordinansa sa bunyag? (Tan-awa sa Mosiah 18:8–10 ug sa Doktrina ug mga Pakigsaad 20:77–79.)

• Unsa ang gisaad kanato sa Langitnong Amahan kon maningkamot kita sa pagtuman niini nga pakigsaad?

Tun-i ang mosunod nga pamahayag gikan ni Presidente Russell M. Nelson, mangita sa panalangin nga gihatag sa Langitnong Amahan niadtong mohimo ug motuman sa mga pakigsaad ngadto Kaniya.

Ang matag tawo nga mohimo og mga pakigsaad diha sa mga bunyaganan ug diha sa mga templo—ug motuman niini—nakapadugang og agianan ngadto sa gahom ni Jesukristo. Palihog palandonga kanang talagsaon nga kamatuoran!

Ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on nato sa pagpakigbatok sa atong mga pagsulay, mga tintasyon, ug mga kasakit. Kini nga gahom makapasayon sa atong dalan. Kadtong kinsa nagsunod sa mas taas nga mga balaod ni Jesukristo adunay agianan ngadto sa Iyang mas dako nga gahom. (Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 96)

• Ngano nga ang mga panalangin sa pakigsaad nga gihulagway ni Presidente Nelson gikinahanglan subay sa atong dalan pabalik ngadto sa Langitnong Amahan?

Ang panumpa ug pakigsaad sa pagkapari

Diha sa Doktrina ug mga Pakigsaad 84, si Jesukristo mihatag og “pagpadayag sa pagkapari” ngadto ni Joseph Smith (tan-awa sa ulohan sa seksiyon). Isip kabahin niini nga pagpadayag, Iyang gihulagway ang “panumpa ug pakigsaad” (mga bersikulo 39–40) sa pagkapari. (Ang usa ka panumpa usa ka ligdong nga saad.)

Sa imong journal sa pagtuon, isulat ang “Panumpa ug Pakigsaad sa Pagkapari” sa ibabaw sa usa ka pahina. Paghimo og duha ka kolum ubos niini nga ulohan. Markahi ang usa ka kolum og “ang mga saad sa Langitnong Amahan” ug ang laing kolum “Ang atong mga saad.”

Mahimong kompletohon sa mga estudyante ang anaa sa ubos nga kalihokan sa pagtuon nga magtinagsa. Mahimo dayon silang mopakigbahin diha sa gagmay nga mga grupo sa unsay ilang nakaplagan.

Sa laing paagi, mahimo nimong ipares-pares ang mga estudyante, nga ang usa ka kauban mangita sa mga saad sa Langitnong Amahan ug ang lain mangita sa atong mga saad. Mahimo dayon silang mopakigbahin sa usag usa ug morekord kon unsa ang ilang gihisgotan diha sa ilang journal sa pagtuon.

Basaha ang Doktrina ug mga Pakigsaad 84:33–44. Ikonsiderar ang pagmarka sa usa ka paagi sa mga saad nga gidapit sa Langitnong Amahan kanato sa paghimo ug ang pagmarka sa lahi nga paagi sa panalangin nga Iyang gitanyag niadtong kinsa nagtuman sa ilang mga pakigsaad. Isulat kon unsay imong nakaplagan diha sa nahiuyon nga mga kolum sa imong journal sa pagtuon.

Kini usa ka maayo nga panahon nga ipapraktis sa mga estudyante ang pag-ila sa mga baroganan. Mahimong moila sila og lain-laing mga baroganan. Mahimo nimo silang hangyoon sa pagpangita sa mga baroganan nga naggamit og mga pamahayag nga nagsugod sa unsay atong gisaad nga buhaton ug natapos sa unsay gisaad sa Dios nga buhaton. Sama pananglit, ang mga estudyante mahimong makakita sa mosunod nga mga baroganan:

• Kon atong palamboon ang atong mga calling ug mga responsibilidad diha sa Simbahan, ang Dios mopabalaan kanato pinaagi sa Iyang Espiritu ug mopabag-o sa atong mga lawas.

• Kon kita matinud-anong makabaton sa Aaronic ug Melchizedek nga mga Pagkapari ug modawat sa pinili nga mga sulugoon sa Dios, ang Langitnong Amahan mopanalangin kanato sa tanan nga aduna Siya.

Hatagi ang mga estudyante og panahon nga mainampoong makat-on mahitungod sa mga saad nga sila ang labing interesado nga mas makasabot. Mahimong magtinabangay ang mga estudyante diha sa gagmay nga mga grupo kauban sa ubang mga estudyante nga mipili sa pagtuon sa samang mga saad, o mahimo silang magtuon nga magtagsa-tagsa.

Ang handout naghatag og mga kapanguhaan sa pagtuon nga makatabang sa mga estudyante nga mas makasabot sa pipila ka mga saad diha sa panumpa ug pakigsaad sa pagkapari. Mahimo nimong hatagan ang mga estudyante niini nga handout kon gusto nimo.

Kon ang mga estudyante interesado sa pagtuon sa usa ka hugpong sa mga pulong nga wala maapil sa handout, dapita sila sa pagkat-on sa tanan nga ilang mahimo pinaagi sa pagsiksik sa ilang gipili nga hilisgotan o mga hilisgotan nga adunay mga kapanguhaan sama niini:

• Mga Hilisgotan ug Mga Pangutana

• Giya ngadto sa mga Kasulatan

• ChurchofJesusChrist.org o ang Gospel Library nga app

• Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw

Pagpalawom sa Imong Pagsabot sa Panumpa ug Pakigsaad sa Pagkapari

Gibalaan pinaagi sa Espiritu ngadto sa pagbag-o sa lawas (tan-awa sa bersikulo 33)

Sa paghisgot sa saad sa Langitnong Amahan, si Presidente Henry B. Eyring sa Unang Kapangulohan mipasabot:

Akong nakita kana nga saad natuman sa akong kaugalingong kinabuhi ug sa mga kinabuhi sa uban. Usa nako ka higala mialagad isip presidente sa misyon. Siya misulti kanako nga sa matag tapos sa adlaw samtang siya nag-alagad, hapit dili siya makahimo pagkatulog nga dili maghanduraw og aduna pa ba siyay kusog pagharong og laing adlaw. Dayon pagkabuntag, iyang mamatikdan nga ang iyang kusog ug kadasig nabalik. Inyo kining nakita sa mga kinabuhi sa edarang mga propeta kinsa maingon og nabag-o matag higayon nga sila mibarog aron pagmatuod sa Ginoong Jesukristo ug sa gipahiuli nga ebanghelyo. Usa kana ka saad alang niadtong kinsa mopadayon uban ang hugot nga pagtuo sa ilang pagpangalagad sa priesthood. (Henry B. Eyring, “Hugot nga Pagtuo ug Panumpa ug Pakigsaad sa Priesthood,” Liahona, May 2008, 62)

Pagmatinud-anon sa pagbaton sa Aaronic ug Melchizedek nga mga Pagkapari (tan-awa sa bersikulo 33)

Ang mahimong matinud-anon sa “pagbaton niining duha ka mga pagkapari” (Doktrina ug mga Pakigsaad 84:33) naglakip sa pagbaton sa gahom ug mga panalangin nga moabot gikan sa pagdawat sa mga ordinansa sa Aaronic ug Melchizedek nga mga Pagkapari ug matinud-anong magtuman sa kaubang mga pakigsaad. Si Propeta Joseph Smith mitudlo nga ang usa ka tawo makaangkon sa kahingpitan sa pagkapari “pinaagi paghupot sa tanang mga sugo ug pagtuman sa tanang mga ordinansa diha sa balay sa Ginoo” (Mga Pagtulun-an sa mga Presidente sa Simbahan: Joseph Smith [2007], 507).

Alang sa mga lalaki, kini naglakip usab sa pagbaton sa pagkapari nga gitugyan ngadto kanila ug gi-orden ngadto sa mga katungdanan sa pagkapari.

Pagpalambo sa atong pagtawag (bersikulo 33)

Doktrina ug mga Pakigsaad 58:27–28; 107:99–100

Mga kahigayonan sa pagdawat og mga calling ug pag-apil sa buhat sa Ginoo sa kaluwasan

Si Presidente M. Russell Ballard sa Korum sa Napulog Duha ka Apostoles mitudlo:

Samtang kita nagtrabaho sa pagpalambo sa atong mga calling, atong pangitaon ang pagdasig sa Espiritu sa pagsulbad sa mga problema sa mga paagi nga mas makatabang sa mga tawo nga atong gialagaran. Aduna kitay handbook sa mga panudlo, ug sundon gayod ang mga sumbanan niini. Apan sulod niana nga sumbanan mao ang importanting mga kahigayonan sa paghunahuna, pagmamugnaon, ug paggamit sa mga talento sa indibidwal. Ang panudlo sa pagpalambo sa atong mga calling dili kasugoan sa pagdugang ug sa pagpalisod niini. Ang pagbag-o wala magpasabot nga palapdan; kasagaran nagpasabot nga himoong sayon. (M. Russell Ballard, “O Pagmaalamon,” Liahona, Nob. 2006, 18)

Ang tanan nga iya sa Langitnong Amahan (tan-awa sa bersikulo 38 )

Doktrina ug mga Pakigsaad 76:55–60; 81:6

Si Elder Ronald A. Rasband sa Korum sa Napulog Duha ka Apostoles mipakigbahin:

Ang pagkahibalo nga kita adunay Amahan sa Langit ug nga si Jesukristo mao ang Iyang Bugtong Anak nagpasabot nga kita nagtan-aw sa mas layo pa sa dalan sa pakigsaad kay sa kon asa kita karon. Kini nagpasabot nga kita mapasalamaton nga kita mga manununod sa tanan nga anaa sa Amahan; ang mga gingharian nga dili maihap mao ang Iyang gingharian ug mahimong ato. Ang Manluluwas misaad, “Kon ikaw magmatinud-anon hangtod sa kataposan ikaw makabaton og usa ka korona sa pagka-imortal, ug kinabuhi nga dayon diha sa mga mansyon nga akong giandam diha sa balay sa akong Amahan.” (Ronald A. Rasband, “The Divine Destiny of His Daughters” [BYU Women’s Conference, Apr. 30, 2021], broadcasts.ChurchofJesusChrist.org)

Human sa igong panahon sa pagtuon, dapita ang mga estudyante sa pagpakigbahin uban sa usa ka pares o diha sa gagmay nga grupo kon unsay ilang nakat-onan. Mahimo kang mogamit og mga pag-aghat sama sa mosunod aron makatabang sa paggiya sa panaghisgotan:

• Ngano kaha nga kini nga panalangin importante kanimo karon?

• Unsa ang gitudlo niini nga panalangin diha kanimo mahitungod sa Langitnong Amahan?

Pagpakigbahin og usa ka ehemplo (gikan sa mga kasulatan o sa imong kinabuhi) sa usa ka tawo nga imong nakita nga nagpakita nga nagtuman sa saad nga imong gipili.

Sa pagtapos sa klase, mahimo nimong ipakigbahin kon sa unsang paagi ka napanalanginan pinaagi sa gahom sa pagkapari samtang ikaw misulay sa matinud-anong pagtuman sa mga pakigsaad nga imong gihimo ngadto sa Langitnong Amahan. Dapita ang mga sakop sa klase sa pagpangita og mga oportunidad sa paggamit sa gahom sa pagkapari nga ang Dios misaad sa Iyang mga anak sa pakigsaad.

Dugang nga mga Kapanguhaan

Sa unsang paagi nga ang pagkapari mahinungdanon sa tanang anak sa Dios?

Si Presidente Russell M. Nelson mitudlo:

Espirituhanon nga mga Bahandi

Si Presidente Nelson nagtudlo nga ang mga babaye nga natugahan sa gahum sa pagkapari diha sa templo makaangkon sa gahum sa Dios sa ilang kinabuhi.

Ang matag babaye ug matag lalaki kinsa mohimo og mga pakigsaad uban sa Dios ug motuman niadto nga mga pakigsaad, ug kinsa takos nga moapil sa mga ordinansa sa pagkapari, direktang makaangkon sa gahom sa Dios. Kadtong gitugahan diha sa balay sa Ginoo makadawat og gasa sa gahom sa pagkapari sa Dios pinaagi sa hiyas sa ilang pakigsaad, uban sa gasa sa kahibalo nga masayod unsaon paggamit niana nga gahom. (Russell M. Nelson, “Espirituhanon nga mga Bahandi,” Liahona, Nob. 2019, 77)

Si Sister Jean B. Bingham, kanhi Kinatibuk-ang Presidente sa Relief Society, mipasabot:

Bisan og ang panumpa ug pakigsaad sa pagkapari nga makita diha sa Doktrina ug mga Pakigsaad 84 direktang namulong ngadto sa mga kalalakin-an nga gi-orden sa katungdanan sa pagkapari, daghan sa mga saad ug mga panalangin nga gihatag didto magamit usab sa mga babaye nga nagtuman sa pakigsaad. …

Importante nga masabtan sa mga babaye nga kita, usab, mapanalanginan sa pagdawat sa “tanan nga anaa [sa atong] Amahan” kon kita makadawat, o maminaw ug mopatalinghog, sa mga sulugoon sa Ginoo (Doktrina ug mga Pakigsaad 84:38).

Ako moawhag kaninyo sa pagtuon ug pagkat-on kon sa unsang paagi ang panumpa ug pakigsaad sa pagkapari mipanalangin kaninyo ug niadtong inyong gimahal. Ang matag babaye kinsa mohimo ug motuman sa mga pakigsaad uban sa Dios ug kinsa takos nga moapil sa mga ordinansa sa pagkapari direktang makaangkon sa gahom sa Dios! (Jean B. Bingham, “The Oath and Covenant of the Priesthood Is Relevant to Women,” Relief Society, ChurchofJesusChrist.org)

Doktrina ug mga Pakigsaad 84:33. Unsa ang buot ipasabot nga mopalambo sa atong tawag?

Si Presidente Thomas S. Monson (1927–2018) mipakigbahin sa mosunod nga kahulugan:

Si Propeta Joseph Smith sa makausa gipanguta, “Brother Joseph, pirme kang moawhag nga among palamboon ang among balaang tawag. Unsay gipasabot niana?” Giingon nga siya mitubag, “Ang pagpalambo sa usa ka balaang tawag mao ang pagtamod niini uban sa kaligdong ug kamahinungdanon, nga ang kahayag sa langit molamdag pinaagi sa binuhatan sa usa katawo aron makita sa laing mga tawo.” (Thomas S. Monson, “Ang Atong Sagrado nga Katungdanan sa Priesthood,” Liahona, Mayo 2006, 56)

Dugang nga mga Kalihokan sa Pagkat-on

Pagpalambo sa imong mga pagtawag

Ikonsiderar ang pagpakita sa mga estudyante og lente nga makapadako o hulagway sa usa ka tawo nga naggamit o nagkupot og lente nga makapadako. Dapita ang klase sa paghisgot kon sa unsang paagi ang usa ka lente nga makapadako makatabang kanato nga makasabot sa tinguha sa Manluluwas kon giunsa nato Siya pagserbisyo diha sa mga tawag ug mga asaynment. Mahimo nimong ipasabot nga gawas sa paghimo sa mga butang nga mas dako ug mas tin-aw, ang usa ka lente nga makapadako usab nagpunting sa kahayag.

Ikonsiderar ang pagpakigbahin sa pamahayag ni Presidente Thomas S. Monson diha sa “Dugang nga mga Kapanguhaan.”

Dapita ang mga estudyante sa pagbasa sa Doktrina ug mga Pakigsaad 84:45–46, mangita sa unsay gitudlo sa Manluluwas kanato mahitungod sa Iyang kahayag.

• Sa unsa nga paagi kita makapunting sa kahayag sa Manluluwas samtang kita moserbisyo sa Simbahan?

Ang panumpa ug pakigsaad sa pagkapari magamit sa mga babaye ug lalaki

Kon ang mga estudyante makabenepisyo gikan sa mas maayo nga pagsabot nga ang panumpa ug pakigsaad sa pagkapari magamit ngadto sa mga babaye ug mga lalaki nga naghupot sa pakigsaad, mahimo nimong ipakita ang bidyo nga “The Oath and Covenant of the Priesthood Is Relevant to Women” (gikan sa time code 01:48 hangtod sa 03:31). Si Sister Jean B. Bingham, kanhi Kinatibuk-ang Presidente sa Relief Society, naghisgot sa panumpa ug pakigsaad sa pagkapari uban ni Presidente Russell M. Nelson.

The Oath and Covenant of the Priesthood Is Relevant to Women

President Russell M. Nelson and Jean B. Bingham, Relief Society General President, discuss the oath and covenant of the priesthood at the site in Pennsylvania where Joseph Smith lived.