Doktrina ug mga Pakigsaad 84

Doktrina ug mga Pakigsaad 84

Kinatibuk-ang Pagpasabot

Human sa pagpauli gikan sa ilang mga misyon, usa ka grupo sa mga Elder nakigtagbo ni Propeta Joseph Smith. Samtang nag-ampo nga magkauban, ang Propeta nakadawat og pagpadayag nga naghatag og mga panabot mahitungod sa gahom sa pagka-diosnon nga nahimong posible sa kababayen-an ug kalalakin-an pinaagi sa mga ordinansa sa pagkapari. Ang Manluluwas mipasabot usab sa panumpa ug pakigsaad nga magamit sa Iyang gahom sa pagkapari ug misugo sa Iyang mga disipulo sa pagpamatuod sa Iyang ebanghelyo ngadto sa tibuok kalibotan.

Pagpangutana og mga pangutana nga nagdapit og pagpamalandong: Ang personal nga pagpamalandong ug pagtimbang-timbang sa kaugalingon mahimong modapit sa Espiritu Santo sa pagtabang sa matag estudyante nga makakita sa mga butang “ingon nga sila gayod mao, ug … sila gayod mahimo unya” (Jacob 4:13). Ang epektibo nga mga pagtimbang-timbang sa kaugalingon makatabang sa mga estudyante sa pagkonsiderar sa ilang kasamtangan nga panabot ug sa kamahinungdanon sa mga kamatuoran sa ebanghelyo, ingon man usab kon unsaon sa pagpuyo niini. Alang sa dugang pa kon sa unsang paagi kini gibuhat sa Manluluwas, tan-awa ang seksiyon nga “Naghatag ang Manluluwas og mga Oportunidad alang sa mga Tawo nga Matudloan pinaagi sa Espiritu Santo” diha sa Pagtudlo Sumala sa Pamaagi sa Manluluwas. Makakita ka usab og usa ka ehemplo kon unsaon sa pagbuhat niini diha sa leksiyon karong semanaha nga giulohan og “Doktrina ug mga Pakigsaad 84:1–32.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 84:1–32

Katuyoan sa leksiyon: Aron matabangan ang mga estudyante nga mobati sa kamahinungdanon sa pagdawat sa gahom sa pagka-diosnon nga gitanyag ni Jesukristo pinaagi sa Iyang mga ordinansa sa pagkapari.

Pagpangandam sa estudyante: Dapita ang mga estudyante sa pagpamalandong kon unsay ilang nahibaloan mahitungod sa mga ordinansa sa pagkapari ug kon nganong importante kini sa ilang indibidwal nga kinabuhi isip mga miyembro sa Ang Simbahan ni Jesukristo sa mga Santos sa Ulahing mga Adlaw.

Doktrina ug mga Pakigsaad 84:33–44

Katuyoan sa leksiyon: Aron matabangan ang mga estudyante nga mapalawman pa ang ilang pagsabot sa panumpa ug pakigsaad sa pagkapari.

• Pagpangandam sa estudyante: Dapita ang mga estudyante sa paghunahuna mahitungod kon sa unsa nga paagi sila napanalanginan pinaagi sa paghimo ug sa pagtuman sa mga pakigsaad ngadto sa Dios. Hangyoa sila nga mangandam sa pagpakigbahin kon sa unsang paagi ang pagpaningkamot sa pagtuman sa ilang mga pakigsaad nakapalambo sa gahom sa Dios diha sa ilang mga kinabuhi.

• Handout: “Pagpalawom sa Imong Panabot sa Panumpa ug Pakigsaad sa Pagkapari (Bahin 1 ug Bahin 2)”

Doktrina ug mga Pakigsaad 84:49–102

Katuyoan sa leksiyon: Aron matabangan ang mga estudyante nga mobati sa Kristohanong tinguha sa pagpakigbahin sa ebanghelyo ngadto sa tanan sa kalibotan.

• Pagpangandam sa estudyante: Dapita ang mga estudyante nga mangutana og usa ka tawo mahitungod sa mga panalangin sa pagdawat kang Ginoong Jesukristo ug sa Iyang gipahiuli nga ebanghelyo. Kon mahimo, dapita sila sa pagpangutana ngadto sa usa ka tawo kinsa nabunyagan human matudloan sa mga misyonaryo.

• Hulagway nga ipakita: Usa ka mapa sa kalibotan

• Mga bidyo: “A Change of Heart” (4:39)

Pagbansay 6 sa Doktrinal nga Kahanas

Katuyoan sa leksiyon: Aron matabangan ang mga estudyante nga makasabot sa mga kamatuoran nga gitudlo diha sa mga tudling sa doktrinal nga kahanas ug makakat-on ug mogamit sa balaanong mga baroganan alang sa pag-angkon og espirituhanong kahibalo.

Pagpangandam sa estudyante: Dapita ang mga estudyante sa pagpangutana sa usa ka mas edaran na nga miyembro sa pamilya o lider sa Simbahan kon nganong gipili niya nga magpabiling aktibo sa Simbahan ug magmatinud-anon sa ebanghelyo ni Jesukristo.