Leksiyon 93: Doktrina ug mga Pakigsaad 81–83

Sukda ang Imong Nakat-onan 6

Doktrina ug mga Pakigsaad 76–83

Ang paggahin og panahon sa pag-ila sa pagtubo ug espirituhanong paglambo makapalig-on sa atong relasyon ngadto sa Langitnong Amahan ug ni Jesukristo ug modasig kanato sa pagpabilin diha sa dalan sa pakigsaad. Kini nga leksiyon makatabang sa mga estudyante sa pagsukod sa ilang espirituhanong pagtubo gikan sa ilang pagtuon sa Doktrina ug mga Pakigsaad sa pagkakaron.

Mga Posibleng Kalihokan sa Pagkat-on

Kini nga leksiyon gituyo aron sa pagtabang sa mga estudyante sa pagsukod sa ilang abilidad sa pagpasabot sa mga pagtulun-an diha sa Doktrina ug mga Pakigsaad, pagtimbang-timbang sa mga tumong nga ilang gitakda, ug sa pagsukod kon sa unsang paagi nga ang ilang mga kinaiya, mga tinguha, ug abilidad sa pagsunod sa ebanghelyo nausab. Ang pagtuon sa imong klase sa Doktrina ug mga Pakigsaad 76–83 mahimong nakatutok sa mga kamatuoran nga lahi sa mga gipasiugda sa leksiyon. Kon mao, ikonsiderar ang pagpahiangay sa mga kalihokan aron maapil ang mga kamatuoran nga mas pamilyar sa imong mga estudyante.

Pagpabili sa paglambo ug pag-uswag

Kon mahimo, sugdi ang klase pinaagi sa pagpakita sa mga hulagway sa mga tawo nga nagbaktas, nagbisikleta, ug nagdagan. Hangyoa ang mga estudyante sa pagpataas sa ilang mga kamot kon nakahimo na sila sa usa o labaw pa niini nga mga kalihokan. Sunod, hangyoa ang mga estudyante sa pagpadayon sa pagpataas sa ilang mga kamot kon nakaapil na sila sa usa ka hilabihan ka taas o mahagiton nga pagdagan, pagbaktas, o pagsakay sa bisikleta. Dapita ang pipila ka estudyante nga nag-isa sa ilang mga kamot sa paghulagway sa ilang kasinatian. Ikonsiderar ang paghisgot og pipila ka mga pangutana sama sa mosunod:

• Unsa ang imong mabuhat aron malingaw sa panaw?

• Unsaon kaha nato pagtandi kana nga matang sa panaw ngadto sa proseso nga mahimong mas mahisama ni Jesukristo?

• Unsa ang mga paagi nga kita mahimong mas malingaw ug mas magmapasalamaton sa proseso sa espirituhanong paglambo?

  Dapita ang mga estudyante sa pagpamalandong sa unsay ilang nakat-onan diha sa Doktrina ug mga Pakigsaad, giunsa nila kini sa paglihok, ug ang ilang espirituhanong mga panaw. Mahimong mamalandong sila kon sa unsang paagi ang Manluluwas mitabang sa bisan unsang bag-ohay lang nga pag-uswag.

• Unsay paminaw nimo sa imong pag-uswag ug pagka mas suod ngadto sa Ginoo?

• Sa unsang paagi ang Ginoo nagtabang kanimo?

Ang mosunod nga mga kalihokan gidisenyo aron sa pagtabang sa mga estudyante sa pag-ila, pagpasalamat, ug pagtimbang-timbang sa mas piho nga pag-uswag ug paglambo.

Pagpasabot sa tulo ka ang-ang sa himaya

Ikonsiderar ang paggamit og senaryo sama sa mosunod aron matabangan ang mga estudyante sa pagrebyo ug sa pagsukod sa ilang pagsabot bahin sa tulo ka ang-ang sa himaya diha sa plano sa Langitnong Amahan. Kon gikinahanglan, mahimong usbon sa mga estudyante ang mga detalye sa senaryo aron maseguro nga kini mabati nga tinuod ngadto kanila.

Handurawa nga ikaw adunay suod nga higala nga ginganlan og Olivia kinsa dili miyembro sa Simbahan apan hugot nga nagtuo kang Jesukristo. Usa ka adlaw siya miduol kanimo ug nangutana: “Unsa ang gituohan sa mga miyembro sa imong Simbahan mahitungod sa kinabuhi human sa kamatayon? Gitudloan ko nga ang tanan moadto sa langit o sa impyerno, apan nadungog nako nga ang mga miyembro sa Ang Simbahan ni Jesukristo sa mga Santos sa Ulahing mga Adlaw nagtuo sa daghang mga langit. Unsa man diay kana?”

Paggahin og pipila ka mga minuto sa pagsulat og usa ka tubag ngadto ni Olivia nga magpatin-aw sa imong pagsabot ug kahibalo sa tulo ka ang-ang sa himaya. Kon gusto nimo, mahimo kang mag-apil og mga drowing aron matabangan si Olivia sa paghulagway sa unsay imong gipasabot.

Human makompleto sa mga estudyante ang ilang mga pagpasabot, ikonsiderar ang pagdapit og pipila sa pagpakigbahin kon unsay ilang gisulat o sa pagdrama-drama sa senaryo diha atubangan sa klase.

Kon dili kini hisgotan sa mga estudyante, pangutan-a sila kon sa unsang paagi ang tulo ka ang-ang sa himaya nagpakita sa gugma ug kaluoy sa Langitnong Amahan ug ni Jesukristo (tan-awa sa Doktrina ug mga Pakigsaad 76:40–43). Klaroha nga ang pagpanunod sa usa ka gingharian sa himaya, lakip ang celestial nga himaya, posible lamang pinaagi ni Jesukristo (tan-awa sa Doktrina ug mga Pakigsaad 76:69–70).

Pangutan-a ang mga estudyante sa unsay ilang nakat-onan gikan niini nga kasinatian. Kon ang mga estudyante adunay mga pangutana mahitungod sa tulo ka ang-ang sa himaya, pangutan-a ang klase kon makakita ba sila og mga bersikulo sa Doktrina ug mga Pakigsaad 76 nga magtabang sa pagtubag sa ilang mga pangutana. Mahimo usab nimong ribyohon ang pipila sa materyal gikan sa nangaging mga leksiyon.

Pagtahod sa Langitnong Amahan ug ni Jesukristo

Ikonsiderar ang pagdapit sa mga estudyante sa paglista sa bisan unsa nga bag-o lang nilang nakat-onan diha sa Doktrina ug mga Pakigsaad nga nagdugang sa ilang gugma, pagpasalamat, ug pagtahod sa Langitnong Amahan ug kang Jesukristo. Ang mga estudyante mahimo usab nga maglakip og mga kasinatian sa panimalay, sa mga dapit sa Simbahan, o sa ubang dapit nga nakapalig-on sa ilang relasyon ngadto sa Langitnong Amahan ug kang Jesukristo.

Mahimong makatabang ang pagdapit sa mga estudyante sa pagrebyo sa Doktrina ug mga Pakigsaad 63:58–64; 76:19–24 ug sa bisan unsang mga mugbo nga sulat nga ilang nasulat samtang nagtuon sila niini nga mga bersikulo kaniadto.

Mahimo nimong ipakita ang mosunod nga pangutana ug dapita ang mga estudyante sa pagtubag aron matabangan sila sa pagsukod sa ilang kasamtangan nga paningkamot, tinguha, ug pag-uswag:

• Unsa ang imong nakat-onan mahitungod sa Langitnong Amahan ug ni Jesukristo nga nagdugang sa imong gugma, pagpasalamat, ug pagtahod alang Kanila?

Awhaga ang pipila ka mga estudyante sa pagpaambit. Ikonsiderar usab ang pagpakigbahin sa imong mga hunahuna.

Pagtuon ug pagpamalandong sa mga kasulatan

Ikonsiderar ang pagpakita sa hulagway sa ibabaw ug ipangutana ang mosunod nga mga pangutana:

• Unsa ang gibuhat nila ni Joseph Smith ug ni Sidney Rigdon sa wala pa sila makadawat sa panan-awon sa tulo ka ang-ang sa himaya?

• Unsay imong nakat-onan gikan sa ilang kasinatian?

Kon ang mga estudyante wala makahinumdom, dapita sila sa pagribyo sa Doktrina ug mga Pakigsaad 76:15–19. Seguroha nga sila nakasabot nga sa wala pa ang mga panan-awon gibuksan ngadto kang Joseph ug Sidney, ang duha ka tawo nagtuon ug namalandong sa mga kasulatan. Usa sa mga kamatuoran nga mahimong nakat-onan sa mga estudyante mao kini: Samtang mainampoong magtuon ug mamalandong kita sa mga kasulatan, giandam nato ang atong kaugalingon sa pagdawat og panabot gikan sa Ginoo pinaagi sa Espiritu Santo.

Hatagi ang mga estudyante og panahon sa pagpamalandong sa pagka-epektibo sa ilang pagtuon sa kasulatan. Mahimong mamalandong sila kon unsa kamaayo ang ilang mainampoong pagtuon ug pagpamalandong sa mga kasulatan. Kon mapuslanon, mahimo nimong ipakita ang mosunod nga hulagway ug dapita ang mga estudyante sa pagpakigbahin kon sa unsang paagi ang matag aytem makatabang kanila sa ilang pagtuon sa kasulatan. Mahimong ipakigbahin sa mga estudyante ang ilang gibuhat nga ilang gibati nga nakatabang kanila.

Mahimo usab nga makabenepisyo ang mga estudyante gikan sa paghisgot sa mga hagit ug posible nga mga solusyon uban sa ubang mga sakop sa klase. Mahimo nimong bahinon ang mga estudyante ngadto sa gagmay nga mga grupo ug dapita sila sa paghisgot sa mga hagit nga ilang giatubang samtang naningkamot sa pagtuon ug sa pagpamalandong sa mga kasulatan. Awhaga ang matag grupo sa pagpili og usa ka hagit ug sa paghunahuna og pipila ka yano nga mga lakang nga ilang mahimo aron mabuntog ang maong hagit ug madugangan ang kaepektibo sa ilang pagtuon sa kasulatan. Dapita ang matag grupo sa pagpakigbahin ngadto sa tibuok klase.

Sa pagtapos, pagdapit og pipila ka estudyante sa pagpamatuod kon sa unsang paagi ang pagpamalandong ug pagtuon sa kasulatan nagpanalangin sa ilang mga kinabuhi ug nagtabang kanila nga mobati nga mas duol kang Jesukristo.

Dugang nga mga Kalihokan sa Pagkat-on

Pagpasabot sa tulo ka ang-ang sa himaya

Mahimo nimong gamiton ang mosunod agig dugang o puli sa senaryo diha sa leksiyon. Mahimo usab kini nga usa ka kalihokan sa pagribyo atol sa laing sesyon sa klase.

Pagdrowing og hulagway sa adlaw, bulan, ug mga bitoon diha sa pisara. Dapita ang mga estudyante sa pagduol sa pisara ug sa pagsulat og mga detalye nga ilang nahinumdoman mahitungod sa mga ang-ang sa himaya tapad sa matag hulagway. Awhaga sila sa pagribyo sa Doktrina ug mga Pakigsaad 76 ug sa ilang mga mugbo nga sulat alang sa dugang nga impormasyon. Dapita ang pipila ka estudyante sa pagpasabot kon nganong mapasalamaton sila sa kahibalo nga gipadayag diha sa Doktrina ug mga Pakigsaad 76 ug kon sa unsang paagi kana nga kahibalo mahimong magdugang sa ilang gugma alang sa Langitnong Amahan ug kang Jesukristo.

Pagtahod sa Langitnong Amahan ug ni Jesukristo

Ikonsiderar ang mosunod nga kalihokan isip usa ka alternatibo nga paagi sa pagtabang sa mga estudyante sa pagsukod sa ilang pagpasalamat ug pagtahod alang sa Langitnong Amahan ug ni Jesukristo.

Dapita ang mga estudyante sa paghunahuna sa bag-o lang nga gitun-an nga mga tudling gikan sa Doktrina ug mga Pakigsaad nga nagdugang sa ilang gugma, pagpasalamat, ug pagtahod sa Langitnong Amahan ug ni Jesukristo. Ikonsiderar ang paglista niini diha sa pisara samtang mopakigbahin ang mga estudyante. Pagpakita og hulagway ni Jesukristo ug awhaga ang mga estudyante sa pagtan-aw niini samtang nagbasa ka og kusog sa usa sa mga tudling sa kasulatan. Dapita ang mga estudyante nga hilom nga motubag sa mga pangutana sama sa mosunod diha sa ilang mga journal sa pagtuon:

• Sa unsa nga paagi kini nga tudling sa kasulatan makatabang kanimo sa pagpalambo ug paglig-on sa imong relasyon ngadto sa Langitnong Amahan ug ni Jesukristo?

• Hain nga kamatuoran o mga kamatuoran nga anaa niini nga tudling ang imong gibati nga mahimo nimong pamatud-an?

• Unsa nga kamatuoran o mga kamatuoran ang anaa niini nga tudling ang gusto nimong mahibaloan pa og dugang? Ngano man?

Kon itugot sa panahon, ikonsiderar ang pagsubli sa kalihokan gamit ang laing tudling sa kasulatan.