Leksiyon 92: Doktrina ug mga Pakigsaad 81–83

Doktrina ug mga Pakigsaad 82:8–24

“Ako, ang Ginoo, Mapugos sa Pagtuman kon Kamo Mobuhat sa Unsa nga Ako Misulti”

Ang Manluluwas midapit sa mga miyembro sa Nagkahiusa nga Kapunongan sa pagbugkos sa ilang mga kaugalingon pinaagi sa pakigsaad sa pagdumala sa mga kalihokan sa Iyang Simbahan. Siya mihatag kanila og mga sugo ug misaad sa pagpanalangin kanila kon sila mosunod. Kon kita makigsaad sa pagsunod sa mga sugo ni Jesukristo, Siya misaad sa pagpanalangin kanato. Kini nga leksiyon makatabang sa mga estudyante nga makasabot kon unsaon sa pagtuman ang mga pakigsaad nga atong gihimo uban sa Langitnong Amahan ug ni Jesukristo.

Mga Posibleng Kalihokan sa Pagkat-on

Nabugkos ngadto sa Ginoo

Ang mosunod nga leksiyon nga naggamit og butang makatabang sa mga estudyante sa pagpamalandong sa ilang relasyon ngadto sa Langitnong Amahan ug ni Jesukristo. Ipakita sa mga estudyante ang duha ka magnet. Mahimong ipakita sa usa ka estudyante kon sa unsang paagi kon ang mga magnet magkaduol, sila magdikit o magbuwag sa usag usa. Hangyoa ang mga estudyante sa paghanduraw nga ang usa sa mga magnet nagrepresentar ni Jesukristo ug ang lain nagrepresentar kanila.

• Unsa ang atong makat-onan mahitungod sa atong relasyon sa Langitnong Amahan ug ni Jesukristo gikan niining mga magnet?

Dapita ang mga estudyante sa paghunahuna mahitungod sa ilang relasyon ngadto sa Langitnong Amahan ug ni Jesukristo. Samtang magtuon ang mga estudyante sa Doktrina ug mga Pakigsaad 82, awhaga sila sa pagtinguha og personal nga pagpadayag kon unsaon nila pagpalig-on ang ilang relasyon ngadto sa Langitnong Amahan ug ni Jesukristo.

“Ako, ang Ginoo, mapugos sa pagtuman kon kamo mobuhat sa unsa nga Ako misulti”

Sa Doktrina ug mga Pakigsaad 82, gisubli sa Ginoo ang mga instruksiyon nga gihatag sa nag-una nga pagpadayag (tan-awa sa Doktrina ug mga Pakigsaad 78). Ang mga instruksiyon mao ang pagtukod sa Nagkahiusa nga Kapunongan sa pagdumala sa temporal nga mga kalihokan sa Simbahan ug sa pagtukod sa Zion.

Ang Doktrina ug mga Pakigsaad 82:10 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Basaha ang Doktrina ug mga Pakigsaad 82:8–10, mangita kon unsay gitudlo sa Ginoo mahitungod sa Iyang mga sugo.

• Unsa ang rason sa Manluluwas sa paghatag kanato og mga sugo?

• Unsa ang gisaad sa Manluluwas kon kita motuman sa Iyang mga sugo?

Dapita ang mga estudyante sa pagsulti pag-usab sa kamatuoran gikan niini nga mga bersikulo sa ilang kaugalingong mga pulong. Mahimo usab nila kining isulat diha sa ilang journal o diha sa pisara. Mahimong makaila ang mga estudyante sa mga kamatuoran nga susama niini: Kon kita mosunod sa mga sugo sa Ginoo, Siya misaad sa pagpanalangin kanato.

Unsa ang gitudlo niini nga mga bersikulo mahitungod sa kinaiya sa Langitnong Amahan ug ni Jesukristo?

Aron matabangan ang mga estudyante sa pag-ila kon nakakita na sila sa katumanan niini nga kamatuoran, mahimo kang mohimo og kalihokan sama sa mosunod:

Bahina ang klase ngadto sa gagmay nga mga grupo. Hangyoa ang matag grupo sa pagpangita og mga ehemplo sa Manluluwas nga nagpanalangin sa mga tawo tungod sa pagsunod sa Iyang mga sugo. Ang mga estudyante mahimong maglista og mga ehemplo gikan sa mga kasulatan, sa ilang kaugalingong mga kinabuhi, o sa mga kinabuhi sa mga tawo nga ilang nailhan. Human sa igong panahon, mahimo nimong dapiton ang mga grupo sa pagpuli-puli sa pagpakigbahin og mga ehemplo. Mahimo nimong hisgotan kon unsay atong makat-onan gikan niini nga mga ehemplo mahitungod sa kaandam sa Manluluwas sa pagtuman sa Iyang mga saad.

Nabugkos pinaagi sa pakigsaad

Mahimo nimong tabangan ang mga estudyante nga makasabot kon sa unsang paagi ang bersikulo 1 makatudlo mahitungod sa atong relasyon sa pakigsaad ngadto sa Langitnong Amahan ug ni Jesukristo. Pinaagi sa mga pakigsaad, kita mohimo og mga saad ngadto sa Langitnong Amahan ug ni Jesukristo, ug Sila mohimo og mga saad ngari kanato.

• Unsa sa imong hunahuna ang gitudlo sa bersikulo 10 mahitungod sa mga pakigsaad nga atong gihimo ngadto sa Langitnong Amahan ug ni Jesukristo?

Basaha ang mosunod nga pamahayag ni Presidente Russell M. Nelson, mangita sa unsay iyang gitudlo mahitungod sa mga pakigsaad.

Sa higayon nga kita mohimo og usa ka pakigsaad uban sa Dios, kita mobiya na sa nyutral nga kahimtang hangtod sa kahangtoran. Ang Dios dili mobiya sa Iyang relasyon niadtong kinsa mimugna sa ingon nga bugkos uban Kaniya. Sa pagkatinuod, ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy. …

Sa higayon nga kamo ug ako mohimo og usa ka pakigsaad uban sa Dios, ang atong relasyon uban Kaniya mamahimong [mas] suod kay sa wala pa ang atong pakigsaad. Karon kita mag-uban nga gihugpong. Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maluluy-on nga pailob ngari kanato. Ang matag usa kanato adunay usa ka espesyal nga dapit diha sa kasingkasing sa Dios. Siya adunay taas nga pangandoy alang kanato. (Russell M. Nelson, “Ang Walay Kataposan nga Pakigsaad,” Liahona, Okt. 2022, 5, 6).

• Unsa sa imong hunahuna ang importante nga hinumdoman gikan niini nga pamahayag?

Ang pagtuman sa mga pakigsaad magdala og mga panalangin

Isip kabahin sa panudlo sa Ginoo ngadto sa mga lider sa Nagkahiusang Kapunongan, gitambagan Niya sila Joseph Smith, Oliver Cowdery, Edward Partridge, ug uban pa nga “pagabugkoson nga maghiusa pinaagi sa usa ka kasabotan ug pakigsaad” (Doktrina ug mga Pakigsaad82:11) sa pagdumala sa temporal nga mga kalihokan sa Simbahan. Isip mga anak sa Dios sa pakigsaad, kita usab mipakigsaad sa pagbuhat og pipila ka piho nga mga butang samtang kita nagasunod ni Jesukristo.

Ikonsiderar ang pagbahin sa klase ngadto sa duha ka grupo ug dapita ang matag grupo sa pagtigom og usa sa mosunod nga mga lista. Mahimo usab isulat sa mga estudyante ang ilang mga lista diha sa pisara.

Basaha ang Doktrina ug mga Pakigsaad 82:12–19 ug paghimo og lista sa unsay gisugo sa Ginoo nga buhaton sa mga miyembro sa Nagkahiusang Kapunongan.

Basaha ang Mosiah 18:8–10 ug ang Doktrina ug mga Pakigsaad 20:77 ug paghimo og lista sa unsay gihangyo sa Ginoo nga atong ipakigsaad nga buhaton karon.

• Unsa may mipatigbabaw kanimo gikan niini nga mga lista?

• Sa unsang paagi kini nga mga responsibilidad sa pakigsaad managsusama?

• Sa unsang paagi paminaw nimo nga ang pagtuman sa atong mga pakigsaad makatabang kanato nga mahimong mahisama sa Manluluwas?

Basaha ang Doktrina ug mga Pakigsaad 82:24, mangita sa unsay gisaad sa Ginoo niadtong kinsa nagtuman sa ilang mga pakigsaad uban Kaniya.

Ikonsiderar ang pagpakita sa mga magnet nga nagdikit. Dapita ang mga estudyante sa pagpakigbahin kon unsay ilang nakat-onan gikan niini nga leksiyon mahitungod sa ilang relasyon uban ni Jesukristo. Mahimo usab nimong ipakigbahin ang imong mga pagbati mahitungod sa mga panalangin nga imong nadawat gikan sa paghimo ug sa pagtuman sa mga pakigsaad ngadto sa Langitnong Amahan ug ni Jesukristo.

Isag-ulo ang doktrinal nga kahanas

Atol niini nga leksiyon, mahimo nimong tabangan ang mga estudyante sa pagsag-ulo sa Doktrina ug mga Pakigsaad 82:10 ug sa mahinungdanon nga hugpong sa mga pulong sa kasulatan nga “Ako, ang Ginoo, mapugos sa pagtuman kon kamo mobuhat sa unsa nga Ako misulti.” Unya mahimo nimong irebyo kini sa umaabot nga mga leksiyon. Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Sa unsa nga paagi nga ang pagtuman sa mga pakigsaad makapausab sa akong relasyon ngadto sa Langitnong Amahan ug ni Jesukristo?

Si Presidente Russell M. Nelson mipasabot:

Sa dihang ikaw ug ako mosulod usab niana nga dalan [sa pakigsaad], kita makabaton og usa ka bag-ong pamaagi sa kinabuhi. Kita sa ingon mohimo og usa ka relasyon ngadto sa Dios nga magtugot Kaniya nga mopanalangin ug mousab kanato. Ang dalan sa pakigsaad modala kanato balik ngadto Kaniya. Kon kita motugot nga ang Dios mopatigbabaw sa atong mga kinabuhi, kana nga pakigsaad modala kanato nga mas mapaduol pa gayod ngadto Kaniya. Ang tanang pakigsaad gituyo nga mahimong mobugkos. Kini makahimo og usa ka relasyon nga walay kataposang pagkabugkos. …

Ang paghimo og usa ka pakigsaad sa Dios mousab sa atong relasyon uban Kaniya hangtod sa kahangtoran. Kini mopanalangin kanato sa naghingapin nga gugma ug kaluoy. Kini makaapekto kon si kinsa kita karon ug sa unsang paagi ang Dios motabang kanato nga mamahimong unsa atong sangpotan (Russell M. Nelson, “Ang Walay Kataposan nga Pakigsaad,” Liahona, Okt. 2022, 5, 9-10).

Unsa kaha kon dili nato makita ang mga panalangin sa pagsunod sa mga sugo ug pagtuman sa mga pakigsaad?

Si Elder D. Todd Christofferson sa Korum sa Napulog Duha ka Apostoles mitudlo:

Ang Atong Relasyon sa Dios

Si Elder Christofferson nagtudlo nga bisan unsa pay atong mortal nga mga kasinatian, kita makasalig nga ang Dios motuman sa Iyang mga saad.

Ang Dios motuman gayod sa Iyang mga pakigsaad ug mga saad sa matag usa kanato. Kita dili kinahanglan nga mabalaka niana [Doktrina ug mga Pakigsaad 82:10]. Ang makatubos nga gahom ni Jesukristo—kinsa mikunsad ubos sa tanang butang ug dayon mikayab sa kahitas-an [Doktrina ug mga Pakigsaad 88:6] ug kinsa aduna sa tanang gahom sa langit ug sa yuta [Mateo 28:18]—makaseguro nga ang Dios makatuman ug motuman sa Iyang mga saad. Importante nga atong tahoron ug sundon ang Iyang mga balaod, apan dili ang tanang panalangin nga pinasikad base sa kamasulundon sa balaod [Doktrina ug mga Pakigsaad 130:20–21] giporma, gidesinyo, ug may tagal sumala sa atong mga gilaoman. Kita maningkamot sa atong labing maayo apan kinahanglan nga itugyan ngadto Kaniya ang pagdumala sa mga panalangin, temporal man o espirituwal. (D. Todd Christofferson, “Ang Atong Relasyon sa Dios,” Liahona, Mayo 2022, 79)

Si Presidente Russell M. Nelson mitambag:

Ang espirituhanong kamatuoran dili mabaliwala—labi na ang balaang mga sugo. Ang pagtuman sa balaang mga sugo magdala og panalangin, kanunay! Ang pagsupak sa balaang mga sugo makawala sa mga panalangin, kanunay! (Russell M. Nelson, “Ipakita ang Inyong Pagtuo,” Liahona, Mayo 2014, 30)

Unsa ang pipila ka dugang nga mga panalangin nga nagauban sa pagtuman sa mga pakigsaad?

Si Elder David A. Bednar sa Korum sa Napulog Duha ka Apostoles mitudlo:

Kita lig-on nga nabugkos ngadto ug uban sa Manluluwas samtang matinud-anong mohinumdom ug mohimo sa labing maayo sa pagpuyo sumala sa mga obligasyon nga atong gidawat. Ug kana nga pagkabugkos uban Kaniya mao ang tinubdan sa espirituhanon nga kalig-on sa matag panahon sa atong kinabuhi. …

… Ako mopamatuod nga ang katawhan sa pakigsaad sa Ginoo karon sa pagkatinuod gisangkapan sa katarong ug uban sa gahom sa Dios sa dako nga himaya. Ako nakasaksi sa hugot nga pagtuo, kaisog, panglantaw, kamakanunayon, ug hingpit nga kalipay nga molabaw pa kaayo sa mortal nga kapasidad—ug nga ang Dios lamang ang makahatag. (David A. Bednar, “Uban sa Gahom sa Dios sa Dako nga Himaya,” Liahona, Nob. 2021, 29)

Si Sister Jean B. Bingham, Kinatibuk-ang Presidente sa Relief Society, nakaobserbar:

Covenants with God Strengthen, Protect, and Prepare Us for Eternal Glory

President Bingham teaches that making and keeping covenants with God brings us happiness and safety now and eternal joy in the world to come.

Kadtong kinsa nabunyagan mipakigsaad nianang dili gayod hikalimtan nga adlaw nga dad-on ang ngalan ni Jesukristo diha kanila, nga kanunay mohinumdom Kaniya, motuman sa Iyang mga sugo, ug moserbisyo Kaniya hangtod sa kataposan. Kon kita mobuhat niining mga butanga, ang Langitnong Amahan nagsaad nga mopasaylo sa atong mga sala ug mohatag kanato sa pagpakig-uban sa Espiritu Santo. Kini nga mga panalangin mopahiluna kanato diha sa dalan nga, kon kita mopadayon sa unahan ug molahutay ngadto sa kataposan, motugot kanato aron makapuyo uban Kaniya ug sa Iyang Anak didto sa celestial nga gingharian. Ang matag tawo nga nabunyagan gisaaran niini nga mga pribilihiyo kon siya motuman sa mga pakigsaad nga iyang gihimo nianang espesyal nga adlaw.

Kadtong kinsa mohimo og dugang nga mga pakigsaad diha sa templo makadawat og gamhanan nga mga saad sigon sa personal nga pagkamatinud-anon. Kita ligdong nga mipakigsaad nga mosunod sa mga sugo sa Dios, mosunod sa ebanghelyo ni Jesukristo, mahimong lunsay sa moral nga paagi, ug mopahinungod sa atong panahon ug mga talento ngadto sa Ginoo. Agig balos, ang Dios nagsaad og mga panalangin niini nga kinabuhi ug sa oportunidad nga mobalik ngadto Kaniya. Niana nga proseso, kita hatagan, o tugahan, sa gahom sa pag-ila tali sa kamatuoran ug sayop, tali sa sakto ug dili sakto, taliwala sa daghan kaayong negatibo nga mga tingog nga nagsamok-samok kanato. Pagkagamhanan nga gasa! (Jean B. Bingham, “Ang mga Pakigsaad uban sa Dios Makalig-on, Makapanalipod, ug Makaandam Kanato alang sa Mahangtoron nga Himaya,” Liahona, Mayo 2022, 66-67)

Dugang nga mga Kalihokan sa Pagkat-on

Doktrina ug mga Pakigsaad 82:8–9. “Kini unta mobalik nganha kaninyo alang sa inyong kaluwasan”

Gamit ang Doktrina ug mga Pakigsaad 82:8–9, dapita ang mga estudyante sa paglista sa mga sugo nga ang Ginoo nagsugo kanila nga tumanon karon. Mahimo nimong pangutan-on ang mga estudyante kon unsa sa ilang hunahuna ang gipasabot sa hugpong sa mga pulong nga “kini unta mobalik nganha kaninyo alang sa inyong kaluwasan”. Dayon hisgoti kon sa unsang paagi ang pagsunod sa matag sugo diha sa lista makatampo sa ilang kaluwasan.

Ang pagtuman sa mga pakigsaad makatabang sa pagtukod sa Zion

Usa ka alternatibo nga paagi sa pagkonsiderar sa Doktrina ug mga Pakigsaad 82:12–19 mao ang pagtutok sa pagtukod sa Zion. Ang Doktrina ug mga Pakigsaad 82:14 nag-ingon nga ang Zion kinahanglan mobangon, malig-on, ug motubo diha sa katahom ug pagkabalaan. Ang Nagkahiusang Kapunongan gimugna aron sa pagtabang sa pagtukod sa Zion ug paghatag og benepisyo sa mga kabos (tan-awa sa ulohan sa seksiyon sa Doktrina ug mga Pakigsaad 78).

Hangyoa ang mga estudyante sa pagbasa sa Moises 7:18, nga nagkonsiderar kon giunsa sa Ginoo paghatag og kahulogan ang Zion. Dayon dapita sila sa pagbasa sa Doktrina ug mga Pakigsaad 82:12–19, sa pag-ila sa mga paagi nga ang Ginoo mihangyo sa unang mga Santos sa pagtuman sa ilang mga pakigsaad sa pagtabang sa pagtukod sa Zion.

Ikonsiderar ang pagsulat sa pulong nga Zion diha sa pisara. Dapita ang mga estudyante sa pagdugang og mga hugpong sa mga pulong ug mga drowing nga nagrepresentar sa mga paagi nga kita makasunod niini nga mga panudlo sa atong panahon. Human sila makadugang og pipila ka mga butang diha sa pisara, hisgoti kon sa unsang paagi ang pag-apil niini nga mga kalihokan makabugkos kanato ngadto sa Manluluwas ug sa usag usa sa paghimo sa Zion. Mahimo nimong ikonsiderar ang paglakip sa mga panalangin nga nagauban sa pagkabugkos ngadto sa Manluluwas pinaagi sa pakigsaad.