Leksiyon 91: Doktrina ug mga Pakigsaad 81–83

Doktrina ug mga Pakigsaad 82:1–7

“Ngadto Kinsa Daghan Ang Gihatag Daghan Ang Gikinahanglan”

Niadtong Abril 1832, si Propeta Joseph Smith ug ang uban pa mibiyahe ngadto sa Independence, Missouri. Sila misunod sa sugo sa Ginoo sa pag-establisar og organisasyon aron sa pagtukod sa Zion ug sa pag-atiman sa mga kabos (tan-awa sa Doktrina ug mga Pakigsaad 78). Human sa pagtabang sa pagsulbad sa pipila ka mga panagbangi tali sa mga miyembro, ang Propeta nakadawat niini nga pagpadayag nga naghulagway sa mga gilaoman sa Ginoo sa Iyang mga katawhan. Kini nga leksiyon makatabang sa mga estudyante nga makasabot sa mga paagi nga ang Ginoo nagpanalangin kanila ug kon sa unsang paagi Niya gilaoman nga gamiton nila kadto nga mga panalangin.

Mga Posibleng Kalihokan sa Pagkat-on

Unsa ang gihatag sa Ginoo kanimo

Aron makatabang sa pag-andam sa mga estudyante alang niini nga leksiyon, ikonsiderar ang pag-awit og usa ka himno mahitungod sa mga panalangin nga gihatag sa Ginoo. Ang himno mahimong kabahin sa debosyonal.

Pagdapit og tulo ka estudyante nga mobarog atubangan sa klase. Ihatag sa usa ang kopya sa Basahon ni Mormon, ngadto sa lain ang sobre nga adunay dakong kantidad sa salapi nga gisulat sa gawas (pananglitan, $ 1,000,000), ug sa lain pa ang pipila ka mga piraso sa kendi.

• Base sa unsay gihatag kanila, unsay imong gilaoman nga buhaton niini nga mga estudyante?

Ikonsiderar ang pagdapit sa mga estudyante nga anaa diha sa atubangan sa klase sa pagpakigbahin og usa o duha ka ideya kon unsaon nila sa pagpanalangin ang uban sa unsay gihatag kanila.

Hisgoti nga dili kita makabaton sa sama nga mga gilaoman alang sa usa ka tawo nga wala makadawat sa sama nga mga butang.

Isip mga anak sa Langitnong Amahan ug isip mga miyembro sa Iyang Simbahan, gihatagan kita og daghan. Dapita ang mga estudyante sa paggahin og pipila ka minuto sa paglista sa mga panalangin nga ilang nadawat gikan sa Ginoo. Mahimong makatabang ang paghimo og pipila ka mga kategoriya alang sa mga estudyante aron hunahunaon samtang sila naghimo sa ilang lista (pananglitan, mga panalangin nga anaa sa Simbahan, espirituhanong mga kasinatian nga ilang nasinati, mga tawo nga mipanalangin sa ilang mga kinabuhi, yutan-ong mga kabtangan ug mga oportunidad nga anaa kanila, ug uban pa).

Ipakita ang mosunod nga mga pangutana alang sa mga estudyante aron pamalandongan.

Pamalandongi ang mosunod nga mga pangutana:

• Sa unsang paagi nakaapekto kanimo kini nga mga panalangin?

• Unsa ang ikatudlo niini kanimo mahitungod sa Ginoo?

• Sa unsang paagi kaha nga ang Ginoo naglaom kanimo nga molihok nga lahi gikan sa usa ka tawo kinsa wala makadawat niini nga mga panalangin?

Sa imong pagtuon niini nga leksiyon, pangitaa ang dugang nga mga panabot dinhi niini nga mga pangutana.

Doktrina ug mga Pakigsaad 82

Ikonsiderar ang pagpamubo sa mosunod nga impormasyon:

Ang mga Santos niini nga panahon nakadawat og dagkong mga panalangin gikan sa Ginoo. Kini nga mga panalangin naglakip sa gipahiuli nga Simbahan, sa Basahon ni Mormon, ug sa buhing propeta nga nagpadayag sa mga pulong sa Ginoo. Bisan pa niana, sila naglisod gihapon sa pagpanimuyo sa paagi nga gitinguha sa Ginoo. Ang mosunod mao ang pipila ka mga panag-ingnan:

• Sulod sa pipila ka mga bulan, ang dili mabination nga mga pagbati namugna tali ni Sidney Rigdon sa Ohio ug ni Bishop Edward Partridge sa Missouri. Bag-ohay lang silang nagka-uli.

• Pipila ka mga miyembro sa Simbahan sa Missouri nahimong masinawayon kang Joseph Smith.

• Samtang ang mga miyembro sa Simbahan mibalhin sa Missouri, daghan kanila napakyas sa pagsunod sa tambag ug mga sugo sa Ginoo, lakip ang pagsunod sa balaod sa pagpahinungod.

Si Propeta Joseph Smith ug ang ubang mga lider sa Simbahan mibiyahe ngadto sa Missouri ug mipahigayon og usa ka konseho sa halangdon nga mga pari sa Simbahan. Ang pinadayag diha sa Doktrina ug mga Pakigsaad 82 nadawat atol sa sesyon sa hapon.

Basaha ang Doktrina ug mga Pakigsaad 82:1–7, mangita sa unsay gilaoman sa Ginoo gikan sa mga Santos tungod kay sila napanalanginan sa hilabihan.

• Unsa ang imong nakat-onan gikan niini nga mga bersikulo?

  Mahimong mopakigbahin ang mga estudyante og nagkalain-laing mga kamatuoran. Pangutan-a sila kon nganong ang mga kamatuoran nga ilang gipakigbahin importante nga masabtan.

  Ang mga estudyante mahimong mopakigbahin o dili mopakigbahin sa baroganan nga ang Ginoo nagkinahanglan og daghan niadto kinsa Iyang gihatag og daghan. Kon ang mga estudyante dili mopakigbahin niana, dapita sila sa pagpakigbahin kon unsay ilang nakat-onan gikan sa bersikulo 3.

  Kon mangutana ang mga estudyante mahitungod sa kanhi nga mga sala nga mibalik (tan-awa sa bersikulo 7), tabangi sila nga makasabot nga kon magpadayon kita sa pagbuhat sa samang sala, kinahanglan natong ipadayon ang atong paghinulsol. Kita mapailobon nga makasalig sa Manluluwas ug magpadayon sa pagpaningkamot sa pagpalambo, nasayod nga Siya motabang kanato. (Tan-awa sa Neil L. Andersen, “Paghinulsol … Aron Ako Moayo Kaninyo,” Liahona, Nob. 2009, 40).

• Sa imong hunahuna ngano kaha nga ang Ginoo adunay ingon niini nga mga gilaoman?

• Nganong importante man alang kanato nga makasabot niini?

Alang sa dugang nga mga panabot, basaha ang mosunod nga pamahayag ni Elder D. Todd Christofferson sa Korum sa Napulog Duha ka Apostoles:

Ang atong Langitnong Amahan usa ka Dios nga adunay taas nga mga gilaoman. …

… Ang tuyo sa Dios mao nga kita, Iyang mga anak, makasinati og hingpit nga kalipay, nga makauban Kaniya sa kahangtoran, ug mahisama Kaniya. …

Kon kita kinasingkasing nga magtinguha ug maningkamot nga hintupngan ang taas nga mga gilaoman sa atong Langitnong Amahan, Siya moseguro nga atong madawat ang tanang tabang nga atong gikinahanglan kon kini paghupay man, paglig-on, o pagpanton. (D. Todd Christofferson, “Ako Nagabadlong ug Nagapanton sa Akong Gihigugma,” Liahona, Mayo 2011, 97, 99)

• Ngano nga makatabang usab ang paghinumdom sa masinabtanon ug maluluy-on nga kinaiya sa Ginoo? (tan-awa sa mga bersikulo 1, 7).

Paghinumdom sa kon unsa ang gihatag sa Ginoo kanato

Ang mosunod mao ang usa ka paagi sa pagtabang sa mga estudyante nga makasabot kon nganong ang Dios naglaom og labaw niadtong “kang kinsa daghan ang gihatag” (Doktrina ug mga Pakigsaad 82:3). Mahimong buhaton sa mga estudyante ang kalihokan diha sa gagmay nga mga grupo o sa tinagsa.

Mga Panalangin gikan sa Ginoo

Pagpili og bisan og duha sa mosunod nga mga panalangin, o pagpili og ubang mga panalangin nga wala malista.

• Mga Kasulatan

• Buhi nga mga propeta

• Pagpasaylo sa mga sala

• Ang gasa sa Espiritu Santo

• Usa ka kahibalo mahitungod ni Jesukristo ug sa Iyang Pag-ula alang kanato

• Mga Templo

Sa pipila ka minuto, tun-i ang mahitungod sa mga panalangin nga imong gipili. Gamita ang mga kasulatan, mga pakigpulong sa kinatibuk-ang komperensiya, ug ubang mga kapanguhaan sa Simbahan sama sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022). Pangitaa ang:

1. Mga paagi nga ang Ginoo makapauswag sa atong kinabuhi pinaagi niini nga mga panalangin.

2. Unsa ang gilaoman sa Ginoo gikan niadto kinsa kini nga mga panalangin gihatag.

Pagdugang og bisan unsa sa imong kaugalingon nga mga hunahuna o mga panabot gikan sa personal nga mga kasinatian. Mahimo nimong ilakip kon sa unsang paagi ang mga tawo nga aduna niini nga mga panalangin mahimong makatabang o mahimong usa ka ehemplo niadtong wala mahatagi sa sama nga mga kasinatian ug kahibalo.

Dapita ang mga estudyante sa pagpakigbahin kon unsay ilang nakat-onan. Usa ka paagi sa pagbuhat niini mao ang paghangyo og usa ka boluntaryo sa pagpakigbahin ug dayon paghingalan og laing estudyante nga ilang gibati nga usa ka dako nga panalangin ngadto sa klase. Dayon pangutan-a ang girekomendar nga estudyante kon andam ba siyang mopakigbahin kon unsay iyang nakat-onan. Seguroha nga sila nasayod nga sila dili obligado nga mopakigbahin. Balika kini nga kalihokan sa pipila ka higayon.

Kon makatabang ang pagpakita og usa ka ehemplo sa usa ka tawo kinsa nagsunod niini nga baroganan, ipakita ang “Treasures in Heaven: The John Tanner Story” gikan sa time code 8:21 hangtod sa 12:24. Ipasabot nga si John Tanner usa ka tawo nga gipanalanginan sa Ginoo og dagkong mga bahandi sa wala pa siya makabig ngadto sa ebanghelyo. Dapita ang mga estudyante sa pagpangita kon sa unsang paagi gigamit ni John ang iyang bahandi.

Ang mga gilaoman ug gugma sa Dios

Samtang tubagon sa mga estudyante ang mosunod nga mga pangutana, susiha kon unsa ka maayo ang ilang nasabtan sa baroganan nga gilakip niini nga leksiyon. Pangita og mga paagi sa paghatag og gibug-aton sa gugma sa Ginoo ug sa unsang paagi kita makapanalangin og dugang sa Iyang mga anak samtang kita magkinabuhi sumala sa unsay Iyang gihatag kanato.

Giyahi ang mga tigkat-on sa pag-ila sa impluwensiya sa Ginoo diha sa ilang kinabuhi: Alang sa dugang nga pagbansay kon unsaon sa pagbuhat niini, tan-awa ang pagbansay nga giulohan og “Tabangi ang mga tigkat-on nga makaila sa gugma, gahom, ug kaluoy sa Ginoo diha sa ilang kinabuhi” nga makita sa Pagpalambo sa mga Kahanas sa Magtutudlo: Magpunting Kang Jesukristo. Ikonsiderar ang pagpraktis sa kahanas. Mahimo nimong ipangutana sa mga estudyante ang mga pangutana nga nagpunting sa pagkonektar sa gugma, gahom, ug kaluoy sa Ginoo diha sa ilang kinabuhi.

• Ngano nga mapasalamaton ka man sa mga gilaoman sa Ginoo?

• Sa unsang paagi ang mga gilaoman sa Ginoo nagpakita sa Iyang gugma?

Dapita ang mga estudyante sa pagtan-aw sa ilang lista kon unsa ang gihatag sa Ginoo kanila. Mahimo silang magdugang og bisan unsang ikadugang nga mga panalangin nga ilang nahunahunaan sa tibuok leksiyon. Hangyoa sila sa pagrekord kon unsa ang gusto nilang mahinumdoman o buhaton tungod sa unsay gihatag sa Ginoo kanila.

Dugang nga mga Kapanguhaan

Unsa ang gihatag ni Jesukristo kanato pinaagi sa Iyang Pag-ula?

Si Presidente Dallin H. Oaks sa Unang Kapangulohan mitudlo:

Unsa ang nabuhat ni Jesukristo alang sa matag usa kanato?? Nabuhat Niya ang tanan nga mahinungdanon alang sa atong panaw sa mortalidad ngadto sa padulngan nga gilatid diha sa plano sa atong Langitnong Amahan. …

… Si Jesus mitudlo, “Kay Ako buhi man, mabuhi usab kamo” (Juan 14:19). …

Apan ang Pagkabanhaw naghatag kanato og labaw pa niini nga kaseguroan sa pagka-imortal. Kini nakapausab sa paagi nga kita motan-aw sa mortal nga kinabuhi. …

… Tungod kay ang matag usa kanato adunay kaseguroan sa pagkabanhaw, kita nasayod nga kining mortal nga mga kakulangan ug mga oposisyon temporaryo lang. …

Ang atong Manluluwas ug Manunubos milahutay sa dili matukib nga pag-antos nga mahimong usa ka sakripisyo alang sa mga sala sa tanang mga tawo kinsa maghinulsol. Kining maulaon nga sakripisyo … kini miabli sa pultahan alang sa matag usa kanato nga malimpyohan sa atong personal nga mga sala aron kita madawat og balik ngadto sa presensiya sa Dios, atong Amahan sa Kahangtoran. …

… Pinaagi sa mga pagtulun-an sa Iyang mga propeta ug pinaagi sa Iyang personal nga pangalagad, si Jesus mitudlo kanato sa plano sa kaluwasan. …

Ang atong Manluluwas mibati ug nasayod sa atong mga tentasyon, atong mga panlimbasog, sa atong mga kasakit, ug sa atong mga pag-antos, kay Siya andam nga misinati niining tanan isip kabahin sa Iyang Pag-ula. … Ang tanang nag-antos sa bisan unsa nga matang sa mortal nga kahuyang kinahanglang mahinumdom nga ang atong Manluluwas nakasinati usab niining matang sa sakit, ug pinaagi sa Iyang Pag-ula, Siya nagtanyag sa matag usa kanato sa kalig-on aron mapas-an kini. (Dallin H. Oaks, “Unsa ang Nabuhat sa Manluluwas alang Kanato?,” Liahona, Mayo 2021, 75–77)

Nganong daghan man ang gilaoman gikan sa mga miyembro sa Simbahan?

Si Elder Neil L. Andersen sa Korum sa Napulog Duha ka Apostoles mitudlo:

Ang uban nangutana, “Kinahanglan ba nga malahi gayod ako sa uban?” “Dili ba ako mahimong usa ka disipulo ni Kristo nga dili kaayo maghunahuna sa akong batasan?” “Dili ba ako makahigugma ni Kristo nga dili mosunod sa balaod sa kaputli?” “Dili ba ako makahigugma Kaniya ug mobuhat sa akong gusto sa Dominggo?” Si Jesus mihatag og yano nga tubag: “Kon nahigugma kamo kanako, inyong pagatumanon ang akong mga sugo” [Juan 14:15]. …

… Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kay nakabaton og pagsaksi sa Iyang katinuod dili lang gikan sa Biblia apan gikan usab sa Basahon ni Mormon; nasayod nga ang Iyang priesthood napahiuli na sa yuta; nakahimo na og sagradong mga pakigsaad sa pagsunod Kaniya ug nakadawat na sa gasa sa Espiritu Santo; natugahan na og gahom diha sa Iyang balaan nga templo; ug nahimong kabahin sa pagpangandam alang sa Iyang mahimayaong pagbalik nganhi sa yuta, dili kita makatandi kon unsa kita ngadto sa uban nga wala pa nakadawat niining mga kamatuoran. “Alang kaniya ngadto kinsa daghan ang gihatag daghan ang gikinahanglan” [Doktrina ug mga Pakigsaad 82:3]. (Neil L. Andersen, “Ayaw Gayod Pagbiya Kaniya,” Liahona, Nob. 2010, 41)

Aron makita kon sa unsang paagi si Presidente Dieter F. Uchtdorf, nga kaniadto sa Unang Kapangulohan, mitudlo sa mga naghupot sa pagkapari mahitungod niini nga baroganan, tan-awa ang “A Matter of a Few Degrees” gikan sa time code 9:42 hangtod sa 10:54.

Dugang nga mga Kalihokan sa Pagkat-on

Pagpahisama sa mga kasulatan ngari kanato

Isip lahi nga paagi sa pagtuon niini nga pagpadayag, ipasabot nga makatabang ang pagpahisama sa mga kasulatan sa atong mga kinabuhi samtang atong basahon kini. Dapita ang mga estudyante sa pagbasa diha sa leksiyon sa mga problema nga giatubang sa mga Santos sa dihang gipadayag ang Doktrina ug mga Pakigsaad 82. Paghimo og tinud-anay ug may kalabotan nga sitwasyon karon diin ang mga miyembro sa Simbahan mahimong:

• Adunay dili mabination nga mga pagbati ngadto sa usag usa.

• Nanghinaway sa mga propeta o mga lider sa Simbahan.

• Wala nagsunod sa sugo.

• Wala nagpakigbahin sa ilang kwarta, panahon, o talento sa pagtabang sa uban.

Dapita ang mga estudyante sa pagpili og sitwasyon nga sa ilang hunahuna makahuloganon nga pamalandongan samtang magtuon sila sa Doktrina ug mga Pakigsaad 82. Dasiga sila sa pagpangita og mga baroganan nga mahimong makatabang niini nga sitwasyon.

Kon dili ako gusto og taas nga mga gilaoman

Paingon sa kataposan sa leksiyon, mahimong mapuslanon ang pagdapit sa mga estudyante sa paghanduraw nga adunay nagbasa sa Doktrina ug mga Pakigsaad 82 ug nangandoy nga wala lang unta siya mahatagi og daghan kaayong mga panalangin aron ang Ginoo molaom og diyutay lang kaniya. Ipatubag sa mga estudyante base sa unsay ilang nakat-onan sa leksiyon. Ang kataposang duha ka mga pangutana diha sa leksiyon mahimong mapuslanon usab.

Usa ka biswal nga kalihokan

Kon gibati nimo nga makatabang kini, dapita ang mga estudyante sa paglista diha sa wala nga bahin sa usa ka piraso sa papel og 5 ngadto sa 10 ka mga panalangin nga ilang nadawat. Dayon sa atbang sa matag panalangin mahimo nilang isulat kon unsa ang ilang gibati nga gilaoman sa Ginoo gikan sa usa ka tawo nga nakadawat niana nga panalangin.

Pagsabot sa duha ka lain-laing mga aspeto sa Manluluwas

Ipakita ang usa ka katunga sa usa ka litrato, ug unya ipakita ang lain pang katunga. Pangutan-a ang mga estudyante kon sa unsang paagi nga ang pagtan-aw sa duha ka mga katunga makatabang kanila nga mas makasabot sa tibuok nga hulagway. Sama sa duha ka katunga sa usa ka litrato, si Jesus maluluy-on ug adunay taas usab nga gilaoman kanato. Basaha ang Doktrina ug mga Pakigsaad 82:1–7, mangita og ebidensiya sa duha ka mga hiyas diha Kaniya. Nganong importante man nga mahibalo nga Siya aduna nianang duha ka mga kinaiya? Sa unsang paagi kini makaapekto sa usa ka tawo kon siya nakasabot lamang sa usa ka bahin sa Iyang kinaiya?