Leksiyon 97: Doktrina ug mga Pakigsaad 84

Pagbansay 6 sa Doktrinal nga Kahanas

Pagsabot sa Doktrina ug Pag-angkon og Espirituhanong Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon makatabang sa mga estudyante nga makasabot sa mga kamatuoran nga gitudlo diha sa mga tudling sa doktrinal nga kahanas ug makatabang kanila nga makakat-on ug mogamit sa balaanong mga baroganan alang sa pag-angkon og espirituhanong kahibalo.

Mga Posibleng Kalihokan sa Pagkat-on

Rebyo sa doktrinal nga kahanas: Sabta

Aron matabangan ang mga estudyante nga mahimong pamilyar sa mga tudling sa doktrinal nga kahanas sa nahibilin nga mga seksiyon sa Doktrina ug mga Pakigsaad, ikonsiderar ang paghatag kanila og pipila ka minuto aron markahan kini nga mga tudling diha sa ilang mga kasulatan sa lahi nga paagi. Ang mga estudyante makakaplag sa lista sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan diha sa Mahinungdanon nga Dokumento sa Doktrinal nga Kahanas (2023).

Mahimo dayon nimong dapiton ang mga estudyante sa pagbuhat sa mosunod nga kalihokan diha sa gagmay nga mga grupo aron madugangan ang ilang pagsabot sa doktrina nga gitudlo niini nga mga tudling. Seguroha nga ang pagmarka sa mga kasulatan ug ang pagkompleto niini nga kalihokan molungtad lang og 10 ngadto sa 15 ka minuto. Kini makahatag og igong panahon alang sa mga estudyante sa pagpraktis sa paggamit sa mga baroganan sa pag-angkon og espirituhanong kahibalo unya sa leksiyon.

Paghimo og lista sa komon nga mga kalisdanan nga giatubang sa mga tin-edyer diha sa ilang inadlaw nga kinabuhi.

Pangita og mga tudling sa doktrinal nga kahanas sa Doktrina ug mga Pakigsaad nga makatabang niadto nga mga sitwasyon. Basaha ang mga tudling nga imong gipili, ug pangandam sa pagpakigbahin ngadto sa klase sa imong mga tubag sa mosunod nga mga pangutana:

• Unsaon nimo sa pagpasabot sa imong kaugalingong mga pulong kon unsay gitudlo niini nga mga tudling?

• Sa unsang paagi nga ang mga pagtulun-an ni Jesukristo niini nga mga tudling makatabang sa mga tin-edyer nga adunay komon nga mga kalisdanan nga imong gilista?

Pagkat-on ug paggamit sa mga baroganan sa pag-angkon og espirituhanong kahibalo

Sa dili pa ipahibalo ang mosunod nga sitwasyon, mahimong makatabang alang sa mga estudyante ang pagrebyo sa makadiyot sa mga baroganan sa pag-angkon og espirituhanong kahibalo. (Ang gisugyot nga mga kalihokan sa pagrebyo gilakip diha sa “Mga Kalihokan sa Pagrebyo sa Doktrinal nga Kahanas” diha sa apendiks niini nga manwal.)

Usa ka paagi sa pagrebyo mao ang pagsulat sa matag baroganan diha sa pisara isip usa ka linain nga ulohan nga adunay luna nga masuwatan ubos sa matag usa. Pagdapit og halos managsama nga gidaghanon sa mga estudyante aron sa pagrebyo sa lain-laing mga baroganan sa pag-angkon og espirituhanong kahibalo gikan sa mga parapo 5–12 sa Mahinungdanon nga Dokumento sa Doktrinal nga Kahanas (2023). Dayon pagdapit og tulo ka mga boluntaryo, usa alang sa matag baroganan, ngadto sa pisara. Hangyoa sila sa pagsulat ubos sa nahiuyon nga ulohan og usa ka importante nga hugpong sa mga pulong o konsepto gikan sa mga parapo nga ilang giribyo. Kini nga mga hugpong sa mga pulong o mga konsepto gamiton unya diha sa leksiyon.

Basaha ang mosunod nga senaryo, ug hunahunaa kon sa unsang paagi ang mga baroganan sa pag-angkon og espirituhanong kahibalo mahimong makatabang:

Gibati ni Kris nga naglibog. Ang iyang magulang nga babaye, kinsa minyo, bag-ohay lang misulti kaniya nga siya mibiya sa Simbahan ug wala na magtinguha nga mahimong miyembro. Si Chris adunay ubang mga sakop sa pamilya ug mga higala kinsa kanhi lig-on sa ebanghelyo apan mihunong sa kanunayng pagtambong sa simbahan. Sila mga maayo nga mga tawo ug makita nga malipayon ug malamposon sa ilang mga kinabuhi. Kanunay nga nagplano si Chris nga magpabilin nga aktibo sa Simbahan, apan nagsugod siya sa paghunahuna kon ang pagpabiling aktibo sa Simbahan sa tibuok niyang kinabuhi importante ba gayod.

Dapita ang mga estudyante sa pagporma og mga grupo sa tinagutlo, kon mahimo, uban sa mga estudyante kinsa miribyo og lain-laing mga baroganan sa pag-angkon og espirituhanong kahibalo. Hangyoa ang mga grupo sa paghisgot kon sa unsang paagi ang matag hugpong sa mga pulong o mga konsepto diha sa pisara makatabang kang Chris.

Base sa panahon, mahimo nimong balikon ang miaging kalihokan sa makadaghan pinaagi sa pagdapit og ubang mga boluntaryo sa pagsulat og lain-laing mga hugpong sa mga pulong o mga konsepto diha sa pisara ubos sa matag baroganan. Alang sa dugang nga kalainan, atol sa matag hugna ang mga estudyante mahimong moporma og lain na usab nga mga grupo sa tinagutlo aron hisgotan ang bag-ong mga hugpong sa mga pulong o mga konsepto diha sa pisara.

Sa pagtapos niini nga kalihokan, mahimong magporma ang mga estudyante og bag-ong mga grupo sa makausa pa ka higayon aron hisgotan ang mosunod:

• Unsa nga mga tudling sa doktrinal nga kahanas sa Doktrina ug mga Pakigsaad ang labing makatabang kang Chris nga makasabot sa unsay gitanyag ni Jesukristo niadtong kinsa magpabiling matinud-anon sa Iyang Simbahan?

• Unsa nga mga tudling sa doktrinal nga kahanas gikan sa ubang mga basahon sa kasulatan ang makatabang usab kaniya?

Human ang mga estudyante nakagahin na og panahon sa pagpangita ug paghisgot diha sa ilang mga grupo, dapita sila sa pagpakigbahin diha sa klase kon hain nga mga tudling ang ilang gibati nga labing makatabang ug ngano. Pagdasig og daghang mga grupo nga mopakigbahin. (Ang pipila ka mga tudling nga tingale pilion sa mga estudyante naglakip sa Doktrina ug mga Pakigsaad 1:30; 84:20–22; Helaman 5:12; Josue 24:15; Isaias 58:13–14; Lucas 22:19–20; Mga Taga-Efeso 2:19–20.)

Mahimo nimong taposon ang leksiyon pinaagi sa paghangyo sa mga estudyante sa pagtubag sa pipila o sa tanan sa mosunod nga mga pag-aghat diha sa ilang mga journal sa pagtuon:

Gikan sa mahangtorong panglantaw, gusto sa Langitnong Amahan nga magpabilin kong matinud-anon ngadto ni Jesukristo ug aktibo sa Iyang Simbahan tungod kay .

Ang usa ka tudling sa kasulatan nga nagtabang nako nga magtinguha nga magpabiling matinud-anon ngadto ni Jesukristo ug aktibo sa Iyang Simbahan mao ang .

Usa ka butang nga akong mabuhat aron magpabilin nga matinud-anon ngadto ni Jesukristo ug aktibo sa Iyang Simbahan sa tibuok nakong kinabuhi mao ang .

Dugang nga Kalihokan sa Pagkat-on

Alternatibong senaryo

Mahimong makatabang kini sa imong mga estudyante sa pagpunting sa usa ka senaryo nga ang tudling sa doktrinal nga kahanas sa Doktrina ug mga Pakigsaad 82:10 mahimong makatabang. Kon mao, dapita sila sa paghimo og senaryo nga may kalabotan sa mga tin-edyer sa inyong dapit pinaagi sa pagtubag sa mosunod nga mga blangko:

“Si (ngalan) gusto nga motuman sa sugo sa Ginoo nga (usa ka sugo o sumbanan sa Ginoo nga mahimong lisod sundon, sama sa pagserbisyo og misyon, pagpuasa, pagbalaan sa adlaw nga Igpapahulay, pagpabilin nga limpyo sa moral nga paagi) apan naglisod sa pagbuhat niini tungod kay (mga butang nga makapalisod sa pagsunod niana nga sugo o sumbanan).”

Dapita ang mga estudyante sa pagtinabangay sa paggamit sa mga baroganan sa pag-angkon og espirituhanong kahibalo ug sa mga kamatuoran nga gitudlo sa Doktrina ug mga Pakigsaad 82:10 diha sa senaryo.