Leksiyon 94: Doktrina ug mga Pakigsaad 84

Doktrina ug mga Pakigsaad 84:1–32

“Ang Gahom sa Pagkadiosnon”

Sa pagpauli gikan sa ilang mga misyon, usa ka grupo sa mga elder nakigtagbo ni Propeta Joseph Smith. Samtang nag-ampo nga magkauban, ang Propeta nakadawat og pagpadayag nga naghatag og mga panabot mahitungod sa “gahom sa pagka-diosnon” (Doktrina ug mga Pakigsaad 84:20) nga nahimong posible ngadto sa kababayen-an ug kalalakin-an pinaagi sa mga ordinansa sa pagkapari. Kini nga leksiyon makatabang sa mga estudyante nga mobati sa kamahinungdanon sa pagdawat sa gahom sa pagka-diosnon nga gitanyag ni Jesukristo pinaagi sa Iyang mga ordinansa sa pagkapari.

Mga Posibleng Kalihokan sa Pagkat-on

Mga ordinansa sa pagkapari

Ikonsiderar ang pagpakita sa mosunod nga pamahayag ni Elder Neil L. Andersen sa Korum sa Napulog Duha ka Apostoles. Dapita ang mga estudyante sa pagpakigbahin kon unsay ilang gibati mahitungod sa iyang mga pangutana ug kon unsaon nila kini sa pagtubag.

Sa akong mga pagbiyahe isip sakop sa Korum sa Napulog Duha ka Apostoles, nakahimamat ako og mga batan-on sa tibuok kalibotan. Daghan kanila nakigbisog sa tinuoray nga mga kabalaka: “Ang Dios motabang ba kanako? Mogiya ba Siya sa akong kinabuhi? Unsaon nako sa pagkadawat sa tabang, direksyon, ug kalinaw nga akong gikinahanglan?” (Neil L. Andersen, “Ang Gahom sa Pagkadiosnon pinaagi sa mga Ordinansa ug mga Panalangin sa Pagkapari,” Alang sa Kalig-on sa mga Kabatan-onan, Ago. 2021, 10)

• Paghunahuna og balik sa mga panahon sa imong kinabuhi sa dihang nagkinahanglan ka og tabang, direksiyon, ug kalinaw. Unsa ang imong gibuhat o mahimo nimong buhaton aron sa pagtinguha og tabang ug giya sa Dios?

Basaha ang nahibilin sa pamahayag ni Elder Neil L. Andersen, mangita og usa ka butang nga gihatag sa Dios aron sa pagtabang kanato.

Minahal ko nga batan-ong mga higala, ang Dios motabangkaninyo, ug Siya anaa andam sa pagpanalangin kaninyo. Isip atong mahigugmaon nga Amahan, Siya mihatag kanato og mga ordinansa nga makatabang kanato aron mobati sa Iyang gahom diha sa atong kinabuhi—ang gahom sa pagkadiosnon. (Neil L. Andersen, “Ang Gahom sa Pagkadiosnon pinaagi sa mga Ordinansa ug mga Panalangin sa Pagkapari,” Alang sa Kalig-on sa mga Kabatan-onan, Ago. 2021, 10)

Mahimong wala ikonsiderar sa mga estudyante kon sa unsang paagi ang mga ordinansa makatabang kanila sa ilang mga kinabuhi. Pwede nimong dapiton ang mga estudyante sa pagpamalandong sa ilang mga hunahuna ug mga pagbati mahitungod sa mga ordinansa. Mahimo nimong ipakita ang mosunod nga pagsukod sa kaugalingon aron sa pagbuhat niini:

Gamit ang sukdanan nga 1–5 (1 = ubos; 5 = taas), unsay ihatag nimo nga sukod sa imong pagsalig sa mosunod nga mga pamahayag:

• Nahibalo ako kon unsa ang mga ordinansa sa pagkapari.

• Nakita na nako kon giunsa sa Dios pagpanalanginan ang akong kinabuhi pinaagi sa mga ordinansa sa pagkapari.

• Gituyo nako ang pagpangandam sa pagdawat sa sunod nga ordinansa sa akong kinabuhi.

Dapita ang mga estudyante sa pagdawat sa mga impresyon gikan sa Espiritu Santo samtang magtuon sila sa seksiyon 84 ug sa pagkat-on og dugang mahitungod sa gahom sa Dios nga mahimong moabot sa ilang mga kinabuhi pinaagi sa mga ordinansa sa pagkapari.

Ang templo ug ang pagkapari

Ikonsiderar kon unsaon nimo sa pagpakigbahin ang mosunod nga impormasyon ngadto sa mga estudyante:

Niadtong Septiyembre 1832, ang mga misyonaryo mibalik sa Kirtland, Ohio, human sa pagsangyaw sa ebanghelyo sa sidlakang Estados Unidos. Atol sa ilang panagtigom, nadawat ni Propeta Joseph Smith ang pagpadayag nga narekord diha sa Doktrina ug mga Pakigsaad 84. Niini nga pagpadayag, ang Ginoo mipalapad sa pagsabot sa mga Santos bahin sa pagkapari. Basaha ang Doktrina ug mga Pakigsaad 84:1–5, mangita sa unsay gitudlo sa Ginoo sa mga Santos nga unahon samtang sila nagtukod sa siyudad sa Bag-ong Jerusalem.

• Ngano sa imong hunahuna nga mahinungdanon man nga ang Ginoo mosugod sa pagpadayag mahitungod sa pagkapari pinaagi sa pagtudlo mahitungod sa kaimportante sa mga templo?

Kon dili kini hisgotan sa mga estudyante, mahimo nimong ipasabot nga diha sa templo, ang mga ordinansa sa pagkapari gipahigayon nga kinahanglanon alang sa atong kaluwasan ug kahimayaan.

Mahimo nimong ipakigbahin sa mga estudyante nga diha sa mga bersikulo 6–18, ang Ginoo mipahayag nga ang Iyang pagkapari gitugyan ngadto ni Adan ug nagpadayon sa panahon ni Moises. Si Jesukristo mitugyan usab sa pagkapari ngadto ni Aaron ug sa iyang mga kaliwatan. Mahimo nimong hisgotan nga ang Iyang pagkapari nagpadayon sa gipahiuli nga Simbahan ni Jesukristo karon. Ang tanang awtoridad sa pagkapari, lakip niana nga gikinahanglan sa paghimo sa mga ordinansa sa templo, gikan ni Jesukristo.

Ang gahom sa pagka-diosnon gipakita pinaagi sa mga ordinansa

Kini mahimong maayong panahon sa pagpangutana sa imong mga estudyante kon unsa ang usa ka ordinansa. Kon sila maglisod sa pagpasabot niini, mahimo nimo silang dapiton sa paggamit sa mga tabang sa pagtuon sa kasulatan aron mahibaloan kini. Tabangi sila nga makasabot nga ang usa ka ordinansa usa ka sagrado, pormal nga buhat o seremonya nga gihimo pinaagi sa awtoridad sa pagkapari. Ang ubang mga ordinansa mahinungdanon sa atong kahimayaan.

Mahimo nimong ilista ang mga ordinansa sa pagkapari diha sa pisara, sama sa bunyag, sakramento, panalangin sa kahupayan ug tambag, patriyarkal nga panalangin, pagkumpirma ug gasa sa Espiritu Santo, pagtuga sa templo, ug pagsilyo sa templo.

Basaha ang Doktrina ug mga Pakigsaad 84:19–22, mangita sa unsay gitudlo sa Ginoo mahitungod sa mga ordinansa.

Ang Doktrina ug mga Pakigsaad 84:20–22 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

• Unsa ang imong nakat-onan mahitungod sa mga ordinansa sa pagkapari?

• Unsa ang imong mga pangutana mahitungod sa imong gibasa?

  Depende sa pagsabot sa mga estudyante ug sa mga pangutana nga ilang ipangutana, mahimo nimong ipakigbahin ang pipila o ang tanan sa mosunod:

• “Ang labaw nga pagkapari nangalagad sa ebanghelyo” nagpasabot sa awtoridad sa Melchizedek nga Pagkapari sa pagpangalagad sa mga ordinansa nga gikinahanglan alang sa atong kaluwasan ug kahimayaan.

• Ang“mga misteryo” mao ang “espirituhanon nga mga kamatuoran nga mahibaloan lamang pinaagi sa pagpadayag” (Giya ngadto sa mga Kasulatan, “Mga Misteryo sa Dios,” scriptures.ChurchofJesusChrist.org).

• Ang “Gahom sa pagka-diosnon” nagpasabot sa gahom nga gikan sa Dios sa pagtabang kanato niini nga kinabuhi ug sa pag-andam kanato alang sa kinabuhing dayon.

Tabangi ang mga estudyante sa pagkahibalo nga pinaagi sa mga ordinansa sa pagkapari, makadawat kita sa gahom sa pagkadiosnon sa atong mga kinabuhi.

Aron matabangan ang mga estudyante nga mapalawman ang ilang pagsabot niini nga kamatuoran, dapita sila sa pagpili og usa sa mga ordinansa nga gilista diha sa pisara nga gusto nilang makat-onan pa gayod. Hatagi sila og panahon sa pagsulat og duha ngadto sa tulo ka mga pangutana nga aduna sila mahitungod niana nga ordinansa. O mahimo nimong ipakita ang tulo ka mga pangutana nga gilista sa ubos aron ilang hunahunaon pag-ayo.

• Unsaon sa usa ka tawo sa pagpangandam sa pagdawat niini nga ordinansa?

• Sa imong hunahuna sa unsang paagi kini nga ordinansa sa pagkapari makatabang kanato sa pagdawat sa gahom sa pagka-diosnon aron sa pagtabang kanato niini nga kinabuhi?

• Sa unsang paagi nga ang pagdawat niini nga ordinansa makatabang kanato nga mahimong mas sama sa Langitnong Amahan ug ni Jesukristo?

Dapita ang mga estudyante sa pagpangita sa balaanong gitudlo nga mga tinubdan aron sa pagkat-on ug dugang mahitungod sa ordinansa nga ilang gipili ug alang sa mga tubag sa ilang mga pangutana. Mahimo nila kining buhaton nga sila ra o kauban sa uban nga mipili sa susama nga ordinansa. Ang Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, makita sa ChurchofJesusChrist.org, naghatag og makatabang nga impormasyon alang niadtong mopili sa pagtuon sa Pagtuga [Endowment] sa Templo (27.2) ug pagselyo (27.3). Mahimong mamalandong usab sila og personal nga mga kasinatian dihang ang mga ordinansa nga ilang nasinati nakatabang kanila nga mobati sa gahom sa pagkadiosnon sa ilang mga kinabuhi.

Human ang igong panahon, dapita ang mga indibidwal o mga grupo sa pagpakigbahin sa unsay ilang nakat-onan ngadto sa klase.

Ang kamahinungdanon sa mga ordinansa

Aron matabangan ang mga estudyante sa pagpamalandong sa unsay ilang nakat-onan mahitungod sa kamahinungdanon sa mga ordinansa sa pagkapari, mahimo nimong ipatubag sa mga estudyante ang pipila o ang tanan sa mosunod nga mga pangutana. Mahimong mopili ang mga estudyante og usa ka pangutana ug mopakigbahin sa ilang mga tubag ngadto sa usa ka kauban sa klase.

• Unsay imong nakat-onan mahitungod sa gahom sa pagka-diosnon ug sa mga ordinansa sa pagkapari?

• Sa unsang paagi nga ang pagpangandam sa pagdawat ug ang pagdawat niini nga mga ordinansa makatabang kanimo nga mas mahiduol kang Jesukristo?

• Kanus-a ka mibati sa gahom sa Dios pinaagi sa mga ordinansa sa pagkapari nga imong nadawat?

Ikonsiderar ang pagpakigbahin sa imong mga hunahuna ug mga pagbati mahitungod sa gahom sa Dios nga imong nadawat sa imong kinabuhi pinaagi sa mga ordinansa sa pagkapari.

Isag-ulo

Mahimo nimong tabangan ang mga estudyante sa pagsag-ulo sa mga pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Diha sa mga ordinansa niana, ang gahom sa pagkadiosnon gipakita.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Doktrina ug mga Pakigsaad 84:20–21. Unsa ang koneksiyon tali sa makaluwas nga mga ordinansa ug sa gahom sa pagka-diosnon?

Si Elder David A. Bednar sa Korum sa Napulog Duha ka Apostoles mipahayag:

Ang mga ordinansa sa pagkapari mao ang dalan padulong sa gahom sa pagkadiosnon. … Ang mga ordinansa sa pagkapari mahinungdanon aron hingpit nga “[mo]duol ngadto kang Kristo, ug [m]aghingpit diha kaniya” (tan-awa sa Moroni 10:30–33). Kon wala ang mga ordinansa, ang indibidwal dili makadawat sa tanang mga panalangin nga nahimong posible pinaagi sa walay kinutuban ug mahangtorong pag-ula sa Ginoo (tan-awa sa Alma 34:10–14)—gani ang gahom sa pagka-diosnon. (David A. Bednar, “Misyonaryo, Family History, ug Buhat sa Templo,” Liahona, Okt. 2014, 16)

Doktrina ug mga Pakigsaad 84:22. Unsa ang buot ipasabot nga “kon wala kini walay tawo nga makakita sa nawong sa Dios … ug mabuhi”?

Ang Ginoo mitudlo kang Adan nga “walay mahugaw nga butang nga makapuyo … diha sa iyang atubangan” (Moises 6:57). Pinaagi lamang sa pagdawat sa mga ordinansa pinaagi sa gahom sa pagkapari ug sa pagtuman sa kaubang mga pakigsaad kita malimpyohan gikan sa sala ug mahimong balaan ug putli sama sa Dios. Si Propeta Joseph Smith mitudlo, “Kon kamo gusto nga moadto hain ang Dios, kinahanglan nga mahisama kamo sa Dios, o magbaton sa mga baroganan nga gihuptan sa Dios” (Mga Pagtulon-an sa mga Presidente sa Simbahan: Joseph Smith [2007], 84).

Kinsa ang maka-akses sa gahom sa pagkapari?

Si Presidente Camille N. Johnson, Kinatibuk-ang Presidente sa Relief Society, mitudlo:

Ang mga babaye, mga lalaki ug mga bata mo-access ug mogamit sa gahom sa pagkapari, ang gahom sa Manluluwas, sa pagtabang sa mga katawhan nga ilang gihigugma (tan-awa sa Dallin H. Oaks, “Ang Melchizedek nga Pagkapari ug ang mga Yawe,” Liahona, Mayo 2020, 69–72). Ang mga panalangin sa gahom sa pagkapari nga nahimong posible sa tanan nga mga miyembro sa Simbahan kinsa naghupot sa ilang mga pakigsaad —mga babaye, mga lalaki ug mga bata—naglakip sa:

• Giya alang sa ilang kinabuhi.

• Inspirasyon nga mahibalo kon unsaon pagserbisyo sa mga sakop sa pamilya ug sa uban.

• Kalig-on sa paglahutay ug sa pagbuntog sa mga hagit.

• Gasa sa Espiritu aron sa pagpalambo sa ilang mga abilidad.

• Pagpadayag aron makahibalo unsaon sa pagtuman sa buhat nga sila gi-orden, gi-set apart, o gisangonan nga buhaton.

• Pagtabang ug paglig-on nga mahimong mas sama ni Jesukristo ug sa Langitnong Amahan (Kinatibuk-ang Tamdanan nga Basahon, 3.5).

Ang Manluluwas mao ang tinubdan sa tanan niini nga mga panalangin. Giya, inspirasyon, mga gasa sa Espiritu ug pagpadayag ang tanan moabot pinaagi sa Espiritu Santo, gipadala sa Amahan pinaagi sa ngalan sa Manluluwas. …

Sa akong kasinatian, ang gahom sa pagkapari, ilabi na nianang diin ako gitugahan diha sa balay sa Ginoo, nagpalig-on sa pakig-uban sa Espiritu Santo ug sa akong pagsabot sa Pag-ula ni Jesukristo. (Camille N. Johnson, “President Camille N. Johnson: What Must Women and Men Do to Have Access to Priesthood Power?,” Church News, Oct. 30, 2022, thechurchnews.com)

Sa unsang paagi ang templo makatabang kanako nga maka-akses sa gahom sa Dios?

Si Presidente Russell M. Nelson mitudlo:

Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga nato sa Iyang makaayo, makapalig-on nga gahom [tan-awa sa Doktrina ug mga Pakigsaad 109:15, 22]. Ug oh, kadako sa atong panginahanglan sa Iyang gahom sa mga adlaw nga umaabot. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 94)

Dugang nga mga Kalihokan sa Pagkat-on

Ang sakramento

Kon gusto nimong mogahin og dugang nga panahon sa pagtabang sa mga estudyante nga masabtan ang kamahinungdanon sa sakramento, mahimo nimong ipakigbahin ang mosunod nga pamahayag:

Ang sakramento usa ka ordinansa diin ang mga miyembro sa Simbahan mokaon og pan ug tubig agig paghinumdom sa maulaong sakripisyo ni Jesukristo. Kini nga ordinansa usa ka importanting bahin sa pagsimba ug espirituhanong paglambo. Pinaagi niini nga ordinansa, ang mga miyembro sa Simbahan mobag-o sa mga pakigsaad nga ilang gihimo ngadto sa Dios sa dihang sila gibunyagan. (Mga Hilisgotan ug Mga Pangutana, “Sacrament [Sakramento],” topics.ChurchofJesusChrist.org)

Ikonsiderar ang paghisgot sa kamahinungdanon sa ordinansa sa sakramento ngadto sa mga estudyante. Tabangi sila nga masabtan nga kini usa ka importanting bahin sa ilang pagsimba ug espirituhanong paglambo. Mahimo silang magtakda og tumong sa usa ka butang nga ilang mahimo atol sa sakramento nga makatabang nila nga mapalambo ang ilang pagsimba ug espirituhanong paglambo.

Linya sa awtoridad

Basaha ang Doktrina ug mga Pakigsaad 84:6–16. Dapita ang mga estudyante sa pag-ila kon unsa ang anaa niini nga mga bersikulo ug unsay gitudlo sa mga tudling kanato mahitungod sa pagkapari. Kon mahimo, pagdala og kopya sa linya sa awtoridad sa pagkapari sa usa ka tawo diha sa klase. Mahimo nimong kopyahon ang linya sa awtoridad diha sa pisara. Tabangi ang mga estudyante nga masabtan nga ang usa ka linya sa awtoridad sa pagkapari nagpakita kon sa unsang paagi ang awtoridad sa pagkapari gitugyan gikan sa usa ka naghupot sa pagkapari ngadto sa lain, gikan ni Jesukristo ngadto sa naghupot sa pagkapari karon. Mahimo usab nimong ipakita kon unsaon sa paghangyo og usa ka linya sa awtoridad.

Ipasabot ang kamahinungdanon sa mga ordinansa

Mahimo kang mosulat sa mosunod diha sa pisara: “Ngano nga ang mga ordinansa sa pagkapari importante sa akong kinabuhi?” Hatagi ang mga estudyante og pipila ka minuto sa paghunahuna kon unsaon nila sa pagtubag niini nga pangutana. Mahimo nimong ipabuhat kini sa mga estudyante sa sinugdanan sa leksiyon aron masukod ang ilang pagsabot sa mga ordinansa o sa kataposan sa leksiyon aron ilang mapakita kon unsay ilang nakat-onan. Human sila makapamalandong kon unsaon nila sa pagtubag kini nga pangutana, pagdapit og pipila ka estudyante sa pagpakigbahin kon unsaon nila sa pagtubag.