“Leksiyon 200—Paghigugma, Pagpakigbahin, ug Pagdapit: Pagpundok sa Uban ngadto kang Jesukristo,” Manwal sa Magtutudlo sa Seminary sa Doktrina ug mga Pakigsaad (2025)
“Paghigugma, Pagpakigbahin, ug Pagdapit,” Manwal sa Magtutudlo sa Seminary sa Doktrina ug mga Pakigsaad
Leksiyon 200: Misyonaryo nga Pagpangandam
Paghigugma, Pagpakigbahin, ug Pagdapit
Pagpundok sa Uban ngadto kang Jesukristo
Isip mga miyembro sa Ang Simbahan ni Jesukristo sa mga Santos sa Ulahing mga Adlaw, atong responsibilidad sa pakigsaad nga ipakigbahin ang ebanghelyo sa Manluluwas sa “mga lumulupyo sa kalibotan” (Doktrina ug mga Pakigsaad 1:23). Mahimo kitang moapil niining talagsaon nga buhat pinaagi sa paghigugma sa uban, pagpakigbahin sa mensahe ni Jesukristo, ug pagdapit kanila nga moduyog kanato sa pag-adto sa Manluluwas. Kini nga leksiyon makatabang sa mga estudyante sa paghimo og plano aron mapakatap ang ebanghelyo ni Jesukristo gamit ang mga baroganan sa paghigugma, pagpakigbahin, ug pagdapit.
Posibleng mga Kalihokan sa Pagkat-on
Ayaw itago ang imong kahayag sa ebanghelyo
Sa pagsugod sa klase, ipakita sa mga estudyante ang litrato sa usa ka hayop nga maayong pagkatago. Dapita ang mga estudyante sa pagpakigbahin kon nganong makaayo sa maong hayop ang pagtago og ingon niini.
-
Unsa nga mga kahimtang nga gustong magtago ang usa ka tawo?
Si Elder Quentin L. Cook sa Korum sa Napulog Duha ka Apostoles mipakigbahin og usa ka butang nga dili nato gustong itago bahin sa atong kaugalingon:
Usa ka importante nga bahin niining misyonaryo nga paningkamot mao ang alang sa indibidwal nga mga miyembro nga mahimong talagsaon nga mga ehemplo bisan asa kita nagpuyo. Kita kinahanglang dili magtakoban. …
… Ang Ginoo naglaom niadtong kinsa nakadawat sa Iyang ebanghelyo nga maningkamot karon nga mahimong usa ka talagsaon nga ehemplo nga motabang sa uban nga moduol ngadto sa Dios. Kini magtugot sa atong mga igsoon nga lalaki ug igsoon nga mga babaye sa tibuok kalibotan nga makatagamtam sa langitnon nga mga panalangin ug mga ordinansa sa gipahiuli nga ebanghelyo ni Jesukristo ug mahimong luwas nga pagapundokon pauli sa panimalay. (Quentin L. Cook, “Luwas nga Pagapundokon Pauli sa Panimalay,” Liahona, Mayo 2023, 23)
-
Unsa ang mahinungdanon kanimo gikan sa mensahe ni Elder Cook?
Aron makatabang nga maandam ang mga kasingkasing ug mga hunahuna sa mga estudyante alang niini nga leksiyon, pwede nimo silang dapiton nga ipakigbahin ang istorya sa usa ka sakop sa pamilya o higala nga mipasakop sa Ang Simbahan ni Jesukristo sa mga Santos sa Ulahing mga Adlaw. Pwede usab nilang ipakigbahin ang kaugalingon nilang istorya sa pagkakabig. Kon daghang estudyante ang adunay mga istorya nga ipakigbahin, pwede nimo silang dapiton nga ipakigbahin kini ngadto sa kapares o sa gagmayng grupo.
Dapita ang mga estudyante nga irekord diha sa ilang mga journal sa pagtuon ang mga paagi nga sila tingali “nagtakoban” ug mga paagi ang ilang personal nga misyonaryo nga paningkamot mahimong “mga ehemplo sa sanag nga kahayag.”
Dapita ang mga estudyante nga mainampoong dapiton ang Espiritu nga motabang nila sa pag-ila kon unsaon nila sa dayag nga paagi ipakigbahin ang kahayag sa ebanghelyo sa Manluluwas.
Ang misyonaryo nga mando sa Manluluwas
Ikonsiderar ang pagpakita sa mosunod nga pamahayag ni Elder Quentin L. Cook. Dapita ang mga estudyante sa pagpangita og tambag kon unsaon epektibong mapakigbahin ang ebanghelyo ni Jesukristo.
Si Elder Cook mitudlo usab:
Ang Manluluwas mabination nga midapit kanato nga mahimong Iyang tingog ug Iyang mga kamot. Ang gugma sa Manluluwas mao ang mahimo natong giya nga kahayag. Ang Manluluwas nagtudlo sa Iyang mga disipulo, “Panglakaw kamo ug himoa ninyong mga tinun-an ang tanang kanasoran” [Mateo 28:19]. …
Aron ang mando sa Manluluwas sa pagpaambit sa ebanghelyo mahimong kabahin sa atong pagkatawo, … kinahanglan kita nga mohigugma sa atong mga silingan, mopaambit sa gipahiuli nga ebanghelyo ni Jesukristo, ug modapit sa tanan aron moduol ug mosusi. (Quentin L. Cook, “Pagkakabig ngadto sa Kabubut-on sa Dios,” Liahona, Mayo 2022, 56)
-
Unsaon nimo pagpasabot ang mensahe ni Elder Cook sa kaugalingon nimong mga pulong?
Tabangi ang mga estudyante nga mailhan ang kamatuoran nga sama niini: Mitabang kita sa misyonaryo nga mga paningkamot sa Manluluwas pinaagi sa paghigugma sa atong mga silingan, pagpakigbahin sa Iyang ebanghelyo, ug pagdapit sa uban nga modangop Kaniya.
Pwede nimong isulat ang mga pulong nga paghigugma, pagpakigbahin, ug pagdapit sa ibabaw nga bahin sa tulo ka column diha sa pisara. Samtang ipakigbahin sa mga estudyante ang ilang mga tubag sa mosunod nga mga pangutana, dapita sila nga maghimo og lista sa kada kolum sa mga ideya kon unsaon pagdala sa uban ngadto sa Manluluwas pinaagi sa paghigugma, pagpakigbahin, ug pagdapit.
-
Unsa ang pipila ka epektibong paagi nga imong nakita sa pagpakigbahin sa uban sa ebanghelyo ni Jesukristo?
-
Unsay imong mga kasinatian sa pagpakigbahin sa ebanghelyo sa Manluluwas ngadto sa uban?
Paghigugma, pagpakigbahin, ug pagdapit
Usa ka paagi aron matabangan ang mga estudyante nga mas masabtan ang mga baroganan sa paghigugma, pagpakigbahin, ug pagdapit mao ang paghatag nila og mga kopya sa handout nga giulohan og “Paghigugma, Pagpakigbahin, Pagdapit.” Magporma og gagmayng mga grupo ang mga estudyante aron tun-an ang materyal ubos sa “Paghigugma.” Pwede silang magporma og bag-ong mga grupo nga magtuon sa “Pagpakigbahin” ug bag-ong mga grupo para sa “Pagdapit.”
Sa laing bahin, pwedeng tun-an sa mga estudyante ang mga tudling sa kasulatan diha sa “Pagtuon sa mga Kasulatan” nga ideya sa pahina 223 sa Isangyaw ang Akong Ebanghelyo (2023).
Ikonsiderar ang pagpakita sa mosunod nga mga pangutana diha sa pisara aron hisgotan sa mga estudyante uban sa ilang grupo samtang nagtuon.
-
Unsang mga panabot ang imong naangkon bahin sa pagpakigbahin sa ebanghelyo?
-
Sa unsang paagi gipakita sa Manluluwas ang baroganan diha sa Iyang mgha inter-aksiyon sa uban?
-
Unsa ang pipila ka paagi nga makalihok uyon sa baroganan ang mga tin-edyer samtang naningkamot sila sa pagpakigbahin sa ebanghelyo sa Manluluwas?
Paghigugma, Pagpakigbahin, Pagdapit
Paghigugma
Juan 13:34–35; Mosiah 18:20–22; Doktrina ug mga Pakigsaad 12:7–9; 121:41–42
Si Elder Gary E. Stevenson sa Korum sa Napulog Duha ka Apostoles mitudlo:
Sa matag higayon nga atong gipakita ang Kristohanon nga gugma ngadto sa atong mga silingan, atong gisangyaw ang ebanghelyo—bisan kon wala kitay bisan usa ka pulong nga gisulti.
Ang gugma alang sa uban mao ang klaro nga pagpadayag sa ikaduhang dako nga sugo sa paghigugma sa atong silingan; kini nagpakita sa makapalimpyo nga proseso sa impluwensiya sa Esipiritu Santo sulod sa atong mga kalag. Pinaagi sa pagpakita sa gugma ni Kristo ngadto sa uban, atong madasig kadtong kinsa nakakita sa atong maayong mga buhat aron “daygon nila ang [atong] Amahan nga atua sa langit” [Mateo 5:16]. (Gary E. Stevenson, “Paghigugma, Pagpaambit, Pagdapit,” Liahona, Mayo 2022, 85)
Pagpakigbahin
2 Nephi 2:6–8; Mosiah 28:1–3; Alma 31:5; Doktrina ug mga Pakigsaad 60:2
Si Elder Dieter F. Uchtdorf sa Korum sa Napulog Duha ka Apostoles mitudlo:
Kon dunay mangutana bahin sa inyong hinapos sa semana, ayaw pagduhaduha sa paghisgut bahin sa inyong kasinatian sa simbahan. Paghisgut bahin sa gagmayng mga bata nga mibarug sa atubangan sa kongregasyon ug mikanta nga madasigon kon giunsa nila pagpaningkamot nga mahimong sama ni Jesus. Paghisgut bahin sa grupo sa mga batan-on kinsa migahin og panahon sa pagtabang sa mga tigulang sa balay pahulayanan arong sa paghan-ay og personal nga mga kasaysayan. …
Sa bisan unsang paagi nga natural o normal para nimo, ipaambit sa mga tawo ngano nga si Jesukristo ug ang Iyang Simbahan importante para nimo. (Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” LiahonaMayo 2019, 17)
Pagdapit
Juan 1:35–46; 4:28–30, 39–41; Alma 5:62; Moroni 10:3–5
Si Elder Gary E. Stevenson sa Korum sa Napulog Duha ka Apostoles mitudlo:
Adunay daghan kaayong mga pagdapit nga mahimo natong ipaabot sa uban. Kita makadapit sa uban sa “pagduol ug pagtan-aw” sa usa ka tulumanon sa sakramento, usa ka kalihokan sa ward, usa ka online nga video nga nagpasabot sa ebanghelyo ni Jesukristo. Ang “pagduol ug pagtan-aw” mahimong mao ang usa ka imbitasyon sa pagbasa sa Basahon ni Mormon o pagbisita sa usa ka bag-o nga templo atol sa open house niini sa dili pa kini ipahinungod. Usahay, ang pagdapit mao ang usa ka butang nga atong ipaabot ngadto sa kahiladman—usa ka pagdapit sa atong kaugalingon, maghatag kanato og kaigmat ug panglantaw sa mga oportunidad nga naglibot kanato aron lihokon. (Gary E. Stevenson, “Paghigugma, Pagpaambit, Pagdapit,” Liahona, Mayo 2022, 86)
Epektibong mga paagi sa paghigugma, pagpakigbahin, ug pagdapit
Tabangi ang mga estudyante sa paghunahuna og dugang nga mga ideya kon unsaon sa pagpakigbahin sa ebanghelyo gamit ang mga baroganan sa paghigugma, pagpakigbahin, ug pagdapit. Iapil ang ilang mga ideya diha sa pisara ubos sa katugbang nga mga kolum. Pipila sa mosunod nga mga kapanguhaan mahimong makatabang sa paghimo og mga ideya:
-
Artikulo—“20 Easy Ways to ‘Love, Share, Invite’ Your Neighbors,” newsroom.ChurchofJesusChrist.org
-
Bidyo—“Yano nga mga Paagi sa Paghigugma, Pagpakigbahin, ug Pagdapit” (2:45), nga anaa sa ChurchofJesusChrist.org
Yano nga mga paagi sa paguigugma, Pagpakigbahin, Ug pagdapit
Ang Manluluwas mipakita og ehemplo sa paghigugma, pagpakigbahin, ug pagdapit. Pangita og mga ideya ug inspirasyon kon unsaon nimo nga makasunod niana nga ehemplo sa share.churchofjesuschrist.org.
-
Bidyo—“2021 nga Broadcast: Mga Baroganan sa Paghigugma, Pagpakigbahin, ug Pagdapit” gikan sa time code nga 0:00 hangtod 1:35, nga anaa sa ChurchofJesusChrist.org
Paghigugma, Pagpaambit, Pagdapit
Mga lider sa ward ug sa stake gidapit sa usa ka espesyal nga tibuok kalibotan nga sibya nga nagtutok sa pagpaambit sa ebanghelyo pinaagi sa mga baroganan sa paghigugma, pagpaambit, ug pagdapit.
Gamita ang imong nakat-onan
Ikonsiderar ang pagpakigbahin sa panahon dihang gitabangan nimo ang usa ka tawo gamit ang mga baroganan sa paghigugma, pagpakigbahin, ug pagdapit. O pwede nimong ipakigbahin ang usa ka higayon dihang gipanalanginan sa usa ka tawo ang imong kinabuhi gamit niini nga mga baroganan.
Dapita ang mga estudyante nga sundon ang mga pag-aghat nga ilang nabati karon sa paghimo og plano nga ipakigbahin ang ebanghelyo. Ang ilang mga plano mahimong maglakip sa pagpatuman og usa o kapin pa sa mga ideya nga nalista sa pisara. Arong matabangan ang mga detalye sa ilang mga plano, pwede nimong ipakita ang mosunod nga mga instruksiyon ug mga pag-aghat aron makompleto sa mga estudyante ang ilang mga journal sa pagtuon.
Pagpili og usa o kapin pa sa mosunod nga mga pag-aghat aron makompleto ang imong journal sa pagtuon:
-
Magpakita ko og gugma ngadto sa usa ka tawo pinaagi sa .
-
Ipakigbahin nako ang akong nahibaloan o gibati bahin sa ebanghelyo sa Manluluwas pinaagi sa .
-
Dapiton nako si (ngalan sa usa ka tawo) sa .
Para sa (mga) pag-aghat nga gipili nimong tubagon, kompletoha ang mosunod diha sa imong journal sa pagtuon:
-
Ang sunod nga lakang nga akong buhaton aron makompleto ang akong plano mao ang .
-
Paningkamotan nako nga buhaton kini sa (petsa).
Ang pipila ka estudyante mahimong mawad-an og kadasig kon ang sinsero nga mga pagpaningkamot nga ipakigbahin ang ebanghelyo dili maayo nga gidawat. Tabangi ang mga estudyante nga masabtan nga ganahan kaayo ang Ginoo sa mga pagpaningkamot nga ilang gihimo, bisan kon kini daw dili malamposon karon. Dapita sila sa pagpadayon sa paglihok uban ang hugot nga pagtuo bisan pa sa diha-diha nga mga resulta.