Leksiyon 202: Misyonaryo nga Pagpangandam

Ang Basahon ni Mormon Usa ka Himan sa Pagkakabig

Paggamit sa Basahon ni Mormon sa Pagpangandam sa Pagpaambit sa Ebanghelyo

Ang Basahon ni Mormon usa ka gasa nga gihatag sa Dios kanato sa pagpundok sa ulahing adlaw nga Israel ngadto kang Jesukristo. Aron magamit sa mga estudyante kini nga gasa sa pagtabang sa pagpundok sa uban, importante nga ilang madawat ang kaugalingon nilang pagsaksi gikan sa Dios nga tinuod kini. Kini nga leksiyon makatabang sa mga estudyante nga mabati ang kaimportante sa pagpalig-on sa ilang mga pagpamatuod sa Basahon ni Mormon agig pagpangandam sa pagpaambit sa ebanghelyo sa Manluluwas.

Posibleng mga Kalihokan sa Pagkat-on

Usa ka instrumento sa pagpundok sa Israel

Ikonsiderar ang paglista diha sa pisara o pagpakita sa lainlaing mga himan nga pamilyar sa imong mga estudyante. Ang pipila ka pananglitan mao ang martilyo, screwdriver, toothbrush, stapler, ug uban pa. Dapita ang mga estudyante nga hisgotan kon asa magamit ang mga himan pinaagi sa mga pangutana nga sama sa mosunod.

• Kanus-a ang kataposang higayon nga imong gigamit ang usa niini nga mga himan? Giunsa nimo kini paggamit?

• Sa unsang paagi ginagamit ang ubang mga himan aron himoon ang pareho nga buhaton?

  Aron tabangan ang mga estudyante nga masabtan nga ang piho nga mga himan mas maayo sa paghimo og piho nga mga buluhaton, ikonsiderar ang pagpangutana sa usa ka estudyante nga himoon ang usa ka buluhaton sama sa pag-staple sa pipila ka papel gamit ang screwdriver o toothbrush.

  Tabangi ang mga estudyante nga masabtan nga niini nga mga himan makahimo og piho nga mga buluhaton. Sa samang paagi, naghatag ang Dios og mga himan aron matuman ang piho nga mga bahin sa Iyang buluhaton, usa niini mao ang pagpundok sa mga tawo ngadto kang Jesukristo.

• Unsa ang pipila ka himan nga gihatag sa Langitnong Amahan ug ni Jesukristo aron pundokon ang mga tawo ngadto Kanila?

Pwedeng basahon sa mga estudyante ang mosunod nga pamahayag aron ikompirma ang ilang mga tubag sa nag-unang pangutana o aron mangita og dugang tubag.

Si Elder Shayne M. Bowen sa Seventy mitudlo:

Atong gipundok ang Israel sa kataposang higayon ug nagbuhat sa ingon pinaagi sa Basahon ni Mormon—usa ka basahon nga, inubanan sa Espiritu sa Ginoo, mao ang labing gamhanan nga himan sa pagkakabig. (Shayne M. Bowen, “Ang Papel sa Basahon ni Mormon diha sa Pagkakabig,” Liahona, Nob. 2018, 83)

• Sa imong hunahuna, nganong ang Basahon ni Mormon mahimong usa ka gamhanan nga himan sa pagkabig ug pagpundok sa mga tawo ngadto kang Jesukristo?

Paminaw pag-ayo samtang motubag ang mga estudyante, ug kon nahiangay, dapita sila nga ipakigbahin kon nganong ingon niana ang ilang gibati.

Kon makatabang sa mga estudyante nga makakita og ehemplo kon sa unsang paagi ang Basahon ni Mormon maoy usa ka himan sa pagdala og usa ka tawo nga mapaduol ngadto sa Dios, ikonsiderar ang pagpasalida sa “Ang Istorya sa Basahon ni Mormon” (5:15), nga anaa sa ChurchofJesusChrist.org.

Dapita ang mga estudyante nga basahon ang Moroni 10:3–5 ug ang mosunod nga pamahayag. Hangyoa sila sa pagpangita og usa ka importanteng paagi nga makapangandam kita sa pagpakigbahin sa Basahon ni Mormon ngadto sa uban.

Si Presidente Henry B. Eyring sa Unang Kapangulohan mitudlo:

Aron kita masayod nga ang Basahon ni Mormon tinuod, kinahanglan gayod nga kita mobasa niini ug mohimo sa pagpili nga makita diha sa Moroni: mag-ampo aron masayod kon kini tinuod. Kon kita nakahimo na niana, kita makapamatuod gikan sa atong personal nga kasinatian ngadto sa atong mga higala nga sila makahimo niana nga pagpili ug masayod sa sama nga kamatuoran. (Henry B. Eyring, “A Voice of Warning,” Ensign, Nov. 1998, 34)

• Unsay imong nakat-onan gikan sa pamahayag ni Presidente Eyring ug sa Moroni 10:3–5?

Samtang ipakigbahin sa mga estudyante ang ilang nakat-onan, mahimong makaila sila og kamatuoran nga sama sa mosunod: Ang pagbaton sa atong kaugalingong pagsaksi sa Basahon ni Mormon makapahimo nato sa pagtabang sa uban nga makakat-on sa katinuod niini.

Aron tabangan ang mga estudyante nga ikonsiderar ang kaugalingon nilang mga kasinatian bahin niini nga kamatuoran, pwede nimo silang dapiton nga hilom nga pamalandongan ang ilang mga tubag sa mosunod nga mga pamahayag.

Gamit ang sukdanan nga usa hangtod sa lima, diin ang usa nagtumong sa “dili tinuod nako” ug ang lima maoy “tinuod kaayo nako,” gradohi ang mosunod nga mga pamahayag:

• Mapasabot nako ang usa ka higala kon unsa ang Basahon ni Mormon ug sa unsang paagi madala niini ang mga tawo ngadto kang Kristo.

• Gitun-an nako ang Basahon ni Mormon sa paagi nga makapalawom sa akong personal nga pagkakabig ngadto kang Jesukristo.

• Naa koy mga kasinatian nga nagtugot nako aron mopamatuod ngadto sa uban nga tinuod ang Basahon ni Mormon.

Ikonsiderar ang pagdapit sa mga estudyante nga tinguhaon ang pagdasig kon unsaon pagdapit sa gahom sa Dios ngadto sa ilang mga kinabuhi ug sa kinabuhi sa uban pinaagi sa Basahon ni Mormon.

Paghatag og bili sa gasa sa Dios sa Basahon ni Mormon

Sa pagpadayag nga gihatag kang Joseph Smith, ang Ginoo mihatag og gibug-aton sa kaimportante sa Basahon ni Mormon pinaagi sa pagpakigbahin sa unsay iyang bation kon ang mga tawo dili kaayo magtagad niini.

Basaha ang Doktrina ug mga Pakigsaad 84:54–57, ug hunahunaa kon sa unsang paagi kini nga mga bersikulo magamit sa mga miyembro sa Simbahan sa Ginoo nga nangandam sa pagpakigbahin sa Iyang ebanghelyo.

• Unsay imong nakaplagan nga mahimong magamit niadtong nagtinguha sa pagpakigbahin sa ebanghelyo sa Manluluwas?

• Unsa ang pipila ka paagi nga mapakita nato kon unsa ka importante ang Basahon ni Mormon diha sa atong kinabuhi?

Personal nga kahibalo ug pagsaksi sa Basahon ni Mormon

Ang mosunod nga senaryo, o laing senaryo nga imong gihimo, mahimong makatabang sa mga estudyante nga ipahayag ang ilang nakat-onan ug gibati panahon sa leksiyon. Ikonsiderar ang pagbasa sa senaryo isip usa ka klase ug hatagi og panahon ang mga estudyante nga hunahunaon kon unsay ilang ipakigbahin kang Annie.

Bag-o lang mitambong si Annie sa klase sa misyonaryo nga pagpangandam. Nangayo siya og mga sugyot sa bag-o lang nauli nga misyonaryo nga mga magtutudlo bahin sa pagpangandam sa pagpakigbahin sa ebanghelyo. Ang duha ka magtutudlo mitambag kaniya nga palig-onon ang iyang kahibalo ug pagpamatuod sa Basahon ni Mormon. Sa tanang paagi nga pwede unta nilang itubag, ang pagtuon sa Basahon ni Mormon dili mao ang tubag nga gilaoman ni Annie.

Dapita ang mga estudyante nga liboton ang klasrom ug sultihan ang labing minos duha ka estudyante kon unsa ang pwede nilang ipakigbahin kang Annie.

Ikonsiderar ang paghimo og kahigayonan alang sa Espiritu Santo sa pagpamatuod sa Basahon ni Mormon ngadto sa imong mga estudyante. Pwede kang magdapit og mga boluntaryo nga ipakigbahin sa klase ang ilang paboritong mga tudling sa Basahon ni Mormon o ilang mga kasinatian sa pag-angkon og pagpamatuod sa Basahon ni Mormon. Pwede nimong ipakigbahin ang usa ka tudling nga nakatabang nimo nga mas masayod sa Manluluwas. Hatagi og panahon ang mga estudyante sa pagpangandam. Kon daghang estudyante ang gustong mopakigbahin, dapita sila sa paghimo niana diha sa gagmayng grupo aron adunay kahigayonan ang tanan.

Aplikasyon

Ikonsiderar ang pagdapit sa mga estudyante nga hilom nga tubagon ang mosunod nga pangutana diha sa ilang mga journal sa pagtuon.

• Unsa ang imong mahimo sa pagpalawom sa imong relasyon kang Jesukristo pinaagi sa Basahon ni Mormon?

  Pwede kang magsugyot og pipila ka opsiyon, sama sa mosunod: pagbasa sa tibuok Basahon ni Mormon sa usa ka piho nga yugto sa panahon, pangitaon ang mga bersikulo nga ipakigbahin sa uban, o hangyoon ang Langitnong Amahan og usa ka saksi pinaagi sa Espiritu Santo nga tinuod ang basahon.

  Pwede usab nimong ipasalida ang bidyo nga “Ang Basahon ni Mormon” (2:10), nga anaa sa ChurchofJesusChrist.org. Niini nga bidyo, gipakigbahin ni Elder Jeffrey R. Holland ug Elder Quentin L. Cook sa Kurom sa Napulog Duha ka mga Apostoles kon sa unsang paagi gidapit sila sa ilang presidente sa misyon sa pagkat-on kang Kristo pinaagi sa Basahon ni Mormon. Mahimong pilion sa mga estudyante nga sundon ang samang pagdapit.

• Sa unsang paagi ang paghimo sa unsay imong gisulat mag-andam nimo sa pagpakigbahin sa Basahon ni Mormon sa matag adlaw nga pagpakabuhi o isip usa ka full-time nga misyonaryo?

Makatabang tingali ang pagpakigbahin sa imong pagpamatuod kon sa unsang paagi nakatabang nimo ang Basahon ni Mormon nga mapaduol kang Jesukristo.

Dugang nga mga Kapanguhaan

Sa unsang paagi ug nganong kinahanglan nakong ipakigbahin ang Basahon ni Mormon?

Si Elder Ronald A. Rasband sa Korum sa Napulog Duha ka Apostoles mipakigbahin:

Ako modapit ninyo, karong adlawa, nga mohatag og Basahon ni Mormon ngadto sa inyong mga higala ug pamilya, mga kauban sa trabaho, sa inyong coach sa soccer, o sa tindero diha sa inyong merkado. Sila nagkinahanglan sa mga pulong sa Ginoo nga makita dinhi sa basahon. Sila nagkinahanglan og mga tubag sa mga pangutana sa inadlaw nga kinabuhi ug sa kinabuhing dayon nga moabot. Sila nagkinahanglan nga masayod bahin sa dalan sa pakigsaad nga giandam alang nila ug sa gugma sa Ginoo alang nila. Kining tanan ania dinhi sa Basahon ni Mormon.

Kon kamo mohatag nila og Basahon ni Mormon, kamo nag-abli sa ilang mga hunahuna ug mga kasingkasing ngadto sa pulong sa Dios. Kamo dili kinahanglan nga magdala og giimprinta nga mga kopya sa basahon. Kamo dali nga makapakigbahin niini gikan sa inyong mobile phone gikan sa seksiyon sa mga kasulatan sa Librarya sa Ebanghelyo nga app.

Hunahunaa ang tanan niadtong kinsa mahimong mapanalanginan sa ebanghelyo diha sa ilang mga kinabuhi, ug dayon padad-i sila og kopya sa Basahon ni Mormon gikan sa inyong phone. Hinumdomi ang paglakip sa inyong pagpamatuod ug sa unsang paagi nga kini nga basahon nakapanalangin sa inyong kinabuhi. (Ronald A. Rasband, “Karong Adlawa,” Liahona, Nob. 2022, 27)

Sa unsang paagi ang Basahon ni Mormon magdala kanato ngadto kang Jesukristo?

Si Elder Ulisses Soares sa Korum sa Napulog Duha ka Apostoles mipakigbahin:

Akong gitun-an ang Basahon ni Mormon, ginagmay, samtang akong gikompleto ang sinemana nga mga leksyon sa seminary. Akong mahinumdoman, mura lang og kagahapon, kanang mainiton nga pagbati hinay-hinay nga mipadako sa akong kalag ug mipuno sa akong kasingkasing, naglamdag sa akong panabot, ug nahimong nagka anam og kanindot, sama sa gihulagway ni Alma sa iyang pagsangyaw sa pulong sa Dios ngadto sa iyang katawhan. Kana nga pagbati sa kadugayan nahimong kahibalo nga migamot sa akong kasingkasing ug nahimong pundasyon sa akong pagpamatuod sa mahinungdanong mga panghitabo ug mga pagtulun-an nga makita niining balaan nga basahon.

Pinaagi niini ug sa uban pang bililhong personal nga mga kasinatian, ang Basahon ni Mormon nahimo gayod nga bato sa pamag-ang nga nakasustiner sa akong pagtuo diha ni Jesukristo ug sa akong pagpamatuod sa doktrina sa Iyang ebanghelyo. Nahimo kining usa sa mga haligi nga nagpamatuod ngari nako kabahin sa balaan nga maulaon nga sakripisyo ni Kristo. Nahimo kining taming sa tibuok nakong kinabuhi batok sa mga pagsulay sa kaaway sa pagpahinay sa akong hugot nga pagtuo ug pagtisok og kawalay pagtuo sa akong hunahuna ug mihatag nako og kaisog nga maisogon nga mamahayag sa akong pagpamatuod sa Manluluwas ngadto sa kalibutan. (Ulisses Soares, “Ang Pagtungha sa Basahon ni Mormon,” Liahona, Mayo 2020, 34)

Dugang nga mga Kalihokan sa Pagkat-on

Pagtabang sa uban nga modangop kang Jesukristo pinaagi sa Basahon ni Mormon

Tingali mahagit ang mga estudyante sa pagpakigbahin sa ebanghelyo ngadto sa uban. Makatabang tingali ang pagpasalida sa mosunod nga bidyo sa usa ka batan-ong lalaki nga mipakigbahin sa Basahon ni Mormon ngadto sa usa ka higala. Sa laing paagi, pwedeng isulti sa mga estudyante mahitungod sa mga higayon nga ilang gipakigbahin ang Basahon ni Mormon ngadto sa usa ka tawo kinsa napanalanginan tungod sa pagbasa niini.

Pwedeng hisgotan sa mga estudyante kon nganong ang pagpakigbahin sa Basahon ni Mormon maoy usa ka maayong paagi sa paghisgot sa ebanghelyo ngadto sa usa ka tawo.

Pwede nimong ipakita sa mga estudyante ang lainlaing paagi sa pagpakigbahin sa Basahon ni Mormon sa elektronik nga paagi. Mahimo nila kini diha sa Librarya sa Ebanghelyo nga app pinaagi sa pag-abli sa tab sa mga kasulatan ug pag-tap sa “Ipakigbabin” o “Ipakigbahin Karon” diha sa kinaibabwang bahin sa pahina. O pwede nilang ipakigbahin ang Basahon ni Mormon nga app. Kining duha ka opsiyon nagtanyag sa Basahon ni Mormon sa sobra sa 100 ka pinulongan nga walay bayad. Ang mosunod nga website naay mga instruksiyon sa pag-download sa app ug naglakip og bidyo aron tabangan ang mga estudyante nga masayod kon unsaon kini sa pagpakigbahin:

Ipakigbahin ang Book of Mormon [Basahon ni Mormon] nga App

Mag-drama-drama sa pagpakigbahin sa Basahon ni Mormon

Makatabang tingali ang paghatag sa mga estudyante og higayon sa pagpakigbahin sa Basahon ni Mormon diha sa usa ka matang sa misyonaryo nga kahimtang. Pwedeng mag-drama-drama ang mga estudyante uban ang ilang kapares. Magpulihanay ang magpares sa paghimo sa mosunod nga morag nakig-istorya sila sa usa ka higala nga lahi og relihiyon:

• Ipasabot kon unsa ang Basahon ni Mormon.

• Dapita ang imong higala sa pagbasa niini.

• Sultihi ang imong higala kon nganong gusto ka nga mabasa kini niya.

Makatabang tingali sa mga estudyante ang pagbasa ug pagsunod sa mga sugyot sa pagpakigbahin sa Basahon ni Mormon nga makita ilawom sa “Mga Panabot sa Pagtudlo” sa pahina 42 sa Isangyaw ang Akong Ebanghelyo: Usa ka Giya sa Misyonaryo nga Pangalagad (2023).

Pasiuna sa Basahon ni Mormon. “Pagsunod sa iyang mga lagda”

Ikonsiderar ang pagpabasa sa mga estudyante sa ikaunom nga parapo sa pasiuna sa Basahon ni Mormon. Makatabang kini nila nga makita ang importanteng paagi sa pagdapit sa mga panalangin sa Basahon ni Mormon diha sa ilang kinabuhi. Hangyoa sila sa pagpangita sa gihatag nga saad. Ang mosunod nga mga hisgotanan nga pangutana tingali makatabang:

• Agi og dugang sa pagbasa sa Basahon ni Mormon, unsa pay kinahanglan natong buhaton aron mas mapaduol ngadto sa Dios?

• Kanus-a ka nakahimo sa usa ka butang nga imong nakat-onan gikan sa Basahon ni Mormon?

Ang Basahon ni Mormon nagsulti para sa kaugalingon niini

Aron tabangan ang mga estudyante nga mas masabtan ang gahom sa Basahon ni Mormon sa pagpunting sa mga tawo ngadto sa Langitnong Amahan ug kang Jesukristo, pwede ninyong tan-awon ang mosunod nga bidyo. Gipakita niini ang mga tawo sa tibuok kalibotan nga lainlain og relihiyon nga nagbasa og sinalagma nga pahina sa Basahon ni Mormon ug nangita kon sa unsang paagi kini nagpamatuod sa Dios.