Leksiyon 47: Doktrina ug mga Pakigsaad 30–36

Doktrina ug mga Pakigsaad 30–36, Bahin 1

“Pagsangyaw sa Akong Ebanghelyo”

Pipila lang ka mga bulan human ang Simbahan opisyal nga natukod, ang Manluluwas misugo sa pipila ka bag-ong mga miyembro sa pagserbisyo og mga misyon. Bisan pa sa ilang bag-ohay lang nga pagdawat ug limitado nga pagsabot sa gipahiuli nga ebanghelyo, ang Ginoo mitawag niini nga mga tawo sa pagsangyaw sa Iyang ebanghelyo uban sa “tingog sa trumpeta” (Doktrina ug mga Pakigsaad 30:9). Kini nga leksiyon makatabang sa mga estudyante nga makasabot sa pipila ka mga rason sa Manluluwas sa pagsugo kanato sa pagsangyaw sa Iyang ebanghelyo.

Mga Posibleng Kalihokan sa Pagkat-on

Kini ang una sa duha ka mga leksiyon nga naghisgot sa Doktrina ug mga Pakigsaad 30–36. Ang bahin 1 motutok sa mga rason nga gusto sa Ginoo nga atong ipakigbahin ang Iyang ebanghelyo, ug ang bahin 2 magtutok sa tabang nga Iyang gihatag kanato ug unsaon nato sa pagsangyaw ngadto sa uban. Kon limitado ang oras sa klase ug usa ra ka leksiyon sa Doktrina ug mga Pakigsaad 30–36 ang matudlo, ikonsiderar kon sa unsang paagi ang duha ka mga leksiyon mahimong epektibong mahiusa.

Atong katungdanan sa pagsangyaw sa ebanghelyo

Ikonsiderar ang pagsugod sa klase pinaagi sa pagpakita og bag-ohay lang nga tawag sa misyon ug sa pagbasa niini og kusog. Dapita ang mga estudyante sa pagpakigbahin sa ilang mga pagbati mahitungod sa unsay makapahinam ug tingali makapabalaka kanila kon maghunahuna sila sa pagserbisyo og misyon.

Si Presidente Russell M. Nelson mipakigbahin sa mosunod nga tambag kalabot sa full-time nga misyonaryo nga pagserbisyo:

Pagsangyaw sa Ebanghelyo sa Kalinaw

Presidente Nelson nagtudlo nga kita kinahanglan nga mobarog sa balaan nga mga dapit ug mopakigbahin sa ebanghelyo sa tibuok kalibotan.

Karong adlawa ako kusganong mopanghimatuod og balik nga ang Ginoo miawhag sa matag takos, makahimo nga batan-ong lalaki sa pagpangandam ug pagserbisyo sa misyon. Alang sa batan-ong kalalakin-an nga mga Santos sa Ulahing mga Adlaw, ang misyonaryo nga pagserbisyo usa ka responsibilidad sa pagkapari. …

Alang kaninyo batan-on ug makahimo nga mga sister, ang usa ka misyon gamhanan usab, apan opsiyonal, nga oportunidad. Among gihigugma ang sister nga mga misyonaryo ug tibuok kasingkasing namo silang gihangop. Ang inyong matampo niini nga buhat nindot kaayo! Pag-ampo aron masayod kon ang Ginoo buot ba nga moserbisyo kamo og misyon, ug ang Espiritu Santo motubag sa inyong kasingkasing ug hunahuna.

Minahal nga batan-ong mga higala, ang matag usa kaninyo importante ngadto sa Ginoo. Siya migahin kaninyo hangtod niining higayona aron sa pagtabang sa pagpundok sa Israel. Ang inyong desisyon sa pagserbisyo og misyon, pangsangyaw man o pangserbisyo nga misyon, makapanalangin kaninyo ug sa daghan pang uban. …

Ang tanang misyonaryo nagtudlo ug nagpamatuod sa Manluluwas. Ang espirituhanon nga kangitngit sa kalibotan nakapahimo sa kahayag ni Jesukristo nga wala pa sukad mas gikinahanglan kaysa karon. Ang tanan angayan nga hatagan og kahigayonan nga mahibalo bahin sa gipahiuli nga ebanghelyo ni Jesukristo. Ang matag tawo angayan nga makahibalo asa sila makakaplag sa paglaom ug sa kalinaw nga “dili matugkad sa tawo” [Mga Taga Filipos 4:7]. (Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 6–7)

• Unsa nga mga hunahuna o mga pagbati ang aduna ka mahitungod sa pamahayag ni Presidente Nelson?

• Unsa nga ebidensiya ang imong nakita nga ang kahayag ni Jesukristo wala pa sukad mas kinahanglana sa kalibotan kaysa karon?

Ipasabot nga ang pagsangyaw sa ebanghelyo sa Manluluwas dili lamang usa ka katungdanan sa full-time nga mga misyonaryo apan responsibilidad usab nga gisaw-an sa tanang miyembro sa Simbahan. Sultihi ang mga estudyante nga ang leksiyon karong adlawa magtutok sa mga pagtulun-an sa Ginoo kon nganong gikinahanglan natong ipakigbahin ang Iyang ebanghelyo. Ikonsiderar ang pagpakigbahin sa mosunod nga mga pagdapit aron matabangan ang mga estudyante nga maandam sa pagtuon niini nga leksiyon.

Pamalandongi kon unsa ang imong nahibaloan na kon nganong ang Ginoo naglaom sa Iyang mga sumusunod sa pagsangyaw sa ebanghelyo, bisan isip usa ka full-time nga misyonaryo o sa inadlaw-adlaw nga pakig-uban. Mahimo nimong isulat kini nga mga rason diha sa imong journal sa pagtuon. Samtang magtuon ka karon, pangitaa ang mga pagtulun-an nga makatabang nimo nga mas makasabot nganong ang Ginoo matinguhaon kaayo sa Iyang mga sumusunod sa pagpakigbahin sa Iyang ebanghelyo.

“Pagsangyaw gikan niini nga higayon”

Sa dili pa ang klase, ipakita ang mosunod nga mga ngalan diha sa pisara o sa mga bongbong sa tibuok lawak: Peter Whitmer Jr., John Whitmer, Thomas B. Marsh, Parley P. Pratt, Ziba Peterson, Ezra Thayer, Northrop Sweet, Orson Pratt, Sidney Rigdon, ug Edward Partridge. Pangutan-a ang mga estudyante kon nakaila ba sila sa bisan hain sa mga ngalan. Ipasabot nga kining tanan nga mga kalalakin-an gitawag sa Ginoo sa pagserbisyo og mga misyon ug sa pagsangyaw sa ebanghelyo sa wala madugay human sa organisasyon sa Simbahan. Hisgoti nga pipila kanila nabunyagan wala pay usa ka bulan sa wala pa moabot ang ilang mga tawag.

Ang mosunod nga kalihokan sa pagtuon makatabang sa mga estudyante nga makasabot sa pipila ka mga rason kon nganong ang Manluluwas mihangyo kanato sa pagsangyaw sa Iyang ebanghelyo. Ikonsiderar ang pagbahin sa mga estudyante ngadto sa mga grupo ug sa paghatag sa matag estudyante sa nag-uban nga handout. Ang matag grupo mahimong hatagan og usa sa mga tudling sa kasulatan nga tun-an.

Ang Tambag sa Ginoo ngadto sa mga Misyonaryo diha sa Doktrina ug mga Pakigsaad 30–36

Tun-i ang tambag sa Manluluwas ngadto sa mga indibidwal nga gilista sa ubos, ug hisgoti ang mosunod nga mga pangutana.

Doktrina ug mga Pakigsaad 31:1–5 (Thomas B. Marsh)

• Unsa ang pipila ka mga kamatuoran gikan niini nga mga bersikulo nga makatabang kanimo nga makasabot kon nganong ang Manluluwas mihangyo kanato sa pagpakigbahin sa Iyang ebanghelyo?

• Ngano sa imong hunahuna nga si Jesukristo mipasabot sa Iyang ebanghelyo isip “maayo nga mga balita sa dako nga kalipay”? (bersikulo 3). Sa unsang paagi nga ang ebanghelyo sa Manluluwas makahatag kanimo og hingpit nga kalipay?

Doktrina ug mga Pakigsaad 33:1–7, 10–12 (Ezra Thayer ug Northrop Sweet)

• Unsa ang pipila ka mga kamatuoran gikan niini nga mga bersikulo nga makatabang kanimo nga makasabot kon nganong ang Manluluwas mihangyo kanato sa pagpakigbahin sa Iyang ebanghelyo?

• Ngano kaha nga gusto sa Ginoo nga ipahayag ang Iyang ebanghelyo sa makusog nga tingog sama sa “tunog sa trumpeta”? (bersikulo 2).

Doktrina ug mga Pakigsaad 34:1–7 (Orson Pratt)

• Unsa ang pipila ka mga kamatuoran gikan niini nga mga bersikulo nga makatabang kanimo nga makasabot kon nganong ang Manluluwas mihangyo kanato sa pagpakigbahin sa Iyang ebanghelyo?

• Ngano kaha nga kita “labaw nga bulahan” (bersikulo 5) tungod kay gitawag kita aron sa pagsangyaw sa ebanghelyo sa Manluluwas kaysa sa yanong pagtuo niini?

Doktrina ug mga Pakigsaad 35:1–3, 6–8, 12–13 (Sidney Rigdon)

• Unsa ang pipila ka mga kamatuoran gikan niini nga mga bersikulo nga makatabang kanimo nga makasabot kon nganong ang Manluluwas mihangyo kanato sa pagpakigbahin sa Iyang ebanghelyo?

• Ngano sa imong hunahuna nga ang Ginoo mitawag sa “walay nakat-onan” ug sa walay kasinatian nga mga tawo sa pagpahayag sa Iyang ebanghelyo ngadto sa “mga kanasoran” sa kalibotan? (bersikulo 13).

© 2025 by Intellectual Reserve, Inc. All rights reserved.

Human matun-an ug mahisgotan sa mga estudyante kini nga mga bersikulo, dapita sila sa pagpakigbahin sa unsay ilang nakat-onan. Usa ka paagi sa pagbuhat niini mao ang pagsulat sa mga hugpong sa mga pulong nga Mga Rason nga gusto sa Manluluwas nga atong ipakigbahin ang Iyang ebanghelyo diha sa tunga sa pisara. Dayon ang daghang mga estudyante mahimong moduol sa pisara ug magsulat og mga ideya nga ilang nakat-onan gikan sa ilang pagtuon. Dasiga ang mga estudyante sa paghimo og daghang mga rason kutob sa ilang mahimo. Ania ang pipila ka mga ehemplo sa mga tubag nga mahimo nilang ipakigbahin:

• Ang Iyang ebanghelyo makatabang sa mga tawo nga makasinati og hingpit nga kalipay (tan-awa sa Doktrina ug mga Pakigsaad 31:3).

• Dili kita makaangkon og kinabuhing dayon kon dili magpakita og hugot nga pagtuo diha Kaniya, maghinulsol, ug modawat sa mga ordinansa sa Iyang ebanghelyo (tan-awa sa Doktrina ug mga Pakigsaad 33:10–12).

• Gusto Niya nga ang kalibotan maandam alang sa Iyang Ikaduhang Pag-anhi (tan-awa sa Doktrina ug mga Pakigsaad 33:10; 34:6–7).

• Gihigugma kita Niya ug gihatag ang Iyang kinabuhi alang kanato (tan-wa sa Doktrina ug mga Pakigsaad 34:3; 35:2).

Human mopakigbahin ang mga estudyante sa mga kamatuoran nga ilang nakat-onan, ikonsiderar ang pagpangutana og pipila ka mga pangutana sama sa mosunod:

• Sa unsang paagi nga ang pagkahibalo niini nga mga kamatuoran makadasig kanato sa pagpakigbahin sa ebanghelyo sa Manluluwas ngadto sa uban, bisan isip full-time nga mga misyonaryo o sa atong inadlaw nga pakig-uban?

• Unsa ang pipila sa labing importante nga mga rason alang kanimo sa pagpakigbahin sa ebanghelyo sa Manluluwas?

Pagpamatuod sa mga kamatuoran nga imong nahisgotan karon. Dasiga ang mga estudyante sa paglihok sa mga pag-aghat nga ilang nadawat. Ikonsiderar ang pagdapit kanila sa mainampoong paghunahuna sa pagtubag sa tambag ni Presidente Nelson mahitungod sa full-time nga misyonaryo nga pagserbisyo.

Dugang nga mga Kapanguhaan

Doktrina ug mga Pakigsaad 35:13. Unsa ang gipasabot sa Ginoo sa “pag-ayag sa mga kanasoran pinaagi sa gahom sa akong Espiritu”?

Ang pulong nga pag-ayag nagpasabot sa paagi sa pag-ayag sa lugas. Ang pag-ayag mao ang proseso nga nagbulag sa lugas gikan sa tukway ug tipasi niini. Ang mga lugas tipigan, ug ang tukway ug tipasi ilabay. Busa, ang “pag-ayag sa mga kanasoran” nagpasabot sa buhat sa pagsangyaw sa ebanghelyo aron ang mga anak sa Dios mapundok ug mabulag gikan sa kalibotan.

Ngano nga kinahanglan nakong ipakigbahin ang ebanghelyo?

Si Presidente Russell M. Nelson mipahayag:

Ang atong calling isip Israel sa pakigsaad mao ang pagsiguro nga ang matag miyembro sa Simbahan makaamgo sa kalipay ug mga pribilehiyo nga kauban sa paghimo og mga pakigsaad sa Dios. Usa kini ka tawag sa pag-awhag sa matag lalaki ug babaye, batang lalaki ug batang babaye nga masulondon sa pakigsaad, sa pagpaambit sa ebanghelyo niadtong kinsa mosulod sa ilang impluwensiya. Usa usab kini ka tawag sa pagsuporta ug pag-awhag sa atong mga misyonaryo, kinsa gipadala nga dala ang mga instruksiyon sa pagbunyag ug pagtabang sa uban sa pagpundok sa Israel, aron nga magkauban kita nga mamahimong katawhan sa Dios ug Siya mahimong atong Dios (tan-awa sa Doktrina ug mga Pakigsaad 42:9). (Russell M. Nelson, “Ang Walay Kataposan nga Pakigsaad,” Liahona, Okt. 2022, 10)

Si Presidente Dallin H. Oaks sa Unang Kapangulohan mitudlo:

Gusto nakong ipasabot nga ang mga paningkamot sa misyonaryo sama sa pagpakigbahin sa ebanghelyo. Ang pulong nga pagpakigbahin nagpamatuod nga kita adunay usa ka butang nga talagsaon kaayo ug gusto nga ihatag kini sa uban alang sa ilang kaayohan ug panalangin. …

Ang Ginoo nahigugma sa tanan Niyang mga anak. Siya nagtinguha nga ang tanan makadawat sa hingpit Niyang kamatuoran ug kaabunda sa Iyang mga panalangin. (Dallin H. Oaks, “Sharing the Gospel,” Ensign, Nob. 2001, 8–9)

Sa unsang paagi nga ang pagserbisyo og full-time nga misyon makapanalangin sa akong kinabuhi?

Si Elder Denelson Silva sa Seventy mitudlo:

Kaisog sa Pagpahayag sa Kamatuoran

Si Elder Silva mihulagway sa iyang kasinatian sa pagkakabig ug nag-awhag sa mga batan-ong lalaki ug mga batan-ong babaye nga moserbisyo og mga misyon.

Sa tanan kinsa mohukom nga moserbisyo Kaniya, ako mosaad ninyo nga ang 24 o 18 ka bulan sa pagserbisyo nga molabay sa natad sa misyon sama nga kini molabay kon kamo magpabilin sa balay, apan ang mga oportunidad nga naghulat sa takos nga mga batan-ong lalaki ug mga batan-ong babaye niini nga Simbahan diha sa natad sa misyon talagsaon. Ang pribilehiyo sa pagrepresentar sa Manluluwas nga si Jesukristo ug sa Iyang Simbahan dili mabaliwala. Ang pag-apil sa dili maihap nga mga pag-ampo, pagpalambo ug paghatag sa inyong pagpamatuod sa makadaghang higayon atol sa adlaw, daghang mga oras sa pagtuon sa kasulatan, pakighimamat sa mga tawo nga dili ninyo mahimamat kon kamo magpabilin sa inyong balay, mao ang dili mahulagway nga mga kasinatian. Ang samang lebel nga kasinatian gireserba alang sa kabatan-onan nga tawagon sa Ginoo nga moserbisyo og mga pangserbisyo nga mga misyon. Kamo hangpon pag-ayo ug gikinahanglan. Palihog, ayaw ipagamay ang kaimportante sa usa ka pangserbisyo nga misyon, kay ang pangserbisyo nga mga misyon naghatag usab og dili mahulagway nga mga kasinatian. (Denelson Silva, “Kaisog sa Pagpahayag sa Kamatuoran,” Liahona, Nob. 2022, 71-72)

Dugang nga mga Kalihokan sa Pagkat-on

Doktrina ug mga Pakigsaad 30:1–4. Ang pagtutok sa mga butang sa Dios labaw pa sa “mga butang sa yuta”

Ikonsiderar ang pagdapit sa mga estudyante sa paghunahuna mahitungod sa kalibotanong mga butang nga makabalda kanato sa pagtutok sa espirituhanong mga butang. Tingale mainteresado ang mga estudyante nga makahibalo nga gibadlong sa Ginoo si David Whitmer sa pag-una sa kalibotanong mga butang kaysa Kaniya ug sa pangalagad diin si David gitawag. Dapita ang mga estudyante sa pagbasa sa Doktrina ug mga Pakigsaad 30:1–4, mangita sa tambag sa Ginoo ngadto kang David. Ikonsiderar ang pagpangutana sa pipila ka mga pangutana sama sa mosunod:

• Sa unsang paagi nga kita usahay, sama ni David Whitmer, mas naghunahuna sa mga butang sa kalibotan kay sa mga butang sa Dios?

• Kon kita mobati nga matintal sa pagkalimot sa Ginoo ug motutok sa kalibotanon nga mga butang, sa unsang paagi kita mas maayo nga “maminaw ngadto [sa] Espiritu” ug mosalig sa Manluluwas alang sa kalig-on?

Doktrina ug mga Pakigsaad 31:10–13. “Mananambal ngadto sa simbahan”

Mahimong ganahan ang mga estudyante nga mahibalo sa tambag nga gihatag sa Manluluwas ngadto kang Thomas B. Marsh diha sa Doktrina ug mga Pakigsaad 31:10–13. Dasiga ang mga estudyante sa pagmarka sa pulong nga mananambal diha sa bersikulo 10, ug hangyoa sila sa pagpasabot sa nag-unang tahas sa usa ka doktor. Dapita sila sa pag-cross reference sa bersikulo 10 ngadto sa Mateo 9:12, diin ang Manluluwas mitawag sa Iyang kaugalingon isip usa ka mananambal. Ikonsiderar ang pagpangutana sama sa mga mosunod:

• Ngano nga “ang Labing Maayo nga Mananambal” usa ka haom nga titulo alang sa Ginoong Jesukristo?

• Sa unsang paagi Siya nahimong mananambal diha kanimo o sa imong minahal sa kinabuhi?

• Unsa ang pipila ka mga paagi nga mahimo kang “mananambal” ngadto sa mga miyembro sa imong ward o branch sama sa gitambag nga buhaton ni Thomas B. Marsh?