Leksiyon 49: Doktrina ug mga Pakigsaad 30–36

Doktrina ug mga Pakigsaad 35

Ang Hubad ni Joseph Smith sa Biblia

Sa ting-init sa 1830, si Propeta Joseph Smith misugod sa pagtrabaho sa usa ka dinasig nga rebisyon, o paghubad, sa King James nga Biblia. Iyang gikonsiderar kini nga proyekto nga importante nga bahin sa iyang calling isip propeta sa Dios. Kini nga leksiyon makatabang sa mga estudyante nga mobati og pasalamat sa unsay gipadayag sa Dios pinaagi sa Hubad ni Joseph Smith sa Biblia.

Mga Posibleng Kalihokan sa Pagkat-on

Ang Hubad ni Joseph Smith sa Biblia

Aron ipaila sa mga estudyante ang Hubad ni Joseph Smith sa Biblia, ikonsiderar ang paghatag kanila sa mosunod nga mga pamahayag. Dapita ang mga estudyante sa pagtag-an kon ang matag pamahayag tinuod ba o sayop.

1. Sa wala madugay human gimantala ang Basahon ni Mormon niadtong 1830, ang Ginoo misugo kang Joseph Smith sa pagsugod og hubad sa Biblia.

2. Gitan-aw ni Joseph Smith ang orihinal nga Hebreohanon ug Griyego nga mga sinulat aron makahimo og bag-ong Iningles nga hubad sa Biblia.

3. Ang Ginoo mipadayag sa mga basahon ni Moises ug Joseph Smith—Mateo sa Perlas nga Labing Bililhon isip kabahin sa Hubad ni Joseph Smith sa Biblia.

4. Ang Ginoo mipadayag sa pipila ka doktrinal nga mga kamatuoran nga gitudlo sa Ang Simbahan ni Jesukristo sa mga Santos sa Ulahing mga Adlaw ngadto ni Joseph Smith samtang siya naghubad sa Biblia.

5. Ang Ginoo mipanalangin sa imong kinabuhi pinaagi sa Hubad ni Joseph Smith.

Dapita ang mga estudyante sa pagtinguha og mga tubag niini nga mga pamahayag ug sa ubang mga pangutana nga aduna sila bahin sa hilisgotan sa tibuok leksiyon. Papamalandonga sila sa piho kon ang ikalimang pamahayag tinuod ba alang kanila.

Ikonsiderar ang pagdapit sa mga estudyante sa pagdrowing og basahon diha sa ilang journal sa pagtuon ug tagaan kini og ulohan nga “Hubad ni Joseph Smith.” Sa tibuok leksiyon, dasiga ang mga estudyante sa pagsulat sa palibot sa gawas sa ilang drowing sa mga rason nga sila mapasalamaton sa Hubad ni Joseph Smith sa Biblia o mga panabot nga ilang nakita nga makahuluganon.

Mga Panalangin sa Hubad ni Joseph Smith

Human mabunyagi ni Oliver Cowdery sa Kirtland, Ohio, usa ka kanhi magwawali nga ginganlan og Sidney Rigdon mibiyahe ngadto sa Fayette, New York, aron makigkita ni Propeta Joseph Smith. Ang Doktrina ug mga Pakigsaad 35 usa ka pagpadayag gikan sa Ginoo ngadto ni Joseph Smith ug Sidney Rigdon.

Basaha ang ulohan sa seksiyon sa Doktrina ug mga Pakigsaad 35 ug ang mga bersikulo 17–20, mangita kon unsay atong makat-onan mahitungod sa Hubad ni Joseph Smith.

• Unsa ang imong nakat-onan gikan niini nga mga bersikulo?

• Unsa nga katuyoan ang gihatag sa Ginoo alang sa dinasig nga mga kausaban sa Biblia (tan-awa sa bersikulo 20)?

Usa ka kamatuoran nga gitudlo sa Ginoo niini nga mga bersikulo mao nga pinaagi sa Hubad ni Joseph Smith sa Biblia, si Jesukristo mipadayag og dugang nga mga kamatuoran aron makatabang sa paggiya kanato ngadto sa kaluwasan. Mahimo nimong isulti ang mosunod nga impormasyon ngadto sa mga estudyante aron makatabang sa pagtubag sa ikaduhang pangutana.

Agi og pagsunod niini nga pagpadayag, si Sidney Rigdon misugod sa pag-alagad isip tigsulat samtang ang Ginoo mipadayag sa dinasig nga mga pagkorihir ug mga pagdugang sa Biblia pinaagi ni Propeta Joseph Smith. Ang buhat dili literal nga hubad gikan sa usa ka pinulongan ngadto sa lain. Si Joseph migamit og kopya sa King James nga Biblia isip pagsugod samtang siya nagtinguha og pagpadayag ug midiktar sa dinasig nga mga koreksiyon ug mga pagdugang.

Ang mosunod nga kalihokan makatabang sa mga estudyante nga mas makasabot sa gipabaga nga pagkasulat nga baroganan ug mahimong pamilyar sa Hubad ni Joseph Smith. Ikonsiderar ang pagpanghatag sa handout nga giulohan og “Ang Hubad ni Joseph Smith.” Dapita ang mga estudyante sa pagpili og usa o daghang mga seksiyon nga tun-an sa ilang kaugalingon ug sa pagpangandam sa pagtudlo sa ilang mga klasmeyt sa unsay ilang nakat-onan. Samtang magtuon ang mga estudyante, pahinumdomi sila sa pagsulat og makahuloganon nga mga panabot o mga rason nga sila mapasalamaton sa Hubad ni Joseph Smith sa palibot sa drowing nga ilang gihimo diha sa ilang mga journal sa pagtuon.

Ang Hubad ni Joseph Smith

Gipahiuli sa Ginoo ang dugang nga mga pagtulun-an pinaagi sa Hubad ni Joseph Smith sa Biblia.

Makita ba nimo ang basahon ni Moises diha sa imong mga kasulatan? Gipahiuli sa Ginoo ang dugang nga kahibalo pinaagi sa Hubad ni Joseph Smith, lakip ang mga panan-awon ug mga pagtulun-an ni Moises ug sa uban. Kini anaa sa Basahon ni Moises sa Perlas nga Labing Bililhon.

Basaha ang Moises 1:3–4, 6, 8, 39. Pangitaa kon unsay nahibaloan ni Moises mahitungod sa iyang kaugalingon ug sa Ginoo atol sa iyang mga panan-awon. (Mahimo ka usab mangita og paborito nga mga bersikulo diha sa Basahon ni Moises.)

• Sa unsang paagi nga ang mga pagtulun-an niini nga mga bersikulo makatabang kanato samtang kita maningkamot sa pagsunod sa Manluluwas?

• Ngano kaha nga ang usa ka tawo mobati nga mapasalamaton sa unsay gipadayag sa Ginoo niini nga mga bersikulo?

Ang Ginoo mipahiuli sa “yano ug bililhon” nga mga kamatuoran pinaagi sa Hubad ni Joseph Smith.

Nakadungog ka na ba sukad nga pipila ka importente nga mga kamatuoran lagmit nawala o dili klaro diha sa Biblia? Ang Biblia usa ka kasaligan ug dinasig nga basahon. Bisan pa niana, si Nephi mitudlo nga pipila ka “yano ug bililhon nga mga butang” nawala o dili klaro (1 Nephi 13:28–29). Sama pananglit, ang bunyag wala direkta nga gihisgotan sa Biblia hangtod miabot sa Bag-ong Tugon, ug ang biblikanhong asoy ni Noe wala magpasabot nga ang Ginoo mipasidaan sa mga tawo ug mihatag kanila og kahigayonan sa paghinulsol sa wala pa gipadala ang lunop.

Basaha ang Moises 6:64–66; 8:16–17, 20 aron makita kon giunsa pagpahiuli sa Ginoo ang bililhong mga kamatuoran diha sa Hubad ni Joseph Smith.

• Sa unsang paagi kini makatabang kanato karon nga makahibalo kita nga ang bunyag usa ka sugo sukad pa sa mga adlaw ni Adan?

• Sa unsang paagi kini makatabang kanato nga masayod nga ang Ginoo kanunay nga nagdapit kanato sa paghinulsol ug andam sa pagpasaylo kanato?

• Sa unsang paagi kini nga mga kamatuoran makatabang sa paggiya kanato ngadto sa kaluwasan pinaagi ni Jesukristo?

Ang mga pagpadayag sa Ginoo diha sa Hubad ni Joseph Smith misangpot sa dugang nga mga pagpadayag sa Doktrina ug mga Pakigsaad.

Nakatabang ba nimo sukad ang pagtuon sa kasulatan nga makadawat og dugang nga pagpadayag? Kini nakatabang alang kang Joseph. Wala madugay human siya nakahibalo diha sa dinasig nga hubad mahitungod ni Enoch ug sa iyang mga katawhan nga nagtukod sa Zion (tan-awa sa Moises 7:18–21), ang Ginoo mipadayag og mga panudlo ngadto ni Joseph sa pagtabang sa mga Santos nga mahimong usa ka katawhan sa Zion (tan-awa sa Doktrina ug mga Pakigsaad 38, 42, 45).

Laing ehemplo niini nahitabo sa dihang sila si Joseph Smith ug Sidney Rigdon naghubad sa Juan 5:29. Aduna silay mga pangutana bahin sa langit ug impyerno nga misangpot sa usa ka talagsaong panan-awon nga narekord karon diha sa Doktrina ug mga Pakigsaad 76. Kini nga panan-awon naglakip sa mga kamatuoran mahitungod sa tulo ka ang-ang sa himaya nga mapanunod sa mga tawo human niini nga kinabuhi.

Basaha ang Doktrina ug mga Pakigsaad 76:22–24, 50–53, ug 58–62, ug markahi ang imong nakat-onan mahitungod ni Jesukristo ug unsaon nato pagbalik sa pagpuyo uban Kaniya ug sa Langitnong Amahan.

• Unsa nga mga pulong o mga hugpong sa mga pulong ang imong gimarkahan? Ngano man?

• Ngano kaha nga ang usa ka tawo mobati nga mapasalamaton nga masayod niini nga mga kamatuoran?

Ang Ginoo mihatag og katin-awan sa doktrina ug dugang nga mga panabot sa mga bersikulo sa Biblia pinaagi sa Hubad ni Joseph Smith.

Gawas sa Perlas nga Labing Bililhon, nahibalo ka ba kon asa makit-an ang Mga Hubad ni Joseph Smith sa Biblia? Daghan ang anaa sa Mga Kapilian gikan sa Hubad ni Joseph Smith sa Biblia diha sa likod sa mga kasulatan o sa Apendiks sa Hubad ni Joseph Smith nga makita diha sa seksiyon sa Mga Tabang sa Pagtuon sa Gospel Library nga app. Pagkat-on unsaon paggamit niini nga mga kapanguhaan pinaagi sa pagtan-aw sa ehemplo ug pagpasabot sa ubos.

Sa pipila ka mga pinulongan, ang mga tudling sa Hubad ni Joseph Smith makita diha sa mga footnote sa Santos sa Ulahing mga Adlaw nga edisyon sa Biblia o sa “May Kalabotan nga Sulod” sa digital nga mga device.

Basaha ang mosunod nga mga tudling sa Biblia, dayon gamita ang Hubad ni Joseph Smith sa pag-ila sa dinasig nga mga kausaban.

Juan 1:16–18 (Hubad ni Joseph Smith, Juan 1:16–19)

Juan 4:24 (Hubad ni Joseph Smith, Juan 4:26)

Juan 6:44

• Unsa ang gitudlo kanimo niining dinasig nga mga kausaban mahitungod ni Jesukristo?

• Ngano nga usa ka panalangin ang mas masabtan kining mga butanga?

© 2025 by Intellectual Reserve, Inc. All rights reserved.

Dapita ang mga estudyante sa pagpakigbahin unsay ilang nakat-onan ug gibati samtang sila nagtuon. Kon gikinahanglan, hatagi ang mga estudyante og mga tubag sa unang upat ka mga pamahayag sa pangbukas nga kalihokan (1. Tinuod, 2. Sayop, 3. Tinuod, 4. Tinuod). Ikonsiderar ang paghatag sa mga estudyante og pipila pa ka minuto sa pagsulat diha sa ilang journal sa pagtuon sa bisan unsang mga ideya nga ilang naangkon o nganong mapasalamaton sila sa Hubad ni Joseph Smith. Pagdapit og pipila ka mga boluntaryo sa pagpakigbahin sa unsay ilang gisulat o kon nganong ang ikalimang pamahayag gikan sa sinugdanan sa klase tinuod alang kanila. Ikonsiderar ang pagpakigbahin sa imong pagpamatuod bahin ni Propeta Joseph Smith ug sa unsang paagi ang iyang buhat makatabang kanato nga makaila sa Langitnong Amahan ug ni Jesukristo.

Dugang nga mga Kapanguhaan

Asa ako makakat-on og dugang pa mahitungod sa Hubad ni Joseph Smith sa Biblia?

Ang mosunod nga mga kapanguhaan naghatag og dugang nga impormasyon mahitungod sa Hubad ni Joseph Smith:

Mga Hisgotanan sa Kasaysayan sa Simbahan, “Ang Hubad ni Joseph Smith sa Biblia,” ChurchofJesusChrist.org/study/history/topics

Elizabeth Maki, “Joseph Smith’s Bible Translation,” sa Revelations in Context [2016], 99–104

The Joseph Smith Papers, season 1, mga yugto 20, “Joseph Smith Translation (JST), Bahin 1,” ChurchofJesusChrist.org

The Joseph Smith Papers, season 1, mga yugto 21, “Joseph Smith Translation (JST), Bahin 2,” ChurchofJesusChrist.org

Nahuman ba gayod ni Joseph Smith ang paghubad sa Biblia?

Niadtong Hulyo 2, 1833, usa ka sulat gikan sa Unang Kapangulohan (Joseph Smith, Sidney Rigdon, ug Frederick G. Williams) ngadto sa mga Santos sa Zion mitaho, “Kami nahuman niining adlawa sa paghubad sa mga Kasulatan, tungod niini ibalik namo ang pasalamat ngadto sa atong Langitnong Amahan” (“Letter to Church Leaders in Jackson County, Missouri, 2 July 1833,” Letterbook 1, 51,​josephsmithpapers.org).

Sa unsang paagi nga ang Hubad ni Joseph Smith nakaimpluwensiya sa unang mga Santos sa pagsabot bahin sa Zion?

Si Robert J. Matthews, usa ka eskolar nga Santos sa Ulahing mga Adlaw, mipakigbahin sa mosunod:

Ang Simbahan niadtong 1830 hingpit nga nagsalig sa usa ka bag-ong pagpadayag aron makahibalo sa bisan unsa nga mahinungdanon mahitungod ni Enoch, sa iyang pangalagad, sa mga tawo sa iyang siyudad (Zion), o sa ilang mga balaod. Bisan pa niana, ang Ginoo hapit na mopadayag ngadto sa Simbahan og daghan mahitungod ni Enoch ug sa mga balaod kalabot sa karaan ug sa umaabot nga Zion. Ang unang pasiuna niini nga mga butang niadtong Nobiyembre ug Disyembre 1830 samtang ang Propeta naghubad gikan sa Genesis. Sa misunod nga pipila ka bulan miabot ang mga pagpadayag sa Doktrina ug mga Pakigsaad 42–43, 45–51, ug 57–59 (Pebrero–Agosto 1831). Makita ba nimo kon unsa ka talagsaon ang pasiuna sa panagna ni Enoch diha sa HJS Genesis kapitulo 7 (Moises 7) diha sa pagpahimutang sa pundasyon alang niining ulahing mga pagpadayag? Sa gitas-on lamang kini impresibo. Ang impormasyon mahitungod kang Enoch ug sa Zion, ingon nga gipadayag ngadto ni Joseph Smith niadtong Nobiyembre ug Disyembre 1830 samtang naghubad siya sa Biblia, napulog walo ka pilo ang gitas-on sa tanang materyal nga Enoch nga anaa sa King James Version. (Robert J. Matthews, “The Joseph Smith Translation: A Primary Source for the Doctrine and Covenants,” sa Sperry Symposium Classics: The Doctrine and Covenants, ed. Craig K. Manscill [2004], 142–54)

Dugang nga mga Kalihokan sa Pagkat-on

Yano ug bililhon nga mga butang

Ikonsiderar ang pagsugod sa klase pinaagi sa pagbutang sa mga estudyante sa mga grupo nga tag-lima o labaw pa. Sugoa ang mga sakop sa grupo sa paglingkod nga maglinya. Dapita ang estudyante sa atubangan sa linya sa matag grupo sa paggawas sa lawak klasehanan, ug sultihi sila og dili pamilyar nga hugpong sa mga pulong, sama sa “ang abtik abuhon nga fox miambak sa ibabaw sa tapolan nga iro ug miingon og hello sa iring.” Sugoa kini nga mga estudyante sa pagbalik ngadto sa ilang mga grupo ug ihunghong sa makausa ang hugpong sa mga pulong ngadto sa sunod nga estudyante sa linya. Kana nga estudyante mohunghong dayon sa iyang nadungog ngadto sa sunod nga estudyante ug padayon hangtod nga ang kataposang estudyante sa matag grupo adunay isulti kanila. Dapita ang kataposang estudyante sa matag grupo sa pagpakigbahin sa unsay ilang nadungog, ug itandi kini sa orihinal nga hugpong sa mga pulong.

• Unsa kaha ang hinungdan nga nausab ang mensahe samtang kini gipasa?

Si Nephi nakakita og usa ka panan-awon sa pagtungha sa Biblia. Basaha ang 1 Nephi 13:24–27. Pangitaa kon sa unsang paagi kini nga mga bersikulo mahimong may kalabotan sa kalihokan.

• Unsay nahitabo sa Biblia sa paglabay sa panahon?

• Sa unsang paagi ang pipila niadtong yano ug bililhon nga mga kamatuoran gipahiuli sa ulahing mga adlaw?

Mahimong mopakigbahin ang mga estudyante og mga tubag sa ikaduhang pangutana sama sa Basahon ni Mormon o sa mga propeta sa modernong panahon. Ipasabot nga ang Hubad ni Joseph Smith sa Biblia mipahiuli usab sa daghang mga kamatuoran nga nawala sa paglabay sa panahon.

Ang Paglalang ug ang Pagkapukan

Ipasabot nga samtang gihubad ni Joseph Smith ang basahon sa Genesis, nakaangkon siya og dugang nga mga panabot sa Paglalang sa kalibotan ug sa Pagkapukan ni Adan ug ni Eva (tan-awa sa Moises 2–4). Sa mga panahon nga gihubad ni Joseph kini nga materyal, nadawat niya ang pagpadayag nga makita karon sa Doktrina ug mga Pakigsaad 29.

Basaha ang Doktrina ug mga Pakigsaad 29:31–42. Pangitaa kon unsay imong makat-onan mahitungod sa Paglalang sa kalibotan ug sa Pagkapukan ni Adan ug ni Eva.

• Unsay imong nakat-onan?

• Sa unsang paagi nga ang pagkahibalo niini nga mga butang makatabang kanato nga mas makasabot sa panginahanglan alang sa usa ka Manluluwas (tan-awa sa bersikulo 42)?

Pamalandongi kon sa unsang paagi ang pagkahibalo niini nga mga kamatuoran makadala kanimo ngadto sa Ginoo ug sa kaluwasan.