Pagbansay alang sa Pagsagop ug Pagpahiangay sa Kurikulom sa Seminary
“Pagbansay alang sa Pagsagop ug Pagpahiangay sa Kurikulom sa Seminary,” Pagbansay alang sa Kurikulom sa Seminary (2025)
Imahe
babaye nga nagtuon
Pagbansay alang sa Pagsagop ug Pagpahiangay sa Kurikulom sa Seminary
Adunay daghan nga epektibong paagi sa pagpangandam sa pagtudlo sa ebanghelyo ni Jesukristo. Kini nga pagpangandam kanunay nga maglakip sa mainampoong pagtuon sa pulong sa Dios ug sa pagtinguha sa giya sa Espiritu Santo aron masayod kon unsaon aron matabangan sa labing maayong paagi ang imong mga gitudloan nga mas mapalawman ang ilang pagkakabig kang Jesukristo ug sa Iyang gipahiuli nga ebanghelyo.
Ang kurikulom sa seminary usa ka kapanguhaan nga imong kasaligan nga mogiya kanimo sa pag-andam sa imong leksiyon ug makatabang nga imong matudlo ang tinuod nga doktrina. Samtang gamiton nimo kini nga kapanguhaan, tinguhaa og una nga sagopon ang unsay anaa sa kurikulom, ug dayon ikonsidera ang mga panginahanglan sa imong mga estudyante ug giya sa Espiritu Santo aron masabtan kon asang dapita kaha ikaw mopahiangay sa pipila ka ideya sa kurikulom.
Ikonsidera kining mosunod nga tambag ni Presidente Dallin H. Oaks sa Unang Kapangulohan mahitungod sa paggamit sa kurikulom aron sa pagpangandam sa mga leksiyon sa seminary:
Imahe
Presidente Dallin H. Oaks
Una sagopon nato, dayon mopahiangay. Kon hingpit ang atong pagpamilyar sa gitakdang leksiyon nga atong ihatag, nan mahimo natong sundon ang Espiritu aron sa pag-usab aron ipahiangay ang unsay anaa niini. Apan adunay tentasyon, kon hisgotan nato ang mahitungod niini nga pagpailin-ilin, kon sugdan ang pagpahiangay ang unsay anaa kay sa sagopon. Usa kini ka pagbalanse. Usa kini ka padayon nga hagit. Apan ang pamaagi nga unahon ang pagsagop ug isunod ang pag-usab aron ipahiangay usa ka maayong paagi alang sa luwas nga pagtudlo. (“Usa ka Panel Discussion uban ni Elder Dallin H. Oaks” [Sibya sa satellite sa Seminaries and Institutes of Religion, Ago. 7, 2012], broadcasts.ChurchofJesusChrist.org)
Ngano kaha nga importante man nga unahon ang pagsagop kon unsay naa sa kurikulom sa dili pa usbon aron ipahiangay ang unsay anaa sa leksiyon?
Pagsagop sa Kurikulom
Ang Tumong sa Seminaries and Institutes of Religion nag-ingon nga atong “tabangan ang kabatan-onan ug mga young adult nga mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo.” Ang tumong naghisgot sa mga mosunod mahitungod sa pagtabang sa mga estudyante nga mapalawman ang pagkakabig:
Kita mosentro sa matag kasinatian sa pagkat-on diha ni Jesukristo ug sa Iyang ehemplo, mga hiyas, ug makatubos nga gahom. Kita motabang sa mga estudyante nga makat-on sa gipahiuli nga ebanghelyo ni Jesukristo sama sa makita diha sa mga kasulatan ug sa mga pulong sa mga propeta. Kita motabang sa mga estudyante sa ilang tahas diha sa proseso sa pagkat-on alang sa ilang kaugalingon. Kita maningkamot sa pagdapit sa Espiritu Santo aron sa pagtuman sa Iyang tahas diha sa matag kasinatian sa pagkat-on.
Ang kurikulom sa seminary mainampingon nga gedisinyo sa pagtabang kanimo nga makaangkon niini nga kasinatian sa pagkat-on. Ang matag leksiyon nagsentro sa kasinatian sa pagkat-on kang Jesukristo (nagsentro kang Kristo), makatabang sa mga estudyante sa pagkat-on sa ebanghelyo gikan sa mga kasulatan ug sa mga pulong sa mga propeta (gibase sa kasulatan), ug naghatag og mga oportunidad nga matuman sa mga estudyante ang ilang tahas sa kasinatian sa pagkat-on (nakatutok sa tigkat-on). Pinaagi sa pagtipon niining tulo ka importanteng elemento sa katuyoan, atong dapiton ang Espiritu Santo sa pagtuman sa Iyang tahas sa kasinatian sa pagkat-on. Ang Pagtudlo sumala sa Pamaagi sa Manluluwas nagpasabot nga “Ang Espiritu mao ang tinuod nga magtutudlo ug tinuod nga tinubdan sa pagkakabig.” Mahitabo lamang nga mapalawman ang pagkakabig ngadto sa Manluluwas kon anaa ang Espiritu.
Imahe
Grapika [graphic] sa Gigiyahan sa Espiritu nga Kasinatian sa Pagkat-on
Kini nga dayagram naghulagway sa nakasentro kang Kristo, nakabase sa kasulatan, ug nakatutok sa tigkat-on nga kasinatian nga magdapit sa Espiritu Santo sa paghimo sa Iyang tahas. Ang yellow nagpasabot sa sukod diin ang kasinatian sa pagkat-on mas makadapit sa Espiritu Santo. Ang sentro niini nga dayagram naghulagway kanus-a ang Espiritu nagdirekta sa kasinatian sa pagkat-on ug ang mga estudyante mopalawom sa ilang pagkakabig ngadto ni Jesukristo ug sa Iyang gipahiuli nga ebanghelyo. Pinaagi sa pagsagop sa kurikulom sa seminary, makapalambo kita og purohan nga ang mga estudyante makaangkon og giniyahan sa Espiritu nga kasinatian sa pagkat-on sa seminary. Ang kurikulom sa seminary mainampingon usab nga girebyo ug gisabotan aron makatabang kanimo:
Sa paghatag og mga kasinatian alang sa mga estudyante aron makapakigbahin ug sa pagpakita kon unsay ilang nakat-onan.
Sa paggamit og lahi-lahing mga pamaagi.
Dunay daghang mahinungdanon nga konsiderasyon nga angay timan-an kon mag-andam og leksiyon. Ang pagsagop sa kurikulom makatabang sa paggiya kanimo kon unsa ug kon unsaon sa pagtudlo. Makatabang usab kini nga magpabilin ka sa solido nga pundasyon sa doktrina.
Ania ang pipila ka paagi nga masagop nimo ang kurikulom:
Basaha og maayo ang katuyoan sa leksiyon. Makita kini diha sa kinatibuk-ang pagpasabot [overview] nga dokumento ug sa kataposang kapahayag sa pasiuna sa matag leksiyon. Ang tanan nga sulod ug mga kalihokan nagsubay niini nga katuyoan o sa resulta sa pagkat-on.
Basaha ang tibuok nga leksiyon. Ikonsidera kon unsaon sa pagbasa sa mga estudyante ang pinili nga mga kasulatan, sa gipabaga pag-type nga mga kamatuoran, mga kinutlo, ug mga kalihokan nga nagsubay sa katuyoan sa leksiyon ug nagsangkap og nakasentro kang Kristo, nakabase sa kasulatan, ug nakatutok sa tigkat-on nga kasinatian. Tutoki og maayo ang kalihokan sa pagkat-on dapit sa kataposan sa leksiyon, nga maghatag sa mga estudyante og oportunidad nga ikapakita ang katuyoan sa leksiyon.
Ikonsiderar ang pagtubag sa mga pangutana ug paghimo sa mga kalihokan sama nga ikaw usa ka estudyante. Makatabang kini nga makakat-on ka pinaagi sa Espiritu ug mosulod sa klasrom nga nalig-on, nabayaw, ug mas andam nga mohatag og susamang kasinatian sa imong mga estudyante.
Tinguhaa nga masabtan ug matudlo ang tanang matang sa leksiyon nga anaa sa kurikulom, bisan og bag-o kini alang kanimo. (Ang mga matang sa leksiyon maglakip sa Kurso sa Kasulatan nga mga leksiyon, Pagpraktis og Doktrinal nga Kahanas nga mga leksiyon, ug Pagpangandam sa Kinabuhi nga mga leksiyon.) Ang matag usa niining mga kasinatian nagtampo og lahi nga mga paagi nga mapalawman ang pagkakabig sa mga estudyante ngadto ni Jesukristo ug sa Iyang ebanghelyo.
Ang pagpili sa pagsagop unsay anaa sa kurikulom tingali importante kaayo sa Pagpangandam sa Kinabuhi nga mga leksiyon. Kini nga mga leksiyon nagtutok og lainlaing importanteng mga hilisgotan alang sa kinabuhi sa mga estudyante. Gipalambo kini pinaagi sa tabang sa lainlaing departamento sa Simbahan ug sa ubang mga eksperto sa butang nga hisgotan. Ang ubang mga magtutudlo tingali mobati nga dili kwalipikadong motudlo og pihong mga hilisgotan sa Pagpangandam sa Kinabuhi apan mobati nga duna silay maayo kaayong mga kahanas sa ubang mga hilisgotan sa Pagpangandam sa Kinabuhi. Bisan asa niini nga sitwasyon, mas maalamon alang sa mga magtutudlo ang pagsagop sa kurikulom sa dili pa magtinguha sa pagpahiangay niini. (Tan-awa sa mga sitwasyon nga pagatun-an ni Brother Alvarez ug ni Sister Sato diha sa ubos.)
Mga sitwasyon nga pagatun-an alang sa pagsagop sa kurikulom
Si Brother Alvarez—Usa ka magtutudlo kinsa mibati nga dili kwalipikadong motudlo og usa ka piho nga Pagpangandam sa Kinabuhi nga leksiyon
Si Brother Alvarez usa ka kinabig sa Simbahan ug wala moserbisyo og full-time nga misyon. Wala siya mobati nga kwalipikadong motudlo og usa ka pagpangandam sa misyonaryo, kay wala man siya makaserbisyo og misyon ug gikonsidera nga sayloan ang Pagpangandam sa Misyonaryo nga seksiyon diha sa mga leksiyon sa Pagpangandam sa Kinabuhi. Hinoon, dihang gisugdan niya ang pagsusi sa mga leksiyon, nakabantay siya nga nakapunting kini kang Kristo isip hingpit nga ehemplo sa pagpakigbahin sa Iyang ebanghelyo ug wala kini magsalig sa kaugalingon niyang mga kasinatian. Naglakip kini sa mga kasulatan nga puno sa pagtulon-an ug makapalakip nga mga kalihokan aron matabangan ang iyang mga estudyante nga maaandam sa pagserbisyo isip mga misyonaryo sa Ginoo. Naamgohan niya nga ang mga leksiyon sa kurikulom makatabang sa iyang mga estudyante nga makabaton og talagsaong kasinatian bisan pa sa kawala niyay kaugalingon nga kasinatian sa misyonaryo nga pagpangandam.
Si Sister Sato—Usa ka magtutudlo nga dunay dakong kahanas sa piho nga hilisgotan sa Pagpangandam sa Kinabuhi
Si Sister Sato nangandam nga motudlo sa leksiyon nga Pagpangandam sa Kinabuhi mahitungod sa pagdumala sa pinansiyal. Usa siya ka propesyonal nga tigplano sa pinansiyal ug mahinamong mopakigbahin sa iyang kahibalo ug mga kasinatian ngadto sa iyang klase sa seminary. Dihang mainampoon niyang gitun-an ang kurikulom, iyang nabantayan ang kayano sa materyal ug sa paghatag og gibug-aton ngadto kang Jesukristo ug sa mga kasulatan. Natino niya nga ang pagtudlo sa leksiyon sigon sa unsay gilatid sa kurikulom makatabang sa iyang mga estudyante nga malig-on ang ilang pagtuo kang Jesukristo ug maghatag kanila og mga sukaranang baroganan nga tukma sa ang-ang sa ilang kinabuhi. Imbis mag-andam sa pagtudlo og mas pauna nga mga baroganan sa pinansiyal, nakahukom si Sister Sato nga mogamit lang gayod sa leksiyon nga naa sa kurikulom.
Pagpahiangay sa Kurikulom
Isip magtutudlo sa seminary, naa ka sa maayong kahigayonan nga makatabang sa imong mga estudyante sa pagduol ngadto kang Jesukristo. Pinaagi sa imong kanunay nga pakig-inter-aksyon sa imong mga estudyante, mailhan nimo sila ug mahigugma kanila og maayo. Ang pagkaila ug paghigugma sa imong mga estudyante mopalambo sa imong abilidad sa pagdawat og inspirasyon gikan sa Espiritu Santo mahitungod sa kon kanus-a ug unsaon sa paghimo og mga pagpahiangay sa kurikulom. Samtang mag-andam ka og mga leksiyon gamit ang kurikulom, sugdi ang pag-andam pinaagi sa pag-ampo. Ang Langitnong Amahan modasig kanimo pinaagi sa Espiritu Santo kon unsang mga pagpahiangay, kon aduna, tingali ang imong buhaton og unsay sulod sa leksiyon aron mas makatubag sa panginahanglan ug sa mga abilidad sa imong mga estudyante.
Mga rason nganong tingali angay nga ipahiangay ang leksiyon maglakip sa:
Pagtabang sa mga estudyante nga dunay kasamtangang mga isyu ug mga pangutana. (Tan-awa ang sitwasyon nga pagatun-an ni Brother Jones.)
Sa paghimong makahuloganon sa usa ka porsyon sa leksiyon base sa mga panginahanglan sa imong mga estudyante, mga abilidad, kultura, o magamit nga mga kapanguhaan. (Tan-awa ang sitwasyon nga pagatun-an ni Sister Dube, Brother Reyes, ug ni Sister Rodriguez.)
Sa paggamit og mas bag-ong mga pamahayag, direksiyon, o mga kapanguhaan nga gihatag sa mga lider sa Simbahan. (Tan-awa ang sitwasyon nga pagatun-an ni Sister Schmidt.)
Aron makakita og mas maayong paagi nga matuman ang gihatag nga seksiyon sa leksiyon. Ang mga ehemplo pwedeng maglakip sa pagpahiuyon sa usa ka leksiyon nga maggamit og butang [object lesson] sa paagi nga sa gihapon makapaandam sa mga hunahuna ug kasingkasing sa mga estudyante aron matudloan o sa pagdapit sa mga estudyante nga matudloan o madapit sa pagdrama-drama sa usa ka asoy gikan sa mga kasulatan kay sa motan-aw og video nga nagpakita sa susama nga hitabo. (Tan-awa ang sitwasyon nga pagatun-an ni Brother Li.)
Sa dili pa buhaton ang pagpahiangay sa kurikulom, ikonsidera ang pagpangutana sa imong kaugalingon og sama sa mosunod:
Ang pagpahiangay naghatag ba gihapon og kasinatian sa pagkat-on nga nakasentro kang Kristo, gibase sa kasulatan, ug nagtutok sa tigkat-on?
Ang pagpahiangay nahiuyon ba sa mga pag-aghat sa Espiritu Santo ug mga baroganan sa sama kang Kristo nga pagtulon-an nga makita diha sa Pagtudlo sumala sa Pamaagi sa Manluluwas?
Ang gihimong pagpahiangay nagpakita ba sa katuyoan sa dinasig nga tagsulat?
Ang gihimong pagpahiangay nagtutok ba sa makakabig nga mga baroganan?
Nasabtan ba nako kon sa unsang paagi ang akong pagpahiangay makaapekto sa umaabot nga mga leksiyon ug sa pagsukod sa kahibalo sa mga kasinatian alang sa mga estudyante?
Mga sitwasyon nga pagatun-an alang sa pagpahiangay sa kurikulom
Brother Jones—Pag-usab aron ipahiangay ang leksiyon nga magbase sa bag-o ug sensitibo nga mga isyu
Gikugihan ni Brother Jones sa pag-andam ang adlawng Biyernes sa wala pa ang kinatibuk-ang komperensiya sa kataposan sa semana ang pagtudlo sa Kurso sa Kasulatan nga leksiyon alang sa moabot nga Lunes. Sa iyang katingala, nadungog niya ang propeta nga mipahibalo nga usa ka bag-ong templo ang itukod sa dapit diin siya nagtudlo. Nasayod siya nga moadto ang mga estudyante sa klase nga mahinamong maghisgot mahitungod sa templo ug daghan ang adunay mga pangutana bahin niini.
Gibati ni Brother Jones ang pag-aghat sa Espiritu Santo nga usabon ang iyang giya sa gipaspason nga itudlo ang usa sa mga leksiyon sa Pagpangandam alang sa Templo gikan sa Pagpangandam sa Kinabuhi nga seksiyon sa kurikulom inig ka Lunes kay sa leksiyon diha sa Kurso sa Kasulatan.
Brother Reyes—Pagpahiangay sa unsay anaa sa kurikulom nga kalihokan base sa mga abilidad sa mga estudyante
Samtang nagtuon sa leksiyon, namatikdan ni Brother Reyes nga ang leksiyon nag-agad kaayo sa usa ka han-ay sa diskusyon alang sa mga estudyante. Naobserbahan ni Brother Reyes nga ang iyang mga estudyante sa kasagaran hilom kaayo ug dili kaayo moapil sa mga diskusyon. Hinoon, sila, malingaw kaayong magsulat sa ilang mga journal. Imbis mohatag og diskusyon, mihukom siya nga mosulat og duha ka pangutana gikan sa kurikulom diha sa pisara ug modapit sa mga estudyante sa pagsulat sa ilang mga tubag. Giplanohan niya nga ipakigbahin sa andam nga mga estudyante ang unsay ilang gisulat.
Sister Rodriguez—Pagpahiangay sa leksiyon base sa lokal nga kultura
Si Sister Rodriguez nangandam sa pagtudlo og leksiyon nga naglakip og mga pakisayran sa kasulatan mahitungod ni Maria, ang Inahan ni Jesus. Dunay kultura sa lig-ong mga pagbati ug lainlaing mga gituohan mahitungod ni Maria sa gipuy-an ni Sister Rodriguez. Daghan gani ang nagsimba ni Maria tungod sa iyang tahas isip ang inahan ni Jesukristo. Samtang gitun-an niya ang leksiyon gikan sa kurikulom, si Sister Rodriguez nangita og tukma nga dapit aron matabangan ang mga estudyante nga makasabot kon unsa ang gitudlo sa mga kasulatan ug sa mga lider sa Simbahan mahitungod ni Maria. Mihukom siya sa pagpahiangay sa leksiyon pinaagi sa pagdugang sa mosunod nga duha ka pangutana sa unsay nalakip diha sa kurikulom:
“Unsay gikatabang sa Alma 7:10 kanato sa pagsabot mahitungod ni Maria? Samtang kita nagtahod ug naghigugma ni Maria ug sa ubang matinud-anong mga disipulo diha sa kasulatan, giunsa sa Alma 7:11–13 sa pagtabang kanato nga makasabot ngano nga kita nagsimba lamang sa Langitnong Amahan ug ni Jesukristo?”
Sister Dube—Pagpahiangay sa unsay anaa sa kurikulom base sa anaa nga mga kapanguhaan
Samtang nangandam si Sister Dube og usa ka leksiyon, nakabantay siya nga ang usa ka mga pagdapit mao ang pagpasiksik sa mga estudyante sa ilang mga katigulangan gamit ang FamilySearch.org. Nasayod siya nga kadaghanan sa iyang mga estudyante walay akses sa internet. Maalamon niyang gipahiangay ang pagdapit nga sugdan sa mga estudyante sa pagsulat ang family group sheet sa usa ka papel ug sa pagpakigsulti sa temple and family history consultant sa ilang ward aron makat-on kon unsaon nila sa pagsiksik og laing mga ngalan sa pamilya.
Sister Schmidt—Pagpahiangay sa usa ka leksiyon aron makagamit sa mas bag-ong mga pamahayag gikan sa mga lider sa Simbahan
Atol sa iyang pag-andam sa leksiyon, si Sister Schmidt nagbasa og usa ka leksiyon nga iyang itudlo sa mosunod nga adlaw. Samtang nagbasa sa usa ka pamahayag sa leksiyon gikan sa usa ka lider sa Simbahan, nahinumdoman niya ang mas bag-ong pamahayag nga pwedeng makahatag og parehas nga katuyoan. Bag-o lang niyang natun-an ang pakigpulong atol sa iyang personal nga pagtuon, ug lab-as pa kini sa iyang hunahuna. Mihukom siyang gamiton ang mas bag-ong pamahayag sa iyang leksiyon imbis ang pamahayag nga naa sa kurikulom.
Brother Li—Pag-usab aron ipahiangay ang usa ka kalihokan sa pagkat-on nga anaa sa kurikulom aron mas matuman ang katuyoan
Samtang si Brother Li nangandam sa pagtudlo sa leksiyon gikan sa kurikulom, nagbasa siya og usa ka sugyot nga magdala og bola sa soccer ngadto sa klase. Nabantayan niya nga ang katuyoan sa pagpakita og butang sa pagtudlo sa usa ka leksiyon mao ang pagtabang nga makita sa mga estudyante nga ang kantidad sa bola sa soccer maimpluwensyahan pinaagi sa dugang nga kahibalo bahin sa kasaysayan niini.
Gusto nga matuman kini nga katuyoan sa labing epektibo nga paagi alang sa iyang mga estudyante, namalandong siya sa makadiyot kon unsa nga aytem ang iyang madala sa klase nga labing mohaom sa kasinatian sa mga estudyante. Nakahukom siya nga iyang ipahiangay ang leksiyon pinaagi sa pagdala og usa ka yano nga kwentas ngadto sa klase. Human mopakigbahin ang mga estudyante kon pila sa ilang hunahuna ang kantidad sa kwentas, iyang ipakigbahin kon kinsa ang naghimo sa kwentas ug nganong ang pagkahibalo sa kasaysayan niini nakapahimo niini nga labing bililhon ngadto kaniya kaysa wala mahibaloi ang kasaysayan niini.
Mga Sugyot alang sa Pagsagop ug Pagpahiangay
Samtang ang bisan unsang naa nga materyal sa kurikulom mahimo rang ipahiangay, ang mosunod nga dayagram naghulagway og mga butang kon sa unsang paagi ang managlahing mga bahin sa leksiyon tingali mas tukma nga ipahiangay kay sa uban.
Sama pananglit, ang katuyoan sa leksiyon, ang konteksto sa gisaysay, o ang gihatagan og gibug-aton nga kamatuoran, tingali dili kaayo tukmang ipahiangay sa unsay naa sa leksiyon kay sa giunsa sa pagsugod ang leksiyon o kon unsay mga sanglitanan nga tingali ipakigbahin sa magtutudlo gipabaga og type nga kamatuoran. Ang mga aytem nga mas duol sa wala nga bahin tingali mas kanunay nga sagopon, samtang ang mga aytem nga naa sa tuo nga bahin tingali mas kanunay nga ipahiangay. Isulod sa hunahuna nga kini mga sugyot. Ang mga magtutudlo wala laomi nga mopahiangay sa tanan nga naa sa tuo nga bahin, sama ra nga wala sila laomi nga mosagop sa tanang butang sa naa sa wala nga bahin.
Imahe
Unsaon sa usa ka Magtutudlo sa Pagpahiangay sa grapika [graphic] nga Kurikulom
Panapos
Ang Langitnong Amahan mogiya kanimo pinaagi sa Espiritu Santo samtang mainampoon ka nga magtuon sa Iyang pulong ug mag-andam og mga leksiyon sa pagpanalangin sa Iyang mga anak. Makatabang siya kanimo sa pagsabot unsaon pagsagop ang unsay anaa sa kurikulom ug kanus-a maghimo og mga pagpahiangay aron mas matabangan ang imong mga estudyante.