batan-ong mga babaye nga nagtuon sa mga kasulatan

Pagbansay alang sa mga Leksiyon sa Pagpangandam sa Kinabuhi

Kinatibuk-ang Pagpasabot

Human sa pagpasalamat sa mga magtutudlo alang sa ilang mga paningkamot sa pagpanalangin sa kabatan-onan, si Presidente Henry B. Eyring sa Unang Kapangulohan miingon, “Apan ang [atong mga estudyante] nagkinahanglan og daghan pa. Daghan kaayo nga migradwar sa seminary ang dili kwalipikado nga magmisyon. Daghan kaayo sa atong matinud-anon nga mga estudyante nga wala gayod makadawat sa mga panalangin sa mga ordinansa sa templo. Ang proporsiyon niadto nga mga trahedya taliwala nila modaghan kon dili kita mag-usab” (“We Must Raise Our Sights” [CES Conference, Aug. 14, 2001], Gospel Library).

Sobra na sa 20 ka tuig sukad nga si Presidente Eyring mihatag niana nga pamahayag. Ang atong kabatan-onan nag-atubang og mas dagko nga mga hagit ug oposisyon—dili lang sa ilang pagtuo apan sa ubang mga aspeto sa ilang kinabuhi usab. Ang mga leksiyon sa Pagpangandam sa Kinabuhi gidesinyo aron matubag ang mga panginahanglan sa kabatan-onan niini nga henerasyon. Kini nga mga leksiyon sa Pagpangandam sa Kinabuhi makahatag sa mga estudyante og mga oportunidad sa paggamit sa mga pagtulon-an sa Manluluwas aron:

• Sa pagdumala sa lisod nga mga pangutana ug sa mahagiton nga mga kahimtang sa kinabuhi.

• Sa pag-ugmad og pagbarog pinaagi sa kinaugalingong paningkamot sa pagsangkap sa kaugalingon ug sa pamilya.

• Mahimong mas himsog sa pisikal ug sa emosyonal nga paagi.

• Sa pagpalambo og mga kahanas aron magmalamposon sa pag-eskwela.

• Sa paghimo og mga plano aron sa pagpangandam alang sa umaabot nga edukasyon ug pagpanarbaho.

• Sa pagpangandam alang sa pagserbisyo sa misyon ug sa Simbahan.

• Sa pagpangandam sa paghimo ug sa pagtuman sa mga pakigsaad sa templo.

Kini nga mga leksiyon makatabang nga matubag ang mga hagit nga giatubang sa kabatan-onan diha sa paagi nga nakasentro sa Simbahan, nakabase sa kasulatan, ug nakatutok sa tigkat-on nga gigiyahan sa Espiritu. Kauban sa mga leksiyon sa Kurso sa Kasulatan, ang mga leksiyon sa Pagpangandam sa Kinabuhi makatabang sa pagpalig-on sa pagkakabig sa mga estudyante ngadto ni Jesukristo ug sa Iyang gipahiuli nga ebanghelyo.

Mga Leksiyon sa Pagpangandam sa Kinabuhi ug ang Tumong

Niini nga pagbansay, ikaw adunay oportunidad sa pagsuhid kon sa unsang paagi nga ang mga leksiyon sa Pagpangandam sa Kinabuhi gidesinyo aron matuman ang tumong sa S&I, sama sa mga leksiyon sa Kurso sa Kasulatan. Matag leksiyon sa Pagpangandam sa Kinabuhi gisulat sumala sa mosunod nga mga sumbanan diha sa “Pagtudlo” nga parapo sa tumong sa S&I:

Kita mosentro sa matag kasinatian sa pagkat-on diha ni Jesukristo ug sa Iyang ehemplo, mga hiyas, ug makatubos nga gahom. Kita motabang sa mga estudyante nga makat-on sa gipahiuli nga ebanghelyo ni Jesukristo sama sa makita diha sa mga kasulatan ug sa mga pulong sa mga propeta. Kita motabang sa mga estudyante sa ilang tahas diha sa proseso sa pagkat-on alang sa ilang kaugalingon. Kita maningkamot sa pagdapit sa Espiritu Santo aron sa pagtuman sa Iyang tahas diha sa matag kasinatian sa pagkat-on.

Ang mga Leksiyon sa Pagpangandam sa Kinabuhi Motabang nga Matuman ang Tumong sa S&I

Ipasabot

Samtang mag-andam ka sa mga leksiyon, lakip na sa mga leksiyon sa Pagpangandam sa Kinabuhi, mahimong makatabang nga mangita kon sa unsang paagi nga ang leksiyon nagtuman sa matag usa sa mga kapahayag gikan sa “Pagtudlo” nga parapo sa tumong.

Modelo

Sa ubos mao ang duha ka pinili gikan sa mga leksiyon sa Pagpangandam sa Kinabuhi alang sa 2025. Ang una mao ang leksiyon sa Pisikal ug Emosyonal nga Kahimsog nga giulohan og “Pagpalambo og mga Sundanan sa Himsog nga Paghunahuna.” Ang ikaduha mao ang leksiyon sa Pagmalamposon sa Pag-eskwela nga giulohan og “Pagdiskobre sa Imong mga Kalig-on ug mga Abilidad.” Tan-awa kon sa unsang paagi nga kini nga mga kalihokan sa pagkat-on, nga nagtutok sa managlahi gayod nga mga hilisgotan, gidesinyo aron matuman ang tumong sa S&I.

Leksiyon 186: Pagpalambo og mga Sundanan sa Himsog nga Paghunahuna

Nakasentro ni Kristo: Ania ang pipila ka ehemplo gikan niini nga leksiyon nga makatabang nga isentro ang kasinatian sa pagkat-on diha ni Jesukristo. Bantayi kon giunsa dinhi niini nga mga sitwasyon, nga ang mga estudyante gihangyo sa pagpangayo og tabang sa Manluluwas ug sa pagkat-on gikan sa Iyang ehemplo ug mga pagtulon-an.

• Mahimo ka nga mopakigbahin diha sa mga estudyante nga ilang praktison ang pagdapit sa tabang sa Manluluwas aron makorehian ang dili tukma o dili himsog nga mga hunahuna.

• Unsa kaha ang ipasabot sa pagtan-aw ngadto sa Manluluwas sa atong mga hunahuna? (Ang pipila ka ehemplo naglakip sa mosunod: pagpamalandong kon unsa kaha ang buhaton sa Manluluwas sa mga sitwasyon nga atong giatubang, mangita kon unsaon nga ang Iyang mga pagtulon-an magamit sa sitwasyon, ug paghinumdom sa Iyang gugma.)

Nakabase sa kasulatan: Ania ang pipila ka ehemplo gikan niini nga leksiyon nga makatabang sa mga estudyante sa pagkat-on gikan sa mga kasulatan ug sa mga pulong sa mga propeta. Bantayi nga ang mga estudyante gihatagan og mga oportunidad sa pagtuon sa mga kasulatan ug nga ang mga pulong ni Presidente Russell M. Nelson makatabang sa mga estudyante nga masabtan kini nga kasulatan.

• Basaha ang Doktrina ug mga Pakigsaad 6:36, mangita sa unsay gidapit sa Ginoo nga atong buhaton.

• Namulong mahitungod niini nga kasulatan, si Presidente Nelson mitudlo: “Kinahanglang lig-on kitang nakatutok sa Manluluwas ug sa Iyang ebanghelyo. Nagkinahanglan og grabeng paningkamot sa pangisip nga motan-aw Kaniya sa matag hunahuna. Apan kon atong buhaton, ang atong mga pagduha-duha ug mga kahadlok mahanaw” (Russell M. Nelson, “Pagdawat sa Gahom ni Jesukristo diha sa Atong mga Kinabuhi,” Liahona, Mayo 2017, 40).

Nakatutok sa tigkat-on: Ania ang pipila ka ehemplo gikan niini nga leksiyon nga makatabang sa mga estudyante nga matuman ang ilang tahas sa pagkat-on alang sa ilang kaugalingon. Bantayi nga ang mga estudyante gidapit sa pag-ila sa ilang kaugalingong mga panginahanglan aron sa pagdasig nila nga moapil sa kasinatian sa pagkat-on. Ang mga estudyante gidapit usab sa pagpakigbahin sa ilang kaugalingong, talagsaon nga mga hunahuna ug mga ideya.

• Dapita ang mga estudyante sa pagpamalandong kon unsa ka sagad nga ilang mabantayan ang ilang kaugalingong mga sundanan sa paghunahuna ug kon kadto nga mga sundanan makatabang o tukma ba.

• Unsay nakapadayeg kanimo sa pamahayag ni Presidente Nelson?

Gigiyahan sa Espiritu: Ania ang ehemplo sa usa ka paagi nga ang leksiyon makadapit sa Espiritu Santo sa pagtuman sa Iyang tahas diha sa kasinatian sa pagkat-on. Ang mga magtutudlo giawhag nga planohon og maayo ang mahitungod sa pagdapit sa mga estudyante nga magtinguha sa giya gikan sa Espiritu Santo. Ang mga pagdapit sama niini makatabang sa mga estudyante sa ilang mga paningkamot nga makadawat og inspirasyon gikan sa Espiritu Santo diha sa ilang pagkat-on.

• Dapita ang mga estudyante sa pagtinguha og giya gikan sa Espiritu Santo aron mas masabtan ang ilang kaugalingong mga sundanan sa panghunahuna, ilabi na kon motubag sa mahagiton nga mga sitwasyon.

Leksiyon 193: Pagdiskobre sa Imong mga Kalig-on ug mga Abilidad

Nakasentro ni Kristo: Ania ang pipila ka ehemplo gikan niini nga leksiyon nga makatabang nga isentro ang kasinatian sa pagkat-on diha ni Jesukristo. Bantayi kon sa usang paagi nga ang pinabaga nga pagkasulat nga mga kamatuoran dinhi niini nga leksiyon konektado ngadto ni Kristo ug dapita ang mga estudyante nga modangop ngadto Kaniya alang sa tabang. Ang mga estudyante gipahinumdoman usab sa ilang balaanong pagkatawo ug ang mga kalig-on ug mga abilidad nga anaa kanila mga timailhan sa gugma ug kaluoy sa Dios.

• Ang mga estudyante moila og mga kamatuoran nga susama sa mosunod: Ang Ginoo wala magtan-aw sa panagway sa gawas apan sa kasingkasing (tan-awa sa 1 Samuel 16:7). Kita makahimo sa tanan pinaagi ni Jesukristo, nga makalig-on kanato (tan-awa sa Mga Taga-Filipos 4:13; Alma 26:12). Ang bili sa mga kalag mahinungdanon sa panan-aw sa Dios (tan-awa sa Doktrina ug mga Pakigsaad 18:10).

• Pahinumdomi ang mga estudyante nga isip mga anak sa Dios nga gilalang sa Iyang panagway, matag usa nato gipanalanginan og lainlaing mga kalig-on ug mga abilidad. Tingali adunay mga estudyante nga naglisod sa pag-ila sa mga kalig-on ug mga abilidad nga gipanalangin sa Dios kanila.

Nakabase sa kasulatan: Ania ang pipila ka ehemplo gikan niini nga leksiyon nga makatabang sa mga estudyante sa pagkat-on gikan sa mga kasulatan ug sa mga pulong sa mga propeta. Bantayi nga ang mga kasulatan nga tun-an sa mga estudyante gipili og tuyo aron ang mga estudyante modangop ngadto ni Jesukristo alang sa Iyang tabang. Dayon ang mga estudyante adunay oportunidad sa pagtuon sa tambag gikan sa usa ka Apostol kon unsaon nga madiskobre ang pipila sa ilang hinatag sa Dios nga mga gasa.

• Tun-i ang pipila sa mosunod nga mga tudling, nga mangita sa mahangtoron nga mga kamatuoran nga makatabang nato sa pag-ila sa atong abilidad nga makab-ot ang atong potensiyal pinaagi ni Jesukristo. 1 Samuel 16:7; Mga Taga-Filipos 4:13; Jacob 4:7; Alma 26:12; Doktrina ug mga Pakigsaad 18:10.

• Si Elder Ronald A. Rasband sa Korum sa Napulog Duha ka Apostoles mipakigbahin og pipila ka paagi nga kita makaila sa mga talento, mga kalig-on, ug mga abilidad nga gipanalangin sa Langitnong Amahan kanato: “Ang mga talento nga gihatag sa Dios kanato una mahimong klaro diha sa mga pangandoy nga atong gitinguha. Kon kamo naghunahuna mahitungod sa inyong mga talento, ilista ang mga butang nga gusto ninyong buhaton. Ilakip ang tanang kalihokan nga nalingaw kamo gikan sa lainlaing mga aspeto sa inyong kinabuhi—espirituwal, musika, drama, akademiko, dula, ug uban pa. Tun-i ug pamalandongi ang inyong patriyarkal nga panalangin alang sa mga ideya ug inspirasyon. Mokonsulta sa mga sakop sa pamilya, kasaligan nga mga higala, mga magtutudlo, ug mga lider; ang laing tawo sa kasagaran mao ang makakita kanato sa unsay dili nato makita sa atong kaugalingon” (Ronald A. Rasband, “Parables of Jesus: The Parable of the Talents,” Ensign, Aug. 2003, 34).

Nakatutok sa tigkat-on: Ania ang pipila ka ehemplo gikan niini nga leksiyon nga makatabang sa mga estudyante nga matuman ang ilang tahas sa pagkat-on alang sa ilang kaugalingon. Bantayi kon sa unsang paagi nga kini nga mga kalihokan makatabang sa mga estudyante sa paghunahuna sa ilang kaugalingon nga mga kasinatian ug mga kahimtang. Gituyo kini aron matabangan ang mga estudyante nga mobati og kadasig nga igahin ang ilang mga kasingkasing ug mga hunahuna ngadto sa kasinatian sa pagkat-on aron matubag ang mga panginahanglan nga anaa nila sa pagkakaron. Ang mga estudyante adunay oportunidad usab sa paghunahuna mahitungod sa tinuod nga mga hagit nga ilang giatubang ug kon sa unsang paagi ang mga kamatuoran nga ilang nakaplagan diha sa mga kasulatan makatabang nila.

• Hunahunaa ang mahitungod sa mga responsibilidad o trabaho nga ganahan nimong ipadayon sa umaabot. Sulayi usab ang pag-ila sa mga kahanas ug mga abilidad nga gikinahanglan pa gihapon nimong palamboon nga makatabang nimo nga mas maandam alang sa umaabot.

• Sa unsang paagi nga kini nga mga kamatuoran makatabang nato kon kita mobati og kawalay kadasig mahitungod sa atong mga abilidad?

Gigiyahan sa Espiritu: Ania ang ehemplo sa usa ka paagi nga ang leksiyon makadapit sa Espiritu Santo sa pagtuman sa Iyang tahas diha sa kasinatian sa pagkat-on. Bantayi nga ang mga estudyante gidapit sa pagtinguha og inspirasyon gikan sa Espiritu Santo aron mas klaro nga makakita sa ilang mga panginahanglan sa pagkakaron ug sa sunod nga mga lakang aron mahimong mas maandam alang sa kinabuhi.

• Samtang magtuon ka karon, tinguhaa ang giya sa Langitnong Amahan pinaagi sa Espiritu Santo aron matabangan ka sa pag-ila sa mga kalig-on ug mga kahanas nga anaa na nimo nga moandam nimo alang niini nga mga responsibilidad.

Pagpraktis

Pag-ila og leksiyon sa Pagpangandam sa Kinabuhi nga imong itudlo sa dili madugay, base sa imong lokal nga giya sa gipaspason. Rebyoha kini nga leksiyon nga mangita sa mga tubag sa mosunod nga mga pangutana:

• Sa unsang paagi nga ang kasinatian sa pagkat-on nakasentro diha ni Jesukristo?

• Sa unsang paagi nga ang leksiyon makatabang sa mga estudyante sa pagkat-on sa ebanghelyo ni Jesukristo sama sa makita diha sa mga kasulatan ug sa mga pulong sa mga propeta?

• Sa unsang paagi nga ang leksiyon makatabang sa mga estudyante sa ilang tahas sa pagkat-on alang sa ilang kaugalingon?

• Sa unsang paagi nga ang leksiyon makatabang sa pagdapit sa Espiritu Santo sa pagtuman sa Iyang tahas diha sa kasinatian sa pagkat-on?

Klaro nga Pagpahibalo sa Eskedyul sa Leksiyon

Tingali makalibog sa mga estudyante nga adunay leksiyon sa Kurso sa Kasulatan sa usa ka adlaw ug unya usa ka leksiyon sa Pagpangandam sa Kinabuhi sa sunod adlaw. Kon ang mga estudyante hatagan og mas halapad nga panglantaw kon unsay ilang tun-an nianang semanaha, makatabang kini nila nga mas makaandam sa pagkat-on. Ang mosunod nga mga kahanas mao ang pipila ka paagi nga mahimo nimo kini. Kon nakabantay ka nga ang imong mga estudyante naglibog kon mobalhin ka tali sa lainlaing mga matang sa mga leksiyon, mahimo nimong sulayan ang usa o mas daghan pa niini nga mga sugyot o usa ka butang nga imong gihunahuna sa imong kaugalingon. Kini nga pagbansay motabang nimo nga:

• Klaro nga ipahibalo unsay itudlo nianang semanaha ug ngano.

• Klaro nga ipahibalo nianang semanaha kon mobalhin og leksiyon o hilisgotan gikan sa mga leksiyon sa Kurso sa Kasulatan ngadto sa mga leksiyon sa Pagpangandam sa Kinabuhi.

Klaro nga Ipahibalo Unsay Itudlo Nianang Semanaha ug Ngano

Ipasabot

Sa pagsugod sa matag semana, mahimo nimong pahibaloon ang mga estudyante sa mga leksiyon ug mga hilisgotan alang sa matag adlaw niana nga semana. Kon ang mga estudyante makasabot sa direksiyon alang niana nga semana ug sa mga katuyoan sa leksiyon, mas makaandam sila sa pag-apil sa kasinatian sa pagkat-on. Usa ka paagi nga imong mapahibalo kon unsa ang itudlo nianang semanaha mao ang pagpakita sa ulohan sa matag usa sa mga leksiyon nianang semanaha, nga adunay mubo nga pagpasabot sa unsay malaoman nga makat-onan sa mga estudyante niadto nga mga leksiyon.

Modelo

Class, naghinamhinam ko sa atong umaabot nga mga leksiyon karong semanaha. [Ang magtutudlo nagpakita og grapika uban sa mosunod nga tsart]

Lunes	Doktrina ug mga Pakigsaad 3
Martes	Doktrina ug mga Pakigsaad 4
Miyerkoles	Doktrina ug mga Pakigsaad 5
Huwebes	Leksiyon sa Pagsukod sa Imong Nakat-onan
Biyernes	Pagdumala sa Kaugtas ug Kabalaka

Karong semanaha sa Lunes hangtod sa Miyerkoles atong tun-an ang mga seksiyon 3–5 sa Doktrina ug mga Pakigsaad. Mao kini ang makaugtas nga mga panahon alang ni Propeta Joseph Smith igon nga siya nagsagubang og lisod kaayo nga mga pagsulay. Gikan niini nga mga seksiyon, atong makat-onan ang importante nga mga kamatuoran nga gipadayag sa Dios nga makatabang nato nga modangop ngadto ni Jesukristo ug lig-ong mobarog atol sa makaugtas nga mga panahon. Sa Huwebes, kamo adunay higayon sa pagpamalandong sa unsay inyong nakat-onan diha sa leksiyon sa Pagsukod sa Imong Nakat-onan. Sa Biyernes, atong hisgotan kon unsaon sa pagdumala sa kaugtas ug kabalaka pinaagi sa tabang ug kalig-on sa Langitnong Amahan ug ni Jesukristo.

Pagpraktis

Tan-awa ang imong giya sa gipaspason ug kinatibuk-ang pagpasabot sa sunod semana. Isulat kon unsay mahimo nimong buhaton aron klaro nga ipahibalo unsay itudlo atol sa semana.

Klaro nga Ipahibalo atol sa Semana Kon Mobalhin og Leksiyon o Hilisgotan gikan sa mga Leksiyon sa Kurso sa Kasulatan ngadto sa mga Leksiyon sa Pagpangandam sa Kinabuhi

Ipasabot

Kon mobalhin gikan sa mga leksiyon sa Kurso sa Kasulatan ngadto sa mga leksiyon sa Pagpangandam sa Kinabuhi, mahimo nimong sultihan ang mga estudyante sa hilisgotan ug katuyoan sa leksiyon nianang adlawa. Tingali makatabang ang pagpakigbahin kon sa unsang paagi nga ang leksiyon ug ang sulod susama o lahi kaysa miaging klase. Dili kinahanglan nga buhaton kini kanunay, apan usahay makatabang kini sa mga estudyante aron masabtan ang katuyoan ug direksiyon.

Modelo

Sa ubos makita nimo ang modelo diin ang mga katuyoan sa Kurso sa Kasulatan ug ang leksiyon sa Pagpangandam sa Kinabuhi mas nagtukma ug ang usa diin wala kini nagtukma.

1. Karong semanaha, nagkat-on kita mahitungod sa pipila ka makaugtas nga mga sitwasyon nga giatubang ni Propeta Joseph. Nakahinumdom ba kamo kon unsa ang pipila niini? [Estudyante motubag] Karon mobalhin kita gikan sa pagtuon niini nga mga asoy diha sa Doktrina ug mga Pakigsaad ngadto sa pagtuon sa mga kasulatan ug sa mga pulong sa mga lider sa Simbahan aron matabangan kamo nga makakaplag og kalig-on gikan sa Langitnong Amahan ug ni Jesukristo sa pag-atubang sa inyong kaugalingong makaugtas nga mga sitwasyon.

2. Samtang nagtuon kita niini nga mga asoy diha sa Doktrina ug mga Pakigsaad, atong nakat-onan kon unsaon nga kita makadawat og kalig-on gikan sa Ginoo sa pag-atubang sa makaugtas nga mga sitwasyon. Karon mobalhin kita ngadto sa pagkat-on kon sa unsang paagi nga kita makadawat og kalig-on gikan sa Ginoo aron mahimo ug magpabilin nga takos nga mosulod ug mosimba Kaniya diha sa Iyang templo.

Pagpraktis

Tan-awa ang kurikulom sa gipaspason karong semanaha. Isulat ang paagi sa klaro nga pagpahibalo kon unsay tutokan sa klase sa matag adlaw.

Mga Pasidaan

Ang mga leksiyon sa Pagpangandam sa Kinabuhi naghatag og mga oportunidad alang sa mga estudyante sa pagkat-on kon sa unsang paagi nga ang Langitnong Amahan ug si Jesukristo makatabang nila sa pagdumala sa mga hagit sa mortalidad. Sa imong pagtudlo niini nga mga leksiyon, bantayi ang mosunod nga mga pasidaan:

Matag Kasinatian sa Pagkat-on Kinahanglan nga Nakasentro ni Kristo, Gibase sa Kasulatan, ug Nakatutok sa Tigkat-on

Ang matag kasinatian sa pagkat-on sa seminary kinahanglan nga makatabang nga matuman ang Tumong sa Seminaries and Institutes of Religion. Kini nagpasabot nga kanunay kini nga nakasentro ni Kristo, nakatutok sa tigkat-on, gibase sa kasulatan, ug gigiyahan sa Espiritu. Ang mga leksiyon sa Pagpangandam sa Kinabuhi dali ra nga mawala sa balanse. Pananglitan, ang magtutudlo mahimong adunay daghan kaayo og kasinatian sa usa sa mga hilisgotan ug modesisyon nga motutok og maayo diha sa paghimo sa kasinatian nga nakatutok lang sa tigkat-on, naghatag og gibug-aton sa daghang kahanas ug mga estratehiya kon unsaon sa pagtubag sa mga panginahanglan sa mga estudyante. Apan, sa proseso, dali ra nga malaktawan sa magtutudlo ang panginahanglan sa pagkonektar sa mga estudyante ngadto ni Kristo ug sa pagtudlo nila gikan sa mga pulong sa mga kasulatan ug sa mga propeta.

Sitwasyon nga Pagatun-an: Si Sister Jones daghan kaayo og kasinatian sa pagplano sa pinansiyal. Si Sister Jones nakadesisyon sa pagtudlo sa iyang mga estudyante og daghang kahanas mahitungod sa pagplano sa pinansiyal sa paagi nga nakatutok lang gayod sa tigkat-on.

Unsa ang pipila sa potensiyal nga mga sangpotanan ni Sister Jones sa pagtudlo sa leksiyon niini nga paagi?

Ibalanse ang Gidaghanon sa mga Leksiyon sa Pagpangandam sa Kinabuhi sama sa Gilatid diha sa Kurikulom

Tingali adunay pipila ka matang o hilisgotan sa leksiyon nga gustong gahinan sa mga magtutudlo og mas dako o mas gamay nga oras sa klase kaysa uban. Hunahunaa nga daghang tawo, lakip na niadtong gikan sa laing mga departamento sa Simbahan, ang nakigtinambagay aron sa pagtino sa gidaghanon sa mga leksiyon sa matag kategoriya. Bisan ang hilisgotan nga murag dili kaayo makapainteresado sa magtutudlo mahimong bililhon kaayo sa piho nga mga estudyante. Ang paggahin og mas dako nga oras sa klase sa pipila ka leksiyon kaysa gilatid diha sa kurikulom mosangpot ngadto sa dili paghatag og gibug-aton sa ubang importante nga mga resulta sa pagkat-on. Ang “Pagbansay alang sa Paghimo og Giya sa Gipaspason” nagrekomendar nga kasagaran kinahanglang adunay mas daghang leksiyon sa Kurso sa Kasulatan kaysa mga leksiyon sa Pagpangandam sa Kinabuhi diha sa imong giya sa gipaspason. Ang gidaghanon sa mga leksiyon alang sa matag kategoriya sa Pagpangandam sa Kinabuhi nagpakita usab sa gisugyot nga pagbalanse. Sunda kini nga mga lagda nga adunay diyotay ra kaayo nga mga eksepsiyon.

Sitwasyon nga Pagatun-an: Si Brother Hendricks naghinamhinam nga sa kataposan aduna nay gipaninguha og maayo nga mga paningkamot diha sa seminary sa pag-andam sa kabatan-onan alang sa mga misyon. Imbes magtudlo og lima lang ka leksiyon bahin sa pagpangandam sa misyon, migahin siya og duha ka semana sa pagtudlo niini nga mga leksiyon ingon man sa pipila nga iyang gihimo mismo.

Unsa ang pipila sa potensiyal nga mga sangpotanan sa pamaagi ni Brother Hendricks sa pagtudlo sa mga leksiyon sa pagpangandam sa misyonaryo?

Gamiton ang Kurikulom Bisan Unsa Pa ang Imong Lebel sa Kasinatian

Susama sa gidaghanon sa mga leksiyon, ang matag katuyoan sa leksiyon gitino usab pinaagi sa pakigtambayayong sa daghang tawo, lakip na sa mga sakop sa laing mga departamento sa Simbahan. Kini nga mga departamento kasagaran nagsalig sa pagsiksik nga nakompleto pinaagi sa Correlation Research Division sa Simbahan sa mga kasayoran nga ilang gisangkap. Bahin sa tanang leksiyon sa kurikulom sa S&I, ang Correlation Department sa Simbahan mainampingon nga mirebyo sa mga leksiyon sa Pagpangandam sa Kinabuhi alang sa katukma ug kaangay sa doktrina. Ang mga leksiyon gidesinyo nga yano ang pamaagi sa hilisgotan nga ilang hisgotan, dili komprehensibo nga kurso sa hisgotanan. Kon sinati ka sa hilisgotan, mabati nimo nga ang importante nga mga ideya wala maapil. Magmatngon gayod mahitungod sa pagdugang og butang nga wala na maapil. Bisan unsa pa kadaghan o kagamay sa imong kasinatian sa gihatag nga hilisgotan, gamita ang kurikulom isip pundasyon alang sa kasinatian sa pagkat-on nga imong ihatag. Sugdi pinaagi sa paghangop sa leksiyon sa dili pa mohimo og deisiyon kon unsay ipahiangay. Alang sa dugang pa bahin niini, tan-awa sa “Pagbansay alang sa Pagsagop ug Pagpahiangay sa Kurikulom sa Seminary” nga makita diha sa Pagbansay alang sa Kurikulom sa Seminary.

Sitwasyon nga Pagatun-an: Si Sister Benson usa ka lisensiyado nga clinical social worker. Sa kasamtangan nakita niya ang dakong kalamposan gamit ang bag-ong pamaagi sa pagtabang sa iyang mga kliyente bahin sa pagkaadik. Nakadesisyon siya sa pagtudlo sa iyang mga estudyante og mga kahanas nga may kalabotan niining bag-ong pamaagi imbes bahin sa usa sa mga leksiyon sa emosyonal nga kahimsog.

Unsa ang pipila sa potensiyal nga mga sangpotanan sa pamaagi ni Sister Benson sa mga leksiyon sa emosyonal nga kahimsog?

Hinumdomi ang Imong Tahas isip Magtutudlo

Samtang magtudlo ka sa mga leksiyon sa Pagpangandam sa Kinabuhi, hinumdomi ang imong tahas isip magtutudlo sa seminary. Ang mga estudyante mahimong mopakigbahin nimo og mahagiton nga mga sitwasyon nga ilang giatubang. Ang imong tahas mao ang pagpaduol nila ngadto sa ilang mga ginikanan ug sa mga lider sa pagkapari, nga makagiya nila sa tabang nga ilang gikinahanglan. Alang sa tabang sa mga sitwasyon nga may kalabotan sa pag-abuso, palihog tan-awa sa “Abuse” diha sa Seminaries and Institutes Emergency Response Guide.

Sitwasyon nga Pagatun-an: Nahibaloan ni Sister Benson nga human sa pagtudlo sa iyang mga leksiyon, daghang estudyante ang magpabilin human sa klase. Gusto sila nga mopakigbahin ngadto niya og pipila ka personal kaayo nga mga detalye sa ilang mga kinabuhi. Siya nakigkita nila sa tinagsa-tagsa sa iyang opisina human sa klase ug human sa eskwela.

Unsa kaha ang pipila ka potensiyal nga sangpotanan sa pagpakighinabi ni Sister Benson sa iyang mga estudyante?

Panapos

Sa tibuok kurso sa upat ka tuig sa seminary, ang mga estudyante adunay daghang oportunidad sa pagkat-on kon unsaon sa paggamit sa mga pagtulon-an sa Manluluwas ngadto sa nagkadaiya nga managlahing mga kahimtang ug mga sitwasyon. Ang mga kasinatian sa pagkat-on nga idugang sa mga leksiyon sa Pagpangandam sa Kinabuhi ngadto sa mga leksiyon sa Kurso sa Kasulatan mas moandam sa tibuok henerasyon sa pagtubag sa mga hagit sa kinabuhi pinaagi sa paghupot og kalig-on, mga pagtulon-an, ug ebanghelyo sa Manluluwas. Mas masangkapan sila aron maandam ang ilang mga kaugalingon, ilang mga pamilya, ug ang lain pa alang sa kinabuhing dayon uban sa ilang Amahan sa Langit.