“Leksiyon 193—Pagdiskobre sa Imong mga Kalig-on ug mga Abilidad: Pagpangandam para sa Karera ug Uban pang Umaabot nga mga Papel,” Manwal sa Magtutudlo sa Seminary sa Doktrina ug mga Pakigsaad (2025)
“Pagdiskobre sa Imong mga Kalig-on ug mga Abilidad,” Manwal sa Magtutudlo sa Seminary sa Doktrina ug mga Pakigsaad
Leksiyon 193: Pagpangandam alang sa Umaabot nga Edukasyon ug Pagpanarbaho
Pagdiskobre sa Imong mga Kalig-on ug mga Abilidad
Pagpangandam para sa Karera ug Uban pang Umaabot nga mga Papel
Samtang mangandam ang kabatan-onan para sa umaabot nga mga responsibilidad ug mga oportunidad sa pagpanarbaho, makatabang nila ang pag-ila sa mga kalig-on ug mga abilidad nga wala nila o kinahanglan nilang ugmaron. Ang atong Amahan sa Langit makagiya kanila aron madiskobrehan ang ilang mga kalig-on ug mga kahuyangan samtang ilang tinguhaon ang Iyang tabang. Kini nga leksiyon makatabang sa mga estudyante nga maandam para sa umaabot nga mga responsibilidad ug mga oportunidad sa pagpanarbaho pinaagi sa pag-ila sa kasamtangan nga mga kalig-on ug mga abilidad nga ilang gikinahanglan nga palamboon.
Posibleng mga Kalihokan sa Pagkat-on
Pahinumdom: Ang umaabot nga leksiyon nga giulohan og “Pag-ugmad og mga Kahanas ug mga Abilidad” magtutok sa pagtabang sa mga estudyante sa pag-ugmad og pipila ka kahanas ug abilidad nga ilang mailhan niini nga leksiyon. Kon ang imong eskedyul sa pagtudlo nagkinahanglan nga hiusahon ang mga leksiyon, epektibo tingali kon dunganon nimo kining duha ka leksiyon sa pagtudlo.
Mga kalig-on ug mga abilidad nga gikinahanglan aron molampos
Ikonsiderar ang pagsulat diha sa pisara sa lainlaing papel nga mabatonan tingali sa mga estudyante sa umaabot, sama sa mosunod.
-
Estudyante
-
Aprentis
-
Ginikanan
-
Kapikas
-
Trabahante
Imbes iapil ang trabahante isip usa sa mga papel, pwede kang mahimong mas piho pinaagi sa pagdapit sa pipila ka estudyante nga ipakigbahin ang pipila sa umaabot nga mga karera nga nakapainteres nila ug isulat kini diha sa pisara.
Pwedeng hisgotan sa mga estudyante ang mosunod nga pangutana diha sa ginagmayng grupo. Ikonsiderar ang pag-asayn og usa sa mga responsibilidad sa kada grupo, o pwede nimong pahisgotan nila ang tanang papel.
-
Unsa ang pipila ka kahanas o abilidad ang makatabang sa usa ka tawo nga mahimong molampos niini nga mga papel?
Dapita ang matag grupo sa pagpakigbahin sa unsay ilang nahisgotan. Pwede nimong dapiton ang mga grupo nga mopaduol sa pisara ug isulat tapad sa nahiangayng papel ang pipila sa mga kahanas o mga abilidad nga ilang nailhan. Kon nagkinahanglan og tabang ang mga estudyante, ikonsiderar ang pagsugyot og pipila ka kahanas na nalista diha sa handout sa ulahing bahin sa leksiyon.
Human sa panaghisgot, ipakigbahin ang mosunod aron tabangan ang mga estudyante nga mangandam para sa nahibiling bahin sa leksiyon:
Hunahunaa ang mahitungod sa mga responsibilidad o mga oportunidad sa pagpanarbaho nga ganahan nimong ipadayon sa umaabot. Samtang magtuon ka karon, tinguhaa ang giya sa Langitnong Amahan pinaagi sa Espiritu Santo aron matabangan ka sa pag-ila sa mga kalig-on ug mga kahanas nga anaa na nimo nga moandam nimo alang niini nga mga responsibilidad. Sulayi usab ang pag-ila sa mga kahanas ug mga abilidad nga gikinahanglan pa gihapon nimong palamboon nga makatabang nimo nga mas maandam alang sa umaabot.
Ang atong potensyal pinaagi ni Jesukristo
Ipasabot nga pipila ka mga tawo mahimong mobati nga mawad-an og kadasig kon pangutan-on sila bahin sa ilang mga kahanas ug mga abilidad kay gibati nila nga dili sila parehas ka talentado o ka hanas kay sa uban. Adunay mahangtorong mga kamatuoran nga gitudlo diha sa mga kasulatan nga makatabang dihang mobati kita og sama niini.
Tun-i ang pipila sa mosunod nga mga tudling, nga mangita sa mahangtoron nga mga kamatuoran nga makatabang nato sa pag-ila sa atong abilidad aron makab-ot ang atong potensiyal pinaagi ni Jesukristo.
1 Samuel 16:7; Mga Taga-Filipos 4:13; Jacob 4:7; Alma 26:12; Doktrina ug mga Pakigsaad 18:10.
-
Unsang mga kamatuoran ang imong nakita nga makatabang sa usa ka tawo nga mibati nga kulang sila og mga kahanas o mga abilidad aron molampos sa kinabuhi?
Pwedeng ipasabot sa mga estudyante ang mga kamatuoran nga susama sa mosunod: Ang Ginoo wala magtan-aw sa panggawas nga panagway, apan sa kasingkasing (tan-awa sa 1 Samuel 16:7); Mahimo nato ang tanang butang pinaagi kang Jesukristo, nga makalig-on nato (tan-awa sa Mga Taga-Filipos 4:13; Alma 26:12); Ang bili sa atong mga kalag dako sa panan-aw sa Dios (tan-awa sa Doktrina ug mga Pakigsaad 18:10).
-
Sa unsang paagi nga kini nga mga kamatuoran makatabang nato kon kita mobati og kawalay kadasig mahitungod sa atong mga abilidad?
Pagdiskobre sa imong mga kalig-on ug mga abilidad
Pahinumdomi ang mga estudyante nga isip mga anak sa Dios nga gilalang sa Iyang panagway, matag usa nato gipanalanginan og lainlaing mga kalig-on ug mga abilidad. Tingali adunay mga estudyante nga naglisod sa pag-ila sa mga kalig-on ug mga abilidad nga gipanalangin sa Dios kanila.
Si Elder Ronald A. Rasband sa Korum sa Napulog Duha ka Apostoles mipakigbahin og pipila ka paagi nga kita makaila sa mga talento, mga kalig-on, ug mga abilidad nga gipanalangin sa Langitnong Amahan kanato:
Ang mga talento nga gihatag kanato sa Dios una nga makita sa mga interes nga atong gipangita. Kon kamo naghunahuna mahitungod sa inyong mga talento, ilista ang mga butang nga gusto ninyong buhaton. Ilakip ang tanang kalihokan nga nalingaw kamo gikan sa lainlaing mga aspeto sa inyong kinabuhi—espirituwal, musika, drama, akademiko, dula, ug uban pa. Tun-i ug pamalandongi ang inyong patriyarkal nga panalangin alang sa mga ideya ug inspirasyon. Mokonsulta sa mga sakop sa pamilya, kasaligan nga mga higala, mga magtutudlo, ug mga lider; ang laing tawo sa kasagaran mao ang makakita kanato sa unsay dili nato makita sa atong kaugalingon. (Ronald A. Rasband, “Parables of Jesus: The Parable of the Talents,” Ensign, Ago. 2003, 34)
-
Sa unsang paagi ang pagkahibalo sa imong kasamtangan nga mga talento, mga kalig-on, o mga abilidad makatabang nimo samtang naghunahuna ka bahin sa umaabot nga mga responsibilidad o mga oportunidad sa pagpanarbaho?
Hatagi og panahon ang mga estudyante diha sa klase nga madiskobre ang mga kalig-on ug mga abilidad nga naa kanila ug kinahanglang palamboon aron mahimong mas andam alang sa umaabot nga mga responsibilidad o mga oportunidad sa pagpanarbaho. Ang mosunod maoy pipila sa mga ideya kon unsaon nimo pagtabang ang mga estudyante sa paghimo niini. Samtang himoon nila kini nga mga kalihokan, dapita sila nga tinguhaon ang inspirasyon gikan sa Langitnong Amahan aron makita nila ang ilang kaugalingon sama sa Iyang pagtan-aw kanila.
-
Dapita ang mga estudyante nga isulat ang ilang kasamtangan nga mga interes. Dapita sila nga hunahunaon ang mga potensyal nga mga oportunidad sa pagpanarbaho nga pwede nilang kab-oton nga may kalabotan sa ilang mga interes. Ikonsiderar ang pagtanyag og tabang pinaagi sa pagsugyot og pipila ka posible nga mga oportunidad sa pagpanarbaho nga mohaom sa mga interes sa mga estudyante.
-
Dapita ang mga estudyante nga nakadawat sa ilang patriyarkal nga panalangin nga basahon kini, nga pangitaon kon unsay nakatabang niini kanila nga masabtan ang ilang kaugalingon.
-
Dapita ang gamayng grupo sa mga estudyante nga hisgotan ang mga kalig-on ug mga abilidad nga ilang namatikdan sa usag usa. Pwede pod nimong kontakon ang mga ginikanan o mga lider sa pagkapari sa dili pa magklase ug hangyoon sila nga magsulat og mubo nga sulat nga maghulagway sa pipila sa mga abilidad nga ilang nakita sa ilang estudyante.
-
Ipanghatag ang handout nga giulohan og “Pagsusi sa Kaugalingong mga Kahanas ug mga Abilidad” ug hatagi og panahon ang mga estudyante nga kompletohon kini. Ipasabot nga kini nga pagsusi naglangkob og usa ka listahan sa mga kahanas nga katibuk-ang gipangita sa mga agalon diha sa ilang mga empleyado.
Pagsusi sa Kaugalingong mga Kahanas ug mga Abilidad
Para sa kada mosunod nga mga pamahayag, gradohi ang imong lebel sa kompiyansa sa sukdanan nga 1 (walay kompiyansa) hangtod 5 (dako kaayog kompiyansa).
-
Epektibo ko nga makaistorya ngadto sa uban.
-
Madasig nako ang akong kaugalingon.
-
Usa ko ka kugihan.
-
Makahunahuna ko bisan sa lisod nga mga sitwasyon ug makakita og mga solusyon niini.
-
Andam kong mokat-on ug mosulay og bag-ong mga butang.
-
Matinud-anon ug kasaligan ko.
-
Maayo kong makigtrabaho sa uban.
-
Makasalig nako ang mga tawo nga himoon ang gihatag kanako nga buluhaton.
-
Mahimo nakong maorganisar ug magamit ang akong oras sa epektibong paagi.
-
Makaabot ko sa eksaktong oras.
Human ang mga estudyante adunay igong panahon nga himoon ang miaging mga kalihokan sa pagpamalandong, dapita sila nga ipakigbahin ang pipila sa ilang mga panabot pinaagi sa pagpangutana og sama sa mosunod.
-
Unsa nga mga panabot bahin sa imong kaugalingon ang imong naangkon?
-
Sa unsang paagi nga makatabang nimo ang unsay imong nakat-onan aron mas makapangandam alang sa umaabot?
Aron tabangan ang mga estudyante nga ma-summarize ug mahinumdoman ang unsay ilang nakat-onan bahin sa ilang kaugalingon karong adlawa, ikonsiderar ang pagpakita sa mosunod nga mga prompt ug pagdapit sa mga estudyante nga irekord ang ilang mga tubag diha sa ilang mga journal:
-
Ang usa ka kalig-on o abilidad nga naa nako nga makatabang nako sa akong mga responsiblidad sa umaabot mao ang …
-
Ang usa ka kahanas o abilidad nga gusto nakong palamboon aron matabangan ko nga mas maandam sa umaabot nga mga responsibilidad mao ang …
Ipasabot nga sa umaabot nga leksiyon (“Pag-ugmad og mga Kahanas ug mga Abilidad”) ang mga estudyante hatagan og kahigayonan nga hunahunaon kon unsaon nila pag-ugmad ang mga kahanas ug mga abilidad nga ilang nailhan sa ikaduhang prompt. Pwede nimo silang dapiton nga sugdan ang paghunahuna og mga paagi nga ilang mapalambo kini nga mga kahanas o mga abilidad karon. Pagpamatuod sa abilidad ug kaandam sa Ginoo nga motabang kanila nga molambo ug mouswag.