Leksiyon 191: Pagpangandam alang sa Umaabot nga Edukasyon ug Pagpanarbaho

Ang Kaimportante sa Edukasyon

Ang Edukasyon Mahinungdanon sa Atong Pag-uswag

Gusto sa Langitnong Amahan ug ni Jesukristo nga kita makakat-on ug makaangkon og edukasyon sa tibuok natong kinabuhi. Ang pagbuhat sa ingon mahinungdanon sa atong pag-uswag dinhi sa yuta ug sa kahangtoran. Kini nga leksiyon makatabang sa mga estudyante nga masabtan ang kaimportante sa edukasyon.

Posibleng mga Kalihokan sa Pagkat-on

Nganong importante ang edukasyon?

Aron matabangan ang mga estudyante nga sugdan paghunahuna ang kaimportante sa edukasyon, ikonsiderar ang pagpakigbahin sa mosunod nga senaryo:

Hunahunaa nga dunay estudyante nga ginganlan og Sara nga dili gustong moeskuwela. Paminaw niya nag-usik lang kini sa panahon ug naghatag niya og grabeng kaugtas. Dugang pa, wala siyay daghang kadasig sa pagkat-on tungod kay dili kaayo siya maayo sa eskwelahan. Mas ganahan siyang makig-uban sa iyang mga higala, magrelaks sa balay, o manarbaho.

Dapita ang mga estudyante sa paghunahuna kon mibati ba sila og parehas kang Sara. Ipasabot nga kini nga leksiyon makatabang nila sa pagkat-on kon nganong gusto sa Langitnong Amahan ug ni Jesukristo nga makabaton kita og edukasyon.

Mahimong makatabang ang pagpahinumdom sa mga estudyante nga ang edukasyon pwedeng maglakip sa pagkat-on diha sa pormal nga mga kahimtang, sama sa eskwelahan. Ang edukasyon mahimo usab nga maglakip sa pagkat-on nga mahitabo sa dili pormal nga mga kahimtang, sama sa balay o sa uban pang inadlaw nga mga kalihokan.

Sa ibabaw nga bahin sa pahina sa imong journal sa pagtuon, paghimo og heading nga giulohan og “Nganong importante ang edukasyon?” Samtang magtuon ka karon, tinguhaa ang pagpadayag gikan sa Langitnong Amahan pinaagi sa Espiritu Santo aron makita ang bili sa edukasyon sa imong kinabuhi. Idugang ang imong mga panglantaw ug espirituhanon nga mga impresyon ngadto sa listahan diha sa imong journal.

Tun-i ang kaimportante sa edukasyon

Hatagi og panahon ang mga estudyante sa pagtuon sa mga kasulatan ug mga pamahayag gikan sa mga lider sa Simbahan nga nagtudlo bahin sa kaimportante sa pagkat-on ug sa edukasyon. Pwedeng tun-an sa mga estudyante ang pipila o tanan sa mga kapanguhaan diha sa handout nga giulohan og “Ang Kaimportante sa Edukasyon.” Awhaga sila sa pagrekord ngadto sa ilang lista diha sa mga journal sa pagtuon sa bisan unsang mga panglantaw nga ilang madiskobrehan.

Ikonsiderar ang pagbahin-bahin sa mga estudyante ngadto sa gagmay nga mga grupo ug sa pag-asayn sa kada sakop sa grupo og usa ka kasulatan ug usa ka pamahayag nga ilang tun-an. Hangyoa ang mga estudyante nga ipasabot ngadto sa nahibilin sa ilang grupo ang unsay ilang nakat-onan sa giasayn kanila nga mga basahonon.

Ang Kaimportante sa Edukasyon

Ang mosunod nga mga kasulatan ug pahayag gikan sa mga lider sa Simbahan makatabang nimo nga mas masabtan ang mga gidahom ug mga tinguha sa Ginoo alang kanimo nga makabaton og edukasyon. Samtang magtuon ka, pangitaa ang mga kamatuoran bahin sa kaimportante sa edukasyon.

Mga kasulatan nga tun-an:

Doktrina ug mga Pakigsaad 88:77–80, 118; 130:18–19

Mga pagtulun-an gikan sa mga lider sa Simbahan:

Si Presidente Russell M. Nelson mitudlo:

Makaangkon mo og edukasyon sa inyong paninguha. Walay laing makaangkon niini alang kaninyo. Bisan asa kamo, palamboa ang dakong tinguha sa pagkat-on. Kita isip mga Santos sa Ulahing mga Adlaw, ang pag-angkon og edukasyon dili lang usa ka pribilehiyo, relihiyoso kini nga responsibilidad. “Ang himaya sa Dios mao ang salabotan” (Doktrina ug mga Pakigsaad 93:36). Sa pagkatinuod, ang atong edukasyon alang sa kahangtoran. …

Ang maong mahangturong panglantaw makatabang ninyo sa paghimo’g maayong mga pagpili bahin sa pagkat-on.

Ayaw kahadlok sa pagpadayon sa inyong mga tumong—gani sa inyong mga damgo! Apan hibaloi nga walay shortcut sa kamaayo ug abilidad. Ang edukasyon mao ang kalainan tali sa paghandom nga makatabang mo sa ubang tawo ug sa paghimo sa pagtabang kanila. (Russell M. Nelson, “Unsay Inyong Pilion?” Liahona, Ene. 2015, 32)

Si Elder David A. Bednar sa Korum sa Napulog Duha ka Apostoles miingon:

Ikaw ug ako ania dinhi sa yuta aron maandam alang sa kahangtoran, sa pagkat-on unsaon sa pagkat-on, sa pagkat-on og mga butang nga importante sa temporal ug mahinungdanon sa kahangtoran, ug pagtabang sa uban nga makakat-on og kaalam ug kamatuoran (tan-awa sa Doktrina ug mga Pakigsaad 97:1). Ang pagkasabot kon kinsa kita, asa kita gikan, ug nganong ania kita sa yuta maghatag sa kada usa nato og dakong responsibilidad sa pagkat-on kon unsaon sa pagkat-on ug sa pagkat-on sa paghigugma sa pagkat-on. (David A. Bednar, “Learning to Love Learning,” Ensign, Feb. 2010, 27)

Si Presidente Camille N. Johnson, Kinatibuk-ang Presidente sa Relief Society, mipakigbahin:

Kinahanglang mokuha kita sa tanang edukasyon ug pagbansay kutob sa atong mahimo aron makapangandam kita. Andam sa pagserbisyo sa kalibotan ug sa Simbahan. Andam nga mahimong maalamong mga magtatambag ug mga kauban sa atong mga kapikas. Andam nga mahimong epektibong mga magtutudlo sa atong kabataan ug niadtong kabatan-onan nga atong impluwensiyahan. Kon mas daghan ang atong makat-onan, mas dako nga impluwensiya ang atong maangkon alang sa kaayohan.” (Camille N. Johnson, “Seek Learning by Study and by Faith” [BYU–Pathway Worldwide devotional, Oct. 19, 2021], byupathway.org).

Gikan sa Alang sa Kalig-on sa mga Kabatan-onan: Usa ka Giya sa Paghimo og mga Pagpili:

Ang Langitnong Amahan gusto nga ang Iyang mga anak nga babaye ug mga anak nga lalaki kanunayng makakat-on. Kamo adunay temporal ug espirituhanong mga rason sa pagtinguha ug mahalon ang pagkat-on. Ang edukasyon dili lang mahitungod sa pagkita og kwarta. Kini kabahin sa inyong mahangtoron nga tumong nga mahimong mas mahisama sa Langitnong Amahan. …

Pangita og mga oportunidad sa pagpalapad sa inyong hunahuna ug sa inyong kahanas. Kini nga mga oportunidad naglakip sa pormal nga edukasyon sa eskwelahan o sa bokasyonal nga pagbansay, ingon man sa dili pormal nga pagkat-on gikan sa mga tinubdan nga inyong gisaligan. Ilakip ang Ginoo diha sa inyong mga paningkamot, ug Siya mogiya kaninyo. Samtang kamo magkat-on mahitungod sa kalibotan sa inyong palibot, kat-oni usab ang mahitungod sa Manluluwas, kinsa milalang sa kalibotan. Tun-i ang Iyang kinabuhi ug mga pagtulon-an. Himoa ang seminary, institute, ug ang personal nga pagtuon sa ebanghelyo nga kabahin sa inyong tibuok kinabuhi nga pagkat-on. (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 31)

Kon gigrupo-grupo nimo ang mga estudyante, dapita sila nga ipakigbahin ang ilang mga nakaplagan ngadto sa ilang mga ka grupo. Sa dila pa sila mopakigbahin, ipasabot nga ang importante nga kahanas nga makatabang nila sa tibuok nilang kinabuhi mao ang makahimo og kritikal nga panghunahuna. Ang kritikal nga panghunahuna mao ang abilidad sa paghimo og mga koneksiyon tali sa mga ideya ug susihon kini. Ipakita ang mosunod nga mga instruksiyon aron tabangan ang mga estudyante sa pagpraktis sa kritikal nga panghunahuna atol sa ilang panaghisgot sa grupo:

1. I-summarize ang unsay imong nakat-onan gikan sa kasulatan ug sa pamahayag nga imong gitun-an.

2. Human mapakigbahin sa mga estudyante ang tanang summary, hisgoti ang mosunod nga mga pangutana:

3. Unsay pagkaparehas ang imong nakit-an sa mga pahayag ug sa mga kasulatan nga imong nakat-onan?

4. Sa unsang paagi ang mga kasulatan o mga pamahayag nga imong gitun-an talagsaon gikan sa usag usa?

5. Aduna bay bisan unsa diha sa usa ka kinutlo o kasulatan ang nakahatag nimo og panabot bahin sa usa ka butang diha sa laing kinutlo o kasulatan?

Mga kamatuoran bahin sa kaimportante sa edukasyon

Hatagi og higayon ang mga estudyante sa pagpakigbahin sa mga kamatuoran nga ilang nakaplagan gikan sa ilang pagtuon ug panaghisgot. Pwede nimong isulat sa pisara ang pangutana gikan sa unang bahin sa leksiyon nga, “Nganong importante ang edukasyon?,” ug ipasulat sa mga estudyante ang mga kamatuoran nga ilang nakat-onan gikan sa pangutana. Ang mga estudyante mahimong mopakigbahin sa mga kamatuoran nga susama sa mosunod:

• Ang edukasyon motabang nato sa pagpangandam sa pagserbisyo sa gingharian sa Dios (tan-awa sa Doktrina ug mga Pakigsaad 88:77–80).

• Gisugo sa Ginoo nga tinguhaon nato ang pagkat-on (tan-awa sa Doktrina ug mga Pakigsaad 88:118).

• Ang kahibalo ug salabotan nga atong mabatonan niini nga kinabuhi madala nato diha sa Pagkabanhaw (tan-awa sa Doktrina ug mga Pakigsaad 130:18–19).

• Ang edukasyon mag-andam nato sa pagkahimong mas maayo nga mga impluwensiya alang sa kaayohan sa kalibotan (tan-awa sa Camille N. Johnson, “Seek Learning by Study and by Faith,” [BYU–Pathway Worldwide devotional, Oct. 19, 2021], byupathway.org).

Ikonsiderar ang paghisgot sa mga panabot sa mga estudyante bahin sa mga kamatuoran nga ilang nailhan pinaagi sa pagpangutana sama sa mosunod:

• Hain sa mga kamatuoran nga inyong nailhan ang labing makahuloganon para ninyo? Ngano man?

• Sa inyong hunahuna, sa unsang paagi ang edukasyon makaapekto sa inyong relasyon sa Langitnong Amahan ug kang Jesukristo?

• Sa unsang paagi ninyo nakita ang mga panalangin sa pag-angkon og edukasyon sa inyong kinabuhi ug sa kinabuhi sa uban?

Ipasabot kini sa kaugalingon nimong mga pulong

Pahinumdomi ang mga estudyante sa senaryo bahin kang Sara gikan sa sinugdanan sa leksiyon. Human mapakigbahin ang mosunod nga mga instruksiyon, hatagi og panahon ang mga estudyante nga magrekord og tubag diha sa ilang mga journal sa pagtuon.

Gamit ang imong nakat-onan ug gibati karon, paghimo og tubag nga pwede nimong ipakigbahin kang Sara nga makatabang niya nga mas masabtan ang kaimportante sa edukasyon. Diha sa imong tubag, paglakip og labing menos usa ka pakisayran sa kasulatan o pamahayag gikan sa usa ka lider sa Simbahan. Mahimo usab nimong ilakip ang imong pagpamatuod o ihulagway ang imong mga kasinatian.

Ikonsiderar ang paghatag sa mga estudyante og kahigayonan sa pagpakigbahin sa ilang mga tubag uban ang usa ka pares. Ang pipila ka andam nga mga estudyante mahimo usab nga mopakigbahin sa ilang mga tubag ngadto sa klase.

Taposa ang leksiyon pinaagi sa pagdapit sa mga estudyante nga ipakigbahin ang unsay ilang nakat-onan ug gibati nga gusto nilang mahinumdoman. Pwede nilang irekord ang ilang mga hunahuna o mga impresyon diha sa ilang mga journal sa pagtuon. Ikonsiderar ang pagpakigbahin sa imong pagpamatuod bahin sa kaimportante sa edukasyon.

Dugang nga mga Kapanguhaan

Sa unsang paagi ang edukasyon makatabang kanako?

Si Elder David A. Bednar sa Korum sa Napulog Duha ka Apostoles mitudlo:

Sa akong hunahuna ang yawe sa pagkat-on mao ang pagkat-on kon unsaon sa pagkat-on. Ang isyu dili ang pagkat-on og pormula sa matematika o pagsag-ulo og mga serye sa mga kosepto gikan sa libro sa ekonomiks, o uban pa. Para nako, ang kabililhon sa edukasyon mao ang paghunahuna kon unsay buhaton kon wala ka makahibalo unsay buhaton. Mao kana ang ihatag sa edukasyon. Pwede kang modangop sa mga libro, sa Google, pwede kang modangop sa tanang klase sa mga pakisayran nga mga materyal. Pero unsay imong himoon kon wala sa mga libro ang tubag? Ang tanan naghunahuna nga nahibalo ang Google sa tanan—wala. Unsay imong himoon kon wala ka kahibalo? Mao kana ang mahimo sa pagkat-on. Nagsangkap kini kanimo. Makalingaw kini. Kini makapadani. Mao kini ang sentro sa ebanghelyo—pagkat-on, paglambo, pag-uswag. Busa, dapiton nako kining tanang kabatan-onan nga tinguhaon ang tabang sa Espiritu Santo aron makakat-on sila kon unsaon sa pagkat-on ug aron makakat-on sa paghigugma sa pagkat-on. (David A. Bednar, “I Have Learned for Myself” [BYU–Pathway Worldwide devotional, Oct. 23, 2018], byupathway.org)

Si Elder Robert D. Hales (1932–2017) sa Korum sa Napulog Duha ka Apostoles mitudlo:

Ang edukasyon moandam ninyo alang sa mas maayo nga mga oportunidad sa panarbaho. Mobutang kini ninyo sa mas maayong posisyon sa pagserbisyo ug pagpanalangin niadtong naglibut kaninyo. Mopahimutang kini ninyo sa dalan sa tibuok kinabuhi nga pagkat-on. Mopalig-on kini ninyo sa pakigbatok sa kaignorante ug sayop. Sama sa gitudlo ni Joseph Smith: “Ang kahibalo makapawagtang sa kangitngit, kabalaka ug pagduda; kay kini sila dili magpabilin kon anaa ang kahibalo. … Diha sa kahibalo adunay gahum” [Mga Pagtulun-an sa mga Presidente sa Simbahan: Joseph Smith (2007), 319]. … Ang edukasyon moandam kaninyo alang sa umaabot. (Robert D. Hales, “Pagdawat ug Pagbuntog sa mga Hagit sa Kalibutan Karon,” Liahona, Nob. 2015, 45)

Dugang nga mga Kalihokan sa Pagkat-on

Pagkat-on nga higugmaon ang pagkat-on

Ang mga pamahayag ni Elder David A. Bednar diha sa handout sulod sa leksiyon ug sa seksiyon nga “Dugang nga mga Kapanguhaan” naghisgot sa pagkat-on nga higugmaon ang pagkat-on. Kon makabenepisyo ang mga estudyante sa dugang instruksiyon bahin kon unsaon paghigugma sa pagkat-on, ikonsiderar ang paghisgot sa mosunod nga mga pangutana:

• Unsa man ang anaa aron higugmaon ang pagkat-on? Nganong usahay mawala ang atong panan-aw niana?

• Kinsay inyong nailhan nga morag ganahan nga magkat-on? Unsay ilang gibuhat nga nagpakita nga nahigugma sila sa pagkat-on?

• Unsay makatabang ninyoaron modako ang inyong gugma sa pagkat-on?

Dapita ang mga estudyante sa pagpakigbahin og mga paagi nga nakapalambo sila og pasalamat o nahigugma pa gani sa pagkat-on ug mga oportunidad sa edukasyon. Ikonsiderar ang paglista niini diha sa pisara. Tabangi ang mga estudyante nga makita nga kon mas nasabtan nato ang atong pagkat-on ug edukasyon, mas maningkamot kita nga mokat-on, molambo, ug mouswag.

Unsaon nako nga mahimong mas maayo nga tigkat-on karon?

Mahimong mawad-an og kadasig ang mga estudyante kon bation nila nga dili sila maayo sa pagkat-on. Ang uban maglisod tingali sa pormal o dili pormal nga mga kahimtang pero tabangan sila sa Ginoo. Ang mosunod nga mga sugyot makagiya sa mga estudyante samtang ipadayon nila ang emosyonal, intelektuwal, ug espirituwal nga pagkat-on.

1. Pagpakita og hugot nga pagtuo. Kon nagtuo ka nga tabangan ka sa Dios nga makab-ot ang kahimayaan, mas sayon para nimo nga motuo nga Siya makatabang nimo nga makakat-on og math o bisan unsa nga subject nga naglisod ka. Pagbaton og mahangtoron nga panglantaw. Ang pagpakita og hugot nga pagtuo makatabang nimo nga mahimong mapasalamaton sa feedback bisan kon kini nagpasabot nga mawala ang mga puntos o kinahanglang himoon ang usa ka butang pag-usab.

2. Pagbaton og katuyoan sa imong kadasig sa pagkat-on. Ang mga estudyante nga mosulay sa pagkab-ot sa mga kinahanglanon sa kurso ug mga deadline sa dinali-dali, pagbalewala, o “itsek ang kahon” nga pamaagi mahimong mawad-an sa oportunidad sa pagkat-on. Sa sukwahi, ang mga estudyante nga mangita og mga koneksiyon, mga oportunidad, ug usa ka pagbati sa katuyoan nga pwedeng mabag-o pinaagi sa kasinatian sa edukasyon. Nagkat-on sila aron sila mabag-o, mouswag, ug molambo.

3. Pagmaandamon sa pagbag-o. Pagmaandamon sa pagbag-o ug ilhon kon sa unsang paagi ang imong pamaagi sa panghunahuna ug paglihok karon tingali nagbutang og limitasyon sa imong abilidad sa pagkat-on. Pangita og pamaagi nga mouswag kon ang imong pagpaningkamot sa usa ka pasulit o assignment mas ubos kaysa imong gilaoman. Ang kausaban mahimong maghatag og bag-o nga mga resulta.

4. Tinguhaa ang mga oportunidad sa pagkat-on ug paglambo. Tungod kay importante sa Ginoo ang edukasyon, samtang magtinguha ka og mga oportunidad sa pagkat-on ug paglambo, mas mapaduol ka kang Jesukristo ug makabaton og emosyonal, intelektuwal, ug espirituhanon nga kalig-on.