Leksiyon 194: Pagpangandam alang sa Umaabot nga Edukasyon ug Pagpanarbaho

Pag-ugmad og mga Kahanas ug mga Abilidad

Pag-uswag uban sa Tabang sa Ginoo

Samtang himoon nato ang atong bahin, ang Manluluwas makatabang nato sa pag-ugmad og mga kahanas ug mga abilidad nga makatabang nato nga makapangandam sa umaabot nga mga responsibilidad ug sa pagkab-ot sa atong potensyal isip mga anak sa Dios. Kini nga leksiyon makatabang sa mga estudyante nga planohon ang pag-ugmad og mga kahanas ug mga abilidad nga mag-andam nila sa umaabot nga pagpanarbaho ug uban pang mga tahas.

Posibleng mga Kalihokan sa Pagkat-on

Kini nga leksiyon mahimong labing epektibo human sa pagtudlo sa leksiyon nga giulohan og “Pagdiskobre sa Imong mga Kalig-on ug mga Abilidad.” Kon wala nimo matudlo ang maong leksiyon, ikonsiderar ang paggamit sa pipila ka kalihokan gikan niini isip kabahin niini nga leksiyon.

Pagpunting kon asa ka paingon

Ikonsiderar ang pagsugod sa leksiyon pinaagi sa pagpakita sa mosunod nga mga imahe o drowing nga parehas niini diha sa pisara. Pwede nimong itudlo ang unang imahe dihang imong ihulagway ang unang batan-ong babaye sa senaryo diha sa ubos, dayon itudlo ang ikaduhang imahe dihang ihulagway nimo ang ikaduhang tin-edyer.

Hunahunaa nga naa kay kaila nga duha ka batan-on nga lahi kaayo og gibati sa ilang mga kahanas ug mga abilidad. Ang una klaro nga naay daghang talento, samtang ang ikaduha usahay mobati nga wala siyay talento nga gikinahanglan aron molampos sa kinabuhi.

• Unsa nga tambag o mga pasidaan ang imong ihatag niini nga mga tawo bahin sa ilang mga talento, mga kahanas, o mga abilidad? Ngano man?

Ipakita ang mosunod nga imahe ug dapita ang mga estudyante nga ipakigbahin kon unsay ilang mabantayan nga gihulagway. Pwede silang mopakigbahin og espirituhanon nga mga leksiyon nga ilang makat-onan gikan sa tsart sa imahe.

Sa dili pa ipakigbahin ang pamahayag ni Elder Clark G. Gilbert sa Seventy, makatabang tingali ang pagpasabot nga ang slope sa usa ka linya nagtumong sa pagpataas o pagpaubos nga pag-uswag niini.

Si Elder Clark G. Gilbert sa Seventy mitudlo sa kaimportante sa pagpunting kon asa ka paingon sa kinabuhi imbes sa kon asa ka nagsugod:

Ang atong kaugmaon pagatinoon og gamay ra pinaagi sa atong pagsugod ug labaw kaayo diha pinaagi sa atong pagsaka-kanaog. Si Jesukristo nagtan-aw sa balaanong potensyal sa walay pagsapayan diin kita nagsugod. … Si Kristo naghunahuna kon unsay atong gibuhat sa unsay gihatag kanato. Samtang ang kalibotan nagpunting sa atong hunonganan, ang Dios nagpunting sa atong pagsaka-kanaog. Sa matematika sa Ginoo, buhaton Niya ang tanan nga Siya makahimo sa pagtabang kanato sa pagpaduol sa atong mga pagsaka-kanaog ngadto sa langit. (Clark G. Gilbert, “Pakighiusa diha kang Kristo: Ang Sambingay sa Bakilid,” Liahona, Nob. 2021, 20)

• Unsay imong nakat-onan bahin kang Jesukristo gikan sa mga pulong ni Elder Gilbert?

• Unsay imong nakaplagan niini nga pamahayag nga makatanyag nimo og paglaom ug pagdasig kon bahin sa pag-ugmad og mga talento, mga kahanas, o mga abilidad?

Ipasabot nga kini nga leksiyon magtutok sa pag-ugmad og mga kahanas ug mga abilidad nga makatabang nato sa pagpangandam alang sa umaabot nga pagpanarbaho o ubang mga tahas nga atong maangkon.

Dapita ang mga estudyante nga hunahunaon ang mga kahanas o mga abilidad nga gusto nilang ugmaron aron mahimong mas andam para sa ilang umaabot nga mga tahas o oportunidad sa pagpanarbaho. Pwede nila kining ilista diha sa ilang mga journal. Makatabang ang pagdasig sa mga estudyante nga tan-awon ang ilang mga mubo nga gisulat atol sa leksiyon nga giulohan og “Pagdiskobre sa Imong mga Kalig-on ug mga Abilidad.”

Awhaga ang mga estudyante samtang magtuon karong adlawa nga mohatag og pagtagad sa inspirasyon gikan sa Espiritu Santo nga makatabang nila nga mas makasabot kon unsaon nila pag-ugmad ang ilang mga talento, mga kahanas, o mga abilidad uban ang tabang sa Ginoo.

Pag-ugmad og mga kahanas ug mga abilidad

Sa dili pa dapiton ang mga estudyante nga mokigbahin sa mosunod nga kalihokan sa pagtuon, ikonsiderar ang pagdapit nila nga maghunahuna og mga paagi kon sa unsang paagi makatabang nila ang Ginoo sa pag-ugmad og mga kahanas ug abilidad.

Dayon grupoha ang mga estudyante sa gagmayng grupo aron ilang madiskobrehan ang mga kamatuoran gikan sa mga kasulatan. Pwede nimong hatagan ang kada grupo og lainlaing bersikulo ug hangyoon sila nga basahon, hisgotan, ug magsulat og mga kamatuoran o baroganan diha sa pisara base sa nakaasayn nga kasulatan.

Basaha ang mosunod nga mga bersikulo nga pangitaon ang mga kamatuoran. Ikonsiderar kon sa unsang paagi makatabang nimo kining mga kamatuoran sa imong mga paningkamot sa pag-ugmad og mga kahanas ug mga abilidad.

Doktrina ug mga Pakigsaad 4:7; 46:8–9; 75:3, 29; 1 Nephi 7:12

Dapita ang mga estudyante sa pagpakigbahin sa mga kamatuoran nga ilang nadiskobrehan. Mahimo silang mopakigbahin og mga kamatuoran nga parehas sa mosunod:

• Kon mangayo ta og tabang sa Dios, tubagon Niya ang atong mga pag-ampo (tan-awa sa Doktrina ug mga Pakigsaad 4:7).

• Gisugo kita sa Ginoo sa pagtinguha og espirituhanon nga mga gasa aron kita ug ang uban makabenepisyon gikan niini (tan-awa sa Doktrina ug mga Pakigsaad 46:8–9).

• Gisugo kita sa Ginoo nga likayan ang pagkatapolan ug makugihon nga maghago (tan-awa sa Doktrina ug mga Pakigsaad 75:3, 29).

• Ang Ginoo makahimo sa tanang butang para nato sumala sa Iyang kabubut-on, kon magpakita kita og hugot nga pagtuo ngadto Kaniya (tan-awa sa 1 Nephi 7:12).

• Sa imong hunahuna, sa unsang paagi kini nga mga kamatuoran may kalabotan sa pag-ugmad og mga talento, mga kahanas, o mga abilidad?

• Kanus-a napalambo nimo o sa mga tawo nga imong kaila ang mga kahanas o mga abilidad pinaagi sa paggamit sa usa o daghan pa niini nga mga kamatuoran?

Human matubag sa mga estudyante ang miaging pangutana, ikonsiderar ang pagpakigbahin sa “Hugot nga Pagtuo ug ang Tumong” (4:40), nga anaa sa ChurchofJesusChrist.org. Dapita ang mga estudyante sa pagpangita og mga ehemplo sa mga kamatuoran nga ilang nailhan.

Pag-ugmad ug paggamit sa imong mga talento

Gidisenyo kini nga bahin sa leksiyon sa paghatag og higayon sa mga estudyante nga maghimo og plano sa pag-ugmad og talento, kahanas, o abilidad nga ilang nailhan nga makatabang nila sa pagpangandam para sa umaabot nga mga tahas o mga oportunidad sa pagpanarbaho. Awhaga ang mga estudyante nga mosalig sa Espiritu samtang mangita sila og mga paagi sa pag-ugmad ug pagkat-on. Pwede nimong ikonsiderar ang pagpahinumdom sa mga estudyante nga ang pipila ka talento natural nga mogawas, samtang ang uban kinahanglan tagsa-tagsaon sa pagtrabaho ug pagpaningkamot.

Sa dili pa hatagan og panahon ang mga estudyante sa paghimo og plano, ikonsiderar ang pagpasalida sa “Gamay ug Yano” (3:31), nga anaa sa ChurchofJesusChrist.org. Pwede nimong gamiton kini nga bidyo aron tabangan ang mga estudyante nga makita ang mga ehemplo sa yano nga mga paagi nga ilang masunod aron matuman ang ilang mga tumong.

Ipanghatag ang handout nga “Pag-ugmad og mga Kahanas ug mga Abilidad.” Sa dili pa hatagan og panahon ang mga estudyante nga himoon kini, ikonsiderar ang pagkompleto sa usa ka ehemplo isip usa ka klase. Hangyoa ang mga sakop sa klase nga maghunahuna og kahanas o abilidad nga tutokan, ug dayon dapita sila nga maghunahuna og mga paagi nga mahimo nilang makompleto ang kada lakang aron makaugmad niana nga kahanas o abilidad.

Kon ang mga estudyante magtrabaho sa plano nga sila ra, makatabang tingali ang pagpahinumdom nila sa kahanas o abilidad nga gusto nilang palamboon diha sa leksiyon nga giulohan og “Pagdiskobre sa Imong mga Kahanas ug mga Abilidad.”

Pag-ugmad og mga Kahanas ug mga Abilidad

Gamita ang mosunod nga mga lakang aron matabangan ka nga maghimo og plano para sa pag-ugmad og mga kahanas ug mga abilidad nga moandam nimo sa umaabot nga mga tahas ug mga oportunidad sa pagpanarbaho:

1. Ilista ang kahanas o abilidad nga gusto nimong palamboon aron matabangan ka nga makapangandam alang sa umaabot nga pagpanarbaho o uban pang mga tahas nga imong maangkon.

2. Sa unsang paagi kini nga kahanas o abilidad makatabang nimo nga mahimong mas mahisama sa Langitnong Amahan ug kang Jesukristo?

3. Pagtakda og piho nga tumong nga motabang nimo sa pag-ugmad niini nga kahanas o abilidad. Paglista og duha o tulo ka piho nga mga lakang o aksiyon nga imong himoon aron makab-ot kini nga tumong.

4. Unsang kinaiya o mga kinaiya ang imong usbon aron makab-ot ang imong tumong? Pagsugod sa ginagmay. Paglista og usa o duha ka mga kinaiya nga pwede nimong bag-ohon o ugmaron kada adlaw. Dili kinahanglan nga dako dayon ang kausaban.

5. Unsaon nimo pagpangayo og tabang sa Dios para sa imong plano? Pwede kang mangita og kasulatan nga naghulagway sa mga paagi nga mahimo nimo kini. Ang mga ehemplo naglakip saMga Proverbio 3:5–6; 2 Nephi 32:3; Ether 12:27; ug Doktrina ug mga Pakigsaad 4:7.

Dapita ang andam na nga mga estudyante nga ipakigbahin ang pipila sa ilang mga plano ngadto sa usag usa, sa kapares man o sa ginagmay nga mga grupo. Bahina ang mga estudyante nga magkapares ug hatagi sila og higayon nga mopakigbahin og feedback. Pwede kang magpakita og mga prompt nga parehas sa mosunod aron magiyahan ang matang sa feedback nga ihatag sa mga estudyante:

• Usa ka butang nga ganahan nako sa imong plano kay …

• Usa ka butang nga nakatabang nako nga matuman ang akong tumong mao ang …

• Ang laing ideya nga pwede nimong sulayan aron matabangan ka nga molampos mao ang …

Awhaga ang mga estudyante nga lihokon ang mga plano nga ilang gitakda alang sa ilang kaugalingon. Ipamatuod ang abilidad ug kaandam sa Ginoo nga motabang nila samtang naningkamot sila sa pag-ugmad sa ilang mga kahanas ug mga abilidad agig pagpangandam sa umaabot.

Dugang nga mga Kapanguhaan

Nganong importante para nako ang pag-ugmad og mga talento?

Si Elder Ronald A. Rasband sa Korum sa Napulog Duha ka Apostoles mitudlo:

Ang matag tawo moanhi sa yuta isip usa ka talagsaong indibidwal. Ang susama nga kutay mahimong anaa sa mga pamilya, apan ang matag usa kanato adunay usa ka talagsaong butang sa atong kaugalingon. Si Elder Bruce R. McConkie (1915-85) sa Korum sa Napulog Duha ka Apostoles misulat: “Ang matag tawo niini nga kinabuhi gitugahan niadto nga mga talento ug mga kapasidad nga ang iyang kinabuhi sa wala pa dinhi sa yuta naghatag kaniya og katungod sa pagdawat. Ang uban pinaagi sa pagkamasulondon sa balaod nakaangkon og usa ka talento ug ang uban sa laing paagi.”

Giklaro sa Ginoo nga dili igo ang basta lang nga mobalik ngadto Kaniya sa mga talento nga Iyang gihatag kanato. Kinahanglan tang mag-uswag ug dugangan ang atong mga talento. Misaad Siya nga kon padaghanon nato ang atong mga talento, makadawat kita og mahangtorong kalipay.

Sa modernong pagpadayag, gipamatud-an sa Ginoo ang mga baroganan niini nga sambingay: “Apan sa uban Ako wala mahimuot pag-ayo, kay … sila nagtago sa kahibalo nga Ako mihatag ngadto kanila, tungod sa kahadlok sa tawo. … Ayaw kamo pag-usik sa inyong panahon, ni kamo motago sa inyong kahibalo nga kini dili masayran.” (Doktrina ug mga Pakigsaad 60:2, 13) (Ronald A. Rasband, “Parables of Jesus: The Parable of the Talents,” Ensign, Ago. 2003, 34)

Sa unsang paagi gidahom sa Ginoo nga gamiton nako ang akong mga talento ug abilidad?

Si Elder Lawrence E. Corbridge sa Seventy mitudlo:

Alang kanato nga mibati nga kulang kon mahitungod sa mga talento ug mga gasa, makapadasig ang pagkahibalo nga kini nga imbitasyon dili aron pasinahon ang uban kon kinsa kita o kon unsay atong nahibaloan. Hinuon, ang atong kahayag mao ang Kahayag sa Kalibotan nga nagdan-ag kanato samtang naningkamot kita nga himoon ang Iyang gihimo. Kana ra. Giingnan kita sa Ginoo nga sundon Siya ug dili maulaw o kontra-gusto nga molabaw. Ayaw og kaulaw sa pagpataas sa Iyang kahayag. Ayaw og kahadlok nga mosanag. (Lawrence E. Corbridge, “Valiant in the Testimony of Jesus Christ,” Ensign, Sep. 2011, 36)

Unsa kaha kon nawad-an ko sa kadasig dihang nagpalambo sa akong mga abilidad?

Si Elder L. Tom Perry (1922–2015) sa Korum sa Napulog Duha ka Apostoles mitudlo:

Kitang tanan gipanalanginan og daghang talento ug abilidad. Ang uban gipanalanginan og talento sa pagkanta, ang uban sa pagpinta, ang uban sa pakigpulong, ang uban sa pagsayaw, ang uban sa paghimo og nindot nga mga butang gamit ang ilang mga kamot, ug ang uban sa paghatag og manggiloy-ong pagserbisyo. Ang uban nakaangkon og daghan, ang uban pipila lang. Dili importante ang gidak-on o ang gidaghanon apan ang atong paningkamot nga gihimo sa pagpalambo sa mga talento ug mga abilidad nga atong nadawat. Wala ka nakigkompetisyon ni bisan kinsa. Nakigkomptensya ka lang sa imong kaugalingon aron mahimo ang labing maayo bisan unsa pay imong nadawat. Ang kada talento nga gipalambo gikinahanglan kaayo ug mohatag nimo og dakong kalamposan ug katagbawan sa imong kinabuhi. (L. Tom Perry, “Youth of the Noble Birthright,”Ensign, Nov. 1998, 74.)

Dugang nga mga Kalihokan sa Pagkat-on

Mga ehemplo sa pag-ugmad og mga kahanas ug mga abilidad

Samtang dapiton nimo ang mga estudyante nga hisgotan kon sa unsang paagi nila o sa uban napalambo ang mga kahanas o mga abilidad uban ang tabang sa Ginoo, pwede nimong ikonsiderar ang paggamit sa mosunod nga mga ehemplo:

“Pagpangandam ni Heber J. Grant: Paglahutay ug Kalig-on” (1:59). Dapita ang mga estudyante sa pagpangita og mga ehemplo ni Presidente Heber J. Grant sa paghimo sa mga kahuyang ngadto sa mga kalig-on.

“Ang Gahom sa Personal nga Pagpamatuod” gikan sa time code nga 0:57 hangtod 3:03. Dapita ang mga estudyante sa pagpangita kon unsay nakadasig ni Presidente Dieter F. Uchtdorf sa pagkat-on og Iningles agig pagpangandam sa karera nga gusto niyang kab-oton.

Gamit ang mga gasa ug mga panalangin nga gihatag kanato sa Ginoo

Ipasabot nga atol sa panahon sa Manluluwas, ang “talento” maoy usa ka yunit sa timbang ug dako usab nga kantidad sa kwarta. Diha sa mga kasulatan, gigamit sa Manluluwas ang mga talento aron magtudlo og mga kamatuoran bahin sa kaimportante sa paggamit sa maalamong paagi sa mga gasa nga gihatag sa Dios kanato (tan-awa sa Mateo 25:14–30). Kini nga mga gasa naglakip sa kahibalo, mga gasa, o mga abilidad nga gihatag Niya kanato.

Sa atong dispensasyon, gitumong sa Manluluwas ang mga talento ngadto sa Iyang mga pagtulun-an ngadto sa usa ka grupo sa mga elder nga gitawag sa pagsangyaw sa ebanghelyo. Dapita ang mga estudyante nga basahon ang Doktrina ug mga Pakigsaad 60:1–3, 13, nga pangitaon ang tambag sa Ginoo. Hangyoa sila nga hunahunaon kon sa unsang paagi kini nga tambag may kalabotan sa mga abilidad nga gihatag sa Ginoo kanato.

Pwede kang mangutana sama sa mosunod aron tabangan ang mga estudyante nga ipakigbahin ang ilang mga panglantaw:

• Unsa ang bililhong gasa nga gihatag sa Ginoo niini nga mga elder nga wala nila gigamit o gipakigbahin ngadto sa uban? (Kon gikinahanglan, tabangi ang mga estudyante nga masabtan nga gihatagan sila sa Ginoo og kahibalo sa Iyang ebanghelyo. Ang Ginoo wala mahimuot sa pagkadili andam sa mga elder sa pag-abli sa ilang mga ba-ba aron ipakigbahin ang ebanghelyo.)

• Unsa ang kamatuoran nga imong nakat-onan gikan niini nga mga bersikulo bahin sa unsay angay natong himoon sa mga gasa ug mga panalangin nga gihatag sa Dios kanato?

Ang mga estudyante mahimong makaila sa kamatuoran nga susama sa mosunod: Nagdahom ang Ginoo nga gamiton nato ang mga panalangin nga Iyang gihatag kanato.

• Sa imong hunahuna, sa unsang paagi kini nga kamatuoran mahimong magamit sa atong mga talento ug mga abilidad?

• Unsa ang kalainan nga mahimo sa pagpili nga gamiton o dili gamiton ang atong mga talento ug mga bilidad diha sa atong kinabuhi ug sa kinabuhi sa uban?