Pagmalamposon sa Pag-eskwela

Pagmalamposon sa Pag-eskwela

Kinatibuk-ang Pagpasabot

Samtang ilakip nato ang Ginoo diha sa atong pagkat-on, matabangan kita Niya nga magmalamposon sa atong pag-eskwela. Atong masunod ang ehemplo ni Jesukristo pinaagi sa paglihok uban ang integridad diha sa atong mga buluhaton sa ekwelahan. Ang paghinumdom sa Ginoo ug unsa ang Iyang mabuhat kanato nahatag kanato og kompiyansa sa kaugalingon nga mabuntog ang mga hagit sa pag-eskwela.

Sugyot sa gipaspason: Ikonsiderar ang pagtudlo sa pipila o ang katibuk-an niini nga mga leksiyon sa sinugdanan sa tuig sa pag-eskwela. Ang paghimo sa ingon makatabang sa mga estudyante nga makakat-on og bililhong mga kahanas nga makatabang nila nga makasinati sa kalamposan sa ilang akademiya nga pag-eskwela sa tibuok tuig.

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Paglakip sa Ginoo diha sa Imong Pagkat-on

Katuyoan sa leksiyon: Aron tabangan ang mga estudyante nga iapil ang Ginoo sa matag aspeto sa ilang pag-eskwela samtang nagtinguha sila sa pagkat-on pinaagi sa pagtuon ug sa hugot nga pagtuo.

• Pagpangandam sa estudyante: Dapita ang mga estudyante sa paghunahuna bahin usa ka pihong panahon dihang kinahanglan nilang kat-onan ang usa ka butang nga bag-o o lisod. Patambonga sila nga andam sa pagpakigbahin kon giunsa nila paglakip ang Langitnong Amahan ug si Jesukristo diha sa ilang pagkat-on.

• Sulod nga ipakita: Ang upat ka pamahayag sa pagsusi sa kaugalingon sa sinugdanan sa leksiyon

• Bidyo: “Becoming More in Christ: The Parable of the Slope” (10:01; tan-awa gikan sa time code 0:00 hangtod 1:05)

Integridad sa Atong Pag-eskwela

Katuyoan sa leksiyon: Aron tabangan ang mga estudyante nga molihok nga mas matinuoron ug mas may integridad diha sa ilang pag-eskwela.

• Pagpangandam sa estudyante: Dapita ang mga estudyante nga pamalandongan ang milabay nga mga sitwasyon diha sa ilang mga buluhaton sa eskwelahan diin sila nag-atubang og kapilian sa pagpanikas o paglihok nga malimbongon ug mipili nga dili kini himoon. Dapita sila sa pagpamalandong kon nganong sakto ang ilang gihimo ug kon unsay naghatag nilag kalig-on nga kini ang himoon.

• Bidyo: “Honesty: You Better Believe It!” (4:46)

Pagpangandam alang sa mga Pasulit ug Lisod nga mga Proyekto

Katuyoan sa leksiyon: Aron tabangan ang mga estudyante nga masabtan ang mga paagi nga malamposong makapangandam para sa mga pasulit ug lisod nga mga proyekto.

• Pagpangandam sa estudyante: Ikonsiderar ang pagdapit sa mga estudyante nga maghunahuna og usa ka higayon sa dihang ilang nabati nga gitabangan sila sa Manluluwas sa lisod nga eksamin o proyekto sa eskwelahan. Dasiga sila nga mamalandong ug motambong nga andam sa pagpakigbahin kon unsay ilang gibati sa pagdawat sa Iyang tabang.

• Sulod nga ipakita: Mga pangutana nga ikonsiderar sa mga estudyante iubos sa ulohan nga “Paghatag og tambag”

Panghunahuna nga Molambo Pa

Katuyoan sa leksiyon: Aron tabangan ang mga estudyante nga makaugmad og panghunahuna nga molambo pa aron makaya ang mga babag sa pagkat-on.

• Pagpangandam sa estudyante: Dapita ang mga estudyante sa paghunahuna bahin sa mga babag nga ilang giatubang diha sa pag-eskwela o pagkat-on. Dasiga silang pamalandongan kon unsaon nila pagtubag dihang mag-atubang niini nga mga babag.

• Sulod nga ipakita: Mga kahulogan sa mga panghunahuna nga mouswag pa ug panghunahuna nga dili na mausab; tsart nga nagpakita sa mga pamahayag sa panghunahuna nga dili na mausab ug panghunahuna nga mouswag pa