“Leksiyon 197—Pagpangandam alang sa mga Pasulit ug Lisod nga mga Proyekto: ‘Kon Kamo Andam Dili Kamo Mahadlok,’” Manwal sa Magtutudlo sa Seminary sa Doktrina ug mga Pakigsaad (2025)
“Pagpangandam alang sa mga Pasulit ug Lisod nga mga Proyekto,” Manwal sa Magtutudlo sa Seminary sa Doktrina ug mga Pakigsaad
Leksiyon 197: Pagmalamposon sa Pag-eskwela
Pagpangandam alang sa mga Pasulit ug Lisod nga mga Proyekto
“Kon Kamo Andam Dili Kamo Mahadlok”
Sa atong mga paningkamot nga makakuhag edukasyon, sagad tagaan kita og lisod nga mga buluhaton nga kinahanglang kompletohon. Samtang modangop ang kabatan-onan kang Jesukristo ug buhaton ang ilang bahin sa pagpangandam ug pagpaningkamot sa pag-eskwela, makatabang nila ang Manluluwas nga mabalanse ang mga buluhaton sa eskwelahan. Kini nga leksiyon makatabang sa mga estudyante nga masabtan ang mga paagi nga malamposong makapangandam para sa mga pasulit ug lisod nga mga proyekto.
Posibleng mga Kalihokan sa Pagkat-on
Pagpakigbisog sa mga pasulit ug mga proyekto sa eskwelahan
Ikonsiderar ang pagsugod sa klase pinaagi sa pagpakigbahin sa mosunod nga mga senaryo. Imbes ipakigbahin ang tibuok senaryo, pwede nimong ipakigbahin ang unang kapahayag sa matag usa ka senaryo ug dayon hangyoa ang mga estudyante nga maghatag og mga rason kon nganong mao kana ang gibati ni Sam ug Emma.
Dili ganahan si Sam sa mga pasulit sa eskwelahan kay maglisod siya niini. Sagad mabalaka kaayo siya dihang mokuha siya og pasulit ug morag malimtan ang kadaghanan sa iyang nakat-onan.
Naglisod ni Emma dihang gitagaan siyag dakong proyekto o mga buluhaton sa iyang mga klase sa eskwelahan. Siya mibati nga nabug-atan sa gidaghanon sa trabaho nga kinahanglan niyang himoon ug mag-unya-unya hangtod nga usa o duha na lang ka adlaw sa dili pa ipasa ang proyekto o ang buluhaton. Ingon nga resulta, ang ipasa sagad nga wala mahuman o dili maayo ang pagkahimo.
Dapita ang mga estudyante nga hunahunaon ang mga panahon dihang mobati sila nga sama kang Sam o Emma. Ipasabot nga sagad sa mga estudyante ang maglisod sa ilang pagsalig sa kaugalingon diha sa eskwelahan, ilabina dihang mag-eksamin ug kon naay lisod nga mga proyekto. Makatabang tingali ang pagpahinumdom nila nga ang pagkat-on usa ka tibuok kinabuhi nga proseso. Ania kita niini nga yuta aron makakat-on ug mouswag.
Dapita ang mga estudyante nga samtang nagtuon bantayan ang mga espirituwal nga mga kamatuoran ug impresyon nga makatabang nilang magmalamposon sa mga pasulit o proyekto sa eskwelahan samtang nagtuon sila karon.
Pagkat-on gikan sa mga kasulatan
Ipasabot nga ang mga kasulatan dili piho nga nagtudlo kon sa unsang paagi mangandam para sa mga pasulit o proyekto sa eskwelahan. Apan, samtang atong ipahisama ang kasulatan (tan-awa sa 1 Nephi 19:23), makakita kita sa mga kamatuoran nga makatabang nato sa lainlaing paagi,lakip na kon mag-atubang kita og mga hagit sa atong edukasyon.
Ikonsiderar ang pagbahin sa klase ngadto sa ginagmay nga mga grupo aron kompletohon ang mosunod nga kalihokan.
Pangitaa diha sa mga kasulatan ang mga kamatuoran nga motabang nimo sa imong mga paningkamot nga molampos sa mga eksaminasyon ug proyekto sa eskwelahan. Pwede kang mangitag kaugalingon nimong mga tudling sa kasulatan, o pwede nimong tun-an ang pipila o ang tanan sa mosunod nga mga tudling:
-
Unsang mga kamatuoran ang imong nakita nga motabang nimo nga molampos sa mga pasulit o mga proyekto sa eskwelahan?
Aron tabangan ang mga estudyante nga tudloan ang usag usa, ikonsiderar ang pagdapit nila nga ilista sa pisara ang mga kamatuoran nga ilang nakita.
Angayng mailhan sa mga estudyante ang daghang kamatuoran gikan sa kasulatan nga ilang gitun-an. Niay pipila ka ehemplo: kayang lamdagan sa Espiritu Santo ang akong hunahuna (tan-awa sa Doktrina ug mga Pakigsaad 6:15); kon andam ko, dili ko mahadlok (tan-awa sa Doktrina ug mga Pakigsaad 38:9, 30); samtang kanunay kong mag-ampo, ipahinungod sa Dios ang akong hinimoan alang sa kaayohan sa akong kalag (tan-awa sa 2 Nephi 32:8–9); mahimo nako ang tanang butang pinaagi kang Jesukristo (tan-awa sa Mga Taga-Filipos 4:13).
Ikonsiderar ang pagdapit og daghang estudyante sa pagtubag sa una sa mosunod nga mga pangutana. Pwede nimong ipasabot ang mga kamatuoran diha sa pisara ug dapita ang mga estudyante nga misulat niini nga tubagon ang maong pangutana diha sa ilang hunahuna.
-
Sa imong hunahuna, sa unsang paagi ang mga kamatuoran nga imong nakita nga makatabang nimo sa mga pasulit o proyekto sa eskwelahan?
-
Unsa ang pipila ka paagi nga matabangan ka sa Ginoo sa imong mga buluhaton sa eskwelahan samtang imong gamiton kini nga mga kamatuoran diha sa imong pagtuon?
Ingon nga kabahin sa inyong panaghisgot sa nag-unang mga pangutana, ikonsiderar ang paghangyo sa pipila ka estudyante nga ipakigbahin ang mga ehemplo kon sa unsang paagi sila nakadawat og tabang sa Ginoo diha sa ilang mga buluhaton sa eskwelahan. Dapita sila sa pagpakigbahin kon sa unsang paagi ang maong mga kasinatian nakaapektar sa ilang pagbati para sa Manluluwas.
Paghatag og tambag
Kini nga bahin sa leksiyon gituyo aron tabangan ang mga estudyante nga maghunahuna og pihong mga paagi nga makapangandam sila aron magmalamposon sa lisod nga mga pasulit o mga proyekto. Aron mahimo kini, pwede nimong ipakita ang mosunod nga mga instruksiyon ug hatagig panahon ang mga estudyante nga motubag uban sa usa ka pares o gamayng grupo.
Handurawa nga aduna kay kahigayonan sa paghatag og tambag sa usa ka tawo nga parehas ni Sam o Emma bahin kon unsaon aron magmalamposon sa mga pasulit o sa lisod nga mga proyekto sa eskwelahan. Isulat ang tambag nga imong ihatag. Iapil ang mga hugpong sa mga pulong gikan sa mga kasulatan nga para nimo makatabang. Ang mosunod nga mga pangutana makagiya sa imong tubag:
-
Unsay makatabang nimo nga mahinumdoman ug magamit ang imo nang nakat-onan?
-
Sa unsang paagi nimo malikayan nga mabalda samtang nagtuon?
-
Unsay makatabang nimo nga dili mag-unya-unya?
-
Unsay makatabang aron mapauswag nimo ang katakos sa klaro nga paghunahuna?
-
Unsay imong mahimo aron imong maapil ang Ginoo diha sa imong pagpangandam?
Human makabaton og igong panahon ang mga estudyante nga makatubag, dapita silang ipakigbahin ang ilang mga tubag diha sa klase. Pwede nimong isulat sa pisara ang mga panabot nga gipakigbahin ug dasiga ang mga estudyante nga irekord diha sa ilang mga journal sa pagtuon ang tambag nga ila nang nahunahunaan. Pwede pod nimong dapiton ang mga estudyante nga ipakigbahin ang mga ehemplo kon sa unsang paagi ang pipila niini nga mga sugyot nakatabang kanila.
Kon nagkinahanglan og tabang ang mga estudyante sa paghunahuna sa mga ideya, ikonsiderar ang paghatag og pipila ka sugyot, apil ang pipila sa mosunod:
-
Isulat kon unsay imong nakat-onan sa klase ug kanunay kining rebyohon. Ipasabot usay imong nakat-onan sa usa ka classmate, sakop sa pamilya, o higala.
-
Ipalayo ang imong selpon ug i-block ang akses ngadto sa makabalda nga mga site sa internet samtang nagtuon.
-
Anam-anama ang pagtuon ug bahina kini sulod sa daghang mga adlaw o mga semana. Paghimog eskedyul ug sunda kini. Kon maowahi ka, ayawg hulata nga moabot ang kataposan aron ka makaapas.
-
Pangitag hilom nga lugar aron magtuon, ug pagtuon sa mga oras nga dili kaayo ka kapoy. Atimana ang imong lawas pinaagi sa pagkaon og sustansyadong pagkaon, pagkatulog og eksakto, ug regular nga pag-ehersisyo.
-
Paggahin og panahon sa pagtudlo ug pag-andam sa imong espiritu pinaagi sa pagtuon sa kasulatan. Pag-ampo ug pagpuasa usahay alang sa tabang ug giya.
Ang ubang mga ideya nga makatabang sa mga eksamin sa eskwelahan anaa sa seksiyon nga “Dugang nga mga Kalihokan sa Pagkat-on”.
Hunahunaa ang imong nakat-onan
Dapita ang mga estudyante sa pagpamalandong sa ilang nakat-onan ug gibati sa leksiyon nga makatabang sa ilang kinabuhi. Usa ka paagi sa pagbuhat niini mao ang pagpatubag sa mga estudyante sa mosunod nga pangutana diha sa ilang mga journal sa pagtuon.
-
Unsay imong nakat-onan o gibati karon nga gusto nimong hinumdoman?
-
Unsa ang pipila sa mga estratehiya nga imong nakat-onan karon ang gusto nimong gamiton sa imong pagtuon?
Ikonsiderar ang pagpahinumdom sa mga estudyante nga ang malamposong tigkat-on nagkinahanglan og panahon, pagpangandam, pailob, ug praktis. Dasiga sila sa pagpadayon nga pagsalig sa Manluluwas alang sa tabang ug giya.