Leksiyon 196: Pagmalamposon sa Pag-eskwela

Integridad sa Atong Pag-eskwela

“Kami Nagtuo sa Pagkamatinuoron”

Samtang naningkamot kita nga mahimong angayan ug sinaligang disipulo ni Jesukristo, importante nga naay pagkamatinuoron ug integridad ang atong mga kasingkasing. Kini nga leksiyon makatabang sa mga estudyante nga molihok nga mas matinuoron ug mas may integridad diha sa ilang pag-eskwela.

Posibleng mga Kalihokan sa Pagkat-on

Pagpili sa pagkamatinuoran ug integridad

Dapita ang mga estudyante sa pagpakigbahin og mga senaryo o sitwasyon diha sa eskwelahan diin masulayan tingali ang integridad sa usa ka tawo. Ipakigbahin ang mosunod nga mga ehemplo kon gikinahanglan.

1. Hapit na ang inyong importanteng eksamin. Nabantayan sa imong klasmeyt ang kopya sa mga tubag sa eksamin diha sa lamesa sa magtutudlo ug gikuhaan kini niyag litrato gamit ang iyang selpon. Gipadad-an ka niyag kopya sa litrato ug ang daghan pang laing mga estudyante.

2. Kinahanglan kang magsulat og saysay para sa klase apan wala ka mogahin og panahon sa pagbuhat niini. Misugyot ang usa ka higala nga pwede kang mogamit og online software nga maoy mosulat sa imong artikulo para nimo. O pwede nimong i-paste ang mga seksiyon gikan sa lainlaing artikulo gikan sa internet ug iapil ang pipila sa kaugalingon nimong mga kapahayag aron nga morag ikaw ang nagsulat. Miingon ang imong higala nga gihimo na ni niya sa una ug wala makabantay ang magtutudlo.

   • Unsay sangpotanan sa usa ka tawo nga maghunahuna nga maayong ideya kini nga mga binuhatan?

   • Unsay makatabang nimo nga masayod kon unsay buhaton niini nga mga situwasyon?

Ipasabot nga kini nga leksiyon magtutok sa kaimportante sa pagkamatinuoron ug integridad sa pag-eskwela. Dapita ang mga estudyante nga ipakigbahin ang unsay ilang nahibaloan bahin sa integridad. Ang mosunod nga pamahayag ni Elder Joseph B. Wirthlin makatabang tingali nga kapanguhaan.

Gihatagan og kahulogan ni Elder Joseph B. Wirthlin (1917–2008) sa Korum sa Napulog Duha ka Apostoles ang integridad sa mosunod nga paagi:

Ang kaligdong nagpasabot nga kanunayng maghimo kon unsa ang husto ug maayo, bisan unsa pa man ang hinanaling mga sangpotanan. Nagpasabot kini nga magmatarong gikan gayod sa kinahiladman sa atong kalag, dili lamang diha sa atong mga lihok apan, mas importante, diha sa atong mga hunahuna ug sa atong mga kasingkasing. Ang personal nga kaligdong nagpasabot sa ingon nga pagkamasaligan ug dili madala sa kahiwian nga kita dili makahimo sa ingon nga pagluib ngadto sa usa ka pagsalig o pakigsaad. …

Ang kalibotan nagkinahanglan kaayo og mga tawo nga naay integridad. Halos kada adlaw kita makadungog og pagpangilad, sayop nga paggamit sa pondo, sayop nga pag-endosar sa produkto, o uban pang pagpakiglabot nga gidisenyo aron makabentaha pinaagi sa pagpanikas o pagpanglingla. Gidumtan sa Ginoo ang maong buhat. (Joseph B. Wirthlin, “Personal Integrity,” Ensign, Mayo 1990, 30, 32)

• Sa unsang paagi nimo nabantayan ang panginahanglan sa integridad sa kalibotan karon?

Ang mosunod nga sugyot makatabang sa mga estudyante nga susihon ang kaugalingon nilang mga hunahuna bahin sa kaimportante sa paglihok uban ang integridad diha sa ilang pag-eskwela: Dapita sila nga mangitag blangko nga papel diha sa ilang mga journal sa pagtuon ug butangi kinig label nga “Nganong importante para nako ang integridad diha sa pag-eskwela.” Hangyoa ang mga estudyante sa paglista sa tanang mga rason kon nganong importante nila ang integridad. Dihang mahuman na sila, pwedeng ipakigbahin sa pipila ka boluntaryo ang ilang mga rason diha sa klase.

Dasiga ang mga estudyante nga padayong magdugang og mga ideya, mga kamatuoran, ug mga kasulatan diha sa ilang listahan sa tibuok leksiyon.

Gusto sa Langitnong Amahan ug ni Jesukristo nga molihok kita uban ang integridad

Ipasabot nga ang pagsabot sa karakter ug mga pagtulun-an sa Langitnong Amahan ug ni Jesukristo motukmod nato sa paglihok nga adunay integridad. Ikonsiderar ang pagdapit sa mga estudyante nga himoon ang mosunod nga kalihokan sa pagtuon uban ang usa ka pares o gamayng grupo.

Basaha ang mosunod nga mga kasulatan, nga mangita sa mga pagtulun-an nga makatabang nato nga mas tinguhaon nga molihok uban ang integridad: 3 Nephi 27:18; Ether 3:11–12; Doktrina ug mga Pakigsaad 3:2; 51:9; 124:15, 20; Mga Artikulo sa Hugot nga Pagtuo 1:13.

• Unsang mga kamatuoran ang imong nakat-onan gikan niini nga mga bersikulo bahin sa kaimportante sa pagkamatinuoron ug integridad diha sa atong kinabuhi?

  Dapita ang mga estudyante nga ipakigbahin ang daghang kamatuoran nga ilang nakat-onan. Pwede nilang mailhan ang mga kamatuoran nga parehas sa mosunod: Ang Langitnong Amahan ug si Jesukristo maoy hingpit nga matinuoron. Dihang molihok kita uban ang pagkamatinuoron ug integridad, mas mahisama kita Nila.

• Unsay nakapalisod sa paglihok uban ang pagkamatinuoron ug integridad diha sa atong pag-eskwela?

Si Elder Neil L. Andersen sa Korum sa Napulog Duha ka Apostoles mitudlo sa epekto sa integridad diha sa atong espirituwal nga pag-uswag:

Adunay dako kaayo nga espirituhanong gahom sa pagpabiling matinuoron bisan og ang mga sangputanan sa inyong pagkamatinuoron ingon og dili makaayo. Matag usa kaninyo moatubang sa maong mga desisyon. Kining maong higayon mosulay sa inyong kaligdong. Samtang kamo mopili sa pagkamatinuoron ug kamatuoran—bisan ang sitwasyon mahitabo o dili sumala sa inyong gilaoman—kamo mahibalo nga kining importante nga kinasang-an maoy mahinungdanong mga haligi sa kalig-on sa inyong espirituhanong paglambo. (Neil L. Andersen, “Ang Balaan nga Sumbanan sa Pagkamatinuoron,” Liahona, Ago. 2017, 40)

• Unsay mga kaayohan ug mga panalangin sa pagkamatinuoron ug pagbaton og integridad diha sa trabahoan ug eskwelahan?

Dapita ang mga estudyante sa pagpakigbahin sa ilang mga kasinatian dihang ilang nakita ang mga panalangin sa Ginoo tungod sa pagpakitag integridad sa ilang pag-eskwela. Pwede nimong ipasalida ang bidyo nga “Honesty: You Better Believe It!” (4:46), nga anaa sa ChurchofJesusChrist.org, aron tabangan ang mga estudyante nga makita ang mga ehemplo sa integridad.

Gamita ang imong nakat-onan

Pahinumdomi ang mga estudyante sa ilang balaanong pagkatawo isip mga anak sa mahigugmaon nga langitnong mga ginikanan. Kabahin kini kon si kinsa sila, apil na ang pag-eskwela. Samtang ilang sundon si Jesukristo ug molihok uban ang pagkamatinuoron ug integridad, kini nga mga hiyas makapalahi nila gikan sa kalibotan.

Si Presidente Russell M. Nelson mitudlo:

Ang imong bililhon nga pagkatawo takos sa imong bililhong kaligdong! Bantayi kini isip ang ganti nga bililhon kaayo nga kini mao. (Russell M. Nelson, “Integrity of Heart” [debosyonal sa Brigham Young University, Peb. 23, 1993], 7, speeches.byu.edu)

Aron tabangan ang mga estudyante nga ikonsiderar kon unsaon sa pagpanalipod o pagpalambo sa ilang pagkamatinuoron ug integridad, hangyoa sila nga tubagon ang pipila o ang tanan sa mosunod nga mga pangutana diha sa ilang mga journal sa pagtuon.

• Unsay imong gibati karon bahin sa integridad sa pag-eskwela nga gusto nimong hinumdoman?

• Unsay imong nakat-onan bahin sa Langitnong Amahan ug kang Jesukristo nga motabang nimo dihang tentalon ka sa paglihok uban ang pagkadili-matinuoron?

• Unsa ang usa o duha ka aksyon nga imong himoon aron madugangan ang imong pagkamatinuoron ug integridad sa pag-eskwela?

Ikonsiderar ang pagdapit sa pipila ka estudyante nga andam ipakigbahin ang ilang mga tubag. Pamatud-i ang mga kamatuoran nga imong gihisgotan, ug dasiga ang mga estudyante nga molihok uyon sa ilang mga plano.

Dugang nga mga Kapanguhaan

Unsay koneksyon sa pagkamatinuoron ngadto sa pagkat-on?

Ang Langitnong Amahan gusto nga ang Iyang mga anak nga babaye ug mga anak nga lalaki kanunayng makakat-on. Kamo adunay temporal ug espirituhanong mga rason sa pagtinguha ug mahalon ang pagkat-on. Ang edukasyon dili lang mahitungod sa pagkita og kwarta. Kini kabahin sa inyong mahangtoron nga tumong sa pagkahimong mas sama sa Langitnong Amahan.

Ang pagpakabuhi nga may kaligdong nagpasabot nga kamo mohigugma sa kamatuoran sa tibuok ninyong kasingkasing—labaw pa kay sa kamo mohigugma sa personal nga kahupayan, ka ilado, o kasayon. Nagpasabot kini sa pagbuhat sa unsay matarong tungod lang kay kini husto. (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 31)

Unsaon nako pagpadayon sa pag-ugmad og personal nga integridad?

Si Presidente Russell M. Nelson mitudlo:

Ang maayong panahon sa pagsusi sa kaugalingon atol sa pribadong personal nga pag-ampo. Sa buntag iapil tinghali sa pag-ampo ang pagkamatinuoron, pagkaputli, hiyas, o bisag ang simpleng pagserbisyo sa uban. Sa gabii naa tingali mubong pagsusi para sa maong mga hiyas. Una, iampo nga magpadayon ang imong espirituwal nga integridad, ug dayon paningkamotan kini. Kon naa kay makitang bisan unsang sayop, sugdi ang proseso sa pagtul-id dayon niini nga mahimong proteksyon aron dili na mas madaot ang pisi nga naa nay guna. (Russell M. Nelson, “Integrity of Heart” [debosyonal sa Brigham Young University devotional, Peb. 23, 1993], 4, speeches.byu.edu)

Nganong kinahanglan kong molihok uban ang pagkamatinuoron ug integridad diha sa akong mga buluhaton sa eskwelahan?

Si Elder David A. Bednar sa Korum sa Napulog Duha ka Apostoles mitudlo bahin sa epekto kanato sa pagkadili-matinuoron diha sa eskwelahan:

Ang pagpanikas diha sa mga buluhaton sa eskwelahan wala magsubay sa mga baroganan, dili-matinuoron, ug usa ka klase sa paglimbong sa kaugalingon ug pagluib. Dili makalaom ang estudyante nga molampos siya sa usa ka karera o propesyon kon ang pagpanglimbong ang iyang pondasyon niini. (David A. Bednar, “Be Honest,” New Era, Okt. 2005, 6)

Si Presidente James E. Faust (1920–2007) sa Unang Kapangulohan mipasabot:

Kitang tanan angayng mahibalo sa kahulogan sa pagkahimong matinuoron. Ang pagkamatinuoron mas labaw pa kay sa dili pagpamakak. Pagsulti kini sa tinuod, pagpakabuhi nga matinuoron, ug paghigugma sa kamaturoan. …

Ako nanghinaot nga prangka nga mosulti kaninyo bahin sa pagkamatinuoron. Ang pagkamatinuoron maoy usa ka moral nga kompas nga mogiya sa atong kinabuhi. … Apan, ang grabeng pagpugos nga mahimong labing maayo diha sa sekyular nga pagkat-on usahay maoy motental sa mga tawo nga ikompromiso … ang ilang pagkamatinuoron ug integridad.

Ang pagpanikas diha sa eskwelahan maoy usa ka klase sa paglimbong sa kaugalingon. Moeskwela kita aron makakat-on. Gitikasan nato ang atong kaugalingon kon magsalig kita sa mga paningkamot ug pagtuon sa uban. (James E. Faust, “Honesty—a Moral Compass,” Ensign, Nob. 1996, 41, 42)

Dugang nga mga Kalihokan sa Pagkat-on

Pagbarog uban ang integridad

Aron tabangan ang mga estudyante nga masabtan ang kaimportante sa pagbarog uban ang integridad, ikonsiderar ang pagpakita sa mosunod.

Si Elder Ronald A. Rasband sa Korum sa Napulog Duha ka Apostoles mitudlo:

Unsay kahimtang sa imong kinabuhi karon? Makasalig ba ang Ginoo kanimo ug sa imong integridad ingon nga matuod nga miyembro sa Iyang Simbahan? …

Samtang atong nakita nga nagkahugno ang sumbanan sa kalibotan gikan sa tanang direksyon, sagad kinahanglan kitang mobarog nga malig-on, depensahan ang atong tinuohan, ug suportahan ang integridad sa ebanghelyo. Hinumdomi ang tambag ni Helaman nga dihang gitukod ka “diha sa bato nga mao ang atong Manunubos, nga si Kristo, ang Anak sa Dios,” ang nagsingabot nga “mapintas nga unos … walay gahom batok kaninyo sa pagbitad kaninyo … , tungod sa bato diin kamo natukod [Helaman 5:12]. (Ronald A. Rasband, “Integrity of Heart,” [debosyonal sa Brigham Young University, Marso 13, 2018], 4, speeches.byu.edu)

Pahisgoti sa mga estudyante ang mga paagi nga lig-on silang makabarog uban ang integridad diha sa kalibotan karon.

Pagdrowing og yano nga tawo o litrato sa usa ka estudyante diha sa pisara, o hangyoa ang usa ka estudyante nga andam ipakigbahin ang ilang maayong talento sa pagdrowing. Ipasabot nga nagrepresentar kini sa mga estudyante.

Pangutan-a ang mga estudyante:

• Unsa ang pipila sa mga nahugno na nga sumbanan sa kalibotan karon nga imong giatubang? (Isulat ang ilang mga tubag palibot sa drowing nga estudyante, nga naay mga arrow nga nagtudlo sa drowing nga estudyante nga daw nagpakita sa daghang butang nga giatubang sa mga estudyante karon.)

• Unsang mga kinaiya ni Jesukristo nga makatabang nimo nga lig-ong makabarog uban ang integridad? (Isulat ang ilang mga tubag diha sa tiilan o ubos sa drowing nga estudyante diha sa pisara.)

Dasiga ang mga estudyante nga sundon ang panig-ingnan ni Jesukristo samtang nag-atubang silag mga hagit nga magsulay sa ilang integridad.

Unsa ang plagiarism?

Kon nagkinahanglan og tabang ang mga estudyante sa pagsabot sa plagiarism ug kon unsay koneksyon niini ngadto sa integridad sa pag-ekswela, pwede nimong ipakigbahin ang mosunod nga pagpasabot ug tsart.

Ang paggamit sa mga pulong sa uban nga morag imoha kini nga dili ilhon nga gikan sa uban ang maong mga pulong o hisgotan kon kinsa ang orihinal nga tagsulat mao ang gitawag og plagiarism. Ang plagiarism maoy dili matinuoron ug usa ka klase sa pagpanikas. Ang pipila ka estudyante nahagbong ang mga grado o gipapahawa sa eskwelahan kay naghimog plagiarism. Daghan ang nawad-an og trabaho tungod sa plagiarism.

Paghimo og duha ka kolum sa pisara. Butangi og label nga Unsa ang Plagiarism ug ang lain Unsay Dili Plagiarism. Ikonsiderar ang pagprinta sa mosunod nga tsart ug guntinga ang matag sitwasyon ngadto sa mga kwadro. Ipabutang sa mga estudyante ang mga kwadro sa haom nga mga kolum.

Unsay ang Plagiarism	Unsay Dili Plagiarism
Unsay ang Plagiarism Pagkopya sa makita nimo sa internet o sa asaynment sa uban ug moingon nga ikaw ang nagsulat ani.	Unsay Dili Plagiarism Paggamit sa mga pulong sa uban apil ug lakip ang pakisayran kon kinsay nag-ingon sa maong mga pulong.
Unsay ang Plagiarism Pagkopya sa mga pulong sa uban ug pag-ilis sa usa o duha ka pulong diha sa parapo.	Unsay Dili Plagiarism Pagbasa mahitungod sa hilisgotan ug pagsulat sa imong nakat-onan gamit ang kaugalingon nimong mga pulong, apil ang pakisayran sa orihinal nga tagsulat.
Unsay ang Plagiarism Ilakip ang piho nga mga kamatuoran o estatistika nga nakita nimo gikan sa ubang tinubdan nga dili ilhon nga gikan kini sa maong mga tinubdan.	Unsay Dili Plagiarism Katibuk-ang mga pamahayag nga dili pihong gisulti sa usa ka tawo, sama sa: Asul ang langit. Ang Dios nahigugma kanimo.
Unsay ang Plagiarism Naggamit lamang sa mga ideya ug panghunahuna sa uban diha sa imong gisulat.	Unsay Dili Plagiarism Paggamit sa kadaghanan sa imong kaugalingon nga mga hunahuna o mga ideya.