Leksiyon 195: Pagmalamposon sa Pag-eskwela

Paglakip sa Ginoo diha sa Imong Pagkat-on

“Ako Maguban Kanimo”

Gusto kitang tabangan sa Langitnong Amahan ug ni Jesukristo sa tanang aspeto sa atong kinabuhi, apil ang atong mga paningkamot nga makakat-on ug makakuhag pormal nga edukasyon. Kini nga leksiyon makatabang sa mga estudyante sa pag-apil sa Ginoo sa tanang aspeto sa ilang pag-eskwela samtang nagtinguha sila sa pagkat-on pinaagi sa pagtuon ug sa hugot nga pagtuo.

Posibleng mga Kalihokan sa Pagkat-on

Lisod nga mga sitwasyon

Pwede nimong sugdan ang klase pinaagi sa pagpakigbahin sa mosunod nga mga sitwasyon ug hisgotan kini diha sa klase. Kon gikinahanglan, ipahaom ang mga sitwasyon aron mas mohaom sa panginahanglan sa imong mga estudyante.

Handurawa ang imong kaugalingon nga anaa sa usa o daghan pa sa mosunod nga mga sitwasyon:

• Nawad-an ka og gana sa usa ka klase sa eskwelahan ug gusto na kang moundang.

• Ikaw adunay mga pangutana bahin sa pagpadayon sa imong pag-eskwela dihang batan-on nga hamtong na ang imong pangidaron. Wala ka mahibalo kon asa ka mopadayon og eskwela o kon mopadayon ba gyod ka.

• Unang semana nimo sa imong bag-ong trabaho, ug mibati ka nga kulang ang imong kahibalo para sa trabaho o sa mga buluhaton.

Unsay imong buhaton kon ikaw pay naa sa usa niini nga mga sitwasyon? Kinsa imong dangpan alang sa tabang?

Ikonsiderar ang pagpangutana sa mga estudyante kon sila ba o mga tawo nga ilang nailhan nakasinati sa mga sitwasyon nga parehas niini. Pwede nimo silang dapiton nga ipakigbahin ang gihimo nila o sa ilang kaila aron makadawat og tabang.

Ipasabot nga niini nga leksiyon, makakat-on ang mga estudyante bahin sa kaimportante sa paglakip sa Ginoo sa tanang aspeto sa ilang kinabuhi, apil ang ilang edukasyon. Aron tabangan silang mangandam sa pagtuon niini nga hilisgotan, ipakita ang mosunod nga mga pangutana ug dapita ang mga estudyante nga tubagon kini sa ilang mga journal sa pagtuon.

Paggahin og panahon sa pagpamalandong sa mosunod nga mga pamahayag gamit ang sukdanan nga 1 (dili gayod) hangtod 5 (sagad kaayo):

1. Mag-ampo ko sa Langitnong Amahan alang sa tabang sa dili pa ko magsugod og tuon o sa dili pa nako sugdan ang usa ka proyekto para sa eskwelahan.

2. Sa akong personal nga mga pag-ampo, ipahayag nako sa akong Langitnong Amahan ang akong tinguha nga mabatonan ang Espiritu uban nako samtang nagkat-on ko sa eskwelahan.

3. Regular nakong gisulayan nga mas maningkamot pa aron makakat-on sa tabang ni Jesukristo.

4. Ako misalig ug miila sa tabang sa Espiritu diha sa akong pagkat-on ug pag-eskwela.

Dapita ang mga estudyante sa pagpangita sa mga pagtulun-an nga makatabang nila nga mas ilakip ang Ginoo diha sa ilang pagkat-on ug pag-eskwela.

Pagkat-on gikan sa mga tigkat-on diha sa mga kasulatan

Ipasabot nga ang mga kasulatan adunay daghang mga ehemplo sa mga tawo nga gilakip ang Ginoo aron matabangan sila nga makasabot ug mabuntog ang mga hagit. Ikonsiderar ang paggrupo-grupo sa klase aron kompletohon ang mosunod nga kalihokan. Ihatag sa matag grupo ang usa sa mosunod nga mga ehemplo, ug dayon hisgoti ang duha ka pangutana nga nagsunod.

Tun-i ang mosunod nga mga kasulatan bahin sa mga tawo nga nag-atubang og lisod ug dili segurado nga mga sitwasyon. Pangitag mga ehemplo kon sa unsang paagi gilakip niini nga mga indibidwal ang Ginoo samtang nagtinguha sila og pagsabot.

• Joseph Smith (Joseph Smith—Kasaysayan 1:10–18)

• Nephi (1 Nephi 11:1–9)

• Igsoon nga lalaki ni Jared (Ether 1:38–42; 2:22–25; 3:1–6)

• Giunsa paglakip niining mga tawhana ang Ginoo diha sa ilang pagkat-on?

• Sa unsang mga paagi sila gitabangan sa Ginoo?

  Human makabaton ang mga estudyante og igong panahon sa pagtuon ug panaghisgot, dapita ang mga sakop sa matag grupo nga ireport ang ilang gihisgotan pinaagi sa pagpakigbahin sa ilang mga tubag sa nag-unang mga pangutana.

• Base sa imong nakat-onan, unsaon nimo sa pagkompleto ang mosunod nga pamahayag? Samtang ilakip nato ang Ginoo diha sa atong pagkat-on, Siya …

  Pwedeng kompletohon sa mga estudyante kini nga pamahayag sama sa mosunod: Samtang ilakip nato ang Ginoo diha sa atong pagkat-on, Siya makahatag nato og pagsabot nga dili nato makuha kon kitakita ra.

• Unsay imong nahibaloan bahin sa Ginoo nga naghatag nimog pagsalig nga tabangan ka Niya sa imong pag-eskwela?

Mga paagi sa paglakip sa Ginoo diha sa imong pagkat-on

• Kon bahin sa imong mga buluhaton sa eskwelahan, kanus-a makatabang nga ilakip ang Ginoo?

Kon gikinahanglan, tabangi ang mga estudyante sa paghunahuna sa mga tubag sa nag-unang pangutana. Ang mgaehemplo mahimong maglakip sa, samtang naghimo og homework, nag-eksamin, nagkat-on sa klase, ug dihang naghimo og asaynment sa klase o mga proyekto. Ikonsiderar ang paglista sa mga ideya sa mga estudyante diha sa pisara .

Dayon hatagi sa mosunod nga instruksiyon ang mga estudyante aron tabangan silang maghunahuna og mga paagi nga malakip nila ang Ginoo diha sa mga ehemplo nga ilang gihatag. Pwede kining himoon sa estudyante nga nag-inusara, uban sa kapares, o sa gamayng grupo.

Isulat ang mga pulong nga Malakip nako ang Ginoo sa akong pagkat-on pinaagi sa … diha sa usa ka panid sa imong journal sa pagtuon. Ilista ang daghang ideya kutob sa imong mahunahunaan sa paglakip sa Ginoo diha sa mga kalihokan nga konektado sa pag-eskwela nga imong nailhan.

Human makalista ang mga estudyante, dapita silang ipakigbahin ang ilang mga ideya sa klase. Makahimo usab ka og listahan diha sa pisara ug idugang dinhi ang mga ideya sa mga estudyante.

Kon gikinahanglan, pwede kang motanyag og pipila ka ehemplo: pag-ampo alang sa tabang nga mahinumdoman nimo ang imong mga gitun-an sa dili pa ang mga pasulit, mga proyekto, o mga asaynment; pagpasalamat sa tabang sa Ginoo ug sa mga kahigayonan nga Iyang gihatag nimo aron makat-on; irekord ang imong mga kasinatian dihang imong gilakip ang Ginoo sa imong pagkat-on; pagpuasa ug pag-ampo para sa mas dakong tinguha nga mokat-on; unaha ang Dios pinaagi sa paggahin og panahon sa inadlawng pag-ampo ug pagtuon sa kasulatan.

• Unsay imong mga kasinatian dihang gilakip nimo ang Ginoo diha sa imong pag-eskwela?

Ingon nga bahin sa panaghisgot, ikonsiderar ang pagpasalida sa “Becoming More in Christ: The Parable of the Slope” gikan sa time code 0:00 hangtod 1:05. Kini nga bidyo anaa sa ChurchofJesusChrist.org. Sa bidyo, gihulagway ni Elder Clark G. Gilbert sa Seventy ang iyang kasinatian sa paglakip sa Ginoo diha sa iyang pagkat-on.

Pamalandong ug lihok base sa mga kamatuoran

Ikonsiderar ang pagdapit sa mga estudyante nga pamalandongan ang mga paagi nga ilang magamit ang ilang nakat-onan bahin sa kon unsaon paglakip sa Ginoo diha sa ilang pagkat-on. Pwede nilang tubagon ang mosunod diha sa ilang mga journal sa pagtuon.

• Unsay imong nakat-onan o gibati bahin sa Ginoo nga nakapahimo nga gusto nimo Siyang ilakip sa imong pagkat-on?

• Unsa ang usa o duha ka aksyon nga imong himoon aron malakip ang Ginoo sa imong pagkat-on?

Ikonsiderar ang pagdapit sa mga estudyante sa pagpakigbahin sa ilang gibati ug nakat-onan. Pagpamatuod sa mga kamatuoran nga imong gihisgotan, ug dasiga ang mga estudyante nga buhaton ang ilang mga plano ug molihok sigon sa mga impresyon nga ilang nadawat gikan sa Espiritu.

Dugang nga mga Kapanguhaan

Sa unsang paagi ang paglakip sa Ginoo sa akong pagkat-on makatabang nako nga magmalamposon sa pag-eskwela?

Si Elder D. Todd Christofferson sa Korum sa Napulog Duha ka Apostoles mitudlo:

Kinahanglan nimong hinumdoman kanunay nga wala ka mag-inusara. Naay mga tawo nga nagmahal ug nag-ampo para nimo. Aduna tingali pipila nga maduhaduhaon nga moingon nga dili na nimo kaya o kinsa, sa bisan unsa mang rason, dili gusto nga molampos ka. Pero dili ka nila mapugngan, ug mas daghan ang nagsuporta nimo. Labaw sa tanan, ang imong Langitnong Amahan ug ang imong Manluluwas nakaila nimo ug mohatag sa langitnong tabang. Himoa nga katimbang nimo ang Dios. …

Gimahal ka sa imong Langitnong Amahan ug sa Iyang Minahal nga Anak parehas sa Ilang pagmahal kanako, ug may katungod ka sa Ilang tabang parehas nako. Sa Ilang tabang, molampos ka sa imong [edukasyon] ug sa uban pa nimong takos nga gipaningkamotan sa imong kinabuhi. Wala ka naghago ug nagtuon nga nag-inusara. (D. Todd Christofferson, “The Will to Prepare” [debosyonal sa BYU–Pathway Worldwide, Nob. 12, 2019])

Si Elder Kim B. Clark sa Seventy mitudlo:

Kon mohunong kamo sa pagkat-on, dili kamo mahimong mas maalamon, mas epektibo, mas mapuslanon, mas matinud-anon, o mas mahisama sa inyong Amahan sa Langit.

Ang inyong kasinatian sa pagkat-on sa mga katuigan sa inyong kabatan-onan ug young adult nagpahimutang sa pundasyon alang sa tibuok kinabuhi nga pagkat-on. Kon makaugmad kamo sa abilidad nga magkat-on og maayo sumala sa pamaagi sa Ginoo—pinaagi sa Espiritu ug sa makugihon, aktibo nga pagtuon—mahimo kining dako nga panalangin nganha kaninyo. (Kim B. Clark, “Pagkat-on alang sa Tibuok Kalag,” Liahona, Ago. 2017, 29).

Unsang klase nga pagkat-on ang labing prayoridad nako?

Si Presidente Russell M. Nelson mitudlo:

Sa padayon ninyong pag-angkon og kahibalo, hibaloi nga ang labing importante kaayo nga kamatuoran nga inyong makat-unan nagagikan sa Ginoo. Sa Iyang pagpangamuyo sa Iyang Amahan, ang Manluluwas Mismo mikumpirmar niini. Miingon Siya, “Ug ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesukristo nga imong gipadala.” (Juan 17:3). Labaw sa tanan naningkamot kamo sa pagkat-on, naningkamot nga makaila sa Dios, inyong Langitnong Amahan, ug sa Iyang Anak, nga si Jesukristo. Ilha Sila ug higugmaa Sila sama sa akong gibuhat. (Russell M. Nelson, “Unsay Inyong Pilion?,” Liahona, Ene. 2015, 32)

Dugang nga mga Kalihokan sa Pagkat-on

Unahon ang Ginoo

Human makahimog listahan ang mga estudyante sa mga paagi nga malakip nila ang Ginoo sa ilang pagkat-on, ikonsiderar ang pagpasalida sa “The Soul’s Sincere Desire” (3:28), nga anaa sa ChurchofJesusChrist.org. Dapita ang mga estudyante sa pagpangitag mga ehemplo kon sa unsang paagi gilakip sa batan-ong babaye diha sa bidyo ang Ginoo diha sa iyang pagkat-on.

Paghimo og mga sundanan sa personal nga pagkat-on nga ilakip ang Ginoo

Sa kataposan sa leksiyon, ikonsiderar ang paghatag og higayon sa mga estudyante sa paghimog biswal nga representasyon nga nag-summarize sa ilang nakat-onan bahin sa paglakip sa Ginoo diha sa ilang pag-eskwela. Ikonsiderar ang pagdapit sa mga estudyante sa pagsulat sa Paglakip sa Ginoo diha sa Imong Pagkat-on sa tunga sa papel. Dayon dapita silang ilista ang pihong mga kinaiya ug hiyas nga nagrepresentar kon sa unsang paagi nila malakip ang Ginoo diha sa ilang pagkat-on ug pag-eskwela. Dapita sila sa pagdrowing og biswal o paghimog sundanan sa digital nga pagkat-on nga ipakigbahin sa ilang mga kaedad panahon sa leksiyon. (Isip ehemplo tan-awa ang mosunod nga grapiko [graphic] gikan sa Oktubre 2016 Liahona).

Dapita ang mga estudyante sa paghimo og pamahayag sa personal nga pagkat-on

Makabenepisyo ang mga estudyante sa paghimo og “pamahayag sa personal nga pagkat-on” nga magamit nila sa tibuok nilang kinabuhi nga makatabang aron mahinumdoman nila ang ilang mga tumong sa pag-eskwela. Ang ilang mga pamahayag pwedeng magsugod sa mga pulong nga sama sa “Ako …” o “Naglaom ko nga …”

Aron tabangan ang mga estudyante sa paghimo og mga pamahayag, ikonsiderar ang pagdapit nila nga pamalandongan ang mga bahin sa ilang pagkat-on nga gusto nilang pauswagon o ugmaron. Pagsukna og mga pangutana nga sama sa “Unsaon nimo paglakip sa Ginoo diha sa imong pagkat-on?” o “Unsaon ka pagtabang sa Ginoo sa imong plano?” Pwedeng maila sa mga estudyante ang mga aksiyon ug mga kinaiya nga gusto nilang iapil sa ilang mga pamahayag.

Sagad mugbo ug gamhanan ang mga pamahayag sa pagkat-on. Pwedeng iapil sa mga estudyante ang ilang mga tumong sa pag-eskwela o mga gidahoman ug ang mga butang nga ilang himoon aron makab-ot ang ilang mga tumong.

Ania ang duha ka ehemplo sa mga pamahayag sa pakat-on sa mga estudyante:

• Magmapaubsanon ko ug daling tudloan samtang akong tinguhaon ang tabang sa Ginoo nga mouswag isip usa ka tigkat-on.

• Sa dili pa moeskwela, mag-ampo ko sa akong Langitnong Amahan ug ipahayag ang akong tinguha sa pagbaton sa Espiritu uban nako diha sa akong pagkat-on.