“Pagbansay alang sa Doktrinal nga Kahanas,” Pagbansay alang sa Kurikulom sa Seminary (2025)

Imahe

mga batan-ong lalaki nga nagtuon sa mga kasulatan

Pagbansay alang sa Doktrinal nga Kahanas

Pasiuna sa Doktrinal nga Kahanas: Usa ka Sundanan sa Pagpangita ug Pagkaplag sa Balaanon nga mga Tubag

Imahe

Jacob ug Sherem

Diha sa Basahon ni Mormon, si Jacob misaysay og usa ka kasinatian nga iyang nasinati uban sa usa ka tawo nga ginganlan og Sherem. Si Sherem usa ka makinaadmanon ug migamit og hilabihan nga pag-ulog-ulog ug makusganong gahom sa pakigpulong aron sa paglingla sa mga kasingkasing sa daghan ug sa “pagdaot sa doktrina ni Kristo” (tan-awa sa Jacob 7:2–4). Si Jacob mipasabot nga si Sherem “nangita og daghang kahigayonan nga magkaatubangay kami. … Ug naglaom siya nga iya akong matay-og gikan sa akong gituohan” (Jacob 7:3, 5). Si Jacob mirekord, hinuon, nga “dili ako matarog” (Jacob 7:5). Tungod sa makugihon nga mga paningkamot nga gihimo ni Jacob sa tibuok niyang kinabuhi, walay pangutana o kahimtang nga makatarog gayod ni Jacob gikan sa iyang pundasyon nga lig-ong natukod diha ni Jesukristo ug sa Iyang ebanghelyo.

Imahe

Meme bahin sa Kalig-on Taliwala sa mga Unos

Sa atong panahon, ang kabatan-onan sa Simbahan nag-atubang og daghang lisod nga mga pangutana ug mga kahimtang nga makapatarog nila gikan sa ilang hugot nga pagtuo. Ang doktrinal nga kahanas mao ang usa ka paagi nga ang mga estudyante makaandam alang niini nga mga hagit. Samtang ang mga estudyante mopalambo og doktrinal nga kahanas, mas maandam sila nga dili gayod matarog sa ilang hugot nga pagtuo diha ni Jesukristo. Si Presidente M. Russell Ballard sa Korum sa Napulog Duha ka Apostoles mipakigbahin sa mosunod ngadto sa mga magtutudlo sa mga seminary ug mga institute mahitungod sa doktrinal nga kahanas:

Ang [doktrinal nga kahanas] magtutok sa pagpalambo ug pagpalig-on sa hugot nga pagtuo sa atong mga estudyante diha kang Jesukristo ug pagdugang sa ilang abilidad nga masunod ug magamit ang ebanghelyo sa ilang kinabuhi. …

Kini nga inisyatibo dinasig ug tukma sa panahon. Duna kini talagsaong impluwensya sa atong kabatan-onan. Hinuon, ang kalamposan sa Doktrinal nga Kahanas, ug sa tanang uban pang mga programa sa pagtuon sa CES, mag-agad sa usa ka mahinungdanong bahin diha nimo. (M. Russell Ballard, “The Opportunities and Responsibilities of CES Teachers in the 21st Century” [evening with a General Authority, Feb. 26, 2016], broadcasts.ChurchofJesusChrist.org)

Doktrinal nga Kahanas nga anaa sa Kurikulom

Diha sa manwal sa magtutudlo, ang mga kasinatian sa pagkat-on sa doktrinal nga kahanas gilakip na sa matag karon ug unya sa pagtabang sa mga estudyante nga makab-ot ang mga resulta sa doktrinal nga kahanas. Ang mosunod nga grapik naghulagway sa mga resulta sa doktrinal nga kahanas. Alang sa dugang nga impormasyon, tan-awa sa Mahinungdanon nga Dokumento sa Doktrinal nga Kahanas (2023).

Imahe

Tsart sa Pagbansay alang sa Doktrinal nga Kahanas

Ang kurikulom sa seminary nagtabang sa mga estudyante nga makab-ot ang mga resulta sa doktrinal nga kahanas sa mosunod nga tulo ka paagi:

Pasiuna nga mga leksiyon sa doktrinal nga kahanas ug mga baroganan sa pag-angkon og espirituhanon nga kahibalo
Mga tudling sa kasulatan alang sa doktrinal nga kahanas nga gitudlo sumala sa konteksto uban sa eskedyul sa Dali, Sunod Kanako
Mga leksiyon sa Pagpraktis sa Doktrinal nga Kahanas

Ingon nga ang tigkatkat sa bato nagkinahanglan og ekipo aron luwas nga makanaog sa bakilid nga mga palibot sa dal-og [canyon], kining mga kasinatian sa pagkat-on makatabang nga masangkapan ang mga estudyante og mga kahanas sa pagdumala sa mahagiton nga mga pangutana ug mga kahimtang inubanan sa hugot nga pagtuo diha ni Jesukristo.

Imahe

Meme bahin sa mga Kahanas sa Pagdumala sa mga Hagit

Pasiuna sa doktrinal nga kahanas ug mga leksiyon sa pag-angkon og espirituhanon nga kahibalo

Adunay lima ka leksiyon sa doktrinal nga kahanas, nga gidesinyo aron matabangan ang mga estudyante nga masabtan ang katuyoan sa doktrinal nga kahanas ug makakat-on mahitungod sa mga baroganan sa pag-angkon og espirituhanon nga kahibalo.

Pagpalig-on sa Imong Epirituwal nga Pundasyon: Pasiuna sa Doktrinal nga Kahanas. Maghatag sa mga estudyante og kinatibuk-an nga panglantaw kon unsa ang doktrinal nga kahanas ug kon unsa nga mga matang sa mga kasinatian sa pagkat-on ang ilang malaoman aron matabangan sila nga molambo sa doktrinal nga kahanas. Labing maayo nga itudlo sa sinugdanan sa tuig nga tingkalse kon daghang estudyante ang bag-o pa sa seminary o rebyohon sa tunga-tunga sa tuig.
Pagtinguha og Personal nga Pagpadayag alang sa Akong mga Pangutana: Pag-angkon og Espirituhanon nga Kahibalo, Bahin 1. Motabang sa mga estudyante nga makasabot kon sa unsang paagi nga sila makadawat og giya ug pagpadayag gikan sa Dios pinaagi sa Espiritu Santo. Labing maayo nga itudlo sa sinugdanan sa tuig nga tingklase.
Paglihok inubanan sa Hugot nga Pagtuo aron Makaplagan ang mga Tubag: Pag-angkon og Espirituhanon nga Kahibalo, Bahin 2. Motabang sa mga estudyante nga makasabot kon unsaon sa paglihok inubanan sa hugot nga pagtuo diha ni Jesukristo samtang mangita sila og mga tubag sa ilang mga pangutana. Labing maayo nga itudlo sa sinugdanan sa tuig nga tingklase.
Pagsusi sa mga Hilisgotan ug mga Pangutana sa Ebanghelyo uban sa Mahangtorong Panglantaw: Pag-angkon og Espirituhanon nga Kahibalo, Bahin 3. Motabang sa mga estudyante nga motan-aw sa mga konsepto ug sa mga pangutana nga mas sama ni Jesukristo samtang ang mga estudyante mosusi niini inubanan sa mahangtorong panglantaw. Labing maayo nga itudlo sa sinugdanan sa tuig nga tingklase.
Pagdangop ngadto sa Balaanong Gitudlo nga mga Kapanguhaan aron Matabangan nga Makaplagan ang mga Tubag: Pag-angkon og Espirituhanon nga Kahibalo, Bahin 4. Motabang sa mga estudyante nga makasabot sa kamahinungdanon sa pagpangita sa kamatuoran gikan sa mga tinubdan nga mahigugmaong gihatag sa Langitnong Amahan ug ni Jesukristo. Labing maayo nga itudlo sa sinugdanan sa tuig nga tingklase.

Mga tudling sa doktrinal nga kahanas nga gitudlo sumala sa konteksto

Kon magtudlo og leksiyon gikan sa hugpong sa kasulatan nga naglakip og tudling sa doktrinal nga kahanas, pangita og mga paagi sa paghatag og gibug-aton sa tudling. Itudlo ang tudling sumala sa konteksto, ug motutok sa doktrina nga gitudlo niini. Mabantayan nimo kini nga icon sa higayon nga adunay tudling sa doktrinal nga kahanas. Mahimo nimong awhagon ang mga estudyante nga markahan ang matag tudling aron makit-an sa mga estudyante unya.

Ang Mahinungdanon nga Dokumento sa Doktrinal nga Kahanas (2023) adunay lista sa 24 ka tudling sa Doktrinal nga Kahanas alang sa matag kurso. Ang imong giya sa gipaspason lagmit dili molakip sa tanang leksiyon nga naghisgot sa mga tudling sa doktrinal nga kahanas sumala sa konteksto samtang ang seminary nagklase pa, mao nga seguroa nga mangita og mga oportunidad sa pagtabang sa mga estudyante nga marebyo ang tanang 24 ka tudling.

Kon ang mga tudling sa doktrinal nga kahanas tun-an diha sa klase, seguroa nga mogahin og igong oras sa pagtuon sa doktrina nga gitudlo diha sa tudling sa doktrinal nga kahanas aron ang mga estudyante masayod ug makasabot niini. Ang matag leksiyon nga adunay tudling sa doktrinal nga kahanas naglakip og sugyot aron matabangan ang mga estudyante sa pagpraktis sa pagsag-ulo sa pakisayran sa kasulatan ug sa mahinungdanong hugpong sa mga pulong sa kasulatan isip kabahin sa leksiyon ug sa pagpraktis pag-usab sa umaabot nga mga leksiyon. Ang mga estudyante kinahanglan kanunay nga magpraktis sa pagsag-ulo sa pakisayran ug mahinungdanon nga hugpong sa mga pulong sa kasulatan. Ang “Mga Ideya sa Pagrebyo sa Doktrinal nga Kahanas” naglakip sa mga sugyot kon unsaon nga imong matabangan ang mga estudyante nga magpraktis sa pagsag-ulo sa pakisayran ug mahinungdanon nga hugpong sa mga pulong sa kasulatan. Makita kini diha sa apendiks sa manwal sa magutudlo sa seminary.

Mga Leksiyon sa Pagpraktis sa Doktrinal nga Kahanas

Ang mga leksiyon sa Pagpraktis sa Doktrinal nga Kahanas ieskedyul matag karon ug unya, matag upat ngadto sa unom ka semana. Makahatag kini sa mga estudyante og mga oportunidad sa pagtrabaho ngadto sa pagkab-ot sa mga resulta sa doktrinal nga kahanas. Ang matag leksiyon sa pagpraktis sa doktrinal nga kahanas adunay duha ka seksiyon:

Pagrebyo sa Doktrinal nga Kahanas
Pagkat-on ug Paggamit sa mga Baroganan sa Pag-angkon og Espirituhanon nga Kahibalo

Pagrebyo sa Doktrinal nga Kahanas

Diha sa seksiyon sa Pagrebyo sa Doktrinal nga Kahanas, ang mga estudyante magpraktis sa pagsabot ug sa pagpasabot sa doktrina gamit ang mga tudling sa doktrinal nga kahanas, sa pagpangita sa mga tudling sa kasulatan sa doktrinal nga kahanas ug sa pagsag-ulo sa mahinungdanon nga mga hugpong sa mga pulong sa kasulatan, ug sa paggamit sa doktrina nga gitudlo dinhi niini nga mga tudling. Bisan kon kini nga mga pagrebyo importante ug kinahanglang kanunay nga kabahin sa mga kasinatian sa pagkat-on sa mga estudyante, idumala ang oras sa klase sa epektibong paagi aron ang dakong bahin sa oras magahin ngadto sa seksiyon sa Pagkat-on ug Paggamit sa mga Baroganan sa Pag-angkon og Espirituhanon nga Kahibalo.

Pagkat-on ug Paggamit sa mga Baroganan sa Pag-angkon og Espirituhanon nga Kahibalo

Ang seksiyon sa Pagkat-on ug Paggamit sa mga Baroganan sa Pag-angkon og Espirituhanon nga Kahibalo kinahanglang gahinan og dakong panahon diha sa leksiyon sa Pagpraktis sa Doktrinal nga Kahanas. Kini nga seksiyon naghatag sa mga estudyante og mga oportunidad sa pagpraktis sa paggamit sa doktrina sa ebanghelyo ni Jesukristo ug sa mga baroganan sa pag-angkon og espirituhanon nga kahibalo sa mga sitwasyon sa tinuod nga kinabuhi.

Ang matag pagpraktis magsugod sa oportunidad sa pagrebyo sa mga baroganan sa pag-angkon og espirituhanon nga kahibalo. Hinumdomi nga bisan og ang usa o duha ka estudyante kahibalo na kaayo sa mga baroganan, ang uban nagkinahanglan pa gihapon og dugang nga panahon ug pagpraktis. Buhata kutob sa imong mahimo aron matabangan ang tanang estudyante nga mahimong masaligon sa paggamit sa mga baroganan sa pag-angkon og espirituhanon nga kahibalo. Ang “Mga Ideya sa Pagrebyo sa mga Baroganan sa Pag-angkon og Espirituhanon nga Kahibalo” naglakip og mga sugyot kon unsaon sa pagrebyo niini nga mga baroganan. Makita kini diha sa apendiks sa manwal sa magtutudlo sa seminary.

Ang mga estudyante dayon hatagan og usa ka senaryo nga naghulagway og pangutana o sitwasyon diin ang sakto nga pagsabot sa tinuod nga doktrina makatabang. Sa pagtubag sa pangutana o sitwasyon, ang mga estudyante makapraktis sa paggamit sa mga baroganan sa pag-angkon og espirituhanon nga kahibalo ug sa doktrina nga gitudlo diha sa mga tudling sa doktrinal nga kahanas, sa ubang mga kasulatan, o sa mga pagtulon-an sa mga lider sa Simbahan nga gitun-an sa mga estudyante bag-ohay lang.

Ang paghatag sa mga estudyante og daghang oportunidad sa pagpraktis kinahanglanon alang sa ilang kalamposan sa doktrinal nga kahanas. Hunahunaa kon sa unsang paagi nga ang usa ka tawo nga anaa sa pagpanagang sa martial arts nagkinahanglan og hilabihan nga pagpraktis aron molambo ang kalig-on sa kaunoran. Nag-andam kini nila sa pagtubag sa lainlaing paagi sa pagpang-ataki. Sa samang paagi, ang mga estudyante nagkinahanglan og hilabihan nga pagpraktis sa doktrinal nga kahanas. Kon ang mga estudyante moapil sa kanunay nga pagpraktis, ang matinud-anon nga mga pagtubag sa mga hagit mahimong natural ug normal na lang.

Imahe

Meme bahin sa Kanunay nga Pagpraktis

Aron makakita og ehemplo sa aplikasyon sa pagpraktis, ikonsiderar ang pagtan-aw sa usa o duha sa mosunod nga mga bidyo, nga makita diha sa ChurchofJesusChrist.org. Samtang magtan-aw ka, tan-awa kon giunsa sa magtutudlo pagtabang ang mga estudyante sa pagpraktis sa paggamit sa tanang tulo ka baroganan sa pag-angkon og espirituhanon nga kahibalo.

Mahimo kang mopahiangay sa mga senaryo ug ang gisugyot nga mga pangutana o ubang mga kalihokan sa pagkat-on kon gikinahanglan aron mas matubag ang mga panginahanglan sa mga estudyante. Mahimo usab nimong usbon ang han-ay diin ang mga estudyante mogamit sa mga baroganan sa pag-angkon og espirituhanon nga kahibalo. Seguroha nga ang bisan unsa nga mga pagpahiangay makahatag gihapon sa mga estudyante og mga oportunidad sa pagpraktis sa paggamit sa mga baroganan sa pag-angkon og espirituhanon nga kahibalo ug sa doktrina ngadto sa usa ka tinuod nga sitwasyon. Kon mopahiangay sa mga senaryo, sulayi ang pagpreserbar sa dakong pangutana o kabalaka sa senaryo. Ang mga pangutana o mga kabalaka nga anaa sa sentro sa matag senaryo mainampingon nga giplano sulod sa tibuok upat ka tuig sa seminary.

Alang sa mga ideya kon unsaon sa paghimo og tukmang mga pagpahiangay sa mga aplikasyon sa pagpraktis, ikonsiderar ang pagtan-aw sa usa o mas daghan pa sa mosunod nga mga bidyo nga makita diha sa ChurchofJesusChrist.org.

Mga Kahanas sa Epektibong Pagtudlo sa Doktrinal nga Kahanas

Ang mosunod nga mga pagbansay motudlo og mga kahanas nga makatabang sa mga estudyante sa pagpalambo og doktrinal nga kahanas. Tingali epektibo nga iapil kini nga mga kahanas matag karon ug unya.

Kahanas: Ipasabot ang rason alang sa kalihokan sa doktrinal nga kahanas.

Ipasabot

Ang pagpakigbahin o ang pagtugot sa mga estudyante nga mopakigbahin og rason alang sa paghimo sa kalihokan sa doktrinal nga kahanas makapadasig sa mga estudyante sa pag-apil niini. Magtugot usab kini sa Espiritu Santo sa pagtudlo kanila mahitungod sa kaimportante sa kalihokan. Human sa imong pagpakigbahin kon unsay buhaton sa klase, pagpakigbahin og usa o duha ka rason kon nganong maghimo kamo sa kalihokan o hangyoa ang mga estudyante sa pagpakigbahin kon ngano nga sa ilang hunahuna makatabang ang kalihokan.

Modelo

“Class, sulod sa pipila ka minuto atong ipasabot ang doktrina nga atong nakat-onan gikan sa Lucas 2:10–12, nga si Jesukristo mao ang Manluluwas sa kalibotan. Usa sa rason nga ato kining gibuhat mao ang pagtabang kanato nga mahimong masaligon nga motubag kon aduna kitay kaila nga mangutana kanato ngano nga si Jesukristo importante kanato.”

Aron makakita og ehemplo kon unsaon kini paghimo, tan-awa ang usa o mas daghan pa sa mosunod nga mga bidyo nga makita diha sa ChurchofJesusChrist.org.

Pagpraktis

Pagpili og usa sa mosunod nga mga pag-aghat ug kompletoha ang kapahayag.

“Maghimo kita og kalihokan nga makatabang kanato nga masag-ulo ang pakisayran sa doktrinal nga kahanas uban sa importante nga hugpong sa mga pulong. Usa sa rason nga kita naningkamot nga masag-ulo kini mao …”

“Sa mosunod nga pipila ka minuto, atong rebroyohon ang mga baroganan sa pag-angkon og espirituhanon nga kahibalo. Ang pagkahibalo niini nga mga baroganan makatabang kanato nga …”

“Atong praktison gamit ang tulo ka baroganan sa pag-angkon og espirituhanon nga kahibalo. Ang paggamit niini nga mga baroganan maka…”

Pag-analisar

Unsa ang inyong nakat-onan samtang kamo nagpraktis sa pagpasabot sa mga rason sa paghimo sa kalihokan sa doktrinal nga kahanas?

Iapil

Samtang nag-andam ka nga papraktison ang mga estudyante og kalihokan sa doktrinal nga kahanas, pagsulat og labing minos usa ka rason nga kini mahinungdanon sa mga estudyante.

Kahanas: Dapita ang mga estudyante sa pagrebyo sa mga baroganan sa pag-angkon og espirituhanon nga kahibalo.

Ipasabot

Sa kanunay nimong pagrebyo sa mga baroganan sa pag-angkon og espirituhanon nga kahibalo ngadto sa imong klase, ang Espiritu Santo makatabang sa mga estudyante sa paghinumdom ug paggamit sa mga baroganan sa panahon sa panginahanglan. Mahimo nimong dapiton ang mga estudyante sa pagrebyo niini nga mga baroganan sa dili pa ka mopakigbahin sa mga senaryo o samtang ang mga estudyante nagtrabaho sa mga senaryo. Kini nga mga imbitasyon naglakip sa oportunidad alang sa mga estudyante sa pagrebyo sa labing minos usa ka baroganan, mga instruksiyon alang sa unsa kadugaya nila nga rebyohon ang mga baroganan, ug usa ka oportunidad alang kanila sa pagpakigbahin unsa ang ilang nakat-onan. Sa pagbuhat niini, ang mga estudyante mas makagamit sa mga baroganan isip kabahin sa pagpraktis sa paggamit. Alang sa mga ideya kon unsaon sa paghimo niini, Tan-awa sa “Mga Ideya sa Pagrebyo sa mga Baroganan sa Pag-angkon og Espirituhanon nga Kahibalo” diha sa apendiks sa manwal sa magtutudlo sa seminary.)

Modelo

“Karon atong rebyohon ang mga baroganan sa pag-angkon og espirituhanon nga kahibalo gikan sa Mahinungdanon nga Dokumento sa Doktrinal nga Kahanas (2023). Atong bahinon ang grupo sa tinagutlo. Ang matag estudyante diha sa grupo morebyo og lahi nga baroganan.

“Paggahin og tulo hangtod sa upat ka minuto sa pagbasa ug sa pag-andam sa pagpakigbahin nganha sa inyong grupo og usa ka paagi nga ang baroganan makatabang sa usa ka tawo nga nag-atubang og lisod nga pangutana o kahimtang.”

Alang sa ehemplo sa paagi nga matabangan ang mga estudyante sa pagrebyo sa mga baroganan sa pag-angkon og espirituhanon nga kahibalo, tan-awa ang “Mohatag sa mga estudyante og mga oportunidad sa pagrebyo sa tanang tulo ka baroganan sa pag-angkon og espirituhanon nga kahibalo,” nga makita diha sa ChurchofJesusChrist.org.

Pagpraktis

Pagsulat og laing paagi nga mahimo nimong madapit ang mga estudyante sa pagrebyo sa mga baroganan sa pag-angkon og espirituhanon nga kahibalo.

Pag-analisar

Unsay imong nakat-onan mahitungod sa paghatag og mga pagdapit sa mga estudyante sa pagrebyo sa mga baroganan sa pag-angkon og espirituhanon nga kahibalo?

Iapil

Samtang mangandam ka sa imong sunod nga leksiyon sa Pagpraktis sa Doktrinal nga Kahanas, planoha kon unsaon nimo pagdapit ang mga estudyante sa pagrebyo sa mga baroganan sa pag-angkon og espirituhanon nga kahibalo.

Kahanas: Pangutana og mga pangutana nga makatabang sa mga estudyante sa pagsulti kon sa unsang paagi nga ang mga baroganan sa pag-angkon og espirituhanon nga kahibalo makatabang sa mga sitwasyon sa tinuod nga kinabuhi.

Ipasabot

Human marebyo sa mga estudyante ang mga baroganan sa pag-angkon og espirituhanon nga kahibalo, ipakigbahin nila ang senaryo ug dapita sila sa pagsulti diha sa mga grupo ug unya diha sa klase kon hain sa mga baroganan nga sa ilang pamati makatabang sa senaryo. Ang pagbuhat niini makatabang sa mga estudyante nga mapalig-on ang ilang pagsalig sa paggamit niini nga mga baroganan sa ilang kaugalingong mga kinabuhi.

Modelo

Human sa pagrebyo sa mga baroganan sa pag-angkon og espirituhanon nga kahibalo ug sa pagpailaila sa senaryo, mahimo ka nga mangutana sama sa mosunod:

“Hain nga baroganan sa pag-angkon og espirituhanon nga kahibalo sa inyong hunahuna ang makatabang niini nga senaryo, ug ngano?”
“Sa unsang paagi nga kini nga mga baroganan makatabang ninyo kon kamo mag-atubang og pangutana sama sa usa nga anaa niini nga senaryo?”

Alang sa ehemplo, tan-awa ang usa o ang duha sa mosunod nga mga bidyo nga makita diha sa ChurchofJesusChrist.org.

Pagpraktis

Pagsulat og pipila ka pangutana nga imong ipangutana nga makatabang sa mga estudyante sa pagsulti kon sa unsang paagi nga ang mga baroganan sa pag-angkon og espirituhanon nga kahibalo makatabang nila sa pagtubag sa ilang higala diha sa mosunod nga senaryo.

Ang usa sa imong mga higala nga dili relihiyoso bag-ohay nga nakakita og pares sa mga misyonaryo nga nakig-istorya sa pipila ka tawo sa parke. Gipangutana ka sa imong higala, “Nganong ang mga misyonaryo gikan sa inyong simbahan mogawas man ug mosangyaw mahitungod kang Jesus? Mora og naningkamot mo nga ipugos ang inyong mga gituohan ngadto sa ubang tawo. Nganong dili na lamang ninyo sila pasagdan nga malipay sa kon unsa sila?”

Pag-analisar

Sa imong hunahuna nganong importante man nga ang mga estudyante mosulti kon unsaon nila paggamit ang mga baroganan sa pag-angkon og espirituhanon nga kahibalo?
Sa imong hunahuna sa unsang paagi nga ang paggamit sa mga baroganan sa pag-angkon og espirituhanon nga kahibalo makaimpluwensya sa mga kinabuhi sa mga estudyante?

Iapil

Unsa ang imong mabuhat aron sa pagtabang sa mga estudyante sa pagsulti kon sa unsang paagi nga ang mga baroganan sa pag-angkon og espirituhanon nga kahibalo makatabang kanila ug sa uban kon mag-atubang og lisod nga pangutana o sirkumstansiya?

Panapos

Hunahunaa kon sa unsang paagi nga ang imong mga estudyante makahimo sa pagtubag sa mga pangutana o mga kabalaka human sa makanunayong pagpaningkamot paingon sa mga resulta sa doktrinal nga kahanas diha sa seminary. Sa sinugdanan, ang mga estudyante magkinahanglan og dugang nga tabang ug suporta gikan kanimo isip usa ka magtutudlo aron sa paggamit sa mga baroganan sa pag-angkon og espirituhanon nga kahibalo ug sa doktrina sa mga sitwasyon sa tinuod nga kinabuhi. Magkinahanglan kini og panahon alang sa mga estudyante nga mahimong hanas sa doktrina ug mahimong masaligon sa paggamit sa mga baroganan sa pag-angkon og espirituhanon nga kahibalo. Hinuon, sa imong pagpadayon sa paghatag sa mga estudyante og kanunay nga mga oportunidad sa pagpraktis, kini mahimong usa ka butang nga natural nila nga buhaton. Mao kini ang usa ka paagi nga makatabang ka sa imong mga estudyante sa lig-ong pagtukod sa ilang pundasyon diha sa bato ni Jesukristo ug sa pagpalawom sa ilang pagkakabig ngadto Kaniya ug sa Iyang doktrina.