Leksiyon 81: Doktrina ug mga Pakigsaad 67–70

Doktrina ug mga Pakigsaad 68:25–31

Pagtudlo ug Pagkat-on sa Ebanghelyo diha sa Panimalay

Ang pagkat-on sa ebanghelyo ni Jesukristo makatabang sa pag-andam sa mga bata sa pag-atubang sa mga hagit ug mga tentasyon sa kinabuhi nga adunay hugot nga pagtuo sa Manluluwas. Ang mga ginikanan adunay talagsaon nga potensiyal sa pagtabang sa ilang mga anak nga makakat-on sa ebanghelyo. Kini nga leksiyon makatabang sa mga estudyante nga mas masabtan ang sugo sa Ginoo alang sa mga ginikanan sa pagtudlo sa ilang mga anak sa ebanghelyo diha sa panimalay.

Mga Posibleng Kalihokan sa Pagkat-on

Tabang sa atong mortal nga panaw

Ikonsiderar ang pagpahinumdom sa mga estudyante nga sa dihang mianhi kita sa yuta, nawala ang atong panumdoman sa kinabuhi sa wala pa dinhi sa yuta kauban sa atong Langitnong Amahan. Dugang pa, miabot kita sa usa ka napukan nga kalibotan nga naglakip sa malimbongon ug makadaot nga impluwensiya ni Satanas. Kini nga mga kamatuoran nagmugna og mga hagit sa pagpuyo nga matinud-anon sa plano sa Langitnong Amahan.

• Unsa ang pipila ka butang nga gihatag sa Langitnong Amahan nga makatabang kanato nga makakat-on mahitungod Kaniya ug mag-giya sa pag-atubang sa mortal nga mga hagit?

  Mahimo nimong ilista diha sa pisara ang mga tubag sa mga estudyante. Kon dili kini hisgotan sa mga estudyante, idugang ang “mga ginikanan o mga tigbantay” ngadto sa lista.

• Sa unsang paagi ka napanalanginan sa bisan hain niini nga mga impluwensiya?

• Ngano sa imong hunahuna nga ang mga ginikanan o mga tigbantay mahimong dako og impluwensiya sa pagtabang sa mga bata sa pagsagubang sa mga hagit sa mortalidad?

Ikonsiderar ang pagpakigbahin sa mga estudyante nga karong adlawa magkat-on sila gikan sa usa ka tudling sa kasulatan nga naghulagway sa mga responsibilidad sa mga ginikanan sa pagtabang sa mga bata nga makakat-on sa ebanghelyo. Mahimong sensitibo sa kamatuoran nga ang matag estudyante naggikan sa lain-laing kahimtang sa pamilya ug nga ang pipila ka mga estudyante tingali walay maayong sitwasyon sa panimalay.

Hibaloi ang mga kahimtang sa matag tigkat-on: Alang sa dugang nga pagbansay aron makakat-on kon unsaon nga mahimong sensitibo sa mga kahimtang sa matag estudyante, tan-awa ang pagbansay nga giulohan nga “Tan-awa ang mga tigkat-on sa paagi nga ang Dios nagtan-aw kanila” diha sa Pagpalambo sa mga Kahanas sa Magtutudlo: Higugmaa Kadtong Imong Gitudloan. Ikonsiderar ang pagpraktis sa kahanas nga “Mohunong, mamalandong, ug motubag sa mga pangutana nga atong ipangutana sa atong kaugalingon.”

Ikonsiderar ang pagpasabot sa mosunod:

Adunay usa ka dako nga kalainan sa mga sitwasyon sa pamilya. Ang ubang mga tawo, sama ni Nephi, natawo sa mga ginikanan kinsa naningkamot sa paggiya kanila sa pagsunod sa Manluluwas (tan-awa sa 1 Nephi 1:1). Ang uban, sama ni Presidente Russell M. Nelson o Elder David A. Bednar ug Elder Quentin L. Cook sa Korum sa Napulog Duha ka Apostoles, nagdako uban sa usa o sa daghan pa nga mga ginikanan kinsa dili mga miyembro sa Simbahan o kinsa dili aktibo nga tig-apil niini. Ang uban, sama ni Presidente Dallin H. Oaks sa Unang Kapangulohan, namatyan og ginikanan sa sayong bahin sa ilang kinabuhi. Ang ubang kabatan-onan nagdako nga layo sa ilang mga ginikanan, sama ni Moises (tan-awa sa Exodo 2:10) ug ni Samuel (tan-awa sa 1 Samuel 1:24–28). Ug sa gihapon ang uban, sama ni Abraham ug Limhi, adunay usa ka ginikanan nga aktibong naningkamot sa pagbuhat og daotan (tan-awa sa Abraham 1:1–17, 27; Mosiah 7:9; 11:1–5).

Sa imong journal sa kasulatan, ihulagway ang imong sitwasyon sa pamilya. Pamalandongi kon unsay imong nakat-onan gikan sa imong mga kasinatian sa pamilya. Mahimo nimong ilakip ang imong mga pagbati bahin sa pagkahimong usa ka ginikanan sa umaabot ug kon unsaon nimo gusto nga mahimong ginikanan.

Kon ang mga estudyante mobati nga komportable, mahimo nilang ipakigbahin ang pipila sa ilang mga hunahuna.

Dapita ang mga estudyante sa paghunahuna kon sa unsang paagi nga ang ilang nakat-onan karon makatabang kanila sa pagsuporta niadto kinsa naningkamot sa pagtudlo kanila sa ebanghelyo ni Jesukristo, lakip sa mga ginikanan o mga tigbantay. Mahimo usab nilang hunahunaon kon unsaon nila sa paggamit ang unsay ilang nakat-onan diha sa umaabot nga kaugalingon.

Unsa ang gisugo sa Ginoo sa mga ginikanan nga itudlo sa ilang mga anak

Samtang nagpundok alang sa usa ka komperensiya sa Ohio, upat ka kalalakin-an ang nagtinguha og direksiyon sa Ginoo pinaagi ni Propeta Joseph Smith. Human mohatag og pipila ka tambag ngadto niini nga mga tawo mahitungod sa ilang mga katungdanan, ang Ginoo mihatag og mas kinatibuk-ang tambag ngadto sa tanan nga mga pamilya kinsa kabahin sa Zion.

Ikonsiderar ang pagsulat diha sa pisara sa dili kompleto nga kapahayag Ang Ginoo misugo nga tudloan sa mga ginikanan ang ilang mga anak …. Mahimo dayon nga dugangan sa mga estudyante og mga pulong o mga hugpong sa mga pulong ang pamahayag nga anaa sa pisara samtang ilang makita kini sa mosunod nga mga bersikulo. Sa laing paagi, mahimo nimong dapiton ang mga estudyante sa pagsulat sa kapahayag diha sa ilang mga journal ug idugang ang ilang mga tubag didto.

Basaha ang Doktrina ug mga Pakigsaad 68:25–31, mangita sa unsay gisugo sa Ginoo sa mga ginikanan nga itudlo sa ilang mga anak.

Sa higayon nga ang mga estudyante nakagahin na og panahon sa pagkompleto sa kapahayag gamit ang nagkalain-laing mga baroganan nga gusto sa Ginoo nga itudlo sa mga ginikanan, dapita sila sa pagtubag sa mosunod nga mga pangutana:

• Kon ang mga tawo walay ebanghelyo sa ilang panimalay, unsa pa nga mga paagi ang gihatag sa Ginoo kanila sa pagkat-on niini nga mga baroganan?

• Kinsa ang mitudlo kanimo sa usa sa mga baroganan niini nga mga bersikulo samtang ikaw nagdako? Aduna ka bay bisan unsang nahinumdoman kanila nga nagtudlo kanimo? Kon mao, unsa kini nga mga panumdoman?

• Sa unsang paagi nga ang mga baroganan niini nga mga bersikulo nakaapekto sa imong kinabuhi, o sa unsang paagi nga kini makaapekto?

Mahimong pamalandongan sa mga estudyante kon sa unsang paagi ang mga panudlo gikan niana nga tawo o mga bersikulo nakatabang o makatabang kanila nga mobati sa gugma sa Ginoo ug sa Iyang tinguha nga sila makakat-on niini nga mga baroganan.

Paggamit sa Doktrina ug mga Pakigsaad 68:25–31

Aron ikonsiderar kon sa unsang paagi nga ang Doktrina ug mga Pakigsaad 68:25–31 makatabang sa mga tin-edyer sa nagkalain-laing mga sitwasyon, hatagi ang mga estudyante og pipila ka mga senaryo nga susihon. Mahimo nimong gamiton ang mga senaryo ug mga pangutana nga gihatag sa ubos o paghimo og pipila sa imong kaugalingon nga makatabang sa mga estudyante. Mahimong hunahunaon sa mga estudyante kini nga mga senaryo isip usa ka klase, sa mga grupo, o sa indibidwal.

Kalikohan A

Ang usa ka batan-ong lalaki adunay mga ginikanan nga naningkamot nga mahimong mga panig-ingnan sa pagsunod sa Manluluwas, apan kanunay siyang moreklamo kon ang iyang mga ginikanan modapit kaniya sa pagtuon sa kasulatan o pag-ampo isip pamilya. Siya kasagarang mobalewala kanila o magdula sa iyang telepono sa higayon nga sila mosulay sa pagtambag kaniya.

• Sa unsang paagi nga ang mga pagtulun-an sa Ginoo diha sa Doktrina ug mga Pakigsaad 68:25–31 makatabang kaniya nga makasabot kon unsa ang gibati sa Ginoo mahitungod sa unsay gipaningkamotan sa iyang mga ginikanan nga buhaton?

• Unsa nga mga kasulatan ang mahimong mogiya kaniya sa pagtubag og mas maayo sa sitwasyon? (Ang ubang mga ehemplo mao ang Mga Taga-Efeso 6:1–3; Mosiah 4:14–15; ug ang ehemplo sa Manluluwas sa edad nga 12 sa Lucas 2:51–52.)

• Unsa ang pipila ka mga paagi nga siya makasuporta sa iyang mga ginikanan? Sa unsang paagi nga kini nga mga buhat makahimo og kalainan sa iyang pamilya?

Kalihokan B

Ang mga ginikanan sa usa ka batan-ong babaye nagdiborsyo. Gibahinbahin niya ang iyang oras para sa paggahin og panahon kanila. Ang iyang inahan nagbugalbugal sa Simbahan ug wala maglaom nga ang iyang anak nga babaye mosunod sa mga pagtulun-an sa ebanghelyo kon anaa sa iyang panimalay. Ang iyang amahan nag-awhag kaniya sa pagsunod sa ebanghelyo ug sa aktibong pagtambong sa mga kalihokan sa seminary, sa simbahan, ug sa kabatan-onan. Kon itandi sa pagpakig-uban sa iyang inahan, ang kinabuhi uban sa iyang amahan mabati nga estrikto ug higpit.

• Sa unsang paagi nga ang Doktrina ug mga Pakigsaad 68:25–31 makatabang sa paggiya niining batan-ong babaye?

Basaha ang Exodo 20:12.

• Unsa ang pipila ka mga paagi nga kining batan-ong babaye makatahod sa duha niya ka ginikanan samtang nagsunod gihapon sa Ginoo?

• Unsa ang ubang mga ideya, mga pagtulun-an gikan sa mga lider sa Simbahan, o mga kasinatian nga makatabang kaniya?

Kalihokan C

Ang usa ka batan-ong lalaki adunay usa ka malisod kaayo nga kinabuhi isip batan-on ug wala na ikauban ang iyang mga ginikanan. Sakit alang kaniya ang paghunahuna mahitungod kanila.

• Sa unsang paagi kaha nga makatabang alang niining batan-ong lalaki ang pagpamalandong kon kinsa pa ang ubang mga tawo nga gipadala sa Ginoo sa pagtudlo kaniya sa mga baroganan nga nalista diha sa Doktrina ug mga Pakigsaad 68:25–31?

• Sa unsang paagi nga ang Doktrina ug mga Pakigsaad 68:25–31 makatabang niining batan-ong lalaki sa pagpangandam alang sa iyang kaugmaon?

Aron sa pagtapos niini nga kalihokan, pagpili og usa ka baroganan nga gisugo sa Ginoo sa mga ginikanan nga itudlo nga anaa sa Doktrina ug mga Pakigsaad 68:25–31, ug dayon pangita og bersikulo sa kasulatan nga imong magamit sa pagtudlo niana nga baroganan. Ipakigbahin kon sa unsang paagi kini nga baroganan makatabang sa mga kabatan-onan karon.

Dapita ang mga estudyante sa pagpakigbahin kon unsay ilang nakat-onan. Mahimong makatabang ang paghatag sa mga estudyante og kahigayonan sa pagpakigbahin sa ilang kaugalingong mga kasinatian, mga pangutana, o mga kabalaka nga may kalabotan sa pagkat-on sa ebanghelyo diha sa panimalay. Ikonsiderar ang pagtugot sa mga estudyante sa pagtubag sa mga pangutana o mga kabalaka sa ilang mga kaedad pinaagi sa paggamit sa balaanong gitudlo nga mga tinubdan ug sa ilang kaugalingong mga kasinatian.

Tabangi ang mga estudyante nga makasabot nga bisan unsa ang sitwasyon sa ilang pamilya, ang Ginoo nagtinguha nga sila makaangkon og lawom ug malungtarong pagkakabig ngadto Kaniya ug sa Iyang ebanghelyo sa labing maayo nga paagi nga ilang mahimo. Ikonsiderar ang pagdapit sa mga estudyante sa pagtinguha og personal nga pagpadayag kon unsaon nila sa paggamit ang ilang nakat-onan. Mahimo kining pinaagi sa pagsuporta sa ilang mga ginikanan samtang sila naningkamot sa pagtuman sa ilang responsibilidad sa pagtabang kanila sa pagduol ngadto kang Jesukristo, pagpasalamat sa uban nga ang Ginoo miandam sa pagtudlo kanila sa mga baroganan nga gitun-an karon, o pagpangandam sa pagtudlo sa ilang kaugalingong mga anak sa umaabot.

Dugang nga mga Kapanguhaan

Giunsa sa Simbahan pagpaningkamot sa pagtabang sa mga ginikanan sa ilang responsibilidad sa pagtudlo sa ebanghelyo ni Jesukristo diha sa panimalay?

Si Presidente Russell M. Nelson mitudlo:

Ang bag-o nga nakasentro sa panimalay, gisuportahan sa Simbahan nga integrated nga kurikulum adunay potensyal sa pagpakita sa kalig-on sa mga pamilya, samtang ang matag pamilya mosunod sa pagbuhat nga mahunahunaon ug mainampingon nga mousab sa ilang panimalay ngadto sa usa ka santuwaryo sa hugot nga pagtuo. Ako mosaad nga samtang makugihon kamo nga molihok aron sa pagbag-o sa inyong panimalay ngadto sa usa ka sentro sa pagkat-on sa ebanghelyo, sa hinayhinay ang inyong mga adlaw nga Igpapahulay mahimong ikahimuot. Ang inyong mga anak maghinam-hinam sa pagkat-on ug pagsunod sa mga panudlo sa Manluluwas, ug ang impluwensya sa kaaway sa inyong kinabuhi ug sa inyong panimalay makuhaan. Ang mga kausaban sa inyong pamilya dako ug magpadayon. (Russell M. Nelson, “Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 113)

Unsa ang balanse tali sa responsibilidad sa mga ginikanan sa pagtudlo ug sa responsibilidad sa bata sa pagkat-on sa ebanghelyo?

Si Elder David A. Bednar sa Korum sa Napulog Duha ka Apostoles mipakigbahin sa mosunod nga ideya:

Ang atong hugot nga tinguha sa pagkat-on ug pagpuyo sumala sa kamatuoran mas nagka anam ka importante dinhi sa kalibotan nga anaa sa “kaguliyang” [Doktrina ug mga Pakigsaad 45:26] ug mas nagkaanam kalibog ug kadaotan. Dili kita angay magdahom nga basta lang motambong sa mga miting sa Simbahan ug moapil sa mga programa ug dayon makadawat na sa tanang espiritwal nga kalig-on ug panalipod nga makatabang nato nga “makasukol kamo … inig-abot sa adlaw sa kalisdanan” [Mga Taga-Efeso 6:13].

“Ang mga ginikanan adunay sagrado nga katungdanan sa pagmatuto sa ilang mga anak diha sa paghigugma ug sa pagkamatarong” [“Ang Pamilya: Usa ka Pamahayag ngadto sa Kalibotan,” ChurchofJesusChrist.org]. Ang dinasig nga mga lider sa Simbahan, mga magtutudlo, ug mga kalihokan makatabang sa indibidwal ug pamilya nga mga paningkamot sa espiritwal nga pag-uswag. Ug bisan kon kitang tanan nanginahanglan og tabang sa pagpadayon sa dalan sa pakigsaad, ang may pinakadakong responsibilidad sa pagpalambo og espiritwal nga kalig-on ug paglahutay gisangon sa matag usa kanato. …

Kon ang tanan nga inyo o akong nahibaloan mahitungod ni Jesukristo ug sa Iyang gipahiuli nga ebanghelyo mao lamang ang gitudlo o gisulti kanato sa ubang mga tawo, niana ang pundasyon sa atong pagpamatuod Kaniya ug sa Iyang mahimayaon nga buhat sa ulahing mga adlaw natukod diha sa balas. Dili kita angay nga mosalig lang o manghulam og kahayag sa ebanghelyo ug kahibalo gikan sa ubang tawo—bisan niadtong atong gihigugma ug gisaligan. (David A. Bednar, “Andam nga Makaangkon sa Matag Gikinahanglan nga Butang,” Liahona, Mayo 2019, 102-103)

Dugang nga mga Kalihokan sa Pagkat-on

Doktrina ug mga Pakigsaad 68:27. “Pagabunyagan … kon moabot sa walo ka tuig ang panuigon.”

Kon gusto sa mga estudyante nga makasabot kon nganong ang mga bata bunyagan sa edad nga walo, ikonsiderar ang pagdapit sa mga estudyante sa pagbasa sa Doktrina ug mga Pakigsaad 20:71 ug 29:47. Mahimo kang mohangyo sa mga estudyante sa pagpakigbahin og mga panabot nga ilang naangkon. Ikonsiderar ang pagdapit sa mga estudyante sa pag-ila sa hugpong sa mga pulong diha sa Doktrina ug mga Pakigsaad 29:47 nga nagsugyot nga ang pagkamay-tulubagon usa ka proseso nga labaw pa kay sa usa ka panghitabo. Mahimo nimong ipangutana kon sa unsang paagi nga ang sugo sa Langitnong Amahan nga ang mga ginikanan mag-andam sa ilang mga anak alang sa bunyag sa edad nga walo nagpakita sa Iyang gugma alang sa mga bata.

Doktrina ug mga Pakigsaad 68:30–31. “Mga tapolan diha kanila.”

Kon bililhon alang sa imong mga estudyante nga adunay mas maayong pagsabot sa konsepto sa paglikay sa pagkatapolan, mahimo nimo silang dapiton sa pagpakigbahin sa mga panalangin nga ilang nakita gikan sa kakugi. Mahimong basahon sa mga estudyante ang Doktrina ug mga Pakigsaad 68:30–31 ug ilhon ang posibleng negatibo nga mga sangpotanan sa pagkatapolan (o pagkataspokan). Mahimo nimong pangutan-on ang mga estudyante kon unsay makatabang sa usa ka tawo sa pagbuntog sa posibilidad nga mahimong tapolan.

Pagpangandam sa pagtudlo sa umaabot nga mga anak

Bisan og ang mga bersikulo nga gitun-an niini nga leksiyon gisulat ngadto sa mga ginikanan, mahimo usab silang magamit sa mga estudyante isip umaabot nga mga ginikanan. Aron matabangan ang mga estudyante sa paghunahuna mahitungod niini nga ideya, mahimo nimo silang dapiton sa pagpili og usa sa mga baroganan nga itudlo sa mga ginikanan ngadto sa ilang mga anak. Dayon dapita sila sa paghimo og mubo nga leksiyon niana nga baroganan nga ilang magamit sa pagtudlo sa ilang kaugalingong anak.

Tambag alang sa kabataan

Usa ka paagi sa pagtabang sa mga estudyante nga makonektar ang sugo sa Ginoo ngadto sa mga ginikanan sa pagtudlo sa mga anak mao ang pagpakonsiderar sa mga estudyante sa papel sa kabataan sa proseso sa pagkat-on. Sa pagbuhat niini, mahimo nimong dapiton ang mga estudyante sa pagsulat og usa ka bersikulo nga magsunod sa Doktrina ug mga Pakigsaad 68:28 nga gisulat ngadto sa kabataan. Dapita ang mga estudyante sa paglakip diha sa ilang bersikulo og tambag ngadto sa kabataan mahitungod sa pagkahimong mga tigkat-on sa ebanghelyo diha sa panimalay.