Doktrina ug mga Pakigsaad 71–75

Doktrina ug mga Pakigsaad 71–75

Kinatibuk-ang Pagpasabot

Sa tingtugnaw niadtong 1831, ang mga sulat nga adunay sayop nga impormasyon mahitungod ni Joseph Smith ug sa Simbahan giapod-apod sa Kirtland, Ohio, nga dapit. Ang Manluluwas misugo ni Joseph Smith ug Sidney Rigdon sa pagbiyahe sa tibuok rehiyon aron sa pagtul-id sa mga bakak.

Hatagi og gibug-aton ang ehemplo ni Jesukristo: Usa ka paagi sa pagbutang ni Jesukristo sa sentro sa atong pagtudlo ug pagkat-on mao ang paghatag og gibug-aton kon sa unsang paagi Siya mao ang hingpit nga ehemplo sa tanang mga baroganan sa ebanghelyo. Bisan kon ang ehemplo sa Manluluwas wala direkta nga gihisgotan diha sa usa ka tudling sa kasulatan, makatabang kita sa mga tigkat-on sa paghimo og mga koneksiyon tali sa unsay atong gikat-on diha sa asoy sa kasulatan ug sa ehemplo sa Manluluwas. Alang sa dugang pa kon sa unsang paagi kini gibuhat sa Manluluwas, tan-awa ang seksiyon nga “Hatagi og Gibug-aton ang Ehemplo ni Jesukristo” diha sa Pagtudlo Sumala sa Pamaagi sa Manluluwas. Makakita ka usab og ehemplo kon unsaon kini sa pagbuhat diha sa leksiyon niining semanaha nga giulohan og “Doktrina ug mga Pakigsaad 71.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 71

Katuyoan sa leksiyon: Aron matabangan ang mga estudyante nga makasabot kon sa unsang paagi ang Manluluwas gusto nga kita motubag kon ang mga tawo mosaway sa atong mga gituohan.

• Pagpangandam sa estudyante: Dapita ang mga estudyante nga maghunahuna og usa ka higayon nga ilang nadungog ang usa ka tawo nga nagsaway o nagbugalbugal sa Ang Simbahan ni Jesukristo sa mga Santos sa Ulahing mga Adlaw o sa ilang mga gituohan, ug pamalandongi kini nga mga pangutana: Unsa ang maayo nakong gisulti o gibuhat? Unsa pa man kaha unta ang mas maayo nakong buhaton?

Pagbansay 5 sa Doktrinal nga Kahanas

Katuyoan sa leksiyon: Aron mahatagan ang mga estudyante og mga kahigayonan sa pagsag-ulo sa mga pakisayran sa doktrinal nga kahanas ug sa ilang mahinungdanon nga mga hugpong sa mga pulong sa kasulatan ingon man sa pagkat-on ug sa paggamit sa balaanong mga baroganan alang sa pag-angkon og espirituhanong kahibalo.

• Pagpangandam sa estudyante: Dapita ang mga estudyante sa paghunahuna sa impormasyon nga ilang nasag-ulo nga nakatabang kanila sa eskwelahan, sa trabahoan, o sa mga kalihokan nga ilang gikalingawan. Ang mga estudyante mahimong maghunahuna kon nganong mapasalamaton sila nga ilang nasag-ulo kana nga impormasyon.

• Mga materyal alang sa mga estudyante: Mga kopya sa tsart nga adunay mga pakisayran sa doktrinal nga kahanas ug sa mahinungdanon nga mga hugpong sa mga pulong sa kasulatan; mga gunting

• Handout: “Nagdala Akog Kalipay Inay Kagul-anan: Ang Makaayo nga Dalan sa Pagpasaylo”

Sukda ang Imong Nakat-onan 5

Katuyoan sa leksiyon: Aron matabangan ang mga estudyante sa paghinumdom ug sa pagsusi kon sa unsang paagi ang ilang mga kasinatian sa pagtuon sa Doktrina ug mga Pakigsaad nakatabang kanila nga molambo sa espirituhanong paagi.

• Pagpangandam sa estudyante: Dapita ang mga estudyante sa pagpili og usa ka kalihokan diin malingaw sila ug sa paghunahuna sa mosunod nga mga pangutana: Unsaon nimo pagkahibalo kon ikaw nag-uswag? Unsaon nimo sa pagsukod ang imong pagtubo niini nga kalihokan?

• Mga materyal: Usa ka instrumento, sama sa kagamitan sa pagsukod sa gitas-on o usa ka stopwatch, nga makatabang kanimo sa pagsukod sa pag-uswag sa usa ka kalihokan nga imong giapilan

• Hulagway: Usa ka kasingkasing ug hunahuna

• Sulod nga ipakita: Usa ka lista sa mga pangutana nga pilian ug tubagon sa mga estudyante