Leksiyon 82: Doktrina ug mga Pakigsaad 71–75

Doktrina ug mga Pakigsaad 71

Pagtubag Niadto nga Nagsaway sa Simbahan sa Manluluwas

Sa tingtugnaw niadtong 1831, ang mga sulat nga adunay sayop nga impormasyon mahitungod ni Joseph Smith ug sa Simbahan giapod-apod diha sa dapit sa Kirtland. Sa Doktrina ug mga Pakigsaad 71, ang Manluluwas misugo ni Joseph Smith ug Sidney Rigdon sa pagbiyahe sa tibuok rehiyon, magtul-id sa mga bakak (tan-awa sa mga bersikulo 1–2). Kini nga leksiyon makatabang sa mga estudyante nga makasabot kon sa unsang paagi ang Manluluwas gusto nga kita motubag kon ang mga tawo mosaway sa atong mga gituohan.

Mga Posibleng Kalihokan sa Pagkat-on

Pagtubag sa mga kritiko sa Simbahan sa Manluluwas

Aron matabangan ang mga estudyante nga makasabot sa konteksto sa kasaysayan sa Doktrina ug mga Pakigsaad 71, ipakigbahin ang mosunod nga parapo o ipamubo kini sa imong kaugalingong mga pulong.

Ang pagpanglutos miinit pag-ayo alang ni Joseph Smith ug sa mga Santos sa Kirtland niadtong tingtugnaw sa 1831. Ang ubang mga Santos nagsugod sa pagbiya sa Simbahan, lakip ni Ezra Booth ug Simonds Ryder. Si Booth misugod sa pagmantala og mga sulat nga nag-atake ni Joseph ug naningkamot sa pagbungkag sa buhat sa Ginoo (tan-awa sa History, 1838–1856 [Manuskrito sa Kasaysayan sa Simbahan], volume A-1, 153–54, josephsmithpapers.org). Si Joseph mihangyo sa Ginoo alang sa tambag, ug ang Doktrina ug mga Pakigsaad 71 nadawat.

• Sa unsang paagi kaha nimo gustong tubagon ang mga pagpang-atake sa Simbahan sa Manluluwas ug ni Joseph Smith?

  Dapita ang mga estudyante sa pagpakigbahin og mga ehemplo sa dihang nakasaksi sila og pagsaway sa Simbahan o sa ebanghelyo. Hangyoa ang mga estudyante sa pagpamalandong unsa sa ilang hunahuna ang gusto sa Manluluwas nga ilang itubag kon ang mga tawo dili mabination mahitungod sa ilang mga gituohan. Pagdapit og mubo nga panaghisgot samtang ang mga estudyante motubag sa mosunod nga mga pangutana.

• Unsaon nato pagkahibalo sa labing maayo nga paagi sa pagdala sa mga sitwasyon kon ang uban mosaway sa atong mga gituohan o mopakigbahin og sayop nga impormasyon mahitungod sa Simbahan sa Manluluwas?

• Sa imong hunahuna kanus-a man mas maayo nga ibalewala ang mga pagsaway?

Pamalandongi kon unsa ka masaligon ang imong gibati nga makahibalo kon unsay gusto ni Jesus nga imong itubag. Samtang ikaw nagtuon, pangitaa ang lain-laing mga paagi nga ang Manluluwas nagtudlo kanato sa pagtubag.

Ang Manluluwas nagtudlo kanato sa pagsulti sa walay pagpanglipodlipod ug sa pagpakigbahin sa Iyang ebanghelyo

Basaha ang Doktrina ug mga Pakigsaad 71:1–3, ug pangitaa kon sa unsang paagi ang Manluluwas gusto nga si Joseph ug Sidney motubag sa mga bakak nga gipakatap mahitungod sa Simbahan nianang panahona.

• Unsay mipatigbabaw diha kanimo?

• Sumala sa bersikulo 1, unsa ang gihatag sa Manluluwas aron matabangan si Joseph ug Sidney nga mahibalo unsaon pagtubag?

• Sa unsang paagi ang tambag sa Manluluwas makatabang kanato sa atong panahon?

  Tabangi ang mga estudyante sa pag-ila sa kamatuoran nga ang Manluluwas motudlo kanato pinaagi sa mga kasulatan ug sa Espiritu kon unsaon sa pagtubag niadtong mosaway sa Iyang Simbahan.

• Ngano sa imong hunahuna nga ang paggamit sa mga kasulatan ug ang pagsunod sa mga pag-aghat sa Espiritu mao ang labing maayo nga mga paagi sa pagtubag sa mga pagsaway?

• Sa unsang mga paagi nga ang impluwensiya sa Espiritu makaapekto kon unsaon nato pagtubag ang pagsaway?

Ikonsiderar ang pagdapit og usa ka estudyante sa pagsulat sa “Pagtubag sumala sa pamaagi sa Manluluwas” sa ibabaw sa pisara. Mahimo usab nimong ipasulat sa klase kini nga ulohan sa usa ka pahina sa ilang mga journal sa pagtuon. Ang mga estudyante mahimong magsugod og lista pinaagi sa pagsulat sa “paggamit sa mga kasulatan” ug “pagsunod sa Espiritu” sa ubos niini nga ulohan. Gamit ang lista nga ilang gihimo, ang mga estudyante makabaton og kahigayonan sa pagbansay sa pagtubag sa mga sitwasyon sumala sa paagi sa Manluluwas.

Si Elder Neil L. Andersen sa Korum sa Napulog Duha ka Apostoles migamit sa simbolo sa kasulatan sa nagdilaab nga mga pana aron ihulagway ang pagsaway sa uban sa atong mga gituohan. Samtang imong tun-an kini nga pamahayag, hunahunaa kon unsa ang imong ikadugang sa lista sa “Pagtubag sumala sa pamaagi sa Manluluwas”.

Pinaagi sa taming sa inyong hugot nga pagtuo diha kang Jesukristo, kita mahimong magbubuhat og kadaitan, mopalong … sa tanang nagsiga nga mga pana sa kaaway [tan-awa sa Mga Taga-Efeso 6:16; Doktrina ug mga Pakigsaad 3:8]. …

Sa unsa nga paagi nga ang usa ka magbubuhat og kadaitan mopakalma ug mopabugnaw sa nagsiga nga mga pana? Sigurado dili ang pagnunot ngadto niadtong nagsulti og daotan kanato. Hinoon, kita magpabilin nga masaligon sa atong hugot nga pagtuo, mopakigbahin sa atong mga gituohan uban ang kombiksyon, apan kanunay nga maglikay sa kasuko o malisya. …

Ang magbubuhat og kadaitan aktibo; sila maawhagon sa pamaagi sa Manluluwas.

Unsa ang nakahatag nato og kalig-on sa kaugalingon sa pagpabugnaw, pagpakalma, ug pagsanta sa nagsiga nga mga pana nga gitumong ngadto sa mga kamatuoran nga atong gimahal? Ang kalig-on nagagikan sa atong hugot nga pagtuo ni Jesukristo ug sa atong hugot nga pagtuo sa Iyang mga pulong. (Neil L. Andersen, “Pagsunod kang Jesus: Pagkahimong Magbubuhat og Kadaitan,” Liahona, Mayo 2022, 17–18)

Dapita ang mga estudyante sa paghisgot kon unsay ilang ikadugang sa lista human sa pagrebyo sa pamahayag ni Elder Andersen. Mahimo kang makapangutana sama sa:

• Unsaon ninyo nga mahimong tigpasiugda sa kalinaw kon motubag sa uban?

Basaha ang Doktrina ug mga Pakigsaad 71:4–7, ug pangitaa unsay gitudlo sa Ginoo kang Joseph Smith ug Sidney Rigdon niining piho nga sitwasyon aron sa pagtubag sa sayop nga impormasyon nga gimantala.

• Unsay imong nadiskobrehan?

• Unsa nga koneksiyon ang imong nasabtan tali sa tambag sa Manluluwas niini nga mga bersikulo ug sa mga pagtulun-an ni Elder Andersen?

Hatagi og gibug-aton ang ehemplo ni Jesukristo: Ang mosunod nga kalihokan usa ka oportunidad sa paghatag og gibug-aton sa ehemplo ni Jesukristo. Alang sa dugang nga pagbansay niini, tan-awa ang pagbansay nga giulohan og “Hatagi og gibug-aton ang ehemplo ni Jesukristo” sa Pagpalambo sa mga Kahanas sa Magtutudlo: Magpunting kang Jesukristo. Ikonsiderar ang pagpraktis sa kahanas nga “Tabangi ang mga estudyante sa pagkonektar sa unsay ilang gitun-an ngadto sa giunsa pagpakita og ehemplo ni Kristo ang baroganan.”

Aron matabangan ang mga estudyante sa pag-ila og daghang Kristohanong mga tubag nga makatabang kanila sa pagpanalipod sa ilang mga gituohan, ikonsiderar ang pag-organisar sa klase ngadto sa mga grupo alang sa mosunod nga kalihokan.

Awhaga ang mga estudyante sa paggamit sa mga kasulatan sa pagpangita og mga ehemplo o mga pagtulun-an nga nagpakita og lain-laing mga paagi nga ang Manluluwas ug ang Iyang mga tinun-an mitubag sa pagsaway. Kon ang mga estudyante nagkinahanglan og dugang nga giya, mahimo nimong ipakita ang pipila sa mosunod nga mga tudling nga naghulagway sa mga kasinatian ug mga pagtulun-an sa Manluluwas aron ilang tun-an.

Dapita ang mga estudyante sa paghisgot kon unsay ilang nadiskobrehan uban sa ilang kagrupo ug dayon sa pagpili og usa ka lider sa panaghisgot aron mopakigbahin sa impormasyon ngadto sa klase.

• Mateo 4:3–11 (Si Jesus mitubag sa mga pagtintal ni Satanas gamit ang mga kasulatan.)

• Lucas 23:8–10 (Si Jesus nagbarog sa atubangan ni Herodes, nga nagpakahilom lamang.)

• Juan 8:2–11 (Si Jesus, gikomprontase sa mga kadagkoan sa mga Judio, nagluwas sa kinabuhi sa usa ka babaye.)

• Doktrina ug mga Pakigsaad 100:5–7 (Ang Ginoo nagsaad nga Siya mohatag kanato sa mga pulong nga isulti kon kita mamulong sa Iyang ngalan.)

• Doktrina ug mga Pakigsaad 121:41–45 (Ang Ginoo nagtanyag og tambag kon unsaon sa paghatag og pagtul-id.)

Ikonsiderar ang pagdapit sa mga lider sa grupo sa pagpakigbahin sa klase sa ilang nahisgotan ug idugang sa lista sa angay nga mga tubag diha sa pisara. Pahinumdomi ang mga estudyante nga adunay mga higayon nga ang Espiritu modasig kanato sa pagpakahilom kay sa dayag nga pagtul-id sa unsay gisulti.

Pagbansay sa pagtubag sa paagi sa Manluluwas

Aron matabangan ang mga estudyante sa pagpakita sa ilang pagsabot sa baroganan nga gitun-an karon, mahimo nimong ihatag o ipakita ang mosunod nga mga senaryo. Samtang ang mga estudyante naghisgot og lain-laing mga paagi nga kita mahimong motubag, awhaga sila sa pagpangita sa lista nga ilang gihimo kaganena alang sa mga ideya. Tabangi sila nga makasabot nga adunay daghang husto nga mga paagi sa pagtubag sa matag sitwasyon. Ang Espiritu makatabang kanato nga mahibalo unsay gusto sa Langitnong Amahan nga atong buhaton o isulti kon moabot ang mga sitwasyon.

Mahimo kang magmugna og lain-laing mga sitwasyon nga mas makatubag sa mga panginahanglan sa imong klase o magdugang og mga detalye sa mga senaryo sa ubos aron madugangan ang interes sa mga estudyante. Mahimo ka usab nga mopabuhat sa klase og ilang kaugalingong mga senaryo gikan sa ilang personal nga mga kasinatian. Tingali mahimong angayan nga dapiton ang mga estudyante sa pagpakigbahin sa ilang mga kasinatian sa nangagi.

Ipakigbahin ang pipila ka lain-laing mga paagi nga mahimo kang motubag sa matag usa sa mosunod nga mga sitwasyon sa Kristohanong paagi:

• Nag-post ka og hulagway sa templo sa social media, ug adunay mitubag pinaagi sa pagsaway sa Simbahan tungod sa pagbaton og taas nga mga sumbanan sa pagsulod sa templo.

• Sa usa ka panagtigom sa pamilya, usa ka uyoan misulti og dili mabination nga mga butang mahitungod ni Propeta Joseph Smith.

• Ang usa ka higala nag-ingon nga binuang ang pagtuo sa usa ka Dios nga dili nimo mapamatud-an nga anaa.

• Usa ka tawo sa imong trabahoan misulti sa imong mga kauban sa trabaho nga ang mga Santos sa Ulahing mga Adlaw dili mga Kristiyano.

Sa kaugalingong tukma nga panahon sa Manluluwas

Sila si Joseph Smith ug Sidney Rigdon masulundon sa pagpadayag nga ilang nadawat. Sila mibiyahe sa tibuok dapit, nagsangyaw sa ebanghelyo sa Manluluwas ug mitul-id sa mga bakak nga gipakaylap.

Basaha ang Doktrina ug mga Pakigsaad 71:8–11, ug pangitaa ang pasalig nga gihatag sa Manluluwas ngadto sa tanan kinsa manalipod sa Iyang Simbahan ug sa Iyang ebanghelyo.

• Unsa ang gitudlo niini nga mga bersikulo kanimo mahitungod ni Jesukristo ug sa Iyang buhat?

• Unsa sa imong hunahuna ang gipasabot nga walay mga tingog o mga hinagiban nga mouswag batok kanato (tan-awa sa mga bersikulo 9–10)?

Tabangi ang mga estudyante nga makasabot nga bisan kon wala silay hingpit nga tubag ngadto sa usa ka tawo, ang Manluluwas dili motugot nga ang mga kaaway sa Iyang Simbahan mouswag sa kahangtoran. Ang Manluluwas misaad nga ang mga kritiko “mabuntog diha sa [Iyang] kaugalingon nga tukma nga panahon” (bersikulo 10).

• Unsa ang imong nakat-onan karon nga makatabang kanimo sa pag-atubang sa mga sitwasyon kon ang usa ka tawo nga imong nailhan mosaway sa Simbahan o sa mga pagtulun-an sa Manluluwas?

Mahimo nimong taposon ang klase pinaagi sa pagdasig sa mga estudyante sa pagsunod sa tambag sa Manluluwas kon mag-atubang sila og mga sitwasyon diin ang uban nagsaway sa Simbahan ug sa ebanghelyo. Mahimo nimong ipakigbahin ang imong pagsaksi sa gahom nga gihatag niadtong kinsa manalipod sa ilang mga pagtuo sama sa buhaton sa Manluluwas.

Dugang nga mga Kapanguhaan

Sa unsang paagi nato angay nga trataron kadtong dili mouyon kanato?

Si Presidente Dallin H. Oaks sa Unang Kapangulohan mitudlo:

Sa pagpamulong sa publiko, kinahanglan natong sundon ang mga pagtulun-an sa ebanghelyo sa paghigugma sa atong silingan ug paglikay sa panagbingkil. Ang mga sumusunod ni Kristo kinahanglan nga maoy ehemplo sa kabuotan. Kinahanglang higugmaon nato ang tanan, maminaw og maayo, ug magpakabana sa sinsero nilang mga gituohan. Bisan og supak kita, kinahanglan dili kita makapasakit. Ang atong baroganan ug pagpamulong bahin sa kontrobersiyal nga mga hilisgotan kinahanglang dili makagubot. Kinahanglang maayo kita sa pagpasabot sa atong baroganan ug sa paggamit sa atong impluwensiya. (Dallin H. Oaks, “Paghigugma sa Uban ug Pagpakabuhi nga may mga Panaglahi,” Liahona, Nob. 2014, 27.)

Kinahanglan ba natong kanunay nga panalipdan gamit sa mga pulong ang Simbahan ug doktrina sa Manluluwas?

Si Elder Jeffrey R. Holland sa Korum sa Napulog Duha ka Apostoles mipahayag:

Ako moingon sa tanan ug ilabi na sa kabatan-onan sa Simbahan nga kon wala pa kamo tawaga, moabot ang adlaw nga kamo pagatawgon sa pagpanalipod sa inyong tinuohan o tingali bisan sa paglahutay sa personal nga mga pang-abuso tungod kay kamo mga miyembro sa Ang Simbahan ni Jesukristo sa mga Santos sa Ulahing mga Adlaw. Ang maong higayon magkinahanglan og kaisog ug maayong pamatasan sa inyong bahin. (Jeffrey R. Holland, “Ang Bili—ug mga Panalangin—sa Pagkadisipulo,” Liahona, Mayo 2014, 6)

Si Elder Neil L. Andersen sa Korum sa Napulog Duha ka Apostoles mipahinumdom kanato:

Ang pipila ka pagpang-ataki ngadto sa Manluluwas hugaw kaayo nga Siya wala motubag. “Miduol ang mga kadagkoan sa mga pari ug ang mga magtutudlo sa balaod … ug mipasakag bug-at nga mga sumbong batok kang Jesus … ug gibugalbugalan siya,” apan “wala gayod motubag [kanila] si Jesus” [tan-awa sa Lucas 23:9–11]. Adunay mga panahon nga ang pagbuhat og kadaitan nagpasabot nga pugngan nato ang tinguha sa pagtubag ug hinoon uban sa kaligdong, magpabilin nga hilom.

Makapasubo kaayo alang natong tanan kon ang dili maayo o matamayon nga mga pulong mahitungod sa Manluluwas, ngadto sa Iyang mga sumusunod, ug sa Iyang Simbahan gisulti o gimantala niadtong kinsa sa makausa aktibo nga miyembro sa Simbahan, miambit sa sakramento uban nato, ug mipamatuod uban nato sa balaan nga misyon ni Jesukristo.

Kini nahitabo usab panahon sa pangalagad sa Manluluwas. (Neil L. Andersen, “Pagsunod kang Jesus: Pagkahimong Magbubuhat og Kadaitan,” Liahona, Mayo 2022, 19)

Nganong kinahanglan nga likayan nato ang panagbingkil kon motubag sa pagsaway?

Si Elder Dale G. Renlund sa Korum sa Napulog Duha ka Apostoles mipasabot:

Kon kita makigbangi sa usag usa uban ang kasuko, si Satanas mokatawa ug ang Dios sa langit mohilak.

Si Satanas mokatawa ug ang Dios mohilak tungod sa duha ka hinungdan. Una, ang panagbingkil mopahuyang sa atong hiniusa nga pagsaksi ngadto sa kalibotan mahitungod ni Jesukristo ug sa katubsanan nga moabot pinaagi sa Iyang “mga maayo nga buhat, … kaluoy, ug grasya” [2 Nephi 2:8]. … Ang Iyang buhat sa ulahing mga adlaw mahuyang kon adunay panagbingkil o pagdumot taliwala sa Iyang mga disipulo [tan-awa sa Juan 17:21, 23]. Ikaduha, ang panagbingkil dili makapahimsog sa espirituhanong paagi alang nato isip mga indibidwal. Mawala kanato ang kalinaw, kalipay, ug pahulay, ug ang atong abilidad sa pagpamati sa Espiritu mahuyang.

Si Jesukristo mipasabot nga dili Iyang doktrina “ang pagkutaw sa mga kasingkasing sa mga tawo sa kasuko, usa batok sa usa; apan [ang Iyang] doktrina [mao] nga ang ingon niini nga mga butang pagahunongon” [3 Nephi 11:30]. Kon dali ko nga masilo o motubag sa managlahing opinyon pinaagi sa pagkasuko o pagkamahukmanon, “pakyas” ko sa espirituhanong pag-eksamin sa kasingkasing. Kining pakyas nga pag-eksamin wala magpasabot nga wala na koy paglaom. Kondili, nagpasabot kini nga kinahanglan ko nga mag-usab. Ug nindot nga masayod niana. (Dale G. Renlund, “Ang Kalinaw ni Kristo Makawagtang sa Pagdumot,” Liahona, Nob. 2021, 83–84)

Dugang nga mga Kalihokan sa Pagkat-on

Si Jacob mitubag kang Sherem

Laing ehemplo nga makatabang sa mga estudyante nga makasabot kon unsaon sa pagtubag sa pagsaway mao ang istorya ni Jacob ug Sherem diha sa Basahon ni Mormon. Ikonsiderar ang pagdapit sa mga estudyante sa pagbasa sa Jacob 7:1–3, 8–12 diha sa gagmay nga mga grupo aron makita kon giunsa paggamit ni Jacob ang Espiritu ug ang mga kasulatan sa pagtubag kang Sherem.

• Unsa ang imong namatikdan kon giunsa pagdala ni Jacob ang pakig-inter-aksyon?

• Unsaon sa usa ka tawo sa pagtubag sa susama nga paagi karon?

Human sa panaghisgotan, mahimo nimong dapiton ang mga estudyante sa pagbasa sa Jacob 7:13–23 aron makita kon sa unsang paagi matapos ang istorya.

Unsa ang buhaton kong adunay mohagit sa imong pagtuo

Ang mga estudyante mahimong makabenepisyo gikan sa pagtan-aw sa mga bahin sa bidyo sa “Everyday Example: When Beliefs Are Questioned” (12:48) aron makita ang usa ka gi-drama nga sitwasyon diin ang mga pagtuo sa usa ka miyembro sa Simbahan ni Jesukristo gikuwestiyon. Mahimo nimong ihunong ang bidyo ug dapita ang mga estudyante sa pagkonsiderar kon sama sa unsa kaha ang tukmang tubag. Ang mga pangutana sa panaghisgotan mahimong maglakip sa:

• Unsaon kaha nimo sa pagpakita ang tukmang paagi sa Kristohanong gugma alang sa usa ka tawo nga nagduhaduha sa imong mga gituohan?

• Unsaon nimo sa pagtubag kon ang imong mga pagtuo gisaway sa susamang paagi?

• Unsa ang mahimong iaghat sa Espiritu nga imong buhaton sa susama nga sitwasyon?