Leksiyon 84: Doktrina ug mga Pakigsaad 71–75

Sukda ang Imong Nakat-onan 5

Doktrina ug mga Pakigsaad 51–75

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Manluluwas. Kini nga leksiyon makatabang sa mga estudyante sa paghinumdom ug sa pagsusi kon sa unsang paagi ang ilang mga kasinatian sa pagtuon sa Doktrina ug mga Pakigsaad nakatabang kanila sa paglambo sa espirituhanong paagi.

Mga Posibleng Kalihokan sa Pagkat-on

Pahinumdom: Mahimong wala kay igong panahon sa klase sa pagbuhat sa matag oportunidad sa pagsukod nga gihatag dinhi niini nga leksiyon. Pilia ang mga seksiyon nga imong gibati nga labing makabenepisyo sa imong mga estudyante sa pagsukod sa ilang pagkat-on.

Sukda ang imong paglambo

Ikonsiderar ang paghatag og oportunidad sa mga estudyante sa pagpakigbahin sa mga tubag sa mosunod nga mga pangutana ngadto sa daghang mga klasmeyt. Mahimo kini pinaagi sa paghatag kanila og usa ka minuto sa pagpangita og usa ka klasmeyt ug ang matag usa mopakigbahin sa ilang mga tubag. Mahimong balikon kini sa makadaghang higayon.

(Mahimo kang mohatag og ehemplo pinaagi sa pagpakigbahin og kalihokan nga ikaw malingaw. Ikonsiderar ang pag-display o pagpakita og hulagway sa usa ka himan nga gigamit sa pagsukod sa pag-uswag sa imong kalihokan. Pananglitan, kon ganahan ka nga modagan, mahimo nimong ipakita ang usa ka stopwatch ug ipasabot kon sa unsang paagi kini magamit sa pagsukod sa imong pagtubo.)

• Unsa ang usa ka kalihokan nga malingaw ka sa pag-apil?

• Unsaon nimo sa pagkahibalo kon ikaw nag-uswag? Aduna bay piho nga mga himan nga imong gigamit aron masukod ang imong pag-uswag?

Sama nga ang pagsukod sa atong pisikal nga pag-uswag makatabang kanato nga makita ang atong paglambo, kita kinahanglang mogahin ug panahon sa pagsusi sa atong espirituwal nga paglambo. Ang Espiritu Santo mao ang instrumento nga nagtabang kanato sa pagsukod sa atong espirituhanong pag-uswag. Usa ka paagi nga atong madapit ang Espiritu Santo sa pagtabang kanato nga makita ang atong pag-uswag mao ang mainampoong pagpamalandong sa espirituhanong mga leksiyon nga atong nakat-onan ug sa pagkonsiderar kon sa unsang paagi kita milambo sa espirituhanong paagi samtang atong gigamit kana nga mga leksiyon sa atong kinabuhi.

Dapita ang mga estudyante sa pagbasa sa ilang mga mubo nga sulat ug mga kasulatan gikan sa miaging pipila ka semana sa seminary (Doktrina ug mga Pakigsaad 51–75), motan-aw sa mga leksiyon nga ilang nakat-onan ug mga tumong nga ilang gitakda. Ipakita ang mosunod nga mga pangutana aron matabangan ang mga estudyante nga mamalandong sa ilang espirituhanong paglambo. Mahimong mopili ang mga estudyante sa pagsulat sa ilang mga tubag diha sa journal sa pagtuon o sa pagpamalandong sa ilang mga tubag.

• Unsa ang pipila ka butang nga imong gibuhat aron sa paggamit sa espirituhanong mga kamatuoran nga imong nakat-onan sa seminary? Sa unsang paagi nga ang paggamit niini nga mga kamatuoran nagtabang kanimo nga motubo sa espirituhanon nga paagi?

• Sa unsang paagi nimo namatikdan ang Langitnong Amahan ug ang Manluluwas nga nagtabang kanimo samtang imong gigamit ang unsay imong nakat-onan sa imong mga paningkamot nga mahimong mas mahisama Kanila?

Hatagi og oportunidad ang mga estudyante sa pagpakigbahin og mga tubag nga dili kaayo personal. Dapita ang mga estudyante nga mahimong sensitibo sa Espiritu samtang mangita sila og mga paagi nga mas magamit pa gayod kini nga mga leksiyon sa ilang kinabuhi.

Ipasabot ang katuyoan sa mga sugo

Ikonsiderar ang pagpakita sa unang kapahayag sa mosunod nga pamahayag ni Presidente Russell M. Nelson, nga ilisan ang pulong nga “mga balaod” og usa ka blangko nga linya. Mahimong mosugyot ang mga estudyante og posible nga mga kapilian alang sa nawala nga pulong. Human ang mga estudyante misulay sa pag-ila sa nawala nga pulong, ipakita ang tibuok nga pamahayag.

Tungod kay ang Amahan ug ang Anak nahigugma kanato uban sa walay kinutoban, hingpit nga gugma ug tungod kay Sila nahibalo nga kita dili makakita sa tanan nga Ilang nakita, Sila mihatag kanato og mga balaod nga mogiya ug manalipod kanato. Dunay lig-on nga koneksiyon tali sa gugma sa Dios ug sa Iyang mga balaod. (Russell M. Nelson, “The Love and Laws of God” [debosyonal sa Brigham Young University, Sept. 17, 2019], 2,speeches.byu.edu)

• Unsa ang usa ka sugo nga nakatabang kanimo nga mobati nga gipanalipdan ug gihigugma sa Dios?

  Dapita ang mga estudyante sa paggamit sa ilang mga kasulatan ug mga mubo nga sulat sa pagpangita sa mga tubag sa mosunod nga pangutana.

• Unsa ang pipila sa mga balaod sa Dios nga bag-o lang natong gitun-an sa Doktrina ug mga Pakigsaad?

Mahimo nimong ipasulat sa usa ka estudyante ang mga tubag sa pangutana diha sa pisara. Mahimo nilang hisgotan ang pipila sa mosunod: paghinulsol (58:42–43), pagbalaan sa adlaw nga Igpapahulay (59:9–13), kaputli (63:13–16), ug pagpasaylo sa uban (64:9–11).

Ipakita ang usa ka senaryo sama sa mosunod. Dapita ang mga estudyante sa pagbansay kon unsaon nila sa pagpasabot ang katuyoan sa mga sugo ngadto sa ilang higala. Ang mga pangutana nga nagsunod sa senaryo makatabang sa paggiya sa ilang mga tubag.

Handurawa nga usa sa imong mga higala mipakigbahin sa iyang kasagmuyo kanimo mahitungod sa usa ka sugo. Naghunahuna siya kon nganong ang Dios maghasol pa man sa paghatag kanato og mga sugo.

Pagpili og usa ka sugo nga imong gitun-an sa Doktrina ug mga Pakigsaad karong tuiga ug ipakigbahin kini:

• Sa unsang paagi kana nga sugo usa ka panalipod ug giya gikan sa atong Amahan sa Langit.

• Sa unsang paagi kana nga sugo ebidensiya sa gugma sa Dios.

Paghatag sa imong kasingkasing ug andam nga hunahuna ngadto sa Ginoo

Isip kabahin sa pagtuon sa Doktrina ug mga Pakigsaad 64:20–43, ang mga estudyante tingali gidapit sa pagdrowing og mga hulagway sama sa mosunod diha sa ilang mga journal sa pagtuon. Ikonsiderar ang pagpakita niini nga hulagway ug hangyoa ang mga estudyante sa pagpakigbahin sa unsay ilang nahinumdoman mahitungod niana nga leksiyon. Sila gidapit sa pagkolor sa gidak-on sa ilang mga hunahuna ug mga kasingkasing nga paminaw nila ilang gihatag ngadto sa Ginoo.

Dapita ang mga estudyante sa pagpangita sa ilang drowing o sa pagsulay sa paghinumdom kon unsay hitsura niini. Tabangi ang mga estudyante sa paghinumdom nga kon giunsa nila sa pagkolor ang ilang kasingkasing ug hunahuna usa lamang kadto ka daklit nga paghulagway sa nangaging panghitabo. Kini mausab, dili permanente. Sila mahimong magtinguha sa tabang sa Manluluwas aron mahimong andam sa paghatag og mas dako pa sa ilang mga hunahuna ug mga kasingkasing ngadto Kaniya. Dasiga ang mga estudyante sa pagpamalandong sa ilang mga kasinatian pinaagi sa pagtubag sa pipila sa mosunod nga mga pangutana diha sa ilang mga journal sa pagtuon.

• Unsa ang imong gibuhat o mahimo nimong buhaton aron madugangan ang imong tinguha sa paghatag ngadto sa Manluluwas sa imong kasingkasing ug hunahuna?

• Unsa nga mga kausaban ang imong namatikdan sa imong tinguha sa paghatag sa imong kasingkasing ug hunahuna ngadto sa Manluluwas?

• Sa unsang paagi ang imong mga hunahuna ug mga lihok nakaimpluwensiya sa imong relasyon sa uban ug kang Jesukristo?

Hatagi ang pipila ka mga estudyante sa oportunidad sa pagpakigbahin kon unsa ang makahuloganon ngadto kanila mahitungod niini nga kasinatian ug sa unsang paagi kini nakaapekto kanila.

Mahimo dayong magdrowing ang mga estudyante og ikaduha nga kasingkasing ug hunahuna diha sa ilang journal sa pagtuon tapad sa ilang orihinal nga drowing. Dapita sila sa pagkolor sa gidak-on sa ilang kasingkasing ug hunahuna nga karon ilang gihatag ngadto sa Manluluwas isip resulta sa ilang mga paningkamot sa pagpalambo. Mahimong itandi sa mga estudyante ang duha ka mga hulagway ug tinoon kon ang ilang kaandam sa paghatag ngadto sa Manluluwas sa ilang kasingkasing ug hunahuna milambo ba.

Pagbalaan sa adlawng Igpapahulay

Ikonsiderar ang pagpakita sa mosunod nga bahin sa usa ka pangutana alang sa rekomend sa templo ug dapita ang mga estudyante sa pagpakigbahin kon unsay ilang nakat-onan mahitungod sa pagbalaan sa adlaw nga Igpapahulay karong tuiga. (Kon gikinahanglan, mahimo nimong hatagan ang mga estudyante og panahon sa pagrebyo sa daklit sa Doktrina ug mga Pakigsaad 59 o sa ilang mga entry sa journal gikan sa leksiyon niana nga seksiyon.)

Ikaw ba naningkamot sa pagbalaan sa adlaw nga Igpapahulay, diha sa panimalay ug sa simbahan…

Isip kabahin sa leksiyon sa Doktrina ug mga Pakigsaad 59, ang mga estudyante tingali gidapit sa paghimo og plano sa pagtahod sa Manluluwas sa adlaw nga Igpapahulay. Kon mao, dapita sila sa pagpamalandong sa ilang nahimo isip resulta. Mahimong makatabang alang sa mga boluntaryo ang pagpakigbahin sa bahin sa ilang plano ngadto sa klase.

Ikonsiderar ang pagpakita sa mosunod nga mga pangutana aron matabangan ang mga estudyante sa pagsukod sa ilang mga paningkamot sa pagbalaan sa adlaw nga Igpapahulay. Dapita ang mga estudyante sa pagpili og duha o tulo ka mga pangutana gikan sa lista aron matubag diha sa ilang mga journal sa pagtuon.

• Hunahunaa ang usa ka butang nga imong gibuhat aron sa pagbalaan sa adlaw nga Igpapahulay. Sa unsang paagi ang imong kasinatian sa adlawng Igpapahulay milambo tungod niini?

• Sa unsang paagi nga ang imong paningkamot sa pagbalaan sa adlawng Igpapahulay nakapaduol kanimo ngadto sa Langitnong Amahan ug sa Manluluwas?

• Unsa ang pipila ka mga hagit nga imong giatubang sa pagbalaan sa adlaw nga Igpapahulay?

• Unsa ang usa ka butang nga gusto nimong sugdan sa pagbuhat aron sa pagbalaan sa adlaw nga Igpapahulay?

• Nganong importante man ang pagbalaan sa adlaw nga Igpapahulay?

• Unsa ang usa ka butang diha sa imong lista nga wala pa nimo mabuhat nga mahimo nimong sugdan ang pagbuhat niini karong Dominggo aron sa pagbalaan sa adlaw nga Igpapahulay?

• Sa unsang paagi nga ikaw nakahimo nga mas motahod sa Amahan sa Langit ug ni Jesukristo samtang ikaw nagsugod o mihunong sa pagbuhat og pipila ka mga butang sa adlaw nga Igpapahulay?

Samtang kini nga mga pangutana gituyo alang sa mga estudyante sa tagsa-tagsa nga pagsukod sa ilang mga paningkamot sa pagbalaan sa adlaw nga Igpapahulay, kon angay, mahimo nimong dapiton ang andam nga mga estudyante sa pagpakigbahin sa pipila sa ilang mga tubag ug mga kasinatian.

Dasiga ang mga estudyante sa ilang mga paningkamot sa pagdawat sa mga panalangin sa pagtahod sa adlaw nga Igpapahulay, ilabi na niadtong wala pa makahimo og bisan unsa nga aksiyon. Mahimo nimo silang dapiton sa pagbutang og pahinumdom sa ilang telepono aron sa pagbuhat og usa ka butang aron mas mabalaan ang sunod nga adlawng Igpapahulay. Pagpamatuod sa tinguha sa Manluluwas nga sila moduol ngadto Kaniya ug nga ang pagbalaan sa adlaw nga Igpapahulay usa ka paagi nga kita mahiduol ngadto Kaniya.