Tan-awa ang mga tigkat-on sa paagi nga ang Dios nagtan-aw kanila.

Kahanas

Tun-i ang bag-ohay nga propetikanhon nga mga mensahe aron masabtan kon unsa ang pagtan-aw sa Langitnong Amahan sa mga batan-on.

Ipasabot

Elder Dale G. Renlund nagtudlo, “Aron epektibong makaserbisyo sa uban kinahanglan ato silang makita … pinaagi sa panan-aw sa Dios” (“Pinaagi sa Panan-aw sa Dios,” Liahona, Nob. 2015, 94). Ang buhi nga mga propeta mga dinasig nga kalalakin-an nga gitawag aron mamulong alang sa Ginoo. Pinaagi sa pagsabot kon unsa ang gitudlo sa mga propeta mahitungod sa kabatan-onan karon, ikaw makatan-aw sa imong mga estudyante pinaagi sa Panan-aw sa Dios ug mas makahibalo kon unsaon sa pagtabang kanila sa bisan unsa nga panahon. Usa ka paagi sa pagbuhat niini mao ang mainampoon nga pagtuon sa propetikanhong mga mensahe sa pagdiskobre sa mga tubag sa mga pangutana sama sa mosunod:

• Unsa ang gitudlo sa mga propeta ug apostoles mahitungod sa talagsaong pagkatawo sa kabatan-onan?

• Unsa ang gihangyo sa mga lider sa Simbahan nga buhaton sa mga batan-ong katawhan?

• Unsa ang gipadayag sa mga propeta ug apostoles mahitungod sa mga paglaom, mga tinguha, ug mga pagbati, ug mga gilaoman sa Ginoo alang sa mga batan-o?

Samtang magtuon ikaw sa mga pulong sa buhi nga mga propeta aron makaplagan ang mga tubag ngadto niining mga pangutana, ikaw molambo diha sa imong pagsabot kon unsa ang pagtan-aw sa Dios sa kabatan-onan sa Simbahan. Samtang ikaw motan-aw sa mga estudyante sa mas klaro pinaagi sa panan-aw sa Dios, ikaw madasig sa pagtudlo ug pagkig-interaksiyon uban sa mga batan-on diha sa mas taas ug mas balaan nga mga paagi.

Modelo

• Si Sister Antel magsugod na sa iyang unang tuig sa pagtudlo sa Institute. Sa wala pa makigkita sa iyang estudyante, nagtuon siya sa pakigpulong ni Presidente Nelson nga “Mga Pagpili alang sa Kahangtoran” samtang namalandong sa pangutana nga “Unsa man ang gusto sa propeta sa Ginoo nga akong masabtan mahitungod sa mga young adult nga andam kong itudlo?” Mas klaro niyang nakita kon sa unsang paagi ang Langitnong Amahan nagtan-aw sa iyang mga estudyante samtang siya nagbasa sa mosunod: “Una sa tanan, kamo mga anak sa Dios. Ikaduha, isip miyembro sa Simbahan, kamo anak sa pakigsaad. Ug ikatulo, kamo mga disipulo ni Jesukristo.”

• Si Brother Mueller nasagmuyo tungod kay ang mga estudyante sa iyang klase sa seminary mora og dili interesado. Siya nagtinguha og tabang pinaagi sa pagtuon sa labing bag-o nga mga pakigpulong sa kinatibuk-ang komperensiya aron makakita og mga tubag sa mga pangutana nga “Unsa man ang gipakigbahin sa mga lider sa Simbahan mahitungod sa mga paglaom, mga tinguha, ug mga pagbati, ug mga gilaoman sa Ginoo alang sa mga batan-on?” Ang iyang panglantaw sa iyang mga estudyante milig-on sa dihang iyang gibasa ang mga pulong ni Elder Dieter F. Uchtdorf: “Minahal kong mga higala, tugoti ko nga mosubli, kon ang Manluluwas nagbarog karon dinhi, Siya mopadayag sa Iyang walay kinutoban nga gugma alang kaninyo, sa Iyang hingpit nga pagsalig kaninyo” (“Si Jesukristo Mao ang Kalig-on sa mga Kabatan-onan,” Liahona, Nob. 2022, 12).

Pagpraktis

• Pagtuon sa usa ka bag-ong propetikanhong mensahe ug pangita og mga salabotan nga makatabang nimo nga makasabot kon sa unsang paagi ang Langitnong Amahan nagtan-aw sa imong mga estudyante.

Iapil

• Paghimo og usa ka lista sa propetikanhon nga mga pamahayag gikan sa nangagi nga nakatabang kaninmo nga matan-aw ang batan-ong katawhan pinaagi sa panan-aw sa Langitnong Amahan.

Hisgoti o Pamalandongi

Sa unsang paagi ang pagtan-aw sa batan-ong katawhan pinaagi sa panan-aw sa Dios makaapekto sa paagi nga ikaw motratar kanila?

• Unsa pa ang uban nga propetikanhon nga mga pamahayag nga nakatabang kanimo nga matan-aw ang batan-ong katawhan sa paagi nga ang Langitnong Amahan nagtan-aw kanila, ug unsa ang kalainan nga nahimo niana alang kanimo?

• Unsa pa ang laing mga pangutana nga tingali imong pamalandongan samtang nagtuon sa propetikanhong mga mensahe sa pagtabang kanimo nga mas masabtan ang mga kabatan-onan sa Simbahan?

Gusto pa og Dugang?

• Russell M. Nelson, “Mga Pagpili alang sa Kahangtoran” (tibuok kalibotan nga debosyonal alang sa mga young adult, Mayo 15, 2022), ChurchofJesusChrist.org

• Dale G. Renlund, “Pinaagi sa Panan-aw sa Dios,” Liahona, Nob. 2015, 93–94

• Chad H Webb, “His Representatives” (Tinuig nga sibya sa pagbansay sa Seminaries and Institutes of Religion, Ene. 21, 2022), broadcasts.ChurchofJesusChrist.org