Tinguhaa nga makaila kanila—sabta ang ilang mga sirkumstansiya, mga panginahanglan, ug mga kalig-on.

Kahanas

Pag-obserbar ug pangutana mahitungod sa mga interes sa mga estudyante.

Ipasabot

Ang mga magtutudlo makakat-on mahitungod sa mga sirkumstansiya sa ilang mga estudyante ug moila og pipila sa ilang mga panginahanglan sa pagkat-on pinaagi sa pag-obserbar ug pagpangutana mahitungod sa ilang mga interes. Sa kasagaran labing sayon ang paghimo niining mga panag-istoryahanay sa dili pa ug human sa klase, apan mahitabo usab kini atol sa klase. Adunay nagkadaiya nga mga paagi nga ang mga magtutudlo makahimo niini. Usa ka magtutudlo mahimong makabantay og usa ka libro, usa ka proyekto, usa ka sticker, usa ka piraso sa ekipo sa isport, o laing butang nga gidala sa usa ka estudyante nganha sa klase. O usa ka magtutudlo tingali nakahinumdom og usa ka kalihokan diin giapilan sa mga estudyante ug mangutana kanila mahitungod niini. Ang atong mga ipangutana makatabang kanato nga makaila sa mga estudyante ug sa ilang mga interes ug maglakip og mga hugpong sa mga pulong nga sama sa:

• “Sultihi pa ko og daghan bahin niana …”

• “Unsa ang inyong nagustohan kabahin sa …”

• “Kuryoso lang ko nga masayod …”

Kon ang mga magtutudlo sinsero ug tinud-anay sa ilang mga pangutana, makakat-on sila og dugang mahitungod sa mga sirkumstansiya ug mga panginahanglan sa pagkat-on sa ilang mga estudyante, ug ang mga estudyante mobati nga ang ilang magtutudlo nagpakabana gayod. Kon ang mga estudyante mobati nga ang ilang magtutudlo tinud-anay nga nagpakabana kanila, sila lagmit nga moadto sa klase nga andam sa pagkat-on ug mopakigbahin sa ilang mga panabot ug mga kasinatian ngadto sa ilang magtutudlo ug sa uban diha sa klase.

Modelo

1. Nahinumdom si Hermana Muñoz nga si Rosa adunay dakong dula sa soccer nga si Rosa gikulbaan niini. Sa dihang iyang nakita si Rosa, si Hermana Muñoz mihunong ug nangutana niya kon unsay iyang gibati kabahin sa dula.

2. Gibutang ni Auro ang iyang mga yawe sa lamesa. Sa imong pag-agi, imong namatikdan ang usa ka bandila gikan sa laing nasod sa iyang key chain. Nakuryoso ka ug miingon, “Auro, sultihi ko bahin sa bandila nga naa sa imong key chain.” Si Auro mipaambit nga ang iyang igsoong babaye nagmisyon sa Brazil, ug siya miuban sa iyang pamilya sa pagkuha kaniya pagkahuman sa iyang misyon. Imong gipadayon ang panag-istoryahanay, nangutana, “Unsay ganahan nimo bahin sa pakigkita sa imong igsoong babaye sa iyang misyon?

Iklik dinhi aron makakita og bidyo niini nga modelo.

Pagpraktis

Praktis #1: Sa matag usa sa mosunod nga mga hulagway, unsay imong nakita nga makatabang nimo nga makat-on mahitungod sa mga sirkumstansiya o mga panginahanglan sa pagkat-on niini nga mga estudyante?

Praktis #2: Unsang mga pangutana ang mahimo nimong ipangutana aron makakat-on og dugang bahin sa mga interes sa imong mga estudyante?

Hisgoti o Pamalandongi

• Unsa ang imong nakat-onan samtang nagpraktis ka sa pag-obserbar ug pagpangutana bahin sa mga interes sa mga estudyante?

• Sa unsang paagi ang pag-obserbar ug pagpangutana bahin sa mga interes sa mga estudyante makapakita nga gihigugma nimo ang imong mga estudyante?

Iapil

• Sa klase karong semanaha, pangitaa ang mga oportunidad sa pagpangutana sa mga estudyante mahitungod sa ilang mga interes, mga panghitabo, o mga sirkumstansiya. Tinuod nga ipakita nga ikaw nagpakabana sa imong nakat-onan gikan kanila. Pangitaa kon unsa ang epekto niini sa kasinatian sa pagkat-on sa estudyante isip resulta. Paggahin og lima ka minuto human sa klase sa pagsulat unsay imong nakat-onan mahitungod sa imong mga estudyante ug sa unsang paagi kana makatabang nimo sa paghimo og mga kasinatian sa pagkat-on nga mosangpot sa pagkakabig, kalambigitan, ug pagkanahisakop.

Gusto pa og dugang?

• Lori Newbold, “See the One” (tinuig nga sibya sa pagbansay sa Seminaries and Institutes of Religion, Hunyo 13, 2017), broadcasts.ChurchofJesusChrist.org

• Chad . Webb, “Kita Wala Moabot Niining Gilay-ona Aron Igo Lang Mohunong Dinhi” (Sibya sa tinuig nga pagbansay sa Seminaries and Institutes of Religion, Hunyo 9, 2020) broadcasts.ChurchofJesusChrist.org

• “Reaching the Individual” (bidyo), ChurchofJesusChrist.org

Kahanas

Hunong, pamalandong, ug tubaga ang mga pangutana nga atong ipangutana sa atong kaugalingon nga makadapit sa Kristohanong diwa sa pagsabot, gugma, ug empatiya sa atong mga inter-aksiyon.

Kini nga pagbansay nagpresentar sa una sa tulo ka konektado nga mga kahanas nga makatabang kanato sa pagsabot nga ang mga estudyante mahimong makakita sa mahangtorong mga kamatuoran gikan sa lahi nga pangagpas kay sa atong nakita. Kon mas masabtan nato ang atong mga estudyante, mas makahimo kita sa pagtubag ngadto kanila nga may gugma ug empatiya samtang kita motabang kanila sa pag-ugmad og hugot nga pagtuo kang Jesukristo.

Kini nga mga pagbansay maglakip sa:

1. Pag-ila sa pangagpas sa usa ka estudyante pinaagi sa paghunong, pagpamalandong, ug pagtubag sa mga pangutana nga atong ipangutana sa atong kaugalingon atol sa pagpangandam sa leksiyon ug samtang atong hatagan og pagtagad ang mga komentaryo o mga pangutana sa mga estudyante diha sa klase;

2. Pagtinguha nga maklaro ug masabtan ang tinuod nga katuyoan sa mga pangutana, mga pagbati, ug gituohan sa estudyante; ug

3. Pagtabang sa mga estudyante sa pagsusi o pag-usab sa ilang pangagpas gamit ang mahangtoron nga panglantaw.

Ang ikaduha ug ikatulo nga mga pagbansay ihatag sa sunod.

Kini nga pagbansay magpunting sa mosunod nga kahanas:

• Pag-ila sa pangagpas sa usa ka estudyante pinaagi sa paghunong, pagpamalandong, ug pagtubag sa mga pangutana nga atong ipangutana sa atong kaugalingon atol sa pagpangandam sa leksiyon ug samtang atong hatagan og pagtagad ang mga komentaryo o mga pangutana sa mga estudyante diha sa klase.

Ipasabot

Matag estudyante nga moabot sa klase nga may lain-lain nga mga kasinatian ug mga relasyon sa kinabuhi nga makaimpluwensiya sa paagi nga sila maghunahuna ug mobati mahitungod sa mga kamatuoran sa ebanghelyo. Kini nga mga panglantaw mao ang sinugdanan, sa kasagaran gitawag og pangagpas, sa hunahuna sa indibidwal. Ang pag-ila sa pangagpas sa usa ka indibidwal makatabang kanato sa pagtudlo sa kamatuoran uban ang empatiya ug gugma, sama sa gibuhat ni Jesukristo. Ang lainlaing mga pangagpas dili mousab sa doktrina; hinoon, kini magtugot kanato nga makita ang panglantaw sa ubang tawo sa paagi nga makatabang sa pagdugang sa atong pagsabot sa mga panginahanglan sa matag tigkat-on, agig balos, molambo ang hugot nga pagtuo diha kang Jesukristo.

Atol sa pagpangandam sa leksiyon, ang mga magtutudlo mahimong mokonsiderar sa mahangtoron nga mga kamatuoran kon sila mohunong, mamalandong, ug motubag sa mosunod nga mga pangutana:

• Sa unsa kaha nga paagi ang mga kasinatian ug mga relasyon sa akong mga estudyante makaimpluwensiya sa paagi nga sila maghunahuna, mobati, ug mosunod niining mga kamatuoran?

• Samtang kami magtuon niining kamatuoran, aduna ba kaha sa akong mga estudyante ang mobati nga walay labot, malibog, o masakitan tungod sa ilang mga sirkumstansiya?

Samtang mohatag og pagtagad sa komentaryo o pangutana sa usa ka estudyante atol sa klase, o sa usa ka panag-istorya, ang mga magtutudlo makapangutana sa ilang kaugalingon:

• “Unsa kaha nga mga kasinatian ug mga relasyon ang anaa niini nga estudyante nga nakapalahi sa iyang hunahuna kay sa akoa?”

• “Unsa pa kaha ang angay nakong mahibaloan aron hingpit nga masabtan kon unsa iyang panglantaw?”

Kini nga mga pangutana makadapit sa Espiritu Santo ug makadapit og usa ka Kristohanong diwa sa pagsabot, gugma, ug empatiya sa atong mga inter-aksiyon. Makatabang usab kini kanato nga likayan ang pagsulti ngadto sa mga estudyante sa paagi nga mapahitas-on, mahukmanon, o mapanagan-on nga paagi. Kini makatabang kanato sa pagtudlo sa kamatuoran sa paagi nga makapanalangin sa klase ug motabang sa uban nga mapalig-on ang hugot nga pagtuo diha kang Jesukristo.

Modelo (atol sa pagpangandam sa leksiyon)

Samtang nangandam og leksiyon bahin sa pagsunod sa mga pag-aghat sa Espiritu Santo, ako mamalandong sa mosunod nga mga pangutana: “Sa unsa kaha nga paagi ang mga kasinatian ug mga relasyon sa akong mga estudyante makaimpluwensiya sa paagi nga sila maghunahuna, mobati, ug mosunod niining mga kamatuoran?” ug “Samtang kami magtuon niining kamatuoran, aduna ba kaha sa akong mga estudyante nga manglimbasog o mobati nga walay labot, malibog, o masakitan tungod kay ang ilang mga sirkumstansiya dili haom kalabot niining doktrina?”

Dayon ako motubag: “Tingali ako adunay mga estudyante nga mobati nga sila wala gayod makadawat og usa ka pag-aghat sukad, o sila wala mobati nga ang Espiritu Santo namulong ngadto nila. Tingali ako adunay pipila ka mga estudyante kinsa mobati nga sila dili takos. Tingali adunay higayon nga ang akong mga estudyante dili segurado kon ang pag-aghat nga miabot gikan ba sa Espiritu Santo. Tingali adunay mga estudyante kinsa gikapoy na sa pagpaminaw og mga istorya gikan sa uban mahitungod sa pagsunod sa Espiritu tungod kay kini kanunayng mora og milagroso ra kaayo ug kana nga mga butang wala gayod mahitabo ngadto nila.”

Pagpraktis (atol sa pagpangandam sa leksiyon)

Samtang nangandam og usa ka leksiyon sa 1 Nephi 3:7, “Ako moadto ug mobuhat sa mga butang nga ang Ginoo nagsugo”:

• Pamalandong ug tubag: “Sa unsa kaha nga paagi ang mga kasinatian ug mga relasyon sa akong mga estudyante makaimpluwensiya sa paagi nga sila maghunahuna, mobati, ug mosunod niining mga kamatuoran?” ug “Samtang kami magtuon niining kamatuoran, aduna ba kaha sa akong mga estudyante nga manglimbasog o mobati nga walay labot, malibog, o masakitan tungod kay ang ilang mga sirkumstansiya dili haom kalabot niining doktrina?”

Samtang nangandam og leksiyon bahin sa kinatawhan [gender] isip usa ka importante nga matang sa kinaiya sa atong mahangtoron nga talagsaon nga pagkatawo ug katuyoan diha sa leksiyon nga giulohan og “Kinatawhan ug ang Mahangtoron nga Pagkatawo”:

• Pamalandong ug tubag: “Sa unsa kaha nga paagi ang mga kasinatian ug mga relasyon sa akong mga estudyante makaimpluwensiya sa paagi nga sila maghunahuna, mobati, ug mosunod niining mga kamatuoran?” ug “Samtang kami magtuon niining kamatuoran, aduna ba kaha sa akong mga estudyante nga manglimbasog o mobati nga walay labot, malibog, o masakitan tungod kay ang ilang mga sirkumstansiya dili haom kalabot niining doktrina?”

Modelo (atol sa klase)

• Kon maghisgot sa doktrina bahin sa adlaw nga Igpapahulay, usa ka estudyante mokomentaryo, “Ang akong pamilya malingaw magtan-aw og mga kalihokan sa isport sa Dominggo.” Samtang ikaw mohatag og pagtagad sa mga komentaryo sa imong estudyante, ikaw maghunahuna nga, “Unsa kaha nga mga kasinatian ug mga relasyon ang anaa niini nga estudyante nga nakapalahi sa iyang hunahuna kay sa akoa?” o “Unsa pa kaha ang angay nakong mahibaloan aron hingpit nga masabtan kon diin siya gikan?”

Pagpraktis (atol sa klase)

Samtang naghisgot og misyonaryo nga buhat, usa ka estudyante ang nangutana, “Unsa may anaa anang matag batan-on nga lalaki nga magserbisyo og misyon?”

• Hunahunaa sa hilom, “Unsa kaha nga mga kasinatian ug mga relasyon ang anaa niini nga estudyante nga nakapalahi sa iyang hunahuna kay sa akoa?” o “Unsa pa kaha ang angay nakong mahibaloan aron hingpit nga masabtan kon nganong ingon niana ang iyang panghunahuna?”

Sa usa ka panaghisgotan bahin sa mga propeta ug pagpadayag, usa ka estudyante ang nangutana, “Kanus-a man ang Simbahan mousab sa mga palisiya niini aron mas motukma sa uban sa kalibotan”

• Hunahunaa sa hilom, “Unsa kaha nga mga kasinatian ug mga relasyon ang anaa niini nga estudyante nga nakapalahi sa iyang hunahuna kay sa akoa?” o “Unsa pa kaha ang angay nakong mahibaloan aron hingpit nga masabtan kon nganong nakahunahuna siya niana?”

Iklik dinhi aron makakita og bidyo niini nga modelo.

Hisgoti o Pamalandongi

• Unsa ang imong nakat-onan mahitungod sa pagtudlo sa kamatuoran nga dunay empatiya samtang imong gipraktis ang pag-ila sa mga pangagpas sa mga estudyante sa wala pa ug atol sa klase?

• Sa unsang paagi kini nga pagpraktis makatabang kanimo sa pagtudlo nga mas sama ni Jesukristo?

Iapil

Pagpili og usa sa mga pagpraktis sa ibabaw aron hatagan og pagtagad sulod sa mosunod nga duha ka semana. Planoha kon unsaon nimo sa pagpadayon sa pagpraktis niining mga kahanas. Pananglitan:

• Gamit ang matag kamatuoran nga imong giandam, ikaw makapili nga mogahin og lima ka minutos sa paghunong, pagpamalandong, ug pagtubag sa mga pangutana nga makatabang nimo sa pag-ila sa pangagpas sa estudyante.

• Sa dili pa magklase, pagpili og usa ka estudyante ug maghunahuna mahitungod sa usa ka komentaryo o pangutana nga tingali anaa kaniya sa matag kamatuoran. Hunahunaa sa hilom, “Unsa kaha nga mga kasinatian ug mga relasyon ang anaa niini nga estudyante nga nakapalahi sa iyang hunahuna kay sa akoa?” o “Unsa pa kaha ang angay nakong mahibaloan aron hingpit nga masabtan kon nganong nakahunahuna siya niana?” Kini makaandam kanimo sa pagbuhat niini atol sa klase samtang imong gihatagan og pagtagad ang mga komentaryo ug mga pangutana sa estudyante.

Gusto pa og Dugang?

• Chad H Webb, “Empathy” (Sibya sa tinuig nga pagbansay sa Seminaries and Institutes of Religion, Ene. 26, 2021), broadcasts.ChurchofJesusChrist.org

• Jean B. Bingham, “Teaching Truth in the Language of Love” (Sibya sa tinuig nga pagbansay sa Seminaries and Institutes of Religion, Ene. 19, 2021), broadcasts.ChurchofJesusChrist.org

Kahanas

Tinguhaa nga maklaro ug masabtan ang tinuod nga katuyoan sa mga pangutana, mga pagbati, ug mga gituohan sa mga estudyante.

Kini nga pagbansay nagpresentar sa ikaduha sa tulo ka konektado nga mga kahanas nga makatabang kanato sa pagsabot nga ang mga estudyante mahimong makakita sa mahangtorong mga kamatuoran gikan sa lahi nga pangagpas kay sa atong nakita. Kon mas masabtan nato ang atong mga estudyante, mas makahimo kita sa pagtubag ngadto kanila nga may gugma ug empatiya samtang kita motabang kanila sa pag-ugmad og hugot nga pagtuo kang Jesukristo. Kini nga mga pagbansay makatabang usab kanato nga molambo diha sa unang mga lakang sa pagtubag sa lisod nga mga pangutana sa mga estudyante. Kini nga mga pagbansay maglakip sa:

1. Pag-ila sa pangagpas sa usa ka estudyante pinaagi sa paghunong, pagpamalandong, ug pagtubag sa mga pangutana nga atong ipangutana sa atong kaugalingon atol sa pagpangandam sa leksiyon ug samtang atong tutokan ang mga komentaryo o mga pangutana sa mga estudyante diha sa klase.

2. Pagtinguha nga maklaro ug masabtan ang tinuod nga tumong sa mga pangutana, mga pagbati, ug gituohan sa estudyante.

3. Pagtabang sa mga estudyante sa pagsusi o pag-usab sa ilang pangagpas gamit ang mahangtoron nga panglantaw.

Ipasabot

Ang pagtinguha nga maklaro ug masabtan ang tinuod nga tumong sa mga pangutana, mga pagbati, ug gituohan sa estudyante naglakip sa pagpakisayod og dugang mahitungod sa kasinatian, sitwasyon, o pagbati nga nakaaghat sa pangutana. Human ang usa ka estudyante mipakigbahin og usa ka pangutana, pagbati o gituohan, mahimo nimo siya nga pasalamatan sa unsa ang gipakigbahin ug dayon pangutana kon ang estudyante bukas ba sa pagtubag og mga follow-up nga mga pangutana. Kon ang estudyante mosulti nga dili, pasaligi siya nga OK ra kana, ug tubaga ang orihinal nga pangutana o pamahayag. Kon ang estudyante moingon nga oo, i-follow up og pangutana nga makadapit sa estudyante sa pagpakigbahin pa og dugang mahitungod sa unsay nakaaghat sa pangutana o pamahayag. Ang pagbuhat niini makatabang kanimo ug sa uban sa imong klase nga mas magkasinabot ang usag usa ug motubag nga may empatiya ug gugma.

Modelo

1. Si Sister Garnier nagtudlo mahitungod sa pagkapari diha sa mga kasulatan sa dihang usa sa iyang mga estudyante nangutana, “Nganong ang mga Itom nga mga kalalakin-an wala man tugoti nga makaangkon sa pagkapari hangtod sa 1978?”

   • Sister Garnier: Salamat sa pagpangutana. Kini usa ka pangutana nga gihunahuna sa kadaghanan nato. Mahimo ba ko nga mangutana og pipila ka follow-up nga pangutana?

   • Estudyante: Ok kaayo!

   • Sister Garnier: Unsa man ang nakaaghat niini nga pangutana alang kanimo?

2. Si Brother Monet nagtudlo mahitungod sa pagkapari diha sa mga kasulatan sa dihang usa sa iyang mga estudyante nangutana, “Nganong ang mga Itom nga mga kalalakin-an wala man tugoti nga makaangkon sa pagkapari hangtod sa 1978?”

   • Brother Monet: Salamat sa pagpangutana. Kini usa ka pangutana nga gihunahuna sa kadaghanan nato. Mahimo ba ko nga mangutana og pipila ka follow-up nga pangutana?

   • Estudyante: Dili.

   • Brother Monet: Walay problema. Nalipay ko nga nangutana ka. Maghisgot ta mahitungod sa pangutana.

Uban nga mga ehemplo sa usa ka follow-up nga pangutana nga tingali imong ipangutana:

• Salamat sa imong kaandam sa pagpakigbahin niana ngari kanamo. Aduna bay kasinatian o sitwasyon nga nakaaghat niana nga [pangutana, hunahuna, gituohan]?

• Salamat sa pagpangutana. Mahimo ba ko nimo sultihan pa og daghan mahitungod kon unsa ang nakaaghat niini nga pangutana?

• Salamat sa pagpangutana. Tabangi ko nga makasabot kon unsa ang nakadala nimo ngadto niana nga pangutana o nakapahimo nimo nga gustong masayod niana?

Pagpraktis

Tinguhaa nga makasabot ug klarohon unsa ang nakaaghat sa pangutana, pagbati, o gituohan diha sa mosunod nga mga sitwasyon:

1. Atol sa leksiyon mahitungod sa kaminyoon tali sa usa ka lalaki ug usa ka babaye nga giorden sa Dios, usa ka estudyante nangutana, “Nganong dili man nato gusto kadtong kinsa nalakip sa komunidad sa LGBTQ? Nganong dili man sila mahimong magminyo kon sila nagkahigugmaay sa usag usa?”

2. Atol sa panaghisgotan sa misyonaryo nga buhat, usa ka estudyante mopakigbahin, “Sa akong hunahuna ang batan-ong lalaki walay kapilian kon sila moadto ba og misyon apan ang batan-ong babaye aduna.”

Hisgoti o Pamalandongi

• Sa imong hunahuna ngano kaha nga kita kinahanglan mogahin og panahon aron klarong masabtan unsa ang gipakigbahin? Sa imong hunahuna sa unsang paagi kaha ang atong mga paningkamot sa klarong pagsabot sa tinuod nga tumong sa estudyante makaapekto sa kasinatian diha sa usa ka lawak klasehanan? Sa unsang paagi ang atong pagsabot sa tinuod nga tumong sa estudyante makatabang kanato nga makakonektar kanila ngadto ni Kristo?

Iapil

• Diha sa lawak klasehanan, paminaw og maayo ngadto sa unsay gipakigbahin ug maampingon nga mokonsiderar kon asa dapit ang ganahan nimong klarohon. Human pasalamatan ang estudyante nga nangutana, pangutana og usa ka follow-up nga pangutana nga makatugot sa estudyante nga makahatag og katin-awan.

Gusto pa og Dugang?

• “Asking Follow-Up Questions” (bidyo), ChurchofJesusChrist.org

• Randall L. Ridd, “Living with Real Intent,” Ensign, Okt. 2015, 12–15