19:0

Pagtudlo sa Kamatuoran pinaagi sa Lenggwahe sa Gugma

2021 nga Tinuig nga Sibya sa Pagbansay sa S&I

Presidente Jean B. Bingham

Kinatibuk-ang Presidente sa Relief Society

Martes, Enero 19, 2021

Igsoong mga babaye ug mga lalaki, nindot kaayo kini nga kahigayonan sa pagpaminaw ug pagkat-on! Wala ko kahibalo kon pila ninyo ang miapil sa miting, apan tugoti ko nga mopadangat sa akong dako nga pasalamat sa matag usa kaninyo nga hapit 56,000 nga gitawag nga mga magtutudlo sa seminary ug institute ug kamo nga sobra sa 2,200 nga empleyado nga mga magtutudlo sa CES aron motudlo niining mahinungdanon kaayo nga grupo—ang bag-o nga kaliwatan! Salamat sa inyong mapahinungoron nga serbisyo ug bayanihong mga paningkamot, daghan sa atong bililhon nga kabatan-onan ug mga young adult ang mipili nga magmatinuoron ug magpabilin sa dalan sa pakigsaad. Ang espirituhanong mga panudlo ug mga kasinatian nga inyong gihatag mahinungdanon kaayo sa pagpalig-on sa ilang mga pagpamatuod. Ug mohatag ko og espesyal nga pag-ila ug pagpakpak kaninyo nga wala mailhi nga mga bayani: ang mga kapikas niini nga mga magtutudlo. Kon wala ang inyong makanunayon nga emosyonal, espiritwal, ug suporta sa panimalay, kini nga paningkamot dili magmalamposon. Busa dako kaayo nga salamat sa matag usa kaninyo, gikan sa kinahiladman, sa tunga-tunga, ug sa ibabaw sa akong kasingkasing!

Sa pagsugod sa bag-o nga tuig—nga gilaoman natong tanan nga magdala og bag-o nga panglantaw o tingali bisan gamayng kahupayan gikan sa miaging tuig—nindot nga maghunahuna og bag-ong pamaagi sa unsay atong gibuhat. Tinuod, gusto kita nga mahimong propesyonal sa atong buluhaton, apan labaw sa tanan nangandoy kita nga makahimo og positibo nga kausaban sa mga kinabuhi sa atong mga tinun-an.

Samtang magtrabaho kamo kauban sa bag-o nga kaliwatan, ganahan mo nga motabang sa inyong mga tinun-an nga makasabot sa ilang balaanon nga kagikan, ang ilang katuyoan sa mortalidad, ug si kinsa sila nga mamahimo. Ang inyong labing dako nga tinguha mao ang pagtabang nila nga molambo ngadto sa ilang balaanon nga potensyal. Ang opisyal nga gipahayag nga katuyoan sa mga Seminary ug mga Institute naglakip sa pagtabang sa mga tinun-an nga makakat-on kabahin sa ug pagsalig diha sa mga pagtulun-an ug Pag-ula ni Jesukristo ug pag-andam kanila alang sa mga ordinansa sa pagkapari sa templo ug sa kinabuhing walay kataposan. Samtang kamo nagbuhat aron matuman kadto nga mga katuyoan, kamo nag-andam kanila sa mga kahanas ug gamit nga gikinahanglan nila batok sa “nagdilaab nga mga pana sa kaaway”¹ ingon man usab naglig-on nila nga mahimong matinuoron nga mga Santos sa Ulahing mga Adlaw kinsa mahinamon nga naghulat sa pag-abot sa Manluluwas. Inyo silang gitabangan nga maandam alang sa ilang umaabot nga mga tahas sa pamilya, sa Simbahan, ug sa komunidad isip matarong nga mga lider ug mga ehemplo sa pagkamaayo.

Samtang naghunahuna ko kabahin sa unsa nga mga hisgotanan ang tingali makatabang kaayo karon, naghunahuna ko kabahin sa dako kaayo nga panalangin nga ang kurikulum sa seminary nahisubay sa Dali, Sunod Kanako ug ang kalig-on nga mahitabo alang sa kabatan-onan ug sa ilang mga pamilya. Naghunahuna ko kabahin sa mga young adult kinsa nagpuyo layo sa panimalay ug sa unsang paagi nga ang “nakasentro sa panimalay” nga pamaagi sa pagtuon sa ebanghelyo diha sa institute magamit ngadto kanila. Ug naghunahuna ko kabahin sa mga paagi aron mahimo ang panudlo nga mahiangay ngadto sa kabatan-onan ug mga young adult. Human sa pagkonsiderar, nakaamgo ko nga pinaagi sa pagpangita sa inyong kaugalingong pagpadayag ug pagpakigtambag sa uban nga mga magtutudlo ug mga tigdumala, makakita kamo og mga tubag aron mahimo kadtong mga “unsaon sa.”

Hinoon, gusto ko nga mopokus sa duha ka baruganan. Ang mga baruganan nga gusto nakong hisgotan anaa sa kategorya nga “Unsa ang akong gipangandoy nga akong nahibaloan sa dihang ako usa ka magtutudlo sa seminary.” Ang pagserbisyo isip sayo-sa-buntag nga magtutudlo sa seminary sulod sa unom ka tuig usa ka maanindot kaayo nga kahigayonan ug panalangin. Ang ward diin ako nagtudlo naglakip sa usa ka dako nga grupo sa mga tinun-an kinsa nag-eskwela sa 10 ka nagkalain-lain nga hayskul. Nagkatibulaag sila sa lokasyon apan nagkahiusa sa panagdait. Unta makaingon ko nga usa ako ka banggiitan nga magtutudlo, apan ako pwedeng makaingon nga nakat-on ko og pipila ka butang niadto nga mga katuigan, ug gusto ko nga mopakigbahin og duha lang niini uban kaninyo.

Ang una nga baruganan nga akong nakat-onan mao ang paghatag sa mga tinun-an og espirituhanon nga “karne.” Ang kabatan-onan ug mga young adult niini nga ulahing mga adlaw nagkinahanglan sa espirituhanong “karne” sa ebanghelyo aron matubag ang lisod nga mga pangutana nga motunga ug aron tabangan sila nga mabuntog ang mga kalibog nga tingali mobira nila gikan sa dalan sa pakigsaad. Sila makahimo niini. Sila nagkinahanglan niini! Kinahanglan gahinan nato og panahon sa pag-ampo ug pagpangandam—dili lamang sa mga materyal alang sa leksyon apan usab mogahin og panahon sa pag-ila-ila sa mga tinun-an aron makasabot kita unsa ang ilang gikinahanglan ug dayon makahibalo unsa ang gamiton gikan sa atong giandam. Mahimo natong tubagon ang panawagan: “gigutom ako, ug inyo akong gipakaon.”² Tugoti ko nga mopakigbahin og pipila ka ehemplo.

Sa dihang mitambong ko og seminary isip usa ka batan-on sa Sidlakang Kabaybayonan sa Estados Unidos, ang mga miyembro sa ward nagkatag sa usa ka dako kaayo nga heyograpikal nga dapit. Aduna lamang duha ka lain nga mga estudyante sa akong dako nga hayskul kinsa mga miyembro sa Simbahan gawas sa akong igsoong mga babaye. Ang negatibo nga mga impluwensya sa katilingban makita kaayo. Panahon kadto sa mga kasamok ug puno sa pagsupak nga mga kalihokan, naglakip sa kaguliyang sa siyudad nga migrabe tungod sa kasungian ngadto sa mga may awtoridad, mikaylap nga mga kagubot tungod sa kaliwatan, mga gubat sa pikas nga bahin sa kalibotan, ug mga protesta batok sa gubat diha sa akong nasod. Ang istilo sa kinabuhi nga “walay pagsupak sa sekswal nga relasyon” ug gawasnon nga paggamit sa marijuana ug makadaot sa utok nga mga drugas nagmugna og palibot nga nagsaulog sa pagka indibidwal ug nag-awhag sa pagbiya sa moral nga mga lagda. Ang mga pagpatay tungod sa politika ug dagko nga mga panaglahi sa opinyon kon unsaon sa pagpadagan ang gobyerno mibulag sa katawhan ngadto sa bangis nga nagkompetensyahanay nga mga kampo sa managsama og mga hunahuna. Ang gubot nga dekada sa kataposan nahuman sa usa ka positibo nga butang sa dihang ang unang tawo milandig sa bulan.³ Aduna bay bisan usa niini nga sama sa katilingbanong palibot nga giatubang sa atong kabatan-onan ug mga young adult karon?

Alang kanako, ang hayskul nagsugod nga panahon sa pagdiskobre ug paghimo og mga pagpili sa mas lapad nga kalibotan kay sa akong panimalay ug pamilya. Nabantang ko sa daghan nga mga pilosopiya sa kalibotan, ug nagsugod ko sa pagduda sa kamatuoran sa tanan nga gitudlo kanako sa akong matinuoron nga mga ginikanan ug mga lider sa Simbahan atol sa akong pagkabata. Ang akong una nga magtutudlo sa seminary kay si Sister Thomander, ubanon, seryoso nga babaye nga adunay lapad nga kasinatian sa Simbahan ug lawom nga pagpamatuod sa ebanghelyo. Iya kaming gihagit sa pagbasa sa tibuok Basahon ni Mormon nianang tuiga ug sa pagtambong kada adlaw nga andam sa paghisgot sa unsay among nabasa.

Ang manggihunahunaon, dasig nga pagtudlo ni Sister Thomander sa doktrina dako kaayo og epekto sa akong pagpamatuod. Nakahibalo ko sa walay pagduha-duha nga siya nakahibalo nga ang Simbahan tinuod, tungod kay moabot siya nga andam kaayo sa pagpasabot sa klaro nga mga paagi sa mga bersikulo nga among gibasa, ug siya nagpamatuod niadto nga mga kamatuoran. Dayag kaayo nga siya migahin og panahon sa pag-andam aron sa pagpaambit sa unsay iyang gibati nga labing makaepekto. Wala ko makahinumdom og bisan unsa nga mga dula o mga party o mga premyo, apan ako gayod nakahinumdom nga nahagit ug nabayaw ug gipakaon sa espirituhanong paagi sa matag adlaw. Ang matag leksyon dili ingon nga makapainteres kaayo, apan ang matag adlaw makapadasig ug makapasiguro samtang siya mitubag uban sa pailob ug pag-awhag sa sinsero nga mga pangutana sa mga tinun-an. Ang iyang direkta nga pagdapit ug taas nga mga gilaoman nakahimo og kalainan sa akong kinabuhi nga dili gayod masukod. Si Sister Thomander mao ang usa ka tawo nga gusto nakong makita ug pasalamatan kon moadto na ko sa pikas nga bahin sa tabil!

Akong itandi kana nga tuig sa usa nako ka tuig sa dihang naa na ko sa klase alang sa mas magulang nga mga batan-on. Ang magtutudlo sa seminary makalingaw ug mahigalaon, apan, katingalahan, gamay ra ang akong gibati nga aktwal nga koneksyon. Ang mga semana milabay samtang siya nagtudlo sa materyal sa kaswal kaayo nga pamaagi. Dayag kaayo nga wala siya seryosoha sa mga tinun-an; ang mas magulang nga mga babaye nagbutang og nail polish sa ilang mga kuko samtang nanglingkod sila sa luyo samtang ang mga lalaki nagkinomedyahay sa usag usa, ug ang uban namo nagpinasahay og gagmayng mga sulat aron maglingaw-lingaw sa among kaugalingon. Bisan og sa tinuoray nakahibalo mi nga siya adunay pagpamatuod sa ebanghelyo, tungod kay returned missionary man siya, wala mi makakat-on sa pagpangutana og doktrinal nga mga pangutana, tungod kay ang iyang mga tubag kasagaran taphaw o walay klaro, ug dili mi segurado kon siya makatubag o motubag ba niini. Ang seminary nakatuman sa mahinungdanong sosyal nga katuyoan apan dili kini usa ka espirituhanong kasinatian.

Kamo pamilyar sa pangutana ni Pablo diha sa 1 Mga Taga-Corinto: “Ug kon ang pagpatingog sa trumpeta dili klaro, kinsa may mangandam alang sa gubat?”⁴ Isip mga magtutudlo sa ebanghelyo sa bag-o nga kaliwatan, kinahanglan kita “motingog sama sa klaro nga trumpeta.” Sa panahon sa Daang Tugon, ang trumpeta usa ka shofar, sungay sa toro, diin adunay yano, mailhan gayod nga tingog. Gigamit kini aron sa pagtawag sa katawhan sa Ginoo nga magtapok alang sa pagsimba, sa pagpasidaan sa umaabot nga peligro, ug sa paghatag og mga panudlo panahon sa gubat. Sa mga gubat sa karaang panahon, ang kasaba ug panawagan sa gubat nagmugna og kaguliyang. Kon ang lider dili makahatag og klaro nga komunikasyon sa mga tropa, ang kasundalohan mag-atubang og seguradong kapildehan. Busa, ang “klaro nga trumpeta” namugna. Ang matag sundalo gibansay sa pag-ila sa tingog, mao nga bisan sa mga higayon sa kalibog ang matag usa makahibalo kon moabante ba o moatras, kon moatake sa wala nga habig o sa tuo.⁵

Si Sister Thomander mao kana nga trumpeta alang kanako. Kinahanglan kita ingon niana nga trumpeta, kanang kasaligan nga tingog sa kasegurohan sa mahangturong kamatuoran taliwala sa paspas, nag-usab-usab nga mga mithi sa kalibotan. Kinahanglan natong sultihan ang atong mga tinun-an sa kamatuoran ug tabangan sila nga makasabot sa kon ngano man sama sa unsa man. Mahimo nato kana “sa kalumo ug sa kaaghup,”⁶ apan kinahanglan nato kining buhaton. Sama sa gipamulong sa usa ka magtutudlo sa seminary, “Dili nato ipadahunog ang trumpeta sa dunggan sa usa ka tawo, apan dili usab kita hilom nga mopatingog sa mensahe niini; kon dili, ang tawag kinahanglan nga malumo ug sigurado ug klaro ang tingog.”⁷ Sa pagtudlo sa akong kaugalingon nga mga klase sa seminary, akong nakat-onan nga, oo, ang kabatan-onan malipay sa makalingaw nga mga kalihokan sa pagkat-on ug nagkinahanglan og sosyal nga interaksyon uban sa ilang mga ka-edad apan nangandoy usab og tinuod nga mga tubag sa mga pangutana kabahin sa ebanghelyo ug praktikal nga mga ideya kon unsaon sa pagsunod sa mga baruganan sa ebanghelyo diha sa ilang kaugalingon nga mga kinabuhi.

Ang ikaduhang baruganan nga akong nakita nga mahinungdanon mao ang pagkonektar uban sa tinud-anay nga pagpakabana. Unsaon nato sa pagkonektar sa atong mga tinun-an sa mga paagi nga nahiangay ug makahuloganon? Ang lenggwahe sigurado nga makahimo og kalainan. Pananglitan, kon mosulay ko og istorya og Q’eqchi’ ngadto sa mga tinun-an nga Tagalog ra ang masabtan, dili ko magmalampuson sa pagpadangat sa mensahe. Salamat na lang, adunay duha ka internasyonal nga mga lenggwahe nga masabtan sa tanang kabatan-onan ug mga young adult: ang lenggwahe sa Espiritu ug ang lenggwahe sa gugma.

Ang unang lenggwahe, kana nga sa Espiritu, mailhan sa tanan nga nangita sa kamatuoran. Sama sa gitudlo ni Elder Joseph B. Wirthlin: “Walay mga babag sa lenggwahe diha sa Simbahan. Adunay kusgan nga gahom nga molapas pa sa gahom sa mga mensahe nga ipadangat pinaagi sa mga pulong lamang, ug kini mao ang gahom sa mga mensahe nga isulti sa Espiritu ngadto sa atong mga kasingkasing … , dili igsapayan ang pinulongan o dayalekto. Kini usa ka malukpanon nga mensahero ngadto sa matag kasingkasing nga maminaw.”⁸

Ang Espiritu makig-istorya sa kasingkasing ngadto sa kasingkasing. Sama sa gipahinumdom ni Pablo sa mga Santos sa Roma, “Makighiusa ang maong Espiritu sa atong espiritu aron pagmatuod nga kita mga anak sa Dios.”⁹ Samtang mangita kita, maminaw sa, ug mosunod sa mga pag-aghat sa Espiritu Santo, makadawat kita og inspirasyon sa mga paagi nga makaistorya ngadto sa atong mga tinun-an pinaagi sa Espiritu sa pamaagi nga ilang masabtan. Ang pag-andam og maayo, gamit ang mga materyal sa leksyon nga gidesinyo sa dinasig nga mga manunulat og kurikulum, motabang nato nga magpabiling lig-on nga nakabase sa sukaranang doktrina, nga atong nahibaloan nga adunay labing dako nga gahom sa pag-usab sa mga kasingkasing ug mga kinabuhi. Ang labing importante mao ang pagpangita og personal nga pagpadayag sa unsa man ang ipaambit ug unsaon sa pagpaambit sa unsay imong giandam. Ang lenggwahe sa Espiritu makig-istorya nga labaw pa sa unsay imong ikasulti.

Ang lain nga lenggwahe nga motabang nimo nga makakonektar ngadto sa mga tinun-an mao ang lenggwahe sa gugma. Ang gugma, tungod kay kini usab adunay balaanong kagikan, makigsulti usab sa kasingkasing ngadto sa kasingkasing. Si Juan nga Apostol, usa ka saksi sa Manluluwas, mipaambit niini nga yano nga kamatuoran: “Nahigugma kita, kay ang Dios man ang unang naghigugma kanato.”¹⁰ Sama usab kini ka tinuod sa tawo-ngadto sa-tawo nga mga relasyon. Nakadungog na mo sa panultihon nga “ ang mga tawo dili magpakabana kon unsa kadako ang imong nahibaloan hangtod nga sila makahibalo kon unsa ka dako ang imong pagpakabana.”¹¹ Isip mga magtutudlo, ang atong mahangturon nga epekto direkta nga maimpluwensiyahan sa atong sama kang Kristo nga gugma ngadto sa atong mga tinun-an.

Tingali pamilyar mo sa konsepto sa “mga lenggwahe sa gugma.”¹² Kini mao ang mga paagi sa pagpadayag sa gugma nga masabtan ug madawat sa uban, depende sa ilang personalidad ug sa impluwensiya sa ilang nangagi nga mga kasinatian. Ang lain-lain nga mga tawo tingali andam kaayo nga modawat sa usa ka klase sa lenggwahe sa gugma kay sa uban, apan ang tanan nga tinun-an makaila sa inyong tinud-anay nga pagpakabana sa bisan usa sa tulo ka paagi nga akong ipaambit karon.

Usa ka klase sa lenggwahe sa gugma mao ang mga pulong sa pagdasig. Kini mga hugpong sa mga pulong nga moawhag ug mobayaw, sama sa “Mahimo nimo kana” o “Ikaw naglambo gayod” o “Ako mapasigarbohon nimo tungod sa pagtrabaho og maayo.” Kini nga mga pulong mopadangat ngadto sa mga tinun-an nga siya gihatagan og bili ug siya makahimo. Ang malumong pagdasig sa Manluluwas ni George Miller, nga narekord diha sa Doktrina ug mga Pakigsaad, usa ka nindot kaayo nga ehemplo niini nga klase sa lenggwahe sa gugma. Naghulagway kaniya isip usa ka tawo nga “dili malimbungon,” si Jesukristo mipadayon sa pagsulti bahin niya nga “siya mahimo nga kasaligan tungod sa kaligdong sa iyang kasingkasing; ug tungod sa iyang gugma sa akong pagpamatuod Ako, ang Ginoo, nahigugma kaniya.”¹³ Kadaghanan nato dili na makahinumdom sa pangalan niini nga una nga kinabig, apan nahunahuna lang nako kon sa unsang paagi nga kadto nga mga pulong sa pagdasig nakapalig-on sa pagpamatuod ni George kabahin sa gipahiuli nga ebanghelyo ingon man usab sa iyang gugma alang sa iyang Manluluwas.

Pipila sa mga gamhanan kaayo nga mga pulong mao ang “salamat” ug uban pa nga mga pagpadayag sa pagdayeg. Isip mapaniiron ug mahigugmaon nga magtutudlo sa kabatan-onan o mga young adult, inyong mabantayan ang yano nga mga butang nga himoon sa usa ka tinun-an alang kanimo o alang sa uban nga naa sa klase, o maminaw sa mga maayong butang nga inyong nadungog kabahin sa ilang gibuhat diha sa eskwelahan o diha sa komunidad, ug ipadayag ang inyong pagdayeg. Ang pagpadala og mubo nga sulat ngadto sa ginikanan sa tinun-an kabahin sa usa ka positibong butang nga inyong nabantayan kabahin sa ilang batan-on makadugang usab sa pagbati sa tinun-an nga siya adunay nahimo ug may bili sa kaugalingon. Tanan niini nga klase sa makapadasig nga mga komento makamugna ug makapalig-on og mga relasyon, makadugang sa pagbati og tinud-anay nga pagpakabana tali sa magtutudlo ug tinun-an, nga mopalambo sa impluwensiya sa Espiritu sa ilang mga kinabuhi.

Lain nga lenggwahe sa gugma mao ang mga buhat sa pagserbisyo. Ang pagpangandam sa espirituhanong makapabayaw ug makapahigmata nga materyal sa matag adlaw usa ka dako kaayo nga buhat sa pagserbisyo ug gugma! Ang imong mga gasa sa panahon ug paningkamot tingali dili mahatagan og pagtagad sa kabatan-onan matag adlaw, apan paglabay sa panahon ang ilang pagka sensitibo sa espirituhanong paagi molambo ug sila “motawag [nimo] nga bulahan,”¹⁴ sama sa akong gibati sa akong Sister Thomander.

Tugoti ko nga mopaambit kon sa unsang paagi nga ang duha ka magtutudlo nagpakita sa ilang gugma pinaagi sa mga buhat sa pagserbisyo. Usa ka magtutudlo sa seminary sa Zimbabwe gitawag sa wala pa moigo ang tibuok kalibotan nga pandemya. Ang mga tinun-an mahinamon nga magtigom sa dili pa magsugod ang klase matag adlaw ug naanad na niini nga eskedyul sa dihang wala na sila tugoti nga personal nga magpundok. Ang magtutudlo nag-atubang og problema: kadaghanan sa mga tinun-an walay internet sa panimalay, mao nga dili posible ang online nga klase. Busa, aron sa pagsiguro nga ang iyang mga tinun-an makadawat og inadlaw-adlaw nga espirituhanong pagkaon, nagsugod siya sa pagmugna og mga leksyon gamit ang mga kasulatan, makapaikag sa hunahuna nga mga pangutana, mga meme, ug mga video nga iyang ipadala nila matag adlaw pinaagi sa WhatsApp, usa ka social platform nga daling magamit sa iyang mga tinun-an. Ang iyang mga tinun-an “naamumahan pinaagi sa maayo nga pulong sa Dios”¹⁵ bisan niining panahon sa sosyal nga pagdistansya.¹⁶ Sila miila ug mipasalamat niini nga mga buhat sa pagserbisyo isip usa ka pagpadayag sa iyang gugma. Sila mitubag uban sa espirituhanong mga pagbati sa ilang kaugalingon ug mahinamong nag-atang sa ilang inadlaw-adlaw nga bahin sa espirituhanong giya ug pagbayaw nga nakabase sa kasulatan.

Usa ka magtutudlo sa Norway ang adunay lahi nga hagit. Ang iyang mga klase online lamang tungod kay ang iyang mga tinun-an nagkatag sa tibuok nasod. Apan bisan asa pa siya mobiyahe sa kalibotan o bisan unsa pang orasa sa iyang lokasyon, siya andam sa pagtudlo niadtong sayo-sa-buntag nga mga tinun-an uban sa gugma ug tinud-anay nga interes. Bisan pa sa mga distansya sa heyograpiya tali niya ug nila—ug panagsa ra nga makakita nila sa personal—siya adunay nahibaloan nga butang kabahin sa mga personalidad ug mga tinguha sa matag usa. Makit-an man niya ang ilang mga nawong sa camera o dili, siya moabi-abi nila ug mangayo sa unsay ilang nahibaloan. Siya naghatag og komportable nga lugar sa seguridad diin ang mga tinun-an makapangutana nga dili mahadlok nga mobati nga dili kamao. Siya mihatag nila og daghang nagkalain-lain nga importanting mga espirituhanong kamatuoran, kompleto sa kanunay nga mga oportunidad sa pagpaminaw sa iyang pagpamatuod sa mga baruganan sa ebanghelyo, ug siya nagdapit kanila sa pagpaambit sa ilang kaugalingon nga espirituhanong mga nakat-onan.¹⁷ Sama ninyo, kini nga mga magtutudlo nagsulti sa lenggwahe sa gugma pinaagi sa ilang mga buhat sa mahalaron nga pagserbisyo.

Ang kataposan nga lenggwahe sa gugma nga akong hisgotan mao ang kabahin sa paghatag og de-kalidad nga panahon. Ang paghimo sa oras sa klase nga bililhon kutob sa imong mahimo—nakatutok sa espirituhanong mga kasinatian—usa ka gasa nga nagpadayon sa paghatag. Imbes nga mogahin og oras sa mga dula nga para lang sa pag-abi-abi o paggamit og taas nga panahon sa pagpangandam sa paghimo og nindot kaayo nga handout nga tingali mabiyaan ra sa salog kon mobiya na ang mga tinun-an, ang imong nakatutok nga atensyon sa pagpaapil sa mga tinun-an sa pagkat-on kon unsaon sa pag-ila sa Espiritu ug pagsunod sa ebanghelyo diha sa ilang mga kinabuhi ang mohatag sa labing dako nga ganti. Samtang inyong tubagon ang mga pangutana sa makahuloganon, gihunahuna gayod nga mga tubag, ang inyong mga paningkamot mopadangat sa gugma sa eksakto nga paagi. Ang paghatag og bili sa mga kontribusyon sa tinun-an—matinahoron nga pagpaminaw sa ilang mga komento ug mga pangutana ug pagtubag sa uban sa lig-on nga komento—makatabang sa mga tinun-an nga mahibalo nga nagpakabana ka sa ilang mga problema ug mga panginahanglan kay sa nakatutok lang sa pagpresentar sa materyal nga kinahanglan nimong humanon nianang adlawa. Ang pagkaandam nga mohatag sa tubag nianang layo ra sa hisgotanan nga pangutana o ang pagbalik nianang yano nga tubag sa lahi nga paagi hangtod nga ang konsepto masabtan gayod nagpadangat sa inyong sinsero nga tinguha alang sa ilang espirituhanon ug personal nga paglambo—sa laing pagkasulti, kini nagpadangat sa inyong Kristohanon nga gugma.

Agi og dugang, isip magtutudlo sa seminary, usa sa labing dako nga mga panalangin alang nako mao ang kahigayonan nga mas makatuon ug makat-on kabahin sa ebanghelyo gikan sa maayo kaayo nga mga materyal nga gihatag sa Church Educational System. Hinoon, ang punto niana nga pagtuon mao nga maandam og maayo aron sa paghatag sa mga tinun-an kon unsa gayod ang ilang gikinahanglan, dili ang malipayong pagpasabot sa personal nako nga mga nadiskobrehan. Kamo napanalanginan ug padayon nga panalanginan sa inyong kahigayonan nga makat-on ug magtudlo sa ebanghelyo diha sa seminary ug institute, apan ang inyong mga tinun-an ang mas mapanalanginan pinaagi sa inyong pagtutok sa ilang pagkat-on kay sa imong kaugalingon.

Gikan sa usa ka magtutudlo sa sayo-sa-buntag nga seminary ngadto kaninyong tanan, nakasabot ko sa kalisod sa pagbalanse sa mga panginahanglan sa pamilya, sa panarbaho, o sa mga obligasyon sa komunidad. Nakasabot ko sa hagit sa pagpangita og igo nga oras sa pagpangandam—ug pagpangita og igo nga oras sa pagkatulog—uban niining tanan nga nagkalain-laing responsibilidad! Nagpamatuod ko nga ang Ginoo motabang ninyo samtang kamo mangayo, mangita, ug manuktok. Samtang kamo mag-ampo, magtuon, ug mobuhat diha sa mga pag-aghat nga inyong madawat, mahatag ninyo sa inyong bililhon nga mga tinun-an ang karne sa ebanghelyo—ang espirituhanong paglahutay nga ilang gikinahanglan aron mahimong mga lider, mga amahan, ug mga inahan nga gusto nila ug kinahanglan nga mamahimo niining ulahi nga mga adlaw. Kamo mahimong makapadangat sa kamatuoran pinaagi sa lenggwahe sa Espiritu ug sa lenggwahe sa gugma. Kamo mahimong makakonektar uban sa tinuoray nga pagpakabana, magpakita sa gugma sa Langitnong Amahan ug ni Jesukristo kanila pinaagi sa inyong makapadasig nga mga pulong, mga buhat sa pagserbisyo, ug sa de-kalidad nga oras nga inyong igahin sa pagpaminaw ug pagtubag sa ilang masiksikon nga mga pangutana.

Unta kamo magpadayon sa pagtudlo sa kamatuoran ug mohatag og gugma sa mga paagi nga makapalig-on sa mga pagpamatuod sa ebanghelyo ni Jesukristo ngadto sa bag-o nga kaliwatan. Unta kamo mangita sa pag-andam nila nga matuman ang ilang balaanong potensyal samtang sila mopundok sa Israel niining ulahi nga adlaw mao ang akong hugot nga pag-ampo ug pagdapit sa ngalan ni Jesukristo, amen.