37:2

Panel nga Diskusyon

2021 nga Tinuig nga Sibya sa Pagbansay sa S&I

Martes, Enero 19, 2021

Brother Chad H Webb: Salamat sa inyong pag-apil. Kini si Brother Rory Bigelow. Siya ang atong associate administrator sa operations, mga butang sa Church Office Building sama sa human resources ug panalapi ug pisikal nga mga pasilidad. Kini si Adam Smith, atong associate administrator sa instruksyon, nga nakigtambayayong sa atong mga division sama sa Training and Curriculum ug Student Services ug uban pa.

Sa pagsugod, mohatag lang ko og konteksto ug panglantaw kon asa kita gustong moadto. Karon sa Seminaries and Institutes (S&I) maayo ang atong nahimo sa pagtubag sa mga panginahanglan sa daghan sa atong mga estudyante karon. Apan sa tinuod lang kadtong manambong kasagaran mao kadtong aktibong nag-apil ug mapahinungurong mga miyembro sa Simbahan. Ang uban wala kaayo maapektohi, ug sa tinuod lang, nagkakunhod ang enrollment sa mga programa sa S&I sa tibuok kalibutan.

Dako natong panghinaot nga mausab kana. Naglaom kita nga ang S&I makahimo og mas dakong tahas sa dinaliang panginahanglan sa “pagpundok” sa tibuok henerasyon sa kabatan-onan ug mga young adult. Makahinumdom mo nga si Presidente Nelson mitudlo nga ang pagpundok sa Israel mao ang labing importante nga buhat sa kalibotan. Siyempre, naglakip kini sa misyonaryong buhat ug buhat sa templo, apan miingon si Presidente Nelson nga naglakip usab kini sa pag-ugmad og pagtuo ug pagpamatuod sa kasingkasing sa atong giserbisyohan. Miingon siya nga bisan kanus-a nga duna kitay buhaton sa pagtabang ni bisan kinsa sa paghimo ug pagtuman sa ilang mga pakigsaad sa Dios, nagpundok kita sa Israel.

Nabalaka kita nga nawad-an kita sa uban natong kabatan-onan ug mga young adult. Imbis nga naghisgot kalabot sa pagkawala ug pagkakaplag, ang mga kasulatan kasagaran naghisgot niini isip pagkatibulaag ug pagpundok. Dunay uban nga nanglimbasog sa pagtuo. Apan nasayod kita asa sila; wala sila mawala kanato. Apan natibulaag sila sa mga impluwensya sa kalibotan ug mipugong sa ilang kaugalingon sa pag-apil kanato. Duna kitay talagsaong oportunidad ug dinaliang panginahanglan nga motabang sa “pagpundok” niini nga porsyon sa Israel.

Mabuhat nato kini pinaagi sa pagmugna og mga kasinatian nga mosangpot sa pagkakabig, kamapuslanon, ug pagkahisakop ug pinaagi sa paghimo niadtong mga kasinatian nga masinati sa labing daghang mahimo. Ug buhaton nato kini samtang magpabiling matinuoron sa atong kagikan. Wala kita magtinguhang mousab aron lang dunay mausab. Mopadayon kita sa pagtudlo sa ebanghelyo sumala sa makita sa mga kasulatan pinaagi sa gahom sa Espiritu Santo. Apan sa pagmugna niini nga mga kasinatian, kinahanglang mohimo kita og mga pagpahiangay.

Kinahanglan kitang molihok:

Gikan sa pagsulti ug pagsaysay ngadto sa pagpaapil ug pagdapit.
Gikan sa pagsulti sa mga estudyante kon asa moadto ngadto sa pakighimamat kanila kon asa sila.
Gikan sa pagdayeg lang sa gimithi ngadto sa pagpasidungog sa panlimbasog.
Gikan sa sosyal nga mga kalihokan ngadto sa makahuluganong sosyal nga inter-aksyon.
Gikan sa pagtutok sa kredito sa klase ug gradwasyon ngadto sa pagtutok sa espirituhanong paglambo ug pagkahimo.
Gikan sa dili aktibong tigkat-on nga kinahanglang aghaton ngadto sa aktibong partisipante kinsa mga himan sa Espiritu Santo.

Makigmiting kita sa mga program administrator, sa atong mga seminary principal, institute director, ug coordinator aron klarong mahan-ay ang mga kasinatian ug ekspektasyon sa pagtudlo ug pagkat-on, sa paghatag og pagbansay ug pagtudlo, ug sa paghatag og mga sukdanan sa pagtabang natong masayod kon nagmalampuson ba kita.

Ang pagbansay ug mga kapanguhaan nga inyong madawat ug mga kausaban nga himoon tanan buhaton sa tumong nga mapundok ang Israel—pinaagi sa pagmugna og mga kasinatian nga motubag sa mga panginahanglan sa tanang kabatan-onan ug mga young adult ug paghimo niini nga daling magamit. Tutokan nato kini nga tumong sa mosunod nga tulo ka tuig. Nianang puntoha, atong timbang-timbangon ang atong pag-uswag ug mohimo og dugang pagpahiangay.

Ang akong pagdapit kaninyo mao nga moapil ni Presidente Nelson sa labing dakong buhat sa kalibotan—ang dinaliang panginahanglan ug oportunidad sa pagpundok sa Israel, sa pagpundok niadtong mopatigbabaw sa Dios labaw sa tanan sa ilang kinabuhi. Ang talagsaong mga butang mahitabo, gani mga milagro. Pagkadakong panalangin nga mahimong kabahin niini.

Busa sa dili pa ko mangutana bahin sa pipila sa kausaban sa Seminaries and Institutes, mangutana lang ko, unsay dili gayod mausab?

Brother Rory Bigelow: Usa ka butang nga nagtuo ko nga mao ra gihapon mao ang atong kinatibuk-ang tuyo. Anaa kita aron pagtabang sa kabatan-onan ug mga young adult nga makasabot ug mosalig sa mga pagtulun-an ug Pag-ula ni Jesukristo. Gusto natong motabang nila nga mahimong takos ug mangandam sa mga panalangin nga naghulat nila. Ug dili gayod kana mausab. Ang atong kinatibuk-ang tutokan mao sila, ug higugmaon nato sila. Importante sila. Ug gusto natong tabangan ang matag usa nga makabaton sa saktong kasinatian diha sa Seminaries and Institutes.

Brother Adam Smith: Modugang ko nga kanunay natong tutokan ang panginahanglan sa estudyante, nga imong gihisgotan—nga kinahanglan kitang masayod unsay gikinahanglan sa atong mga tigkat-on sa kasinatian sa klasehanan, nga ang mga kasulatan maoy sentro sa atong buhaton sa pagtabang nga matubag kana nga panginahanglan, ug nga ang Manluluwas maoy sentro nianang tibuok kasinatian.

Duha pud ka butang nga dili gayod mausab mao nga kanunay kitang magmaunungon sa propetikanhong mga prayoridad ug sa direksyon nga atong nadawat gikan sa mga propeta ug mga apostoles. Ug maningkamot kita kanunay nga makabaton sa Espiritu Santo sa atong kinabuhi, kon mangandam kita, ug ilabi na kon anaa kita sa klasehanan uban sa mga estudyante.

Brother Webb: Salamat sa pagsulti niana. Mahinungdanon gayod kana. Kadtong mga butang nga labing importante dili gayod mausab. Ang kinauyokan kon kinsa kita dili gayod mausab.

Maghisgot kon unsay nausab, kini nga sibya lahi. Mao nga gikan sa Gabii uban sa usa ka General Authority niining panahon sa tuig ngadto niining sibya sa tibuok kalibotan nga pagbansay. Naay makasulti ninyo nganong gihimo kana nga kausaban?

Brother Bigelow: Adunay daghang rason, apan duha ka dagkong rason ang importanteng masayran. Ug ang una mao nga kita, sa dugayng panahon—1912, sa dihang gisugdan nato ang Granite Seminary—gitutok nato ang daghan sa atong pagbansay sumala sa akademikanhong iskedyul sa U.S. Niadtong 1991 nausab ang sitwasyon alang kanato. Niadtong 1991 mas daghan ang atong mga estudyante sa institute sa gawas sa Estados Unidos kay sa sulod sa Estados Unidos.

Busa sa atong padayon nga pag-uswag sa internasyonal nga paagi, walay rason nga mopadayon kita sa paghimo og iskedyul nga nakabase sa akademikanhong iskedyul sa Estados Unidos. Kana ang usa sa mga rason—usa ka tinguha nga mobalhin gikan niana ngadto sa iskedyul nga mas tinuig nga iskedyul kay sa akademikanhong iskedyul alang sa amihanang bahin sa kalibotan.

Ang lain pa—modugang lang ko—ang laing butang mao ang kausaban sa atong pilosopiya ug giunsa nato pagpahigayon ang pagbansay. Sa dugayng panahon mora kita og naglumba nga ipasa-pasa ang baton. Ang central office moandam og pagbansay ug mga prayoridad, ug dayon sa area director convention atong ipasa kana nga baton ngadto sa mga area director. Dayon sila moadto ug mopasa niana sa ilang mga area diha sa pagbansay sa area.

Ug mas nagtan-aw kita karon niana agi sa lente sa area director convention o ang pagbansay mas mahitungod sa pagtinambagay ug dungan nga pagmugna og direksyon. Ug karon, pinaagi sa pagbalhin sa atong area director convention gikan sa Abril ngadto sa Oktubre, ato silang mahimamat sa Oktubre ug dayon maandam sa—sama karon, sa Enero—usa ka sibya sa pagbansay alang sa tibuok kalibotan.

Brother Webb: Kahibalo mo, naghisgot kana sa laing kausaban. Katunga na lang ang gidaghanon sa atong mga area director karon kay sa una. Busa mas kadaghan sila nga mapaapil sa atong mga konseho kay sa kaniadto. Diin mas maayong marepresentar ang mga panginahanglan sa matag area sa tibuok kalibotan niadto nga mga konseho ug mas dali ang komunikasyon, diha sa diwa sa usa ka konseho. Mao nga para nako mahinungdanon na.

Sige, laing kausaban nga gipangutana sa daghang tawo—ug nakadayeg mi sa kaandam sa tanan nga mopahiangay niini nga kausaban samtang mopadayon kita sa bag-ong iskedyul nga nagsunod sa tinuig nga iskedyul sa Dali, Sunod Kanako imbis sa akademikanhong iskedyul sa atong kurikulum. Adam, gusto nimong hisgotan kana nga kausaban?

Brother Smith: Oo, ganahan ko. Mga Marso sa 2019 sa dihang nakahukom mi sa paghimo nianang unang lakang nga matakdo ang kurikulum sa Seminaries and Institutes ngadto sa Dali, Sunod Kanako nga basahon sa kasulatan. Duna koy kinutlo gikan ni Elder Clark nga gusto nakong basahon ang matag pulong kay mahinungdanon kaayo.

Sa dihang gipahibalo kana sa kalibotan, miingon si Elder Clark, “Ang propeta sa Ginoo mibarog sa kinatibuk-ang komperensya ug miingon, ‘Nagkinahanglan kita og panudlo sa ebanghelyo nga nakasentro sa panimalay ug gisuportahan sa simbahan.’¹ Ug tungod kay misulti siya niana miusab kini sa tanan.”

Mao nga nakahukom kami nga sa tinglarag sa 2019—nga makahinumdom mo—misugod kita sa Bag-ong Tugon, pagka-Enero 2020 sa Basahon ni Mormon. Sa mga tinglarag sa 2019 duna kitay mga programa sa released-time seminary nga miduol kanamo ug mihangyo nga aduna silay sulayan. Gusto nilang mosulay sa pagtudlo sa kurikulum sa seminary nga mas natakdo sa iskedyul sa Dali, Sunod Kanako alang sa pagbasa. Ug naghunahuna mi nga duna siguroy makat-onan nga makapaikag, mao nga gidapit namo sila sa pagbuhat niana.

Dayon mikuha mi og mga tigsiksik nga makig-istorya sa mga estudyante ug mga ginikanan ug mga magtutudlo sa seminary ug mga administrator ug motandi sa ilang mga resulta ug sa ilang kasinatian niadto nga mga programa nga nagsunod sa mas naandan nga siyam ka bulan nga kurikulum—nagsunod sa basahon sa kasulatan apan nagtudlo gihapon sa kurikulum sa Seminary sa atong siyam ka bulan nga iskedyul.

Ang among nakat-onan niana nga pagsiksik— para nako makadasig kaayo. Medyo makasurprisa usab. Among nakat-onan nga ang mga estudyante dili hasolan sa bisan unsang pagbalik-balik. Nasayran usab namo nga ang pagsabot sa estudyante sa basahon sa kasulatan managsama ra niining duha.

Ang kabalaka mao nga pinaagi sa pagsunod sa Dali, Sunod Kanako nga iskedyul, dunay mga butang nga malaktawan sa mga estudyante sa klasehanan sa Seminary tungod sa summer break o spring break o fall break. Apan ang pagsabot sa mga estudyante sa basahon sa kasulatan namatud-an nga mao ra gihapon.

Apan ang nakalahi maoy nakakuha sa among pagtagad. Adunay dako—ug dako gayod sa pagsumada—dakong pagsaka sa gidaghanon sa mga estudyante nga miabot sa klase nga andam nga makat-on sa leksyon nianang adlawa—dakong pagsaka sa gidaghanon sa mga estudyante nga makahuluganong mikomentaryo, makahuluganong miapil diha sa klase.

Ug ang nakapaikag kaayo nako mao ang dakong pagsaka sa gidaghanon sa mga estudyante nga mibasa sa ilang mga kasulatan sa panimalay gawas sa seminary. Sa dihang nakita namo kana nga pagsiksik ug nakita ang pagtandi nasabtan gayod namo nga sa paghimo niini nga kausaban atong mapanalanginan ang mga estudyante, ug atong mapanalanginan ang mga pamilya. Gipasabot usab niini ang usa ka butang nga kanunayng gitudlo kanato ni Elder Clark sa dihang siya ang atong commissioner.

Mitudlo siya nato sa pagtabang sa mga estudyante nga makabaton og lawom nga pagkat-on ug kasinatian sa pagkakabig samtang kauban nato sila. Pinaagi sa pagtakdo ngadto sa Dali, Sunod Kanako, makatabang kini nga mapagaan og gamay kining kabug-at sa unsay lakipon paghisgot ug unsay kinahanglan natong hisgotan. Karon, magmatinud-anon kita kanunay sa mga kasulatan; kini kanunay mao ang sentro. Ug ang Dali, Sunod Kanako nagtugot nato nga mobasa sa usa ka basahon sa kasulatan gikan sa sinugdanan hangtod sa kataposan. Apan dili nato mahisgotan tanan, mao nga makatutok kita sa mga panginahanglan sa tigkat-on, mokonektar nila ngadto sa Manluluwas, mobuhat niini diha sa mga kasulatan, ug mobuhat niini pinaagi sa Espiritu Santo.

Apan dili nato ibaliwala nga dunay isyu dinhi, nga sama sa bisan unsang iskedyul sa eskwelahan, bisan asa sa kalibotan, kanunay nga dunay kal-ang nga wala sila sa eskwelahan, kasagaran mga duha ngadto sa tulo ka bulan nga gidugayon. Duha ngadto sa tulo ka bulan kana nga sulod sa kasulatan nga dili makuha sa mga estudyante diha sa seminary. Ug isip mga magtutudlo sa kasulatan, makahatag kana nato og kabalaka.

Busa kon asa ang Doktrinal nga Kahanas kanunayng importante sukad kini gipaila, mas gipatataw kini ug mipadako sa kaimportante niini. Kon ang mga magtutudlo motutok sa pagtudlo sa leksyon sa Doktrinal nga Kahanas matag semana, bisan unsay iskedyul sa eskwelahan sa tibuok kalibotan, ang mga estudyante makakuha sa labing gikinahanglan ug labing importanteng mga elemento. Maghunahuna ko usahay, kay ang mga magtutudlo maayo kaayo ug gustong mahisgotan ang hut-ong sa kasulatan, ang Doktrinal nga Kahanas maulahi na “kon duna koy panahon para ana,” ug wala gayod kitay panahon. Dunay daghan kaayong ikatudlo.

Ug usahay ang Doktrinal nga Kahanas tan-awon nga daw pakapin sa ginabuhat sa mga seminary. Apan sa tinuod, ang Doktrinal nga Kahanas sukaranan sa atong ginabuhat. Makatabang gayod kini nato sa pagkab-ot sa atong tumong ug sa unsay gipabuhat kanato sa mga propeta. Busa pinaagi sa pagtutok sa Doktrinal nga Kahanas, atong matubag kana nga kal-ang sa unsay wala mahisgoti diha sa iskedyul sa eskwelahan, ug makatakdo kita diha sa Dali, Sunod Kanako sa paagi nga mopanalangin sa mga estudyante ug mga pamilya.

Brother Webb: Makahinumdom ko sa dihang atong gipakita ang pagsiksik ngadto ni Elder Johnson ug naghisgot niini nga posibilidad. Sa sinugdanan pa gusto niya nga matakdo ngadto sa Dali, Sunod Kanako tungod sa paagi nga mopanalangin kini sa mga pamilya ug mokonektar sa ilang pagtuon diha sa panimalay. Apan nabalaka usab siya, sama nato, mahitungod sa mga kal-ang nga malaktawan diha sa pihong mga hilisgotan sa ubang bahin sa kalibotan kon dili na tingklase. Ang kataposang semana sa kinabuhi sa Manluluwas tingali dili matudlo sa seminary, o ang Unang Panan-awon o uban importante kaayo nga mga panghitabo ug mga baruganan sa ebanghelyo.

Sama sa imong gisulti, sa dihang naghisgot kita sa posibilidad nga tutokan ang mga leksyon sa Doktrinal nga Kahanas ug ilakip kini, bisan kon malaktawan sa dili tingklase—ug maghimo pa gani og pipila ka gipamubong mga leksyon, mga koneksyon sa pagtabang nila nga makonektar kon mobalik sila sa tingklase ug dili moderetso sa iskedyul sa Dali, Sunod Kanako apan magsugod sa mga leksyon nga makakonektar sa ilang nalaktawan, ug unya mopadayon sa iskedyul sa pagbasa sa Dali, Sunod Kanako—makaangkon kita sa mga benepisyo nga inyong gihulagway kon pabiling nakatakdo sa mga iskedyul sa Dali, Sunod Kanako apan usab makasulbad sa mga kabalaka kalabot sa unsay ilang malaktawan. Ug kinahanglan usab kitang mosalig sa mga pamilya ug mga indibidwal nga maoy magtuon niadto nga mga seksyon kon dili nato sila kauban nga makabaton og kasinatian ug pinaagi sa Espiritu Santo makakat-on sa mga butang nga kinahanglan nilang makat-onan. Busa, nindot gayod kana nga pagpasabot. Salamat.

Laing butang nga daghang tawo ang nangutana mao ang kausaban sa mga gikinahanglang basahon—gikan sa gikinahanglan nga pagbasa sa teksto alang sa kurso ngadto sa inadlawng gawi sa pagbasa sa mga kasulatan. Busa unsay masulti ninyo namo kalabot niana nga desisyon?

Brother Smith: Nasayod kitang tanan sa mga rekisitos sa pagkompleto sa seminary ug sa diploma sa seminary: nga atong subayon ang attendance ug dapiton nato sila sa pagbasa sa teksto alang sa kurso. Ug dayon duna kitay learning assessment. Ug naghimo kami og gamayng kausaban sa gikinahanglang basahon gikan sa pagkompleto sa upat ka sumbanan nga mga basahon samtang anaa sila sa seminary ngadto sa pagdapit kanila nga adunay inadlaw nga gawi sa pagbasa sa kasulatan.

Migahin kami og dakong panahon uban sa atong mga area director—ug bisan sa mas daghang region director—sa tibuok kalibotan naghisgot kon unsay gusto namong mahitabo sa ilang kinabuhi, sa mga hunahuna ug mga kasingkasing sa mga estudyante tungod sa ilang mga kasinatian diha sa seminary ug institute.

Ug samtang naghisgot kami mahitungod sa kasinatian sa seminary ug unsay among gilaoman nga mahitabo sa kinabuhi sa usa ka estudyante, naghisgot kami sa pagbalik ngadto sa gikinahanglang basahon nga kasulatan sa seminary. Apan nakaamgo kami nga ang gusto gayod namong hatagag gibug-aton, ang butang nga labing importante, mao ang atong abilidad sa pagtabang og estudyante nga makahimo og inadlawng gawi nga magpabilin kanila sa tibuok nilang kinabuhi.

Makausa pa, dunay koy gidalang kinutlo. Gikan kini sa atong tamdanan nga basahon nga Pagtudlo ug Pagkat-on sa Ebanghelyo apan maayo kining mipamubo niini. Nag-ingon kini, “Adunay pipila ka mga butang nga mabuhat sa mga magtutudlo nga may gamhanan ug malungtarung impluwensya sa kaayohan diha sa kinabuhi sa ilang mga estudyante kay sa pagtabang nila nga magkat-on sa paghigugma sa mga kasulatan ug sa pagtuon niini kada adlaw.”³ Busa kon gusto kita og diploma sa seminary nga magsimbolo og makahuluganon, lawom, ug makakabig nga kasinatian sulod sa upat ka tuig, ang pagtuon sa kasulatan kinahanglang kabahin niana.

Ug daghang paagi nga masukod nimo ang pagkalambigit sa estudyante sa mga kasulatan, apan gusto namong tutokan ang pagsukod sa labing importante, ug kana ang pagtabang sa mga estudyante nga mabatasan ang personal nga inadlawng gawi sa pagtuon sa kasulatan. Mao nga gipaubanan namo kini og maayo nga mga kapanguhaan sa in-service leader nga among gilaoman nga magamit sa mga magtutudlo ug mga in-service leader. Tungod kay makadugang gayod kini sa gikinahanglan pinaagi sa pagtabang sa mga estudyante nga makaangkon og mga kahanas ug mohimo og mga tumong ug magkat-on unsaon nga makonektar ngadto sa ilang Amahan sa Langit ug sa ilang Manluluwas pinaagi sa Espiritu Santo diha sa mga kasulatan. Apan nagtuo mi nga kini nga kinahanglanon moresulta sa unsay labing importante ug unsay gusto nato nga irepresentar sa diploma.

Brother Webb: Busa moawhag gihapon kami sa pagbasa sa teksto alang sa kurso. Gani, ang gikinahanglang basahon kada adlaw, o gipaabot, kinahanglang anaa sa kurso sa pagtuon.

Busa naglaom kami nga ang tanang estudyante sa seminary mobasa gihapon sa kurso sa pagtuon. Maglaom kami nga mohimo gihapon sila og mga tumong aron mahimo kining makahuluganon sama sa imong gisulti. Apan ang rekisito alang sa credit mao ang 75 porsyento sa mga adlaw nga anaa sila niana nga semester. Dili na nato ipasabot kon unsa ang magbasa kada adlaw. Apan samtang magtuon sila sa kasulatan alang sa kurso matag adlaw sa bisan unsang paagi, 75 porsyento sa panahon, makadasig kana kanila nga makabaton niana nga kasinatian isip kabahin sa ilang panahon sa seminary.

Brother Bigelow: Nalipay ko nga imong gihisgotan nga ang tumong tingali lahi ug ang atong gitinguha nga resulta alang sa mga indibidwal—nga anaa sila sa mga kasulatan matag adlaw. Sa ubang mga dapit sa kalibotan nga duna kitay seminary, wala gani silay mga kasulatan nga naimprinta nga ilang mabasa. Busa aron makamugna og usa ka sumbanan nga mohaom sa tibuok kalibotan—nagtugot kini nato sa paghimo niana. Nagtugot kini nato sa pag-ingon, “Gusto namong mapalambo ninyo ang inyong relasyon sa Langitnong Amahan pinaagi sa pulong.” Ug mahitabo kana sa inadlawng gawi sa pagtuon sa pulong sa Dios.

Brother Webb: Mao nga gamita ang oportunidad nga maminaw sa Iyang tingog kada adlaw.

Brother Bigelow: Mao gyod.

Brother Webb: Ug naghatag usab kana og pagsalig ngadto sa mga magtutudlo, di ba? Sa pagtrabaho uban sa mga estudyante sa tagsa-tagsa aron maumol ang ilang kasinatian sumala sa ilang mga panginahanglan ug mga abilidad. Ug misalig kami kaninyo. Mao nga dili na kami mopasabot sa kahulogan niini nga labaw pa sa nabuhat na namo.

Brother Bigelow: Mao gyod.

Brother Webb: Salamat. Siyempre kadto nga mga kausaban napahibalo ug naimplementar na, ug magpasalamat mi sa tanan ninyong paningkamot sa paggamit niini sa labing maayong paagi sa pagpanalangin sa mga estudyante. Laing kausaban, o tingali ang tataw kaayong hilisgotan, mao ang pandemiya. ug unsay nahitabo sa milabayng pipila ka bulan nga dunay daghan kaayong kasamok ug kausaban sa online nga pagkat-on ug ubang kausaban nga namugna tungod sa pandemya. Rory, unsay imong masulti nga atong nakat-onan gikan sa pandemya, ug unsay mausab sa umaabot tungod niana?

Brother Bigelow: Una ug labaw sa tanan—ug gihisgotan ni nimo sa imong mga komentaryo sa pagsugod—mao nga among naamgohan duna kitay talagsaong mga tawo nga nagtrabaho ug nagserbisyo uban kanato. Ug kon imong idugang ang mga eskwelahan sa Simbahan ug tanang misyonaryo ug gitawag nga mga magtutudlo ug full-time nga mga empleyado, part-time nga mga empleyado, molabaw sa 60-kapin-ka libo ka tawo sa kalibotan. Ug maayo gyod kaayo sila. Apan naghunahuna ko nga sa nahitabo sa pandemya mora kini og nakapaamgo nato kalabot sa usa ka kahanas nga tingali wala pa kanato.

Sa risgo nga makapaambit og personal nga kasinatian, ang akong asawa ug ako, mga pito ka tuig na ang milabay, gihangyo nga moserbisyo isip mga lider sa misyon sa usa ka misyon sa Brazil. Ug nangadto kami nga nakatuon og Portuguese—miserbisyo ko nga Kinatsila ang pinulongan isip batan-ong lalaki, mao nga bag-o kini nga pinulongan alang kanamo—nagtuo nga kami dunay pihong lebel o kahanas sa pagsulti og Portuguese.

Ug nakahinumdom ko sa unang adlaw gayod sa among pag-abot sa misyon ug ang mouliay nga presidente sa misyon midala kanamo sa mission home. Naa didto ang FM manager, ug sa among pagsulod sa kusina, miingon siya, “Tan-awa, magkinahanglan mo nga mo-order og tubig.” Gipatong niya ang iyang kamot sa sudlanan sa tubig, ug miingon siya, “Magkinahanglan mo nga mokuha og bag-ong botelya sa tubig dinhi.” Nataranta ko kay nakaamgo ko nga dili ko kahibalo mosulti og botelya sa tubig sa Portuguese. Duna koy ubang nahibaloan. Nagtuon kami, nagtuo kami nga nakasabot kami. Ug miingon ko niya, “Pwede nga mamalihog ko nimo ana? Pwede ikaw ang mohimo ana?” Ug miingon siya, “Sigurado.”

Wala siya makakita nga sa iyang pagpanawag, mitalikod ko niya, mikuha og 3x5 nga kard ug misulat sa matag pulong unsaon pag-order og tubig. Ug naghunahuna ko, ang akong pamilya, mangamatay mi sulod sa duha ka semana tungod kay dili ko makakuha og tubig.

Kana nga kasinatian usa ka higayon sa katin-awan nga nagpakita nako nga wala ko mahibalo sa unsay akong gituohan nga nahibalo ko. Ug nagtuo ko nga nabuhat kana sa pandemya kanato. Ang atong lebel, o atong kahanas—Ang atong lebel sa kahanas sa online nga paghatod sa relihiyosong edukasyon wala sa punto nga kinahanglang maanaa kini. Ug ang uban dali nga nakapahiangay, ug ang kahanas anaang daan, tiunay diha kanila, ug nakahimo sila niini. Ang uban dili kaayo.

Mao nga usa sa mga butang nga atong nakat-onan ug kinahanglan natong ipadayon mao ang—kinahanglang mopadayon kita sa pagpalambo sa kahanas—mao ang mga pulong nga gamiton. Kinahanglang mangita kita og mga paagi nga mapalambo ang atong kapasidad.

May gihisgotan ka sa imong pasiunang pakigpulong. Permi ko nga mobalik niini, apan importante kaayo kini. Gikan ni Elder Clark, sa dihang miingon siya, “Bisan unsang ang-ang sa pagkamasulundon o paglaum o gugmang putli ang anaa kanato; bisan unsang lebel sa propesyonal nga kahanas ug abilidad ang atong naangkon, dili kini mopaigo alang sa buhat nga nagpaabut.”⁴

Ug usa sa mga butang nga migawas sa pandemya alang nako mao ang lawom nga tinguha nga molambo, nga mosiguro nga akong nakab-ot ang mga gipaabot, ang nagtubo nga mga gipaabot, sa Ginoo niining lahi kaayo nga kalibotan nga ania nato karon. Busa unsay mabuhat niana sa online? Wala ko kahibalo. Adam, unsay mabuhat niana sa atong online nga instruksyon? Nagtuo ko nga mas angayan ka nga motubag niana nga pangutana.

Brother Smith: Akong balikon ang imong gisulti. Nakakat-on kita og duha ka importanting butang gikan sa pandemya nga atong magamit sa umaabot. Ang usa, sama sa imong gihisgotan, nagtrabaho kita kauban sa labing maayong mga tawo. Ang atong full-time nga mga magtutudlo, atong mga boluntaryo, sila andam kaayo ug talagsaon ug mapahinunguron. Nabutang sila sa lisod nga sitwasyon ug maayo kaayo og nabuhat.

Nakakat-on usab kita og mga oportunidad nga mapalambo. Ug mas nakakat-on kita unsa nga mga pangutana ang kinahanglan natong ipangutana aron makat-onan ang mga tubag nga kinahanglan natong makat-onan.

Usa nga among nabuhat diha sa Church Office Building mao nga miorganisar kami og Digital Learning Management division. Nagpasabot kana og grupo sa mga tawo nga dunay kahanas sa pagtabang namo sa pag-uswag kalabot sa online nga mga tanyag sa Seminaries and Institutes. Ang rason nga gitawag namo kini og Digital Learning Management tungod kay ang pulong nga online pwedeng magpasabot og daghan kaayong butang. Ug ang among gipasabot mao ang bisan unsang matang sa dili linawas nga paghatod gamit ang teknolohiya, hybrid man kini o video conferencing o asynchronous—dunay daghang lain-laing paagi nga ato kining matan-aw.

Apan ang atong nakat-onan mao ang, unsa nga mga pangutana ang kinahanglan natong ipangutana? Ug misugod kita sa pagpangutana niana aron makahimo kita og mga kapanguhaan ug inprastraktura ug usa ka programa nga motabang sa pagsuporta sa magkalapad nga digital nga tanyag sa mga klase sa seminary ug institute.

Sigurado nga kon mawala na ang COVID, nga gilaoman natong tanan nga dili magdugay, ang panginahanglan dili na ingon ka taas, apan mas taas kini kay sa kaniadto tungod kay atong naabot ang mga estudyante nga wala nato maabot kaniadto. Nakahimo kita sa pagpanalangin og mga kinabuhi ug mga pamilya nga wala nato mabuhat kaniadto tungod kay kita, sa usa ka paagi, napugos niini nga matang sa paghatod, ug karon atong nakita ang mga benepisyo niini. Karon nasayod kita sa mga angay ipangutana aron mahimong mas maayo, ug naghimo kita og hiniusang mga paningkamot aron masayran kadto nga mga tubag. Busa nagtuo ko nga dunay moabot nga makapaikag nga mga butang.

Brother Webb: Ang ubang tawo nangutana, “Maabot kaha ta sa punto diin duna gayod kitay mga trabahante alang lamang sa online?” Ug moingon lang ko nga naghisgot gihapon kami niadto nga mga pangutana. Posible kaayo nga moabot ang adlaw nga duna kitay full-time nga mga magtutudlo sa seminary kinsa magtudlo lamang diha sa online. Apan tinuod usab nga kitang tanan kinahanglang dunay sukaranang pagsabot kon unsaon ang epektibong pagtudlo sa online. Basin kitang tanan, sa usa ka punto, tawagon sa pagbuhat niana. Ug kon tawagon kita, siyempre atong buhaton ang labing maayo nga atong mahimo. Nakakita kita og mga magtutudlo nga maayo kaayong mibuhat niana. Nakakita kita og mga magtutudlo kinsa kaupat pil-a ang ilang mga enrollment sa mga programa sa institute tungod kay epektibo kaayo ang ilang pagtudlo diha sa online. Busa mas importante kay sa istraktura sa organisasyon mao ang, makakat-on ba kita sa mga kahanas nga gikinahanglan aron epektibong mahatod ang online nga edukasyon ug tinud-anay nga mapanalanginan ang mga tawo pinaagi niana nga pamaagi sa paghatod?

Ug samtang daghan kita og makat-onan niana, mopaambit kita og daghan niana sa mga oportunidad sa pagbansay aron ang mga tawo makahimo sa labing maayo sa paghatod og epektibong kasinatian sa relihiyosong edukasyon. Busa nindot kadto nga mga komentaryo. Salamat.

Brother Bigelow: Kini nga pagpahiangay sa online nga instruksyon, naghunahuna ko nga dili kini hingpit nga pagbiya sa unsay atong nabuhat kaniadto. Apan kinahanglan kitang mopahiangay, tingali mokuha og dugang part-time nga mga magtutudlo sa institute, part-time nga mga magtutudlo sa seminary. Ang online naghatag og oportunidad sa mga tawo nga motudlo, nga dili kini full load.

Brother Webb: Apan walay pugson ngadto niana nga mga kausaban. Mohimo lang kita niadto nga mga pagpahiangay sa atong pagpadayon ug samtang moabot ang bag-ong mga oportunidad. Usa sa mga rason niana akong hisgotan kadali. Nag-anam kadaghan ang mga babaye nga nanarbaho. Ug mapasalamaton kita sa ilang mga natampo. Ug ang uban nila mipili, tungod sa mga sirkumstansya sa pamilya, nga gusto tingaling magtudlo og part-time o motudlo sa online o sa bisan unsang rason.

Kahibalo mo, tinuod usab nga samtang nagkadaghan ang mga babaye nga trabahante nga ang ilang mga oportunidad sa pagpangulo misaka. Hisgutan nako, duna kitay 10 ka division director sa Church Office Building, ug tulo kanila karon mga babaye. Ug wala sila gitudlo o gikuha ngadto niana nga mga posisyon tungod kay sila mga babaye; sila ang labing kwalipikado nga mga kandidato alang niadtong mga posisyon ug nagtanyag og talagsaong kontribusyon sa buhat nga atong gihimo.

Apan usa lang na ka ehemplo, sa pagtubo sa atong organisasyon, nga nahitabo usab kana sa mga region director, sa magtutudlo, o mga program administrator. Ug hisgotan usab nako kay usa kana ka kausaban sa atong mga trabahante ug kinahanglang makamatngon ta niana. Ug kadtong mga program administrator kinahanglang mas nakamatngon sa lain-laing panglantaw ug magtinambagay sa usag usa ug mogamit sa kasinatian sa mga tawo ug makaangkon gikan sa ilang mga panglantaw.

Naghunahuna ko nga usa kini ka butang nga kinahanglang magmatngon kita aron makabenepisyo sa mas nagkadaiyang trabahante. Ug nasayod ko nga piho kini sa mga empleyado, apan tinuod usab kini sa kalibotan nga puno sa mga magtutudlo, lalaki ug babaye, gikan sa tanang matang sa managlahing kagikan, kinsa gitawag nga mga magtutudlo, nga dunay daghan kaayong ikatanyag nga kinahanglan natong paminawon ug masabtan ang ilang panglantaw ug ilang kasinatian aron atong mapanalanginan ang atong mga estudyante sa atong organisasyon.

Brother Bigelow: Daghan tingali ang wala mahibalo niini, apan nagsugod kita sa pagmugna og mga field team. Nagtugot kini ninyo nga adunay mga tigsulat sa kurikulum gikan sa tibuok kalibotan ug training services nga mga indibidwal, ug mga training services team, tingali gikan sa lain-laing bahin sa kalibotan. Ug nagtugot kini nato nga adunay mas maayong panglantaw sa unsay nahitabo sa kalibotan kay sa pig-ot ra kaayo nga panglantaw.

Brother Webb: Salamat. Adam, pwede ta nga mobalik nimo? Daghan og nahitabo sa Innovate Institute; daghang tawo ang interesado niana ug mitampo niana nga paningkamot. Unsay imong mahatag namo isip update sa Innovate Institute?

Brother Smith: Mipahinungod kita og daghang oras ug mga kapanguhaan, ug daghang talagsaong mga institute director ug mga magtutudlo, nagtan-aw sa mga butang sama sa pisikal nga kahimtang o bag-ong mga kursong itanyag, o bisan lang sa pagpahiangay sa mga titulo sa kurso. Ug nindot kaayo kining tanan. Naghunahuna ko nga tingali ang labing importanteng butang nga atong gibuhat mao nga naminaw kita sa atong mga estudyante sa institute, ilabi na sa pagtutok og paminaw niadtong mga estudyante nga wala nato makauban. Tingali mitambong sila og kausa ug wala na mobalik, o tingali wala pa gayod sila makatambong og institute. Ug mao nga nakatutok gayod kita sa pagpaminaw kanila.

Naghunahuna ko nga ang labing importanteng pagbag-o nga atong mahimo mao ang pagpahiangay og gamay sa paagi sa atong pagtudlo. Sama sa imong gisulti, Rory, dili kini hingpit nga pag-usab; ginagmay lang kini nga pagpahiangay, ginagmayng kausaban sa mga butang nga kanunay natong buhaton. Ug sa akong tan-aw, Brother Webb, ang imong pakigpulong kanamo niadtong Hunyo diin imong gipanghimug-atan ang pagmugna og mga klasehanan sa pagkakabig, pagkaimportante, ug pagkasakop, mao gayod kana ang paagi nga atong bag-ohon ang institute.

Gani, gusto kong mopaambit og istorya nga gipaambit kanako sa usa ka area director sa usa ka magtutudlo sa institute. Nangandam siya sa pagtudlo sa iyang unang Zoom nga panagpundok sa kurso nga Mahangturon nga Pamilya. Ug busa agig pagpangandam gidapit niya ang matag usa sa iyang mga estudyante sa paghimo og gamayng video sa pagpaila sa ilang kaugalingon.

Ug usa sa iyang mga estudyante nga lalaki nakahukom nga mopaila sa iyang kaugalingon sa klase sa institute isip gay ug mipaambit nga duna siyay problema sa posisyon sa Simbahan kalabot sa pamilya ug kaminyoon. Ug nasayod kini nga magtutudlo nga motudlo na siya sa doktrina ug mga baruganan kalabot sa pamilya. Busa nakahukom siya nga maghunahuna og maayo ug mag-amping ug magmainampoon kalabot niini. Kinasingkasing siyang nakigsulti niining batan-ong lalaki ug mipahibalo kaniya nga gusto niya nga ang klasehanan sa institute mahimong dapit diin dili lang siya klarong makatudlo sa doktrina ug makatudlo sa gitudlo sa mga propeta ug mga apostoles apan usa usab ka dapit diin ang mga estudyante mobati nga luwas ug walay naghusga, mopaambit sa ilang mga kabalaka ug mga problema ug mga pangutana.

Sa pakigsulti niining batan-ong lalaki, mipaambit siya sa iyang magtutudlo nga nagplano siya nga maghilom-hilom lang atol sa tibuok leksyon kay mao man kana ang kasagaran niyang buhaton. Kon dunay tawo bisan asa nga sitwasyon sa Simbahan ang mosugod sa pagtudlo mahitungod sa pamilya, dili ra siya maminaw ug maghilom ra. Apan tungod kay kini nga magtutudlo mitabang sa estudyante niana nga paagi, ang estudyante nakahukom nga motambong sa klase ug moapil. Ug ang klase dunay talagsaong kasinatian tungod kay kining batan-ong lalaki maayo kaayo motampo, ug ang iyang mga kabalaka ug mga pangutana mitabang nga makapahigayon og makahuluganong diskusyon tungod kay usa kadto ka kahimtang sa pagtuo diin ang kamatuoran gitudlo ug ang tinuod ug matinuoron ug sinsero nga mga pangutana mahimong ipangutana.

Dayon, human sa kasinatian sa klasehanan ang estudyante misulat niining mubong sulat ngadto sa magtutudlo, nga gipaambit kanako. Ug nagtuo ko nga mipadayag kini sa unsay gusto natong buhaton sa pagbag-o sa institute. Miingon siya niini:

“Gusto lang kong magpasalamat nimo kalabot sa leksyon. Gikulbaan ko og gamay niadto, ug dili ko gustong mosulti og bisan unsa, apan sa kataposan hapit gyod ko makasingit og kusog nga ‘salamat’. Nindot kaayo kadto nga leksyon. Matandi ko kadto sa leksyon nga gihatag kanako human ko miangkon nga gay ngadto sa usa ka magtutudlo sa seminary sa high school, kinsa misuporta human ko misulti niya sa nahitabo nako sa laing klase. Ang iyang leksyon ug ang imong leksyon puno sa gugma ug suporta ug daw miusab sa akong tibuok kinabuhi. Mibati ko og bag-ong kadasig nga gustong magpabilin sa ebanghelyo ug bag-ong pasalig nga maningkamot sa akong labing maayo sa pagsunod niini nga sundanan. Makapausab kini og kinabuhi. Salamat. Ug salamat sa pagtubag sa akong mga pangutana ug sa tinguha nga makaila nako ug sa pagsuporta. Gisulat nako ang akong mga pagbati mahitungod sa tanan tungod kay gibati nako ang Espiritu … sa makadaghan. Gisulat nako sa akong scripture journal nga mapasalamaton kaayo ko ug malipayon. Nakahilak ko karon sa kalipay. Salamat, imong igsoon ug usa ka anak sa Dios.”

Atong makita kini nga magtutudlo nga mihimo og makahuluganong koneksyon ngadto sa estudyante, sa paagi nga naghatag kaniya og paglaom ug kaisog nga moduol sa Manluluwas ug mopadayon sa iyang dalan sa pakigsaad. Ug tungod kini kay ang klasehanan niini nga magtutudlo karon usa ka dapit sa pagkakabig, pagkaimportante, ug pagkasakop.

Brother Webb: Ganahan ko sa paagi sa imong pagtubag niana nga pangutana. Atong trabahoon ang mga kausaban sa kahimtang ug mga latid sa kurso ug tanang matang sa butang. Ug samtang mangita mo og bag-ong praktikal nga paagi sa pagbag-o sa institute sa katuyoan nga modapit og dugang nga mga estudyante kinsa wala karon mag-apilan. Ug dayon, kon motambong sila, nga makaangkon og kasinatian nga sama niana, mopugong kana kanila ug mokonektar nila ngadto sa Langitnong Amahan, mao gayod kana ang katuyoan sa tanan niini nga inisyatiba busa salamat.

Karon, mangutana ko og usa ka pangutana ug kamong duha ang motubag niini. Daghan kita og nahisgotan nga nahibalo na ang mga tawo, apan usa ka butang nga tingali wala sila mahibalo mao ang pipila ka kausaban nga moabot sa usa ka tamdanan nga basahon—ang Teaching and Learning handbook—ug ubang butang nga may kalabotan sa pagbansay nga ihiusa sa atong bag-o nga tamdanan nga mga basahon. Busa unsay ikasulti ninyo nila kalabot sa bag-ong mga butang nga moabot kalabot sa atong pagbansay?

Brother Smith: Gipadak-an gayod namo ang among mga paningkamot sa pagtutok ug pagpayano ug paghiusa. Ug mahinamon kami sa usa ka oportunidad nga makigsabot sa kinatibuk-ang Kapangulohan sa Sunday School diha sa Priesthood and Family Department aron adunay usa ka tamdanan nga basahon alang sa mga magtutudlo sa Simbahan. Ang Pagtudlo sumala sa Pamaagi sa Manluluwas ug ang Pagtudlo ug Pagkat-on sa Ebanghelyo mag-uban ug mapayano ug mapaklaro ug mahiusa aron makahatag kanato og klarong kahulugan sa pagtudlo, kon unsa angay ang kasinatian sa klasehanan, kon unsa ang angay nga masinati sa usa ka tigkat-on kon uban sila kanato. Karon, magamit kana sa gitawag nga mga magtutudlo ug sa mga magtutudlo sa Seminaries and Institutes.

Sa pagsuporta niana, misugod kami sa pagporma sa unsay gitawag namo og Training Resource Library aron kon ang usa ka magtutudlo mobasa og kahulugan sa usa ka kahanas, mahibalo dayon sila nga dunay dapit nga ilang maadto diin kana nga kahanas mapakita ug mapasabot, diin makadawat sila og pagbansay niini ug usa ka pagdapit sa pagpraktis niini ug pag-implementar niini. Busa naglaom gayod kami sa pagtabang sa atong mga magtutudlo sa pag-ila og kahanas nga gusto nilang mapalambo ug dunay mga kapanguhaan nga mapalambo kini. Ug dayon inubanan niana, gusto gyod namong makakita og mga paagi sa pagsukod, gibuhat ba namo ang gilaoman namong makab-ot? Gituman ba namo ang among katuyoan sa mga kinabuhi sa batan-ong mga tawo?

Ug nagtan-aw mi og pipila ka epektibo ug makahuluganong mga paagi nga masukod ug matimbang-timbang ang ilang kaugalingon, aron mapalambo kon sa unsang paagi ang magtutudlo maabagan sa usa ka supervisor nga moabot ug motabang nila sa pagtubo ug paglambo ug pagkahimong mas maayo ug usab sa pagpangutana sa atong mga estudyante kon unsa ang ilang kasinatian ug unsa gayod ang nagpanghitabo sa ilang kinabuhi. Ug naglaom kami nga kining tanan mabuhat sa diwa sa pag-awhag ug pag-uswag ug pagtubo ug usa ka oportunidad alang kanamo sa paggamit sa bisan unsang kapanguhaan nga anaaa aron mahimong mas maayong mga magtutudlo.

Nasayod kita nga nagpuyo kita sa mga adlaw sa dili pa ang Ikaduhang Pag-anhi sa Manluluwas, ug kadtong mga batan-on nga mosulod sa atong mga klasehanan apil sa labing maayo nga nakita sukad niini nga kalibotan. Ug kinahanglan namong mahimong maayo tungod kay maayo kaayo sila. Ug gusto lang namong mahimong mas maayo.

Brother Bigelow: Morag makapaikag ang gilatid ni Adam; kini ang ideya nga mapasabot ba nato kon unsa kining atong gilaoman nga mahitabo? Mahimo ba kitang mabansay niini aron makab-ot niini kana nga gipaabot? Ug kini nga pagsukod mahinungdanon kaayo. Naghisgot pa gani kita og mga paagi sa pagsulay nga mapakita kana nga pagsukod ug dayon mohimo og mga tumong base kon asa sila ug asa sila gusto nga maanaa.

Brother Webb: Kabalo mo, kon maghisgot kita og pagdumala sa binuhatan o bisan unsa, ug mohimo niini nga propesyonal nga termino, ug maghunahuna ang mga tawo, “Nagtudlo ko sa ebanghelyo, ug makapakulba na nako.” Kamong tanan nagmahal sa inyong mga estudyante; kamong tanan gustong mopanalangin nila. Busa kon dunay tawo sa inyong tupad nga motabang niana nga pag-uswag, nianang tinguha nga mopanalangin sa mga estudyante, ug mahimong larawan sa unsay nahitabo sa klasehanan ug mohatag ninyo og tabang sa inyong tinguha nga mouswag ug mopanalangin sa mga estudyante—dili tungod kay gusto ninyong tanan nga mahimong perpekto nga mga magtutudlo apan tungod kay gusto ninyong makamugna sa labing maayong kasinatian alang sa inyong mga estudyante.

Mao nga makapahinam kaayo kini, ug nagtuo ko nga inyo kining nakita—kon inyong makita unsay umaabot, sa tamdanan nga basahon, sa Training Resource Library, ug bisan sa unsay among gitawag nga mga pagsukod, kining tanan positibo gayod ug mapuslanon nga nagtuo ko nga mahinamon kamong makakita. Sa labing minos, mao na ang paglaom, di ba?

Brother Smith: Oo.

Brother Webb: Busa, karon, gusto ka nga mosulti sa dili pa ko motapos—

Brother Bigelow: Oo, usa ka laing aspeto nga sa akong pagtuo mahinungdanon, ug kana mao kini. Kanunay kitang nakatutok sa pagtudlo ug pagpalambo sa pagtudlo ug nataligam-an ang aspeto sa pagpangulo o aspeto sa pagdumala sa pagkahimong seminary principal o coordinator o region director, area director, bisan unsa kana nga posisyon. Ug dili nato gusto nga mabaliwala kana karon. Diin atong gipunting, ang ideya nga mohatag kita og dokumento kalabot sa tahas nga makatabang sa usa ka principal nga masayod unsay mapaabot. Aron kon maghisgot kita mahitungod sa pagsukod dili lang kana pagsukod sa pagtudlo; pagsukod kini sa inyong pagpangulo. Busa sa dihang gihangyo ako nga mahimong principal pipila ka tuig na ang milabay, hangopon unta nako ang unsay atong gihisgotan karon.

Kon akong mahatag ngadto sa mga empleyado, sa mga tawo sa akong faculty, sa mga administrative assistant, moingon, “Tabangi ko nga masayod kumusta ang akong gibuhat,” base sa usa ka sumbanan, “ug tabangi ko nga masayod unsay akong mabuhat aron molambo.” Gusto kong mahimong labing maayong lider nga pwede kong mahimo, ug ang bugtong paagi nga mabuhat ko kana mao ang kon nasayod ko asa ako karon, asa ako kinahanglang maanaa, ug unsay akong mabuhat aron moabot didto. Busa ang tanan nga atong gihisgotan anaa sa konteksto nga motabang kita og mas daghang batan-on, mga young adult nga makabaton og nindot nga kasinatian, ug dayon magamit usab kana sa akong pagpangulo.

Brother Webb: Importanteng timan-an nga ang pipila nini nga mga pagpahiangay dali nga mahitabo—sa umaabot nga mga bulan—ug ang uban mas dugay.

Salamat. Nan, sa dili pa nato taposon kini nga bahin sa sibya, mosulti ko og usa pa ka butang mahitungod sa kausaban sa kinatibuk-an. Makahimo kita sa tanang bag-o nga mga programa ug mga kapanguhaan sa kalibotan, apan walay pulos kining tanan, ug walay usa niini nga molampos gawas kon nagkahiusa kita ug gawas kon nakatakdo kita sa kabubut-on sa Amahan. Magkinahanglan kini sa labing maayo nga atong matanyag. Magkinahanglan kini nga atong ipatigbabaw ang Dios labaw sa tanan sa atong kinabuhi. Magkinahanglan kini nga andam kitang mohangop ug malipayong motubag sa kausaban. Aron makaangkon sa gahom sa pag-usab og mga kinabuhi, kinahanglan kitang motudlo ug mopamatuod gikan sa nausab nga mga kasingkasing.

Hinaot nga atong mahiusa ang atong mga kasingkasing sa hingpit nga pag-apil diha sa kawsa ni Kristo. Ug hinaot nga mas hingpit kitang mosalig Kaniya. Kon atong buhaton, makahimo kita sa pagpahiangay sa bisan unsang mga kausaban nga moabot. Ang Espiritu Santo motabang kanato nga makakita ug mousab sa mga butang nga kinahanglan natong usbon sa atong personal nga kinabuhi ug sa atong pagtudlo. Ug atong masinati sa atong kaugalingon nga ang Dios mao ang Dios sa mga milagro. Sa ngalan ni Jesukristo, amen.