Usa ka Kabilin sa Kausaban sa CES
2021 ngaTinuig nga Sibya sa Pagbansay sa S&I
Martes, Enero 19, 2021
Mapasalamaton ko kaninyo ug malipay ko nga mogahin og pipila ka minuto uban ninyo karon. Mapasalamaton ko ni Chad ug sa iyang maalamon ug mahalaron nga team kinsa nagkugi sa pagtrabaho aron sa pagtabang niini nga buhat sa Ginoo. Usa ka panalangin nga ikauban nato si Sister Jean B. Bingham karon, ug ako naghinam-hinam sa iyang mensahe. Makaimpluwensyan ug makadasig siya nga lider, ug mapasalamaton kita nga siya nagserbisyo sa Church Board of Education.
Samtang kami nagkonsiderar sa importante nga mga kausaban sa mga Seminary ug mga Institute of Religion (S&I), namalandong usab ako sa mga kausaban sa tibuok kasaysayan sa edukasyon diha sa Simbahan. Sa miaging adlaw, nagsugod ko sa pagtandi kon unsay nahitabo sa edukasyon sa Simbahan ngadto sa akong kaugalingong family history. Ang mga ginikanan sa akong inahan nakabig ngadto sa Simbahan didto sa Switzerland sa dihang mga young adult pa sila, mao nga niana nga habig sa pamilya sa henerasyon sa akong inahan mao ang una nga nakasinati sa Edukasyon sa Simbahan. Ang pipila sa mga katigulangan sa akong amahan nahimong mga sakop sa Simbahan mas sayo pa niana nga dispensasyon. Tugoti ko nga mopasabot sa pipila niini ka sukaranang impormasyon sa pipila niadtong akong mga katigulangan ug usab mohisgot sa mga paningkamot sa Simbahan sa edukasyon atol sa ilang panahon. Makamatikod mo og mga kausaban sa paglabay sa katuigan—ang pipila niini mga dagkong kausaban.
Si Sarah Jane Angell, ang inahan sa akong lola sa tuhod, usa ka batang babaye sa dihang ang iyang pamilya nagpuyo sa Kirtland, Missouri, ug Nauvoo. Miabot siya sa Walog sa Salt Lake niadtong 1848 isip usa ka 14 anyos nga batang babaye, ug siya mieskwela sa bisan asa nga mga eskwelahan sa komunidad nga maoy naa sa ilang dapit.
Si Jarvis Johnson, kinsa sa katapusan nakigminyo ni Sarah, nagpuyo sa Nauvoo nga usa ka batan-ong tin-edyer. Ang tanan nga iyang pag-eskwela tingali diha sa usa niana nga daghang eskwelahan sa siyudad. Human ang mga Santos mibiya sa Nauvoo ug mipaingon sa kasadpan, siya nagpasakop sa Mormon nga Batalyon sa edad nga 17. Atol sa pagkabatan-on ug pagka-young-adult ni Sarah ug ni Jarvis, ang Simbahan ug ang mga indibidwal sa ilang mga komunidad mitanyag og eskwela, apan walay Church Educational System nga atong nahibaloan karon.
Ang anak nga lalaki nila ni Sarah ug Jarvis nga si Rais mao ang akong apohan sa tuhod. Nagdako siya sa Utah ug mieskwela sa usa ka lungsod nga gitawag og Honeyville. Ang gambalay gigamit nga simbahan ug eskwelahan. Si Charlotte, kinsa sa katapusan nakigminyo ni Rais, mieskwela sa duol nga Call’s Fort, sa usa ka gamay nga gambalay nga binuhat sa bato. Sila mga tin-edyer sa ulahing bahin sa mga 1870 ug sa sayong bahin sa 1880, pipila ka tuig sa wala pa ablihi sa Simbahan ang kadaghanan nga mga eskwelahan niini. Samtang ang daghang mga eskwelahan sa mga lungsod nahimong mga eskwelahan sa gobyerno sa mga 1880, kini nga mga eskwelahan wala tugoti nga motudlo og relihiyon. Kini maoy nakapasugod sa pagpalapad sa mga eskwelahan nga gidumala sa Simbahan human sila si Rais ug Charlotte nakatapos sa ilang pag-eskwela.
Si Rais nagbilin og usa ka asoy bahin sa iyang pagtanyag og kaminyoon ngadto ni Charlotte, nga iyang gitawag og Lottie. Miingon siya:
“Ang unang higayon nga akong nakita si Lottie siya nagdryab og karwahe nga namaligya. Ang iyang amahan may tindahan sa atubangan sa ilang balay. Si Lottie daw morag buwak nga daisy. Unya nahimamat nako siya sa usa ka sayaw, ug nag-date mi wala kaabot og usa ka tuig, ug dayon gihangyo nako siya nga pakaslan ko. Miingon siya, ‘Wala ka makagusto nako.’ Miingon ko, ‘Nakagusto ko nimo.’ Kami na-engaged sulod sa tulo ka bulan.”1
Nakasiguro kaayo ko nga si Rais dili magmalampuson isip tagsulat og mga nobela sa paghigugmaay, apan si Charlotte nakigminyo kaniya ug sila adunay 12 ka anak.
Usa niadtong 12 ka anak, si Alphalus—nga gitawag og “Alph”—mao ang akong lolo ug mieskwela sa Brigham Young College didto sa Logan, Utah. Ang akong lola, nga ginganla og Blanche, mieskwela usab sa Brigham Young College, nga mao ang usa sa mga eskwelahan sa Simbahan. Sa panahon nga sila nag-eskwela sama kini sa usa ka high school ug junior college nga gitipon. Dinhi niini nga mga eskwelahan, ang mga estudyante gitudloan sa sekular nga mga hilisgutan ug relihiyon ug adunay daghang mga kalihokan. Ang akong lolo midula sa mga team sa baseball ug basketball, ug ang akong lola usa ka tiglukso gamit ang tukon [pole vaulter].
Ang unang seminary nga magklase human sa klase sa eskwelahan [released-time seminary] nagsugod didto sa Siyudad sa Salt Lake niadtong 1912, ug gikan didto ang programa nagsugod sa pagkaylap ngadto sa ubang mga siyudad. Human nga kini nga mga seminary nagsugod sa pagpakita nga kini nakahatag og maayong relihiyoso nga pundasyon ngadto sa mga estudyante sa pampublikong mga eskwelahan, ang Simbahan mihimo og desisyon nga mobiya sa kadaghanan sa mga eskwelahan, lakip na ang Brigham Young College. Tungod niini, ang sunod nga henerasyon sa akong pamilya mieskwela sa pampublikong mga eskwelahan ug sa seminary.
Usa sa mga anak nga lalaki nila ni Alph ug Blanche, si Vere, mao ang akong amahan. Makahinumdom siya sa iyang mga magtutudlo sa seminary sa iyang tibuok kinabuhi. Ang akong inahan, si Winifred, mieskwela usab sa high school ug seminary ug makahinumdom usab sa iyang mga magtutudlo.
Niadtong 1926 ang programa sa Institute of Religion nagsugod didto sa Moscow, Idaho, ug pagka-1928, ang ikaduha nga institute naestablisar didto sa Logan, Utah. Ang akong mga ginikanan mieskwela sa gitawag na karon nga Utah State University sa Logan niadtong mga 1940. Nianang higayona, ang programa sa institute naestablisar na pag-ayo didto sa Logan, ug ang akong mga ginikanan sa sosyal nga paagi nagkahimamat sa usa ka kalihokan sa institute. Sa katapusan sila nagminyo, ug human sa ilang kasal didto sa templo sa Logan, gihimo ang salo-salo sa ilang kasal didto sa gambalay sa institute.
Nagdako ko sa Logan, Utah, ug mieskwela sa samang high school ug seminary sa akong inahan. Kana nga high school mao ang unsay Brigham Young College kaniadto. Gigahin usab nako ang usa ka bahin sa tuig ting-eskwela didto sa Monticello, Utah, ug diha sa samang klase sa seminary sa usa ka talagsaon nga babaye nga manghod nako og usa ka tuig. Ang iyang ngalan mao si Jill. Gani, ang iyang ngalan Jill lang gihapon, ug bisan og wala ko makasiguro nga mas maayo ba ko moistorya bahin sa gugma kay sa akong apohan sa tuhod nga lalaki nga si Rais, si Jill sa katapusan nakigminyo kanako.
Mieskwela ko sa seminary sa ulahing bahin sa mga 1960 ug sa sayong bahin sa mga 1970. Mao kini ang panahon nga dihay mga inisyal nga pagpalapad sa seminary ug institute ngadto sa nagkalain-laing bahin sa kalibutan. Dihay mga kasinatian sa sayo sa buntag nga mga klase sa seminary ug sa pag-eksperimento sa home-study seminary nga naghimong posible sa pagpalapad niini ngadto sa tibuok kalibutan. Mao kini ang mahagitong mga panahon alang niadtong anaa sa S&I. Naningkamot sila sa pagpahaom sa mga programa nga naestablisar nga gihimo sa oras human sa mga klase sa eskwelahan ug sa mga institute ug sa mga kampos sa kolehiyo ngadto sa lahi kaayo nga mga sirkumstansya sa tibuok kalibutan. Gisagubang usab nila ang mga hagit sa daghang hubaronon ug imprintahonon niadtong unang mga panahon.
Gani, dihang nagmisyon ko sa Norway sa sayong bahin sa 1970, ang seminary gipaila didto sa samang tuig nga ako miabot. Nahinumdom ko nga nagtabang og usa ka batan-ong lalaki, si Tom Rui, sa iyang mga leksyon sa home-study seminary—butang nga wala nako makita kaniadto. Una kadto nga higayon nga ako nakahibalo nga ang seminary mahimong lahi kay sa usa ka klase atol sa adlaw ting-eskwela nga gihimo tupad sa eskwelahan.
Mobalhin na ako karon gikan sa akong mga katigulangan ngadto sa among kaliwatan. Ang among mga anak mitambong sa mga programa sa seminary nga magklase human sa klase sa eskwelahan, gawas sa duha namo ka anak kinsa mitambong sa sayo sa buntag nga seminary samtang kami nadestino sa Chile. Ang kurikulom nausab sukad si Jill ug ako mitambong og seminary. Usa ako ka batan-ong magtutudlo sa seminary sa dihang ang sunod-sunod nga pagtudlo sa kasulatan ang gipasugdan. Dihay pipila ka hagit sa paghunahuna kon unsaon pagtudlo sa labing maayo niining paagiha. Dili kadto awtomatik nga transisyon. Apan ang mga resulta mao gayod ang gikinahanglan alang sa henerasyon nga gitudlloan. Mas napamilyar nila ang mga kasulatan, ug ang resulta, mas naimpluwensya sila sa natural nga paagi sa mga kasulatan ug nakapalambo og pagsalig diha niini. Duna mi mga rekord sa akong mga ginikanan sa pipila ka tuig sa wala pa sila motaliwan, ug ang akong inahan naghisgot sa kalainan nga iyang namatikdan.
Paminaw sa iyang mga komentaryo:
“Wala kaayo kami matudloi sa seminary sama sa mga bata karon, ug kami walay kinaiya sa pagbasa sa mga kasulatan sa paagi nga gibuhat nila karon. Gamay ra kaayo og mga libro ang akong inahan—Tales from the Scriptures—ug siya mobasa niadto. Apan wala kko makahinumdom nga kami nagbasa sa mga kasulatan. Ang among mga anak, ug mga apo, tingali adunay mas lig-ong pagpamatuod tungod kay sila mas nakasabot sa ebanghelyo, ug sila aduna— Sila nagsugod sa pagbasa niini sa dihang mas gagmay pa kaayo, ug sila mobasa gayod sa mga kasulatan. Ug sa akong hunahuna nakadugang kini og kalig-on ngadto kanila.”2
Ang pipila sa akong mga apo karon anaa na sa seminary ug ang kinamagulangan anaa na sa institute. Nakakita gihapon sila og mga kausaban sa S&I, sama sa pagpatakdo sa unsay gitudlo sa seminary sa unsay gitun-an sa panimalay sa Dali, Sunod Kanako. Tungod sa kasamtangang pandemya, kinahanglang makat-on kita og daghan kon unsaon nga mahimo ang mga klase sa linagyo nga paagi. Nagdasig ako kaninyong tanan samtang among himoon ang mga kausaban nga mohaom “sa mga kahimtang sa” nagtubo nga henerasyon.3 Kusganon akong modasig tungod kay kanang nagtubo nga henerasyon naglakip sa among mga apo.
Ang paghimo og importante nga mga kausaban sa kasagaran lisud. Usahay ang direksyon klaro, apan ang paghimo mahagiton kaayo. Hunahunaa ang mga anak nga lalaki ni Mosiah. Sila adunay klaro nga katuyoan nga ang “kaluwasan kinahanglan nga ipadayag ngadto sa matag nilalang”4 ug “nga unta [sila] makaluwas sa pipila sa ilang … kalag.”5 Sayon ra kaayo ang pagtutok lamang sa ilang milagroso nga kalampusan ug hikalimtan kon unsa kini ka mahagiton. Gisulayan nila ang tanan. Gihimo nila kini sulod sa 14 ka tuig, ug ang ilang mga kasinatian naglakip sa pag-antos sa matag matang; nagtudlo diha sa mga kadalanan, mga balay, mga templo, ug mga sinagoga; ug gisalikway, ug gibiay-biay, ug gilud-an, ug gisagpa, ug gibato, gigapos, ug gibalhog sa bilanggoan.6 Apan sila mipadayon, wala matarug ang ilang tumong, ug nakadawat sa gahom sa Ginoo sa pagtuman sa ilang misyon.
Bag-o lang gibasa nako pag-usab ang mga kasinatian ni kanhi Elder Russell M. Nelson didto sa Uropa—ilabi na sa Silangang Uropa—sa dihang siya adunay responsibilidad alang niana nga porsyon sa kalibotan gikan sa 1985 hangtud 1990. Nianang higayona siya nagserbisyo diha sa Korum sa Napulog Duha ka mga Apostoles. Niadtong 1985, sa dihang gihatagan siya og responsibilidad alang sa Uropa ug Africa, gihatagan siya og espesyal nga buluhaton sa pag-abli sa mga nasod sa Silangang Uropa (nga kaniadto ubos sa yugo sa komunismo) alang sa pagsangyaw sa ebanghelyo.7 Kini nga buluhaton gihatag upat ka tuig sa wala pa mahagsa ang paril sa Berlin ug unom ka tuig sa wala pa opisyal nga natapos ang Soviet Union.
Ang tumong ni Elder Nelson klaro, apan ang buluhaton lisud kaayo. Wala siya molunga sa iyang tumong niining espesyal nga buluhaton. Mibisita siya “sa kanhi USSR baynte siete ka higayon ug … sa ubang silangang grupo sa mga nasod nga komunista sa daghang higayon.”8 Sa iyang libro nga Insights from a Prophet’s Life: Russell M. Nelson si Sheri Dew mihulagway sa iyang buhat sa mosunod nga paagi:
“Wala siya kagustohi ug panagsa ra abi-abihon. Daghang lider sa gobyerno dili gani mohatag og appointment ngadto sa usa ka tawo nga mipahayag og hugot nga pagtuo sa Dios. Sa hinay-hinay, gibabagan ug giabagan ang iyang mga paningkamot; dili maayo ang pagtagad sa pipila ka sirkumstansya ug gipasalamatan sa uban; gipanid-an sa sekreto nga pulis ug dayon gitagad isip higala sa mga opisyal kinsa nakaila kaniya; ug gidudahan sa ubang dapit samtang gikunsolta sa uban bahin sa medikal. Ang pipila ka pagbiyahe ingon og hingpit nga walay pulos, samtang ang uban, mga oportunidad miabot nga wala niya matagna o maplano.”9
Human mausab ang buluhaton ni Elder Nelson gikan sa Uropa, siya ug si Elder Oaks—kinsa mipuli niya sa buluhaton—mireport ngadto sa Presidente sa Simbahan, nga si Presidente Ezra Taft Benson, nga ang Simbahan naestablisar na karon sa matag nasod sa Silangang Uropa.10 Si Sister Dew dugang nga mihulagway sa kasinatian ni Presidente Nelson:
“Sa dihang gipangutana siya unsay iyang nakat-onan sa buluhaton sa pag-abli sa mga nasod sa Silangang Uropa alang sa pagsangyaw sa ebanghelyo, ilabi na sa pagkonsiderar sa daghang mga paghunong ug mga pagsugod, napakyas nga mga miting, ug mga maayo ug dili maayo nga mga kasinatian, si Elder Nelson yanong mitubag: ‘Ang Ginoo ganahan og paningkamot. Mahimo ra gyud Niyang ingnon si Moises nga, “Sugaton tika sa tunga-tunga.” Apan si Moises kinahanglang motungas hangtud sa ibabaw sa Bukid sa Sinai. Gikinahanglan Niya ang paningkamot ni Moises ug ni Josue ug ni Joseph Smith ug gikan sa tanang misunod nga mga Presidente sa Simbahan. … Andam ba kamo sa pagbuhat sa lisud kaayong mga butang? Kon kamo nagpakita nga kamo andam sa pagbuhat sa inyong bahin, Siya motabang kaninyo.’”11
Ang matarung nga mga paningkamot ni Elder Nelson mao ang instrumento sa dakong kausaban nga miresulta nga madunggan ang ebanghelyo sa minilyon ka anak sa Dios.
Ang mga milagro nagkinahanglan og pagkugi. Ang mga milagro nga atong gihandom magkinahanglan og hilabihang paningkamot sa atong bahin.
Usahay magkinahanglan og panahon ang pagkab-ot sa hingpit nga mga resulta sa atong tumang paningkamot sa paghimo sa gikinahanglan nga kausaban. Sa pipila ka mga sitwasyon, kita dili gani tingali makasaksi sa hingpit nga resulta sa atong mga paningkamot inubanan sa gahom sa Ginoo. Apan ang atong pag-uswag importante kaayo, ug kita makahimo ug makapaningkamot sa paghimo sa mga kausaban nga mopanalangin sa mga kinabuhi niadtong atong gialagaran. Nagpahimutang usab kini sa pundasyon alang sa sunod nga henerasyon—nga atong mga apo sa tuhod. Si Jill ug ako wala pay mga apo, apan sa dili madugay magsugod na sila sa pagpangabot dinhi sa yuta, ug tingali dili namo mabantayan, anaa na sila sa inyong mga klase.
Ang atong tumong sa S&I klaro—wala kini mausab. Maningkamot gihapon kita sa pagpanalangin niining mga kabatan-onan ug pagtabang kanila nga “makasabot ug makasalig sa mga pagtulun-an ug Pag-ula ni Jesukristo, makasarang alang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit.”12 Kini tungod kay kita naningkamot sa pagkab-ot niana nga tumong nga kita bukas sa mga kausaban sa atong mga programa, sa pagpahingpit sa paagi sa pagtudlo, sa pagbag-o sa institute, ug sa ubang mga paningkamot nga palamboon. Tungod kay gimahal nato ang kabatan-onan, andam kitang magkugi sa pagtrabaho, mosulay og bag-ong mga butang, ug mangayo og giya ug gahom sa Ginoo sa tanan natong mga paningkamot.
Sa atong mga paningkamot sa pagpanalangin sa mga kinabuhi sa atong nagtubo nga henerasyon, hinaot nga ang Ginoo mopanalangin usab kaninyo sa mga hagit nga inyong giatubang. Gihigugma ko kamo ug mopamatuod sa atong Langitnong Amahan ug sa Iyang Anak, nga si Jesukristo. Buhi sila.
Sa ngalan ni Jesukristo, amen.