Lesona 80: Mataupu Faavae ma Feagaiga 67–70

Mataupu Faavae ma Feagaiga 67

O se Molimau o le Upumoni

E toatele taitai o le Ekalesia sa lagolagoina le lolomiina o faaaliga na maua e le Perofeta o Iosefa Samita ma malamalama ai na latou omai mai le Atua. O isi sa taulai atu i le lē atoatoa sa latou vaai i ai i faaaliga ma, o se taunuuga, sa latou le mautinoa e omai mai le Alii. O lenei lesona e mafai ona fesoasoani e faateleina ai le talitonuga o tagata aoga faapea e fetalai mai le Alii ia i tatou e ala mai i perofeta ma o le Mataupu Faavae ma Feagaiga o Lana afioga lea.

Gaoioiga E Ono Mafai Ona Aoao Ai

O se molimau

Fuafua se auala e fesoasoani ai i tagata aoga e mafaufau e uiga i a latou molimau i upumoni o le talalelei e faatatau i le fuafuaga a le Tama Faalelagi. E mafai ona latou faia le gaoioiga lenei i luga o le laupapa po o a latou api talaaga mo suesuega.

Tusi se ata fasilaau i le tasi itu o le laupapa. I le isi itu, lisi ai vaega eseese o le fuafuaga a le Tama Faalelagi atonu e manaomia e se tasi ona maua ai se molimau. E mafai foi ona e faaali atu ni ata e faatusa i vaega o le fuafuaga a le Tama Faalelagi, e pei o se ata o Iesu Keriso, le perofeta o i ai nei, po o tusitusiga paia. Filifili ni nai vaega nei ma valaaulia tagata aoga e talanoaina mea nei.

• Aisea e ono fesoasoani ai le i ai o se molimau i nei vaega o le fuafuaga a le Tama Faalelagi?

• O a nisi o mea faalavelave e ono oo mai i le ala o le faamalosia o lenei molimau?

A o faasoa mai tagata aoga, e mafai ona e lisiina mea faalavelave i le va o le ata laau ma le lisi o mea e tatau ona tatou sailia se molimau i o tatou olaga.

A uma le talanoaga, e mafai ona e valaaulia tagata aoga e mafaufau e uiga i a latou lava molimau i vaega eseese o le fuafuaga a le Tama Faalelagi. Valaaulia i latou e vaavaai mo upumoni i le taimi o le lesona e mafai ona fesoasoani ia i latou e maua pe faamalosia ai a latou molimau.

Auala e maua ai ma faamalosia ai se molimau

Ina ia fesoasoani i tagata aoga ia malamalama i le talaaga o le vaega 67, e mafai ona e faasoa atu nisi o faamatalaga mai le parakalafa lenei.

I le taufaaiuiuga o le 1831, sa i ai ia Iosefa Samita se tuufaatasiga o faaaliga mai le Alii, ae toaitiiti lava tagata na mafai ona maua kopi o na faaaliga. Sa faaali mai e le Alii e tatau ona latou lolomiina i se tusi. E pei o le Tusi a Mamona, o le Tusi o Poloaiga (lea na lolomiina mulimuli ane o le Mataupu Faavae ma Feagaiga) sa tatau ona aofia ai faamaoniga mai molimau. Peitai, sa mumusu nisi o taitai o le Ekalesia e molimau atu; sa i ai ni o latou atugaluga i nisi o gagana ma sa mananao e faaleleia atili.

Mafaufau e faaopoopo le “gagana” i le lisi o faafitauli. Fesili atu pe i ai ni auala e mafai ona toe fesootai ai nei mea i le autalavou i aso nei.

Faitau le Mataupu Faavae ma Feagaiga 67:1–5, ma vaavaai mo mea na faasoa atu e le Alii i nei alii.

• O le a sou manatu aisea e manaomia ai ona latou faalogo i lenei mea?

• O a ni upumoni o le talalelei e mafai ona tatou faailoa mai i nei fuaiupu?

  A o faasoa mai tagata aoga, fesoasoani ia i latou e faailoa mai se upumoni faapenei: E faafofogaina e le Alii a tatou tatalo, silafia o tatou loto, ma e mafai ona tuuina mai ia i tatou se molimau o le upumoni tatou te sailia.

• O le a sou manatu e mafai faapefea ona fesoasoani lenei mea ia i tatou pe a tatou sailia pe tauivi ma se molimau?

• Aisea e te manatu ai o le “fefe i o [tatou] loto” (Mataupu Faavae ma Feagaiga 61:3) e ono taofia ai i tatou mai le mauaina o faamanuiaga?

• I le fuaiupu 5, o le a le mea na faailoa mai e le Alii e uiga ia Iosefa Samita? E ui e lei atoatoa pe manino le Perofeta, ae aisea atonu e le talafeagai ai le taumafai e “faaupu ai ia sili atu i lana gagana;”? (Mataupu Faavae ma Feagaiga 61:5).

Faatoilaloina o faafitauli i le fesoasoani a le Alii

E silafia e le Alii o tatou loto ma e mafai ona fesoasoani ia i tatou e faatoilalo ia faafitauli i a tatou molimau. I le taimi lea, na tuuina mai ai e le Alii se lui mo toeaina o Lana Ekalesia e fesoasoani ia i latou ia maua “se molimau o le upumoni” (fuaiupu 4) o faaaliga na maua e Iosefa Samita.

Afai e fiafia au tamaiti aoga i se luitau, e mafai ona tuuina atu le gaoioiga lenei o se suega puupuu. Valaaulia i latou e faitau ma le faaeteete ia fuaiupu ona tapuni lea o a latou tusitusiga paia ma taumafai e tali fesili nei.

Faitau le Mataupu Faavae ma Feagaiga 67:6–9, ma vaavaai mo faamatalaga o le lu’itau a le Alii.

• O le a le ituaiga o faaaliga sa tatau ona latou filifilia? (Tagai i le fuaiupu e 6.)

• O le a le ituaiga tagata sa tatau ona latou filifilia? (Tagai i le fuaiupu e 6.)

• O le a le mea na valauliaina ai lenei tagata e tusi? (Tagai i le fuaiupu e 7.)

• O le a le mea e tupu pe a manuia le latou taumafaiga? (Tagai i le fuaiupu e 7.)

• O le a le mea e tupu pe a le manuia le latou taumafaiga? (Tagai i fuaiupu 8–9.)

  Ina ia iloa le mea na sosoo ai, e mafai ona e lolomiina pe faaali atu le ata tusi “E Moni Upu a le Perofeta” mai le mekasini o le Mo Le Malosi o le Autalavou ia Iuni 2021 ma valaaulia tagata aoga e faitau i ai. I se isi itu, e mafai ona e faamalamalama atu o Viliamu McLellin, o se faiaoga e 25 tausaga le matua ma o se tagata faatoa liliu mai i le Ekalesia, sa tofia o se “tagata sili ona atamai” (fuaiupu 6) o le vaega ma sa talia le lu’i a le Alii. Ina ua uma, sa iloa e tagata uma le mea sa ia tusia e le mai le Alii.

• O le a sou manatu o a nisi o lesona na aoaoina e nei alii mai lenei aafiaga?

  A o tali mai tagata aoga, e mafai ona e valaaulia i latou e toe faamanatu le fuaiupu 9. E mafai foi ona e faamalamalama atu, o le toatele o toeaina na sainia se pepa o faamatalaga e tuuina atu ai a latou molimau aloaia i le moni o faaaliga i le Tusi o Poloaiga.

• E faapefea ona faaalia i lenei aafiaga na silafia i latou e le Alii ma e mafai ona fesoasoani ia latou molimau?

Sa faaauau pea ona folafola mai e le Alii ni aafiaga sili atu faaleagaga i nei tamalii pe afai o le a latou “tafi esea [i latou] mai le fuā ma atuatuvalega, ma faamaualalo [i latou] i o’u luma” (Mataupu Faavae ma Feagaiga 67:10).

O le auala o loo faaaoga ai lenei upumoni i aso nei

Vaai faalemafaufau e faapea, o loo tauivi se tasi e te iloa e talitonu e fetalai mai le Alii ia i tatou e ala mai i perofeta ma o le Mataupu Faavae ma Feagaiga o le afioga a le Alii.

Afai e mananao ai tagata aoga, e mafai ona latou faaopoopo auiliiliga i le tulaga faataitai e ala i le filifilia o se tasi o faafitauli o loo lisiina i luga o le laupapa ma fautua atu e manaomia e le tagata ona faatoilaloina ina ia maua ai se molimau. Ona mafai lea ona e faasoa atu pe faaali atu faatonuga nei.

Mafaufau pe mafai faapefea ona e fesoasoani i lenei tagata e ala i le faia o mea nei:

1. Tusi i lalo mea o le a e fai atu e fesoasoani ai ia latou iloa e faafofogaina e le Alii a tatou tatalo, silafia o tatou loto, ma e mafai ona tuuina mai ia i tatou se molimau e uiga i perofeta ma le Mataupu Faavae ma Feagaiga. Afai e mafai, atonu e te manao e aofia ai soo se aafiaga patino, po o aafiaga o i latou e latalata atu ia te oe, o loo molimau mai i nei upumoni.

2. Faaaoga tusitusiga paia, tala o tusitusiga paia, po o ou lava aafiaga e faasoa atu ai nisi o mea e mafai ona tatou faia e faateleina ai a tatou molimau i perofeta ma le Mataupu Faavae ma Feagaiga (o nisi o faataitaiga e aofia ai le Mataupu Faavae ma Feagaiga 1:37–38; 21:4–6; Moronae 10:4–5). Faasoa atu pe mafai faapefea ona faamanuiaina i tatou e le Alii mo nei faatinoga.

Valaaulia tagata aoga eseese e faasoa mai mea na latou saunia. Faafetai i tagata aoga mo o latou malamalamaaga ma aafiaga.

Faaiu i le valaaulia o tagata aoga e mafaufau loloto i a latou lava molimau faapea e fetalai mai le Alii e ala mai i perofeta ma e moni le Mataupu Faavae ma Feagaiga. Molimau atu e faafofogaina e le Alii a latou tatalo, silafia o latou loto, ma e mafai ona fesoasoani ia i latou ia maua ni molimau. Valaaulia i latou e tusi i lalo soo se musumusuga na latou maua i lenei lesona atoa.

Punaoa Faaopoopo

O le a se mea na faamaumauina e Iosefa Samita i lenei mea?

Sa faamaumauina e le Perofeta:

O William E. M’Lellin, i le avea ai ma se tagata sili ona poto, i lona lava manatu, na sili atu mea na ia iloaina nai lo lona faautauta, sa taumafai e tusi se poloaiga e faapei o se tasi o poloaiga a le Alii, ae sa toilalo; sa o se tiutetauave mataga tele le tusitusi i le suafa o le Alii. O le Au Toeaina ma i latou uma na auai sa molimauina lenei taumafaiga lē aoga a se tagata e faataitai i le gagana a Iesu Keriso, na faafouina ai o latou faatuatua i le atoatoaga o le Talalelei, ma i le moni o poloaiga ma faaaliga lea na tuuina mai e le Alii i le Ekalesia e ala mai i le avea o a’u ma se meafaigaluega; ma sa faaalia e Toeaiina se naunautai e molimau atu i le moni o nei mea i le lalolagi atoa. (Iosefa Samita, i le Talafaasolopito o le Ekalesia, 1:226)

Mataupu Faavae ma Feagaiga 67:3. E mafai faapefea e lo tatou fefefe ona aafia ai i tatou?

Na aoao mai Elder Dieter F. Uchtdorf o le Korama a Aposetolo e Toasefululua:

Ou te manatu, o se vaega o lo tatou luitau o lo tatou mafaufau lea o loo lokaina e le Atua Ana faamanuiaga uma i se ao tele i luga i le lagi, ma e musu e aumai ia i tatou sei vagana ai ua tatou tausisia nisi o tulafono mamafa e leai se tuusaoloto ua Ia faatulagaina. … O le mea moni, o loo liligi mai e le aunoa e le Tama Faalelagi faamanuiaga i o tatou luga. O lo tatou fefefe, masalosalo, ma le agasala, ua pei ai o se faamalu le polokaina o nei faamanuiaga mai le oo mai ia i tatou. (Dieter F. Uchtdorf, “Ola Fiafia i le Talalelei,” Liahona, Nov. 2014, 121–22)

Na aoao mai e Elder David A. Bednar o le Korama a Aposetolo e Toasefululua, auala e mafai ai ona tatou faatoilaloina lo tatou fefe:

E mafai ona faamanuiaina i tatou ia faatoilalo lo tatou matatau ma faamalosia lo tatou faatuatua pe a tatou mulimuli i faatonuga a le Alii: “Vaai mai ia te a’u i mafaufauga uma; aua le masalosalo, aua le fefefe” (MF&F 6:36). (David A. Bednar, “O Lea Na Latou Faafilemu Ai Lo Latou Matatau,” Liahona, Me 2015, 48)

O le a se mea e tatau ona ou faia pe a ou matauina le lē atoatoa o isi?

Sa saunoa mai Elder Jeffrey R. Holland o le Korama a Aposetolo e Toasefululua:

Ou uso e ma tuafafine, vagana ai Iesu, e leai lava ni faatinoga atoatoa i luga o lenei faigamalaga faalelalolagi o loo tatou i ai, a o i ai la iinei i le olaga faaletino ia tatou tauivi mo le agai i luma tumau ae le o le faananau i le mea ua ta’ua e saienitisi o amioga o “faananauga le lelei o le faafia atoatoa.” E tatau ona tatou aloese mai lena faamoemoega faaiu o i tatou lava, o isi, ma ou te fia faaopoopo atu, o i latou o e ua valaauina e auauna atu i le Ekalesia—lea mo le Au Paia o Aso e Gata Ai o lona uiga o tagata uma,, aua ua valaauina i tatou e auauna atu i se mea. (Jeffrey R. Holland, “Ia Atoatoa Ona Lelei o La Outou Amio—I Le Iuga,” Liahona, Nov. 2017, 42)

Gaoioiga Faaopoopo e Aoao Ai

Vaaiga i perofeta a le Atua

Afai e aoga le talanoaina atili o popolega o toeaina i le gagana o faaaliga, mafaufau e faaaoga le lesona faatino lenei: Faaali atu se mea matagofie, e pei o se atavali, ae fai i tagata aoga e faailoa mai soo se mea latou te le fiafia i ai.

• O le a le mea e foliga mai e tupu pe a tatou vaavaai i tulaga sese o se mea?

Fautuaina tamaiti aoga e talanoaina tulaga lamatia e ono i ai o le faamasinoina o le perofeta e ala i lana gagana ma lē atoatoa. O le a le mea e leaga ai le mafaufau faapea e mafai ona tatou “faaupu ai ia sili atu i lana gagana”? (Mataupu Faavae ma Feagaiga 67:5).

Atonu e lelei mo tagata aoga ona iloilo lemu o latou lagona e uiga i le perofeta.

O le taua o le loto maualalo

A uma ona suesue tagata aoga e uiga ia Viliamu McLellin o loo taumafai e tusi se faaaliga, e mafai ona aoga le fesili atu i tagata aoga pe na faapefea e le aafiaga ona faalotomaualaloina ia toeaina.

Valaaulia tagata aoga e faitau le Mataupu Faavae ma Feagaiga 67:10, 14 e vaai po o a faamanuiaga na folafola mai e le Alii pe afai o le a latou faateleina lo latou lotomaualalo.

E mafai e tagata aoga ona suesue le lotomaualalo i le Taiala i Tusitusiga Paia po o le Taiala i Autu ma faasoa mai pe aisea latou te manatu ai e taua le lotomaualalo pe a sailia se molimau.

Mataupu Faavae ma Feagaiga 68:1–5

Valaaulia tagata aoga e faasoa mai pe mafai faapefea ona tatou iloa le finagalo o le Alii mo i tatou.

Faamalamalama atu e faapea, i le taimi o se konafesi na faia i le aso 1 o Novema, 1831, na oo atu ai ni toeaina se toafa, o e ua toeitiiti avea ma ni faifeautalai ia Iosefa Samita ma talosagaina e fia iloa le finagalo o le Alii e uiga ia i latou. I le tali mai, na faaali mai ai e le Alii se mamanu mo le talaiina o le talalelei. Valaaulia tagata aoga e faitau le Mataupu Faavae ma Feagaiga 68:1–5, ma vaavaai mo ni vaega o lena mamanu. Atonu e aoga le iloa o le upu faataitaiga o se mamanu po o se vaaiga faataitai.

• I fuaiupu e 3–5, o le a le folafolaga e tuuina mai e le Alii i Ana auauna?

• O a ni mea e faia e upu musuia a faifeautalai mo i latou o e talia i latou?

E mafai ona faaaoga e tagata aoga ni upu eseese, ae e tatau ona latou faailoa mai le mataupu faavae lenei: Pe a uunaia auauna a le Alii e le Agaga Paia, o a latou upu o le a taitai atu ai tagata i le faaolataga.

Faamalamalama atu e faapea, e ui o i latou ua faauuina e talai atu le talalelei e mafai ona fesoasoani i tagata ia maua se molimau e uiga i le upumoni, ae ua na o le Peresitene o le Ekalesia e i ai le aia e maua ai ma tautino atu le finagalo o le Alii mo le Ekalesia atoa. I lalo o lana taitaiga, e maua ai foi e isi sui o le Au Peresitene Sili ma sui o le Korama a Aposetolo e Toasefululua le pule e folafola mai ai le finagalo o le Atua mo i tatou.

Talanoaina pe mafai faapefea ona faatatau lenei mataupu faavae ia i tatou i aso nei.