Faatomuaga i le Tusi Lesona a le Faiaoga Seminare o le Mataupu Faavae ma Feagaiga

O le faamoemoega o Seminare ma Inisitituti o Mataupu Faalelotu “o le fesoasoani lea i le autalavou ma talavou matutua e faalolotoina lo latou liua ia Iesu Keriso ma Lana talalelei toefuataiina, ia agavaa mo faamanuiaga o le malumalu, ma ia saunia i latou lava, o latou aiga, ma isi mo le ola e faavavau faatasi ma lo latou Tama oi le Lagi” (“The Objective of Seminaries and Institutes” [2022], ChurchofJesusChrist.org).

Ina ia fesoasoani e ausia lenei faamoemoega, o lenei tusi lesona e tuuina atu ai i tamaiti aoga ni aafiaga eseese e aoao ai e ala i ituaiga lesona eseese e lua: Lesona o le Mataupu Faavae ma Feagaiga ma lesona o Sauniuniga mo le Olaga. O lesona o le Mataupu Faavae ma Feagaiga e fetaui ma poloka mau o loo faamamafaina i vaiaso taitasi i le Sau, Mulimuli Mai ia te A’u—Mo Le Aiga ma le Ekalesia: Mataupu Faavae ma Feagaiga 2025. O lesona o Sauniuniga mo le Olaga e fesoasoani i tagata aoga e aoao ai e maua mai le malosi mai ia Iesu Keriso ma faaaoga Ana aoaoga e saunia ai mo luitau o le olaga.

O le faaaogaina o fautuaga faafaiaoga o loo maua i nei ituaiga lesona e lua ma mulimuli i le taitaiga a le Agaga, e mafai ai ona e fesoasoani i tagata aoga e faaaoga le mana o Iesu Keriso i le tele o vaega o o latou olaga—e aofia ai le faaleagaga, faaagafesootai, faaleatamai, ma le faaletino. O le a e fesoasoani foi ia i latou e saunia mo o latou lumanai ma le faatuatua i le Tama Faalelagi ma Iesu Keriso.

O loo maua lenei tusi lesona a le faiaoga i le Potutusi o le Talalelei i le initoneti i le ChurchofJesusChrist.org, lea e mafai foi ona e maua ai se [faila] PDF o le tusi lesona e mafai ona sii mai. O loo maua foi i le polokalama o le Potutusi o le Talalelei. Afai e te manao e faaaoga se tusi lesona ua lolomiina, faamolemole talosaga i lou taitai faamaopoopo i le lotoifale po o le taitai o le polokalama.

Meafaigaluega e Fesoasoani ia te Oe e Saunia ai e Aoao Atu

E tusa lava po o le fea ituaiga lesona o loo e aoaoina atu, o le a fesoasoani ni nai meafaigaluega ia te oe e saunia ai.

O Tusitusiga Paia

O le suesue faatasi ma le poloka mau o le Sau, Mulimuli Mai ia te A’u o se auala taua lea e saunia ai e aoao atu tagata aoga. O lesona o loo i ai i lenei tusi lesona e manaomia ai se faiaoga musuia e suesue e le aunoa i tusitusiga paia ma sailia le mafutaga a le Agaga Paia. A o e suesue e le aunoa i tusitusiga paia, e mafai ona e mautinoa o le a musuia oe e le Tama Faalelagi e ala i Lona Agaga i le auala e fetuunai ai nei anomea i manaoga o au tamaiti aoga.

Vaaiga Aoao

O loo tuuina atu se vaaiga aoao i le amataga o vaiaso taitasi o lesona o le Mataupu Faavae ma Feagaiga ma le amataga o vaega taitasi o lesona o Sauniuniga mo le Olaga. O nei vaaiga aoao o loo tuuina atu ai faamatalaga patino o lesona e fesoasoani ia te oe e saunia ai e aoao atu, e aofia ai:

• Faamoemoega o lesona

• Manatu mo sauniuniga a tagata aoga

• O se lisi o lesona faitino, pepa e tufa atu, ata, vitio, po o isi anomea e ono manaomia ona saunia mamao i ai

O le toe iloiloina o le vaaiga aoao ae e te lei aoao atu lesona e faatatau i ai e mafai ona fesoasoani ia te oe e filifili ai po o fea o anomea e sauni mamao i ai.

Saili le vaaiga aoao faalevaiaso mo lesona o le isi vaiaso o le a e aoaoina atu.

• O a faamatalaga ua e maua iinei e aoga mo oe ona muai iloa?

• E ono mafai faapefea ona e faaaogaina lenei faamatalaga a o e sauni e aoao atu?

Motugaafa Faafaiaoga

O vaaiga aoao taitasi e muamua atu i lesona o le Mataupu Faavae ma Feagaiga o loo i ai se motugaafa mo le aoao atu lea e faamatala ai faiga po o mataupu faavae fautuaina mai le Aoao Atu i le Ala a le Faaola: Mo I Latou Uma o E Aoao Atu i le Aiga ma le Ekalesia. O nei motugaafa o loo faailoa atu i le aikona lenei: A e lagona ua e saunia, taumafai e faatino nei faiga ma mataupu faavae a o aoao atu. O le a e matauina o le faaaogaina o nei fautuaga e mafai ona fesoasoani e faaleleia ai ou gafatia faafaiaoga.

O le motugaafa mo le aoao atu i vaaiga aoao taitasi e faasino atu ai oe i se lesona lea e faataitai ai le faiga po o le mataupu faavae fautuaina. Vaavaai i lena lesona mo le aikona o aoaoga e sue ai se faataitaiga o le motugaafa o loo faataitaia. E fesoasoani foi nei mea e faasino atu ai oe i Tomai o le Atinaega o Faiaoga lea e mafai ona fesoasoani ia te oe e aoao atili ai e uiga i faiga masani po o mataupu faavae o loo faamamafaina. Pe a faatagaina e le taimi ma ou gafatia, mafaufau e faaaoga nei aoaoga o se vaega o au sauniuniga o le lesona.

Toe iloilo le motugaafa mo le aoao atu i le vaaiga aoao mo se vaiaso o loo loma o anotusi o le a e aoao atu. Faamata e mafai faapefea ona e taumafai e faataitai lenei fautuaga i le lesona?

Fautuaga mo le Saoasaoa

O le vaaiga aoao mo seti taitasi o lesona o Sauniuniga mo le Olaga e aofia ai fautuaga o le saoasaoa. O nei fautuaga e maua ai manatu i le mea e mafai ona faaaoga ai nei lesona i se taiala o le saoasaoa. E mafai e taitai faamaopoopo ma taitai o polokalama ona faaaoga nei fautuaga a o latou fatuina se taiala o le saoasaoa.

Sauniuniga a le Tagata Aoga

O vaaiga aoao taitasi e aofia ai foi fautuaga mo le fesoasoani i taagata aoga e saunia o latou mafaufau ma loto mo lesona taitasi. E mafai ona e vaavaai i nei manatu i le amataga o le vaiaso ma filifili ma le agaga tatalo po o a manatu e te lagona o le a sili ona fesoasoani ai i au tagata aoga. E le manaomia ona e faaaogaina fautuaga uma mo sauniuniga a le tagata aoga. E mafai ona e fetuunaia pe fatu ni ou lava manatu. O le tele o nei fautuaga ua mamanuina ina ia muai tuuina atu i tagata aoga i se aso po o se taimi mamao ao lumanai ai le aafiaga e aoao ai.

Toe iloilo manatu o sauniuniga a tagata aoga i le vaaiga aoao mo se vaiaso o lesona o loo loma o le a e aoao atu. Mafaufau po o fea o manatu o le a e faaaogaina, fetuunai, pe le faaaogaina. Afai e te filifili e valaaulia au taagata aoga e saunia, e faapefea ona e faasoa atu lenei manatu mo sauniuniga ia i latou? E mafai ona e faasoaina atu i upu pe faaali atu i le faaiuga o le vasega na muamua atu. Pe, pe a talafeagai ai, auina atu e ala i le imeli po o se polokalama e auina atu ai feau.

Faatonuga Faafaiaoga

I lesona taitasi, o le a e matauina ai pusa o loo i ai faatonuga mo faiaoga. O faatonuga faafaiaoga ua mamanuina e fesoasoani ia te oe e saunia ai e aoao atu. E mafai ona fesoasoani ai ia te oe e iloa ai le auala e faaaoga ai gaoioiga e aoao ai o loo fautuaina atu i le lesona. O nei faatonuga e ono faamalamalama ai faamoemoega o gaoioiga o lesona pe ofo atu ai ni fautuaga i le auala e fetuunai ai le anotusi o le lesona ina ia ausia lelei ai manaoga o tamaiti aoga. O nei fautuaga e mafai ona aofia ai isi auala faaleoleo, fesili, po o gaoioiga e fesoasoani ia te oe e fetuunai ai anotusi ma gaoioiga pe a manaomia.

Toe faamanatu nisi o faatonuga faafaiaoga i se lesona o le a e aoaoina atu i se taimi lata mai. O a fetuunaiga e ono mafai ona e faia e faavae i faatonuga faafaiaoga e te maua?

Gaoioiga E Ono Mafai Ona Aoao Ai

O lesona taitasi o loo i ai manatu o auala e mafai ona e taulimaina ai le aafiaga o le aoaoina. E le manaomia ona e faaaogaina uma gaoioiga o loo fautuaina atu i lesona e te aoao atu.

Mo au tagata aoga ina ia maua le aafiaga sili ona lelei, e tatau ona e faaaogaina le anotusi i le vaega lenei e fai ma taiala nai lo se tusiga tautu. Afai faatoa e amata o se faiaoga seminare, atonu e sili atu le amata i le mulimuli ma le toto’a i gaoioiga e aoao ai ua fautuaina atu. Faatasi ai ma le tele o le poto masani, o le a faaleleia ai lou tomai e fetuunai ai anotusi o lenei tusi lesona ina ia fetaui lelei ma manaoga o au tagata aoga.

O le tele o gaoioiga fautuaina e aoao ai o le a valaaulia ai tagata aoga e faamaeaina i se api talaaga mo suesuega. O loo maua se PDF o se api talaaga mo suesuega e mafai ona faaaoga e tamaiti aoga i le ChurchofJesusChrist.org/si/seminary/manuals. Faamolemole faafesootai lou taitai faamaopoopo po o le taitai o le polokalama e maua ai ni kopi lolomi o lenei api talaaga mo lau vasega, pe a manaomia.

Mo se fesoasoani ia iloa le auala e faapaleni ai le faaaogaina o gaoioiga aoaoina fautuaina ma le fetuunai o mea e faaaoga mo mataupu aoaoina ina ia fetaui lelei ai ma manaoga o tagata aoga, tagai i le “Adopt Then Adapt seminary Curriculum Training” i le Seminare Curriculum Training (2025). Atonu e sili ona aoga le faamaeaina o lenei aoaoga i totonu o nai vaiaso muamua o le tausaga.

Punaoa Faaopoopo

O le tele o lesona o loo i ai se vaega o “Punaoa Faaopoopo” i le faaiuga o le lesona. O lenei vaega o loo aofia ai faamatalaga e mafai ona fesoasoani e faaloloto ai le aoaoina. E mafai ona e maua tali talafeagai i fesili e ono i ai i tagata aoga pe sue ai ni faamatalaga mai taitai o le Ekalesia atonu e te manao e faaaofia i le lesona. O le vaega lenei e faatoa e maua avanoa pe afai o loo e mauaina le tusi lesona a le faiaoga e ala i le polokalama o le Gospel Library po o le Potutusi o le Talalelei i le upega tafailagi i le ChurchofJesusChrist.org O le vaega o “Punaoa Faaopoopo” e le o aofia ai i le lomiga PDF o le tusi lesona a le faiaoga.

Vaai pe o le lesona o loo e aoao atu e sosoo ai e aofia ai le “Punaoa Faaopoopo.” Pe o i ai ni fesili, tali, po o saunoaga a taitai o le Ekalesia e ono aoga e faasoa atu i au tamaiti aoga?

Galuega Faatino Faaopoopo e Aoao Mai Ai

O lenei vaega, o loo aofia ai foi i le faaiuga o le lesona, o loo i ai ni manatu faaopoopo mo le taulai atu i le aafiaga e aoao ai. O nei gaoioiga e aoao ai e aofia ai auala e fetuunai ai gaoioiga o loo i ai nei i le lesona, po o auala e aoao atu ai anomea e le o aofia ai i le lesona. O gaoioiga faaopoopo e aoao ai e na o le tusi lesona a le faiaoga e aofia ai pe afai o loo e mauaina e ala i le polokalama o le Gospel Library po o le Potutusi o le Talalelei i le upega tafailagi i le ChurchofJesusChrist.org O lenei vaega e le o aofia ai i le lomiga PDF o le tusi lesona a le faiaoga.

Afai o lau lesona o le a sosoo ai e aofia ai se vaega o “Galuega Faatino Faaopoopo e Aoao Mai Ai”, iloilo gaoioiga nei. Pe o i ai ni gaoioiga e te manatu o le a aoga e faaaoga faatasi ma au tagata aoga e faaopoopo i ai po o le sui ai o gaoioiga e aoao ai o loo aofia ai i le lesona autu?

Lesona o le Mataupu Faavae ma Feagaiga ma Lesona o Sauniuniga mo le Olaga

E tatau ona aoaoina tagata aoga i lesona o le Mataupu Faavae ma Feagaiga ma lesona o Sauniuniga mo le Olaga i le aluga o le tausaga. I se tulaga lautele, o lesona e tolu i le vaiaso e masani lava o lesona o le Mataupu Faavae ma Feagaiga, ae o isi lesona e lua i le vaiaso o lesona o Sauniuniga mo le Olaga. Atonu e i ai vaiaso e manaomia ai lou fetuunaia o nei faamoemoega lautele.

O faamatalaga nei e mafai ona fesoasoani ia te oe e malamalama ai i le faamoemoega ma auala e faatino ai ituaiga lesona uma e lua.

Lesona o le Mataupu Faavae ma Feagaiga

O lesona o le Mataupu Faavae ma Feagaiga e fetaui ma poloka mau o loo faamamafaina i vaiaso taitasi i le Sau, Mulimuli Mai ia te Au. O nei lesona e tuuina atu ai i tagata aoga avanoa e maua ai ni aafiaga loloto i le suesueina o aoaoga a le Faaola i le Mataupu Faavae ma Feagaiga. O lesona o le Mataupu Faavae ma Feagaiga e aofia ai foi lesona o le Faataitaiga o le Atamai i Aoaoga Faavae ma lesona o le Iloilo Lou Aoaoina.

Atamai i Aoaoga Faavae

O se faamuamua taua mo oe o se faiaoga o le fesoasoani lea i tagata aoga ia ausia taunuuga o le atamai i aoaoga faavae. O nei taunuuga e aofia ai le fesoasoani i tagata aoga ia:

• Aoao ma faaaoga mataupu faavae paia mo le mauaina o le malamalama faaleagaga.

• Ia atamai i fuaitau o le atamai i aoaoga faavae ma aoaoga faavae o le talalelei a Iesu Keriso o loo latou aoao atua.

O le gafataulimaina o fuaitau filifilia ma le aoaoga faavae o le talalelei a Iesu Keriso lea e aoao mai e nei fuaitau o lona uiga o tagata aoga o le a:

• Iloa ma malamalama i aoaoga faavae o loo aoao atu i fuaitau o mau o le atamai i aoaoga faavae.

• Faamatala manino le aoaoga faavae i le faaaogaina o fuaitau o mau e fesootai i le atamai i aoaoga faavae.

• Faaaoga le aoaoga faavae o le talalelei a Iesu Keriso ma mataupu faavae o le mauaina o le malamalama faaleagaga i a latou filifiliga o aso taitasi ma a latou tali i faafitauli ma fesili tau i aoaoga faavae, faaletagata lava ia, faaagafesootai, tulaga faasolopito ma fesili.

• Manatua ma maua ia fuaitau o le atamai i aoaoga faavae ma tauloto o latou fasifuaitau autu o mau.

O le Polokalama o le Atamai i Aoaoga Faavae e mafai ona fesoasoani i tagata aoga e ausia ai nisi o taunuuga o le taulotoina o aoaoga faavae. Ua mamanuina e fesoasoani ai i tagata aoga e tauloto le mau faasino ma le fuaitau autu o mau mo fuaitau taitasi o le atamai i aoaoga faavae. Atonu e te manao e faaaoga le polokalama i le vasega ma uunaia tagata aoga e sii mai i a latou lava masini, pe a mafai. E maua mo masini iOS ma Android .

Mo nisi faamatalaga e uiga i faamoemoega o le taulotoina o aoaoga faavae, matamata i le “O Le A Le Atamai i Aoaoga Faavae?” (3:56), e maua i le ChurchofJesusChrist.org.

Lesona o Faataitaiga o le Atamai i Aoaoga Faavae

O lesona Faataitai o le Atamai i Aoaoga Faavae ua faamoemoe e fesoasoani ai i tagata aoga e galulue agai i le ausiaina o taunuuga o le atamai i aoaoga faavae.

Mo nisi faamatalaga e uiga i le auala e fesoasoani ai i taagata aoga ia ausia ia taunuuga o le atamai i aoaoga faavae, tagai i le “Aoaoga Faamasani o le Atamai i Aoaoga Faavae” i le Seminary Curriculum Training. Atonu e sili atu ona aoga le faamaeaina o lenei aoaoga i totonu o ni nai vaiaso talu ona e faamaeaina le aoaoga faamasani “Adopt Then Adapt Seminary Curriculum” .

O Lesona o le Iloilo Lou Aoaoina

O le iloiloga o se vaega taua o le aoaoina. O avanoa e tu ma tomanatu ai i le aoaoina e mafai ona avea o se aafiaga lelei mo taagata aoga ma uunaia ai i latou i lo latou tuputupu ae faifai pea ma le atinaega agai atu i le avea atili ai e faapei o le Tama Faalelagi ma Iesu Keriso. O le iloiloina o lo latou aoaoina, e avea ai tagata aoga ma tagata auai malolosi i le faagasologa o le aoaoina ma ia sili atu ona tali atu mo lo latou aoaoina.

O lesona o le Iloiloina o Lou Lou Aoaoina e maua ai e tagata aoga ni avanoa e faamatala ai aoaoga faavae autu mai le Mataupu Faavae ma Feagaiga, tomanatu ai i o latou uiga faaalia ma manaoga, ma fefaasoaai o latou alualu i luma i le atiina a’e o amioga e fesoasoani ia i latou e avea atili ai ma soo tuuto o Iesu Keriso. O nei lesona e mafai ona fesoasoani i tagata aoga ia lagona le olioli a o latou iloaina lo latou tuputupu ae ma faailoa mai vaega i le lumanai mo se alualu i luma faaopoopo. Ina ia maua ni togi o le kosi, o le a manaomia ona auai tagata aoga ia le itiiti ifo ma le tasi se lesona Iloiloina o Lou Aoaoina i afa taitasi o le kosi.

O tagata aoga e lei auai i soo se tasi o nei lesona i le afa o le kosi, o le a manaomia ona faamaeaina se lesona Iloilo Lou Aoaoina mo afa taitasi pe a manaomia ina ia maua ai togi o le kosi. O loo aofia ai i le faaopoopoga o lenei tusi lesona ni lesona se lua o le Iloilo Lou Aoaoina. “O leIloilo Lou Aoaoina, Vaega 1” e mafai ona faaaoga e toe faaleleia ai le iloiloga na misi i le afa muamua o le kosi. “Iloilo Lou Aoaoina, Vaega 2” e mafai ona faaaoga e fai ai le iloiloga i le afa lona lua o le kosi. E mafai ona e tuuina atu i taagata aoga lenei iloiloga ma tuu atu ia i latou e faatumu faatasi ma isi tagata o le vasega po o tagata o le aiga. A uma, uunaia i latou e faasoa mai ia te oe mea na latou aoaoina mai le aafiaga. E mafai ona e maua ai avanoa e auauna atu ai i nei tagata aoga ma faamanatu ai lo latou tuputupu ae faaleagaga faatasi ma i latou. Tuu atu ia i latou le faamālō mo le iloiloga mo le afa o le kosi pe a latou faamaeaina lenei lesona Iloilo Lou Aoaoina.

Mo nisi faamatalaga e uiga i le auala e faatino ai lesona o le Iloilo Lou Aoaoina, tagai i le “Aoaoga Faamasani mo Iloiloga” i le Seminary Curriculum Training. Atonu e sili atu ona aoga le faamaeaina o lenei aoaoga faamasani i totonu o ni nai vaiaso talu ona e faamaeaina le “Aoaoga Faamasani o le Atamai i Aoaoga Faavae.”

Lesona o Sauniuniga mo le Olaga

O lesona o Sauniuniga mo le Olaga e tuuina atu ai i tagata aoga avanoa e faaaoga ai aoaoga a le Faaola i le:

• Taulimaina o fesili faigata ma tulaga faigata o le olaga

• Fai ni filifiliga musuia e faaaoga ai aoaoga a Iesu Keriso ma Ana perofeta

• Atiina ae le ola tutoatasi e tausia ai le tagata lava ia ma le aiga

• Ia sili atu ona maloloina faaletino ma faalelagona

• Atiina a’e tomai e faamanuiaina ai i le aoga.

• Fai ni fuafuaga e saunia ai mo aoaoga ma galuega i le lumanai

• Saunia mo le auaunaga faafaifeautalai ma le ekalesia

• Saunia e osia ma tausia feagaiga i le malumalu

Taumafai e aoao atu ni lesona se lua o Sauniuniga mo le Olaga i vaiaso taitasi. O nisi vaiaso e mafai ona e aoao atu ai le tele o mea nai lo lenei ma isi vaiaso atonu e itiiti ifo lou aoao atu, ae o le averesi e tatau ona e taumafai e aoao atu ni lesona se lua i le vaiaso i le tele o taimi e mafai ai. O le a tuu atu ai e lenei mea se avanoa mo tagata aoga e aoaoina ai nei lesona taitasi i le aluga o le tausaga aoga. E le masani ona manaomia mo oe le aoao atu o nei lesona i se faasologa faapitoa, e ui lava e i ai ni nai lesona e faaaoga ai manatu na aoaoina i lesona na muamua atu.

O le vaaiga aoao mo vaega taitasi o lesona o Sauniuniga mo le Olaga e mafai ona avea ma se punaoa taua i le fesoasoani ia te oe e faia ai ni faaiuga e uiga i le taimi e aoao atu ai ni lesona patino o Sauniuniga mo le Olaga. O nei vaaiga aoao o le a fesoasoani ia te oe e vave vaai ai i faamoemoega o lesona mo lesona eseese o Sauniuniga mo le Olaga, faapea ai foi ma le saoasaoa o fautuaga e uiga i taimi e ono i ai o le tausaga e mafai ona e mafaufau e aoao atu ai.

Ia mautinoa ua maua se kopi o se taiala o le saoasaoa ua saunia mo oe e lou taitai faamaopoopo po o le taitai o le polokalama.

Atonu foi e te manao e faafesootai le “Fatu se Aoaoga Faamasani mo le Taiala o le Saoasaoa” i le Seminary Curriculum Training e fesoasoani ai ia te oe e fetuunai lau taiala o le saoasaoa i manaoga o au tagata aoga.