Talia Ona Fetuunai lea o Mataupu Aoaoina a le Seminare

E tele auala aoga e saunia ai e aoao atu le talalelei a Iesu Keriso. O lenei sauniuniga e aofia ai i taimi uma le suesueina ma le agaga tatalo o le afioga a le Atua ma le sailia o le taitaiga a le Agaga Paia ia iloa ai le auala sili e fesoasoani ai ia i latou o loo e aoaoina ina ia liua ia Iesu Keriso ma Lana talalelei. Ina ia ausia lenei mea, ia mautinoa e suesue le poloka mau i le faasologa o le Sau, Mulimuli Mai ia te A’u . O le a fesoasoani lenei mea ia te oe i lau sauniuniga o le lesona a o e iloiloina le mataupu aoaoina. O le a fesoasoani le mataupu aoaoina ia te oe e faailoa ai mataupu faavae taua ma aoaoga faavae i le poloka mau, fesoasoani i tamaiti aoga ia iloa, alofa, ma mulimuli i le Tama Faalelagi ma Iesu Keriso, ma mulimuli i mamanu musuia o le aoao atu ma le mataalia.

Mafaufau i le fautuaga lenei a Peresitene Dallin H. Oaks o le Au Peresitene Sili e uiga i le faaaogaina o mataupu aoaoina e saunia ai lesona o le seminare:

E muamua ona tatou talia, ona tatou fetuunaia ai lea. Afai ua tatou malamalama lelei i le lesona o le a tatou tuuina atu, ona mafai lea ona tatou mulimuli i le Agaga e fetuunaiina. Ae e i ai le faaosoosoga, a tatou talanoa e uiga i lenei fetuunaiga, e amata muamua i le fetuunaiina nai lo le taliaina. O se faapaleniina. O se luitau e faaauau pea. Ae o le faaaogaina o le talia muamua ona fetuunai ai lea o se auala lelei e tumau ai i luga o se nofoaga mautu.

(“A Panel Discussion ma Elder Dallin H. Oaks” [Faasalalauga faasatelite mo Seminare ma Inisitituti Faalelotu, Aok. 7, 2012], broadcasts.ChurchofJesusChrist.org)

• O le a le uiga o le talia ma fetuunai mataupu aoaoina a o e saunia se lesona?

Sa fesoasoani Peresitene Henry B. Eyring ia i tatou ia malamalama i nisi o mafuaaga atonu tatou te manaomia e fetuunai ai le mataupu aoaoina:

E tele atu fautuaga mo manatu e aoao atu, auala e aoao atu ai i latou, ma mau fefaasinoa’i e faaaoga nai lo le mafai ona faaaogaina e soo se tasi o i tatou. … Ae talu ai tatou te mananao i a tatou tamaiti aoga e ole atu i le Alii ina ia faamalamalamaina i latou, e tatau ona tatou faamanuiaina i latou i se faataitaiga. Ina ia faia lena mea e mafai ona tatou faitauina le mataupu aoaoina—upu uma. Atonu e leai so tatou taimi e sue ai ma suesue i mau faasino uma, ae e silafia e le Atua a tatou tamaiti aoga. …

… E silafia lelei lava e le Alii mea ua iloa e [tagata aoga] ma mea latou te manaomia. E alofa o Ia ia i latou ma Ia alofa ia i tatou. Ma faatasi ai ma lana fesoasoani e tatou te … filifili e le gata i na vaega o le mataupu aoaoina lea o le a faatagaina ai i tatou e faaaogaina atoatoa o o tatou mana e aoao atu ai ae o i latou o le a aumaia i lalo mana o le lagi i luga o na tamaiti aoga i lo tatou potuaoga i lena aso.

(“The Lord Will Multiply the Harvest” [afiafi ma se Pulega Aoao, Fep. 6, 1998], ChurchofJesusChrist.org)

• Aisea e te manatu ai e taua le talia muamua o mea o loo i anomea o le lesona a o lei fetuunaia?

• E mafai faapefea ona ese metotia o le sauniaina o se lesona mo se faiaoga e faaaogaina le mataupu aoaoina ma se faiaoga e le faia?

O A Mea e Mafaufau I Ai Pe a Fetuunai Lesona

O nisi nei o fesili e mafaufau i ai a o e taliaina ma fetuunai anomea o lesona:

1. O le a le faamoemoega o le lesona atoa faapea ai ma vaega eseese o le lesona?

2. O le a le faamoemoega o le tusitala musuia, ma o ogatusa le fetuunaiga o loo ou mafaufauina ma lena mea?

3. O a ni a’u mafuaaga mo le manao e fetuunai le lesona? Pe na o se mea e fiafia i ai le tagata lava ia, pe o le suiga e maua ai e tamaiti aoga se poto masani e aoao ai?

4. Pe o ogatusa ea la’u fetuunaiga ma uunaiga a le Agaga Paia?

Atonu e manaomia ona e fetuunaia se lesona ina ia

• mulimuli ai i uunaiga a le Tama Faalelagi ua maua e ala i le Agaga Paia. (Tagai i le mataupu suesue a Brother Dube.)

• ausia manaoga faapitoa pe tulaga ese, tomai, ma punaoa o loo maua a tamaiti aoga. (Tagai i le mataupu suesueina a Brother Dube ma Brother Reyes.)

• faaogatusa vaega o le lesona ma tulaga ma aganuu i le lotoifale. (Tagai i le mataupu suesue a Sister Rodriguez.)

• fesoasoani i tamaiti aoga o i ai ni faafitauli ma ni fesili maaleale i le taimi nei. (Tagai i le mataupu suesue a Brother Dube.)

• saili se auala sili atu e faataunuu ai le faamoemoega lava lea e tasi mo se vaega o le lesona ua tuuina atu. (Tagai i mataupu e suesue ai Brother Li ma Sister Martin.)

• faaaoga le taitaiga ma punaoa aupito lata mai ua saunia e taitai o le Ekalesia. (Tagai i le mataupu suesue a Sister Schmidt.)

O Mataupu Suesueina

Sister Rodriguez

O loo sauni Sister Rodriguez e aoao atu le lesona “Mataio 1:18–25; Luka 1:26–35.” Ua ia iloa o le a mananao tamaiti aoga o lana vasega ia iloa mea o loo aoao mai e tusitusiga paia e uiga i le tina o Iesu, o Maria. O loo i ai se aganuu o lagona malolosi ma talitonuga eseese e uiga ia Maria i lo latou aai. E toatele foi sa tapuai ia Maria ona o lana matafaioi o le tina o le Atua. A o ia suesueina le lesona mai le mataupu aoaoina, e vaavaai Sister Rodriguez mo se nofoaga talafeagai e fesoasoani ai i tagata aoga ia malamalama i mea na aoao mai e tusitusiga paia ma taitai o le Ekalesia e uiga ia Maria.

O se tasi o gaoioiga suesue i le lesona e valaaulia ai le tagata aoga e vaavaai mo aoaoga pe o ai matua o le Faaola i le Luka 1:30–35, Mataio 1:18–23, ma le Alema 7:10.

Ua filifili Sister Rodriguez e fetuunai le lesona pe a uma ona faitau e tamaiti aoga le Alema 7:10 e ala i le faaopoopoina o fesili nei e lua i mea o loo aofia ai i le mataupu aoaoina.

“O le a le mea ua fesoasoani Alema ia i tatou ia malamalama ai e uiga ia Maria? A o tatou faamamaluina ma alolofa ia Maria ma isi soo faamaoni i tusitusiga paia, e faapefea ona fesoasoani le Alema 7:11–13 ia i tatou ia malamalama i le mafuaaga tatou te tapuai ai i le na o le Tama Faalelagi ma Iesu Keriso?”

Brother Li

A o sauni Brother Li e aoao atu le lesona “Ioane 1:1–16,” ua ia vaaia le fautuaga lenei ma fesili e lua i le amataga o le lesona:

Faaali le ata lenei pe aumai se polo i le vasega e faaaogaina i se taaloga lauiloa, ma fai atu fesili nei. E mafai ona faaaoga se isi mea pe afai o le a fesoasoani i tagata a’oga ma aoao atili ai e uiga i le aitema, latou te iloa ai e sili atu lona tau nai lo le mea sa latou mafaufau muamua i ai.

• Tou te iloa e fia le tau o lenei polo?

• Ae a pe ana faapea sa faaaoga lenei polo i se taaloga o le siamupini i le lalolagi pe na sainia e se tagata taalo lauiloa?

Ua faaauau pea ona faitau e Brother Li le lesona e aoao ai po o le a le faamoemoega o le aumaia o se polo i le vasega. Ua ia filima’oti e faapea o le faamoemoega o le fesoasoani lea e saunia tamaiti aoga ia malamalama o le tele o lo tatou aoao po o ai Iesu Keriso a o le’i i ai i Lona soifuaga faaletino, o le tele foi lea o lo tatou talisapaia o le taua o Lana misiona i le lalolagi.

I le manao ai e faataunuu lenei faamoemoega i le auala sili ona aoga mo ana tamaiti aoga, sa ia mafaufau loloto ai mo se minute po o le a le mea e mafai ona ia aumaia i le vasega e sili ona fesootai i ai ana tamaiti aoga. Ua ia filifili e fetuunai le lesona e ala i le aumaia o se asoa faatauvaa i le vasega. A uma ona faasoa mai e tamaiti aoga le tele o o latou manatu pe fia le tau o le asoa, o le a ia faasoa atu po o ai na faia le asoa ma pe aisea e sili atu ai le taua ia te ia o le iloaina o lona talafaasolopito nai lo le mea e ono i ai.

Sister Martin

A o sauni Sister Martin e aoao atu le lesona “Galuega 3,” ua ia matauina se fautuaga e faaali atu se vitio o loo faaalia ai le tagata pipili o loo faamaloloina e Peteru ma Ioane e ala i le mana o le Atua. Ua ia matamata i le vitio ma ua faagaeetia i le aoga tele. Ae ua ia iloa foi ua faatolu ona vaai tamaiti aoga i vitio i lana vasega i lenei vaiaso. Ua tonu ia te ia e vaavaai mo se auala ese o le faataunuuina o le faamoemoega o le vitio.

Ua ia iloaina o le vitio o se vaaiga faalemafaufau o le upu i le upu o lenei tala. Ua ia faaiuina faapea o le faamoemoega o le vitio o le faataga lea o tagata aoga e vaai faalemafaufau i le mea na tupu nai lo le na o le faitau i ai. Ina ia fetuunai le lesona, ua ia fuafua e valaaulia tagata aoga e faitau ona faatino lea o le mea na tupu i le tala, o lea e mafai ai e tagata aoga ona avea ma tagata auai mataalia, fai se malologa mai le matamataina o vitio, ma fesoasoani pea ia i latou e vaai faalemafaufau i lenei mea na tupu.

Brother Dube

Sa saunia ma le filiga Brother Dube i le Aso Faraile a o lumanai le konafesi i le faaiuga o le vaiaso e aoao atu le lesona i le tusi a Roma e pei ona otooto atu i le mataupu aoaoina mo le Aso Gafua a sau. I lona ofo tele, sa ia faalogo ai i le perofeta o faasilasila mai i le taimi o le konafesi o le a fausia le uluai malumalu i lo latou eria i se taimi lata mai. E toalaiti lava ana tamaiti aoga ua vaai tino i se malumalu. Na te silafia o le a o mai tamaiti aoga i le vasega ma le naunau e talanoa e uiga i le malumalu ma e toatele o le a i ai ni fesili e uiga i ai.

Ina ua uma ona tatalo, na ia lagona le uunaia e le Agaga Paia e faamisi i luma ma aoao atu le lesona faatatau i le “1 Peteru 3:18–22; 4:1–6” ma le lesona o le tauloto o le aoaoga faavae o loo avatu faatasi ai i le “1 Peteru 4:6” i le Aso Gafua ma le Aso Lua. Sa pei lenei mea o le fetuunaiga sa’o ona o le lesona faatatau i ai ua i ai le faamoemoega taua, “O lenei lesona o le a fesoasoani ia te oe e saili ai auala e fesoasoani ai i le Faaola i Lana galuega o le faaolaina o e ua maliliu.” Na te lagonaina o lenei taimi tulaga ese o le avanoa sili lea e fesoasoani ai i tamaiti aoga ia fiafia e uiga i le saunia e faaola o latou tuaa i le malumalu i le lumanai.

A o saunia e Brother Dube le lesona o le Aso Gafua, ua ia matauina se tasi o valaaulia e faaaoga mea ua aoaoina e tamaiti aoga o loo faapea mai:

Asiasi i le FamilySearch.org pe faaaoga le polokalama o le Gafa o le Aiga i le FamilySearch. Vaai pe mafai ona e mauaina igoa o tuaa o loo manaomia pea ona maua sauniga o le perisitua. E mafai ona e faaleoleo nei igoa ma ave e oe lava i le malumalu pe auina atu o latou igoa i le malumalu ina ia mafai ai e se isi tagata ona faia sauniga mo i latou. E mafai ona faaaoga le vaega o Sauniga ua Saunia e fesoasoani ia te oe e iloa vave ai tuaa o e manaomia sauniga o le perisitua.

Ua iloa e Brother Dube o le toatele o ana tamaiti aoga e le mafai ona faaaogaina le initoneti po o le polokalama o Gafa o le Aiga i le FamilySearch. Na ia fetuunaia ma le atamai le valaaulia e faaaoga mea sa latou aoaoina e amata faatumu ai pepa o vaega faaleaiga i pepa ma o latou aiga ma talanoa ma o latou faufautua o malumalu ma talafaasolopito o aiga a le uarota e aoao ai pe mafai faapefea ona latou sailia isi igoa faaleaiga e mafai ona latou saunia mo galuega o le malumalu o le a oo mai.

Sister Schmidt

I le maea ai ona suesue i le lesona o le “Mataio 22:34–40” e uiga i poloaiga sili e lua, na manatua ai e Sister Schmidt se faamatalaga na faia i le konafesi aoao aupito lata mai lea o le a fetaui lelei mo lenei lesona. Na ia matauina i le faagasologa o le lesona, o loo i ai se faamatalaga e tuai atu ua faamoemoe e fesoasoani i tamaiti aoga ia iloa a tatou alolofa i le Atua, o le a Ia liliu atu o tatou loto i le soifua manuia o isi. Na ia suia i le faamatalaga lenei:

Ua poloai mai Iesu o le poloaiga muamua ma le sili: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” [Mataio 22:37]. …

O le mea muamua la, alofa i le Tama ma le Alo.

Lona lua, “Ia e alofa atu i le lua te tuaoi” [Mataio 22:39]. …

Lona tolu, alofa ia te oe lava.

O i e tauivi ai le toatele. Pe le o se mea uiga ese le faapea o le alofa ia i tatou lava e foliga e faigofie lava ona itiiti nai lo le alofa i isi? Ae, ua fetalai mai le Alii, “Alofa i lou tuaoi e pei o oe lava.” Na te faatauaina le paia faale-Atua i totonu o i tatou, ma e tatau foi ia i tatou. Pe a oo ina tatou mafatia i sese, lototiga, lagona o le lē agavaa, lē fiafia, ita, po o le agasala, o le mana o le Togiola a le Faaola, e ala i le mamanu faalelagi, o se tasi lea o mea na te siitiaina le agaga. (Ronald A. Rasband, “O Mea a Lo’u Agaga,” Liahona, Nov. 2021, 39, 40)

Na lagona e Sister Schmidt o le faamatalaga mai se konafesi aoao talu ai nei o le a ausia ai le faamoemoega lava lea e tasi e pei ona maua i le lesona o mataupu aoaoina. Ma le isi, ua ia iloa e mafai foi ona fesoasoani i nisi o ana tamaiti aoga o e o loo tauivi e alolofa ia i latou lava ia iloa e mafai foi e le alofa i le Atua ona fesoasoani ia i latou ia lagonaina lo latou lava taua faaletagata lava ia.

Brother Reyes

A o suesueina le lesona o le “Faaaliga 15–19,” na maua ai e Brother Reyes se gaoioiga na valaaulia ai tagata aoga e filifili e suesue ni filifiliga se lua o filifiliga nei e tolu:

• Filifiliga A: Agelu ma mala

• Filifiliga E: Amioleaga ma le mana o le Faaola

• Filifiliga I: Faaipoipoga a le Tamai Mamoe

O filifiliga taitasi sa i ai ni fesili eseese, mau faasino, ma gaoioiga e fesootai i ai. Sa lagona e Brother Reyes o le faamoemoega o le gaoioiga o le fesoasoani lea i tamaiti aoga ia malamalama i le mataupu faavae o loo i le lesona: E mafai e Iesu Keriso ona fesoasoani ia i tatou e faatoilalo le amioleaga o aso e gata ai.

A o gauai atu Brother Reyes i filifiliga, sa ia maua ai le manatu lea na fesoasoani e faataunuu ai le faamoemoega lava lea e tasi i le vaega o “Gaoioiga Faaopoopo e Aoao ai” o le lesona, ma na ia lagonaina e manaomia tele e ana tamaiti aoga:

Faatapulaaina o faatosinaga a Papelonia ia i tatou

Afai o le a manuia tamaiti aoga mai se faamamafa sili atu i le faatoilaloina o Papelonia, mafaufau e faaaoga le saunoaga a Elder David R. Stone, O le “Siona i le Lotolotoi o Papelonia,” Liahona, Me 2006, 90–93. O lana talafaatusa o le malumalu o Manhattan e mafai ona faaaoga e fesoasoani ai i tagata aoga ia iloa le taua o le faateleina o lo latou taimi ma le Faaola a o faatapulaaina le faatosinaga a Papelonia ia i latou. E mafai foi ona aoga i tagata aoga le suesueina ma le talanoaina o tulaga faatonuina a le Alii mo i latou i le Mo le Malosi o le Autalavou (tamaitusi, 2011).

Sa saunia e Brother Reyes se vaega e 10-minute o le lesona e faavae i le manatu faaopoopo. Ina ia mafai ona fatuina se taimi mo lena mea, sa tonu ai ia te ia e valaaulia tamaiti aoga e filifili e suesue na o le tasi o filifiliga fautuaina e tolu o loo maua i le tino autu o le lesona.