Fatu se Aoaoga o le Taiala o le Fuasaoasaoa

O Le Faatomuaga

I le seminare tatou te mulimuli i le faatulagana o le Sau, Mulimuli Mai ia te A’u . O lenei mea e tuu ai le seminare i se matafaioi lagolago i mea o loo aoaoina e tamaiti aoga i le fale. E ui o lenei faiga ua faafaigofie ai mea o loo suesueina e tamaiti seminare, e manaomia nisi o fetuunaiga i le auala o le a faaaoga ai e eria ma polokalama i le lotoifale ia mataupu aoaoina a le seminare. I le tele o tulaga, ona o le lavelave o nei fetuunaiga, atonu e sili atu le i ai o taitai o eria, taitai faamaopoopo, po o taitai o polokalama e fatuina le taiala o le fua saoasaoa ina ia le tatau ai i faiaoga ona faia. O le fatuina o nei taiala mo faiaoga o le a fesoasoani e faasaoina ai lo latou taimi. Peitai, o nisi faiaoga o le a manaomia pea ona faia ni fetuunaiga i le taiala o le fua saoasaoa e te tuuina atu.

Taiala mo le Fatuina o se Taiala o le Fua saoasaoa o le Seminare

Faamuamua le Atamai i Aoaoga Faavae

Pe a fatuina le taiala o le fuas aoasaoa, o le a manaomia ona e gauai atu ma le toto’a i le taimi o le a e faatulagaina ai ni lesona o le atamai i aoaoga faavae. O taiala taua nei mo le faatulagaina o gaoioiga e aoao ai le atamai i aoaoga faavae:

• Fuafua po o afea e aoao atu ai le Mauaina o le Malamalama Faaleagaga, Vaega 1, 2, ma le 3. O nei lesona e folasia ai i tamaitai aoga mataupu faavae o le mauaina o le malamalama faaleagaga. E sili atu le lelei ona aoaoina i latou i le amataga o le tausaga faaleaoaoga a o le’i aoaoina soo se lesona o fuaitau o le atamai i aoaoga faavae.

• Ia mautinoa o lesona e 24 o fuaitau o le atamai i aoaoga faavae ma a latou lesona e fesootai i ai o loo aofia ai i le taiala o le fua saoasaoa ina ia aoaoina i latou a o faia vasega o le seminare. O le tele o lesona o fuaitau o le atamai i aoaoga faavae o le a masani ona oo mai i le gasologa o le tausaga a o faia vasega o le seminare. E sili atu le tuu o nei lesona e latalata i le taimi ua faatulagaina pe a suesueina ai latou poloka mau i le faasologa o le Sau, Mulimuli Mai ia te A’u . Fuafua po o le fea o lesona o fuaitau o le atamai i aoaoga faavae o le a misi e tamaiti aoga pe a le o faia le seminare. Sii atu nei lesona i se vaiaso o loo i ai se iloiloga o le atamai i aoaoga faavae, ina ia aoaoina e sui ai le iloiloga. E faaopoopo atu i le sii atu o nei lesona, ia mautinoa foi e sii atu le lesona faatatau o le talaaga lea e muai faalauiloa mai ai le fuaitau. O lesona o le faatatau i ai o loo maua i le tusi lesona a le faiaoga seminare i le taimi lava lena a o le’i faia lesona taitasi o le fuaitau o le atamai i aoaoga faavae. O le sii atu o nei lesona e lua o lona uiga o se iloiloga o le atamai i aoaoga faavae ma le isi lesona e tasi i lena vaiaso o le a manaomia ona suia.

• Faatulaga le toeiloiloina o iloiloga o le atamai i aoaoga faavae ma iloiloga o le atamai i aoaoga faavae. E faatautaia e faiaoga nei toeiloiloga ma iloiloga i le faaiuga o le semesa i a latou vasega e fesoasoani ai i tamaiti aoga e iloilo pe o le a le lelei ua latou aoaoina o fuaitau talafeagai i le kosi. O le taiala o le fua saoasaoa e mafai ona aofia ai le “Atamai i Aoaoga Faavae: Iloiloga 1 ToeIloiloina” pe a uma ona maua e tamaiti aoga lesona uma o fuaitau o le atamai i aoaoga faavae e o faatasi ma fuaitau i le faavasegaina o le atamai i aoaoga faavae. “Atamai i Aoaoga Faavae: Iloiloga 1” e mafai ona faatulagaina pe tusa ma le tasi le vaiaso pe a mae’a le iloiloga. E mafai foi ona fetuunai le taiala o le saoasaoa e faaaoga ai le “Atamai i Aoaoga Faavae: Iloiloga 2 ToeIloiloina” ma le “Atamai i Aoaoga Faavae: Iloiloga 2” pe a uma ona suesueina e tamaiti aoga ia lesona o fuaitau o le atamai i aoaoga faavae e o faatasi ma fuaitau i le iloiloga o le atamai i aoaoga faavae.

• Ia mautinoa ua maua e tamaiti aoga se aafiaga faalevaiaso i le atamai i aoaoga faavae. I vaiaso e le o i ai se lesona o le mauaina o le malamalama faaleagaga, se lesona o le fuaitau o le atamai i aoaoga faavae, se lesona e iloilo ai le toeiloiloina o le atamai i aoaoga faavae, po o se faavasegaina o le atamai i aoaoga faavae, faatulaga se iloiloga o le atamai i aoaoga faavae. O loo i ai se iloiloga o le atamai i aoaoga faavae ua uma ona aofia i vaiaso taitasi o lesona i le tusi lesona a le faiaoga seminare pe afai e leai se fuaitau o le atamai i aoaoga faavae po o le mauaina o le lesona o le malamalama faaleagaga.

“Mulimuli le faasologa o le Sau, Mulimuli Mai ia te A’u

Mo le tele o vaega, mulimuli i le faasologa o taimi o le Sau, Mulimuli Mai ia te A’u pe a fatuina lau taiala o le fuasaoasaoa. O loo i ai ni poloka mau i le faasologa faalevaiaso o le Sau, Mulimuli Mai ia te A’u ia ua faatumulia i anotusi faaoaina faapitoa ma e aofia ai fuaitau eseese o le atamai i aoaoga faavae. Ina ia faapaleni le atamai i aoaoga faavae o se aafiaga faalevaiaso i vaiaso o loo i ai ni poloka faaoaina faapitoa, atonu e te manao e faatulaga lesona i le taiala o le fua saoasaoa ina ia amata ona suesue e tamaiti aoga le poloka mau i le seminare i le vaiaso a o lei oo mai i le faasologa o le Sau, Mulimuli Mai ia te A’u pe faaauau pea ona suesue i ai i le vaiaso o loo sosoo ai.

Peitai, o nei tulaga, e tatau ona seasea tupu. E tatau i tamaiti aoga ona suesue i le poloka mau lava e tasi i le seminare o loo latou suesueina i le fale faatasi ma le Sau, Mulimuli Mai ia te A’u.

Manatunatu i le Faasologa o le Aoga i le Lotoifale ma Talanoaina Manaoga Faalelotoifale

Ia aofia ai i le taiala fua saoasaoa ia aso malolo o aoga i le lotoifale ma isi malologa i le faasologa o aoga i le mea sili e te mafaia. Pe a puupuu se vaiaso i le seminare ona o le faasologa o aoga i le lotoifale, ia mautinoa o loo faamuamua pea le atamai i aoaoga faavae. I le aluga o nei vaiaso, e tatau ona e filifili po o a isi lesona o le a e faaaofia i le taiala o le fua saoasaoa. Atonu e manaomia lou toe iloiloina o faamatalaga o faamoemoega o lesona eseese i se vaaiga aoao faalevaiaso po o le vaavaaia foi o lesona lava ia e iloa ai po o a aafiaga o aoaoga o le a sili ona lelei mo tamaiti aoga.

Pe a fatuina le taiala o le fua saoasaoa, ia mautinoa e taulimaina manaoga o tamaiti aoga i la outou eria po o le polokalama. O loo i ai lesona tomua o loo aofia ai i luma o le tusi lesona a le faiaoga seminare lea e mafai ona faaaofia ai i se taiala o le fua saoasaoa i le aluga o le tausaga aoga. E le gata i lea, e mafai ona manuia tamaiti aoga mai isi ituaiga o aafiaga e aoao ai ia e le o aofia ai i le tusi lesona a le faiaoga. O nei aafiaga e ono aofia ai lesona e fesoasoani i tamaiti aoga e saunia ai pe manatunatu ai i se konafesi aoao talu ai nei po o se faigalotu a le autalavou. O nei ituaiga o gaoioiga e mafai ona tuuina i totonu o le taiala o le fua saoasaoa.

Tulaga e Aoao Ai

O loo i lalo ni faataitaiga se lua o tulaga e aoao ai e faapupula mai ai le auala e faaaoga ai nei taiala faatoa talanoaina pe a faia se taiala o le fua saoasaoa.

André Morales, o se Taitai Faamaopoopo

O tamaiti aoga i le itulagi lea e faamaopoopo ai e Brother Morales le polokalama o le seminare e amata aoga i le aso 6 o Mati. E amata ona ia saunia se taiala o le fua saoasaoa mo faiaoga o nei tamaiti aoga ina ia le tau saunia ai e faiaoga. E amata o ia i le tilotilo atu i le faasologa o le Sau, Mulimuli Mai ia te A’u e vaai ai po o le a le poloka mau o le a suesueina i lena vaiaso. Ua ia matauina mo le vaiaso o le aso 6 o Mati, o le poloka mau o le Mataio 9–10, Mareko 5, ma le Luka 9. Mo lena vaiaso i le tusi lesona a le faiaoga seminare na te vaaia ai lesona nei e lima:

Ua malamalama Brother Morales e toatele tamaiti aoga o le a fou i le seminare, o lea ua ia filifili ai e amata le semesa e ala i le pikiina o ni nai lesona mai anomea tomua i le Tusi Lesona a le Faiaoga Seminare o le Feagaiga Fou. Na te filifilia le “Faatomuaga i le Feagaiga Fou” ma le “Suesueina o Tusitusiga Paia.”

E lagona e Brother Morales le fiafia e uiga i nei lesona muamua e lua ae o loo tauivi ia iloa po o a isi lesona e tatau ona ia fuafuaina mo lenei vaiaso muamua. E tilotilo o ia i le pepa o faamatalaga o le vaaiga aoao faalevaiaso mo lenei vaiaso ma iloilo faamoemoega o lesona mo lesona taitasi. Na te lagona moni lava o le a maua e tamaiti aoga se aafiaga maoae i lesona e lua i le Mareko 5, ae ua ia iloaina foi e manaomia ona faailoa atu i tamaiti aoga le atamai i aoaoga faavae. O lea, na ia faaopoopo ai le lesona o le “Faatomuaga i le Atamai i Aoaoga Faavae”. Mo isi lesona e lua, sa tonu ia te ia e faaaofia uma lesona e lua i le Mareko 5. O le vaiaso muamua la i le taiala o le fua saoasaoa e foliga faapenei:

O le vaiaso e sosoo ai i le faasologa, ua vaai ai Brother Morales o loo i ai se fuaitau o le atamai i aoaoga faavae mo le Mataio 11:28–30.

E na te lagona e tatau ona malamalama lelei tamaiti aoga i mataupu faavae o le mauaina o le malamalama faaleagaga a o le’i maua le lesona o le fuaitau o le atamai i aoaoga faavae i le Mataio 11:28–30. Ua ia filifili e faatulaga uma lesona e tolu e uiga i le mauaina o le malamalama faaleagaga i le vaega muamua o lenei vaiaso. Ona ia faatulagaina lea o le lesona e faatatau i ai ma le lesona o le fuaitau o le atamai i aoaoga faavae e o faatasi i le Mataio 11:28–30.

Mo vaiaso taitasi e sosoo ai, na te filifili ai e mulimuli i le faasologa ua faatulagaina o lesona i le tusi lesona a le faiaoga, e i ai ma ni nai tuusaunoaga. E na te tilotilo i le faasologa o taimi o le Sau, Mulimuli Mai ia te A’u ma ia matauina ai e faapea, a o faia malologa o le taumafanafana ma sa le’i faia le seminare, ae e fa isi fuaitau o le atamai i aoaoga faavae sa suesueina. E manaomia pea ona ia faaaofia i le taiala o le fua saoasaoa lesona o fuaitau o le atamai i aoaoga faavae ma lesona e o faatasi faatatau o le talaaga mo na fuaitau e fa: Luka 2:10–12, Ioane 3:5, Ioane 3:16, ma le Mataio 5:14–16. Matau le auala na ia suia ai le isi lua vaiaso na sosoo ai ina ia mautinoa ai ua maua e tamaiti aoga fuaitau uma o le atamai i aoaoga faavae ma a latou lesona faatatau o le talaaga e fesootai i ai.

Ina ua uma ona faamae’a e Brother Morales le taiala o le fua saoasaoa e oo mai i lea taimi, ua ia matauina o le vaiaso a sau o le Eseta. O le tusi lesona a le faiaoga seminare e le o aofia ai soo se anotusi mo vaiaso o le Eseta po o le Kerisimasi o loo aofia i le Sau, Mulimuli Mai ia te A’u, o lea e mafai ai e Brother Morales ona faatulaga soo se lesona na te filifilia mo lenei vaiaso. E mafai ona ia filifili e faaaofia ai isi lesona atonu na misi e tamaiti aoga i le taumafanafana. Ua ia filifili e faatulaga i le aluga o lenei vaiaso ia lesona e lua o loo totoe o le fuaitau o le atamai i aoaoga faavae ma a la lesona e fesootai e faatatau i ai lea na aofia ai i le taimi o le malologa o le taumafanafana. O loo i ai pea ia te ia se isi vaega mo se lesona ma filifili e faaopoopo se lesona mai anomea tomua e lei faia lava e tamaiti aoga.

O lea la ua faaaofia e Brother Morales ia lesona uma o fuaitau o le atamai i aoaoga faavae ma lesona e faatatau i ai o le saoasaoa, e mulimuli o ia i le faasologa o lesona i le tusi lesona a le faiaoga. Mai lea taimi i lea taimi, e i ai vaiaso e i ai aso e leai ai se aoga. I le aluga o nei vaiaso, na te faamuamua lava aafiaga e aoao ai o le atamai i aoaoga faavae ma filifili ai po o le fea o isi lesona i le vaiaso e le o aofia ai i le taiala o le fua saoasaoa.

Ua mulimuli Brother Morales i lenei mamanu seia oo i nai vaiaso mulimuli o le afa muamua o le kosi. Faatasi ai ma le lua vaiaso o totoe, na te faaaofia ai le lesona o le “Atamai i Aoaoga Faavae: Iloiloga 1 Toeiloilo” e sui ai se iloiloga o le atamai i aoaoga faavae. O le vaiaso e sosoo ai, o le vaiaso mulimuli lea o le afa muamua o le kosi, na te filifili ai e faatulaga le lesona o le “Atamai i Aoaoga Faavae: Iloiloga 1”. Na te faatulagaina i le amataga o le vaiaso ina ia maua e tamaiti aoga ni nai aso e ave ai pe afai e i ai se tasi e le’i aoga i le aso na faia ai pe manaomia ona toe faia.

Stacie Richards, o se Puleaoga o le Seminare i le Taimi o Aoga

O le semesa lona lua o le tausaga aoga i le eria o loo faiaoga ai Sister Richards ma lana vaega o faiaoga e faiaoga ai mai le aso 3 o Ianuari e oo i le aso 27 o Me. Ona faamalolo lea o tamaiti aoga mo le malologa o le taumafanafana seia oo i le aso 22 o Aokuso.

Ua mafai e Sister Richards ona fatuina se taiala o le fua saoasaoa e iai ni eseesega itiiti mai le auala ua faatulagaina ai le tusi lesona a le faiaoga mo le vaega muamua o le semesa. Peitai, a o ia faatusatusaina le faasologa o taimi a le aoga i le fua saoasaoa i le Sau, Mulimuli Mai ia te A’u, sa ia matauina o le a i ai tamaiti aoga i le malologa o le taumafanafana lea e lua fuaitau o le atamai i aoaoga faavae o loo aofia ai i le afa muamua o le mataupu aoaoina ua faatulagaina ai. O nei fuaitau o le Ioane 17:3 ma le Luka 24:36–39. Talu ai o se tasi o faamoemoega o le atamai i aoaoga faavae o le faafesootaia lea o le va o mea o le a misi e tamaiti aoga pe a le o a’e ai le aoga, ua ia filifili ai e sue se nofoaga e faaaofia ai nei fuaitau i le taimi o le semesa o i ai nei. Ua ia iloa foi e manaomia ona ia faatulagaina le “Atamai i Aoaoga Faavae: Iloiloga 1 Toeiloilo” ma lesona o le “Atamai i Aoaoga Faavae: Iloiloga 1” a o le’i tuua e tamaiti aoga mo le malologa o le taumafanafana.

Ina ia mafai ona faia nei fetuunaiga, ua tonu ia te ia e amata i le vaiaso faaiu o le semesa ma galue agai i tua seia oo ina mafai ona ia galue i le iloiloga, toeiloilo le iloiloga, lesona o le atamai i aoaoga faavae ma a latou lesona e faatatau i ai, ma soo se isi lava lesona e manaomia. Ua ia filifili e le aoao atu le lesona o le “Atamai i Aoaoga Faavae: Iloiloga 1” i le aluga o le vaiaso faaiu o le semesa ona o le mafai ona fetuunai faasologa o taimi o le aoga ma le toatele o tamaiti aoga e ono le aooga ai i lena vaiaso. O le mea lea, o le vaiaso faaiu, ua tuu ai e pei ona faatulagaina ai.

O le iloaina e tatau ona aoaoina le lesona o le “Atamai i Aoaoga Faavae: Iloiloga 1 Toeiloilo” a o le’i faia le lesona o le iloiloga, ua tonu ai ia Sister Richards e tuu e avea ma lesona muamua o le vaiaso lona lua i le vaiaso mulimuli o le semesa ma tuu ai le lesona o le iloiloga e avea lesona faaiu o le vaiaso. O lenei mea o le a mafai ai e tamaiti aoga i ni nai aso ona suesue i fuaitau ia atonu latou te le o masani tele ai pe a mae’a le toe iloiloga.

Ona ia filifili lea o le toe iloiloga o le a sili ona aoga pe a uma ona suesueina e tamaiti aoga ia lesona uma o fuaitau o le atamai i aoaoga faavae. E ala i le sii atu o le lesona o le atamai i aoaoga faavae o le Mataio 22:36–39 faatasi ma lana lesona e faatatau i ai i le faaiuga o le vaiaso ua tuanai, ua mafai ai ona ia faataunuuina lenei faamoemoega a o tuu ai ni nai aso i le va o toeiloiloga ma le iloiloga.

Ona vaai lea o Sister Richards i se avanoa e tuu ai i totonu le lesona o le atamai i aoaoga faavae o le Ioane 17:3 faatasi ai ma lana lesona e faatatau i ai o le taiala o le fua saoasaoa. O nei lesona na muai faatulagaina ina ia aoaoina i le taimi o le malologa o le taumafanafana. Ina ua uma ona faitauina faamoemoega o lesona taitasi o loo totoe mo le vaiaso, sa ia filifili e tuu ai pea lesona e tolu na ia lagonaina e sili ona manaomia e tamaiti aoga i lana eria. Sa ia le vaaia le manaomia ona faia soo se suiga i le vaiaso o le 24-30 Aperila.

Sa iloa e Sister Richards e na o le toe tasi lava le lesona o le fuaitau o le atamai i aoaoga faavae o loo totoe, Luka 24:36–39, lea e manaomia pea ona tuu i totonu. E masani foi ona aoaoina i le taimi o le malologa o le taumafanafana. Sa ia matauina o le vaiaso o 17–23 Aperila o loo i ai se lesona e toe iloilo o le atamai i aoaoga faavae lea e mafai ona suia i le lesona o le Luka 24 . Ae a o faaauau pea ona ia vaai atu i le faasologa o taimi, sa ia matauina ai e le’i i ai ni lesona faatulagaina o le vaiaso o le Eseta.

O le iloaina o le lesona o le atamai i aoaoga faavae o le Luka 24 , faatasi ai ma lana lesona e faatatau i ai, o le a fetaui lelei mo le vaiaso o le Eseta, ua tonu ai ia te ia e tuu i ai iina. Ona ia tilotilo lea i isi lesona o le a misi e tamaiti aoga i le taimi o a latou malologa o le taumafanafana ma filifili ai e faapea o lesona aupito sili ona taua e mafai ona ia aoao atu mai na lesona o lesona ia o loo aoao mai e uiga i mafatiaga o le Faaola i Ketesemane, Lona Faasatauroga, ma molimau o Lona Toetu. Na te faamae’aina le faasologa o taimi mo le vaiaso o le Eseta e ala i le tuuina atu i totonu o na lesona.

E ala i le filifilia o lesona sa ia filifili, sa mafai ai e Sister Richards ona faamuamua le atamai i aoaoga faavae mo tamaiti aoga faapea foi ma le tuuina atu i tamaiti aoga o ni aafiaga taua na aoao mai ai lea e taulai atu i le Faaola i le gasologa o le vaiaso o le Eseta.

Mo le vaega o totoe o le semesa, sa mafai ona ia faatulagaina lesona ina ia mafai ona latou mulimuli ai i le faasologa o loo i le tusi lesona a le faiaoga.