Aoaoga mo Iloiloga

O le Iloiloga o se vaega taua o le aoaoina. Sa faamamafa mai e Elder David A. Bednar o le Korama a Aposetolo e Toasefululua le taua o le iloiloga, i le ituaiga o suega, i le faagasologa o le aoaoina.

Ae o suega i lea taimi ma lea taimi e matuai taua lava i le aoaoina. O se su’ega lelei, e fesoasoani ia i tatou e faatusatusa ai mea tatou te manaomia ona iloa i mea ua tatou iloa moni e uiga i se mataupu patino; e saunia ai foi se fua e mafai ona tatou iloilo fua i ai lo tatou aoaoina ma le atina’ega.

E faapena foi, o suega i le a’oga o le olaga faaletino o se elemene taua o lo tatou alualu i luma e faavavau. Peitai, e mataina lava, o le upu suega e le o maua e oo lava i le faa-tasi i anotusi o tusitusiga paia o tusitusiga faavae i le Faaperetania. Ae, o upu e pei o le tofotofo, suesueina, ma le taumafai o loo faaaoga e faamatala ai mamanu eseese o le faapupulaina faalelei o lo tatou iloa faaleagaga e uiga i ai, malamalama i ai, ma le tuuto i le fuafuaga e faavavau o le fiafia a lo tatou Tama Faalelagi ma lo tatou gafatia e saili atu mo faamanuiaga o le Togiola a le Faaola. (David A. Bnar, “O le a Tatou Tofotofoina ai i Latou,” Liahona, Nov. 2020, 8)

O iloiloga masani i le seminare e mafai ona fesoasoani i tamaiti aoga e faaalia ai lo latou malamalama faaleagaga, malamalama, ma le tuuto atu i le Tama Faalelagi ma Iesu Keriso. O nei ituaiga faavasegaga o iloiloga e mafai ona fesoasoani i tamaiti aoga ia nofouta atili ai i mea o loo latou aoaoina ma le auala o loo latou tuputupu ae ai.

O lenei iloaina e mafai ona avea o se aafiaga tauia ma faaosofia ma e mafai ona valaaulia atili ai faaaliga faaletagata lava ia i olaga o tamaiti aoga. E mafai foi ona fesoasoani i tamaiti aoga e fatufatu ai ni fuafuaga mo le tuputupu a’e ma le aoaoina i le lumanai. O nisi o faataitaiga o gaoioiga o le iloiloga i mataupu aoaoina a le seminare e aofia ai lesona o le “Iloilo Lou Aoaoina”, lesona o le atamai i aoaoga faavae (e aofia ai iloiloga o le atamai i aoaoga faavae), ma iloiloga o le aoaoina mo afa taitasi o le kosi.

Lesona o le “Iloilo Lou Aoaoina”

Mai lea taimi i lea taimi i le mataupu aoaoina a le seminare, o le a e maua ai lesona o le “Iloilo Lou Aoaoina”. O nei lesona ua faatulagaina pe a ma le tai fa i le ono vaiaso ma tuuina atu ai i tamaiti aoga se avanoa e toe manatunatu ai ma le toto’a i lo latou aoaoina. E patino lava, o nei lesona e maua ai e tagata aoga ni avanoa e faamalamalama ai le aoaoga faavae sa latou aoaoina i le kosi; mafaufau i o latou lagona, uiga faaalia, ma manaoga e faatatau i le fuafuaga a le Tama Faalelagi ma le talalelei a Iesu Keriso; ma iloilo fuafuaga po o sini o loo latou galulue ai ina ia faalolotoina lo latou avea ma soo ma lo latou liua ia Iesu Keriso. O le faatinoga a tamaiti aoga i nei iloiloga e le o faamaumauina aloaia e pei o iloiloga o le atamai i aoaoga faavae. O nei iloiloga ua fausia ua faamoemoeina mo le manuia o tamaiti aoga lava ia.

E ui lava o le tamaititi aoga e nafa ma le iloiloina o lona lava aoaoina i nei lesona, ae e mafai foi e isi ona fesoasoani. E i ai se matafaioi taua a le Agaga Paia e fesoasoani ai i tamaiti aoga e iloilo i latou lava. E leai se isi soa e sili atu nai lo le Agaga Paia e fesoasoani i tamaiti aoga ia iloa manino le auala latou te aoao ma tuputupu ae ai ma le auala e mafai ai ona latou faaauau pea ona faaleleia.

E mafai e tagata o le vasega ona fesoasoani i a latou lava tupulaga e iloilo lo latou aoaoina, ma e mafai foi e oe o se faiaoga. A faamatala mai e tamaiti aoga le aoaoga faavae, atonu o se taimi lelei lea e galulue faatasi ai tamaiti aoga e faataitai le faamalamalamaina po o le faatinoina. I le avea ai ma se faiaoga, atonu o oe o se punaoa lelei e tuuina atu ni manatu faaalia i se tamaitiiti aoga i le alualu i luma o loo latou faia pe o tauivi e fai. E mafai ona e mafaufau i ni manatu pe faasoa atu ni aafiaga mai lou lava olaga e fesoasoani ai i se tamaitiiti aoga. Peitai, ia manatua, e le tatau ona avea o se faamoemoega le lipoti mai e tamaiti aoga o a latou sini po o fuafuaga ia te oe. O nisi o nei sini ma fuafuaga e mafai ona patino tele i le tagata lava ia. Afai e lagona e se tamaitiiti aoga le toafimalie e faailoa atu a latou fuafuaga po o sini ia te oe, fefautuaai faatasi ma i latou, ae ia iloa foi le taimi e tatau ona toe faasino atu ai se tamaitiiti aoga i o latou matua po o lo latou epikopo po o le peresitene o le paranesi.

Fatuina o se Gaoioiga o le Iloiloga mo se Lesona o le “Iloilo Lou Aoaoina”

E i ai taimi, e manaomia ai ona e fetuunaia lesona o le “Iloilo Lou Aoaoina” e ala i le fatuina o se gaoioiga fou o le iloiloga. Ona o faatulagana o aoga, atonu sa i ai se lesona e lei suesueina e tamaiti aoga o se lesona o le “Iloilo Lou Aoaoina” i le mataupu aoaoina a le seminare lea e aumai mai ai. Pe atonu foi sa i ai se lesona sa sili ona anoa mo tamaiti aoga e le o talanoaina e se lesona “Iloilo Lou Aoaoina”. I tulaga nei, e manaomia ona e suia se tasi o gaoioiga i le lesona o le “Iloilo Lou Aoaoina” i se tasi e te fatuina e iloilo ai le malamalama o le tagata aoga po o le alualu i luma i lena autu.

O laasaga nei e mafai ona fesoasoani ia te oe e fatu ai se gaoioiga aoga o le iloiloga.

Laasaga 1: Amata e ala i le faailoaina o se lesona e te manao e toe tulitatao. O le a le ituaiga o taunuuga na taulai i ai le lesona?

Pe na taulai atili atu i mea ua iloa ma malamalama i ai tamaiti aoga? Pe na tuu ai se faamamafa sili atu i lagona, uiga faaalia, po o manaoga o tamaiti aoga? Pe atonu foi e tele ina taulai atu i amioga a tamaiti aoga? O le iloaina o le ituaiga o taunuuga e te manao e fesoasoani i tamaiti aoga ia ausia, e mafai ona fesoasoani ia te oe e fatu ai se aafiaga talafeagai o le iloiloga.

Laasaga 2: Mafaufau po o le a se mea e mafai ona fai e tamaiti aoga e fesoasoani ai ia i latou ia iloa lo latou tuputupu a’e ma le aoaoina. Manatua e le o se mea lenei e manaomia e tamaiti aoga ona faaali atu ia te oe po o isi tamaiti aoga. E manaomia lava le avea ma se mea e fesoasoani ia i latou e iloa ai lo latou lava alualu i luma i lo latou aoaoina. O faataitaiga e mafai ona aofia ai mea nei:

• Taunuuga o le iloa ma le malamalama: E mafai e tamaiti aoga ona aoao atu pe faamalamalama se manatu faaleaoaoga faavae a le o le faaupuina po o le tusitusi. O se mea lenei e mafai o se tali atu i se tulaga e ono tupu e faataitai ai e tamaiti aoga ona faamalamalama le aoaoga faavae.

• Lagona, uiga faaalia, po o taunuuga o manaoga: E mafai e tamaiti aoga ona toe iloilo se iloiloga a le tagata lava ia mai se lesona talu ai ma faatusatusa a latou tali i le taimi nei i tali na latou tuuina mai ina ua latou suesueina muamua le lesona. Atonu o se tusiga i le api talaaga latou te iloiloina po o se suesuega na latou faamae’aina na latou tali atu ai pe na toe faamae’a ina ia iloa ai ni eseesega.

• Taunuuga o le amio: E mafai e tamaiti aoga ona iloilo mea na latou lagonaina le uunaiga e fai po o le fuafuaga na latou fatuina o se vaega o se lesona. Ona mafai lea ona latou mafaufau pe na faapefea ona latou faatinoina le uunaiga po o le faatinoina o le fuafuaga. E mafai e ni nai tamaiti aoga naunautai ona faasoa mai o latou aafiaga pe afai e le patino tele ia i latou lava. E mafai foi ona latou faaalia i le vasega nisi o amioga e manaomia, e pei o le faaaogaina o le polokalama o le Gafa o le Aiga i le FamilySearch po o le faaalia o se tomai mo le suesueina o tusitusiga paia.

Laasaga 3: Fatu se aafiaga e aoao ai lea e mafai ai e tamaiti aoga ona vaai pe o faapefea lo latou tuputupu a’e ma le aoaoina. Saili ni auala e faia ia manaia ma faafiafiaina ai ma tuuina atu ai le tele o le taimi mo tamaiti aoga e manatunatu ai ma iloilo lo latou tuputupu a’e. O nisi tamaiti aoga atonu e le fiafia i lo latou tuputupu a’e i le taimi nei. Fatu ni avanoa e le taitai atu ai tamaiti aoga e faatusatusa lo latou tuputupu a’e i isi. E tatau ona tele se taimi o tamaiti aoga e saili ai le fesoasoani mai lo latou Tama i le Lagi e ala i le Agaga Paia ia iloa ai mea o loo lelei ona latou faia ma pe mafai faapefea ona latou faaleleia atili. E tatau ona malamalama tamaiti aoga o nei iloiloga e le tatau lava ona vaaia o se tulaga faaiu. Nai lo lena, e tatau ona uunaia i taimi uma tamaiti aoga e mafaufau po o le a le isi laasaga e sosoo ai i lo latou aoaoina.

Iloiloga o le Atamai i Aoaoga Faavae

E lua iloiloga atoatoa i le seminare e maua ai se avanoa mo tamaiti aoga e faaalia ai le atamai i aoaoga faavae. Ua faamaumauina le faatinoga a tamaiti aoga i nei iloiloga e lua. E ui e manaomia e tamaiti aoga ona pasi uma nei iloiloga ina ia maua ai togi o le seminare mo le tausaga aoga, ae e mafai ona latou aveina i le tele o taimi latou te mananao ai. E tatau foi i faiaoga ona faia ni fetuunaiga talafeagai, i le mae’a ai ona fefautuaai ma matua e uiga i manaoga o tamaiti aoga, mo le auala e faamae’a ai e tamaiti aoga nei iloiloga. Fetuunai nei iloiloga po o auala e mafai ai e tamaiti aoga ona faauma pe a manaomia.

O loo aofia ai i le faaopoopoga o le tusi lesona a le faiaoga ni iloiloga se lua o le iloiloga o le atamai i aoaoga faavae. O aafiaga nei i le potuaoga ua mamanuina e fesoasoani ai i tamaiti aoga e iloilo faatasi e sauniuni ai mo iloiloga o le aoaoina. O nei iloiloga e tatau ona faia pe a potopoto faatasi tamaiti aoga a le o le initoneti po o le faafesagai faaletagata.

Faaiuga

Mafaufau i faamanuiaga o le fesoasoani i tamaiti aoga e iloilo e le aunoa a latou aoaoga. O le tuuina atu i tamaiti aoga o se avanoa e faamatala ai le aoaoga faavae; mafaufau i o latou lagona, uiga faaalia, ma manaoga; ma iloilo fuafuaga po o sini o loo latou galulue ai o le a fesoasoani ia i latou i a latou taumafaiga ia avea atili e faapei o Iesu Keriso. O lesona o iloiloga e maua ai foi se avanoa mo le Agaga Paia e musuia ai tamaiti aoga e ala i le fesoasoani ia latou lagonaina mea o loo lelei ona latou faia ma uunaia i latou ia faaleleia atili. O nei lesona e taua ma e tatau ona aoao atu e le aunoa.