O Le Folafolaga o le Toefuataiga

O Le Folafolaga o le Toefuataiga

Vaaiga Aoao

I le taimi o Lana galuega i le olaga nei, sa faatuina ai e le Faaola Lana Ekalesia i luga o le fogaeleele ma valaauina Ana Aposetolo e ta’ita’ia. Na iu lava ina fasiotia Aposetolo, lea na oo atu ai i se vaitaimi ua ta’ua o le Liliuese Tele. Na amata e le Tama Faalelagi ma Iesu Keriso le faagasologa o le toefuataiina o le talalelei i le lalolagi e ala lea i le faaali atu i le Perofeta o Iosefa Samita i le 1820. Sa faamanatuina le 200 tausaga o le Uluai Faaaliga i le 2020 i le “O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Selau Tausaga i le Lalolagi.” Sa faamaumauina e Iosefa Samita faaaliga na ia maua mai le Alii, ma o le tele o na faaaliga o loo maua i le Mataupu Faavae ma Feagaiga, lea e avea o se molimau o loo fetalai mai Iesu Keriso i o tatou aso.

Uunaia se faiga masani o le suesue i tusitusiga paia i aso taitasi. E itiiti ni mea o le a i ai se aafiaga sili ona mamana ma tumau mo le manuia i olaga o tamaiti aoga nai lo o le fesoasoani ia i latou e aoao ia fiafia i tusitusiga paia ma suesue i ai i aso uma. O se tasi o auala e faia ai lenei mea o le valaaulia lea o tamaiti aoga e faatu se sini faitautusi ma fai se fuafuaga patino e suesue ai i aso taitasi. Mo nisi faamatalaga i le ala na faia ai e le Faaola lenei mea, tagai i le vaega “Na Uunaia e le Faaola Isi ia Iloa o Ia e ala i le Suesueina o Lana Upu” i le Aoao Atu i le Ala a le Faaola: Mo I Latou Uma O E Aoao Atu i le Aiga ma i le Ekalesia (2022). E mafai foi ona e vaai i se faataitaiga o le auala e faia ai lenei mea i le lesona i lenei vaiaso ua faaautuina “Faatomuaga i le Mataupu Faavae ma Feagaiga.”

Sauni e aoao atu

O lenei faamatalaga e tuuina atu ai ia te oe ni manatu o mea atonu e manaomia ona muai saunia mo lesona taitasi.

O Le Liliuese Tele

Faamoemoega o le lesona: O lenei lesona ua faamoemoe e fesoasoani i tamaiti aoga ia malamalama i le manaomia o se toefuataiga o le Ekalesia moni a Iesu Keriso i aso e gata ai.

• Sauniuniga a le tamaitiiti aoga: Valaaulia tamaiti aoga e sue le uiga o le liliuese e faaaoga ai le polokalama feaveai o le Gospel Library po o isi punaoa o loo avanoa mo i latou. Faamalosi’au ia i latou e o mai sauni i le vasega e faasoa mai mea ua latou a’oa’oina.

“O Le Toefuata’iga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Selau Tausaga i le Lalolagi”

Faamoemoega o le lesona: O lenei lesona ua faamoemoe e fesoasoani i tamaiti aoga ia lagona le moni ma le taua o le Toefuataiga faifai pea o le talalelei a Iesu Keriso.

• Sauniuniga a le tamaitiiti aoga: Fai i tamaiti aoga e o mai sauni e faasoa mai faamanuiaga o le talalelei toefuataiina a Iesu Keriso e sili ona aoga ia i latou.

• Vitio: “O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Selau Tausaga i le Lalolagi” (9:24; matamata mai i faailo taimi 0:00 i le 2:21)

Faatomuaga i le Mataupu Faavae ma Feagaiga

Faamoemoega o le lesona: O lenei lesona ua faamoemoe e fesoasoani i tamaiti aoga ia saunia e aoao ia iloa atili le Faaola a o amataina la latou suesuega o le Mataupu Faavae ma Feagaiga.

• Sauniuniga a le tamaitiiti aoga: Mafaufau e valaulia tamaiti aoga e faailoa mai nisi o fuaitau e sili ona latou fiafia i ai mai le Mataupu Faavae ma Feagaiga ma sauni e faamalamalama mai pe aisea e taua ai na fuaitau ia i latou.