“Lesona 2—O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Selau Tausaga i le Lalolagi,” Tusi Lesona a le Faiaoga Seminare o le Mataupu Faavae ma Feagaiga (2025)
“O Le Toefuata’iga o le Atoatoaga o le Talalelei a Iesu Keriso,” Tusi Lesona a le Faiaoga Seminare o le Mataupu Faavae ma Feagaiga
Lesona 2: Folafolaga o le Toefuataiga
“O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Selau Tausaga i le Lalolagi”
I le aso 5 Aperila, 2020, na faitau ai e Peresitene Russell M. Nelson “upu o le folafolaga mamalu ma paia” (“Faalogo ia te Ia,” Liahona, Me 2020, 90) e faamanatu ai le 200 tausaga o le Uluai Faaaliga. O lenei folafolaga na faamaumauina i totonu o le “O Le Toefuataiga o le Atoatoaga o le Talalelei a Iesu Keriso: O Se Folafolaga o le Lua Selau Tausaga i le Lalolagi” (ChurchofJesusChrist.org). O lenei lesona e mafai ona fesoasoani i tagata aooga ia lagonaina le moni ma le taua o le Toefuataiga faifai pea o le talalelei a Iesu Keriso.
Gaoioiga E Ono Mafai Ona Aoao Ai
Faamanatuina o tagata maoae po o mea na tutupu
O le faamanatuina o se tagata po o se mea na tupu o lona uiga o le faaali atu o le lotofaafetai, ava, ma le faaaloalo. E masani ona faia lenei mea e ala i le faia o se mea e fesoasoani e manatua ai le tagata po o se mea na tupu.
Mafaufau e talanoaina mea na tutupu ma tagata na faamanatuina. E mafai ona e faaali atu ni ata o maa faamanatu i la outou nofoaga e faamanatu ai mea na tutupu po o tagata atonu e masani ai au tamaiti a’oga. E mafai ona e valaaulia tagata aooga e faasoa mai po o a mea latou te iloaina pe na asiasi i ai.
Ina ia fesoasoani i tagata aooga e fesootai i se tulaga faaletagata lava ia, e mafai foi ona e valaaulia i latou e mafaufau e uiga i mea tetele na tutupu i o latou aiga valalata po o aiga potopoto. Fai atu ia i latou e faasoa mai ni manatu e uiga i mea latou te ono faia pe afai e talosagaina i latou e fausia se mea e faamanatu ai se tasi o nei mea na tutupu.
Manatua ina ua mavae le maliliu ai o Aposetolo a Iesu Keriso, sa i ai se vaitaimi sa ta’ua o le Liliuese Tele. O se taimi lea e le i ai le talalelei a Iesu Keriso ma le pule o le perisitua i luga o le fogaeleele. I le tautotogo o le 1820, na amatalia ai e le Tama Faalelagi ma Iesu Keriso le Toefuataiga o le talalelei i le lalolagi ina ua La faaali mai ia Iosefa Samita.
I le 2020, ina ia faamanatuina le 200 tausaga o le Uluai Faaaliga a Iosefa Samita, na tusia ai e le Au Peresitene Sili ma le Korama a Aposetolo e Toasefululua se folafolaga. Ua ta’ua “O le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Selau Tausaga i le Lalolagi.” Na saunoa Peresitene Russell M. Nelson e uiga i lenei mea:
Sa matou mafaufau pe tatau ona faatu se ma’a faamanatu. Ae a o matou iloiloina le tulaga ese faasolopito ma aafiaga faavaomalo o lena Uluai Faaaliga, sa matou lagonaina le uunaiga e fatu se ma’a faamanatu e le o se karanite po o se ma’a ae o upu—upu o folafolaga mamalu ma paia—e tusia, e lē vaneina i “papatusi maa” ae ia vaneina i “papatusi aano” o o tatou loto. (Russell M. Nelson, “Faalogo ia te Ia,” Liahona, Me 2020, 90)
Mafaufau e valaaulia tagata aooga e mafaufau e uiga i mea ua latou iloa e uiga i le Uluai Faaliga a Iosefa Samita ma pe aisea e ono aoga ai le faamanatuina mo i latou lava ia. E mafai e ni nai tagata aooga naunau ona faasoa mai i le vasega a latou tali.
Su’esu’e le folafolaga o le Toefuataiga
Faaali atu i tagata aooga le mea e mafai ona latou maua ai le folafolaga o le Toefuataiga i a latou api talaaga mo suesuega po o totonu o le polokalama o le Gospel Library. E mafai foi ona e saunia se kopi pepa o le folafolaga. I le vasega atoa, valaaulia tagata aooga e faailoga vaega o le Toefuataiga latou te manatu e aoga ona faamanatuina.
O se tasi o auala e matauina ai faamanuiaga ua faaavanoaina e le Atua ia te oe o le faia lea o se lisi. E mafai ona e lisiina upu po o fasifuaitau e faamatala ai mea na toefuatai mai. Ona mafaufau lea po o a faamanuiaga ua e fiafia ai nei, pe o le a fiafia ai i le lumanai, ona o mea na toefuatai mai e le Atua.
Ia faataga tagata aooga e suesue le folafolaga mo ni nai minute. Fai atu ia i latou e fai se lisi o upu po o fasifuaitau i luga o le laupapa latou te manatu e taua. Filifili nisi ma fai atu i tagata aooga e faamatala mai pe aisea latou te manatu e taua ai na upu.
-
O a upu po o fasifuaitau e fesoasoani ia te oe e iloa ai le mea na toefuatai mai e le Atua?
-
O fea o nei faamanuiaga toefuataiina e sili ona taua ia te oe? Aisea?
Faaalu sina taimi e mafaufau loloto ai po o a mea e fesoasoani ai nei faamanuiaga toefuataiina ia te oe e malamalama ai e uiga i le Tama Faalelagi ma Iesu Keriso.
-
O a nisi upumoni ua fesoasoani ai lenei folafolaga ia te oe e faailoa e uiga ia i Laua?
E faamoemoe o le a faailoa mai e tagata aooga le tele o upumoni eseese. Faataga i latou e faasoa mai. O upumoni nei e lua e mafai ona e faamamafaina: Na amata e le Tama Faalelagi ma Iesu Keriso ona toefuatai mai le atoatoaga o le talalelei e ala i le Perofeta o Iosefa Samita, ma o loo faaauau pea le Toefuataiga o le talalelei a Iesu Keriso i o tatou aso.
Faamanatu faamanuiaga o le Toefuataiga
Filifili se elemene se tasi o le Toefuataiga e faapitoa ona e faafetai ai. Mafaufau i mea e mafai ona e faia e faamanatu ai lenei faamanuiaga mai le Atua pe faasoa atu i isi. Manatua o le faamanatu o lona uiga o le faaali atu o le lotofaafetai, ava, ma le faaaloalo.
Tuu atu i tagata aooga se taimi i le vasega e filifili ai ma galulue i se auala se tasi e faamanatu ai se faamanuiaga o le Toefuataiga. Ina ia fesoasoani i tagata aooga, e mafai ona e tusia ni nai filifiliga e pei o mea nei i luga o le laupapa. E mafai foi e tagata aooga ona mafaufau i a latou lava auala.
-
Amata ona tauloto se vaega o le folafolaga o le Toefuataiga.
-
Tusi se manatu faaleagaga puupuu e uiga i se vaega se tasi o le Toefuataiga e faasoa atu i lou aiga.
-
Fai se faasalalauga i luga o ala o faasalalauga faaleagafesootai e faasoa atu ai lou agaga faafetai mo se faamanuiaga o le Toefuataiga.
-
Tusi i lalo sau molimau o le Toefuataiga o le talalelei a Iesu Keriso. E mafai ona e faasoa atu lau molimau i se sauniga a le Ekalesia o loo loma nei.
Mafaufau ia lava se taimi e tuu i le faaiuga o le vasega e faataga ai tagata aooga e faasoa atu i se paga mea sa latou faia pe o loo galulue ai. E mafai foi ona e valaaulia nai tagata aooga e faasoa mai i le vasega atoa.