Lesona 1: Folafolaga o le Toefuataiga

O Le Liliuese Tele

O Le Manaomia mo se Toefuataiga o le Ekalesia a le Faaola

Na faavaeina e Iesu Keriso Lana Ekalesia i le taimi o Lana galuega i la le tino. Ina ua mavae Lona maliu ma le Toetu, sa poloaiina ai e le Faaola Ana Aposetolo e ta’ita’i le Ekalesia i Lana pule ma ki o le perisitua. Ona o le malosi o sauaga ma le maliliu ai o Aposetolo, sa tuua ai tagata e aunoa ma se taitaiga faalelagi mai perofeta soifua. Na suia aoaoga ma aoaoga faavae a Iesu Keriso, ma taunuu ai i se vaitaimi na ta’ua o le Liliuese Tele. O lenei lesona e mafai ona fesoasoani i tagata aooga ia malamalama i le manaomia o se toefuataiga o le Ekalesia moni a Iesu Keriso i aso e gata ai.

Gaoioiga E Ono Mafai Ona Aoao Ai

O le ola ai a o lumanai le Toefuataiga

Mafaufau e valaaulia tagata aooga e talanoaina le fesili lea faatasi ma se paga po o se vaega toaitiiti. E mafai foi ona e fai atu i tagata aooga e talanoaina nisi fesili auiliili, e pei o mea atonu sa latou faia mo galuega ma faafiafiaga, i mea atonu sa latou nonofo ai, pe mata o a foliga o o latou fale, ma ituaiga o meaai atonu na latou aai ai.

E mafai foi ona e faaaogaina gaoioiga faaopoopo e aoao ai “Vaai faalemafaufau i le lē mautonu faalelotu i le taimi o le Liliuese Tele” i le taimi o lenei vaega o le lesona.

Manatu faalemafaufau e faapea sa e ola i le tausaga e 1800 nai lo o aso nei.

• Faamata o le a se eseesega e i ai lou olaga?

  Faamalamalama atu o se tasi o eseesega o le ola lea e aunoa ma le talalelei a Iesu Keriso i luga o le fogaeleele. Ina ia fesoasoani i tagata aooga e mafaufau pe faape’i lenei mea, mafaufau e fai atu i ai fesili e pei o nei:

• Mata na faape’i lou sootaga ma le Tama Faalelagi ma Iesu Keriso?

• O a ni fesili po o ni atugaluga atonu sa ia te oe?

O Le Liliuese Tele

Ina ia fesoasoani i tagata aooga ia malamalama i nisi o mea na tutupu ia sa taitai atu ai i le Liliuese Tele, e mafai ona e valaaulia i latou e faasoa mai mea ua latou iloa e uiga i nei mea na tutupu pe faaaoga nisi o aotelega nei. E mafai foi ona e faaaogaina le vitio “Toefuataiga o le Ekalesia a Keriso” mai le faailo taimi 0:32 i le 2:08. O loo maua lenei vitio i le ChurchofJesusChrist.org.

E tupu le liliuese pe a fulitua tagata mai le aoaoga faavae moni o le talalelei ma teena auauna faatagaina a le Alii. O se tasi vaitau o le liliuese na tupu ina ua mavae le vaitau o le Feagaiga Fou, ina ua uma ona faatuina e le Faaola Lana Ekalesia ma poloaiina Ana Aposetolo e taitaia.

“Ina ua mavae le maliu o le Faaola ma Ana Aposetolo, na faaleagaina e tagata ia mataupu faavae o le talalelei ma faia ni suiga e le’i faatagaina i le faatulagaga o le Ekalesia ma sauniga le perisitua. Ona o le salalau tele o lenei liliuese, o lea sa aveesea ai e le Alii le pule o le perisitua mai le lalolagi” (Autu ma Fesili, “Liliuese,” topics.ChurchofJesusChrist.org).

Faitau mau nei, ma vaavaai tulaga sa i ai i le lalolagi i le taimi o le Liliuese Tele.

• Amosa 8:11–12

• 2 Nifae 26:20

• Mataupu Faavae ma Feagaiga 1:15–16

• Mataupu Faavae ma Feagaiga 112:23

E mafai e tagata aooga ona suesue taitoatasi i nei fuaiupu pe faatasi ma se vaega. E mafai foi ona e tofia vaega taitasi e suesueina se seti se tasi o fuaiupu ma faasoa atu i le vasega mea na latou mauaina.

Faaaoga fesili e pei o nei e talanoaina ai mea na aoaoina e tagata aooga mai nei fuaiupu. I le avea ai ma se vaega o lenei talanoaga, atonu e taua le faamalamalama atu faapea e ui lava sa lei i ai le Ekalesia a le Faaola ma le pule i le lalolagi i le taimi o le Liliuese Tele, sa toatele pea tagata sa ola i lena taimi o e sa alolofa i le Atua ma taumafai e mulimuli ma le faamaoni ia te Ia e tusa ai ma le malamalama sa ia i latou.

• O a nisi o upu po o fasifuaitau na e maua e faamatala ai le tulaga o le lalolagi i le taimi o le Liliuese Tele?

• E mafai faapefea ona faatusatusa le lē mauaina o le talalelei moni a Iesu Keriso i se oge? O le a se mea o ofo mai e Iesu Keriso ma Lana talalelei e aumaia ai le ola ma le fafagaina i le lalolagi?

• Aisea e te manatu ai e taua le malamalama i le Liliuese Tele ma ona aafiaga?

I le tali atu i le fesili na muamua atu, atonu e fai mai tagata aooga i se mea e talitutusa ma le upumoni lenei:Sa tatau ona toefuata’i mai le aoaoga faavae ma le pule a Iesu Keriso e faatoilalo ai aafiaga o le Liliuese Tele. Mafaufau e tusi le upumoni lenei i luga o le laupapa.

O Le Toefuataiga o le talalelei a le Faaola

E tele taimi i le talafaasolopito o le lalolagi, ua fesoasoani ai le Tama Faalelagi i Ana fanau o e ua pauu atu i le liliuese e ala i le valaauina o perofeta e faatuina le upumoni ma folafola atu le talalelei. I lo tatou tisipenisione, sa Ia amatalia ai le Toefuataiga o le talalelei e ala mai i le Perofeta o Iosefa Samita (tagai Iosefa Samita—Talafaasolopito 1:15–20; Mataupu Faavae ma Feagaiga 1:17).

O le lesona e sosoo ai, “O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Selau Tausaga i le Lalolagi,” o le a tuuina atu ai i tagata aooga se avanoa e suesue atili ai e uiga i le Toefuataiga o le talalelei a le Faaola i aso e gata ai.

Ina ia fesoasoani i tagata aooga ia iloa le mamanu a le Atua e faamanuia ai Ana fanau i le talalelei pe a mavae vaitau o le liliuese, mafaufau e faaali le vitio “Dispensations: The Pattern of Apostasy and Restoration” (6:52), e maua i le ChurchofJesusChrist.org. Valaaulia ia tagata aooga e mafaufau e uiga i mea ua a’oa’oina ai i latou pe lagona e uiga i le Tama Faalelagi ma Iesu Keriso a o latou matamata i le vitio.

• O le a se mea ua e aoaoina e uiga i le Tama Faalelagi ma Iesu Keriso mai lo La’ua naunautaiga e toefuata’i mai le talalelei i le lalolagi i taimi o le liliuese?

• O le a se mea ua saunia e le talalelei toefuataiina a Iesu Keriso ua fesoasoani ia te oe e tuputupu ae ai faaleagaga?

Faamatala le Liliuese Tele ma le manaomia o le Toefuataiga

Ina ia fesoasoani i tagata aooga e faaalia lo latou malamalama i mea ua aoaoina ai i latou, mafaufau e faasoa atu le tulaga faataitai lenei ma tuu atu i tagata aooga se avanoa e tali atu i ai.

Vaai faalemafaufau e i ai sau uo e le o se tagata o le Ekalesia ae e fia iloa e uiga i ou talitonuga. Ina ua maea sina talanoaga, ua fai mai lau uo, “Pe ua e mafaufau ea pe aisea ua tele naua ai ekalesia Kerisiano i le lalolagi? Ou te le malamalama pe mafai faapefea e tagata ona filifili po o fea le ekalesia e auai atu ai ona ua tele naua.”

I lau apitalaaga mo suesuega, fai se otootoga puupuu e i ai ni mau ma manatu e mafai ona e faasoa atu e ono fesoasoani ai i lau uo. Ia mautinoa e faaaofia ai mea ua aoaoina ai oe i lenei aso e uiga i le Liliuese Tele ma le manaomia o le Toefuataiga. Taumafai e faaaoga au lava upu e faamatala ai pe aisea na tatau ai ona i ai se toefuataiga o aoaoga faavae, pule, ma le Ekalesia a le Faaola e faatoilalo ai aafiaga o le Liliuese Tele.

Mafaufau e faasoa atu lau molimau o upumoni na outou talanoaina i lenei lesona. E mafai ona e valaaulia tagata aooga e tatalo mo se avanoa e faasoa atu ai i se isi tagata mea sa latou aoaoina i le asō ma le taua o le Toefuataiga.

Punaoa Faaopoopo

O le a se mea na leiloa i le taimi o le Liliuese Tele?

Sa aoao mai Elder Robert D. Hales o le Korama a Aposetolo e Toasefululua:

Ina ua mavae le Toetu o le Faaola, sa Ia tuuina atu i Ona Aposetolo e taitaiina le Ekalesia ma faatautaia sauniga o le talalelei. O lo latou faamaoni i lenei matafaioi, sa sauaina ai i latou, ma o nisi na iu lava ina maliu fasia ai. O le taunuuga, sa lei toe i ai le pule o le perisitua a le Alii i luga o le fogaeleele, ma na pa’u atu ai le lalolagi i le pogisa faaleagaga. I seneturi na sosoo ai, sa i ai i le fanau a le Atua le Malamalama o Keriso, sa mafai ona tatalo, ma lagona ia aafiaga a le Agaga Paia. Peitai, sa aveesea le atoatoaga o le talalelei. Sa leai se tasi na totoe i le lalolagi na i ai le mana ma le pule e taitai ai le Ekalesia pe faataunuu ai sauniga paia e pei o le papatisoga, tuuina atu o le meaalofa o le Agaga Paia, ma sauniga faaola o le malumalu. (Robert D. Hales, “Sauniuniga mo le Toefuataiga ma le Afio Mai Faalua: E i Ou Luga Ai Pea Lo’u Lima,’”Liahona, Nov. 2005, 89)

Na faapefea ona saunia le Alii mo le Toefuataiga i le taimi o le Liliuese Tele?

Na aoao mai e Peresitene M. Russell Ballard o le Korama a Aposetolo e Toasefululua le ala na saunia ai le Alii mo le Toefuataiga o le talalelei:

A o tatou mafaufau i le ala na saunia ai e le Alii le lalolagi mo le Toefuataiga, e tatau ona tatou manatua pea o le tele o mea sa Ia ausiaina e ala lea i olaga o tagata taitoatasi—o alii ma tamaitai faatauvaa o e, i nisi tulaga, na ausia ni mea ofoofogia. (M Russell Ballard, “O Le Ala na Saunia ai e le Alii le Lalolagi mo le Toefuataiga,” Liahona, Ian. 2020, 19)

Ina ia aoao atili e uiga i lenei sauniuniga, mafaufau e faitau le tusigaatoa a Peresitene Ballard.

Pe na iloa e tagata i le vaitaimi o Iosefa Samita sa i ai se manaomia mo se toefuataiga?

O le vitio “A Search for Truth” (15:43) o loo faamatala ai le tala i le sailiga e Uilifoti Uitilafi o le Ekalesia a le Faaola.

Gaoioiga Faaopoopo e Aoao Ai

Vaega taua

Ina ia fesoasoani i tagata aooga ia malamalama i vaega taua o le Ekalesia a le Faaola ma le mea na leiloa i le taimi o le Liliuese Tele, mafaufau e aumai i le vasega se vaega o le masini lea e manaomia mo se masini po o se fasi meafaigaluega e galue ai (e pei o se uaea uila mai se masini po o se komepiuta, se filifili po o se uili mai se uila, po o se sipaka mai se taavale). Faaali atu i tagata aooga le vaega o le masini ma fesili i ai po o le a le mea e anaina lea vaega ae o le a foi le mea na te faia. (Afai e te le mauaina se vaega o se masini, tusi se ata i luga o le laupapa.) Mafaufau e fai atu fesili e pei o nei:

• O le a le mea e tupu pe a le i ai lenei vaega mai le masini e anaina?

• O a ni vaega taua o Le Ekalesia a Iesu Keriso o le Au Paia o Aso e Gata Ai? O le a le mea o le a tupu i le Ekalesia pe afai e le o i ai nei vaega?

Tusi le ulutala O Elemene Taua o le Ekalesia a Iesu Keriso i luga o le laupapa. Fesoasoani i tagata aooga e faailoa mai elemene taua mai tusitusiga paia, e pei o nei:

• O Aposetolo ma perofeta e fausia ai le faavae o le Ekalesia a Iesu Keriso (tagai i le Efeso 2:19–22).

• O le pule o le perisitua e tuuina mai e Iesu Keriso (tagai Mareko 3:13–14).

• I le Ekalesia a Iesu Keriso, e mafai ona tatou maua ai sauniga e tatau ai mo lo tatou faaolataga (tagai i le Ioane 3:5; Galuega 2:37–39).

• E taitai ma taiala e Iesu Keriso Lana Ekalesia e ala mai i faaaliga i Ana perofeta ma aposetolo (tagai i le Mataio 16:15–19; Efeso 4:11–13).

Vaai faalemafaufau i le lē mautonu faalelotu i le taimi o le Liliuese Tele

A o mafaufau loloto tagata aooga pe na faape’i le ola ai i le taimi o le Liliuese Tele, atonu o le a faamanuiaina i latou mai le faalogo i le aafiaga lenei:

I le sauniuniga mo le konafesi aoao a le Ekalesia ia Aperila 2020, sa vaai faalemafaufau ai Elder Jeffrey R. Holland o le Korama a Aposetolo e Toasefululua ma lona faletua, o Sister Patricia Holland, sa la soifua i le tauamataga o le 1800. Sa la’ua mafaufau loloto i le fenumia’i sa ono mafai ona la’ua lagonaina ma mea atonu sa la faamoemoe i ai faaleagaga (tagai Jeffrey R. Holland, “O Se Susulu Atoatoa o le Faamoemoe,” Liahona, Me 2020, 81–84).

Afai e maua, mafaufau e matamata i le “O Se Susulu Atoatoa o le Faamoemoe” mai le faailo taimi 0:00 i le 7:16.

Fafagaina faaleagaga mai ia Iesu Keriso ma Lana talalelei

A o lei suesueina ia fuaiupu e uiga i le Liliuese, mafaufau e faaali atu ata o se laau mate ma se laau ola. E mafai foi ona e aumaia nei mea i le vasega pe afai o maua. Valaaulia tagata aooga e talanoaina po o le a le mea ua oo ai laau i se vaaiga matua eseese lava ma pe o a talafaatusa faaleagaga e mafai ona tatou faia mai nei laau. Ia talanoaina foi pe faapefea e le nofo fesoota’i atu ia Iesu Keriso ona fesoasoani i a i tatou ia tumau i le fafagaina faaleagaga ma le maloloina. E mafai e tagata aooga ona faitau le Ioane 15:4–6 ma mafaufau pe faapefea ona fesootai aoaoga a le Faaola i le Au Paia anamua i le taimi o le Liliuese Tele.