Faaopoopoga

Iloilo Lou Aoaoina, Vaega 1

Iosefa Samita—Talafaasolopito 1; Mataupu Faavae ma Feagaiga 1–4; 8–10

O le manatunatu ma iloiloina lo tatou aoaoina faaleagaga e mafai ona fesoasoani ia tatou faalatalata atili atu ai i le Faaola. O lenei lesona e mafai ona fesoasoani ia te oe e manatua ma iloilo ai pe na faapefea ona fesoasoani ia lou suesueina o le Mataupu Faavae ma Feagaiga 1–4, 8–10 ma le Iosefa Samita—Talafaasolopito i lou tuputupu ae ai faaleagaga ma faalatalata atili atu ai ia Iesu Keriso. Vaavaai mo avanoa e faasoa atu ai nisi o au tali i isi tagata aoga po o tagata o le aiga.

Manatua: A o lei faamaeaina lenei iloiloga, ia mautinoa ua faamaeaina faitauga manaomia pe afai e te lei faia: Iosefa Samita—Talafaasolopito 1; Mataupu Faavae ma Feagaiga 1–4, 8–10.

O le a se mea ua e aoaoina? O a mai lou alualu i luma?

Faaalu ni nai minute e tusi ai i lau api faamaumau mo suesuega e uiga i le taumafaiga ua e faia e faalatalata atili atu ai i le Faaola a o e suesueina le Iosefa Samita—Talafaasolopito 1 ma le Mataupu Faavae ma Feagaiga 1–4, 8–10. E mafai ona aofia ai aoaoga faavae ma upumoni o loo e aoaoina, o auala ua faateleina ai lau molimau ia Iesu Keriso, o uiga fou o loo e fausiaina, ma auala o loo e taumafai ai e sui.

Suesue i tusitusiga paia

• Na faapefea ona fesoasoani le suesuega o tusitusiga paia i le Perofeta o Iosefa Samita?

Mafaufau i lau lava sini o le suesueina o tusitusiga paia.

• O faapefea ona aafia oe i lau taumafaiga?

• O le a se auala se tasi e te lagona ua faamanuiaina ai oe i lau suesuega o tusitusiga paia?

• O le a se tauiviga o loo e mauaina i au suesuega o tusitusiga paia?

Iloilo ou lagona e uiga i le Perofeta o Iosefa Samita (tagai i le Iosefa Samita—Talafaasolopito 1)

Tusi le tele o mea e mafai ona e mafaufau i ai ua e aoaoina e uiga i le Perofeta o Iosefa Samita i nai vaiaso ua tuanai o le seminare.

Vase lalo pe li’o soo se mea i lau lisi e faasino foi i se auala na ia fesoasoani ai ia te oe e faalatalata atili atu ai ia Iesu Keriso.

Iloilo pe o le a le malosi e te talitonu ai i mea sa e lisiina i luga o se fua o le 1 i le 5 (1=e lē talitonu ma le 5=talitonu ma le mautinoa). Atonu e te mana’o e faamaumau ni mea na feagai ma oe e fesoasoani e faateleina ai lou talitonuga faapea na valaauina e le Atua ia Iosefa Samita e avea ma se perofeta e fesoasoani ia i tatou e faalatalata atili atu ai ia Iesu Keriso.

• Afai e tauivi se tasi e talitonu na valaauina e le Atua ia Iosefa Samita e avea ma se perofeta, o le a se mea e mafai ona e fautuaina latou e faia e maua pe faamalosia ai lenei talitonuga?

Mauaina o faaaliga patino (Mataupu Faavae ma Feagaiga 8)

Filifili ni nai faamatalaga nei, ma faauma i totonu o lau api talaaga. Ia faaaofia ai soo se isi lava manatu ma uunaiga e te lagona le uunaia e faamaumau.

• O le mea aupito sili ona taua ua ou aoaoina e uiga i faaaliga mai le Tama Faalelagi o le …

• O ni nai mea sa ou taumafai talu ai nei e maua ai faaaliga e aofia ai …

• O se mea na ono aafia ai lo’u tomai e maua faaaliga o le …

• O se aafiaga sa ou oo i ai talu ai nei ou te le manao e faagalo o le …

• Ou te manao e faaauau pea ona faateleina lo’u tomai e maua ai faaaliga mai le Atua ona …

• Ina ia faateleina atili lo’u tomai e maua ai faaaliga mai le Atua, ou te tautino atu e …

Faasoa atu se mea na e faamaumauina i se tagata o le aiga, se uo, po o se tasi i lau vasega.