Faaopoopoga

Iloilo Lou Aoaoina, Vaega 2

Mataupu Faavae ma Feagaiga 76: 84; 93; 110; 121–123

O le faaaluina o le taimi e iloa ai le tuputupu ae ma le atinaega faaleagaga e mafai ona faamalosia ai o tatou sootaga ma le Tama Faalelagi ma Iesu Keriso ma uunaia ai i tatou e tumau i luga o le ala o feagaiga. E mafai ona fesoasoani lenei lesona ia te oe e iloilo ai lou tuputupu ae faaleagaga mai lau suesuega o le Mataupu Faavae ma Feagaiga 76; 84; 93; 110; 121–123. Vaavaai mo avanoa e faasoa atu ai nisi o au tali i isi tagata aoga po o tagata o le aiga.

Manatua: A o lei faamaeaina lenei iloiloga, ia mautinoa ua faamaeaina faitauga manaomia pe afai e te lei faia: Mataupu Faavae ma Feagaiga 76; 84; 93; 110; 121–123.

Talisapaiaina le tuputupu ae, ma le alualu i luma

Mafaufau i se tamoega umi pe luitauina, savaliga i a’ega, po o se tietiega uila.

• O le a se mea e mafai ona e faia e fiafia ai i le faigamalaga?

• E mafai faapefea ona tatou faatusaina lena ituaiga o malaga i le faagasologa o le avea atili e faapei o Iesu Keriso?

• O a ni auala e mafai ona tatou olioli ai ma talisapaia atili le faagasologa o le tuputupu ae faaleagaga?

• O le a sou lagona i lou alualu i luma ma le tuputupu ae ia latalata atili atu i le Alii?

• O faapefea ona fesoasoani le Alii ia te oe?

Faamatalaina o tikeri e tolu o le mamalu

Manatu faapea e i ai sau uo mamae e igoa ia Olivia e le o se tagata o le Ekalesia ae e talitonu mausali ia Iesu Keriso. I se tasi aso na ia faalatalata atu ai ia te oe ma fesili atu, “O le a se talitonuga o tagata o lau Ekalesia e uiga i le olaga pe a mavae le oti? Ua aoaoina au o le a o tagata uma i le lagi po o seoli, ae sa ou faalogo o tagata O le Ekalesia a Iesu Keriso o le Au Paia o Aso e Gata Ai e talitonu i le tele o lagi. O le a le uiga o lena mea?”

Faaalu ni nai minute e tusi ai se tali ia Olivia e faamatala ai lou malamalama ma lou iloa i tikeri e tolu o le mamalu. Afai e te manao ai, e mafai ona e faaaofia ai ni ata e fesoasoani ai ia Olivia e vaai faalemafaufau i mea o loo e faamatalaina. Saili se tasi ma faataitai le faamatala atu o lau tali ia i latou e pei o i latou o Olivia.

Faamatala matafaioi, faalagiga, ma uiga o Iesu Keriso

O se tasi o valaaulia a le Faaola i le Mataupu Faavae ma Feagaiga o le “aoao e uiga ia te [Ia], ma faalogo i [Ana] upu” (Mataupu Faavae ma Feagaiga 19:23). Sauni e faasoa atu i se isi tagata mea ua e aoaoina e uiga i matafaioi, faalagiga, po o uiga o le Faaola e ala i le faia o se tasi o gaoioiga nei:

• Tuufaatasia se lisi o nisi o matafaioi, faalagiga, po o uiga o Iesu Keriso ia na e suesueina talu ai nei i le Mataupu Faavae ma Feagaiga 76:1–7, 22–24; 93:1–10. Ona filifili lea o se tasi pe sili atu o i latou ma tali i fesili nei: (1) O le a se mea o aoao mai e lenei igoa, faalagiga, po o uiga ia te oe e faatatau ia Iesu Keriso? (2) O le a se mea ua fesoasoani lenei igoa, faalagiga po o uiga e te malamalama ai e uiga i le auala e mafai ona Ia fesoasoani ai ia te oe?

• Fatu se faatusa vaaia o se tasi po o le tele o matafaioi, faalagiga po o uiga e sili ona e fiafia i ai o Iesu Keriso. E mafai ona avea lenei mea ma se ao po o se ata. Ia aofia ai mau faasino talafeagai o se vaega o lou foafoaga.

• Tusi se solo po o ni upu o pese e aofia ai nisi o matafaioi, faalagiga po o uiga e te fiafia i ai o Iesu Keriso.

• Vaai faalemafaufau e faapea, sa e maua le avanoa e aoao ai se tasi o uiga po o ai Iesu Keriso ma le mea e mafai ona Ia faia mo i tatou. Tusi se faamatalaga ia le itiiti ifo ma le tasi se parakalafa umi e aofia ai le le itiiti ifo ma le tolu o matafaioi, faalagiga po o uiga o Keriso.

Faasoa atu le mea na e filifili e fai i se tagata o le aiga, se uo, po o se tasi o lau vasega.

Saunia e tapuai i le Alii i totonu o le malumalu

I le Mataupu Faavae ma Feagaiga 110:5–10, atonu ua e matauina le auala e mafai ai e le agavaa ona fesoasoani ia i tatou e lagona ai le latalata atu i le Alii i Lona malumalu.

Saili faaaliga faaletagata lava ia e taiala ai oe a o e taliina se tasi pe sili atu o fesili nei i lau api talaaga mo suesuega:

• O a ni osigataulaga ua e faia pe ua e naunau e fai e faamuamua ai le tapuai atu i le Alii i le malumalu?

• O a faamanuiaga ua e mauaina a o e mafaufau i fesili o pepa faataga o le malumalu?

• O le a se mea ua e faia e taumafai ai ia agavaa e tapuai i le Alii i totonu o le malumalu?

Mafaufau i auala na faamanuiaina ai oe mo au taumafaiga. O le a se mea o le a faaauau pea ona e faia pe amata ona faia ina ia saunia lelei ai e tapuai i Lona malumalu?

Lagona le faateleina o le talitonu i le Atua i taimi o tofotofoga

Mai le Mataupu Faavae ma Feagaiga 121–122 e mafai ona tatou aoaoina upumoni taua e uiga i tofotofoga.

• O le a se mea ua e aoaoina mai nei vaega e uiga i tofotofoga?

• Pe na fesoasoani nei upumoni ia te oe e ese ai ou lagona e uiga i ou tofotofoga? E faapefea?

• O le a se mea ua e aoaoina e uiga i le Tama Faalelagi ma Iesu Keriso ao e i ai i taimi faigata?

Tusi i lau api talaaga ou lagona e uiga i le ala na lagolagoina ai oe e le Tama Faalelagi ma Iesu Keriso i ou tofotofoga. Mafaufau pe na faapefea ona aafia lou faatuatua ia Iesu Keriso ona o mea sa e aoaoina ma oo i ai.